Конда́к 1.

Избра́нному чудотво́рцу, Всеми́лостиваго Спа́са уго́днику, А́нгелов собесе́днику и хода́таю челове́ков гре́шных, о держа́ве Росси́йстей моли́твеннику и оби́тели Леохно́вския устрои́телю, мы́, недосто́йнии раби́ твои́, благодаре́ние во умиле́нном се́рдце прино́сим. Ты́ же, Анто́ние преподо́бне, Престо́лу Сла́вы предстоя́, от вся́ких боле́зней, бе́д, нестрое́ний и скорбе́й все́х на́с сохраня́й, да любо́вию взыва́ем ти́:

Ра́дуйся чудотво́рче Анто́ние, А́нгелов собесе́дниче.

И́кос 1.

А́нгельское житие́ от ю́ности возлюби́в, о́тчий до́м оста́вил еси́, и у́м на Небе́сная возве́л еси́, преподо́бне, се́рдцем ко Го́споду пламене́я, в безмо́лвии и му́дрости Ева́нгельской Боже́ственному житию́ поуча́яся. При́зван же от Бо́га бы́в, и́ноческую оби́тель устро́ив, ве́рный о́браз вруче́нней тебе́ бра́тии яви́лся еси́, всего́ себе́ в же́ртву свя́ту и богоуго́дну прине́сл еси́, те́мже промышле́нию Бо́жию о тебе́ дивя́щеся, во умиле́нии зове́м ти́:

Ра́дуйся, благочести́ваго ко́рене о́трасле пречестна́я; ра́дуйся, лозо́ виногра́да Христо́ва многопло́дная.

Ра́дуйся, гра́да Тве́ри сла́вное прозябе́ние; ра́дуйся, Вели́каго Нова́града духо́вное украше́ние.

Ра́дуйся, от чре́ва ма́тери Ду́хом просвеще́нный; ра́дуйся, Боже́ственным Писа́нием от ю́ности умудре́нный.

Ра́дуйся, граждани́не Небе́сный; ра́дуйся, подви́жниче Спа́сов всече́стне.

Ра́дуйся, мона́хов наста́вниче жития́ а́нгельскаго; ра́дуйся, иере́ев учи́телю служе́ния благогове́йнаго.

Ра́дуйся, я́ко ско́ро послу́шаеши мольбы́, с ве́рою тебе́ приноси́мыя; ра́дуйся, я́ко о́браз явля́еши ве́рным жития́ благочести́ваго.

Ра́дуйся, чудотво́рче Анто́ние, А́нгелов собесе́дниче.

Конда́к 2.

Ве́дяше, блаже́нне, от ю́ности твоея́, коли́ких исполня́ется зо́л и боле́зней вся́к челове́к, прилепля́ющеся суете́ ми́ра сего́, и коли́ких бла́г лиша́ется, отпа́дая от Созда́теля своего́ Бо́га, на вся́кий ча́с согреша́я мно́гажды, те́мже пови́нен ве́чной му́ке быва́ет. Печа́ль мно́гу о си́х име́я, моли́л еси́ Всеми́лостиваго Спа́са и Пречи́стую Богоро́дицу, дабы́ избежа́ти тебе́ красоты́ мирски́я ве́ка сего́ и сподо́битися и́ноческаго о́браза и вы́ну воспева́ти Бо́гу: Аллилу́иа.

И́кос 2.

Разуме́вше Про́мысл Бо́жий о тебе́, дости́гл преде́лов Новогра́дских, и в Рубле́ве пу́стоши, в разсе́лине земно́й верте́п ископа́л еси́, и та́мо затвори́л еси́ себе́, стра́сти умерщвля́я и Еди́ному Го́сподеви рабо́тая. Смире́нием мно́гим благода́ть Госпо́дню стяжа́в, даро́в духо́вных от Бо́га испо́лнился еси́: разсужде́ния, моли́твы, прови́дения и чудоде́йствия, А́нгелов же чистото́ю жития́ твоего́ удиви́л еси́, сего́ ра́ди вопие́м ти́:

Ра́дуйся, в по́двизе потруди́выйся пусты́ннаго жития́; ра́дуйся, в посте́ и бде́нии искуси́выйся весьма́.

