Кондак 1

Избранный Предвечным Богом и возлюбивый Его всем сердцем, страдания и смерть за Него претерпевый и душу свою Ему вручивый, и от Него же венцем нетленным и даром чудотворения увенчанный, всехвальный и богоносный страстотерпче, благоверный болярине Юрие, многих ко Христу обративый, обрати и наша сердца ко Господу Иисусу, и , яко имеяй дерзновение велие ко Всесвятей и Единосущней Троице, молися непрестанно о спасении нас, грешных, и от всяких бед свобождай ны, зовущия ти:

Радуйся, святый новомучениче Юрие Петроградский, светом правды Христовой вся путие жития нашего озаряющий!

Икос 1

Ангелов и человеков Творец посла тя, святче Божий, Церкви Российстей во укрепление, жаждущим же ведения истины во благое вразумление и назидательное окормление, яко просвети тя благодатию своею, ограждая от влияния лжепророков рая земнаго, ты бо токмо за ны Распятому и Воскресением жало смерти поправшему, Христу, Пути, Истине и Жизни неизменно до кончины мученическия твоя следовал еси; ныне же веру соблюдши, яко верный воин Христов, радуешися в Небесном Отечестве, и молишися усердно за нас, с надеждою благою и любовию горячею воспевающих ти сице:

Радуйся, душу твою за веру спасительную положити не отрекийся;

Радуйся, прещений безбожныя и богоборныя власти не убоявыйся;

Радуйся, мучений за исповедание истиннаго Бога не устрашивыйся;

Радуйся, в невечернем дни Царствия Божия ныне почивающий;

Радуйся, трисвятую песнь херувимски со Ангелы и всеми святыми воспевающий;

Радуйся, всех с верою приходящих к тебе благодатно освящающий;

Радуйся, усердно призывающим желания сердечныя исполняющий;

Радуйся, возлагающим упование на тя росту духовному пособствующий;

Радуйся, святый новомучениче Юрие Петроградский, светом правды Христовой вся путие жития нашего озаряющий!

Кондак 2

Видя Господь благое сердца твоего изволение, прехвальный Юрие, яко издетска послужити Ему восхоте, призва тя на тесный и прискорбный путь жития благочестиваго и подвиг богоугодный, иже подьял еси снискания вечной истины Господней и проповедания правды Христовой. Ты же всем сердцем, всею душею и всею крепостию твоею Иисуса Сладчайшего возлюбивши непрестанно взывал еси: Аллилуиа.

Икос 2

Разум озаренный благодатию Божиею измлада имел еси, преславне Юрие, от юности бо сродником твоим богомудрым болярином Орестом наставляемый, хранил еси в сердце твоем закон Христов, чтение Божественных писаний, наипаче же душеполезных повествований о житии угодников Божиих и людей именитых и благочестивых, зело возлюбил еси; преподаваемая же тебе о мире Божием учения, силою действовавшия в тебе благодати, в духовный сот превращал еси, добрая точию держал еси. Мы же ныне таковую мудрость твою хваляще, взываем ти:

Радуйся, от юности твоея всем сердцем твоим Христа возлюбивый;

Радуйся, и сам от Него возлюблен и благословен бывый;

Радуйся, заповедей Иисусовых ревностный исполнителю;

Радуйся, добрый и усердный последователю Его святаго учения;

Радуйся, сословия дворянскаго и чина шляхетскаго драгоценное украшение;

Радуйся, от Творца Всемудраго пребогатно талантами многима одаренный;

Радуйся, сторицею я умноживый и има усердно людем послуживый;

Радуйся, всем житием твоим Предвечному Господу угодивый;

Радуйся, святый новомучениче Юрие Петроградский, светом правды Христовой вся путие жития нашего озаряющий!

Кондак 3

Силою и благодатию Духа Святаго движимый, хранимый и озаряемый, прехвальный болярине Юрие, в духе Евангельских заповедей воспитав свою душу, от юности явился еси делателем неленостным на ниве Христовой, все упование на Единаго Бога возложив, сего ради преуспел еси во учении и наставничестве, милосердии и молитве, веры ради гонения претерпев даже до смерти, и ныне чистою душею в райския обители вселився, идеже молишися о всех о тебе Господеви вопиющих: Аллилуйя!

