Конда́к 1.

Избра́нный уго́дниче Христо́в, и́ноков росси́йских первонача́льниче и вели́кий чудотво́рче, преподо́бне о́тче на́ш Анто́ние, с любо́вию прино́сим ти́ сия́ хвале́бныя пе́сни, небе́сному предста́телю на́шему: ты́ же я́ко име́яй дерзнове́ние ко Го́споду, моли́ся о спасе́нии на́с гре́шных, да зове́м ти́ благода́рно:

Ра́дуйся, Анто́ние, мона́шескаго в Росси́и жития́ первонача́льниче.

И́кос 1.

А́нгел во пло́ти бы́л еси́, преподо́бне о́тче Анто́ние, а́ще и на земли́ роди́лся еси́ во гра́де Лю́бечи, но вы́шний гра́д, Иерусали́м прекра́сный, граждани́на тя́ стяжа́: обита́еши в не́м со А́нгелы и святы́ми, и чуде́с луча́ми озаря́еши вы́ну Оте́чествие твое́ земно́е, от на́с же чту́щих тя́ услы́ши похва́льное пе́ние сицево́е:

Ра́дуйся, роди́телей благочести́вых сы́не; ра́дуйся, гра́да Лю́беча свято́е прозябе́ние.

Ра́дуйся, рая́ Иису́сова ве́твь многопло́дная; ра́дуйся де́лы благи́ми Христу́ благоугоди́вый.

Ра́дуйся, от младе́нчества Бо́гом избра́нный; ра́дуйся, от ю́ности Бо́га все́ю душе́ю возлюби́вый.

Ра́дуйся, вся́ за́поведи Госпо́дни ве́рно сохрани́вый; ра́дуйся, в оправда́ниих Влады́чних непоро́чно ходи́вый.

Ра́дуйся, чи́стое вмести́лище доброде́телей; ра́дуйся, кра́сное селе́ние Ду́ха Свята́го.

Ра́дуйся, целому́дрия рачи́телю; ра́дуйся, смире́ния люби́телю.

Ра́дуйся, Анто́ние, мона́шескаго в Росси́и жития́ первонача́льниче.

Конда́к 2.

Ви́дев Госпо́дь ду́шу твою́, о́тче Анто́ние, пла́менем Боже́ственныя любве́ объя́тую, в ю́ношеском во́зрасте научи́ тя́ богоугожде́нию и́стинному, Его́же про́мыслом наставля́ем, пеще́ру в Лю́бечи ископа́л еси́, и в не́й в моли́твах усе́рдных пребыва́л еси́, подвиза́яся сокруши́ти главу́ а́дскаго зми́я, и победи́ти вся́ его́ искуше́ния, да возмо́жеши досто́йно и пра́ведно воспева́ти Триеди́ному Бо́гу а́нгельскую пе́снь: Аллилу́иа.

И́кос 2.

Ра́зум небе́сный свы́ше тебе́ дарова́ся, преподо́бне о́тче Анто́ние, и в ю́ных ле́тех му́дростию ста́рческою процве́л еси́, вся́ тле́нная в уме́ты вмени́в, Еди́ному же Бо́гу благоугожда́ти вожделе́в, чесому́ свиде́тель нело́жен пеще́ра, в ю́ности тобо́ю ископа́нная в Лю́бечи, для по́двигов духо́вных, я́же я́ко труба́ все́м возвеща́ет, како́в подви́жник бы́л еси́ в ю́ности твое́й. О се́м дивя́щеся, вопие́м ти́:

Ра́дуйся, ю́ноше, Бо́гом возлю́бленный: ра́дуйся, о́троче, десни́цею Всевы́шняго освяще́нный.

Ра́дуйся, проро́ка Бо́жия Илии́, в пеще́ре жи́вшаго, благи́й подража́телю; ра́дуйся, Крести́теля Христо́ва Иоа́нна, в пусты́ни обита́вшаго, ре́вностный после́дователю.

Ра́дуйся, пеще́рное подви́жническое житие́ усе́рдно возлюби́вый, ра́дуйся, мно́гая благода́тная дарова́ния стяжа́вый.