Ра́дуйся, в по́двизе моли́твы преуспе́вый; ра́дуйся, у́м тво́й в Небе́сная впери́вый.

Ра́дуйся, ду́шу твою́ смиреному́дрием украси́вый; ра́дуйся, се́рдце твое́ от вся́каго зла́ очи́стивый.

Ра́дуйся, те́ло твое́ непреста́нными труды́ укрепи́вый; ра́дуйся, хра́м Ду́ха Боже́ственнаго всего́ себе́ соде́лавый.

Ра́дуйся, земну́ю любо́вь к сро́дником препобеди́вый; ра́дуйся, Еди́ному Го́споду рабо́тати возлюби́вый.

Ра́дуйся, пусты́ню по́двиги твои́ми освяти́вый; ра́дуйся, сия́нием жития́ твоего́ во убо́зем верте́пе все́х озари́вый.

Ра́дуйся, чудотво́рче Анто́ние, А́нгелов собесе́дниче.

Конда́к 3.

Си́лою моли́тв твои́х, да́ром прозре́ния, му́дростию и чудесы́ уподо́бился еси́ дре́внему Ма́рку Афиня́нину, прише́дшаго к тебе́ и́нока Ни́фонта вельми́ удивля́я и ви́дом пло́ти небрего́мой своея́ устраша́я, преподо́бне. В простоте́ се́рдца ре́кл еси́ горе́ подви́гнутися, и бы́сть та́ко, по сло́ву Ева́нгельскому Го́спода твоего́, А́нгел же трапе́зу угото́ва двема́ собесе́дникома. Те́мже Ни́фонт, свиде́тель бы́в чуде́с таковы́х, во умиле́нии просла́ви Бо́га, прославля́ющаго уго́дники Своя́: Аллилу́иа.

И́кос 3.

Име́я жела́ние неусы́пное и́ноческий о́браз восприя́ти, моли́л еси́, Анто́ние, Всеми́лостиваго Спа́са дабы́ сподо́бил тя́ сея́ благода́ти, и посла́ ти́ А́нгела Своего́ и повеле́ Леохны́ дости́гнути. От свяще́ннаго же и́нока Тара́сия зде́ прия́л еси́ по́стриг возжеле́нный, преподо́бне, и хра́м созда́ моли́твенный Боголе́пнаго Преображе́ния, да в не́м прославля́емо бу́ди вы́ну и́мя Госпо́дне, те́мже благода́рно воспева́ем ти́:

Ра́дуйся, к оби́телем Небе́сным неукло́нно взира́яй; ра́дуйся, си́лою благода́ти Бо́жией облека́емь.

Ра́дуйся, пре́жде по́стрига на земли́ а́нгельски пожи́вый; ра́дуйся, в по́стриге от ста́рца твоего́ но́вое свято́е и́мя восприя́вый.

Ра́дуйся, я́ко те́сный пу́ть спасе́ния возлюби́л еси́; ра́дуйся, я́ко свяще́нными обе́ты во́лю свою́ связа́л еси́.

Ра́дуйся, с собра́том твои́м неле́гкий тру́д и́ноческой жи́зни подъя́вый; ра́дуйся, хра́м моли́твенный Спа́су возведы́й и украси́вый.

Ра́дуйся, стра́сти грехо́вныя в себе́ умертви́вый; ра́дуйся, всего́ себе́ в же́ртву Го́сподеви принесы́й.

Ра́дуйся, А́нгелов на Небеси́ весе́лие; ра́дуйся, Це́ркве земны́я похвало́ ве́лие.

Ра́дуйся, чудотво́рче Анто́ние, А́нгелов собесе́дниче.

Конда́к 4.

Бу́рю помышле́ний мирски́х побежда́ти благода́тию науча́л еси́ бра́тию прите́кшую к тебе́, преподо́бне, хотя́щу под твои́м нача́лом жи́ти и о́бразом твои́м назида́тися. Ты́ же, сла́вы от челове́к избега́я, учи́л еси́ все́х подража́ти отце́м дре́вним, после́довати нра́вом и украша́тися обы́чаи и́х, дабы́ с ни́ми просла́витися на Небесе́х и а́нгельски воспева́ти Спаси́телю Бо́гу: Аллилу́иа.

