Конда́к 1.

Избра́нный от князе́й Росси́йских на по́двиг му́ченический и убие́нный от язы́к безбо́жных, боголю́бный уго́дниче Христо́в, страстоте́рпче кня́же Рома́не! Восхваля́ем ве́лие терпе́ние твое́ и за ве́ру Христо́ву тве́рдое стоя́ние. Ты́ же, я́ко име́яй дерзнове́ние ко Го́споду, не преста́й моли́ти о на́с Царя́ Небе́снаго, да вы́ну тебе́ взыва́ем:

Ра́дуйся, благове́рный кня́же Рома́не, святы́й му́чениче и преди́вный чудотво́рче!

И́кос 1.

А́нгельское твое́ незло́бие и се́рдца кро́тость мно́гия лю́дие земли́ твоея́ к ти́ привлеко́ша. Ты́ бо, я́ко до́брый виногра́дарь, непреста́нная попече́ния о стране́ Ряза́нстей, вве́ренней от Го́спода, име́вый, вся́ во сла́ву Бо́жию твори́л еси́. Те́мже и мы́ тебе́, стра́ха Бо́жия испо́лненну, любо́вию вопие́м такова́я:

Ра́дуйся, во́ине Христо́в, еди́ному Бо́гу послужи́вый; ра́дуйся, кре́пкий адама́нте, козньми́ вра́жиими непобеди́мый.

Ра́дуйся, не себе́, не ми́ру, но Еди́ному Бо́гу порабо́тивыйся; ра́дуйся, сло́вом Бо́жиим наста́вленный и просвеще́нный.

Ра́дуйся, житие́м твои́м Бо́га просла́вивый; ра́дуйся, бли́жняго своего́ по за́поведи Христо́вой я́ко са́м себе́ возлюби́вый.

Ра́дуйся, судие́ пра́ведный и му́дрый градоправи́телю; ра́дуйся, я́ко чи́стым се́рдцем и ны́не Бо́га зри́ши.

Ра́дуйся, благове́рный кня́же Рома́не, святы́й му́чениче и преди́вный чудотво́рче.

Конда́к 2.

Ви́дя богоуго́дное твое́ житие́, позави́дова всезло́бный диа́вол, воздви́же на тя́ враги́ твоя́, и́же оклевета́ху тебе́ пред ха́ном, ре́кше: ху́лит тя́ и ве́ру твою́; ты́ же, кро́тче и незло́биве кня́же Рома́не, не прича́стен бы́л еси́ вине́ се́й, не име́я зло́бы ни на кого́же, да вы́ну чи́стыми усты́ принесе́ши Бо́гу: Аллилу́иа.

И́кос 2.

Ра́зум просвеще́н име́я Богомы́слием, пу́ть дале́че во Орду́ надлежа́ть узре́л еси́, оправда́ния ра́ди пред нечести́вым влады́кою; те́мже и сы́ном твои́м повеле́вый послуша́ние ма́тери свое́й име́ти; управле́ние градо́в и́м вруча́я, благослове́ние о́тчее даде́. Сие́ же разлуче́ние с при́сными твои́ми, и́хже не наде́яшеся ктому́ зре́ти, со умиле́нием во уме́ свое́м ви́дяще, те́пле тебе́ взыва́ем:

Ра́дуйся, кра́сная ми́ра сего́ ни во что́ вмени́вый; ра́дуйся, ско́ро и не озира́яся вспя́ть, все́х и вся́ Го́спода ра́ди оста́вивый.

Ра́дуйся, я́ко сло́во Госпо́дне «и́же лю́бит сы́на или́ дще́рь па́че Мене́, не́сть Мене́ досто́ин», свя́то соблю́л еси́; ра́дуйся, ни еди́наго в ми́ре па́че Го́спода возлюби́вый.

Ра́дуйся, в кро́тости и смире́нии ко влады́це земно́му потеки́й; ра́дуйся, Влады́ку Небе́снаго вы́ну в се́рдце твое́м име́вый.

Ра́дуйся, сле́зы супру́ги и ча́д твои́х в да́р Го́споду принесы́й; ра́дуйся, на заколе́ние ра́достно гряды́й.

