Конда́к 1.

Взбра́ннаго воево́ды Христа́ ве́рный во́ине, преподо́бне о́тче на́ш Алекса́ндре! Вы́ну бо́дрствуяй, сопроти́вных си́лу низложи́л еси́, и вся́ ти́ повеле́нная сверши́в, Де́нми Ве́тхому предста́л еси́: от Него́ вене́ц сла́вы прия́в, не преста́ни моля́йся, да ду́хом води́ми и свя́то живу́ще, вы́ну ти́ ра́достно зове́м:

Ра́дуйся, преподо́бне Алекса́ндре, Ошеве́нский чудотво́рче.

И́кос 1.

А́нгелов сожи́телю, преподо́бне Алекса́ндре, предста́тельствуяй Бо́гови, те́пле мо́лишися о спасе́нии на́шем, ку́пно же и поле́зная да́руеши к соверше́нию сего́ вре́меннаго жития́, неду́гов врачу́ чудото́чный, во е́же тя́ ублажа́юще, си́це вопие́м:

Ра́дуйся, гра́да Ка́ргополя и всея́ Оне́жския страны́ похвало́; ра́дуйся, до рождества́ твоего́ я́ко уго́дник Бо́жий назна́менанный.

Ра́дуйся, изде́тска процветы́й доброде́тельми; ра́дуйся, от ми́ра утаи́вый чи́стаго ду́ха красоту́.

Ра́дуйся, в Белозе́рстей оби́тели ли́ку и́ноческу приобщи́выйся; ра́дуйся, напита́выйся ту́ словесы́ Христо́ва Ева́нгелия.

Ра́дуйся, посе́м, я́ко се́ятель на ни́ву, исше́дый во Ошеве́нскую ве́сь; ра́дуйся, Ошеве́нския оби́тели устрои́телю, ея́же ча́да мно́зи ве́си просвети́ша.

Ра́дуйся, во благоче́стии воспита́вый ро́д о́тчий и вся́ о́крест жи́вшыя; ра́дуйся, святоле́пне сконча́выйся.

Ра́дуйся, пра́ведником дне́сь собесе́дниче, все́м же на́м ско́рый помо́щниче.

Ра́дуйся, преподо́бне Алекса́ндре, Ошеве́нский чудотво́рче.

Конда́к 2.

Виде́ние чу́дное рожде́нию твоему́ преды́де, преподо́бне. Ма́тери бо твое́й еди́ножды, безча́дия ра́ди те́пле моля́щейся со Кири́ллом Пречи́стая Влады́чица яви́ся и рече́: моли́тв ра́ди ста́рца сего́ бу́дет ти́ ча́до, е́же Бо́га просла́вит, и Бо́г его́ просла́вит, я́же сия́ слы́шавши, благода́рне воспе́: Аллилу́иа.

И́кос 2.

Разуме́я сбытие́ предрече́ннаго в рождестве́ твое́м, преподо́бне, роди́теля твоя́ ра́довахуся, зря́ще к тому́, я́ко от младе́нства поревнова́л еси́ свято́му житию́, и сла́вляху Бо́га, о Не́мже ти́ рце́м:

Ра́дуйся, моли́твенное израсте́ние благогове́йну роди́телю; ра́дуйся, я́ко в купе́ли креще́ния от перворо́днаго греха́ омы́лся еси́.

Ра́дуйся, я́ко да́ры Ду́ха Свята́го в миропома́зании незри́мо прия́л еси́; ра́дуйся, от пеле́н возлюби́вый Це́рковь Бо́жию.

Ра́дуйся, цве́те чи́стый благонра́вия; ра́дуйся, я́ко возраста́яй, преложи́л еси́ бу́есть де́тскую в писа́нии ея́ поуче́нием.

Ра́дуйся, потруди́выйся в де́лех се́льных со роди́тели; ра́дуйся, притяжа́телю при́сных ве́лия благоволе́ния.

Ра́дуйся, я́ко Влады́чицею храни́мь, грехо́вных паде́ний избе́гл еси́; ра́дуйся, я́ко а́нгела храни́теля ничи́мже огорчи́л еси́.

