Конда́к 1.

Избра́нному Бо́гом во игу́мена оби́тели Высо́цкия и ди́вному в преподо́бных отцу́ на́шему Афана́сию соста́вим похвалу́! То́й бо, я́ко оте́ц чадолюби́вый, мо́лит за ны́ просла́вльшаго его́ Го́спода да сохрани́т оби́тель сию́ от нестрое́ний и наве́тов злы́х челове́к и на́с все́х соблюде́т в ми́ре и единомы́слии и любви́; мы́ же любо́вию сыно́вней к нему́ преиспо́лненнии, со умиле́нием благода́рственно зове́м ди́вному уго́днику Христо́ву:

Ра́дуйся, преподо́бне о́тче на́ш Афана́сие, Высо́цкий чудотво́рче.

И́кос 1.

А́нгелов Творе́ц и всея́ тва́ри Созда́тель, яви́вый Це́ркви Святе́й всесве́тлаго свети́льника, от гра́да Яросла́вля призва́вый тя́, преподо́бне о́тче на́ш Афана́сие, в преде́лы гра́да Се́рпухова во оби́тель Пречи́стыя Де́вы и́же на Высо́ком приведе́ тя́. Мы́ же, ви́дя соверше́ние благи́я во́ли Госпо́дни на тебе́, с любо́вию вопие́м ти́ си́це:

Ра́дуйся, гра́да Яросла́вля пресла́вное прозябе́ние; ра́дуйся, проро́ка дре́вняго Амо́са и́мя получи́вый при креще́нии.

Ра́дуйся, я́ко из де́тска у́м и ду́шу твою́ Го́сподеви преда́вый; ра́дуйся, любве́ ра́ди ко Го́споду до́м оте́ческий оста́вивый.

Ра́дуйся, во оби́тель Высо́цкую прише́дый и та́мо поко́й душе́ свое́й обреты́й: ра́дуйся, от ю́ности твоея́ яре́м Христо́в на ся́ восприя́вый.

Ра́дуйся, богому́дрым учи́телем твои́м Афана́сием в мона́шестем де́лании умудре́нный; ра́дуйся, о́браз и́ноческаго доброде́лания чрез все́ житие́ твое́ пронесы́й.

Ра́дуйся, преподо́бне о́тче на́ш Афана́сие, Высо́цкий чудотво́рче.

Конда́к 2.

Ви́дев преподо́бный Афана́сий стро́гия уста́вы оби́тели Высо́цкия возра́довался ду́хом: изде́тска бо жела́ху по́стное и́ноческое житие́ на себе́ восприя́ти и Бо́гу пе́ти: Аллилу́иа.

И́кос 2.

Разуме́ преподо́бный учи́тель тво́й Афана́сий ве́лию ре́вность твою́ по Бо́зе и я́ко богоуго́дным житие́м твои́м безсме́ртие улучи́ши духо́вное, Афана́сием тя́ нарека́ет — безсме́ртию тезоимени́тым содева́ет. Восхваля́юще ди́вное житие́ твое́, преподо́бне, прино́сим ти́ сия́ похва́льныя словеса́:

Ра́дуйся, блаже́ннаго Афана́сия, пе́рваго игу́мена Высо́цкаго, люби́мый учениче́; ра́дуйся, от руки́ его́ по́стриг мона́шеский прие́мый.

Ра́дуйся, Афана́сием и́м нарече́нный; ра́дуйся, руково́дством его́ ко спасе́нию ве́чному напра́вленный.

Ра́дуйся, духо́внаго отца́ своего́ Афана́сия блага́я о́трасле и духодви́жная; ра́дуйся, я́ко во игу́мена оби́тели Высо́цкой и́м поста́вленный.

Ра́дуйся, вельми́ во вре́менней се́й жи́зни подвиза́выйся и мно́гих ко спасе́нию приведы́й; ра́дуйся, я́ко и по ны́не руково́дствуеши ны́ во Оте́чество Небе́сное моли́твами твои́ми.

Ра́дуйся, преподо́бне о́тче на́ш Афана́сие, Высо́цкий чудотво́рче.

