Конда́к 1.

Избра́нному подви́жнику земли́ на́шея, де́лы до́блестными во сла́ву Бо́жию досто́йне потруди́вшемуся, свято́му пра́ведному во́ину Фео́дору похва́льное прино́сим пе́ние. Ты́ же, уго́дниче Бо́жий, я́ко име́яй ве́лие дерзнове́ние ко Го́споду, от вся́ких на́с бе́д свободи́, зову́щих:

Ра́дуйся, святы́й пра́ведный Фео́доре, сла́вный в доброде́телех во́ине Христо́в.

И́кос 1.

А́нгели и боголюби́вии лю́дие дне́сь Христу́ Бо́гу благодаре́ние и славосло́вие прино́сят, яви́ бо тя́, пра́ведне во́ине Фео́доре, сла́внаго покрови́теля и защи́тителя Оте́честву на́шему. Мы́ же, ви́дяще тя́ предстоя́ща Престо́лу Бо́жию и ми́лости на́м у Го́спода прося́ща, со умиле́нием серде́чным воспева́ем:

Ра́дуйся, ро́да благочести́ваго рожде́ние; ра́дуйся, земли́ Яросла́вския многопло́дное прозябе́ние.

Ра́дуйся, А́нгела Храни́теля твоего́ непреста́нно возвеселя́яй; ра́дуйся, роди́тели и наста́вники твоя́ кро́тостию и усе́рдием удивля́яй.

Ра́дуйся, моли́твами свята́го сро́дника твоего́ в духо́вней бра́ни побежда́ти научи́выйся; ра́дуйся, в зако́не Госпо́дни непреста́нно поуча́выйся.

Ра́дуйся, ду́х ми́рен в души́ твое́й стяжа́вый; ра́дуйся, си́лою Креста́ Госпо́дня вся́ враги́ побежда́вый.

Ра́дуйся, любо́вь Христо́ву в се́рдце твое́м носи́вый; ра́дуйся, сла́дкою то́ю любо́вию ду́шу твою́ услади́вый.

Ра́дуйся, тезоиме́нному тебе́ Стратила́ту в иску́сстве воево́дстем уподо́бивыйся; ра́дуйся, тезоиме́нному тебе́ Ти́рону в ревнова́нии о Бо́зе подража́вый.

Ра́дуйся, святы́й пра́ведный Фео́доре, сла́вный в доброде́телех во́ине Христо́в.

Конда́к 2.

Ви́дяй Госпо́дь чистоту́ се́рдца твоего́, преизоби́льно дарова́ тебе́, Фео́доре пресла́вне, благода́ть Свою́, да то́ю укрепля́емый, житие́ твое́ поживе́ши во благоче́стии, прославля́я Творца́ твоего́ пе́снию: Аллилу́иа.

И́кос 2.

Ра́зум Боже́ственный просвети́ и укрепи́ тя, пра́ведне и достохва́льне Фео́доре, егда́ уче́ние кни́жное со усе́рдием познава́л еси́ и ве́лие прилежа́ние к сему́ име́л еси́. Егда́ же чи́ном во́инским почте́н бы́л еси́, обеща́ние пред Всемогу́щим Бо́гом, Святы́м Ева́нгелием Его́ и Кресто́м прине́сл еси́: ве́рно и нелицеме́рно Оте́честву служи́ти. Сего́ ра́ди приими́ от на́с похвалы́ сия́:

Ра́дуйся, па́че всего́ в ми́ре се́м Го́спода возлюби́вый; ра́дуйся, от ле́т млады́х чистоту́ жития́ сохрани́вый.

Ра́дуйся, ко прему́дрости кни́жней усе́рдие от ю́ности име́вый; ра́дуйся, пра́здность и суету́ ми́ра сего́ презре́вый.

Ра́дуйся, зако́н Госпо́день приле́жно изучи́вый; ра́дуйся, целому́дрия сокро́вище драго́е сохрани́вый.

Ра́дуйся, в стра́се Бо́жием до́бре наставле́ние получи́вый; ра́дуйся, в житии́ твое́м доброде́тели высо́кия возрасти́вый.

