Конда́к 1.

Изря́дному де́лателю моли́твы у́мныя, богодохнове́нному учи́телю мона́шеских чино́в, ста́рцу Анато́лию похва́льная воспису́ем. Ты́ же, о́тче, наста́ви на́с на стези́ богоуго́дныя, да в ра́дости зове́м ти́:

Ра́дуйся, Анато́лие, зерца́ло моли́твы у́мныя.

И́кос 1.

Мирска́го треволне́ния избежа́в, преподо́бне, Бо́гу посвяще́н бы́в от роди́телей, я́коже Самуи́л. Сего́ ра́ди ю́ношеское твое́ благоче́стие похваля́юще, вопие́м ти́:

Ра́дуйся, благочести́вое Бо́гу приноше́ние; ра́дуйся, боголюби́вым роди́телем твои́м похвале́ние.

Ра́дуйся, от ю́ности твоея́ проти́ву греха́ подвиза́выйся; ра́дуйся, в зре́лости твое́й венце́м побе́ды венча́выйся.

Ра́дуйся, моли́твами де́тскими украси́вый ду́шу твою́; ра́дуйся, слеза́ми чи́стыми ороси́вый лани́ты твоя́.

Ра́дуйся, де́вство соблю́л еси́, я́ко зе́ницу о́ка; ра́дуйся, моли́тву стяжа́л еси́, я́ко Херуви́мския о́чи.

Ра́дуйся, Анато́лие, зерца́ло моли́твы у́мныя.

Конда́к 2.

Я́ко еле́нь благоро́ден прите́кл еси́ на па́жить ста́рческаго окормле́ния, вы́ю твою́ повину́в богому́дрому ста́рцу Мака́рию, и́же зла́ком духо́вных рече́ний тя́ напита́. Ты́ же благода́рно Бо́гу воззва́в: Аллилу́иа.

И́кос 2.

И́ноческим житие́м вдохнови́выйся, богому́дре о́тче, по́стничество, послуша́ния, труды́ и бде́ния стро́го держа́. Сего́ ра́ди окова́нный му́жеством сосу́д души́ твоея́ соде́лал еси́. Те́мже приими́ похвалы́ сия́:

Ра́дуйся, послу́шниче приле́жный; ра́дуйся, и́ноче благогове́йный.

Ра́дуйся, мона́шескаго чи́на украше́ние; ра́дуйся, а́нгельскому ликостоя́нию соревнова́телю.

Ра́дуйся, доброде́тельми я́ко звезда́ми уясни́л еси́ житие́ твое́; ра́дуйся, я́ко от тмы́ страсте́й очи́стил еси́ ду́шу твою́.

Ра́дуйся, све́тлая во Христе́ со́весте; ра́дуйся, чи́стое о Бо́зе се́рдце.

Ра́дуйся, Анато́лие, зерца́ло моли́твы у́мныя.

Конда́к 3.

Ио́сифом Прекра́сным тя́ святи́тель Игна́тий наре́кл е́сть, о́тче Анато́лие, егда́ о моли́тве у́мней тя́ вопроси́. Ты́ же я́сно уче́ние святооте́ческое возвести́л еси́ ему́. Те́мже удиви́выйся отве́ту твоему́, возопи́: Аллилу́иа.

И́кос 3.

Смире́нием я́ко покро́вом Бо́жиим тя́ охраня́ше богому́дрый ста́рец Мака́рий и проти́ву похва́л обличе́ньми тя́ наставля́ше. Ты́ же укоре́ния от ста́рца я́ко во́ду чисти́тельную приима́л еси́. Сего́ ра́ди чистоте́ души́ твоея́ дивя́щеся, си́це тебе́ вопие́м:

Ра́дуйся, благоду́шное укори́зны терпе́ние; ра́дуйся, доблему́дрое к труда́м понужде́ние.

Ра́дуйся, от мирски́х похва́л удале́ние; ра́дуйся, нищеты́ и́ноческия взыска́ние.

Ра́дуйся, я́ко ста́рцу твоему́ вся́кий по́мысл открыва́л еси́; ра́дуйся, я́ко вся́кую стра́сть мече́м разсужде́ния закла́л еси́.

Ра́дуйся, послуша́нием животво́рным во́лю свою́ умертви́вый; ра́дуйся, нечу́вствие я́ко ка́мень от се́рдца твоего́ отвали́вый.

Ра́дуйся, Анато́лие, зерца́ло моли́твы у́мныя.

Конда́к 4.

