Конда́к 1.

Избра́нному Го́сподом служи́телю Це́ркви Бо́жия, пресви́теру пра́ведному и ве́рному свиде́телю, Феодо́сию пресла́вному пе́сни принести́ дерза́ем и, по́двиги того́ воспева́юще, со умиле́нием зове́м:

Ра́дуйся, о́тче Феодо́сие, преди́вный испове́дниче ве́ры Правосла́вныя.

И́кос 1.

Архиере́я ве́чнаго, Го́спода Иису́са Христа́, яви́лся еси́ служи́тель пресла́вный, о́тче досточу́дне Феодо́сие, да́нный бо ти́ Зало́г да́же до после́дняго своего́ издыха́ния сохрани́л еси́ и ве́ру свою́ страда́нии запечатле́л еси́, те́мже мы́ дерза́ем ти́ похвалы́ сицевы́я воспе́ти:

Ра́дуйся, ве́ры свети́льниче неугаси́мый; ра́дуйся, испове́дания адама́нте несокруши́мый.

Ра́дуйся, служи́телю Госпо́день всеусе́рднейший; ра́дуйся, Небе́снаго Домовлады́ки ра́бе благи́й и ве́рный.

Ра́дуйся, па́стырю Це́ркви Христо́выя; ра́дуйся, тру́жениче вертогра́да Бо́жия.

Ра́дуйся, подви́жниче препросла́вленный; ра́дуйся, моли́твенниче о на́с всеусе́рднейший.

Ра́дуйся, о́тче Феодо́сие, преди́вный испове́дниче ве́ры Правосла́вныя.

Конда́к 2.

Ви́дящее в тебе́, о́тче, усе́рдие о спасе́ние и ре́вность о сла́ве Бо́жией, благочести́выя роди́тели твоя́ отда́ша тя́ на науче́ние кни́жное, да просвеще́н Прему́дростию Бо́жиею, научи́ши и ины́я ку́пно с тобо́ю пе́снь Бо́гу приноси́ти: Аллилу́иа.

И́кос 2.

Ра́зум богопросвеще́нный стяжа́в, о́тче на́ш Феодо́сие, от ю́ности твоея́ возлюби́л еси́ благоле́пие до́ма Госпо́дняго и ме́сто селе́ния сла́вы Его́, от ле́т млады́х на служе́ние Бо́гу себе́ предугото́вал еси́, све́том моли́тв освеща́я пу́ть науче́ния кни́жнаго, те́мже приими́ от на́с похвалы́ сия́:

Ра́дуйся, суету́ вселука́вую отри́нувый; ра́дуйся, спасе́ния все́м се́рдцем возжеле́вый.

Ра́дуйся, свеще́, моли́твою пламене́ющая; ра́дуйся, кади́льнице, доброде́тельми благоуха́ющая.

Ра́дуйся, све́том И́стины осия́нный; ра́дуйся, огне́м боже́ственным всеразжже́нный.

Ра́дуйся, пропове́дниче Ева́нгелия всеусе́рдный; ра́дуйся, Та́ин Бо́жиих служи́телю благогове́йный.

Ра́дуйся, о́тче Феодо́сие, преди́вный испове́дниче ве́ры Правосла́вныя.

Конда́к 3.

Си́лою Вы́шняго укрепля́емый, Го́рняя возлюби́л еси́, небре́гше до́льняя, и ко небе́сному взо́р тво́й обрати́л еси́, отри́нувше попече́ние о земно́м и тле́нном, пу́ть служе́ния церко́внаго избра́л еси́, о́тче, да Го́споду послу́жиши и Тому́ прилепи́шися и Сему́ Еди́ному пе́снь воспое́ши: Аллилу́иа.

И́кос 3.

Иму́ще се́рдце чи́сто и ра́зум богопросвеще́н, де́латель всеусе́рдный вертогра́да Бо́жия яви́лся еси́, о́тче достоблаже́нне Феодо́сие, егда́ от десни́цы святи́тельския епи́скопа Дими́трия поставле́ние прия́л еси́ на служе́ние свяще́нническое, те́мже, зря́ще тя́ па́стыря всеусе́рднаго, си́це тя́ воспева́ху па́ства твоя́:

Ра́дуйся, па́стырю на́ш до́брый; ра́дуйся, о́тче ми́лостивый и кро́ткий;.