Ра́дуйся, взыска́телю к небесе́м пути́ у́зкаго.

Ра́дуйся, преподо́бне Алекса́ндре, Ошеве́нский чудотво́рче.

Конда́к 3.

Си́лу во е́же при́сныя оста́вити, обре́л еси́, преподо́бне Алекса́ндре, егда́ моля́йся еди́ножды, гла́с сладча́йший Христа́ услы́шал еси́, И́же обеща́ ти́, я́ко во спасе́ние си́ поле́зная обря́щеши, пропе́л еси́ Ему́: Аллилу́иа.

И́кос 3.

Име́ти тле́нная презре́в, оте́чествие оста́вил еси́, во огра́ду же кири́ллову прите́к, вожделе́нная обре́л еси́, преподо́бне, иде́же кро́тостию и люботру́дием со смире́нием украси́лся еси́, вразумля́я пе́ти тебе́:

Ра́дуйся, Алекси́ю челове́ку Бо́жию единоду́шниче; ра́дуйся, я́ко мирско́ю ле́потою не уязви́лся еси́.

Ра́дуйся, во оби́тель та́йно отше́дый подвиза́тися; ра́дуйся, проще́ние преслуша́ния у роди́телей испроси́вый последи́.

Ра́дуйся, та́мо ра́достно сре́тенный; ра́дуйся, че́сти и́ночества испе́рва уклони́выйся.

Ра́дуйся, сниска́вый те́м вя́щшую игу́мена любо́вь; ра́дуйся, я́ко трудо́м па́че все́х прилежа́л еси́.

Ра́дуйся, я́ко моли́твою и богомы́слием укрепи́лся еси́; ра́дуйся, препояса́выйся воздержа́нием.

Ра́дуйся, до́бре преуспе́вый ко прия́тию а́нгельскаго о́браза.

Ра́дуйся, преподо́бне Алекса́ндре, Ошеве́нский чудотво́рче.

Конда́к 4.

Бу́ри, я́же в ми́ре бежа́в, со отъя́тием вла́с в оби́тели соверше́нне себе́ Бо́гови преда́л еси́, Алекса́ндре, власте́м бо повину́яйся, тре́звенно пожи́л еси́ в во́льней нищете́, богатя́йся благода́тию и поя́ Христу́ сла́дце: Аллилу́иа.

И́кос 4.

Слы́шав, я́ко отыдо́ша роди́телие во страну́ дале́че, уразуме́л еси́, преподо́бне, я́ко приспе́ ча́с ми́рови коне́чне упраздни́тися, е́же и соверши́л еси́ а́бие, прие́мь о́браз а́нгельский, те́мже ти́ рце́м:

Ра́дуйся, я́ко же́ртва чи́ста от ро́да о́тча Бо́гови принесе́нный; ра́дуйся, сокро́вищнице де́вственныя чистоты́.

Ра́дуйся, обе́та нестяжа́ния оправда́телю; ра́дуйся, безмо́лвия люби́телю.

Ра́дуйся, я́ко пра́здно сло́во не исхожда́ше от тебе́; ра́дуйся, я́ко ничи́мже кого́ огорчи́л еси́.

Ра́дуйся, кро́тце терпе́вый поноше́ния; ра́дуйся, Го́сподеви пове́давый ско́рби своя́.

Ра́дуйся, я́ко наве́том льсти́ваго николи́же вда́лся еси́; ра́дуйся, я́ко стра́сти пло́ти вся́ истни́л еси́.

Ра́дуйся, я́ко ду́ха кра́сная израсти́л еси́.

Ра́дуйся, преподо́бне Алекса́ндре, Ошеве́нский чудотво́рче.

Конда́к 5.

Богото́чную кро́вь и пречи́стое те́ло Христа́ вы́ну в це́ркви прие́мляй, в де́лании духо́внем преуспе́л еси́, Алекса́ндре: те́мже спасе́нию во Оне́жстей стране́ обита́ющих послужи́ти сподо́бился еси́, иде́же оби́тель Ошеве́нскую ктому́ созда́л еси́, поя́ Бо́гу: Аллилу́иа.