Конда́к 3.

Си́лою Вы́шняго управля́емь учи́тель тво́й, преподо́бне о́тче, со святи́телем Киприа́ном Царягра́да дости́же и та́мо престо́л Патриа́ршия сла́вы насле́дова, отту́ду бо утеша́ху тя́, подвиза́я пе́ти: Аллилу́иа.

И́кос 3.

Име́я в и́ночестем житии́ му́драго наста́вника блаже́ннаго Афана́сия, преуспева́л еси́ преподо́бне, в по́двизех и труде́х, восходя́ от си́лы в си́лу, да соверше́н и́нок яви́шися и оте́ц бра́тии чадолюби́вый. Мы́ же, воспева́я по́двиги и труды́ твоя́, взыва́ем ти́ си́це:

Ра́дуйся, все́х любе́зно в до́брое и спаси́тельное приста́нище наставля́ющий; ра́дуйся, в мона́шеское оти́шие, а́ки в не́коем корабле́ безопа́сном, к тебе́ приходя́щих води́телю.

Ра́дуйся, собра́нное тобо́ю духо́вное ста́до бо́дренным о́ком вы́ну назира́ющий; ра́дуйся, твои́х ученико́в и насле́дников непреста́нно на пу́ть Бо́жиих за́поведей наставля́ющий.

Ра́дуйся, не сло́вом то́чию, но мно́жае па́че де́лом и усе́рдною к Бо́гу моли́твою и́х поуча́ющий; ра́дуйся, твои́х купножи́телей мона́шескими пра́вилы красно́ и боголе́пно украша́ющий.

Ра́дуйся, за́поведей и веле́ний Бо́жиих усе́рднейший исполни́телю; ра́дуйся, к чи́стому и непоро́чному житию́ благопоспе́шный предводи́телю.

Ра́дуйся, преподо́бне о́тче на́ш Афана́сие, Высо́цкий чудотво́рче.

Конда́к 4.

Бу́рю жите́йскаго мо́ря воздвиза́емую на лю́ди Христо́вы человекоуби́йцею искони́ диа́волом науча́л еси́ безбе́дно преходи́ти, глаго́ля: «сохраня́йтеся в ма́лом, да не впаде́те в вели́кая, блюди́те помышле́ния ва́ша немяте́жна и Бо́гу по́йте при́сно: Аллилу́иа».

И́кос 4.

Слы́шаша бли́жнии и да́льнии богоуго́дное житие́ твое́, Афана́сие о́тче на́ш, и к пото́ку богодухнове́нных слове́с твои́х во мно́жестве притека́ху, с весе́лием зову́ще тебе́:

Ра́дуйся, о́тче на́ш пресла́вный; ра́дуйся, па́стырю на́ш предо́брый.

Ра́дуйся, наста́вниче на́ш, Бо́гом науче́нный; ра́дуйся, доброде́тели вся́кия пра́вило.

Ра́дуйся, разсужде́ния да́ром почте́нный; ра́дуйся, смире́нием на высоту́ вознесе́нный.

Ра́дуйся, благочести́вым житие́м твои́м мно́гия приведы́й ко спасе́нию; ра́дуйся, богоуго́дными словесы́ твои́ми к Небеси́ указа́вый ве́рнейший пу́ть восхожде́ния.

Ра́дуйся, преподо́бне о́тче на́ш Афана́сие, Высо́цкий чудотво́рче.

Конда́к 5.

Боготе́чное свети́ло, пу́ть жи́зни твоея́ озаря́ющее, бы́сть тебе́ учи́тель тво́й святи́тель Царегра́дский Афана́сий, из страны́ бо да́льния со иеромона́хом Ви́ктором чу́дныя ико́ны и ины́я потре́бныя ве́щи оби́тели твое́й да́рствует, пою́ще все́х благи́х Пода́телю Бо́гу: Аллилу́иа.

И́кос 5.