Ра́дуйся, свяще́нниче богопросвеще́нный; ра́дуйся, иере́е богоизбра́нный.

Ра́дуйся, жре́бий Госпо́день во смире́нии прия́вый; ра́дуйся, кре́ст служе́ния пресви́терскаго на ра́мена своя́ подъя́вый.

Ра́дуйся, Го́спода учениче́ всеизря́дный; ра́дуйся, апо́столов после́дователю усе́рдный.

Ра́дуйся, о́тче Феодо́сие, преди́вный испове́дниче ве́ры Правосла́вныя.

Конда́к 4.

Бу́ря искуше́ний и скорбе́й насти́же тя́ о́тче, егда́ по немно́гом вре́мени лиши́лся еси́ супру́жницы твоея́ Пелаги́и, я́же оты́де от земна́го жития́ к Небе́сному. В си́х же обстоя́ниих не преда́лся еси́ печа́ли и уны́нию, но все́ упова́ние свое́ на Го́спода возложи́л еси́, го́ресть вдовства́ моли́твою растворя́юще и Уте́шителю Преблаго́му вопию́ще: Аллилу́иа.

И́кос 4.

Слы́шати и воспева́ти чудеса́ Госпо́дня восхоте́л еси́ о́тче, те́мже избра́л еси́ пу́ть те́сный и многоско́рбный пресви́тера во́инскаго, да во бране́х су́щим лю́дем правосла́вным утеше́ние от Го́спода препода́ти возмо́жеши и ко по́двигу си́х укрепи́ши наставле́нии свои́ми. Те́мже во́ини правосла́внии я́ко отца́ своего́ духо́внаго тя́ воспева́ху си́це:

Ра́дуйся, ду́ши на́ша Сло́вом Бо́жиим просвети́вый; ра́дуйся, сердца́ на́ша питие́м благоче́стия напои́вый.

Ра́дуйся, Кроншта́дскаго чудотво́рца всесла́вный учениче́; ра́дуйся, неутоми́мый и́стинныя ве́ры пропове́дниче.

Ра́дуйся, неисчерпа́емый прему́дрости исто́чниче; ра́дуйся, Ве́чнаго Ева́нгелия всехва́льный благове́стниче.

Ра́дуйся, звездо́ пресве́тлая не́ба церко́внаго; ра́дуйся, цве́те всесла́вный вертогра́да небе́снаго.

Ра́дуйся, о́тче Феодо́сие, преди́вный испове́дниче ве́ры Правосла́вныя.

Конда́к 5.

Боготе́чную звезду́ в земно́м стра́нствии твое́м – Зако́н Бо́жий обре́тше, посреде́ су́ши и мо́ря яви́лся еси́ служи́тель неле́ностный Го́спода и Бо́га твоего́, морску́ю пучи́ну моли́твами твои́ми укроща́ющи и во́инов правосла́вных благода́тию Бо́жией укрепля́юще. Егда́ же ра́ны тя́жкия прия́л еси́, на Го́спода все́ упова́ние возложи́л еси́ и от Него́ же исцеле́ния сподо́бился еси́, да и на бу́дущее вре́мя яви́шися па́стырь неле́ностный, посреде́ бу́рь и искуше́нию науча́ющий все́х Бо́гу взыва́ти: Аллилу́иа.

И́кос 5.

Ви́деша тя́ па́ства твоя́, о́тче на́ш Феодо́сие, всего́ себе́ в служе́ние Го́споду преда́вшаго и противостоя́щаго бу́ре злоко́зненных искуше́ний, ю́же вра́г спасе́ния на́шего на Це́рковь воздви́же. Те́мже, обре́тше тя́ наста́вника предо́браго, во вре́мя собла́знов от Бо́га дарова́ннаго, сицевы́ми похвала́ми велича́ху тя́ лю́дие правосла́внии:

Ра́дуйся, броне́ю пра́вды облече́нный; ра́дуйся, венце́м богому́дрия увенча́нный.

Ра́дуйся, ве́ры правосла́вныя утвержде́ние; ра́дуйся, заблужда́ющих вразумле́ние.