Ра́дуйся, благове́рный кня́же Рома́не, святы́й му́чениче и преди́вный чудотво́рче.

Конда́к 3.

Си́лою Бо́жиею укрепля́емь, во Орду́ к бесерме́ном злове́рным при́был еси́ и, се́рдцем откры́тым предста́в нечести́ву, ре́кл еси́: «ни тебе́, ха́не, ниже́ ве́ры твоея́ поху́лих!» Ха́н же, кро́тостию и чистото́ю взо́ра твоего́ смуща́емь, ми́лостивно возжела́ пусти́ти тя́, то́кмо повеле́ тебе́ еди́ною главу́ пред неве́рною и́х кни́гою, «Кора́н» нарица́ему, преклони́ти и довле́ет во свиде́тельство и́м; но ты́, испове́дниче Христо́в, ни ма́ло ме́для, воззва́л еси́: «Христиа́нин е́смь! И вои́стину ве́ра христиа́нская свя́та е́сть». И а́бие воспе́л еси́ Бо́гу: Аллилу́иа.

И́кос 3.

Име́я ре́вность ве́лию о Го́споде и любо́вь к лю́дем нелицеме́рную, кня́же Рома́не, потщи́лся еси́ ло́жность уче́ния Магоме́това показа́ти и поро́чное житие́ того́ после́дователей обличи́ти, Христо́во же всесвято́е уче́ние разъясни́т и призва́ти слепы́х ко прозре́нию и ве́ры Правосла́вныя прия́тию. Те́мже и мы́, ре́вностию твое́ю науче́ннии, воспева́ем тебе́ си́це:

Ра́дуйся, вели́кий пропове́дниче сла́вы Христо́вы; ра́дуйся, изобличи́телю неве́жества ага́рянскаго.

Ра́дуйся, к любви́ Госпо́дни на́с призыва́яй; ра́дуйся, потща́выйся и нечести́вых обрати́ти ко Го́споду.

Ра́дуйся, не преклони́вый главы́ твоея́ пред ло́жью; ра́дуйся, я́ко в темни́цу неустраши́мь веде́н би́л еси́.

Ра́дуйся, на ка́знь лю́тую за ве́ру Христо́ву гото́вый; ра́дуйся, вси́ ко́зни нечести́вых посрами́вый.

Ра́дуйся, благове́рный кня́же Рома́не, святы́й му́чениче и преди́вный чудотво́рче.

Конда́к 4.

Бу́рею зло́бною нападо́ша на тя́, испове́дниче Христо́в, посра́мленнии тобо́ю врази́ Христо́ви и пе́рвее извлеко́ша честны́й язы́к тво́й, но, его́же нечести́выми рука́ми отсе́кше, тебе́ пропове́дати те́м воспрети́ти не возмогли́ су́ть; оба́че без язы́ка гла́сом ве́лиим воспе́л еси́: Аллилу́иа.

И́кос 4.

Слы́шавше враждова́вшии на тя́ мучи́тели твое́ гро́мкое Бо́гу хвале́ние и безконе́чною зло́бою воспыла́вше, уста́ тебе́ заткну́ша пла́том, да бы задыха́яся не возмо́гл пропове́дати Воскре́сшаго. Но ты́, святы́й страстоте́рпче, не смуща́лся си́м но́вым наси́лием, взо́ром вдохнове́нным Христа́ Бо́га на́шего испове́дал еси́. Те́мже и мы́, терпе́нием твои́м умиле́ннии, немо́лчно взыва́ем ти́:

Ра́дуйся, нико́ею стра́стию в пропове́дании Христа́ запина́емый; ра́дуйся, и без язы́ка глаго́лати моги́й.

Ра́дуйся, ве́лию любо́вь ко Го́споду яви́вый; ра́дуйся, вся́ чле́ны твоя́ Го́споду посвяти́вый.

Ра́дуйся, чи́стый взо́р тво́й ко Го́споду возведы́й и те́м о Не́м пропове́давый; ра́дуйся, и взо́ром твои́м в тре́пет нечести́вых приведы́й.