У́мную моли́тву я́ко ме́ч обоюдоо́стрый восприя́л еси́, о́тче Анато́лие, я́коже в чи́не по́стрига мона́шескаго о се́м глаго́лется, и́мже посе́кл еси́ пле́велы страсте́й и вся́кое вра́жие прираже́ние отрази́в, при́сно взыва́яй Бо́гу: Аллилу́иа.

И́кос 4.

Со смиренному́дрием сочета́л еси́ моли́твенное де́лание, о́тче му́дре, я́ко проти́в го́рдых де́монов бра́нь подъя́л еси́, в не́йже побе́ду зако́нную получи́л еси́. Сего́ ра́ди пе́сенныя тебе́ исплета́ются венцы́:

Ра́дуйся, моли́твы сто́лпе; ра́дуйся, смире́ния высото́.

Ра́дуйся, го́рдых де́монов попаля́яй; ра́дуйся, моли́твенным биче́м и́х погоня́яй.

Ра́дуйся, све́тлых А́нгелов у́мным созерца́нием привлека́яй; ра́дуйся, и́ноческия чи́ны серде́чным умиле́нием вдохновля́яй.

Ра́дуйся, Иису́сову моли́тву я́ко дыха́ние стяжа́л еси́; ра́дуйся, ве́тром Ду́ха Свята́го в при́стань безстра́стия дости́гл еси́.

Ра́дуйся, Анато́лие, зерца́ло моли́твы у́мныя.

Конда́к 5.

О́птинских Ста́рцев яви́лся еси́ досто́йный прие́мниче, я́ко степе́ни доброде́телей проше́л еси́ под води́тельством богому́дрых отце́в. Сего́ ра́ди да́р сыноположе́ния от Ду́ха Свята́го прия́л еси́, Бо́гу отце́в на́ших вопию́ще: Аллилу́иа.

И́кос 5.

Вво́инился еси́ в по́лк Ста́рцев О́птинских, о́тче Анато́лие, броня́ми благода́ти обложе́н и дара́ми многоразли́чными окруже́н Ду́ха Свята́го. Сего́ ра́ди спаса́еши от бе́д к тебе́ прибега́ющия и в благода́рности зову́щия:

Ра́дуйся, равностоя́телю отце́в О́птинских; ра́дуйся, единомы́сленниче святы́х Отце́в.

Ра́дуйся, церко́внаго Преда́ния непоколеби́мое утвержде́ние; ра́дуйся, цевни́це благозву́чная му́дрых изрече́ний.

Ра́дуйся, даро́в многоразли́чныя благода́ти сокро́вище; ра́дуйся, ско́рый пода́телю многообра́зныя по́мощи.

Ра́дуйся, я́ко унасле́довал еси́ Амвро́сиеву любо́вь богоподража́тельную; ра́дуйся, я́ко Мака́риево восприя́л еси́ богому́дрие.

Ра́дуйся, Анато́лие, зерца́ло моли́твы у́мныя.

Конда́к 6.

О́браз мона́шескаго соверше́нствования яви́л еси́ твое́й па́стве, о́тче Анато́лие, я́ко на дщи́це души́ твоея́ начерта́л еси́ изя́щныя цве́ты мно́гих доброде́телей, наипа́че же моли́тву непреста́нную в се́рдце стяжа́в, Бо́гу пою́щую: Аллилу́иа.

И́кос 6.

Терпе́нием стяжа́л еси́ ду́шу твою́, по сло́ву Христа́ Го́спода, в у́мнем де́лании пребыва́я де́нь и но́щь, при́сно взыску́я Го́спода, и обре́л еси́ вхо́д в кле́ти серде́чней в Ца́рствие Бо́жие. Сего́ ра́ди песнопе́нии тя́ велича́ем славосло́вными:

Ра́дуйся, де́лателю моли́твы у́мно-серде́чныя; ра́дуйся, храни́телю сокро́вища богодарова́ннаго.

Ра́дуйся, ле́ствице А́нгельскаго восхожде́ния; ра́дуйся, мо́сте преходя́й страсте́й мо́ре.

Ра́дуйся, я́ко благода́ти причасти́лся еси́ та́мошняго блаже́нства; ра́дуйся, я́ко на земли́ живы́й граждани́ном бы́л еси́ бу́дущаго ве́ка.

Ра́дуйся, и́мже восхожде́ние в моли́тве обрета́ем; ра́дуйся, и́мже нераде́ние духо́вное побежда́ем.

Ра́дуйся, Анато́лие, зерца́ло моли́твы у́мныя.

Конда́к 7.