Ра́дуйся, ду́шу свою́ всеце́ло ко Го́споду устреми́вый; ра́дуйся, друго́м твои́м приме́р прилежа́ния бы́вый.

Ра́дуйся, христиа́нскаго благоче́стия неуста́нный блюсти́телю; ра́дуйся, ми́лости и по́мощи нужда́ющимся пода́телю.

Ра́дуйся, святы́й пра́ведный Фео́доре, сла́вный в доброде́телех во́ине Христо́в.

Конда́к 3.

Си́лою Бо́жиею укрепля́емь, все́ житие́ твое́ в пра́ведности проводи́л еси́, сла́вне во́ине Фео́доре, и, не щадя́ живота́ своего́, зе́млю на́шу от супоста́т защища́л еси́, Творцу́ же твоему́, в ра́тных де́лех вспомоществу́ющу ти́, воспева́л еси́ благода́рно: Аллилу́иа.

И́кос 3.

Име́яй в се́рдце свое́м ве́ру тве́рдую во Христа́ Иису́са и си́лою тоя́ вооружи́выйся, на моря́х Балти́йском и Азо́вском служе́ние твое́ ра́тное проходи́л еси́. Помози́ и на́м в ве́ре кре́пцей подража́ти тебе́, уго́дниче Бо́жий Фео́доре, да не поги́бнем в пучи́не беззако́ний на́ших, оба́че ра́достно да зове́м ти́:

Ра́дуйся, Ева́нгелия Христо́ва до́брый послу́шателю; ра́дуйся, за́поведей Иису́совых усе́рдный исполни́телю.

Ра́дуйся, Бо́гу житие́м твои́м соверше́нно угоди́вый; ра́дуйся, стра́сти в души́ твое́й победи́вый.

Ра́дуйся, Ду́ха Свята́го жили́ще, преукраше́нное чистото́ю; ра́дуйся, Бо́жия благода́ти прия́телище, сия́ющее доброде́телей красото́ю.

Ра́дуйся, Ца́рствия го́рняго ре́вностный иска́телю; ра́дуйся, ро́ду христиа́нскому бла́г Небе́сных хода́таю.

Ра́дуйся, Ду́хом Святы́м насыще́нный и просвеще́нный; ра́дуйся, собла́зны ми́ра сего́ су́етнаго не прельще́нный.

Ра́дуйся, измла́да Го́спода все́ю душе́ю возлюби́вый; ра́дуйся, в за́поведех Бо́жиих неукло́нно ходи́вый.

Ра́дуйся, святы́й пра́ведный Фео́доре, сла́вный в доброде́телех во́ине Христо́в.

Конда́к 4.

Бу́ри бе́д и искуше́ний не страши́лся еси́, свя́те Фео́доре, егда́ прибы́в в богоспаса́емый гра́д Херсо́н, слу́жбу твою́ соверша́л еси́; Госпо́дь же укрепля́ше тя́, да труды́ твои́ми кра́й Херсо́нский просла́виши, воспева́я: Аллилу́иа.

И́кос 4.

Слы́шаще и ви́дяще вси́ лю́дие гра́да Херсо́на, я́ко моровы́м пове́трием гра́д и́х одержи́мь бы́сть, на Еди́наго Го́спода все́ упова́ние возложи́ша. Ты́ же, пра́ведне Фео́доре, свы́ше Го́сподем вразумле́нный, вве́ренныя ти́ во́ины от тя́жкия боле́зни огради́л еси́. Те́мже и мы́, усе́рдно к тебе́ прибега́юще, смире́нно мо́лим: упра́ви на́с предста́тельством твои́м к ти́хому и ми́рному житию́, и сподо́би наслажда́тися нетле́нныя ра́дости вопию́щия ти́:

Ра́дуйся, бли́жним твои́м благоде́телю ми́лостивый; ра́дуйся, за ди́вное милосе́рдие твое́ Го́сподем храни́мый.

Ра́дуйся, изнемога́ющих внеза́пное укрепле́ние; ра́дуйся, уныва́ющим благода́тное ободре́ние.