Ви́деша, преподо́бне о́тче на́ш Афана́сие, ди́вный да́р наста́вника твоего́, разуме́ша ско́рбь его́ ве́лию о оте́чествии свое́м. И моля́ху о не́м Го́спода, да уте́шит его́ во стране́ чужде́й су́ща. Моли́ся и о на́с, ча́дех твои́х, во юдо́ли се́й плаче́вней жи́тельствующих и к твоему́ предста́тельству прибега́ющих и та́ко тебе́ вопию́щих:

Ра́дуйся, непреста́нными моли́твами се́рдце твое́ освяти́вый; ра́дуйся, мы́сль твою́ в Бо́зе утверди́вый.

Ра́дуйся, очеса́ твоя́ всегда́ на не́бо возводи́вый; ра́дуйся, моли́твою твое́ю отца́ твоего́ духо́внаго уте́шивший.

Ра́дуйся, я́ко от Го́рних высо́т и на́с, многогре́шных, ми́лостиво назира́еши; ра́дуйся, в беда́х и обстоя́ниих помо́щниче ско́рый.

Ра́дуйся, предста́телю о на́с пред Го́сподем непосты́дный; ра́дуйся, к Богоро́дице моли́твенниче на́ш неусы́пный.

Ра́дуйся, преподо́бне о́тче на́ш Афана́сие, Высо́цкий чудотво́рче.

Конда́к 6.

Пропове́дник богоно́сный бы́в, о́тче на́ш Афана́сие, и́стинному богове́дению и благоче́стию науча́л еси́ бра́тию твою́ при́сно, па́че же о́бразом жития́ своего́ наставля́я на пу́ть спасе́ния, да вопию́т вси́ Спаси́телю Бо́гу: Аллилу́иа.

И́кос 6.

Возсия́л еси́ во оби́тели Высо́цкой в дому́ Пречи́стыя Де́вы Богоро́дицы в сла́внем гра́де Се́рпухове, преподо́бне, ди́вным житие́м твои́м, я́коже свети́ло многосве́тлое, тьму́ неве́дения и уны́ния от приходя́щих к тебе́ отгоня́я и вся́ увещава́я пло́ть ду́хови покоря́ти и невозвра́тным по́мыслом Христу́ рабо́тати. Сего́ ра́ди приими́ от на́с похвалы́ сия́:

Ра́дуйся, милосе́рдием твои́м на покая́ние подвиза́яй; ра́дуйся, никого́же приходя́щаго к тебе́ во́н изгоня́яй.

Ра́дуйся, го́ресть жития́ моли́твою услажда́ти науча́яй; ра́дуйся, во Еди́ном Бо́зе всю́ сла́дость жития́ полага́ти вразумля́яй.

Ра́дуйся, прия́тное благоуха́ние духо́внаго умиле́ния; ра́дуйся, оби́тель Высо́цкую и гра́д Се́рпухов моли́твою твое́ю облагоуха́вый.

Ра́дуйся, де́лателю благи́й, в ма́ле ве́рный, над мно́гим поста́вленный; ра́дуйся, в ра́дость Го́спода твоего́ вше́дый.

Ра́дуйся, преподо́бне о́тче на́ш Афана́сие, Высо́цкий чудотво́рче.

Конда́к 7.

Хотя́щу Всевы́шнему Мироправи́телю призва́ти пра́ведника своего́ в Небе́сныя Ски́нии по нема́лых ле́тех во игу́менстве пребы́вша, на кончи́ну изнеможе́ние ста́рческое и ско́рбь телесе́ прия́л еси́, преподо́бне, я́коже И́ов о́ный не престава́я благословля́ти Го́спода и пе́ти Ему́: Аллилу́иа.

И́кос 7.

Но́во и необыча́йно тече́ние соверши́л еси́ жития́ твоего́, свя́тче Бо́жий, в ми́ре се́м чу́ждо вся́кия скве́рны грехо́вныя, сего́ бо ра́ди а́ще и у́мерл еси́ на земли́ пло́тию, но душе́ю в вы́шнем селе́нии всегда́ жи́в сы́й, на́м же, во святе́й оби́тели твое́й живу́щим, те́плым твои́м хода́тайством посо́бствуеши, вопию́щим к тебе́ такова́я:

Ра́дуйся, А́нгелов подо́бниче и челове́ков красото́; ра́дуйся, свя́тости и чистоты́ кри́не благоуха́нный.

