Конда́к 1.

Избра́нный от Царя́ си́л Го́спода Иису́са, и от ю́ности твоея́ призва́нный во и́ночество, о́бщаго в Росси́и жития́ первонача́льниче и вели́кий чудотво́рче, преподо́бне о́тче на́ш Феодо́сие, умоли́ Го́спода Бо́га от вся́ких бе́д и грехо́вных страсте́й изба́вити ны́, зову́щия ти́:

Ра́дуйся, Феодо́сие, и́ноческаго уста́ва в Росси́и учреди́телю.

И́кос 1.

А́нгел земны́й, и челове́к небе́сный бы́л еси́, преподо́бне о́тче Феодо́сие, и, я́ко звезда́ у́тренняя, возсия́л еси́ на тве́рди Росси́йския Це́ркве, прогоня́я вся́ку тму́ грехо́вную светоза́рным твои́м житие́м и уче́нием, и приводя́ к све́ту Христо́ву мно́гия лю́ди. Те́мже приими́ от на́с благохвале́ния сицева́я:

Ра́дуйся, гра́да Васи́льева свято́е порожде́ние; ра́дуйся, гра́да Ку́рска до́брое воспита́ние.

Ра́дуйся, от млады́х ле́т Христа́ премно́го возлюби́вый; ра́дуйся, Его́ ра́ди у́же желе́зное на те́ле твое́м в ю́ности носи́вый.

Ра́дуйся, усе́рдно примета́выйся ко хра́му Госпо́дню; ра́дуйся, служи́вый Це́ркви Бо́жией от трудо́в твои́х пра́ведных.

Ра́дуйся, сиро́тствовавый от отца́ плотска́го, и в сыновство́ причте́нный Отцу́ Небе́сному; ра́дуйся, мно́гия ско́рби и бие́ния от ма́тере твоея́, любве́ ра́ди Бо́жией претерпе́вый.

Ра́дуйся, му́ченик самопроизво́лен бы́вый; ра́дуйся, све́тлость са́на вре́меннаго ни во что́же вмени́вый.

Ра́дуйся, рука́ма твои́ма хле́бы предложе́ния для олтаря́ Госпо́дня уготовля́вый; ра́дуйся, ду́шу твою́ в хле́б чи́стый, Пресвяте́й Тро́ице принесы́й.

Ра́дуйся, Феодо́сие, и́ноческаго уста́ва в Росси́и учреди́телю.

Конда́к 2.

Ви́девши ма́терь твоя́, о́тче Феодо́сие, я́ко презира́л еси́ вся́ до́льная, и о го́рних вы́ну помышля́л еси́ в ю́ности твое́й, гне́вашеся на тя́ зело́, и тща́шеся тя́ от служе́ния Го́сподеви отврати́ти, о́во моле́нием, о́во преще́нием и ра́нами: оба́че ничто́же успе́, укрепля́ющу тя́ Го́споду, Его́же ра́ди бие́ния и поноше́ния от ма́тере твоея́ ра́достно терпе́л еси́, и Ему́же во дни́ и в нощи́ воспева́л еси́ а́нгельскую пе́снь: Аллилу́иа.

И́кос 2.

Разуме́в до́бре, я́ко в суете́ ми́ра живя́, неудо́бно обрести́ спасе́ние, преподо́бне о́тче Феодо́сие, во гра́д Иерусали́м удали́тися возжеле́л еси́, да покло́нишися та́мо гро́бу Госпо́дню, и по́двиги духо́вными дости́гнеши Иерусали́ма небе́снаго; оба́че воспяще́н от ма́тере твоея́, па́ки во гра́де оте́чествия твоего́ обита́ти принужде́н бы́л еси́. Помина́я такову́ю твою́ ре́вность о спасе́нии душе́внем, вопие́м ти́:

Ра́дуйся, па́че роди́вшия тя́ пло́тию, Го́спода возлюби́вый; ра́дуйся, ма́тернею любо́вию неуловле́н пребы́вый.

Ра́дуйся, служи́ти ми́ру отреки́йся; ра́дуйся, рабо́тати Еди́ному Бо́гу возжеле́вый.

Ра́дуйся, ри́зы ни́щетныя носи́вый; ра́дуйся, в просфоропече́нии неле́ностно труди́выйся.

Ра́дуйся, в хра́м Бо́жий на моли́тву усе́рдно приходи́вый; ра́дуйся, моли́тву непреста́нную возлюби́вый.