Икос 3

Имуще тя предстателя добра ко Всещедрому Богу, всехвальный новомучениче Юрие, нас напастьми и обстояниями скорбными одержимых укрепи, подая руку спасения, страстей бурю утиши, к безстрастия пристанищу управи и от злых устен защити твоих молитв покровом, и милости от Всемилосерднаго Бога испроси нам, с верою, любовию и надеждою величающих тя сице:

Радуйся, духовнаго просвещения светильниче небосветлый:

Радуйся, милосердия и милостыни источниче неисчерпаемый;

Радуйся, светильниче, правы стези ко спасению освещаяй;

Радуйся, от потопления бурями житейскими спасаяй;

Радуйся, унывающих и мятущихся укрепляй;

Радуйся, от заблуждения и сомнения отреваяй;

Радуйся, враг видимых и невидимых от нас отгоняющий;

Радуйся, благодатный щите, от бед ны сохраняющий;

Радуйся, святый новомучениче Юрие Петроградский, светом правды Христовой вся путие жития нашего озаряющий!

Кондaк 4

Бурю многомятежную житейскаго моря безбедно прошел еси, благоверный болярине Юрие, и гавани спасения вечнаго и жительства с Богом безконечнаго достигл еси, окормляемь бо бе заповедьми Христовыма, яже быша светильник ногам твоим, и свет стезям твоим. Темже ныне в горних обителех водворяешися, и купно со всеми новомученики и исповедники российскими радостно поеши Триединому Богу: Аллилуиа!

Икос 4

Слышавше, благоверный болярине Юрие, об отречении благоверного императора Николая и падении империи российстей, не возроптал еси, но разумея, яко вси путие народов и царств в деснице Всемудраго Бога выну пребывают, в годину тяжкую смут и невзгод На Него Единого упование твое возложи. Темже и мы, уповая на твое предстательство, молимся: буди нам скорый помощник и покровитель в земном житии нашем, да благодарно вопием ти:

Радуйся, душу свою добродетельми просветивший.

Радуйся, сердце твое Христу отверсто имевый;

Радуйся, яко промышляеши о нашем спасении;

Радуйся, яко ты печешися о добродетельнем нашем совершении;

Радуйся, Сладчайшего Иисуса более земных благ и пристрастий чтити научаяй;

Радуйся, доверием и любовию к Нему души наша преображаяй;

Радуйся, каменем краеугольным жития нашего Его полагати сподвигаяй;

Радуйся, в Нем токмо отраду, утешение и возрастание духовное обрести наставляяй;

Радуйся, святый новомучениче Юрие Петроградский, светом правды Христовой вся путие жития нашего озаряющий!

Кондак 5

Боготечней звезде, путь верным ко Отцу Небесному указующей, воистину подобен явился еси, всехвальный новомучениче Юрие, яко ты во вся дни земнаго жития твоего учеником, студентом, друзиям и врагом являл еси образ жития добродетельнаго и богоугоднаго, озарял еси всех окрест тебе сущих светом истины Христовой и ныне, нас, вспоминающих подвизи твоя подвигаеши радостно воспевати Сладчайшему Иисусу, выну тя своею благодатно укреплявшему, ангельское пение: Аллилуйя!

Икос 5

Видевшее в тебе источник мудрости великия и познания глубокаго многия людие прихождаху к тебе во всеучилище именитое, иже во граде Петрове, и поучахуся от тебе знаниями полезныма, ты же студентом твоим был еси наставник благий; такожде в написании книг и постижении истины научныя усердно потрудился еси, прехвальный Юрие. Сего ради верно молим тя: предстательством твоим ко Господу, источнику святости и премудрости, глубокую тьму греха отжени, невежественных к познанию Истины настави, шатания умов низложи, нас же во правде Божией укрепи и прими милостиво возносимыя ти похвалы сия:

Радуйся, от Источника Премудрости мудрости наученный.

Радуйся, делатель Христова винограда явивыйся избранный.

Радуйся, правоведов и адвокатов похвало и благословение;

Радуйся, всех истины взыскующих благодатное озарение;

Радуйся, мужей ученых и студентов к познанию Христа приведение;

Радуйся, очи наши сердечныя благодатию и мудростию просвещающий;

Радуйся, заблудшим и ослепленным путь правый показущий;

Радуйся, прельщения и сомнений в действии и милосердии Божием ны удаляющий;

Радуйся, святый новомучениче Юрие Петроградский, светом правды Христовой вся путие жития нашего озаряющий!