И́кос 5.

Ви́дети роди́теля прише́д, егда́ на бре́зе ре́ки Чирью́ги, хотя́ ту́ пожи́ти, кре́ст водрузи́л еси́, преподо́бне, па́ки Христо́с ти́ рече́: уго́дниче мо́й, зде́ ти́ угото́вася ме́сто вселе́ния, зде́ тобо́ю мно́зи спасе́ние улуча́т, ты́ же обрете́ши поко́й си́ во ве́ки. Те́мже во оби́тель по се́м благослове́ния ра́ди нача́льнича возврати́вшутися, си́це пое́м:

Ра́дуйся, прояви́телю честна́го послуша́ния; ра́дуйся, не прекосло́вивый игу́мену воспрети́вшу ви́дети роди́теля.

Ра́дуйся, сугу́бым по́двигом сниска́вый его́ изволе́ние; ра́дуйся, учи́телю повинове́ния власте́м.

Ра́дуйся, я́ко умили́шася роди́телие, зря́ще твое́ кра́йнее истоща́ние; ра́дуйся, утверди́вый я́ свя́то жи́тельствовати.

Ра́дуйся, я́ко о́нии проси́ша тя́ бы́ти и́ма в па́стыря; ра́дуйся, не дерзну́вый не испо́лнити блага́го проше́ния.

Ра́дуйся, показа́телю к при́сным и́стинныя любве́; ра́дуйся, откры́вый лю́дем сокро́вища духо́вная, во оби́тели Белозе́рстей собра́нная.

Ра́дуйся, исполни́телю неисповеди́мых Бо́жиих суде́б.

Ра́дуйся, преподо́бне Алекса́ндре, Ошеве́нский чудотво́рче.

Конда́к 6.

Пропове́давшу ти́ бы́вшая, игу́мену же утверди́вшу жела́ние твое́, в Но́вград отше́л еси́, преподо́бне, иде́же от святи́теля иере́а са́ном почте́н сы́й, от градоде́ржцев зе́млями мно́гими одаре́н бы́л еси́, да безну́ждно стро́иши пусты́нное жи́тельство и пое́ши Бо́гу: Аллилу́иа.

И́кос 6.

Возсия́ и просла́вися оби́тель твоя́ преподо́бне, ю́же стро́я украси́л еси́ хра́мы во и́мя успе́ния Пречи́стыя и Никола́я святи́теля и ке́ллии согради́в, уста́вом возде́ржнаго жития́ бра́тию утверди́л еси́, науча́я пе́ти тебе́:

Ра́дуйся, Ошеве́нския оби́тели созда́телю, благослове́нный Бо́гом и людьми́; ра́дуйся, напу́тствованный от игу́мена о́бразы Одиги́трии и Никола́я святи́теля.

Ра́дуйся, я́ко до дне́сь святы́я ико́ны сия́ украша́ют оби́тель твою́; ра́дуйся, чи́стый сосу́де, в о́ньже излия́ся свяще́нства благода́ть.

Ра́дуйся, небе́сных иска́телю, ему́же приложи́шася вре́менная; ра́дуйся, Анастаси́ею и Гео́ргием одаре́нный зе́млями мно́гими.

Ра́дуйся, отреки́йся от ли́шних, да не огорчи́ши роди́теля отъя́тием ни́в; ра́дуйся, о́бразе и́ноческаго жития́.

Ра́дуйся, наста́вниче преподо́бнаго Пахо́миа, и́же воспита́ преподо́бнаго Анто́ниа, Си́йския оби́тели нача́льника; ра́дуйся, вождю́ иду́щым терни́стым путе́м.

Ра́дуйся, все́м послужи́вый с любо́вию до после́дняго дне́ живота́.

Ра́дуйся, преподо́бне Алекса́ндре, Ошеве́нский чудотво́рче.

Конда́к 7.