Ра́дуйся, зако́н Бо́га твоего́ на скрижа́лех се́рдца твоего́ написа́вый; ра́дуйся, за́поведи Ева́нгелия Христо́ва све́т стезя́м твои́м име́вый.

Ра́дуйся, Христа́ премно́го возлюби́вый; ра́дуйся, непоро́чно и свя́то на земли́ пожи́вый.

Ра́дуйся, ми́р и вся́ кра́сная его́ презре́вый; ра́дуйся, о го́рних бла́гах вы́ну помышля́вый.

Ра́дуйся, Анто́ние, мона́шескаго в Росси́и жития́ первонача́льниче.

Конда́к 3.

Си́лою Бо́жиею укрепля́емый, Оте́чествие твое́ земно́е оста́вил еси́, Анто́ние богому́дре, и в жре́бий Богома́тере, Святу́ю Афо́нскую Го́ру удали́лся еси́, да та́мо обря́щеши приста́нище ти́хое ко спасе́нию, и навы́кнеши и́ноческому равноа́нгельному житию́, его́же возжеле́л еси́, да сподо́бишися благоприя́тно славосло́вити Творца́ вся́ческих Бо́га, и пе́ти Ему́: Аллилу́иа.

И́кос 3.

Име́я по́мысл чи́ст и непоро́чную ду́шу, о́тче Анто́ние, я́ко овча́ кро́ткое, на па́жить Богома́терню, во святу́ю Афо́нскую Го́ру прите́кл еси́, и к до́брому па́стырю и́ноческия оби́тели обрати́лся еси́, прося́ его́, да причте́т тя́ к ста́ду слове́сных свои́х ове́ц; то́йже прови́дев в тебе́ сосу́д избра́н Ду́ху Свято́му, с любо́вию тя́ прия́, и во и́ноческий чи́н облече́. Мы́ же ублажа́ем тя́ зва́нии си́ми:

Ра́дуйся, и́ноче боголюбе́зный; ра́дуйся, по́стниче нелицеме́рный.

Ра́дуйся, во́ине духо́вный, не обяза́выйся ку́плями жите́йскими; ра́дуйся, ку́плю небе́сную соверши́вый.

Ра́дуйся, Христа́ би́сера драга́го обреты́й; ра́дуйся, Его́ ра́ди Оте́чествие земно́е оста́вивый.

Ра́дуйся, Его́ ра́ди стра́нник и пришле́ц на земли́ чужде́й бы́вый; ра́дуйся, любо́вию кре́пкою с ни́м на ве́ки соедини́выйся.

Ра́дуйся, Афо́нския Горы́ жи́телю до́брый; ра́дуйся, жре́бия Богома́терняго прозябе́ние благода́тное.

Ра́дуйся, преподо́бных оте́ц Афо́нских духо́вный учениче́; ра́дуйся, богоно́сных пустынножи́телей Святы́я Горы́ неле́ностный сподви́жниче.

Ра́дуйся, Анто́ние, мона́шескаго в Росси́и жития́ первонача́льниче.

Конда́к 4.

Бу́ри страсте́й избежа́в, в пусты́ни Афо́нстей безстра́стия благода́тнаго дости́гл еси́, преподо́бне о́тче Анто́ние, и духо́вно возра́сл еси́ в му́жа соверше́нна о Христе́: те́мже безмо́лвия кра́йняго возжеле́в, с благослове́ния игу́мена твоего́, в горе́, в пеще́ре всели́лся еси́, и в не́й в моли́тве и посте́ безмо́лвно подвиза́лся еси́, вопия́ немо́лчно Бо́гу: Аллилу́иа.

И́кос 4.