Ра́дуйся, терпе́нием твои́м с многострада́льным И́овом сравни́выйся; ра́дуйся, боле́зньми мно́гими здра́вие души́ стяжа́вый.

Ра́дуйся, жи́телю Боже́ственнаго селе́ния; ра́дуйся, дости́гий ве́чнаго упокое́ния.

Ра́дуйся, всесве́тлаго Ца́рствия Христо́ва насле́дниче; ра́дуйся, Иерусали́ма Го́рняго гра́ждане.

Ра́дуйся, преподо́бне о́тче на́ш Афана́сие, Высо́цкий чудотво́рче.

Конда́к 8.

Слы́шавши у́бо о блаже́нней кончи́не твое́й, преми́лостивый, оби́тели твоея́ бра́тия и мно́гия лю́ди собра́шася на успе́ние твое́; многотру́дное те́ло твое́ достодо́лжно с чинопе́нием че́стно провожда́юще, погребо́ша о́ное во гро́бе, надгро́бное рыда́ние творя́ще пе́снь: Аллилу́иа.

И́кос 8.

Ве́сь сла́дость и жела́ние тебе́, преблаже́нне, бы́сть Христо́с Иису́с, егда́ в житии́ се́м моли́тву Его́ не престава́л еси́ повторя́ти; и в преселе́нии твое́м от земны́х в небе́сная и́стее причасти́лся, о́тче, сла́дости и жела́ния в невече́рнем дни́ Ца́рствия Его́. О се́м ве́дуще и о таково́м блаже́нном успе́нии твое́м ра́дующеся, сия́ досто́йныя тебе́ прино́сим глаго́лы:

Ра́дуйся, свя́тче Бо́жий, свя́то и пра́ведно жи́знь земну́ю соверши́вый; ра́дуйся, во благоуха́нии святы́ни сно́м сме́ртным опочи́вый.

Ра́дуйся, на ло́но Авраа́ма А́нгелы несе́нный; ра́дуйся, пе́нием неземны́м от святы́х небожи́телей встре́ченный.

Ра́дуйся, я́ко па́мять твоя́ с похвала́ми и успе́ние со святы́ми; ра́дуйся, я́ко отверзо́шася тебе́ врата́ ра́йская, и вше́л еси́ в ра́дость Го́спода твоего́.

Ра́дуйся, вене́ц безсме́ртныя жи́зни от руки́ Вседержи́теля прие́мый; ра́дуйся, в Черто́зе Небе́снаго Домовлады́ки ликовству́яй.

Ра́дуйся, преподо́бне о́тче на́ш Афана́сие, Высо́цкий чудотво́рче.

Конда́к 9.

Вся́ бра́тия удивля́хуся зело́, егда́ церко́вных веще́й храни́тель на тя́, преподо́бне, гне́вался и не хоте́ и на погребе́ние моще́й твои́х идти́ и сего́ ра́ди от друче́ния де́монскаго му́чимь бы́в, в ро́в моги́льный вве́ржеся и а́бие исцеле́ние получи́, поя́ его́ муче́ния вра́жия свободи́вшему Бо́гу: Аллилу́иа.

И́кос 9.

Вети́йствовати язы́к не довле́ет воспева́я ми́лость и кро́тость твою́, егда́ бра́ту гне́вавшемуся на тя́, преблаже́нне, проще́ние ниспосла́: уже́ сы́й в гро́бе свое́м погребе́н из о́наго ру́ку свою́ протяже́, прие́мше бра́та твоего́ ре́кл еси́ ему́: «вско́ре и́маши оста́вити жи́знь свою́, бли́з кончи́на твоя́». И в тре́тий де́нь по глаго́лу блаже́ннаго преста́вися мона́х то́й. Сему́ удивля́ющеся вопие́м ти́ си́це:

Ра́дуйся, разруши́телю вражды́ и насади́телю братолю́бия; ра́дуйся, я́ко по успе́нии твое́м ру́ку ми́ра бра́ту твоему́ ми́лостиво пода́вый.