Кондак 6

Проповедниче и ревнителю любви деятельныя и самоотречения ближнего ради в годину смут и нестроений воистину явился еси, благоверный болярине Юрие, егда мнозим страждущим вспоможение оказал еси, радея не токмо о насыщении их благами земныма, обаче же об обращении и возвращении их ко Иисусу Христу, Источнику и смыслу бытия человеческаго, сего ради молитвы горячия возносил еси. Мы же ныне просим тя: сподоби и ны в сокровенных храмех сердец воздвигнути духовныя престолы Спасителю, муки и смерть за ны претепевшему, и да сподобимся с тобою купно Милосердому Господу во веки воспевати: Аллилуйя!

Икос 6

Возсиял еси, блаженне, добротою души твоея к людем, святый Юрие, сугубое попечение о чадех больных и страждущих являя, и иных христиан к сему же воздвигая и тако дивными бо делы добрыми твоими и труды многими прославил еси Отца, Иже есть на небесех, образ благости и милосердия неизреченнаго Того людем являя. Ныне же в небесных селениих славы водворяяся, не забуди нас, любовию тебе зовущих:

Радуйся, огнем любве к Спасителю и ближним в сердце своем горевый;

Радуйся, токмо Ему Единому выну служити ны сподвигающий;

Радуйся, отроков и юношей ко Иисусу и церкви Его преславно приводящий;

Радуйся, в час недоумения мысль благу на сердце нам полагаяй;

Радуйся, и нас служити ближним нелицемерне и усердне научаяй;

Радуйся, суету помышлений сердечных наших огнем молитв твоих развеваяй;

Радуйся, в верности и в стойкости в Евангелии нас всех утверждаяй;

Радуйся, не удалятися от источника животворныя благодати наставляй;

Радуйся, святый новомучениче Юрие Петроградский, светом правды Христовой вся путие жития нашего озаряющий!

Кондак 7

Хотяще познати совершенне Христа — Ипостасную Премудрость и Силу, по благословению святителя Вениамина, святоотеческаго наследия взыскал еси, и орлу уподобился еси, к высоте небесней молитвенно возлетевше, постигал еси Богословскую премудрость в свете истиннаго благочестия, просветил еси ближних твоих и ученик избранных в училище богословском. Сего ради просим тя, святый Юрие, и наши умы и теплохладием пораженныя сердца наша озари светом Христовым, да возможем купно с тобою в блаженней вечности Спасителю воспевати: Аллилуйя!

Икос 7

Новое служение и новыя испытания подьял еси, всехвальный Юрие, егда злочестивыя большевики гонения на Церковь Святую и святыни ея воздвигоша, ты же купно со святителем петроградским Вениамином восстал еси на борьбу за дело Христово и правды ради Божия волею пострадал еси, яко претерпел еси от власти богоборческия чести гражданския лишение, заточение в темнице и судилище неправедное. Сице молим тя: сподоби и нас верными быти Христу даже до смерти, да жительствуем по словеси Евангельскому: "Не убойтеся от убивающих тело, души же не могущих убити". Укрепи же и нас, зовущих ти таковая:

Радуйся, тя бо ни скорбь, ни теснота, ни глад не устрашиша;

Радуйся, яко сия вся от любве Христовы тя не отлучиша,

Радуйся, ветве лозы Христовы, сторичный плод принесшая;

Радуйся, очи наши духовныя к зрению Бога изощряющий;

Радуйся, нас, алчущих и жаждущих правды, насыщающий;

Радуйся, сердца наша благодатию Божиею, ти данною, очищающий;

Радуйся, к терпению бед, лишений и скорбей нас воодушевляющий;

Радуйся, в пренесении испытаний и гонений нас укрепляющий;

Радуйся, святый новомучениче Юрие Петроградский, светом правды Христовой вся путие жития нашего озаряющий!

Кондак 8

Страно есть маловерным и малодушным зрети, како ты, премудрый Юрие, воистину крепкий воин Христов, судилищем неправедным обвиненный, все упование ваше на Господа возложи, почитающе смерть яко страстем Господним следование, возблагодари Его, сподобившаго тя чашу Его пити. Сия убо ныне поминающее, величаем верность твою Господеви и велию веру твою, адаманту подобную, ибо веровал еси, яко за Христа и со Христом пострадавшии, воскреснут с Ним для жизни вечныя, идеже со ангелы вознесут Ему пение: Аллилуйя!