Ра́дуйся, пу́ть ко спасе́нию на́м возвести́вый; ра́дуйся, мно́гия ко Христу́ возврати́вый.

Ра́дуйся, я́ко тобо́ю и́стина пропове́дуется; ра́дуйся, я́ко тобо́ю вся́кая ле́сть отгоня́ется.

Ра́дуйся, о́тче Феодо́сие, преди́вный испове́дниче ве́ры Правосла́вныя.

Конда́к 6.

Пропове́дниче всесла́вный ми́лостей Госпо́дних яви́лся еси́, о́тче на́ш Феодо́сие, посреде́ бу́ри злы́я непреста́нно взыва́юще: «Кре́пость моя́ и пе́ние мое́ Госпо́дь», и наставля́юще лю́ди правосла́вныя, да не убоя́тся нечести́вых преще́ния и злоко́зненныя сатани́нския не́нависти и не прекло́нят коле́на своя́ пред истука́ном безбо́жия, но при́сно Го́спода испове́дуют, вопию́ще: Аллилу́иа.

И́кос 6.

Возсия́л еси́ све́том И́стины посреде́ мра́ка неве́рия, Феодо́сие богому́дре, утвержда́я па́ству свою́ тве́рдо испове́дати ве́ру Правосла́вную и не уклоня́тися на пу́ть поги́бельный ересе́й и раско́лов. Служи́тели же зло́бы преиспо́дняя на тя́ гоне́ние воздви́гнути потща́шася, да па́стыря порази́вше, о́вцы разсе́яти возмо́гут. Те́мже, о́тче, тве́рдость твою́ во испове́дании зря́ще, воспева́ем по́двиги твоя́:

Ра́дуйся, пра́вды Бо́жией свети́льниче; ра́дуйся, И́стины Христо́выя провозве́стниче.

Ра́дуйся, Све́том Невече́рним озаре́нный; ра́дуйся, Сла́вою Бо́жией просвеще́нный.

Ра́дуйся, лжи́выя непра́вды потреби́телю; ра́дуйся, мглы́ неве́рия отгони́телю.

Ра́дуйся, гоне́ния за Христа́ претерпе́вый; ра́дуйся, поноше́ния ра́ди Сло́ва Бо́жия прия́вый.

Ра́дуйся, о́тче Феодо́сие, преди́вный испове́дниче ве́ры Правосла́вныя.

Конда́к 7.

Хотя́ Человеколю́бец Госпо́дь яви́ти Свое́ к на́м милосе́рдие, про́мыслом Свои́м преди́вным преведе́ тя́, о́тче пресла́вне, от Херсоне́са дре́вняго во гра́д Мелито́поль, да яви́шися па́стырь и́стинный и оте́ц чадолюби́вый лю́дем правосла́вным, просвеща́я тьму́ безбо́жия по́двиги пресла́вными свои́ми, и́хже прославля́юще, воспева́ем Го́спода, во испове́дании тя́ укрепи́вшаго и венце́м нетле́ния увенча́вшаго, вопию́ще Аллилу́иа.

И́кос 7.

Но́вый испове́дник, вои́стину, показа́лся еси́, о́тче пресла́вне Феодо́сие, не убоя́лся бо еси́, после́дователей дре́вняго Неро́на, те́ло твоего́ погуби́ти тща́щихся, души́ же не могу́щих вреди́ти, но си́х вся́ческия кова́рства во уме́ты вмени́л еси́, посреде́ страда́ния моли́твою себе́ укрепля́юще. Те́мже, воспомина́юще терпе́ние твое́, во умиле́нии воспева́ем:

Ра́дуйся, Правосла́вия побо́рниче препе́тый; ра́дуйся, о́бразе испове́дничества всетве́рдый.

Ра́дуйся, пещи́ вавило́нския не устраши́выйся; ра́дуйся, преще́ния мучи́телей не убоя́выйся.

Ра́дуйся, росо́, е́юже о́гнь безбо́жия угаса́ется; ра́дуйся, мо́ре, и́мже злове́рие потопля́ется.

Ра́дуйся, зерца́ло благода́ти всесве́тлое; ра́дуйся, похвало́ на́ша всера́достная.