Ра́дуйся, бли́жняго своего́ я́ко себе́ возлюби́вый; ра́дуйся, ме́ньшей бра́тии твое́й я́ко Христу́ послужи́вый.

Ра́дуйся, скорбя́щих благи́й уте́шителю; ра́дуйся, бла́г ве́чных на́м от Го́спода пода́телю.

Ра́дуйся, ри́зу душе́вную чистото́ю убели́вый; ра́дуйся, ра́тными по́двиги твои́ми все́х удиви́вый.

Ра́дуйся, ми́лостию и сострада́нием ду́шу твою́ напо́лнивый; ра́дуйся, служа́щих с тобо́ю на пу́ть благоче́стия напра́вивый.

Ра́дуйся, святы́й пра́ведный Фео́доре, сла́вный в доброде́телех во́ине Христо́в.

Конда́к 5.

Богото́чный исто́чник дарова́ний духо́вных яви́лся еси́, боголюби́ве Фео́доре, и за вели́кия по́двиги твоя́ са́ны во́инскими почте́н бы́л еси́. Оба́че ве́мы, я́ко не по́чести челове́ков, но мзды́ Го́спода твоего́ жа́ждал еси́, благода́рно к Нему́ взыва́я: Аллилу́иа.

И́кос 5.

Ви́дев, я́ко в защище́нии люде́й правосла́вных не довле́ет наде́ятися на си́лы челове́ческия, все́ упова́ние твое́ возложи́л еси́ на Го́спода, Фео́доре, в моли́тве по́мощи у Него́ и му́дрости прося́. Сего́ ра́ди, мы́сленно созерца́я тя́ горе́ и ны́не за ны́ моля́щагося, возсыла́ем ти́ пе́ние сие́:

Ра́дуйся, в терпе́нии мно́зем па́че ины́х преуспе́вый; ра́дуйся, за́поведи Госпо́дни в се́рдце свое́м ве́рно храни́вый.

Ра́дуйся, приле́жно во сла́ву Бо́жию подвиза́выйся; ра́дуйся, во бла́го люде́й правосла́вных сла́вно потруди́выйся.

Ра́дуйся, к Бо́гу и бли́жним вели́кия любве́ горе́ние; ра́дуйся, Це́ркве Христо́вы благода́тное удобре́ние.

Ра́дуйся, пло́ть свою́ ду́хови всеце́ло покори́вый; ра́дуйся, плоды́ духо́вныя ми́ру преизоби́льно яви́вый.

Ра́дуйся, обетова́ний Иису́совых досто́йный насле́дниче; ра́дуйся, А́нгелом и святы́м преди́вный собесе́дниче.

Ра́дуйся, гне́в на бли́жняго твоего́ до конца́ в себе́ умертви́вый; ра́дуйся, уста́ своя́ от клеветы́ и непра́вды огради́вый.

Ра́дуйся, святы́й пра́ведный Фео́доре, сла́вный в доброде́телех во́ине Христо́в.

Конда́к 6.

Пропове́дник ве́ры Христо́вы и благоче́стия христиа́нскаго не сло́вом то́чию, но и де́лом яви́лся еси́, богому́дре Фео́доре, я́ко оте́ц благи́й бы́вый вве́ренным ти́ лю́дем, о́браз и́м жития́ по за́поведем Христо́вым подава́яй. Моли́ся у́бо, да и мы́, в жите́йстем мо́ри су́щии, к ти́хому приста́нищу, Го́споду на́шему, притеце́м, во умиле́нии зову́ще: Аллилу́иа.

И́кос 6.

Возсия́ в тебе́ оби́льно благода́ть Бо́жия, пра́ведне Фео́доре, егда́ вве́рено ти́ бы́сть управле́ние фло́том Черномо́рским, да сверши́ши по́мощию от Вы́шняго, е́же челове́ком невозмо́жно бе́. Таково́му о тебе́ Бо́жию промышле́нию ра́дующеся, зове́м:

Ра́дуйся, доброде́тельми твои́ми Небе́сныя да́ры улучи́вый; ра́дуйся, воспомина́нием страда́ний Христо́вых ско́рби твоя́ услади́вый.