Икос 8

Вся убо могий о укрепляющем тя Христе, болезни и немощи смиренно претерпевая, на Бога все упование возложил еси, мирскаго пристрастия гнушаяся, безбожников прещения не устрашився, блаженне Юрие, и гонения от властей предержащих претерпевая, будущия радости провидел еси восприятие, Страдания за истину подъяв, страстотерпче Христов, теми душу свою очистил еси, ныне же Спасителя умоли, да в доброделании нас укрепит, грехов очищение подаст, к единению с Ним в вечности блаженней ны предуготовит, и твоего предстательства ради благословит всех нас, взывающих ти сице:

Радуйся, козней безбожныя власти не убоявыйся;

Радуйся, Истину Божию паче славы земныя возлюбивый;

Радуйся, яко во мраке безбожия правую веру утверждавый;

Радуйся, пощады от безбожных судий не просивый;

Радуйся, гонения и поругания Христа ради стойко претерпевый;

Радуйся, яко велию благодать от Господа стяжал еси;

Радуйся, ненавидящих тя от всего сердца прощал еси;

Радуйся, образ Божий в своем сердце неизменно носил еси;

Радуйся, святый новомучениче Юрие Петроградский, светом правды Христовой вся путие жития нашего озаряющий!

Кондак 9

Вси видящи тя в темничнем заточении, новомучениче преславный Юрие, зело дивляхуся твоему непоколебимому стоянию за веру истинную и святую, заветы бо отеческия соблюдая, не токмо не устрашился еси уз, оплеваний и поруганий, но мужественно вся сия терпя за Христа, слезнаго исполнишися умиления, благодарственно воспевал еси Богу: Аллилуиа!

Икос 9

Ветия многовещанныя не возмогут по достоянию воспети страдания твоя за Христа Распятаго, прехвальне новомучениче Юрие. Ты бо николиже возроптах, поминающе глаголы Господни: «Блажени есте, егда поносят вам, и ижденут, и рекут всяк зол глагол, на вы лжуще Мене ради, радуйтеся и веселитеся, яко мзда ваша многа на небесех». Мы же, сии глаголы почитающе, евангельское славословие тебе, угодниче Христов, со умилением и надеждою возносим:

Радуйся, яко звезда, во мраце безбожия светло возсиявый:

Радуйся, страдания за Христа и церковь Его радостно претерпевый;

Радуйся, житием твоим Солнце Правды, Христа проповедавый;

Радуйся, милостию и нищелюбием милость велию от Господа стяжавый;

Радуйся, кротостию и смирением землю обетования унаследовавый;

Радуйся, изгнанный правды ради и в Небесныя обители со славою приятый;

Радуйся, нищетою духовною сокровище Царствия Божия обретый;

Радуйся, плачем и скорбьми временными утешения вечнаго сподобивыйся;

Радуйся, правды на земли алкавший, на Небесах же Правдою Божиею насыщенный;

Радуйся, святый новомучениче Юрие Петроградский, светом правды Христовой вся путие жития нашего озаряющий!

Кондак 10

Спасти хотя душу свою, вся земная и временная во уметы вменил еси, святый и богомудрый Юрие, неуклонно крестным путем Спасителеви последствовал еси, муки душевныя, страдания разнообразныя, осмеяния и заушения, унижения и биения купно со святителем Вениамином, преподобномучеником Сергием и страстотерпцем Иоанном претерпел еси, с ними же купно от богоборец чашу смертную испил еси. В небесныя чертози Ангелы Божии вознесоша чистую душу твою, идеже со святители и исповедники Престолу Всевышняго предстоиши, непрестанно взывая укрепльшему тя на подвиги велии: Аллилуйя!

Икос 10

Царя Небеснаго Христа верный последователь был еси, благоверне Юрие, темже по неложному Его глаголу: «Идеже есмь Аз, ту и слуга мой будет», мы чтущии тя, веруем несомненно, яко ты со Христом в обителех блаженства вечнаго водворяешися, и радости нетленныя наслаждаешися, яко истинный Того угодник. Сего ради величаем тя сице:

Радуйся, блаженство вечное унаследовавый;

Радуйся, некрадомое богатство обретый;

Радуйся, страны нашея светлое радование;

Радуйся, в скорбех и заботах прибежище наше и упование;

Радуйся, болезней и страстей греховных пречудное исцеление;

Радуйся, в судебных испытаниех благодатное вспоможение;

Радуйся, узников и всех печалиями томимых отрадное посещение;

Радуйся, в бедах, тяжких работах, изгнании и лишениех сущим утешение;

Радуйся, святый новомучениче Юрие Петроградский, светом правды Христовой вся путие жития нашего озаряющий!