И́кос 4.

Слы́шавше богоуго́дное житие́ твое́, Анто́ние богому́дре, прихожда́ху к тебе́ от все́х конце́в и́ноческаго жития́ ревни́тели, простецы́ и благоро́днии, оби́тель святу́ю соста́вльше. Ты́ же, име́я у́м здра́в и добро́ту серде́чную, те́ми превозмо́гл еси́ недоста́ток уче́ности, други́м Ио́сифом яви́лся еси́ бра́тии твое́й, с любо́вию наставля́я и о́браз благоче́стия и трудолю́бия явля́я. Та́ко и мы́ ны́не житие́м твои́м назида́емии, вопие́м:

Ра́дуйся, оби́тели Преображе́нския основа́телю; ра́дуйся, дре́вних мона́хов усе́рдный подража́телю.

Ра́дуйся, до́брый ста́да Христо́ва наста́вниче; ра́дуйся, коему́ждо во бла́го усе́рдный служи́телю.

Ра́дуйся, смире́нием ду́х на высоте́ утверди́вый; ра́дуйся, стра́сти грехо́вныя в себе́ умертви́вый.

Ра́дуйся, и́ноков пра́вило и основа́ние; ра́дуйся, о́браза А́нгельскаго жития́ препода́ние.

Ра́дуйся, любо́вию па́че слове́с наставля́яй; ра́дуйся, собо́ю пра́вило жития́ и́ноческаго явля́яй.

Ра́дуйся, мудрецо́в ми́ра сего́ мудре́йший; ра́дуйся, подви́жниче благоче́стия усе́рднейший.

Ра́дуйся, чудотво́рче Анто́ние, А́нгелов собесе́дниче.

Конда́к 5.

Богосве́тлою звездо́ю возсия́л еси́, преподо́бне Анто́ние, в земно́м житии́ твое́м, Леохну́ богому́дрием твои́м и чудесы́ вельми́ просла́вил еси́, и в да́льних конце́х изве́стно бы́сть и́мя твое́. Ты́ же непреста́нно прославля́л еси́ Вели́каго Бо́га, да́вшаго тебе́ такову́ю благода́ть: Аллилу́иа.

И́кос 5.

Ви́девше прозорли́вым о́ком, в сму́тное вре́мя междуусо́бной бра́ни, мно́жество во́ев, от ру́к враго́в под О́ршею изги́бших, ре́кл еси́, Анто́ние, ке́ларю своему́: «сего́ дне́, бра́те, мно́го правосла́вных поби́то грехо́в ра́ди наро́да на́шего», – те́мже со и́ноцы о исправле́нии во́инства и наро́да правосла́внаго моли́лся еси́. Дивя́щеся постиже́нию тобо́ю глуби́н Про́мысла Боже́ственнаго, мо́лим тя́ бы́ти на́м учи́телем богоуго́днаго жития́, и ублажа́юще вопие́м ти́:

Ра́дуйся, да́льнее я́ко бли́з су́щее прови́девый; ра́дуйся, смире́нием твои́м высо́кая дарова́ния стяжа́вый.

Ра́дуйся, глубины́ изве́давый Про́мысла Боже́ственнаго; ра́дуйся, к покая́нию направля́яй гре́шников.

Ра́дуйся, учи́телю благоче́стия; ра́дуйся, кро́ткий обличи́телю нече́стия.

Ра́дуйся, о стране́ на́шей моли́твенниче и печа́льниче; ра́дуйся, в беда́х пресла́вный засту́пниче.

Ра́дуйся, ве́рным ми́р и утвержде́ние; ра́дуйся, ско́рое от бе́д избавле́ние.

Ра́дуйся, наро́д правосла́вный все́м се́рдцем возлюби́вый; ра́дуйся, я́ко мо́лишися о все́х на́с вы́ну.

Ра́дуйся, чудотво́рче Анто́ние, А́нгелов собесе́дниче.

Конда́к 6.

Пропове́дником покая́ния явля́ешися, преподо́бне, неду́жныя исцеля́еши и от внеза́пныя сме́рти гре́шников избавля́еши. О́трока от зми́я сме́ртно уя́звленна моли́твою и водо́ю исцели́л еси́, и прозре́в соде́янное те́м, во гресе́, обличи́л еси́, То́й же, во умиле́ние прише́д, к покая́нию со стра́хом обрати́ся, прославля́я Бо́га, чу́днаго во святы́х Свои́х: Аллилу́иа.