Ра́дуйся, в ми́ре не любя́ мирска́го пожи́вый; ра́дуйся, я́ко а́нгел Бо́жий в дому́ ма́тере твоея́ пребыва́вый.

Ра́дуйся, ко Го́споду о́чи се́рдца твоего́ возводи́вый; ра́дуйся, свободи́ти тя́ пле́на грехо́внаго Бо́га усе́рдно проси́вый.

Ра́дуйся, Феодо́сие, и́ноческаго уста́ва в Росси́и учреди́телю.

Конда́к 3.

Си́ла Бо́жия укрепи́ тя, о́тче Феодо́сие, на по́двиги духо́вныя, и Бо́гу помога́ющу ти́, изше́л еси́ та́йно от до́ма ма́тере твоея́, и прите́кл еси́ к до́брому па́стырю, преподо́бному Анто́нию, во гра́де Ки́еве в пеще́ре обита́вшему, умоля́я его́, да причте́т тя́ к слове́сному своему́ ста́ду. То́йже прови́дев душе́вную твою́ добро́ту, прия́т тя́ с любо́вию, и повеле́ преподо́бному Ни́кону облещи́ тя во святы́й а́нгельский о́браз, да пое́ши с ни́ми Бо́гу: Аллилу́иа.

И́кос 3.

Име́я любо́вь ве́лию ко Христу́, преподо́бне о́тче, любо́вию о Христе́ прилепи́лся еси́ к преподо́бному Анто́нию, и взира́я на свято́е и богоуго́дное житие́ его́ в пеще́ре, тща́лся еси́ во все́м ему́ подража́ти, и вся́ словеса́ его́ слага́л еси́ в се́рдце твое́м. Сего́ ра́ди ублажа́ем тя́ зва́нии си́ми:

Ра́дуйся, гра́д оте́честия твоего́ и до́м ма́тере твоея́, Христа́ ра́ди оста́вивый; ра́дуйся, в пу́ть душеспаси́тельный ра́достно потеки́й.

Ра́дуйся, во гра́де Ки́еве па́жить духо́вную обреты́й; ра́дуйся, в пеще́ре преподо́бнаго Анто́ния приста́нище спасе́ния получи́вый.

Ра́дуйся, во а́нгельский чи́н рука́ма преподо́бнаго Ни́кона облече́нный; ра́дуйся, с постриже́нием власо́в главы́ твоея́, все́ плотско́е мудрова́ние соверше́нно отложи́вый.

Ра́дуйся, в ри́зу смире́ния оде́янный; ра́дуйся, в санда́лии послуша́ния обуве́нный.

Ра́дуйся, ку́коль незло́бия на ся́ возложи́вый; ра́дуйся, анала́в Бо́жия зашище́ния восприя́вый.

Ра́дуйся, ме́чь духо́вный в руце́ твое́й вы́ну име́вый; ра́дуйся, и́менем Иису́совым враги́ неви́димыя отража́вый.

Ра́дуйся, Феодо́сие, и́ноческаго уста́ва в Росси́и учреди́телю.

Конда́к 4.

Бу́ри жите́йския избежа́в, о́тче преподо́бне, в благооти́шии пеще́рнем богоуго́дно подвиза́лся еси́, преподо́бным Анто́нием наставля́емь на вся́ку доброде́тель, ма́тере же твоея́ пла́чем не умоле́н бы́л еси́ в ми́р возврати́тися, но моли́твою твое́ю ко Го́споду, и ма́терь твою́ ко и́ночеству приве́л еси́, зовы́й Бо́гу, умягчи́вшему се́рдце ея́: Аллилу́иа.

И́кос 4.

Слы́шав поуче́ния душеспаси́тельная преподо́бнаго Анто́ния, о́тче Феодо́сие, благогове́йно внима́л еси́ его́ глаго́лом и са́мым де́лом исполня́л еси́ того́ словеса́, я́же ко спасе́нию и благоугожде́нию приведо́ша тя́, и бы́л еси́ благи́й учени́к блага́го учи́теля, досто́йный вои́стинну ублаже́ний таковы́х:

Ра́дуйся, во смире́нии преуспе́вый; ра́дуйся, в моли́твах во дни́ и в нощи́ пребыва́вый.