Ра́дуйся, я́ко не от себе́ глаго́лавый; ра́дуйся, по сло́ву Иису́сову Ду́хом Бо́жиим в то́й ча́с науче́нный.

Ра́дуйся, благове́рный кня́же Рома́не, святы́й му́чениче и преди́вный чудотво́рче.

Конда́к 5.

Боготе́чным звезда́м уподо́бится о́чи твои́, кня́же Рома́не, но беззако́нницы, от гее́ны я́ростно распале́ннии, ослепи́ша тя́, страстоте́рпче. Мы́ же, страда́нии твои́ми науче́ннии, пе́ти навыко́хом: Аллилу́иа.

И́кос 5.

Ви́девше твое́ Бо́гом укрепля́емое терпе́ние, нечести́ви, наче́нше издева́тися над честны́м твои́м лико́м, со зло́бою а́дскою уре́заша лани́ты твоя́. Пречестно́ю твое́ю кро́вию омы́выйся, страстоте́рпче, зве́рское жестокосе́рдие с ве́лиим терпе́нием и кро́тостию ра́ди Го́спода поне́сл еси́. Те́мже любо́вию воспева́ем ти́:

Ра́дуйся, Христа́ ра́ди истяза́нный; ра́дуйся, красоту́ земну́ю на ле́поту Небе́сную премени́вый.

Ра́дуйся, я́ко ве́лия страда́ния по́мощию Христо́вою претерпе́л еси́; ра́дуйся, ни еди́ным во́плем, ниже́ сто́ном услади́вый слу́ха нечести́вцев.

Ра́дуйся, лани́ты твоя́ окрова́вленныя Го́споду принесы́й; ра́дуйся, Тому́ в терпе́нии свое́м смире́нно подража́вый.

Ра́дуйся, я́ко о́чи твои́ и язы́к тво́й Бо́гу, и́же созда́ и́х, прине́сл еси́; ра́дуйся, я́ко всего́ себе́ на убие́ние за Христа́ отда́л еси́.

Ра́дуйся, благове́рный кня́же Рома́не, святы́й му́чениче и преди́вный чудотво́рче.

Конда́к 6.

Провозве́стник яви́ся любве́ Христо́вы к на́м, Рома́не святы́й, прославля́я ю́ страда́нии твои́ми. Ушеса́ и но́с мучи́телие твои́ отсеко́ша ти́, оба́че вся́ сия́ пречу́дно претерпе́л еси́, Бо́гу во глубине́ души́ вопия́: Аллилу́иа.

И́кос 6.

Возсия́ све́т благода́ти Бо́жия в тебе́, страстоте́рпче святы́й, и́бо му́ки и страда́ния нечелове́ческия с терпе́нием а́нгельским претерпе́л еси́, Бо́гом укрепля́емь. Ру́ку твое́ю суста́вы с ди́кою я́ростию безбо́жницы преломи́ли су́ть, не ве́дуще, ка́ко еще́ истяза́ти тя́, благове́рне! Те́м ве́лиему терпе́нию твоему́ дивя́щеся, вопие́м ти́ си́це:

Ра́дуйся, во́ине Христо́в, страстьми́ непобеди́мый; ра́дуйся, я́ко дла́ни и пе́рсты, пре́жде де́лы до́брыми Бо́гу послужи́вшыя, на поруга́ние преда́л еси́.

Ра́дуйся, еди́на я́зва сы́й не преста́вый благоду́шие претерпева́ти вся́; ра́дуйся, по сло́ву Го́спода, терпе́нием твои́м ду́шу твою́ стяжа́вый.

Ра́дуйся, я́ко не то́кмо пло́ть, но и ко́сти сокруше́ны имы́й; ра́дуйся, вся́ сия́ стра́сти безро́потно претерпе́вый.

Ра́дуйся, и ве́лия му́ки сия́ ни во что́ Креста́ Христо́ва ра́ди вмени́вый; ра́дуйся, за смире́ние и кро́тость Бо́гом возлю́бленный.

Ра́дуйся, благове́рный кня́же Рома́не, святы́й му́чениче и преди́вный чудотво́рче.