И́кос 6.

Возсия́л еси́ во стране́ на́шей стро́гим по́двигом жития́ твоего́, Анто́ние преподо́бне; доше́дшу слу́ху твоему́ к самому́ царю́ Васи́лию, оби́тели твое́й святе́й то́й мно́гая блага́я ко процвета́нию земно́му дарова́, и моли́тв твои́х с благослове́нием небе́сным для держа́вы Росси́йския проси́л е́сть, ты́ же проше́ния его́ не посрами́л еси́, сего́ ра́ди вопие́м ти́:

Ра́дуйся, страны́ Росси́йския засту́пниче; ра́дуйся, о царе́х усе́рдный моли́твенниче.

Ра́дуйся, я́ко о благи́х оби́тели твоея́ забо́тился еси́ вельми́; ра́дуйся, я́ко со тща́нием хозя́йство ея́ устроя́л еси́.

Ра́дуйся, в ну́ждах жите́йских су́щим все́м ско́рый помо́щниче; ра́дуйся, в бога́тстве де́л земны́х соблюды́й себе́ в духо́вной нищете́.

Ра́дуйся, я́ко стена́ кре́пкая ста́ду твоему́ бы́л еси́; ра́дуйся, я́ко благода́ть Бо́жию к нему́ оби́льно привле́кл еси́.

Ра́дуйся, стужа́емых от страсте́й свободи́телю; ра́дуйся, душе́внаго и теле́снаго здра́вия пода́телю.

Ра́дуйся, я́ко па́дших во гре́х возста́вил еси́; ра́дуйся, я́ко боле́зни теле́сныя и духо́вныя отгна́л еси́.

Ра́дуйся, чудотво́рче Анто́ние, А́нгелов собесе́дниче.

Конда́к 7.

Хотя́щу пла́мени, ве́тром разжига́ему, ке́ллии и́ноков пожра́ти, со слеза́ми ре́кл еси́, преподо́бне, Спа́су Всеми́лостивому: «Ты́ благоволи́л еси́ полюби́ти оби́тель сию́, попусти́ же на́м, живу́щим зде́, наказа́ние с ми́лостию». Та́ко с ве́рою ре́кшу тебе́, обрати́ся ве́тр вспя́ть, не сде́лавши мно́гаго вре́да оби́тели, и́ноки же, утруди́вшеся пла́мень гаси́ти, возликова́ли су́ть, воспе́вши хвалу́ Бо́гу: Аллилу́иа.

И́кос 7.

Но́ваго вои́стину наста́вника мона́хом и миря́ном на земли́ яви́ тя́ Госпо́дь, о́тче Анто́ние; мно́зи же христолюби́вии лю́дие, позна́вше богоуго́дное житие́ твое́ и си́лу духо́вную уразуме́вше, восхваля́ху тя́, егда́ ми́рно преста́ви тя́ Госпо́дь в Небе́сныя оби́тели, и уве́девши но́ваго засту́пника небе́снаго, соверша́ху любо́вию святу́ю па́мять твою́, воспева́юще:

Ра́дуйся, христолюби́вых люде́й утеше́ние; ра́дуйся, и́ноков пресла́вное похвале́ние.

Ра́дуйся, со Апо́столом сме́рть себе́ приобре́тение вмени́вый; ра́дуйся, к преселе́нию в оби́тели Небе́сныя себе́ угото́вивый.

Ра́дуйся, после́дняго часа́ своего́ не устраши́выйся; ра́дуйся, в ча́с кончи́ны Та́йн Христо́вых приобщи́выйся.

Ра́дуйся, после́днее благослове́ние ра́достно препода́вый; ра́дуйся, ми́рно от земли́ к Небе́сным преста́вивыйся.

Ра́дуйся, прикрове́нно предре́кший прославле́ние свое́ во святы́х; ра́дуйся, во оби́тели твое́й погребе́ние предсказа́вый моще́й твои́х.

Ра́дуйся, смире́нием духо́вная дарова́ния стяжа́вый; ра́дуйся, гряду́щая я́ко настоя́щая прови́девый.