Ра́дуйся, послуша́ния зерца́ло; ра́дуйся, трудолю́бия пра́вило.

Ра́дуйся, по́двиги духо́вными пло́ть твою́ ду́ху покори́вый; ра́дуйся, но́щи без сна́ провожда́вый.

Ра́дуйся, рука́ма твои́ма во́лну пря́вый; ра́дуйся, уста́ми твои́ми псалмы́ воспева́вый.

Ра́дуйся, в це́рковь Бо́жию пре́жде все́х на моли́тву приходи́вый; ра́дуйся, неподви́жно и благоумиле́нно в не́й стоя́вый.

Ра́дуйся, тяготы́ бра́тий твои́х любвеоби́льно носи́вый; ра́дуйся, труды́ рукоде́лий за ни́х исполня́вый.

Ра́дуйся, Феодо́сие, и́ноческаго уста́ва в Росси́и учреди́телю.

Конда́к 5.

Боготе́чно ше́ствовал еси́ от си́лы в си́лу, преподо́бне о́тче, и я́ко досто́йный сосу́д Бо́жия благода́ти, во иере́я освяще́н бы́л еси́, и игу́меном поста́влен бы́л еси́ пеще́рней бра́тии, избра́нием тоя́, и благослове́нием преподо́бнаго Анто́ния, с ни́мже вку́пе ре́вностно подвиза́лся еси́ о спасе́нии ду́ш челове́ческих, и ны́не сла́дце пое́ши в го́рних оби́телех Триипоста́сному Бо́гу: Аллилу́иа.

И́кос 5.

Ви́дим тя́, преподо́бне о́тче на́ш Феодо́сие, ре́вностно труди́вшагося в созида́нии оби́тели Пече́рския, и уста́в о́бщаго жития́ в не́й утверди́вшаго богому́дренно, и́же бы́сть пото́м о́браз все́м о́бщаго жития́ оби́телем росси́йским, те́мже киновиа́рх росси́йский имену́ешися от ве́рных, зову́щих ти́:

Ра́дуйся, преподо́бне, богому́дрием высо́ким преиспо́лненный; ра́дуйся, богоно́сне, да́ры Ду́ха Свята́го преукра́шенный.

Ра́дуйся, царя́ псалмопе́вца словеса́ о купножи́тии бра́тском возлюби́вый; ра́дуйся, общежи́тельный уста́в в оби́тели Пече́рстей учреди́вый.

Ра́дуйся, пе́рвый основа́телю кинови́й росси́йских; ра́дуйся, вели́кий ревни́телю и́ноческаго о́бщаго жития́.

Ра́дуйся, вся́ о́бща име́ти бра́тии законоположи́вый; ра́дуйся, общежи́тельная пра́вила са́м во все́м ве́рно исполня́вый.

Ра́дуйся, во́ду нося́й, и дрова́ секи́й в твое́м настоя́тельстве; ра́дуйся, трудолю́бию поуча́вый приме́ром твои́м всю́ бра́тию.

Ра́дуйся, ни́щия пита́вый, и стра́нники упокоева́вый; ра́дуйся, странноприи́мницу и больни́цу в оби́тели твое́й устро́ивый.

Ра́дуйся, Феодо́сие, и́ноческаго уста́ва в Росси́и учреди́телю.

Конда́к 6.

Пропове́дник боговеща́нный бы́л еси́, о́тче Феодо́сие, не то́кмо и́ноком, но и лю́дем мирски́м, князе́м и боля́ром, и все́х поуча́л еси́ неле́ностно доброде́телем христиа́нским, братолю́бию, кро́тости, воздержа́нию и чистоте́. Мо́лим тя́, преподо́бне, предста́тельством твои́м небе́сным испроси́ и на́м си́и боголюбе́зныя доброде́тели, да не порабо́тимся страсте́м грехо́вным, но благоче́стно да пое́м Бо́гу, Спаси́телю на́шему: Аллилу́иа.

И́кос 6.

Возсия́л еси́ я́ко звезда́ богосве́тлая в стране́ Росси́йстей, преподо́бне о́тче, и мно́гия челове́ки приве́л еси́ в огра́ду небе́сную уче́нием твои́м святы́м: ты́ бо не то́кмо учи́л еси́, но и твори́л еси́ вся́ку доброде́тель, непогреши́тельно исполня́я вся́ за́поведи Христа́ Бо́га. Те́мже я́ко сотвори́вшаго, и научи́вшаго, восхваля́ем тя́ си́це:

Ра́дуйся, све́тлостию жития́ твоего́ сия́вый ми́ру; ра́дуйся, уче́ньми твои́ми назида́вый во спасе́ние мно́гия челове́ки.