Восхоте́вшыя и́ночествовати племя́нники твоя́, преподо́бне Алекса́ндре, постри́гл еси́ с ра́достию, кро́тостию ути́шив озлобле́ние бра́тии. Егда́ же о́нии, оста́вльше тя́, отыдо́ша, печа́ль свою́ на Бо́га возве́ргл еси́, и в ско́рби смире́нно пе́л еси́ Ему́: Аллилу́иа.

И́кос 7

Но́выя по се́м и мно́гия ско́рби претерпе́л еси́, преподо́бне Алекса́ндре, ктому́ и неду́гом разслабле́ния я́т бы́л еси́, в не́мже от моли́твы не преста́в, сподо́бился еси́ зре́ти преподо́бнаго Кири́лла, и́же а́бие тя́ исцели́. Те́м ти́ пое́м:

Ра́дуйся, испы́танный Бо́жий слуго́; ра́дуйся, И́ову в терпе́нии ра́вный.

Ра́дуйся, сваря́щихся бра́тий посрами́телю; ра́дуйся, незло́бия глубино́.

Ра́дуйся, Бо́жию смотре́нию преда́вый отше́дшыя племя́нники; ра́дуйся, за преоби́девших тя́ те́плый моли́твенниче.

Ра́дуйся, че́стне погребы́й роди́теля, в ста́рости масти́тей усо́пшыя; ра́дуйся, возноси́вый Же́ртву Безкро́вную, да насле́дят ти́и ра́йская селе́ния.

Ра́дуйся, твори́вый па́мять и́х бе́дным ми́лостынею; ра́дуйся, уте́шенный наде́ждею загро́бнаго свиде́ния.

Ра́дуйся, ве́ры, я́же го́ры дви́жет, прояви́телю.

Ра́дуйся, преподо́бне Алекса́ндре, Ошеве́нский чудотво́рче.

Конда́к 8.

Стра́нствие земно́е вско́ре сконча́л еси́, преподо́бне Алекса́ндре; су́щу бо ти́ пяти́десяти двою́ ле́т, па́ки в неду́г впа́л еси́, и в напу́тствие к животу́ ве́чному Святы́я Та́йны прие́мь, ко Христу́ отше́л еси́ с пе́снию: Аллилу́иа.

И́кос 8.

Вся́ на оби́тель гряду́щая прови́дев, запусте́ние тоя́ и обновле́ние предре́к, с ми́ром преста́вился еси́, преподо́бне, и погребе́н бы́л еси́ бли́з хра́ма, тобо́ю созда́ннаго. Те́мже ти́ вопие́м:

Ра́дуйся, оста́вивый юдо́ль пла́ча и скорбе́й; ра́дуйся, насле́дивый селе́ния безпеча́льная.

Ра́дуйся, не забы́вый оби́тели по преставле́нии; ра́дуйся, я́ко с святи́телем Никола́ем и преподо́бным Кири́ллом прише́д, предуказа́л еси́ Макси́ма во игу́мена.

Ра́дуйся, в труде́х споспешествова́вый сему́; ра́дуйся, наста́вивый его́ не оставля́ти пе́ния церко́внаго.

Ра́дуйся, овогда́ храни́вый оби́тель от о́гненнаго запале́ния; ра́дуйся, овогда́ же о́ным вразумля́вый бра́тий согреша́ющих.

Ра́дуйся, тоя́ при́сный храни́телю; ра́дуйся, и все́х, ве́рно тя́ почита́ющих, небе́сный блюсти́телю.

Ра́дуйся, до дне́сь и́ноков укрепи́телю.

Ра́дуйся, преподо́бне Алекса́ндре, Ошеве́нский чудотво́рче.

Конда́к 9.

Вся́кия неду́ги естества́ на́шего си́лою благода́ти Христо́вы исцеля́еши, преподо́бне Алекса́ндре, егда́ тя́ с ве́рою призову́т, я́ко врача́ скоропослушли́ва. Сего́ ра́ди лику́юще, пое́м Христу́ святы́я Своя́ сла́вящему: Аллилу́иа.