Ра́дуйся, чудотво́рче Анто́ние, А́нгелов собесе́дниче.

Конда́к 8.

Стра́нное и пресла́вное чу́до показа́ о тебе́ Госпо́дь, егда́ нетле́нное те́ло твое́ чу́дно обре́тено бы́сть лю́дем Нова́града на ра́дость: приходя́щим бо поклони́тися тебе́, цельбу́ духо́вную и теле́сную оби́льно препо́дал еси́, и слепа́го исцели́л еси́, три́ ле́та нима́ло свои́ми оча́ми не ви́девша; те́мже воспева́ху Вели́кому Бо́гу: Аллилу́иа.

И́кос 8.

Ве́сь бы́в в Ду́се свя́те в житии́ земно́м, ве́сь Ду́хом насыще́н сы́й во успе́нии твое́м, в нетле́нном телеси́; те́мже мно́г наро́д иска́ше прикаса́тися тебе́, егда́ с пе́нием моле́бным несе́н бы́сть в ме́сто погребе́ния но́ваго, иде́же ны́не ми́рно под спу́дом почива́я, от все́х слы́шиши такова́я:

Ра́дуйся, Ду́хом Святы́м просвеще́нный; ра́дуйся, и́стинный ра́бе Христо́в благи́й и ве́рный.

Ра́дуйся, А́нгелы на Небеси́ прославля́емый; ра́дуйся, на земли́ досто́йно ублажа́емый.

Ра́дуйся, святы́ни чи́стое и честно́е жили́ще; ра́дуйся, вели́ких доброде́телей вмести́лище.

Ра́дуйся, тве́рдое прибе́жище ве́рных; ра́дуйся, утеше́ние уны́лых и безнаде́жных.

Ра́дуйся, соверше́нства учи́телю; ра́дуйся, и́стиннаго Бо́га служи́телю.

Ра́дуйся, по́стников украше́ние; ра́дуйся, преподо́бных похвало́.

Ра́дуйся, чудотво́рче Анто́ние, А́нгелов собесе́дниче.

Конда́к 9.

Вся́к приходя́щий николи́же то́щ и неуте́шен от тебе́ оты́де, Анто́ние преподо́бне, исцеля́еши неду́ги, в ско́рбех и беда́х утеша́еши, в ве́ре и благоче́стии утвержда́еши, безбо́жных к Бо́гу обраща́еши, отча́янных к покая́нию призыва́еши, и все́м вся́ обрета́ешися спасе́ния не́которых ра́ди. Те́мже прославля́ем Да́вшаго тебе́ кре́пость такову́ю: Аллилу́иа.

И́кос 9.

Вети́и суему́дренныя недоуме́ют, ка́ко в толи́ких беда́х и испыта́ниих оби́тели твоея́: пожа́рах и разоре́ниих в не́й бы́вших, мо́щи твоя́ цельбоно́сныя невреди́мы пребы́ша на ме́сте погребе́ния и́х. Мы́ же, дела́ твоя́ сла́вная, чрез ни́х Спа́сом твори́мыя, ви́дяще и доны́не, та́ко прославля́ем тя́:

Ра́дуйся, я́ко моща́ми твои́ми во оби́тели се́й пребыва́еши досе́ле; ра́дуйся, я́ко тобо́ю спасе́ния ве́рным отверза́ются две́ри.

Ра́дуйся, разсла́бленныя от одра́ боле́зни воздви́гнувый; ра́дуйся, слепы́м прозре́ние дарова́вый.

Ра́дуйся, боля́щия мно́гия исцели́вый; ра́дуйся, стра́ждущия в терпе́нии укрепи́вый.

Ра́дуйся, в ско́рбех ско́рый защи́тниче; ра́дуйся, правосла́вным христиа́ном помо́щниче.

Ра́дуйся, нече́стия вся́каго обличи́телю; ра́дуйся, покая́ния и́стиннаго учи́телю.

Ра́дуйся, те́плый хода́таю о все́х, призыва́ющих и́мя твое́; ра́дуйся, нело́жное упова́ние почита́ющих тя́.

Ра́дуйся, чудотво́рче Анто́ние, А́нгелов собесе́дниче.

Конда́к 10.