Ра́дуйся, па́стырю до́брый, чу́ждый лицеприя́тия; ра́дуйся, наста́вниче богому́дрый, преиспо́лненный любве́ ко все́м бли́жним.

Ра́дуйся, си́льным ми́ра пра́вду Бо́жию небоя́зненно возвеща́вый; ра́дуйся, князе́м и вельмо́жам ко благоче́стию сове́тник бы́вый.

Ра́дуйся, неве́рныя иуде́и уве́ровати во Христа́ увещава́вый; ра́дуйся, ми́лостыню мно́гу ни́щей бра́тии подава́вый.

Ра́дуйся, с пла́кавшими пла́кавый; ра́дуйся, скорбя́щия утеша́вый.

Ра́дуйся, вдо́в и сиро́т засту́пниче; ра́дуйся, оби́димых и гони́мых защи́тниче.

Ра́дуйся, Феодо́сие, и́ноческаго уста́ва в Росси́и учреди́телю.

Конда́к 7.

Хотя́ Госпо́дь яви́ти лю́дем, я́ко оби́тель Пече́рская, тобо́ю управля́емая, преподо́бне о́тче Феодо́сие, храни́ма е́сть Его́ благода́тию Боже́ственною, све́т пречу́ден в нощи́ над не́ю возсия́, тате́м же окра́сти це́рковь в не́й хоте́вшим, це́рковь ту́ от земли́ на возду́х вознесе́нную ди́вно показа́, и пе́ние а́нгельское в не́й слы́шано бы́ти сотвори́: да вси́ уве́дят, я́ко вели́к еси́ уго́дник Бо́жий, и я́ко мно́го мо́жет моли́тва твоя́ ко Го́споду, Ему́же воспева́л еси́: Аллилу́иа.

И́кос 7.

Но́ваго тя́ Феодо́сия киновиа́рха яви́ Госпо́дь в стране́ Росси́йстей, преподо́бне о́тче, и тобо́ю просла́ви Ла́вру Пече́рскую, ма́терь оби́телей ру́сских, в не́йже от ле́т дре́вних подви́жничество и́ноческое процвете́, и мно́зи преподо́бнии Бо́гу благоугоди́ша, посреде́ ки́их ты́, я́ко луна́ по́лная, све́том доброде́телей и чуде́с твои́х немерца́емо сия́еши, и все́х подвиза́еши зва́ти тебе́:

Ра́дуйся, ангелонра́вный челове́че; ра́дуйся, ди́вный о Го́споде подви́жниче.

Ра́дуйся, вели́кий чудотво́рче; ра́дуйся, благомо́щный моли́твенниче.

Ра́дуйся, зла́то та́инственно от а́нгела получи́вый; ра́дуйся, те́м зла́том бра́шно гла́дной бра́тии твое́й купи́вый.

Ра́дуйся, оскуде́ние вина́ и еле́я в оби́тели твое́й чуде́сно воспо́лнивый; ра́дуйся, пра́здную жи́тницу по́лну муко́ю яви́вый.

Ра́дуйся, то́щий сосу́д ме́да преизлива́ющимся показа́вый; ра́дуйся, чудеса́ пресла́вна в житии́ твое́м соверши́вый.

Ра́дуйся, Бо́га просла́вивый по́двиги твои́ми; ра́дуйся, Бо́гом просла́вленный благода́тными да́ры.

Ра́дуйся, Феодо́сие, и́ноческаго уста́ва в Росси́и учреди́телю.

Конда́к 8.

Странноприи́мство Авраа́мле возлюби́л еси́, о́тче Феодо́сие, в темни́це заключе́нным хле́бы посыла́л еси́ любвеоби́льно, помина́я словеса́ Христо́ва, я́ко в лице́ стра́нных, и в темни́це седя́щих, са́м Христо́с благотворе́ния прие́млет. Научи́ и на́с, уго́дниче Бо́жий, тебе́ в се́м подража́ти, и ми́лостынею Бо́гу угожда́ти, да возмо́жем благоприя́тно пе́ти Ему́: Аллилу́иа.

И́кос 8.