И́кос 9.

Вети́и всю́ду пове́даша, ка́ко со святи́телем Никола́ем яви́лся еси́, преподо́бне, еди́ному воево́де, име́вшу оби́тель твою́ разори́ти, и гро́зно сие́ воспрети́в, в покая́ние же приведы́й, благотвори́теля тоя́ яви́л еси́ его́. Те́м си́це тя́ велича́ем:

Ра́дуйся, укроти́телю мяту́щихся серде́ц; ра́дуйся, де́монов стра́х.

Ра́дуйся, я́ко тобо́ю ти́и от люде́й изверга́ются; ра́дуйся, пу́тников храни́телю.

Ра́дуйся, слепы́м да́руяй прозре́ние; ра́дуйся, глухи́м слы́шание.

Ра́дуйся, оздравля́яй разсла́бленныя; ра́дуйся, у́ст немы́х разреше́ние.

Ра́дуйся, покрыва́яй до́мы от о́гненнаго запале́ния; ра́дуйся, храня́й ни́вы от зно́йнаго горе́ния и гра́днаго поби́тия.

Ра́дуйся, о ну́ждах на́ших при́сно пеки́йся на небесе́х.

Ра́дуйся, преподо́бне Алекса́ндре, Ошеве́нский чудотво́рче.

Конда́к 10.

Спасти́ вся́ хотя́й, на списа́тели жития́ твоего́, преподо́бне, ди́вне уста́вы Це́ркве на́шея оправда́л еси́. Егда́ бо Феодо́сий, сомня́йся писа́ти про́ста, наказа́л еси́ его́ разслабле́нием, уже́ едва́ возмо́же сложи́ти три́ пе́рсты, егда́ два́ ни́жних ко дла́ни пригнуша́ся, и зна́менася кресто́м, покая́нне пе́ти: Аллилу́иа.

И́кос 10.

Стена́ тве́рда е́сть Це́рковь Христо́ва, ю́же а́дова врата́ не одоле́ют до сконча́ния ве́ка. Удо́бее бо со́лнцу уга́снути, не́жели то́й без ве́сти бы́ти, ея́же веле́ние треми́ пе́рсты крести́ся ди́вно оправда́вшему, си́це ти́ рце́м:

Ра́дуйся, избра́нный сы́не святы́я собо́рныя и апо́стольския Це́ркве на́шея; ра́дуйся, му́дре наказа́вый Феодо́сиево малове́рие.

Ра́дуйся, на не́м вразумля́яй от и́стины укло́нишхся; ра́дуйся, учи́телю крести́тися треми́ пе́рсты.

Ра́дуйся, я́ко от обря́дов лу́чшее предизбра́л еси́; ра́дуйся, я́ко дре́внейший обы́чай освяти́л еси́.

Ра́дуйся, я́ко святи́телей вселе́нских и росси́йских веле́ние предоправда́л еси́; ра́дуйся, благоче́стия ревни́телю.

Ра́дуйся, Правосла́вия охрани́телю; ра́дуйся, звездо́ ко Христу́ приводя́щая.

Ра́дуйся, правосла́вных ра́дование.

Ра́дуйся, преподо́бне Алекса́ндре, Ошеве́нский чудотво́рче.

Конда́к 11.

Пе́ти Бо́гу и храни́ти посты́ запове́дал еси́, преподо́бне, егда́ зно́ем не́когда пали́мей земли́, со Иоа́нном Златоу́стом селя́нину Ма́рку яви́ся еси́, обеща́я до́ждь, и́же сни́де а́бие, то́чию нача́ша твори́ти по словеси́ твоему́. И земля́ издаде́ пло́д стори́цею, его́же на ни́вах гобзу́юще, вси́ ра́достне поя́ху о тебе́ Бо́гу: Аллилу́иа.

И́кос 11.