Ра́дуйся, терпе́нием твои́м мно́гим святы́м уго́дником уподо́бивыйся; ра́дуйся, пред А́нгелы пресве́тлыми не посрами́выйся.

Ра́дуйся, всего́ себе́ в во́лю Бо́жию безро́потно преда́вый; ра́дуйся, боле́зньми твои́ми здра́вие души́ твоея́ стяжа́вый.

Ра́дуйся, за дру́ги своя́ ду́шу полага́вый; ра́дуйся, со все́ми в ми́ре пребыва́ти жела́вый.

Ра́дуйся, до́брыми де́лы Бо́га прославля́яй; ра́дуйся, зе́млю на́шу от враго́в охраня́яй.

Ра́дуйся, ди́вный о́браз любве́ Отца́ Небе́снаго в себе́ яви́вый; ра́дуйся, братолю́бием христиа́нским до́льний ми́р удиви́вый.

Ра́дуйся, святы́й пра́ведный Фео́доре, сла́вный в доброде́телех во́ине Христо́в.

Конда́к 7.

Хотя́й Человеколю́бец Госпо́дь защити́ти страну́ на́шу от наше́ствия ага́рянскаго, вдохнови́ тя, сла́вне Фео́доре, на вели́кия по́двиги, ко́ими туре́цкий фло́т низложе́н бы́сть и лю́дем правосла́вным ми́рное жи́тельство дарова́но бы́сть. Да́ждь у́бо и на́м благо́е утеше́ние в ми́рнем житии́ от Го́спода прия́ти, Ему́же А́нгельскую пе́снь прино́сим: Аллилу́иа.

И́кос 7

Но́выя тала́нты приобре́л еси́, святы́й во́ине Фео́доре, егда́ несомне́нным упова́нием на по́мощь Бо́жию вся́ враги́ побежда́л еси́. Те́мже и на́с, моли́твами твои́ми враги́ неви́димыя побежда́ющих, в го́рния оби́тели приведи́, восхваля́ющих тя́:

Ра́дуйся, высото́ю по́двигов твои́х А́нгелы удиви́вый; ра́дуйся, кре́постию произволе́ния твоего́ де́моны посрами́вый.

Ра́дуйся, му́жество ве́лие во все́х твори́мых бра́нех показа́вый; ра́дуйся, вене́ц побе́ды досто́йно восприе́мый.

Ра́дуйся, во уме́нии флотово́дчестем изря́дно преуспе́вый; ра́дуйся, во сла́ву Бо́жию и на бла́го наро́да сие́ употреби́вый.

Ра́дуйся, христиа́нскаго ро́да ве́лие и сла́вное возвыше́ние; ра́дуйся, го́рняго ми́ра пресве́тлое ра́дование и украше́ние.

Ра́дуйся, за враги́ твоя́ с любо́вию моли́выйся; ра́дуйся, проща́ти все́х у Христа́ научи́выйся.

Ра́дуйся, о́браз ве́рнаго служе́ния Го́сподеви показа́вый; ра́дуйся, ди́вное отверже́ние себе́, спасе́ния ра́ди бли́жних, прояви́вый.

Ра́дуйся, святы́й пра́ведный Фео́доре, сла́вный в доброде́телех во́ине Христо́в.

Конда́к 8.

Стра́нное и пресла́вное чу́до соверши́ся, егда́ ты́, достоблаже́нне Фео́доре, ве́лию святы́ню, мо́щи уго́дника Бо́жия Спиридо́на Тримифу́нтскаго, на о́строве Керки́ре пребыва́ющия, от лю́тых супоста́т свободи́л еси́ и в де́нь Святы́я Па́схи со сла́вою мно́гою на ра́менах твои́х пренесе́ние и́х сверши́л еси́. Те́мже моли́ся за ны́, да изба́влени бу́дем от вра́г ви́димых и неви́димых и да возгори́тся в сердца́х на́ших о́гнь любве́ ко Влады́це Христу́, во е́же пе́ти Ему́: Аллилу́иа.