Ве́сь на служе́ние Бо́гу и бли́жним твои́м себе́ вда́л еси́, Феодо́сие о́тче на́ш, и до́бре па́сл еси́ Бо́гом вруче́нное тебе́ слове́сное ста́до, немощны́я укрепля́я, па́дшия возставля́я, до́бре стоя́щия охраня́я, и бдя́ на стра́же моли́венней, да не похи́тит вра́г неви́димый еди́ну от твои́х ове́ц. О се́м тя́ хва́лим и зове́м:

Ра́дуйся, ве́лию вла́сть на ду́хи нечи́стыя от Го́спода получи́вый; ра́дуйся, хра́мину стужа́емую привиде́нии диа́вольскими моли́твою твое́ю очи́стивый.

Ра́дуйся, мно́гия беснова́тыя, от мучи́тельства де́монскаго свободи́вый; ра́дуйся, вся́ привиде́ния и искуше́ния сатани́нская победи́вый.

Ра́дуйся, ученики́ твоя́ от се́тей неви́димаго врага́ моли́твою твое́ю соблюда́вый; ра́дуйся, искуше́нный на мно́зе, искуша́емым помога́вый.

Ра́дуйся, челове́че Бо́жий, гра́ды и ве́си испо́лнивый сла́вою твои́х по́двигов; ра́дуйся, нестяжа́ния рачи́телю, никогда́же помышля́вый о потре́бах гряду́щаго дне́.

Ра́дуйся, ве́рою кре́пкою на Бо́га упова́вый; ра́дуйся, по ве́ре твое́й вся́ ну́жная от Бо́га изоби́льно получи́вый.

Ра́дуйся, благодаре́ние Го́сподеви вы́ну о все́х даре́х Его́ возноси́вый; ра́дуйся, от малоду́шнаго ро́пота бра́тию твою́ бо́дренно охраня́вый.

Ра́дуйся, Феодо́сие, и́ноческаго уста́ва в Росси́и учреди́телю.

Конда́к 9.

Все́м, тре́бующим по́мощи твоея́, усе́рдно благотвори́л еси́, преподо́бне о́тче, и зело́ милосе́рдствовал еси́ о ни́щих и убо́гих, я́ко бы́ти тебе́ вои́стинну о́ком слепы́х, ного́ю хромы́х, руко́ю безпомо́щных, и никто́же отхожда́ше от лица́ твоего́ неуте́шенным. При́зри и на на́с, уго́дниче Бо́жий, благосе́рдием твои́м, и от ра́н грехо́вных исцеле́ние на́м пода́ждь моли́твами твои́ми, да благода́рственно пое́м Бо́гу: Аллилу́иа.

И́кос 9.

Вети́и суему́дренныя посрами́шася житие́м твои́м, Феодо́сие богому́дре, глаго́лющия бу́йство бы́ти подви́жничество духо́вное: се́ бо ви́дим тя́ во пло́ти небеснопожи́вшаго, и а́нгельския нра́вы на земли́ стяжа́вшаго. Те́мже чудя́щеся твое́й ангелоподо́бней свя́тости, ублажа́ем тя́ благохвале́нии си́ми:

Ра́дуйся, звездо́ у́тренняя, тму́ нече́стия в стране́ Росси́йстей разгна́вшая; ра́дуйся, забра́ло кре́пкое от вра́г ви́димых и неви́димых.

Ра́дуйся, сто́лпе утвержде́ния святы́я Правосла́вныя ве́ры; ра́дуйся, боголе́пное украше́ние Христо́вы Це́ркве.

Ра́дуйся, оте́чествия твоего́ земна́го покрови́телю небе́сный; ра́дуйся, пути́ спаси́тельнаго указа́телю неле́стный.

Ра́дуйся, воево́до изря́дный полка́ во́инов духо́вных; ра́дуйся, ратобо́рче до́блий, победи́вый де́монския полки́.

Ра́дуйся, обще́ния удосто́ивыйся со а́нгелы; ра́дуйся, Христу́ усе́рдно благоугожда́вый.

Ра́дуйся, милосе́рдия Христо́ва подража́телю; ра́дуйся, даро́в духо́вных добре́йший пода́телю.

Ра́дуйся, Феодо́сие, и́ноческаго уста́ва в Росси́и учреди́телю.

Конда́к 10.