Све́та невече́рняго зри́телю, преподо́бне Алекса́ндре, от Го́спода сугу́бо просла́влен еси́, и́же и телеси́ твоему́, в не́дрех земли́ а́ки сокро́вищу заключе́нному, благода́ть исцеле́ний неоску́дную дарова́, науча́я на́с пе́ти тебе́:

Ра́дуйся, киво́те, одушевле́нный зижди́телем; ра́дуйся, алава́стре ми́ра цели́тельнаго телесе́м.

Ра́дуйся, вмести́лище еле́а душевраче́бнаго; ра́дуйся, и́мже отгоня́ются злы́я по́мыслы.

Ра́дуйся, и́мже сердца́ согрева́ются теплото́ю ми́ра благода́тнаго; ра́дуйся, безу́мных разу́мными творя́й.

Ра́дуйся, я́ко тле́ние не прикосну́ся косте́м твои́м; ра́дуйся, я́ко ти́и уме́ршыя животворя́т.

Ра́дуйся, и́мже оздравля́ются бога́тии и убо́зии; ра́дуйся, ему́же смире́нно преклоня́ются сла́внии и имени́тии.

Ра́дуйся, о не́мже сла́вится Христо́с Иису́с.

Ра́дуйся, преподо́бне Алекса́ндре, Ошеве́нский чудотво́рче.

Конда́к 12.

Благода́тнаго ца́рствия Христо́ва насле́дниче, огнезра́чному Божества́ Престо́лу дне́сь предстои́ши, преподо́бне Алекса́ндре, со святи́тели Тому́ прелоня́ешися, со Пречи́стою Богоро́дицею о на́с мо́лишися, со преподо́бными и все́ми святы́ми лику́еши и а́нгельскими во́и пое́ши Ему́: Аллилу́иа.

И́кос 12.

Пою́ще и помина́юще успе́ние твое́, е́же е́сть в жи́знь ве́чную рожде́ние, ра́дуемся о тебе́, преподо́бне, и любо́вию дви́жими, про́сим тя́, не забу́ди на́с, си́це тя́ велича́ющих:

Ра́дуйся, обра́дованный Христо́м; ра́дуйся, пла́чущих уте́шителю.

Ра́дуйся, подвиза́ющихся сора́дователю; ра́дуйся, о па́дающих печа́льниче.

Ра́дуйся, преклоня́яй Христа́ на ми́лость к те́м; ра́дуйся, и́же о небрегу́щих ка́ятися ско́рбне мо́лишися.

Ра́дуйся, я́ко отвраща́еши гне́в Госпо́день на тя́; ра́дуйся, умиле́ние го́рем уя́звленных серде́ц.

Ра́дуйся, на тя́ наде́ющихся опо́ро тве́рдая; ра́дуйся, тя́ ху́лящих наказа́телю.

Ра́дуйся, украше́ние Це́ркве Правосла́вныя; ра́дуйся, ю́же злосло́вящих гро́зный кара́телю.

Ра́дуйся, преподо́бне Алекса́ндре, Ошеве́нский чудотво́рче.

Конда́к 13.

О преподо́бне и богоно́сне о́тче на́ш Алекса́ндре, дне́сь во и́мя твое́ собра́вшеся и помина́юще твоя́ доброде́тели, от умиле́нных серде́ц прино́сим ти́ пе́снь хвале́бную, ю́же ми́лостивно приими́, на́ш моли́твенниче, испроси́ у Го́спода Бо́га ко спасе́нию все́м потре́бная и блаже́нная селе́ния, иде́же а́нгели пою́т Ему́ вы́ну: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгелов сожи́телю, преподо́бне Алекса́ндре, предста́тельствуяй Бо́гови, те́пле мо́лишися о спасе́нии на́шем, ку́пно же и поле́зная да́руеши к соверше́нию сего́ вре́меннаго жития́, неду́гов врачу́ чудото́чный, во е́же тя́ ублажа́юще, си́це вопие́м:

Ра́дуйся, гра́да Ка́ргополя и всея́ Оне́жския страны́ похвало́; ра́дуйся, до рождества́ твоего́ я́ко уго́дник Бо́жий назна́менанный.