И́кос 8

Всего́ себе́ во́ли Бо́жией преда́в, служе́ние ра́тное сверша́л еси́, пра́ведне Фео́доре. Мы́ же, зря́ще сие́, со умиле́нием пое́м ти́:

Ра́дуйся, Христа́ Бо́га я́ко Хле́ба Жи́зни взалка́вый; ра́дуйся, Те́м ду́шу твою́ неизме́нно пита́вый.

Ра́дуйся, Пречи́стыя Кро́ве Его́ я́ко и́стиннаго пития́ приобща́выйся; ра́дуйся, ко пресла́вным пра́ведником приложи́выйся.

Ра́дуйся, за усе́рдие твое́ мзду́ от Вы́шняго восприе́мый; ра́дуйся, и́мя Его́ на земли́ житие́м свои́м просла́вивый.

Ра́дуйся, Царя́ царе́й Христа́ Го́спода служи́телю; ра́дуйся, чи́стых се́рдцем смире́нный и му́дрый учи́телю.

Ра́дуйся, тала́нт во́инский я́ко ве́лий да́р Бо́жий прие́мый; ра́дуйся, повинова́тися во́ли Госпо́дней все́х науча́вый.

Ра́дуйся, Оте́честву на́шему неустраши́мый защи́тниче; ра́дуйся, Правосла́вия ре́вностный пропове́дниче.

Ра́дуйся, святы́й пра́ведный Фео́доре, сла́вный в доброде́телех во́ине Христо́в.

Конда́к 9.

Вси́ лю́дие е́ллинстии, свобо́ду от злоко́зненных вра́г тобо́ю получи́вшии, достосла́вне Фео́доре, благода́рни тебе́ за сие́ бы́ша, отце́м свои́м тя́ велича́юще. Ты́ же за вся́ сия́ Бо́га благодари́л еси́, я́ко дарова́ ти си́лу и му́жество, да послу́жиши не то́кмо своему́, но и ины́м язы́ком правосла́вным, да вси́ пою́т еди́ными усты́ и еди́ным се́рдцем: Аллилу́иа.

И́кос 9.

Вети́йство челове́ческое не довле́ет, свя́те Фео́доре, к восхвале́нию все́х преди́вных трудо́в и побе́д твои́х, наипа́че же му́жества, с ко́им претерпева́л еси́ вся́ ско́рби и лише́ния, клевету́ и за́висть, от вра́г твои́х исходя́щия. Те́мже, велича́юще вся́ по́двиги, терпе́ние и труды́ твоя́, прославля́ем тя́ си́це:

Ра́дуйся, ду́шу твою́ кро́тко Го́сподеви вручи́вый; ра́дуйся, и́скренних свои́х христиа́нскому терпе́нию научи́вый.

Ра́дуйся, ра́дости духо́вныя боголюби́вым душа́м пода́телю; ра́дуйся, но́вый на́ш пред Бо́гом моли́твенниче и предста́телю.

Ра́дуйся, я́ко твои́ми моли́твами Госпо́дь оставля́ет на́м прегреше́ния; ра́дуйся, помога́яй на́м претерпева́ти ско́рби и поноше́ния.

Ра́дуйся, не своея́ сла́вы, но Бо́жия непреста́нно иска́вый; ра́дуйся, вене́ц пра́ведничь от Царя́ Небе́снаго восприе́мый.

Ра́дуйся, миротво́рцев и правдолю́бцев любвеоби́льный наста́вниче; ра́дуйся, Бо́жия пра́вды преди́вный пропове́дниче.

Ра́дуйся, живота́ своего́ за бли́жния своя́ николи́же щади́вый; ра́дуйся, ду́шу свою́ за дру́ги своя́ положи́вый.

Ра́дуйся, святы́й пра́ведный Фео́доре, сла́вный в доброде́телех во́ине Христо́в.

Конда́к 10.

Спасти́ся хотя́щим приме́р благи́й житие́ твое́ бы́сть, пра́ведне Фео́доре, и́мже вся́ ны́ науча́еши иска́ти еди́наго на потре́бу, е́же е́сть богоугожде́ние. Помози́ у́бо и на́м в се́м тебе́ подража́ти, вдохни́ в на́с му́жество душе́вное, украси́ на́с доброде́тельми Небе́сными, да с тобо́ю возмо́жем сонасле́дники Ца́рствия Небе́снаго бы́ти и воспева́ти Созда́телю на́шему: Аллилу́иа.