Конда́к 7.

Хотя́щии доверши́ти зла́я своя́ отсеко́ша десну́ю твою́, е́юже зна́мение креста́ на челе́ свое́м вы́ну полага́л еси́ и е́юже ми́лостыню неоску́дную подава́л еси́, та́же и шу́йцу твою́, я́же по за́поведи Христо́вой не ве́да, е́же десна́я твори́т. Те́миже ра́нами и злострада́нии науче́ннии, Бо́гу вопие́м: Аллилу́иа.

И́кос 7.

Но́вое страда́ние угото́вали ти́ су́ть нечести́вии, но́зе твои́ честне́и, вы́ну до́брым путе́м ше́ствовавшии, отсе́кше, еди́н ста́н со главо́ю оста́вили ти́, великому́чениче! Те́мже му́кам твои́м покланя́ющеся, прино́сим ти́ сицева́я:

Ра́дуйся, десни́цу твою́ Го́споду принесы́й и шу́йцу; ра́дуйся, и все́м собо́ю пренебрега́й ра́ди Го́спода, Его́ же Десни́ца и Шу́йца на́с ра́ди пригвожде́ние бы́сте.

Ра́дуйся, в Его́ Пречи́стеи ру́це ду́х сво́й преда́ти гото́вый; ра́дуйся, еще́ ма́ло потерпе́ти имы́й, но му́ки нестерпи́мыя не́сший.

Ра́дуйся, истоще́нный любве́ ра́ди Боже́ственныя, зане́ и любы́ о́ная тебе́ ра́ди истоще́на бы́сть; ра́дуйся, ну́ждниче, терпе́нием ве́лием Ца́рствие Бо́жие восхити́вый.

Ра́дуйся, ели́ко мно́го пострада́л еси́, толи́ко во сто́ кра́т бо́лее Го́сподом возлю́блен бы́л еси́; ра́дуйся, все́ Ему́ пожре́ти пожела́вый и вся́ преми́рныя ра́дости в раю́ пресве́тлем улучи́вый.

Ра́дуйся, благове́рный кня́же Рома́не, святи́и му́чениче и преди́вный чудотво́рче.

Конда́к 8.

Странноужа́сных страда́ний твои́х безтре́петно не возмо́жем описа́ние че́сти. Уже́ еди́ное дыха́ние живы́м тебе́ бы́ти показу́юще, откры́ нечести́вым, я́ко вре́мя е́сть после́днее злодея́ние над тобо́ю соверши́ти. Наста́ бо ча́с кончи́ны твоея́ честны́я, Рома́не святы́й! И́бо мучи́телие твои́, содра́вше ко́жу с главы́ твоея́, о́ную отсе́кли су́ть. Ду́х же тво́й востече́ на Небеса́, иде́же вы́ну со А́нгелы воспева́еши Бо́гу: Аллилу́иа.

И́кос 8.

Все́м правосла́вным о́браз терпе́ния му́ченическаго яви́л еси́, злостра́ждущим ве́ру укрепля́я, любо́вь ко Го́споду и лю́дем, и́хже То́й люби́ти повеле́л е́сть, умножа́я, и нечести́вым спасти́ся жела́я; му́ки же лю́тыя до конца́ претерпе́вый, главу́ твою́ на позо́рище на ко́пиих водруже́нную уже́ с небе́с узре́л еси́. Те́мже на ико́ну твою́ с любо́вию взира́юще, те́пле вопие́м ти́:

Ра́дуйся, о́бразе кро́тости и соверше́ннаго терпе́ния; ра́дуйся, прия́телище вели́каго у Го́спода дерзнове́ния.

Ра́дуйся, я́ко дана́ тебе́ благода́ть за ны́ моли́тися; ра́дуйся, притека́ющих к тебе́ тщи́ не оставля́яй.

Ра́дуйся, я́ко ничто́же кре́пко е́сть, я́ко моли́тва страстоте́рпча; ра́дуйся, и на́шу немощну́ю моли́тву укрепля́яй.

Ра́дуйся, пред Го́сподем при́сно предстоя́й; ра́дуйся, Ему́ со А́нгельскими ли́ки хвалу́ воспева́яй.