Слы́шав игу́мен тво́й гла́с небе́сный повелева́ющ ему́, да по́слет тя́, о́тче Анто́ние, в страну́ росси́йскую на по́двиги духо́вныя, призва́ тя́ и благослови́, да и́деши та́мо, иде́же рожде́н бы́л еси́, и устро́иши оби́тель и́ноческую на ме́сте, свы́ше Бо́гом на то́ предызбра́ннем. Сего́ ра́ди тебе́ зове́м:

Ра́дуйся, свети́льниче Бо́жия благода́ти на Афо́не возже́нный, и Росси́ю духо́вно просвети́вый; ра́дуйся, я́ко све́т до́брых де́л твои́х немерца́емо све́тится при́сно.

Ра́дуйся, заре́ невече́рняя Со́лнца Пра́вды Христа́; ра́дуйся, послуша́ния рачи́телю, безпрекосло́вно во́лю игу́мена твоего́ испо́лнивый.

Ра́дуйся, свято́е благослове́ние Афо́нския Горы́ в насле́дие росси́йстей стране́ принесы́й; ра́дуйся, в во́лю Бо́жию всего́ себе́ преда́вый.

Ра́дуйся, му́дрый стра́нниче, иски́й Оте́чествия го́рняго; ра́дуйся, кра́сныя но́зе твои́ в пу́ть спаси́тельный ра́ди мно́гих напра́вивый.

Ра́дуйся, вся́ до́льняя презре́вый, о го́рних же вы́ну воздыха́вый; ра́дуйся, нищету́ духо́вную себе́ соверше́нно усво́ивый.

Ра́дуйся, смире́ния свята́го преиспо́лненный; ра́дуйся, слеза́ми моли́твенными себе́ ороша́вый.

Ра́дуйся, Анто́ние, мона́шескаго в Росси́и жития́ первонача́льниче.

Конда́к 5.

Боготе́чней звезде́ подо́бен бы́в, о́тче Анто́ние, от Афо́на в Ру́сь прите́кл еси́, и во гра́де Ки́еве, в пеще́ре варя́жстей, всели́лся еси́, обита́лище разбо́йников в хра́м моли́твы претвори́в, иде́же де́нь и но́щь в моли́тве неутоми́мо подвиза́лся еси́, и благоумиле́нно воспева́л еси́ Го́споду: Аллилу́иа.

И́кос 5.

Ви́девше тя́ лю́дие ки́евскии, Анто́ние богоно́сне, я́ко А́нгела Бо́жия, все́ми доброде́тельми укра́шена и равноа́нгельное житие́ в пеще́ре провожда́вшаго, прихожда́ху к тебе́ усе́рдно, о́ви благослове́ния и моли́тв от тебе́ и́щуще, о́ви же подвиза́тися с тобо́ю хотя́ше; ты́ же, по глаго́лу Христо́ву, приходи́вших к тебе́ не отгоня́л еси́, но спасе́нию челове́ческому ре́вностно служи́л еси́, и основа́ние сла́вней Ла́вре Пече́рстей положи́л еси́, я́же красу́ется тобо́ю, я́ко краеуго́льным ка́менем свои́м, и воспева́ет ти́ пе́сни таковы́я:

Ра́дуйся, подви́жничество духо́вное в росси́йстей стране́ насади́вый; ра́дуйся, сле́з твои́х тече́ньми о́ное во сто́ кра́т уплодоноси́вый.

Ра́дуйся, де́лателю до́брый виногра́да Небе́снаго; ра́дуйся, упра́вителю душеспаси́тельный вве́рившихся твоему́ духо́вному руково́дству.

Ра́дуйся, в подзе́мных кро́вех простра́нство Ца́рствия Небе́снаго получи́вый; ра́дуйся, к нему́ бо́дренно и неукло́нно ученики́ твоя́ путеводи́вый.

Ра́дуйся, пра́вило ве́ры и́стинныя; ра́дуйся, о́бразе кро́тости духо́вныя.

Ра́дуйся, верхо́вный о́тче и́ноков росси́йских; ра́дуйся, зерца́ло све́тлое все́х доброде́телей и́ноческих.

Ра́дуйся, о не́мже ра́дуются А́нгелы на небеси́; ра́дуйся, о не́мже Бо́га сла́вят челове́цы на земли́.

Ра́дуйся, Анто́ние, мона́шескаго в Росси́и жития́ первонача́льниче.