Ра́дуйся, о́тче Феодо́сие, преди́вный испове́дниче ве́ры Правосла́вныя.

Конда́к 8.

Стра́нное чу́до зри́м на тебе́, о́тче всесла́вне, ста́рец бо сы́й многотру́дный, я́коже ю́ный подъе́млеши на ся́ по́двиг испове́дничества и, не убоя́вшеся темни́цы многоско́рбныя, сия́еши чистото́ю и кре́постию, я́ко адама́нт пресла́вный и́стинныя ве́ры, посреде́ узи́лища Го́споду моли́тву принося́ще и со слеза́ми пе́ние растворя́юще: Аллилу́иа.

И́кос 8.

Ве́сь вои́стину яви́лся еси́ о́тче, насле́дник обетова́ния ева́нгельскаго, и блаже́нство ве́чное улучи́ти сподо́бился еси́, Го́споду своему́ после́дствующе да́же до Голго́фы, ско́рби, безче́стие, ра́ны и темни́чное заключе́ние за Него́ ра́достно претерпе́л еси́ и ны́не возше́л еси́ в ра́дость Спа́са твоего́, те́мже от на́с приими́ пе́ние сицево́е:

Ра́дуйся, Го́спода все́м се́рдцем возлюби́вый; ра́дуйся, да́же до сме́рти Ему́ после́довавый.

Ра́дуйся, Христу́ сораспя́выйся всера́достно; ра́дуйся, страда́ния прия́вый безро́потно.

Ра́дуйся, Кре́ст Госпо́день на ра́мена своя́ прие́мый; ра́дуйся, на Голго́фу лику́юще восше́дый.

Ра́дуйся, страда́ний Христо́вых соуча́стниче; ра́дуйся, Воскресе́ния Его́ соприча́стник.

Ра́дуйся, о́тче Феодо́сие, преди́вный испове́дниче ве́ры Правосла́вныя.

Конда́к 9.

Вся́кое претерпе́л еси́ Христа́ ра́ди страда́ние, ри́зу души́ убели́вше кро́вию А́гнца Бо́жия, за грехи́ ми́ра Самаго́ Себе́ в же́ртву живоже́ртвенную прине́сшаго, и Сему́ после́дствующе, возше́л еси́ на Бра́к А́гнчий, иде́же во сла́ве Небе́сней со все́ми святы́ми пе́снь побе́дную пое́ши: Аллилу́иа.

И́кос 9.

Вети́я многосло́вныя не возмо́гут досто́йно воспе́ти по́двиги твоя́, о́тче Феодо́сие, страда́ния бо, му́ки, избие́ния, зауше́ния, напра́слину и мра́к темни́чный Го́спода ра́ди претерпе́ти сподо́бился еси́, те́мже и украси́лся еси́ венце́м побе́дным, его́же обеща́ Госпо́дь все́м ве́рным, и пе́сньми сицевы́ми ублажа́ешися:

Ра́дуйся, побе́ды, ми́р победи́вшей, сонасле́дниче; ра́дуйся, Ца́рствия Небе́снаго соприча́стниче.

Ра́дуйся, му́чеников дре́вних сотаи́нниче; ра́дуйся, лико́в а́нгельских сомоли́твенниче.

Ра́дуйся, ве́ру и́стинную да́же до конца́ сохрани́вый; ра́дуйся, Го́спода да́же до страсте́й испове́давый.

Ра́дуйся, мра́к темни́чный све́том моли́тв твои́х освети́вый; ра́дуйся, вене́ц небе́сный от Го́спода прия́вый.

Ра́дуйся, о́тче Феодо́сие, преди́вный испове́дниче ве́ры Правосла́вныя.

Конда́к 10.

Спасе́ние ве́чное улучи́ти тща́щеся, к нетле́нному устреми́лся еси́, о́тче Феодо́сие, тле́нное оста́вльше, те́мже ны́не я́ко пра́ведник и иере́й Бо́га вы́шняго, ве́ру свою́ по́двигом испове́дничества запечатле́вый, сподо́бился еси́ насле́довати Ца́рствие Бо́жие, пра́ведником от созда́ния ми́ра угото́ванное, иде́же ку́пно со все́ми святы́ми Бо́га воспева́еши, пою́ще: Аллилу́иа.