Восхожде́ние положи́л еси́ о́тче в се́рдце твое́м, в го́рнее устремля́яся богодарова́нною твое́ю моли́твою, а́може дости́гл еси́ ангелоподо́бнаго соверше́нства, с ли́ки безпло́тными при́сно поя́ Бо́гу: Аллилу́иа.

И́кос 7.

О́птинский ста́рец Амвро́сий, я́ко ви́де тя́, о́тче Анато́лие, в во́зраст Христо́в прише́дша, граждани́на тя́ го́рняго Иерусали́ма наре́кл е́сть, еще́ на земли́ живу́щаго. Мы́ же соверше́нству твоему́ чудя́щеся, си́це тебе́ зове́м:

Ра́дуйся, земны́й небожи́телю; ра́дуйся, го́рняго Иерусали́ма служи́телю.

Ра́дуйся, мона́шествующих богому́дрый наста́вниче; ра́дуйся, моли́твенником духоно́сный учи́телю.

Ра́дуйся, непари́тельное пребыва́ние в моли́тве; ра́дуйся, созерца́тельное устрое́ние ума́.

Ра́дуйся, чи́стое зре́ние невече́рняго све́та; ра́дуйся, я́сное ви́дение сокрове́нных та́ин.

Ра́дуйся, Анато́лие, зерца́ло моли́твы у́мныя.

Конда́к 8.

Я́коже от ко́рене блага́го произрасте́ бли́з О́птиной оби́тель Ша́мординская, ю́же насади́ богому́дрый Амвро́сий, ея́же управле́ние духо́вное тебе́ поручи́, о́тче Анато́лие, да наста́виши сестры́ Бо́гу досто́йно служи́ти, вопию́щия Ему́ непреста́нно: Аллилу́иа.

И́кос 8.

Свети́льник яви́лся еси́ богоза́рный, о́тче Анато́лие, световодя́й к невече́рнему дню́ ча́да твоя́, от но́щи неве́дения избавля́яй и от страсте́й изыма́яй, вопию́щих тебе́ сия́:

Ра́дуйся, свети́льник под спу́дом жите́йския толстоты́ не сокры́тый; ра́дуйся, гра́де на верху́ горы́ доброде́телей стоя́й сооруже́нный.

Ра́дуйся, на тве́рде у́мней незаходи́мое свети́ло; ра́дуйся, на высоте́ духо́вней разсужде́ния звездо́.

Ра́дуйся, сла́дким и́менем Иису́совым пита́яй ча́да твоя́; ра́дуйся, мече́м обоюдоо́стрым сло́ва Бо́жия посеца́яй враги́ твоя́.

Ра́дуйся, невестово́дец церко́вный ду́ш Бо́гу посвяще́нных; ра́дуйся, обру́чник мона́шеских чино́в Це́ркви – Неве́сте Христо́вой.

Ра́дуйся, Анато́лие, зерца́ло моли́твы у́мныя.

Конда́к 9.

Литурги́и Боже́ственныя бы́л еси́ благогове́йный служи́телю, о́тче Анато́лие, я́ко к И́стинней Лозе́ ду́хом твои́м приви́лся еси́, те́мже источи́л еси́ я́ко сла́дкое вино́ поуче́ния твоя́ веселя́щия сердца́, и к трапе́зе Христо́вой привлека́ющия ча́да твоя́, благода́рно пою́щия Бо́гу: Аллилу́иа.

И́кос 9.

А́нгелов сослужа́щих тебе́ Боже́ственную литурги́ю сподо́бился еси́ име́ти, о́тче Анато́лие, егда́ с пра́ведным Иоа́нном па́стырем Кроншта́дтским сослужи́л еси́. Сего́ ра́ди ангелоподо́бному твоему́ житию́ чудя́щеся, ангелоле́пную тебе́ прино́сим хвалу́:

Ра́дуйся, Боже́ственныя ча́ши умиле́нный прича́стниче; ра́дуйся, Безкро́вныя же́ртвы тре́петный соверши́телю.

Ра́дуйся, не́бо отве́рзый моли́твами твои́ми; ра́дуйся, я́ко славосло́виши и ны́не с А́нгельскими чи́нми.

Ра́дуйся, А́нгелов я́ко диа́конов име́л еси́ тебе́ служа́щими; ра́дуйся, Ангелоре́вностному Иоа́нну приме́ром бы́в для подража́ния.

Ра́дуйся, я́ко тебе́ ра́ди та́йнам Христо́вым с тре́петом приобща́емся; ра́дуйся, я́ко тебе́ ра́ди на Литурги́ю я́ко к А́нгельскому служе́нию поспеша́ем.