Кондак 11

Пение похвальное возносим тебе, святый наш заступниче и многомилостивый покровителю, ты бо верность и твердость в терпении проявил еси, да сам, искушен быв, сможеши искушаемым нам помощи, да и мы принесем Христу плод веры в добродетели, в добродетели же разум, в разуме же воздержание, в воздержании же терпение, в терпении же благочестие, во благочестии же братолюбие, в братолюбии же любовь, и воспоем Ему с тобою купно ангельское пение: Аллилуйя!

Икос 11

Светозарного светильника, елея молитвы чистыя преисполнена, и пламенем веры светло сияюща, воздвиже тя Господь, новомучениче Юрие. Мы же, очесы веры нашея зрим убо тя в Троическом Свете пребывающего и Отечеству нашему и всему роду христианскому мира и благоденствия просящего, с упованием веры, просим тя, заступниче наш святый: предстательством твоим облагодати вси верныя, чтущия святую память твою и песненно тя ублажающия, и сице тебе воспевающая:

Радуйся, радостный жителю Горняго Иерусалима;

Радуйся, яко на главе твоей сияет царская диадима.

Радуйся, за любовь свою Царство вечныя любви стяжавый;

Радуйся, молитися Богу за ны дерзновение приявый.

Радуйся, сладчайший лик Христов выну зриши;

Радуйся, Царицу всех цариц со святыми присно прославляеши;

Радуйся, ищущим Царствия Небеснаго спасительнаго пути проповедниче;

Радуйся, недуг греховных и ран душевных врачу благоискуснейший;

Радуйся, святый новомучениче Юрие Петроградский, светом правды Христовой вся путие жития нашего озаряющий!

Кондак 12

Благодатию Божиею обогативыйся, по отшествии твоем от земных, святый страстотерпче Юрие, наипаче к трисолнечному престолу Троицы Пресвятыя приближивыйся, и ныне пребываеши в непрестанной радости, восходя от славы к славе, и воспеваеши со ангелы Пресвятую Троицу, Ея же милосердие и к нам приклони, с тобою купно сподобимся во веки воспевати Всеблагому Господу, Подателю благ земных и небесных: Аллилуйя!

Икос 12

Поюще песнь благодарения Всещедрому Человеколюбцу Богу, прославльшему тя, яко вернаго исповедника Церкве Русския, величаем твоя подвиги добропобедные, почитаем страдания, хвалим долготерпение, славим непреоборимое стояние за веру Истинную, ублажаем, новомучениче Юрие, и святую твою кончину, торжествуем небесное увенчание твое и к твоему предстательству за ны пред Триипостасным Господем Нашим усердно прибегаем и с надеждою приносим тебе, святый наш заступниче, от благодарных сердец наших похвалы сия:

Радуйся, яко тебе призывающым быстро предваряеши;

Радуйся, яко любящих тя от различных бед и напастей изымаеши;

Радуйся, яко неправых ковы разрушаеши;

Радуйся, яко правым путем следовати научаеши;

Радуйся, распри и раздоры скоро искореняяй.

Радуйся, хлеб насущный, кров и работу обрести помогаяй;

Радуйся, мрачныя облаки скорбей скоро и благодатно разгоняяй;

Радуйся, Милосерднаго Бога хвалити и благодарити ны научаяй;

Радуйся, святый новомучениче Юрие Петроградский, светом правды Христовой вся путие жития нашего озаряющий!

Кондак 13

О всеблажене угодниче Божий, добропобедный страстотерпче Юрие, внемли усердным молениям, к тебе ныне возносимым, призри на вся наша нужды - душевныя и телесныя, помози нам, странствующим в мори житейстем и далече отстоящим от тя, возвышай наша мысли, чувства, желания и намерения от земнаго к небесному, да безпреткновенне прешедше земный путь наш, взыдем во Иерусалим Небесный, идеже представше пред лицем Предвечнаго Господа Нашего, с тобою купно воспоем Ему: Аллилуиа! Аллилуиа! Аллилуиа!

Этот кондак читается трижды, затем Икос 1 и Кондак 1.