Ра́дуйся, изде́тска процветы́й доброде́тельми; ра́дуйся, от ми́ра утаи́вый чи́стаго ду́ха красоту́.

Ра́дуйся, в Белозе́рстей оби́тели ли́ку и́ноческу приобщи́выйся; ра́дуйся, напита́выйся ту́ словесы́ Христо́ва Ева́нгелия.

Ра́дуйся, посе́м, я́ко се́ятель на ни́ву, исше́дый во Ошеве́нскую ве́сь; ра́дуйся, Ошеве́нския оби́тели устрои́телю, ея́же ча́да мно́зи ве́си просвети́ша.

Ра́дуйся, во благоче́стии воспита́вый ро́д о́тчий и вся́ о́крест жи́вшыя; ра́дуйся, святоле́пне сконча́выйся.

Ра́дуйся, пра́ведником дне́сь собесе́дниче, все́м же на́м ско́рый помо́щниче.

Ра́дуйся, преподо́бне Алекса́ндре, Ошеве́нский чудотво́рче.

Конда́к 1.

Взбра́ннаго воево́ды Христа́ ве́рный во́ине, преподо́бне о́тче на́ш Алекса́ндре! Вы́ну бо́дрствуяй, сопроти́вных си́лу низложи́л еси́, и вся́ ти́ повеле́нная сверши́в, Де́нми Ве́тхому предста́л еси́: от Него́ вене́ц сла́вы прия́в, не преста́ни моля́йся, да ду́хом води́ми и свя́то живу́ще, вы́ну ти́ ра́достно зове́м:

Ра́дуйся, преподо́бне Алекса́ндре, Ошеве́нский чудотво́рче.

Моли́тва пе́рвая.

О преподо́бне и богоно́сне о́тче на́ш Алекса́ндре! Ве́лие име́я к Бо́гу дерзнове́ние, моли́ся вы́ну о все́х на́с, зане́ бу́ря мно́гих бе́д и скорбе́й обдержи́т ны́: се́ бо неду́зи теле́снии, боле́зни душе́вныя, прираже́ния вра́жия обурева́ют ны́. Хо́дит бо вра́г на́ш, иски́й кого́ поглоти́ти, и ежеча́сно от него́ уловля́емся, о спасе́нии же свое́м нерадя́ще, не́смы досто́йни ниже́ воззре́ти на высоту́ небе́сную. Но ты́ бу́ди на́м помо́щник во все́м ско́рый и от зо́л изба́витель. Пода́ждь у́бо на́м па́мять сме́ртную, сле́зы покая́ния и наде́жду спасе́ния: да не в отча́яние впаде́м, ниже́ де́рзостным на милосе́рдие Бо́жие упова́нием, во гресе́х же пребыва́нием в коне́ц себе́ погуби́м. Но да бу́дет на́м па́мять грехо́в на́ших во исто́чник те́плых сле́з и сокруше́ния серде́чнаго, милосе́рдие же Бо́жие и благода́ть Его́ во спасе́ние на́ше, моли́твами твои́ми. Ами́нь.

Моли́тва втора́я.

О преподо́бне и богоно́сне о́тче на́ш Алекса́ндре, предстоя́ Престо́лу Пресвяты́я Тро́ицы, моли́ся вы́ну ко Го́споду: стра́ждущую страну́ росси́йскую от лю́тых безбо́жник и вла́сти и́х да свободи́т, и да возста́вит престо́л правосла́вных царе́й, ве́рных рабо́в твои́х, в ско́рби и печа́ли де́нь и но́щь вопию́щих к тебе́, многоболе́зненный во́пль да услы́шит, многоми́лостиве бла́же на́ш, изведи́ от поги́бели живо́т на́ш, да хо́дим ки́йждо досто́йно зва́ния на́шего, в не́мже зва́ни бы́хом, и да бу́дет земля́ на́ша добра́, и вси́ живу́щии на не́й ро́д избра́н, ца́рское свяще́ние, язы́к свя́т, лю́дие обновле́нии, ны́не и при́сно и во ве́ки веко́в. Ами́нь.