И́кос 10.

Сте́ны темни́чныя и узи́лище многоско́рбное уготовля́ше ти́, о́тче пресла́вне, насле́дницы но́выя гони́телей дре́вних, ты́ же, не убоя́шеся си́х преще́ния, со апо́столом глаго́лал еси́: «вся́ могу́ о укрепля́ющем мя́ Иису́се», те́мже и ны́ укрепи́ моли́твами твои́ми, вопию́щих си́це:

Ра́дуйся, у́зами темни́чными у́зы зло́бы сокруши́вый; ра́дуйся, му́ки и ско́рби ни во что́ же вмени́вый.

Ра́дуйся, Путе́м Госпо́дним при́сно ходи́вый; ра́дуйся, мно́гих от путе́й поги́бельных отврати́вый.

Ра́дуйся, трапе́зою Небе́сною насыще́нный; ра́дуйся, питие́м безсме́ртия напое́нный.

Ра́дуйся, све́том небе́сным ду́ши на́ша озаря́ющий; ра́дуйся, и ны́не благослове́нием твои́м на́с осеня́ющий.

Ра́дуйся, о́тче Феодо́сие, преди́вный испове́дниче ве́ры Правосла́вныя.

Конда́к 11.

Пе́ние на́ше всеумиле́нное приими́ ны́не, Феодо́сие богому́дре о́тче на́ш, и от оби́телей сла́вы небе́сныя при́зри на ча́да твоя́ духо́вныя, моли́твами твои́ми во Правосла́вии ны́ утвержда́юще, да сподо́бимся во ве́ки веко́в Го́спода славосло́вити и с тобо́ю ку́пно Тому́ пе́ти: Аллилу́иа.

И́кос 11.

Светоно́сен свети́льник ве́ры и́стинныя яви́лся еси́, о́тче Феодо́сие, и храни́тель земли́ на́шея, заступле́ние христиа́ном правосла́вным и чудотво́рец изря́дный, сего́ ра́ди прославля́ешися похвалы́ сицевы́ми:

Ра́дуйся, пра́вило ве́ры и благоче́стия; ра́дуйся, о́бразе свя́тости и смире́ния.

Ра́дуйся, Святы́я Тро́ицы пречи́стое селе́ние; ра́дуйся, а́нгельскаго жития́ уподобле́ние.

Ра́дуйся, всесве́тлое благода́ти прия́телище; ра́дуйся, земли́ на́шея чу́дное сокро́вище.

Ра́дуйся, Це́ркве Христо́выя сто́лпе непоколеби́мый; ра́дуйся, Правосла́вия свети́льниче неугаси́мый.

Ра́дуйся, о́тче Феодо́сие, преди́вный испове́дниче ве́ры Правосла́вныя.

Конда́к 12.

Благода́тное украше́ние Це́ркви Правосла́вныя и земли́ на́шея пло́д всеблагослове́нный, па́стырства и́стиннаго о́бразе и испове́дания кре́посте неодоли́мая, Феодо́сие пресла́вный и богому́дрый, моли́твами твои́ми вся́ во Правосла́вии утверди́ и научи́ Го́спода непреста́нно сла́вити: Аллилу́иа.

И́кос 12.

Пою́ще твое́ чуде́сное заступле́ние, прославля́ем тя́, о́тче Феодо́сие, я́ко моли́твенника о на́с пресла́внаго и чудотво́рца ми́лостиваго и велича́ем тя́, глаго́люще:

Ра́дуйся, в моли́тве к Бо́гу предстоя́телю; ра́дуйся, Небе́сных бла́г всесла́вный раздая́телю.

Ра́дуйся, чуде́с исто́чниче неистощи́мый; ра́дуйся, исцеле́ний кла́дезе неисчерпа́емый.

Ра́дуйся, ко благоче́стию на́с уче́ньми свои́ми наставля́ющий; ра́дуйся, от вся́кия напа́сти на́с избавля́ющий.

Ра́дуйся, я́ко предста́тельством твои́м ми́р с Бо́гом обрета́ем; ра́дуйся, я́ко моли́твами твои́ми к Небеси́ восхо́дим.