Ра́дуйся, си́м пресла́вным виде́нием все́х удиви́вый; ра́дуйся, я́ко и по сме́рти твое́й оте́ц чадолюби́вый явля́ешися.

Ра́дуйся, щедро́т и ми́лования струя́ неизсяка́емая; ра́дуйся, любве́ и сострада́ния явле́ние многочуде́сное.

Ра́дуйся, душе́вных неду́гов благосе́рдный целе́бниче; ра́дуйся, теле́сных боле́зней преди́вный врачу́.

Ра́дуйся, преподо́бне о́тче на́ш Афана́сие, Высо́цкий чудотво́рче.

Конда́к 10.

Спасе́ние прине́сл еси́, блаже́нне, оби́тели твое́й и гра́ду Се́рпухову иногда́, егда́ злове́рцы ага́ряне и польски́я лю́ди разори́ти си́и устреми́шася и мно́жество наро́да плени́ша и разори́ша и о́стрием меча́ поби́ша. Ди́вно в виде́нии все́м яви́ся, враги́ устраша́я и прогоня́я, и вся́ ве́рныя подвиза́я пе́ти изба́вителю Бо́гу: Аллилу́иа.

И́кос 10.

Царя́ Небе́снаго Христа́ яви́лся еси́ о́тче гро́зный во́ин, егда́ на коне́ бе́лом из оби́тели вы́шедший ви́ден бы́л еси́ и в це́рковь ка́менну во гра́де стоя́щу вше́дый, я́ко диви́тися ага́ряном зело́. От це́ркви же тоя́, в рука́х же́зл вели́к име́я еди́н, внеза́пу зело́ ско́ро на враго́в о́ных устреми́ся, грозя́ жезло́м те́м. И бежа́ша во́н вся́ орда́, убоя́вшися виде́ния сего́; лю́дие же свобожде́ннии с благода́рностию воспе́ша тебе́:

Ра́дуйся, гро́зный кара́телю оби́дящих; ра́дуйся, оби́тели твоея́ стра́же неусы́пный.

Ра́дуйся, жезло́м игу́менским вся́ ви́димыя и неви́димыя враги́ устраши́вый; ра́дуйся, же́зл настоя́тельства во оби́тели твое́й до ны́не содержа́яй.

Ра́дуйся, правосла́вному во́инству и по преставле́нии твое́м ви́димым о́бразом спобо́рствуяй; ра́дуйся, преде́лы оте́чества на́шего тве́рдым щито́м твоего́ покро́ва защища́яй.

Ра́дуйся, святы́я оби́тели твоея́ при́сное охране́ние; ра́дуйся, гра́да Се́рпухова необори́мое защище́ние.

Ра́дуйся, преподо́бне о́тче на́ш Афана́сие, Высо́цкий чудотво́рче.

Конда́к 11.

Пе́ние трисвято́е слы́шаху бра́тия не еди́нощи, сла́дким гла́сом на гро́бе твое́м воспева́емо, овогда́ у́бо кадя́ща гро́бы, овогда́ со свеща́ми горя́щими оби́тель обходя́ща тя́ ви́деша. Позна́ша у́бо при́сно оби́тели и́х попече́ние возра́довашася и Бо́гу воспе́ша: Аллилу́иа.

И́кос 11.

Свещы́ горя́щия ви́девше священнослужи́тели и мона́хи и и́ны лю́ди на гро́бе твое́м, преподо́бне, помышля́ху пресла́вное чу́до бы́ти. Чрез А́нгелы бо прославля́ет Госпо́дь святы́я Своя́: возжига́ют бо ты́я свещи́ церко́вныя, вкру́г престо́ла и́х обнося́ и к гро́бу свята́го несу́т и взыва́ют к нему́ такова́я:

Ра́дуйся, Небе́снаго Сио́на жи́телю; ра́дуйся, нерукотворе́нных Ски́ний ра́йских обита́телю.

Ра́дуйся, ди́вный Христо́в уго́дниче; ра́дуйся, Бо́гу при́сный люби́мче.