И́кос 10.

Стена́ огражде́ния в Це́ркви Правосла́вней яви́лся еси́, сла́вне Фео́доре, защища́еши бо лю́ди ве́рныя от вра́г ви́димых и неви́димых; не сокры́т же бы́сть и свети́льник доброде́телей твои́х, да све́том, от него́ исходя́щим, прославля́еши Отца́ Небе́снаго. Мы́ же, чту́щии па́мять твою́, со умиле́нием взира́юще на о́браз тво́й святы́й, с ра́достию зове́м:

Ра́дуйся, лжи́ и кова́рства нелицеме́рный обличи́телю; ра́дуйся, ве́ры правосла́вныя неуста́нный насади́телю.

Ра́дуйся, житие́м твои́м А́нгелы возвесели́вый; ра́дуйся, пра́ведностию твое́ю ду́хи тьмы́ посрами́вый.

Ра́дуйся, бе́дствующим до́брый предста́телю; ра́дуйся, за оби́димых и унижа́емых при́сный хода́таю.

Ра́дуйся, кро́тость Христо́ву в се́рдце твое́ восприе́мый; ра́дуйся, смире́нию Его́ притека́ющия к тебе́ науча́вый.

Ра́дуйся, заблу́ждших наста́вниче и скорбя́щих уте́шителю; ра́дуйся, прося́щим по́мощи твоея́ ско́рый пода́телю.

Ра́дуйся, я́ко и по преставле́нии твое́м ми́лости твори́ти не престае́ши; ра́дуйся, я́ко моля́щимся у гро́ба твоего́ ско́рую по́мощь подае́ши.

Ра́дуйся, святы́й пра́ведный Фео́доре, сла́вный в доброде́телех во́ине Христо́в.

Конда́к 11.

Пе́ние всеумиле́нное Триеди́ному Бо́гу прине́сл еси́, блаже́нне Фео́доре, в Санакса́рской оби́тели, иде́же от ра́тных по́двигов почива́я, в моли́тве пла́менней душе́ю свое́ю ко Го́споду всеце́ло устреми́лся еси́. Те́мже сподо́би тя́ Госпо́дь причасти́тися Святы́х Свои́х Та́ин пред сла́вною кончи́ною твое́ю. Ны́не же предстоя́ у Престо́ла Царя́ Сла́вы, моли́ся, да и мы́ ду́ши своя́ Нетле́нному Жениху́ Христу́ чи́стыя принесе́м со А́нгельским пе́нием: Аллилу́иа.

И́кос 11

Светоза́рное свети́ло, на не́бе церко́внем возсия́вшее, зри́м тя́, пра́ведне во́ине Фео́доре, зане́ и ны́не све́тиши на́м зна́мении и чудесы́, от святы́х моще́й твои́х истека́ющими. Те́мже, благода́рственная Бо́гу принося́ще о тебе́ пе́ния, взыва́ем ти́ си́це:

Ра́дуйся, во Иису́се Сладча́йшем еди́ное утеше́ние обрета́яй; ра́дуйся, к бе́дствующим на по́мощь стопы́ твоя́ ускоря́яй.

Ра́дуйся, окамене́ннаго нечу́вствия серде́ц на́ших цели́телю; ра́дуйся, во отча́янии су́щим благи́я наде́жды пода́телю.

Ра́дуйся, я́ко тобо́ю ве́рнии и́стиною Христо́вою просвеща́ются; ра́дуйся, я́ко тобо́ю пока́явшиися от посты́дныя сме́рти избавля́ются.

Ра́дуйся, чуде́сная исцеле́ния от святы́х моще́й твои́х оби́льно источа́яй; ра́дуйся, николи́же во отча́яние впа́дати на́с науча́яй.

Ра́дуйся, пра́ведною кончи́ною твое́ю пра́ведность жития́ твоего́ запечатле́вый; ра́дуйся, в ра́йских оби́телех Творца́ и Спаси́теля с ра́достию узре́вый.