Спаси́тельное приста́нище и хра́м Го́спода сла́вы, Вели́кую, небеси́ подо́бную, це́рковь Пече́рскую, по мно́зех зна́мениих и чудесе́х основа́л еси́, преподо́бне о́тче Феодо́сие, и са́м рука́ма твои́ма помога́л еси́ каменозда́телем ея́, вы́ну моля́ся ко Го́споду и Пресвяте́й Богоро́дице: «да бу́дет сия́ це́рковь изря́дное жили́ще Бо́жия благода́ти, и да услы́шит Госпо́дь моли́твы люде́й Свои́х», с ве́рою вопию́щих Ему́: Аллилу́иа.

И́кос 10.

Царя́ Небе́снаго Христа́, ве́рный ра́б бы́л еси́ Феодо́сие богоно́сне, и Цари́це Небе́сней, в виде́нии ди́внем во Влахе́рнстей це́ркви та́инственно предстоя́л еси́, вку́пе с преподо́бным Анто́нием, егда́ Она́ каменозда́тели в Ки́ев посыла́ше созида́ти Вели́кую Пече́рскую це́рковь, и боже́ственную ико́ну Своего́ Успе́ния и́м подаде́, в благослове́ние всегда́шнее твоея́ оби́тели, в не́йже почита́ешися зва́нии си́ми:

Ра́дуйся, зда́телю Вели́кия Пече́рския це́ркве; ра́дуйся, основа́вый ю́ на ме́сте, освяще́ннем мно́гими чудесы́.

Ра́дуйся, слеза́ми моли́твенными основа́ние ея́ ороси́вый; ра́дуйся, рука́ма твои́ма краеуго́льныя ка́мни ея́ положи́вый.

Ра́дуйся, изря́дный слуго́ Бо́жия Ма́тере; ра́дуйся, ди́вную ико́ну Ея́ Успе́ния ра́достно прия́вый.

Ра́дуйся, ико́ну сию́ благода́тную, с че́стию вели́кою в оби́тели твое́й поста́вивый; ра́дуйся, моли́твы усе́рдныя пред не́ю приноси́вый.

Ра́дуйся, благоволе́нием Богома́тере осене́нный; ра́дуйся, открове́ний Боже́ственных от Нея́ удосто́енный.

Ра́дуйся, избра́нниче Сы́на Ея́ Христа́ Бо́га; ра́дуйся, таи́нниче Пресвяты́я Тро́ицы.

Ра́дуйся, Феодо́сие, и́ноческаго уста́ва в Росси́и учреди́телю.

Конда́к 11.

Пе́ние немо́лчное приноси́л еси́ в Трие́х Ли́цех Еди́ному Бо́гу, преподо́бне о́тче Феодо́сие, и до конца́ твоего́ не престава́л еси́ моли́твенно славосло́вити Го́спода, и та́ко в моли́тве усе́рдней преда́л еси́ в ру́це Его́ ду́шу твою́, ю́же а́нгели святи́и со сла́вою вознесо́ша в оби́тели го́рния, иде́же водвори́лся еси́ со уго́дники Бо́жиими, и ра́достно пое́ши а́нгелов и челове́ков Творцу́: Аллилу́иа.

И́кос 11.

Све́том небе́сным озари́ся лице́ твое́, преподо́бне о́тче, блаже́нно почи́л еси́ сно́м сме́рти, и со слеза́ми мно́гими провожда́емь бы́л еси́ ко гро́бу от твои́х бра́тий и ча́д, пла́кавших и рыда́вших о твое́м с ни́ми разлуче́нии. Мы́ же, а́ки надгро́бную пе́снь, прино́сим ти́ благохвале́ния такова́я:

Ра́дуйся, пра́ведно и богоуго́дно тече́ние земно́е соверши́вый; ра́дуйся, вене́ц нетле́ния от руки́ Христо́вы получи́вый.

Ра́дуйся, я́ко па́мять твоя́ с похвала́ми во святе́й Це́ркви почита́ется; ра́дуйся, я́ко успе́ние твое́ от ве́рных све́тло торжеству́ется.

Ра́дуйся, сме́рть вкуси́вый, но тле́ния не позна́вый; ра́дуйся, све́тлостию лица́ твоего́ сла́ву твою́ небе́сную прояви́вый.

Ра́дуйся, в пеще́ре со слеза́ми мно́гими от бра́тии твоея́ погребе́нный; ра́дуйся, по осмина́десяти ле́тех нетле́нен та́можде обре́тенный.