Молитва первая

К тебе, о преславный новомучениче Юрие, богомудрому наставнику юных, просветителю и истины взыскателю и возвестителю, исповеднику, богословия ревнителю, за Христа страдания и смерть приявшему, вседушно прибегаем и молим: простри руку помощи всем в немощи и злострадании сущим, научи во единодушии и любве пребывати и спасатися вкупе, не остави храм, имени твоему посвященный, твоим попечением и всех с верою и любовию чтущих святую память твою. Ум и сердце на горняя направи; не словесно бо токмо, но действенно жити по Бозе ревнуем; ближняя паче себе возлюбим, гнев, зависть, корысть на кротость и милосердие преложим, да над страстьми победители явимся. Исповедания веры спасительныя держатися помози, прельщения льстиваго сетей избави; и тако прилепившеся тебе, святому заступнику нашему, сподобимся Царствие Небесное унаследовати, идеже ты в сонме новомученик и исповедник Российских непрестанно славиши Пресвятую Троицу, Отца и Сына и Святаго Духа во веки веков. Аминь.

Молитва вторая

О, святый новомучениче Юрие Петроградский! К тебе, предстателю святый, прибегаем, яко не имамы дерзновения ко Господу за премногия грехи наша. Ты же, страстотерпче святый, в земном житии твоем столп веры православныя быв и исповедник доблий, укрепи нашу веру, да возможем противустати всем кознем лукаваго, испроси нам у Всемилостиваго Бога вся благопотребная душам и телесем нашим, заблуждающих обрати, недугующих исцели, юныя просвети, да уведят благочестия доброту и греха безобразие, даждь нам утешение в печалех, пробуди в сердцах наших покаяние, возжги в сердцах наших пламень Божественныя любве и всем вся даруй, яже ко спасению потребное и полезная, да всеблагомощным предстательством твоим избавимся от всякия беды и напасти, и да будем благоуспешны в трудех наших. Услыши моления наша, благоверне Юрие, ко иконе твоей с верою и любовию припадающих, яви нам многомощное твое заступление, соблюди град Петров, его же возлюбил еси, и вся грады и веси русския от напастей ненаветны, да славим дивнаго во святых Своих Бога, Отца и Сына и Святаго Духа, ныне и присно и во веки веков. Аминь.

Молитва третья

О, святый новомучениче Юрие Петроградский! К тебе, скорому помощнику и теплому молитвеннику, недостойнии, прибегаем, смиренное моление приносяще: не презри ны, немощныя, по вся дни и часы в беззакония впадающия. Ей, святче Божий, не остави ны, твоея милости приносящия, велие бо имаши дерзновение ко Христу Богу нашему, яко многи муки и страдания за Него и смерть лютую приял еси и, ныне со Ангелы Престолу Божию предстоя, умоли Господа Бога избавити ны от всякия скорби и болезни и всякаго зла, наипаче же от нахождения врага темнаго, Церкве Православней благоденствие даруй; град Петров, в немже страдания приял еси, и всю землю Русскую миром огради, от всякаго злаго обстояния избави и вся, к животу временному полезная и ко спасению вечному приводящая, даровати нам у Господа Бога нашего испроси, да молитвами твоими христианскую кончину получити вси сподобимся и, козней диавольских и муки вечныя избавльшеся, безконечнаго блаженнаго Царствия причастницы будем.

О святый и добропобедный новомучениче, сотвори молитвы твоя за всех страждущих, за лишенных крова, работы, за сущих во обстояниях тяжких, за пребывающих в отчаянии и тревоге о днях грядущих.

Ей, святый Юрие, ниспошли благословение Божие всем в радости сущим, упроси Творца нашего даровати помощь благодатную семьям нашим, чадом, старцем и старицам, да сподобит всех нас Милосердный наш Господь во всяк день и час жития нашего в мире и славословии Божием пребывати. К предстательству и заступничеству твоему прибегая, угоднице Христова, усердно просим тя: приклони Милосердие Божие, к нашей Святей Церкви, к архипастырям, пресвитером, монашествующим и миряном, яко ты еси всеблагий заступниче наш пред Престолом Всесвятыя и Нераздельныя Троицы.

Вознеси молитвы твоя, о святый страстотерпче, за всех умерших в надежде всеобщего воскресения, да простит им Господь вся согрешения их, вольная и невольная. О святый Юрие, испроси у Иисуса Христа, Господа и Спасителя нашего, прощения всех наших прегрешений, яже от юности до настоящего дня и часа согрешихом. Умоли Господа нашего исполнити вся просьбы наша и молитвами твоими сподоби ны славословити купно с тобою Всесвятаго Господа и Бога нашего, Отца и Сына и Святаго Духа и ныне и присно и во веки веков. Аминь.