Спасти́ хотя́ще росси́йскаго царя́ Алекса́ндра-миротво́рца от стра́шней ги́бели в де́нь па́мяти твоея́, моли́л еси́ усе́рдно, преподо́бне, Царя́ Небе́снаго, и услы́шана бы́сть моли́тва твоя́. О́браз бо келе́йный тво́й Спа́с Нерукотворе́нный бы́сть, таково́й же о́браз неврежде́нным пребы́сть с горя́щею лампа́дою в ваго́не сокруше́нном, иде́же спасла́ся е́сть вся́ семья́ ца́рская с насле́дником, во умиле́нии воспе́вши Вели́кому Бо́гу: Аллилу́иа.

И́кос 10.

Стена́ непристу́пная враго́м оте́чества бы́сть моли́тва твоя́, Анто́ние, егда́ ико́ной твое́й благословля́ше ца́рь Пе́тр фла́гманский фрега́т Балти́йскаго фло́та росси́йскаго, промышля́еши бо о стране́ на́шей и погубля́еши све́ев злове́рных, от ни́хже сожже́на бы́сть оби́тель твоя́ иногда́, те́мже восхваля́ем тя́:

Ра́дуйся, о укрепле́нии и возвыше́нии страны́ на́шея ревни́телю; ра́дуйся, во и́стине и пра́вде Бо́жией ея́ устрои́телю.

Ра́дуйся, благопотре́бне во оте́честве твое́м возсия́вый; ра́дуйся, изоби́лие благи́х и сла́ву его́ прови́девый.

Ра́дуйся, фло́та росси́йскаго Небе́сный покрови́телю; ра́дуйся, враго́в оте́чества сокруши́телю.

Ра́дуйся, я́ко о стране́ на́шей во благо́е промышля́еши; ра́дуйся, я́ко о ми́ре и благостоя́нии ея́ мо́лишися.

Ра́дуйся, неистощи́мый исто́чниче ми́лости; ра́дуйся, царя́-миротво́рца ди́вный спаси́телю.

Ра́дуйся, му́дрости христиа́нской вмести́лище; ра́дуйся, слуго́ Бо́жий, ре́вностию Бо́жиею распали́выйся.

Ра́дуйся, чудотво́рче Анто́ние, А́нгелов собесе́дниче.

Конда́к 11.

Пе́ние всеумиле́нное от любви́ в похвалу́ тебе́ на́ми возноси́мое приими́, благоутро́бне о́тче Анто́ние, приклони́ся к на́м ми́лостию и в христиа́нском житии́ преуспе́ти сподо́би, не преста́й излия́ти благода́ть, сохраня́юще от сопроти́вныя си́лы, от вся́каго зла́, подаю́ще на́м вся́ потре́бная к по́льзе душе́вной и теле́сней, да моли́твами твои́ми спаса́еми, вы́ну воспое́м Спа́су Всеми́лостивому: Аллилу́иа.

И́кос 11

Светопода́тельный свети́льник возсия́л еси́ ми́ру в Леохно́вской ве́си, преподо́бне о́тче, все́х призыва́еши к богоуго́дному и благогове́йному житию́, в благода́тный ми́р Це́ркви Христо́вой ча́д но́вых приво́диши, ве́рных в ве́ре укрепля́еши, в доброде́тели подвиза́еши, в ско́рбех и боле́знех чуде́сно утеша́еши, любо́вь нелицеме́рную да́руеши и пе́ти тебе́ все́х науча́еши:

Ра́дуйся, серде́ц и умо́в благода́тное просвеще́ние; ра́дуйся, чуде́сное в обстоя́ниих злы́х вспоможе́ние.

Ра́дуйся, о́браза христиа́нскаго жития́ указа́ние; ра́дуйся, ду́ха моли́твы в сердца́х возгрева́ние.

Ра́дуйся, вхо́де ча́дом спасе́ния во огра́ду Церко́вную; ра́дуйся, ле́ствице из ми́ра до́льняго к Го́рнему.

Ра́дуйся, Литурги́ею Боже́ственной наслажде́ние; ра́дуйся, пути́ неуко́рнаго в Ца́рствие Бо́жие отверзе́ние.