Ра́дуйся, о́тче Феодо́сие, преди́вный испове́дниче ве́ры Правосла́вныя.

Конда́к 13.

О, всесла́вне и богому́дре о́тче на́ш Феодо́сие! Се́, предстоя́ще пред ра́кою честны́х моще́й твои́х, со слеза́ми и умиле́нием серде́чным мо́лим твою́ благосты́ню, да николи́же оскуде́ет хода́тайство твое́ пред Бо́гом о на́с гре́шных и недосто́йных, да богоприя́тными мольба́ми твои́ми проба́вит Всевы́шний Госпо́дь ми́лость Свою́ над боголюби́вым гра́дом и правосла́вным Оте́чеством на́шим, да укрепи́т ве́ру святооте́ческую, да научи́т ны́ приме́ром пра́веднаго твоего́ жития́ еди́ному то́чию на потре́бу служи́ти и угожда́ти, и да пода́ст на́м ве́чное спасе́ние, во е́же с тобо́ю в селе́ниих пра́ведных воспева́ти непреста́нно: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

Архиере́я ве́чнаго, Го́спода Иису́са Христа́, яви́лся еси́ служи́тель пресла́вный, о́тче досточу́дне Феодо́сие, да́нный бо ти́ Зало́г да́же до после́дняго своего́ издыха́ния сохрани́л еси́ и ве́ру свою́ страда́нии запечатле́л еси́, те́мже мы́ дерза́ем ти́ похвалы́ сицевы́я воспе́ти:

Ра́дуйся, ве́ры свети́льниче неугаси́мый; ра́дуйся, испове́дания адама́нте несокруши́мый.

Ра́дуйся, служи́телю Госпо́день всеусе́рднейший; ра́дуйся, Небе́снаго Домовлады́ки ра́бе благи́й и ве́рный.

Ра́дуйся, па́стырю Це́ркви Христо́выя; ра́дуйся, тру́жениче вертогра́да Бо́жия.

Ра́дуйся, подви́жниче препросла́вленный; ра́дуйся, моли́твенниче о на́с всеусе́рднейший.

Ра́дуйся, о́тче Феодо́сие, преди́вный испове́дниче ве́ры Правосла́вныя.

Конда́к 1.

Избра́нному Го́сподом служи́телю Це́ркви Бо́жия, пресви́теру пра́ведному и ве́рному свиде́телю, Феодо́сию пресла́вному пе́сни принести́ дерза́ем и, по́двиги того́ воспева́юще, со умиле́нием зове́м:

Ра́дуйся, о́тче Феодо́сие, преди́вный испове́дниче ве́ры Правосла́вныя.

Моли́тва.

О, богодарова́нный пресви́тере и служи́телю Бо́жий, о́тче святы́й Феодо́сие, избра́нниче и па́стырю Христо́в! Ты́ измла́да Бо́га и́скренне возлюби́л еси́, ду́шу хра́мом Свята́го Ду́ха соде́лал еси́ изря́дно, всего́ себе́, я́ко же́ртву непоро́чну, Спа́су Христу́ преда́л еси́.

Ты́, свя́те, па́стырь ди́вный в земле́ на́шей на ра́дость и утеше́ние яви́лся еси́, да́ры Бо́жия лю́дям стра́ждущим показу́я. Те́мже и мы́, недосто́йнии и гре́шнии ча́да твоя́, дивя́щеся твоему́ пред Бо́гом дерзнове́нию, его́ же восприя́л еси́ за чистоту́ души́ твоея́, взыва́ем к тебе́ си́це: испроси́ благостоя́ние Це́ркви Ру́сстей, в мо́ре жите́йстем обурева́емей, Оте́честву на́шему ми́р и обновле́ние духо́вное; на́м же утвержде́ние и преспе́яние в ве́ре, христиа́нскую кончи́ну и Бо́жие милосе́рдие на Стра́шнем суде́ Христо́вом, иде́же пра́ведницы возсия́ют, я́ко со́лнце, с ни́миже да просла́вим ве́чно в Тро́ице пева́емаго Бо́га, Отца́ и Сы́на, и Свята́го Ду́ха. Ами́нь.