Ра́дуйся, благове́рный кня́же Рома́не, святы́й му́чениче и преди́вный чудотво́рче.

Конда́к 9.

Возше́дый на Небеса́ и ду́хом в ра́йских селе́ниях обита́яй, на́с на земли́, в печа́ли су́щих, не забыва́еши, да мы́, тебе́ прославля́юще, Бо́гу вопие́м: Аллилу́иа.

И́кос 9.

Вити́и многовеща́ннии не возмо́гут благохвали́ти по достоя́нию твою́ кре́пость му́ченическую, твое́ терпе́ние и ве́лию любо́вь ко Го́споду, мы́ же бре́нными усты́ дерза́ем воспева́ти тебе́:

Ра́дуйся, кре́пкий сто́лпе ве́ры правосла́вныя; ра́дуйся, безбоя́зненный обличи́телю е́реси иносла́вныя.

Ра́дуйся, я́ко богоху́льники бесерме́нския посрами́л еси́; ра́дуйся, я́ко за ве́ру святу́ю постоя́л еси́.

Ра́дуйся, я́ко и на́с науча́еши лжеве́рие изоблича́ти; ра́дуйся, я́ко в боре́ниих за ве́ру Христо́ву заступа́еши.

Ра́дуйся, я́ко Це́рковь Росси́йская обре́те в тебе́ непреста́ннаго хода́тая; ра́дуйся, страны́ Ряза́нския еси́ немо́лчный моли́твенниче.

Ра́дуйся, благове́рный кня́же Рома́не, святы́й му́чениче и преди́вный чудотво́рче.

Конда́к 10.

Спасти́ хотя́ ду́шу свою́, кра́сная ми́ра сего́ презре́л еси́, те́мже у́бо и на́с, чту́щих па́мять твою́, го́рняя му́дрствовати, а не земна́я науча́еши, па́че себе́ и при́сных свои́х в во́лю Бо́жию предаю́ще, вы́ну Бо́гу вопи́ти: Аллилу́иа.

И́кос 10.

Сте́ну необори́мую име́ют страстоте́рпцы Христа́ Бо́га, И́же глаго́лется му́чеников кре́пость; и тебе́, благове́рне Рома́не, бы́сть Христо́с непобеди́мая кре́пость, И́мже вся́ стра́сти претерпе́л еси́, И́мже во оби́тели ра́йския призва́н бы́л еси́. Зря́ще тебе́ в ми́ре преми́рнем пребыва́юща, немо́лчно вопие́м ти́:

Ра́дуйся, прило́ги де́монскими преустраше́н бы́вый; ра́дуйся, си́лою Креста́ и И́менем сладча́йшаго Иису́са огради́выйся.

Ра́дуйся, я́ко страна́ Ряза́нская непреста́нно моли́твою твое́ю огражда́ется; ра́дуйся, я́ко и ины́я ве́си держа́вы Росси́йския не оставля́вши.

Ра́дуйся, я́ко на по́льзу ду́ш на́ших во мно́зех граде́х ны́не прославля́ешися; ра́дуйся, я́ко те́плую любо́вь к тебе́ люде́й чрез па́стырей и́х вруча́еши.

Ра́дуйся, до́брых и ве́рных градоправи́телей ве́рный споспе́шниче; ра́дуйся, враго́м страны́ Росси́йския стра́шный воево́до.

Ра́дуйся, благове́рный кня́же Рома́не, святы́й му́чениче и преди́вный чудотво́рче.

Конда́к 11.

Пе́ние всеумиле́нное прино́сим ти́, страстоте́рпче! Ты́ же со А́нгельскими ли́ки сла́ву Бо́жию воспева́я, не забу́ди и на́с недосто́йных, дабы́ и на́м, спасе́ние ду́ш на́ших улучи́вше, с тобо́ю вку́пе пе́ти Бо́гу: Аллилу́иа.

И́кос 11.