Ра́дуйся, со А́нгелы при́сно лику́яй; ра́дуйся, с Преподо́бными ублажа́емый.

Ра́дуйся, я́ко тобо́ю Вы́шний на небеси́ и на земли́ сла́вится; ра́дуйся, я́ко со А́нгелы горе́ трисвяту́ю пе́снь Ему́ немо́лчно пое́ши.

Ра́дуйся, преподо́бне о́тче на́ш Афана́сие, Высо́цкий чудотво́рче.

Конда́к 12.

Благода́ть вели́ких чуде́с от Го́спода прия́л еси́, преподо́бне о́тче на́ш Афана́сие, и по достоя́нию чудотво́рец нарече́н бы́л еси́: и́бо не то́кмо при жи́зни, но и по сме́рти, вели́чием твои́х чуде́с все́х удивля́еши, и ко славосло́вию Про́мысла Бо́жия подвиза́еши, во е́же пе́ти о тебе́ чуде́с Творцу́ Бо́гу: Аллилу́иа.

И́кос 12.

Пою́ще ра́достную пе́снь хвалы́ и благодаре́ния Человеколю́бцу Бо́гу, просла́вльшему тя́ во гра́де Се́рпухове во оби́тели Высо́цкой чудотво́рца ди́внаго и ми́лостиваго, мо́лим тя́, о́тче на́ш Афана́сие: бу́ди хода́тай к Нему́ и моли́твенник при́сный о на́с, ча́дех твои́х во оби́тели твое́й жи́тельствующих и зову́щих ти́ такова́я:

Ра́дуйся, Пресвяты́я Тро́ицы ве́рный служи́телю; ра́дуйся, Пресвяты́я Богоро́дицы досто́йный предстоя́телю.

Ра́дуйся, несомне́нною наде́ждою на Бо́га оби́тель твою́ созида́вый; ра́дуйся, слеза́ми моли́твенными основа́ние ея́ ороси́вый.

Ра́дуйся, оби́тель твою́ и по сконча́нии твое́м сохрани́вый; ра́дуйся, ча́да твоя́ духо́вная и по сме́рти твое́й не забы́вый.

Ра́дуйся, приходя́щих во оби́тель твою́ на поклоне́ние благи́й предста́телю; ра́дуйся, почита́ющих святу́ю па́мять твою́ небе́сный покрови́телю.

Ра́дуйся, преподо́бне о́тче на́ш Афана́сие, Высо́цкий чудотво́рче.

Конда́к 13.

О, преди́вный уго́дниче Христо́в, преподо́бне о́тче на́ш Афана́сие! Ма́лое сие́ моле́ние приими́ от на́с, недосто́йных ча́д твои́х, от любве́ тебе́ на́ми приноси́мое; моли́ся о на́с ко Всетво́рцу Бо́гу, да утверди́т на́с на терни́стом пути́ мона́шескаго де́лания и сподо́бит с тобо́ю вку́пе во Оби́телех Небе́сных воспева́ти Ему́: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгелов Творе́ц и всея́ тва́ри Созда́тель, яви́вый Це́ркви Святе́й всесве́тлаго свети́льника, от гра́да Яросла́вля призва́вый тя́, преподо́бне о́тче на́ш Афана́сие, в преде́лы гра́да Се́рпухова во оби́тель Пречи́стыя Де́вы и́же на Высо́ком приведе́ тя́. Мы́ же, ви́дя соверше́ние благи́я во́ли Госпо́дни на тебе́, с любо́вию вопие́м ти́ си́це:

Ра́дуйся, гра́да Яросла́вля пресла́вное прозябе́ние; ра́дуйся, проро́ка дре́вняго Амо́са и́мя получи́вый при креще́нии.

Ра́дуйся, я́ко из де́тска у́м и ду́шу твою́ Го́сподеви преда́вый; ра́дуйся, любве́ ра́ди ко Го́споду до́м оте́ческий оста́вивый.

Ра́дуйся, во оби́тель Высо́цкую прише́дый и та́мо поко́й душе́ свое́й обреты́й: ра́дуйся, от ю́ности твоея́ яре́м Христо́в на ся́ восприя́вый.