Ра́дуйся, любы́, ра́зум челове́ческий превосходя́щая; ра́дуйся, свеще́ у́мная, А́нгелы веселя́щая.

Ра́дуйся, Церко́вная сла́досте; ра́дуйся, Пасха́льная ра́досте.

Ра́дуйся, чудотво́рче Анто́ние, А́нгелов собесе́дниче.

Конда́к 12.

Благода́ть боже́ственная многообра́зными путя́ми святы́ню сию́ сохрани́ла е́сть на́м, о́тче преподо́бне, оби́тель твою́ и многоцеле́бныя мо́щи, а́ще и под спу́дом почива́ющия, оба́че я́ко на све́щнице ми́ру сия́ющия, – в пе́пле пожа́рищ о́браза неврежде́нны сохраня́юще, благогове́йных на зда́тельство хра́мов вдохновля́юще, безбо́жныя и злы́я огне́м попаля́юще, кощу́нники из хра́ма свята́го измета́юще, ве́рных же чти́ти па́мять твою́ науча́юще и все́м славосло́вие Бо́гу о тебе́ да́рующе: Аллилу́иа.

И́кос 12.

Пою́ще твое́ моли́твенное заступле́ние, преподо́бне о́тче Анто́ние, благода́рно храни́м па́мять чуде́с, тобо́ю соде́янных, и́миже Бо́г просла́ви мно́гажды на ме́сте се́м пречестно́е и́мя твое́, и согла́сно воспева́ем ти́:

Ра́дуйся, боля́щих цели́телю; ра́дуйся, ско́рбных уте́шителю.

Ра́дуйся, немощны́х помо́щниче; ра́дуйся, стра́ждущих защи́тниче.

Ра́дуйся, я́ко безде́тным роди́телем ра́дость о ча́дех да́руеши; ра́дуйся, я́ко возставля́ти умира́ющих благода́ть и́маши.

Ра́дуйся, я́ко стра́ждущим от ра́ка ле́та жития́ продлева́еши; ра́дуйся, я́ко безнаде́жных соверше́нныя наде́жды исполня́еши.

Ра́дуйся, я́ко обраща́ющихся к ве́ре от неду́гов избавля́еши; ра́дуйся, я́ко в ну́ждах жите́йских ско́ро помога́еши.

Ра́дуйся, дарова́ния чуде́с прие́мый; ра́дуйся, ве́рных засту́пниче ве́рный.

Ра́дуйся, чудотво́рче Анто́ние, А́нгелов собесе́дниче.

Конда́к 13.

О, преди́вный Леохно́вский чудотво́рче, преподо́бне о́тче Анто́ние, приими́ убо́гое моле́ние на́с недосто́йных, чту́щих святу́ю па́мять твою́, труды́ твоя́ безме́рныя, сле́зы, поще́ния и всено́щныя бде́ния, и́миже нача́ло оби́тели твоея́ положи́л еси́, ю́же доны́не моли́твами твои́ми сохрани́л еси́. Изба́ви на́с от бе́д настоя́щих и ве́чныя сме́рти, да твои́м заступле́нием дости́гнув оби́телей Небе́сных, и мы́ с тобо́ю и все́ми святы́ми воспева́ти и́мамы Бо́гу ве́чно: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгельское житие́ от ю́ности возлюби́в, о́тчий до́м оста́вил еси́, и у́м на Небе́сная возве́л еси́, преподо́бне, се́рдцем ко Го́споду пламене́я, в безмо́лвии и му́дрости Ева́нгельской Боже́ственному житию́ поуча́яся. При́зван же от Бо́га бы́в, и́ноческую оби́тель устро́ив, ве́рный о́браз вруче́нней тебе́ бра́тии яви́лся еси́, всего́ себе́ в же́ртву свя́ту и богоуго́дну прине́сл еси́, те́мже промышле́нию Бо́жию о тебе́ дивя́щеся, во умиле́нии зове́м ти́:

Ра́дуйся, благочести́ваго ко́рене о́трасле пречестна́я; ра́дуйся, лозо́ виногра́да Христо́ва многопло́дная.

Ра́дуйся, гра́да Тве́ри сла́вное прозябе́ние; ра́дуйся, Вели́каго Нова́града духо́вное украше́ние.