Конда́к 6.

Пропове́дник смире́ния свята́го бы́л еси́ бра́тии твое́й пеще́рней, преподо́бне о́тче Анто́ние; смире́ния бо ра́ди, от игу́менства и свяще́нства уклони́лся еси́, предпочита́я поуча́ти бра́тию, не толи́ко вла́стию и сло́вом, коли́ко приме́ром святоподви́жнаго жития́ твоего́, по глаго́лу Госпо́дню все́м бы́в слуго́ю. Те́мже ны́не прославля́ешися со А́нгелы, и сла́дце пое́ши Пресвяте́й Тро́ице: Аллилу́иа.

И́кос 6.

Возсия́л еси́ на гора́х Ки́евских я́ко сто́лп утвержде́ния ве́рных, Анто́ние богому́дре, и я́ко денни́ца све́тлая, от мра́ка пеще́рнаго восте́кл еси́ на го́ру Небе́сную, отню́дуже озаря́еши Це́рковь православнору́сскую, в не́йже почита́ешися по достоя́нию первонача́льником и́ноческаго жития́, и слы́шиши от ве́рных ча́д ея́ пе́ние сицево́е:

Ра́дуйся просла́вивый го́ры Пече́рския доброде́тельми твои́ми духо́вными; ра́дуйся, претвори́вый пеще́рное жили́ще разбо́йников в хра́мы Го́спода Сла́вы.

Ра́дуйся, в подзе́мных кро́вех главу́ глуби́ннаго зми́я кре́пко сокруши́вый; ра́дуйся, богомы́слием непреста́нным еще́ во пло́ти небе́сныя бла́га созерца́вый.

Ра́дуйся, утеше́ния Боже́ственнаго сподо́бленный; ра́дуйся, умиле́ния моли́твеннаго преиспо́лненный.

Ра́дуйся, мно́гих ча́д о Христе́ стяжа́вый; ра́дуйся, подража́тели жития́ твоего́ свята́го оте́чески люби́вый.

Ра́дуйся, я́ко се́мя твое́ духо́вное не оскуде́ в земли́ росси́йстей; ра́дуйся, я́ко весели́шися со ча́ды твои́ми в оби́телех ра́йских.

Ра́дуйся, я́ко пло́д благокра́сный, преди́внаго Феодо́сия духо́вно возрасти́л еси́; ра́дуйся, я́ко с ни́м вку́пе во Сла́ве Небе́сней пребыва́я, Бо́га вы́ну о на́с гре́шных умоля́еши.

Ра́дуйся, Анто́ние, мона́шескаго в Росси́и жития́ первонача́льниче.

Конда́к 7.

Вра́г спасе́ния челове́ческаго хотя́ ско́рбь тебе́ сотвори́ти, преподо́бне о́тче на́ш Анто́ние, вооружи́ гне́вом на тя́ вели́каго кня́зя Ки́евскаго Изясла́ва; ты́ же гне́ву его́ ме́сто уступа́я, в о́бласть Черни́говскую удали́лся еси́, и в горе́ Бо́лдиней пеще́ру себе́ ископа́в, в не́й люботру́дно подвиза́лся еси́, и те́м нача́ло оби́тели Свя́то-Ильи́нския та́мо положи́л еси́, я́же благогове́йно честву́ет ны́не твою́ пеще́ру, чудесы́ мно́гими просла́вленную, о ни́хже ве́рнии прославля́ют Ди́внаго во святы́х Свои́х Бо́га, зову́ще: Аллилу́иа.

И́кос 7.

Но́ваго тя́ Анто́ния Вели́каго дарова́ Госпо́дь стране́ росси́йской, преподо́бне о́тче; я́коже бо то́й дре́вле всю́ Це́рковь вселе́нскую све́том доброде́телей и чуде́с свои́х просвети́, первонача́льник все́х и́ноков я́влься: та́ко и ты́ ны́не всю́ Це́рковь Ру́сскую по́двиги твои́ми и чудесы́ духо́вно облиста́л еси́, и по достоя́нию первонача́льник и́ноков ру́сских имену́ешися. Те́мже зове́м ти́:

Ра́дуйся, во смире́нии твое́м вели́ких дарова́ний Бо́жиих удосто́енный; ра́дуйся, нището́ю духо́вною бога́тство небе́сное стяжа́вый.