Ра́дуйся, в Вели́кую Пече́рскую це́рковь со сла́вою пренесе́нный; ра́дуйся, све́том небе́сным в пренесе́нии моще́й твои́х ди́вно возсия́вый.

Ра́дуйся, три́ дуги́ светоза́рныя от пеще́ры к Вели́цей Пече́рстей це́ркви протяже́нныя показа́вый; ра́дуйся, благоуха́ние ди́вное от моще́й твои́х испусти́вый.

Ра́дуйся, Феодо́сие, и́ноческаго уста́ва в Росси́и учреди́телю.

Конда́к 12.

Благода́ти Бо́жией прича́стна показа́ся свяще́нная ра́ка моще́й твои́х, преподо́бне о́тче на́ш Феодо́сие: исцеле́ния бо неду́жным источа́ет, и вся́ку я́зю в лю́дех врачу́ет, и́же с ве́рою и любо́вию к не́й притека́ют, моли́твенно призыва́я твое́ свято́е и́мя. Те́мже покланя́емся ме́сту посме́ртнаго твоего́ поко́я, и лобыза́юще на не́м святоле́пное изображе́ние лица́ твоего́, хвале́бно вопие́м Бо́гу, Ди́вному во святы́х Свои́х: Аллилу́иа.

И́кос 12.

Пою́ще по́двиги и чудеса́ твоя́, преподо́бне о́тче Феодо́сие, мо́лимтися приле́жно: моли́ся с на́ми и о на́с к Всеми́лостивому и Человеколю́бцу Бо́гу, да не оскуде́ет в на́с ве́ра святооте́ческая, в не́йже преуспе́л еси́ духо́вно, но да бу́дем и мы́ подража́тели тебе́ в пра́вой ве́ре и до́брых де́лех, и та́ко возмо́жем неосужде́нно вопи́ти тебе́:

Ра́дуйся, пречу́дное украше́ние святы́я Вели́кия, небеси́ подо́бныя, Пече́рския це́ркве; ра́дуйся, хра́м Богома́тере удобри́вый пресла́вными твои́ми чудесы́.

Ра́дуйся, гро́б тво́й святы́й зла́том и сребро́м чудотво́рно украси́вый; ра́дуйся, исцеле́ний мно́жество от него́ источи́вый.

Ра́дуйся, боля́щих цели́телю; ра́дуйся, скорбя́щих уте́шителю.

Ра́дуйся, бе́дствующим на по́мощь ускоря́яй; ра́дуйся, все́м, чту́щим тя́, заступле́ние да́руяй.

Ра́дуйся, в ча́с сме́ртный все́м на́м благонаде́жный помо́щниче; ра́дуйся, от наси́лия диа́вольскаго многомо́щный на́м защи́тниче.

Ра́дуйся, Ла́вры Пече́рския кре́пкое огражде́ние; ра́дуйся, по Бо́зе и Богоро́дице непосты́дное на́ше упова́ние.

Ра́дуйся, Феодо́сие, и́ноческаго уста́ва в Росси́и учреди́телю.

Конда́к 13.

О, вели́кий чудотво́рче! Услы́ши ми́лостиво сие́ ма́лое моле́ние на́ше, в похвалу́ тебе́ приноси́мое с ве́рою и любо́вию, и помоли́ся ко Го́споду Бо́гу, да изба́вит на́с от все́х бе́д и зо́л, и муче́ний ве́чных, и сподо́бит вку́пе с тобо́ю во Ца́рствии небе́снем пе́ти Ему́: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгел земны́й, и челове́к небе́сный бы́л еси́, преподо́бне о́тче Феодо́сие, и, я́ко звезда́ у́тренняя, возсия́л еси́ на тве́рди Росси́йския Це́ркве, прогоня́я вся́ку тму́ грехо́вную светоза́рным твои́м житие́м и уче́нием, и приводя́ к све́ту Христо́ву мно́гия лю́ди. Те́мже приими́ от на́с благохвале́ния сицева́я:

Ра́дуйся, гра́да Васи́льева свято́е порожде́ние; ра́дуйся, гра́да Ку́рска до́брое воспита́ние.

Ра́дуйся, от млады́х ле́т Христа́ премно́го возлюби́вый; ра́дуйся, Его́ ра́ди у́же желе́зное на те́ле твое́м в ю́ности носи́вый.