Ра́дуйся, Анато́лие, зерца́ло моли́твы у́мныя.

Конда́к 10.

Возрасти́л еси́ са́д в души́ твое́й доброде́телей неувяда́емых, о́тче Анато́лие, по́ст и бде́ние, целому́дрие и чистоту́, любы́ ева́нгельскую и моли́тву духодви́жную, за ны́ Бо́га умоля́ющую, е́юже и пое́ши при́сно: Аллилу́иа.

И́кос 10.

Арома́тами моли́твы твоея́ богодарова́нныя при́сно увеселя́еши ча́д твои́х, о́тче богоно́сне, е́юже и посеща́еши и просвеща́еши и спаса́еши от бе́д и напа́стей многоразли́чных, вопию́щих тебе́ сицева́я:

Ра́дуйся, моли́твы боговдохнове́нная цевни́це; ра́дуйся, орга́не псалмопе́ния, дви́жимый Ду́хом Святы́м.

Ра́дуйся, чистоты́ серде́чныя стро́гое соблюде́ние; ра́дуйся, па́мяти о Бо́зе бы́строе воспламене́ние.

Ра́дуйся, от моли́твы де́ятельное рожде́ние любве́ явля́еши; ра́дуйся, от хране́ния ума́ духо́вный пло́д созерца́ния показу́еши.

Ра́дуйся, и́мже плене́ний ума́ свобожда́емся; ра́дуйся, и́мже непреста́нно моли́тися науча́емся.

Ра́дуйся, Анато́лие, зерца́ло моли́твы у́мныя.

Конда́к 11.

О́птинскаго ста́рчества светоно́сное украше́ние яви́лся еси́, о́тче Анато́лие, доброде́тельми я́ко звезда́ми просвети́вый житие́ твое́, и́миже тве́рдь души́ твоея́ ле́потну соде́лав, Бо́гу украси́вшему не́бо звезда́ми взыва́я: Аллилу́иа.

И́кос 11.

Тве́рдь Церко́вную озари́л еси́ о́тче сия́нием моли́твы твоея́ и я́коже со́лнце богокра́сное прогна́л еси́ тьму́ бесо́вскую, луча́ми любве́ согрева́яй ча́да твоя́, де́монская попаля́яй по́лчища. Сего́ ра́ди во све́те дея́ний твои́х я́коже во дни́ ходя́ще си́це тебе́ вопие́м:

Ра́дуйся, солнцезра́чный пропове́дниче; ра́дуйся, моли́твы богосия́нный свети́льниче.

Ра́дуйся, теплото́ю любве́ согрева́яй ча́да твоя́; ра́дуйся, све́том смире́ния попаля́яй де́моны.

Ра́дуйся, во тьме́ неве́дения возсия́л еси́ я́ко разсужде́ния звездо́; ра́дуйся, се́рдце твое́ яви́ся я́ко не́бо невмести́мое.

Ра́дуйся, сы́не невече́рняго дне́; ра́дуйся, трисо́лнечнаго Божества́ таи́нниче.

Ра́дуйся, Анато́лие, зерца́ло моли́твы у́мныя.

Конда́к 12.

Черто́г узре́л еси́, о́тче Анато́лие, Христо́в украше́нный, гото́вый прия́ти ду́шу твою́ облече́нную в ри́зу бра́чную. Те́мже от одра́ сме́ртнаго возста́л, кресту́ поклони́лся еси́ и ру́ки возде́в, возопи́л еси́: о Тро́ице, приими́ ду́шу мою́, Тебе́ вопию́щую: Аллилу́иа.

И́кос 12.

Естество́ пону́дил еси́ труда́ми по́стническими и вышеесте́ственную све́тлость и ангелоподо́бную доброде́тель стяжа́л еси́, о́тче Анато́лие, ко Го́споду преста́вился еси́, по́честей вене́ц от Него́ прие́м. Сего́ ра́ди мы́, ча́да твоя́, слове́сный вене́ц похва́л тебе́ прино́сим:

Ра́дуйся, моли́твенная похвало́ о́птинскаго ста́рчества; ра́дуйся, созерца́тельная высото́ труднодостижи́мая А́нгелом.

Ра́дуйся, я́ко чистоту́ ума́ стяжа́л еси́ присносия́тельную; ра́дуйся, я́ко Тро́ичным Све́том озари́лся еси́ богозри́тельно.

Ра́дуйся, огнезра́чным Серафи́мом подо́бниче; ра́дуйся, шестокры́лым Херуви́мом слико́вниче.