Ра́дуйся, дре́вним проро́ком Бо́жиим равноче́стный; ра́дуйся, прозорли́вости благода́тныя преиспо́лненный.

Ра́дуйся, бу́дущая я́ко настоя́щая созерца́вый; ра́дуйся, та́йная помышле́ния челове́ческая прозрева́вый.

Ра́дуйся, вся́ искуше́ния духо́в тмы́ победоно́сно отража́вый: ра́дуйся, вели́кую вла́сть на диа́вола от Го́спода получи́вый.

Ра́дуйся, от мучи́тельства де́монскаго мно́гия челове́ки моли́твою твое́ю свободи́вый; ра́дуйся, я́ко исцеле́ния благода́тныя от гро́ба твоего́ ве́рным подае́ши.

Ра́дуйся, победи́вый враги́ неви́димыя глубо́ким твои́м смире́нием; ра́дуйся, низложи́вый и посрами́вый горды́ню зло́бнаго велиа́ра.

Ра́дуйся, Анто́ние, мона́шескаго в Росси́и жития́ первонача́льниче.

Конда́к 8.

Стра́нное и вельми́ безмо́лвное житие́ провожда́л еси́, богоно́сне о́тче, егда́ от Черни́гова па́ки в Ки́ев возврати́лся еси́, и от да́льния пеще́ры твоея́ в Бли́жнюю пресели́лся еси́, ю́же со ученики́ твои́ми ископа́в, я́ко ра́й кра́сный удобри́л еси́ ю́ по́двиги твои́ми и чудесы́, и в не́й безмо́лвно пребыва́я, умиле́нно воспева́л еси́ Царю́ Сла́вы Христу́: Аллилу́иа.

И́кос 8.

Ве́сь в Бо́зе бы́в богомы́слием непреста́нным, преподо́бне о́тче Анто́ние, в све́тлем виде́нии в Царегра́де, во Влахе́рнстей це́ркви, вку́пе с преподо́бным Феодо́сием, та́инственно ви́ден бы́л еси́ каменозда́тельми Вели́кия пече́рския це́ркве, егда́ Пресвята́я Влады́чица Богоро́дица посыла́ше и́х в Ки́ев сооружа́ти ту́ це́рковь и вруча́ше и́м Боже́ственную ико́ну Своего́ Успе́ния. Слы́шавше такова́я преве́лия чудеса́ Бо́жия, тебе́ чудотво́рцу пресла́вному вопие́м:

Ра́дуйся, изря́дный слуго́ Пресвяты́я Богоро́дицы; ра́дуйся, при́сный прослави́телю Ея́ ми́лостей и чуде́с.

Ра́дуйся, оби́тель сла́вную во и́мя Ея́ свято́е, в Росси́и основа́вый; ра́дуйся, ико́ну Ея́ чудотво́рную от ру́к Ея́ дарова́нную, ра́достно прия́вый.

Ра́дуйся, си́м о́бразом Ея́ Боже́ственным оби́тель твою́ духо́вно обогати́вый; ра́дуйся, с Не́ю вку́пе моли́тися за ны́ ко Го́споду дерзнове́ние получи́вый. Ра́дуйся, ве́рный исполни́телю за́поведей сы́на Ея́ и Бо́га; ра́дуйся, пресла́вный соверши́телю мно́гих вели́ких чуде́с.

Ра́дуйся, пеще́рный жи́телю, всю́ Росси́ю испо́лнивый сла́вою твои́х по́двигов; ра́дуйся, от те́мных ме́ст подзе́мных свети́вый ми́ру равноа́нгельным твои́м житие́м.

Ра́дуйся, безмо́лвниче ди́вный, вне́ жите́йских суе́т пожи́вый; ра́дуйся, затво́рниче благоумиле́нный молчали́вая уста́ име́вый.