Ра́дуйся, усе́рдно примета́выйся ко хра́му Госпо́дню; ра́дуйся, служи́вый Це́ркви Бо́жией от трудо́в твои́х пра́ведных.

Ра́дуйся, сиро́тствовавый от отца́ плотска́го, и в сыновство́ причте́нный Отцу́ Небе́сному; ра́дуйся, мно́гия ско́рби и бие́ния от ма́тере твоея́, любве́ ра́ди Бо́жией претерпе́вый.

Ра́дуйся, му́ченик самопроизво́лен бы́вый; ра́дуйся, све́тлость са́на вре́меннаго ни во что́же вмени́вый.

Ра́дуйся, рука́ма твои́ма хле́бы предложе́ния для олтаря́ Госпо́дня уготовля́вый; ра́дуйся, ду́шу твою́ в хле́б чи́стый, Пресвяте́й Тро́ице принесы́й.

Ра́дуйся, Феодо́сие, и́ноческаго уста́ва в Росси́и учреди́телю.

Конда́к 1.

Избра́нный от Царя́ си́л Го́спода Иису́са, и от ю́ности твоея́ призва́нный во и́ночество, о́бщаго в Росси́и жития́ первонача́льниче и вели́кий чудотво́рче, преподо́бне о́тче на́ш Феодо́сие, умоли́ Го́спода Бо́га от вся́ких бе́д и грехо́вных страсте́й изба́вити ны́, зову́щия ти́:

Ра́дуйся, Феодо́сие, и́ноческаго уста́ва в Росси́и учреди́телю.

Моли́тва.

О, свяще́нная главо́, а́нгеле земны́й и челове́че небе́сный, преподо́бне и богоно́сне о́тче на́ш Феодо́сие, изря́дный слуго́ Пресвяты́я Богоро́дицы, во и́мя Ея́ свято́е оби́тель пречу́дну на гора́х Пече́рских сооруди́вый, и в не́й чуде́с мно́жеством просия́вый! Мо́лим тя́ со усе́рдием мно́гим, моли́ся за на́с ко Го́споду Бо́гу, и испроси́ от Него́ вели́кия и бога́тыя ми́лости: ве́ру пра́ву, наде́жду спасе́ния несомне́нну, любо́вь ко все́м нелицеме́рну, благоче́стие непоколеби́мое, ду́ш и теле́с здра́вие, жите́йских потре́б дово́льство, и да не во зло́ обрати́м блага́я, да́руемая на́м от щедрода́тельныя Его́ десни́цы, но в сла́ву и́мени Его́ свята́го, и во спасе́ние на́ше. Сохрани́, уго́дниче Бо́жий, предста́тельством твои́м святы́м и умоли́: стра́ждущую страну́ Росси́йскую от лю́тых безбо́жник и вла́сти и́х Госпо́дь да свободи́т, и да возста́вит престо́л правосла́вных царе́й; ве́рных рабо́в Его́, в ско́рби и печа́ли де́нь и но́щь вопию́щих к Нему́, многоболе́зный во́пль да услы́шит и да изведе́т от поги́бели живо́т на́ш. Соблюди́, преподо́бне чудотво́рче, оте́чество твое́ земно́е, страну́ Правосла́вно-Росси́йскую, ца́рствующия гра́ды ея́, гра́д тво́й, и Ла́вру твою́ невреди́мы от вся́каго зла́, и вся́ лю́ди притека́ющия на поклоне́ние к честно́му твоему́ гро́бу, и пребыва́ющия во святе́й оби́тели твое́й, осени́ небе́сным твои́м благослове́нием, и от вся́ких зо́л и бе́д ми́лостивно изба́ви. Наипа́че же в ча́с кончи́ны на́шея покажи́ на́м многомо́щное твое́ покрови́тельство, да изба́вимся моли́твами твои́ми ко Го́споду, вла́сти лю́таго мироде́ржца, и сподо́бимся насле́дити Ца́рство небе́сное. Яви́ на́м, о́тче, благосе́рдие твое́, и не оста́ви на́с, си́рых и безпомо́щных, да вы́ну славосло́вим Ди́внаго во святы́х Свои́х Бо́га, Отца́ и Сы́на и Свята́го Ду́ха, и твое́ свято́е заступле́ние, во ве́ки веко́в. Ами́нь.