Ра́дуйся, я́ко тобо́ю и доны́не ве́рнии от вра́г избавля́ются; ра́дуйся, я́ко тобо́ю оби́тель Санакса́рская торжеству́ет и прославля́ется.

Ра́дуйся, святы́й пра́ведный Фео́доре, сла́вный в доброде́телех во́ине Христо́в.

Конда́к 12.

Благода́ти и ми́лости испроси́ на́м у Христа́, Созда́теля и Влады́ки на́шего, пресла́вне Фео́доре, мно́го бо мо́жет моли́тва пра́ведника пред лице́м Его́. Мы́ же душа́ми на́шими умиля́емся, я́ко яви́ на́м Госпо́дь во утеше́ние святы́я мо́щи твоя́, вопию́щим Ему́: Аллилу́иа.

И́кос 12.

Пою́ще неисче́тныя по́двиги преди́внаго жития́ твоего́, вели́кий во́ине и флотово́дче Фео́доре, хва́лим и ублажа́ем тя́ я́ко Небе́снаго покрови́теля на́шего. Ты́ же да́нною ти́ свы́ше благода́тию пода́ждь на́м поле́зная ко спасе́нию ду́ш на́ших, да при́сно тя́ велича́ем:

Ра́дуйся, свя́тче Бо́жий, свя́то и пра́ведно жи́знь земну́ю сверши́вый; ра́дуйся, во благоуха́нии святы́ни сно́м блаже́нным опочи́вый.

Ра́дуйся, вели́кий флотово́дче, Бо́гом на укрепле́ние на́м дарова́нный; ра́дуйся, венце́м безсме́ртныя жи́зни от Го́спода увенча́нный.

Ра́дуйся, пресве́тлое лице́ Созда́теля всегда́ созерца́яй; ра́дуйся, Пресвяте́й Тро́ице пе́снь немо́лчно возглаша́яй.

Ра́дуйся, Го́спода хода́тайством твои́м умилостивля́яй; ра́дуйся, Це́рковь Ру́сскую покрови́тельством твои́м защища́яй.

Ра́дуйся, я́ко и́мя твое́ со святы́ми прославля́ется; ра́дуйся, я́ко моли́твами твои́ми гра́ды и ве́си на́ши утвержда́ются.

Ра́дуйся, Престо́лу Царя́ Небе́снаго во сла́ве предстоя́й; ра́дуйся, о все́х ве́рных лю́дех Го́споду моли́твы вознося́й.

Ра́дуйся, святы́й пра́ведный Фео́доре, сла́вный в доброде́телех во́ине Христо́в.

Конда́к 13.

О пресла́вный во́ине и му́жественный флотово́дче Фео́доре, приими́ от на́с сие́ ма́лое похва́льное пе́ние, е́же пред ико́ною твое́ю [или́: святы́ми мощьми́ твои́ми] ны́не воспева́ем, и моли́твами твои́ми испроси́ на́м у Христа́ Бо́га изба́витися от бе́д, скорбе́й и напа́стей, наипа́че же от внеза́пныя сме́рти и ве́чныя му́ки, бу́ди на́м путево́ждь во блаже́нныя оби́тели Небе́сныя, да та́мо с тобо́ю воспое́м Бо́гу: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгели и боголюби́вии лю́дие дне́сь Христу́ Бо́гу благодаре́ние и славосло́вие прино́сят, яви́ бо тя́, пра́ведне во́ине Фео́доре, сла́внаго покрови́теля и защи́тителя Оте́честву на́шему. Мы́ же, ви́дяще тя́ предстоя́ща Престо́лу Бо́жию и ми́лости на́м у Го́спода прося́ща, со умиле́нием серде́чным воспева́ем:

Ра́дуйся, ро́да благочести́ваго рожде́ние; ра́дуйся, земли́ Яросла́вския многопло́дное прозябе́ние.

Ра́дуйся, А́нгела Храни́теля твоего́ непреста́нно возвеселя́яй; ра́дуйся, роди́тели и наста́вники твоя́ кро́тостию и усе́рдием удивля́яй.