Ра́дуйся, Анто́ние, мона́шескаго в Росси́и жития́ первонача́льниче.

Конда́к 9.

Все́м се́рдцем Бо́га возлюби́в, о́тче Анто́ние, Бо́гом возлю́блен бы́л еси́, и́же послу́шаше благоутро́бно твоя́ моли́твы и исполня́ше ми́лостиво вся́ твоя́ проше́ния. В указа́ние тебе́ ме́ста, иде́же име́яше созда́тися Вели́кая пече́рская це́рковь, проси́л еси́, преподо́бне, у Го́спода: да бу́дет по все́й земли́ роса́, а на ме́сте то́м су́ша, и па́ки: да бу́дет по все́й земли́ су́ша, а на ме́сте то́м роса́; и бы́сть та́к по твоему́ проше́нию. Те́мже ра́достно воспе́л еси́ чуде́с Бо́гу: Аллилу́иа.

И́кос 9.

Вити́й челове́ческих похвалы́ превосхо́дит святоподви́жническое житие́ твое́, преподо́бне о́тче Анто́ние: кто́ бо досто́йно мо́жет восхвали́ти тя́ чудотво́рца пресла́внаго, о́гнь с небесе́ све́дшаго моли́твою твое́ю, я́коже проро́к Илия́ дре́вле, и огне́м те́м все́ хвра́стие попали́вшаго на ме́сте, иде́же име́яше созда́тися Вели́кая пече́рская це́рковь, в зна́мение того́, я́ко ве́лия Бо́жия благода́ть в не́й обита́ти бу́дет. О се́м дивя́щеся, смире́нно глаго́лем:

Ра́дуйся, одушевле́нная Це́рковь Бо́га Жива́го бы́вый. Ра́дуйся, в хра́ме Триипоста́снаго Го́спода ду́шу твою́ освяти́вый.

Ра́дуйся, огнедохнове́нныя да́ры Ду́ха Свята́го в се́рдце твое́ прие́мый; ра́дуйся, духоно́сцем апо́столом Христо́вым единонра́вный.

Ра́дуйся, низводи́телю преди́вный огня́ с небесе́; ра́дуйся, удостовери́телю чудотво́рный Бо́жия благоволе́ния к ме́сту Вели́кия пече́рския це́ркве.

Ра́дуйся, адама́нте блиста́ющий дара́ми Бо́жия благода́ти, и несокруши́мый прило́ги вра́жиими; ра́дуйся, сто́лпе непоколеби́мый святы́я правосла́вныя ве́ры.

Ра́дуйся, чудотво́рче пресла́вный и богоприя́тный; ра́дуйся, моли́твенниче си́льный и скороуслы́шанный.

Ра́дуйся, ру́це твои́ преподо́бнии со дерзнове́нием мно́гим горе́ воздева́вый; ра́дуйся, проше́ния твоя́ со слеза́ми те́плыми Го́сподеви приноси́вый.

Ра́дуйся, Анто́ние, мона́шескаго в Росси́и жития́ первонача́льниче.

Конда́к 10.

Спаси́теля ду́ш на́ших, Го́спода Иису́са Христа́, ви́дети сподо́бился еси́ в виде́нии ди́внем, преподо́бне о́тче Анто́ние, и обетова́ния блага́я от у́ст Его́ Боже́ственных услы́шал еси́, я́ко ве́рный Его́ ра́б и уго́дник. Моли́ся у́бо Ему́, преподо́бне да и на́с убо́гих не отри́нет О́н от сла́дкаго лицезре́ния Своего́, но сподо́бит на́с со святы́ми вы́ну ви́дети Лице́ Его́ Пресве́тлое, и пе́ти Ему́: Аллилу́иа.

И́кос 10.