Ра́дуйся, богому́дрым учи́телем твои́м Афана́сием в мона́шестем де́лании умудре́нный; ра́дуйся, о́браз и́ноческаго доброде́лания чрез все́ житие́ твое́ пронесы́й.

Ра́дуйся, преподо́бне о́тче на́ш Афана́сие, Высо́цкий чудотво́рче.

Конда́к 1.

Избра́нному Бо́гом во игу́мена оби́тели Высо́цкия и ди́вному в преподо́бных отцу́ на́шему Афана́сию соста́вим похвалу́! То́й бо, я́ко оте́ц чадолюби́вый, мо́лит за ны́ просла́вльшаго его́ Го́спода да сохрани́т оби́тель сию́ от нестрое́ний и наве́тов злы́х челове́к и на́с все́х соблюде́т в ми́ре и единомы́слии и любви́; мы́ же любо́вию сыно́вней к нему́ преиспо́лненнии, со умиле́нием благода́рственно зове́м ди́вному уго́днику Христо́ву:

Ра́дуйся, преподо́бне о́тче на́ш Афана́сие, Высо́цкий чудотво́рче.

Моли́тва пе́рвая.

О преподо́бне и богоно́сне о́тче на́ш Афана́сие! Ты́, порабо́тати Го́сподеви жела́я, зде́ всели́лся еси́, и неле́ностно во труде́х, во бде́ниих, в моли́твах и посте́х подвиза́лся еси́, и бы́л еси́ наста́вник мона́шествующим, все́м же лю́дем учи́тель ре́вностный. Ны́не у́бо, по отше́ствии твое́м от земны́х, Небе́сному Царю́ предстоя́, моли́ бла́гость Его́, е́же уще́дрити ме́сто селе́ния твоего́, святу́ю оби́тель сию́, иде́же ду́хом любве́ твоея́ неотсту́пно пребыва́еши, и все́м лю́дем твои́м, с ве́рою к ра́це твое́й припа́дающим, во блага́я проше́ния и́х испо́лнити. Испроси́ у ми́лостиваго Го́спода на́шего, да низпо́слет на́м оби́лие бла́г земны́х, па́че же я́же на по́льзу ду́ш на́ших да да́рует на́м, и сконча́ти житие́ сие́ привре́менное в покая́нии да сподо́бит, в де́нь же су́дный десна́го предстоя́ния и наслажде́ния во Ца́рствии Свое́м да удосто́ит во ве́ки веко́в. Ами́нь.

Моли́тва второ́й.

О чудотво́рче пресла́вный и засту́пниче кре́пкий Бо́гом собра́нней дружи́не се́й! К тебе́, я́ко ско́рому и избра́нному спасе́ния на́шего хода́таю, богоизбра́нному духо́вных во́инств воево́де, ору́жием моли́твы твоея́ победи́телем над враги́ я́вльшуся, пред ра́кою святы́х моще́й твои́х припа́дающе, преподо́бне о́тче на́ш Афана́сие, вседу́шно прибега́ем: не отврати́ся на́шея нищеты́, моле́нию на́шему внемли́, и от бе́д на́с, святу́ю оби́тель сию́, гра́д се́й и преде́лы его́ сохрани́. Простри́ руку́ твою́, ско́рую по́мощь подаю́щую. Упра́ви у́м на́ш от пагубоно́сных разсе́яний, и сердца́ на́ша оскверне́нная очи́сти, освяти́ и горе́ име́ти утверди́. От вра́г ви́димых и неви́димых на́с сохрани́, да над страстьми́ победи́тели я́вимся, творя́ще святы́ню во стра́се Госпо́дни, и вся́кое уны́ние попра́вше, ра́доватися о Го́споде начне́м: и та́ко твои́ми хода́тайствы, во смире́нии и простоте́ се́рдца сподо́бимся до после́дняго издыха́ния боголе́пно сла́вити святу́ю Тро́ицу, Отца́, и Сы́на, и Свята́го Ду́ха, ны́не, и при́сно, и во ве́ки веко́в. Ами́нь.