Ра́дуйся, у́мныя моли́твы тихогла́сное произведе́ние; ра́дуйся, ея́же та́инственному сердцевраще́нию на́с науче́ние.

Ра́дуйся, Анато́лие, зерца́ло моли́твы у́мныя.

Конда́к 13.

О, возлю́бленне а́вво Анато́лие, ве́руем, я́ко чи́стою душе́ю соверши́л еси́ пу́ть и́стины пра́вый, и предстои́ши ны́не пред Го́сподем сла́вы, в ве́чнем све́те небе́сных оби́телей, в ли́це Его́ ве́рных служи́телей. Те́мже на́с утомле́нных душе́вною борьбо́ю, помяни́ в моли́тве святе́й, вопию́щих Христу́: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

Мирска́го треволне́ния избежа́в, преподо́бне, Бо́гу посвяще́н бы́в от роди́телей, я́коже Самуи́л. Сего́ ра́ди ю́ношеское твое́ благоче́стие похваля́юще, вопие́м ти́:

Ра́дуйся, благочести́вое Бо́гу приноше́ние; ра́дуйся, боголюби́вым роди́телем твои́м похвале́ние.

Ра́дуйся, от ю́ности твоея́ проти́ву греха́ подвиза́выйся; ра́дуйся, в зре́лости твое́й венце́м побе́ды венча́выйся.

Ра́дуйся, моли́твами де́тскими украси́вый ду́шу твою́; ра́дуйся, слеза́ми чи́стыми ороси́вый лани́ты твоя́.

Ра́дуйся, де́вство соблю́л еси́, я́ко зе́ницу о́ка; ра́дуйся, моли́тву стяжа́л еси́, я́ко Херуви́мския о́чи.

Ра́дуйся, Анато́лие, зерца́ло моли́твы у́мныя.

Конда́к 1.

Изря́дному де́лателю моли́твы у́мныя, богодохнове́нному учи́телю мона́шеских чино́в, ста́рцу Анато́лию похва́льная воспису́ем. Ты́ же, о́тче, наста́ви на́с на стези́ богоуго́дныя, да в ра́дости зове́м ти́:

Ра́дуйся, Анато́лие, зерца́ло моли́твы у́мныя.

Моли́тва.

О, Преподо́бне, богому́дре и богопросвеще́нне о́тче на́ш Анато́лие, ста́рчества О́птинскаго светоно́сное украше́ние! Ты́ пе́рвее пону́дил еси́ у́м тво́й те́сными враты́ вну́трь се́рдца входи́ти и долготерпели́вым по́двигом та́мо о и́мени Иису́с Христо́ве Ца́рствие Бо́жие иска́ти. Сего́ ра́ди не по мно́зем вре́мени дости́гл еси́ пред враты́ вожделе́ннаго безстра́стия и еще́ на земли́ тебе́ су́щу небе́сный граждани́н бу́дущаго блаже́ннаго Ца́рствия сподо́бился еси́ бы́ти. Те́мже у́бо, о́тче приснопа́мятне, к тебе́ прибега́ем, я́ко к наста́внику иску́сному и про́сим и мо́лим: научи́ ны́, ча́да твоя́, сему́ спаси́тельному де́ланию е́же вну́трь се́рдца своего́ неотсту́пно пребыва́ти и неле́ностно Го́спода Иису́са Христа́ все́м помышле́нием свои́м, все́ю кре́постию свое́ю люби́ти и та́мо призыва́ти. Сохрани́ ны́ невреди́мы от все́х наве́т вра́жиих, от все́х преле́стных сете́й диа́вольских. Пода́ждь на́м ра́зум со смиренному́дрием се́й по́двиг проходи́ти, да не прельсти́т на́с супоста́т, но да сокруши́тся его́ зло́ба о тве́рдем ка́мени и́мене Христо́ва, на́м же да яви́тся се́й ка́мень незы́блемо основа́ние зда́ния все́х доброде́телей.

Е́й, о́тче, пода́ждь на́м, я́ко учи́тель ученико́м, моли́тву моля́щимся ю́же вдохну́ в тя́ Ду́х Святы́й, да предста́тельством твои́м и мы́ улучи́м приснодви́жную моли́тву ко Го́споду Иису́су Христу́. Ему́же че́сть и поклоне́ние и моли́твенное славосло́вие возсыла́ем со Безнача́льным Его́ Отце́м и Пресвяты́м и Благи́м и Животворя́щим Его́ Ду́хом, ны́не и при́сно и во ве́ки веко́в. Ами́нь.