Ра́дуйся, от чре́ва ма́тери Ду́хом просвеще́нный; ра́дуйся, Боже́ственным Писа́нием от ю́ности умудре́нный.

Ра́дуйся, граждани́не Небе́сный; ра́дуйся, подви́жниче Спа́сов всече́стне.

Ра́дуйся, мона́хов наста́вниче жития́ а́нгельскаго; ра́дуйся, иере́ев учи́телю служе́ния благогове́йнаго.

Ра́дуйся, я́ко ско́ро послу́шаеши мольбы́, с ве́рою тебе́ приноси́мыя; ра́дуйся, я́ко о́браз явля́еши ве́рным жития́ благочести́ваго.

Ра́дуйся, чудотво́рче Анто́ние, А́нгелов собесе́дниче.

Конда́к 1.

Избра́нному чудотво́рцу, Всеми́лостиваго Спа́са уго́днику, А́нгелов собесе́днику и хода́таю челове́ков гре́шных, о держа́ве Росси́йстей моли́твеннику и оби́тели Леохно́вския устрои́телю, мы́, недосто́йнии раби́ твои́, благодаре́ние во умиле́нном се́рдце прино́сим. Ты́ же, Анто́ние преподо́бне, Престо́лу Сла́вы предстоя́, от вся́ких боле́зней, бе́д, нестрое́ний и скорбе́й все́х на́с сохраня́й, да любо́вию взыва́ем ти́:

Ра́дуйся чудотво́рче Анто́ние, А́нгелов собесе́дниче.

Моли́тва.

О, преподо́бне и богоно́сне о́тче на́ш Анто́ние, Небе́сный челове́че и земны́й А́нгеле! А́ще ты́ и прикрове́нно по́двиг вели́каго служе́ния соверша́л еси́ в ти́хом житии́ твое́м, и по кончи́не блаже́нней твое́й мо́щи под спу́дом сокрыва́л еси́, оба́че от Бо́га и челове́к просла́влен бы́сть вельми́. В после́дняя же времена́ утаи́л еси́ себе́ и от сла́вы челове́ческия, и от мудрецо́в ве́ка сего́, и откры́л еси́ себе́ ча́дом и́стинным Церко́вным, позна́вшим твою́ благода́ть и благомо́щное заступле́ние. Преклоня́ем коле́на серде́ц на́ших пред по́двигом жития́ твоего́ пусты́ннаго, и́мже дарова́ния от Бо́га приобре́л еси́ ве́лия, и пред безме́рными труды́ твои́ми, и́миже оби́тель сию́ воздви́гл еси́ на спасе́ние мно́гих, и пред сле́зным предстоя́нием твои́м у Престо́ла Сла́вы за на́с, окая́нных и злы́х. Ны́не, притека́я в хра́м се́й к ра́це моще́й твои́х, мо́лим тя́ и ве́руем, я́ко ты́ ве́лие дерзнове́ние и́маши в моли́твах ко Всеми́лостивому Спа́су, И́же всегда́ послу́шает тебе́, ве́рнаго уго́дника Своего́. Моли́ милосе́рдие Бо́жие, да спасе́т на́с от прегреше́ний на́ших, и́миже ве́сть судьба́ми. Моли́ бла́гость Его́, е́же ми́лостивно оби́тели се́й и ми́ру всему́ потре́бная подава́ти, стра́ждущую страну́ на́шу Росси́йскую укрепля́ти и благоче́стием возвыша́ти, и извести́ от поги́бели живо́т на́ш. Бу́ди на́м путево́ждь ко спасе́нию, доброде́тели науча́я: смире́нием на́шу горды́ню низложи́, безстра́стием на́ши стра́сти попали́, бде́нием от нераде́ния возста́ви и к и́стинному покая́нию приведи́, да́руй на́м ду́х кро́тости, чистоты́ и благоче́стия. Пода́ждь, да любо́вию ко Го́споду горя́ще и грехи́ на́ша помина́юще, стра́шный о́ный Де́нь Су́дный сре́тити угото́вимся и в Ца́рствие Небе́сное вни́ти с тобо́ю и все́ми святы́ми сподо́бимся, сла́вяще Отца́ и Сы́на и Свята́го Ду́ха во ве́ки веко́в. Ами́нь.