Светоза́рное свети́ло со́лнечное тма́ нощна́я е́сть пред незаходи́мым све́том сла́вы Бо́жия, е́юже наслажда́ешися в ра́йских селе́ниих, Рома́не, еди́ному в Тро́ице сла́вимому Бо́гу предстоя́; те́мже и мы́, во тме́ грехо́вней блужда́ющии, умиле́нно тебе́ взыва́ем:

Ра́дуйся, све́том Боже́ственным озаря́емый и на́м, гре́шным, его́ испроси́ти моги́й; ра́дуйся, сподви́жники твоя́ и слуги́ кре́постию ве́ры твоея́ удиви́вый и обра́довавый.

Ра́дуйся, я́ко и власи́ главы́ твоея́ изочте́ни бы́ша; ра́дуйся, я́ко ни еди́н от ни́х без во́ли Бо́жия паде́.

Ра́дуйся, пло́тию дале́че от земна́го оте́чествия почива́яй; ра́дуйся, ду́хом в Небе́сное Оте́чествие востеки́й.

Ра́дуйся, я́ко во́ля Бо́жия о тебе́ соверши́ся; ра́дуйся, я́ко восприя́л еси́ лу́чшая и поле́знейшая для души́ твоея́.

Ра́дуйся, благове́рный кня́же Рома́не, святы́й му́чениче и преди́вный чудотво́рче.

Конда́к 12.

Благода́ти Бо́жия испо́лненный, и на на́с моли́твами твои́ми ю́ призыва́яй; научи́ ны́ всеблаго́й во́ли Бо́жии соверше́ние покори́тися, с любо́вию храня́ще Того́ повеле́ния; да не оста́вит Госпо́дь в ча́с сме́ртный лю́ди Своя́, но да сподо́бит с тобо́ю при́сно взыва́ти Ему́: Аллилу́иа.

И́кос 12.

Пою́ще ве́лие о тебе́ Боже́ственное промышле́ние и всеси́льную по́мощь в странноужа́сных му́ках твои́х, восхваля́ем терпе́ния твоего́ кре́пость, ублажа́ем нелицеме́рную любо́вь твою́ к Бо́гу и, те́пле воспомина́юще вся́ тобо́ю Го́спода ра́ди претерпе́нная и Христо́м Бо́гом зело́ возлю́бленная, в похвалу́ тебе́ пое́м:

Ра́дуйся, я́ко Госпо́дь в Небе́сный Черто́г тебе́ всели́; ра́дуйся, я́ко по́двиг тво́й подвигополо́жник Христо́с увенча́.

Ра́дуйся, во́ине Христо́в, на земли́ непобеди́мый бы́вый; ра́дуйся, и на Небеси́ с во́и А́нгельскими вселе́нный.

Ра́дуйся, вся́, я́же зде́ оста́вил еси́, та́мо стокра́тно от Го́спода прия́вый; ра́дуйся, ду́шу твою́ Жениху́ Небе́сному уневе́стивый.

Ра́дуйся, а́ще же и погребе́н еси́ забве́нием люде́й, па́мять твою́ скорбьми́ жи́зни воскреси́вый; ра́дуйся, о на́с, гре́шных, пред Го́сподем усе́рдную моли́тву вознося́й.

Ра́дуйся, благове́рный кня́же Рома́не, святы́й му́чениче и преди́вный чудотво́рче.

Конда́к 13.

О, пресла́вный уго́дниче Христо́в, великому́чениче кня́же Рома́не! Приими́ сие́ ма́лое моле́ние на́ше и, предстоя́ у Престо́ла Вседержи́теля, моли́ Его́ изба́вити от находя́щих на ны́ бе́д, вопию́щия о тебе́: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгельское твое́ незло́бие и се́рдца кро́тость мно́гия лю́дие земли́ твоея́ к ти́ привлеко́ша. Ты́ бо, я́ко до́брый виногра́дарь, непреста́нная попече́ния о стране́ Ряза́нстей, вве́ренней от Го́спода, име́вый, вся́ во сла́ву Бо́жию твори́л еси́. Те́мже и мы́ тебе́, стра́ха Бо́жия испо́лненну, любо́вию вопие́м такова́я:

Ра́дуйся, во́ине Христо́в, еди́ному Бо́гу послужи́вый; ра́дуйся, кре́пкий адама́нте, козньми́ вра́жиими непобеди́мый.