Ра́дуйся, моли́твами свята́го сро́дника твоего́ в духо́вней бра́ни побежда́ти научи́выйся; ра́дуйся, в зако́не Госпо́дни непреста́нно поуча́выйся.

Ра́дуйся, ду́х ми́рен в души́ твое́й стяжа́вый; ра́дуйся, си́лою Креста́ Госпо́дня вся́ враги́ побежда́вый.

Ра́дуйся, любо́вь Христо́ву в се́рдце твое́м носи́вый; ра́дуйся, сла́дкою то́ю любо́вию ду́шу твою́ услади́вый.

Ра́дуйся, тезоиме́нному тебе́ Стратила́ту в иску́сстве воево́дстем уподо́бивыйся; ра́дуйся, тезоиме́нному тебе́ Ти́рону в ревнова́нии о Бо́зе подража́вый.

Ра́дуйся, святы́й пра́ведный Фео́доре, сла́вный в доброде́телех во́ине Христо́в.

Конда́к 1.

Избра́нному подви́жнику земли́ на́шея, де́лы до́блестными во сла́ву Бо́жию досто́йне потруди́вшемуся, свято́му пра́ведному во́ину Фео́дору похва́льное прино́сим пе́ние. Ты́ же, уго́дниче Бо́жий, я́ко име́яй ве́лие дерзнове́ние ко Го́споду, от вся́ких на́с бе́д свободи́, зову́щих:

Ра́дуйся, святы́й пра́ведный Фео́доре, сла́вный в доброде́телех во́ине Христо́в.

Моли́тва пе́рвая.

О пресла́вный и достохва́льный во́ине, флотово́дче Фео́доре, Небе́сный на́ш засту́пниче и кре́пкий защи́тниче! Дне́сь, па́мять твою́ почита́юще, смире́нно мо́лим тя́: вознеси́ о на́с ко Го́споду Бо́гу те́плыя твоя́ моли́твы и испроси́ у Него́ оставле́ние все́х согреше́ний на́ших, и́миже преогорчева́ем Его́. Умоли́ Го́спода дарова́ти на́м ко Оте́честву на́шему любо́вь нелицеме́рную, ми́р и благоде́нствие Це́ркви на́шей Правосла́вней, все́м же на́м теле́сное здра́вие и душе́вное спасе́ние, христиа́нскую кончи́ну живота́ на́шего и до́брый отве́т на Стра́шнем Суде́ Его́. Е́й, свя́тче Бо́жий, не посрами́ упова́ния на́шего, е́же на тя́ по Бо́зе и Богоро́дице возлага́ем, да, твои́ми моли́твами получи́вше благода́ть и ми́лость от Го́спода, просла́вим человеколю́бие Отца́, и Сы́на, и Свята́го Ду́ха, и твое́ свято́е заступле́ние, ны́не и при́сно, и во ве́ки веко́в. Ами́нь.

Моли́тва втора́я.

О пра́ведне во́ине, флотово́дче Фео́доре! Прини́кни с го́рних селе́ний на притека́ющия к тебе́ с ве́рою и вонми́ моле́нию на́шему! Ты́ вели́кое служе́ние, возложе́нное на тя́, со тща́нием проходи́л еси́, те́мже и коего́ждо от на́с в зва́нии, в не́мже при́звани есмы́ пребыва́ти, укрепи́. Ты́ супоста́тов мно́жества победи́л еси́, те́мже и на на́с ополча́ющихся ви́димых и неви́димых враго́в низложи́. Умоли́ Го́спода Бо́га дарова́ти Оте́честву на́шему кре́пкий и неруши́мый ми́р, власте́м му́дрость, па́стырем святы́ню, зако́ном си́лу, градонача́льником су́д пра́вый, военача́льником, фло́ту Росси́йскому и всему́ во́инству на́шему му́жество неодоли́мое, все́м же правосла́вным христиа́ном здра́вие и благоче́стие. Сохраня́й страну́ на́шу Росси́йскую [и оби́тель сию́ святу́ю] от все́х наве́тов вра́жиих, да сло́вом и де́лом прославля́ется в не́й [или́: в ни́х] всесвято́е и́мя Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.