Ра́дуйся, не себе́, не ми́ру, но Еди́ному Бо́гу порабо́тивыйся; ра́дуйся, сло́вом Бо́жиим наста́вленный и просвеще́нный.

Ра́дуйся, житие́м твои́м Бо́га просла́вивый; ра́дуйся, бли́жняго своего́ по за́поведи Христо́вой я́ко са́м себе́ возлюби́вый.

Ра́дуйся, судие́ пра́ведный и му́дрый градоправи́телю; ра́дуйся, я́ко чи́стым се́рдцем и ны́не Бо́га зри́ши.

Ра́дуйся, благове́рный кня́же Рома́не, святы́й му́чениче и преди́вный чудотво́рче.

Конда́к 1.

Избра́нный от князе́й Росси́йских на по́двиг му́ченический и убие́нный от язы́к безбо́жных, боголю́бный уго́дниче Христо́в, страстоте́рпче кня́же Рома́не! Восхваля́ем ве́лие терпе́ние твое́ и за ве́ру Христо́ву тве́рдое стоя́ние. Ты́ же, я́ко име́яй дерзнове́ние ко Го́споду, не преста́й моли́ти о на́с Царя́ Небе́снаго, да вы́ну тебе́ взыва́ем:

Ра́дуйся, благове́рный кня́же Рома́не, святы́й му́чениче и преди́вный чудотво́рче!

Моли́тва пе́рвая.

Святы́й сла́вный великому́чениче, благове́рный кня́же Рома́не, покрови́телю и засту́пниче земли́ Ряза́нския! Ве́руем и упова́ем, я́ко страда́ньми и богоуго́дною жи́знию твое́ю стяжа́вый ве́лию ми́лость и дерзнове́ние у Го́спода Бо́га, не забы́л еси́ достоя́ния твоего́ земна́го, оте́чества на́шего, в не́мже обурева́еми есмы́, раби́ твои́, мно́гими напа́стьми вра́жиими и страстьми́ жите́йскими. Те́мже про́сим тя́: моли́твами и предста́тельством твои́м умоли́ Го́спода на́шего Иису́са Христа́, да изба́вит на́с от вся́ких бе́д и злы́х обстоя́ний, от вся́ких неду́гов и боле́зней и от все́х враго́в, ви́димых и неви́димых. О вели́кий уго́дниче Бо́жий! Воздохни́ о на́с, гре́шных, ко Влады́це вся́ческих, да прости́т на́м вся́ согреше́ния на́ша и низпо́слет на ны́ благода́ть Всесвята́го Ду́ха, да преста́вше вся́каго скверноде́йства, про́чее вре́мя живота́ на́шего во вся́ком благоче́стии и чистоте́ поживе́м и, та́ко благоугоди́вше Го́споду, сподо́бимся жи́зни вечноблаже́нныя, пою́ще и воспева́юще превели́кое милосе́рдие Бо́жие и твое́ ми́лостивое предста́тельство за на́с у Престо́ла Бо́жия во ве́ки веко́в. Ами́нь.

Моли́тва втора́я.

О пресла́вный страстоте́рпче, вели́кий уго́дниче Бо́жий, принеси́ на́шу сле́зную моли́тву Го́споду Бо́гу на́шему, уми́лостиви Его́ к на́м, гре́шным, да оты́мет гне́в сво́й пра́ведный и умири́т страну́ на́шу многострада́льную; да утверди́т благоде́нствие и тишину́, да низпо́слет на́м изоби́лие плодо́в земны́х и да возбрани́т враго́м на́шим оби́ду твори́ти си́рым и безпомо́щным. Те́мже, припа́дающе к ико́не твое́й, воспомина́ем с ве́рою страда́ния твоя́, за Христа́ претерпе́нная, и мо́лим тя́: не оста́ви на́с и испроси́ на́м у Го́спода блага́я вре́менная и ве́чная, да сла́вим просла́вльшаго тя́ Бо́га во ве́ки. Ами́нь.