Царя́ Небе́снаго Христа́ ве́рный ра́б и после́дователь бы́л еси́, о́тче преподо́бне, и сего́ ра́ди чудотворе́ния да́ром от Него́ обогати́лся еси́. Мы́ же тебе́ целе́бника благода́тнаго ве́дуще, усе́рдно ны́не прихо́дим к свято́му твоему́ гро́бу, и от него́ цельбы́ безме́здныя душа́м и телесе́м на́шим прие́млюще, благода́рственно тебе́ глаго́лем:

Ра́дуйся, вели́чием по́двигов твои́х подо́бен бы́вый дре́вним богоно́сным отце́м; ра́дуйся, глубино́ю смире́ния твоего́ превозше́дый твоя́ сподви́жники.

Ра́дуйся, се́ти вра́жия, я́ко паучи́ну, сокруши́вый; ра́дуйся, в Ца́рствие Го́рнее, я́ко оре́л воспари́вый.

Ра́дуйся, во сле́д себе́ мно́гия ученики́ ко Христу́ приведы́й; ра́дуйся, ча́да твоя́ духо́вная от искуше́ний диа́вольских бо́дренно храни́вый.

Ра́дуйся, лени́выя подви́гнувый ко исправле́нию Христоподража́тельным твои́м житие́м; ра́дуйся, гре́шныя к покая́нию приведы́й твои́ми богому́дрыми словесы́.

Ра́дуйся, показа́телю любвеоби́льный; ра́дуйся, увеща́телю пресла́дкий.

Ра́дуйся, о́тче, отце́в красото́; ра́дуйся, па́стырю до́брый тобо́ю собра́ннаго слове́снаго ста́да.

Ра́дуйся, Анто́ние, мона́шескаго в Росси́и жития́ первонача́льниче.

Конда́к 11.

Пе́ние всеумиле́нное Го́сподеви приноси́л еси́, преподо́бне о́тче Анто́ние, и возлежа́ на одре́ сме́ртнем, моли́лся еси́ усе́рдно о оби́тели твое́й и ученице́х; та́же проще́ние и благослове́ние твое́й бра́тии препода́в, с ми́ром почи́л еси́, и приложи́лся еси́ к ли́ку святы́х и преподо́бных оте́ц, с ни́ми же ны́не сла́дце пое́ши Христу́ Бо́гу: Аллилу́иа.

И́кос 11.

Светопода́тельный свети́льник явля́ешися по сме́рти, преподо́бне о́тче Анто́ние, из под спу́да пеще́рнаго поста́вленный на версе́х небе́сных, и отону́ду све́тлостию чуде́с просвеща́яй Це́рковь Христо́ву. Просвети́, уго́дниче Бо́жий, и на́ша мра́чныя ду́ши све́том Христо́вым, и моли́твами твои́ми помози́ на́м тмы́ грехо́вныя избежа́ти, лучи́ благода́ти Бо́жия в сердца́ на́ша приима́ти и неосужде́нно пе́ти тебе́:

Ра́дуйся, благода́тию сия́ющий свети́льниче; ра́дуйся, зерца́ло пресве́тлое и́ноческаго жития́.

Ра́дуйся, вторы́й Моисе́е, мы́сленныя скрижа́ли, доброде́тели твоя́, на́м от горы́ святы́я принесы́й; ра́дуйся, вертогра́д духо́вный на гора́х Пече́рских насади́вый.

Ра́дуйся, я́ко ро́зги его́ от ю́га и до се́вера простро́шася; ра́дуйся, я́ко ли́ствия его́ при́сно зелене́ют.

Ра́дуйся, олядене́вшую в язы́честве зе́млю Ру́сскую духо́вно оплодотвори́вый; ра́дуйся, садоде́латель до́брый в не́й бы́вый.

Ра́дуйся, новосажде́ния богоуго́дныя в не́й возрасти́вый; ра́дуйся, от пеще́рных затво́ров в Ра́й Иису́сов цветы́ мно́гая пересади́вый.

Ра́дуйся, А́нгеле земны́й; ра́дуйся, челове́че небе́сный.

Ра́дуйся, Анто́ние, мона́шескаго в Росси́и жития́ первонача́льниче.

Конда́к 12.

Благода́ть Бо́жия храни́т свяще́нный тво́й гро́б, Анто́ние, о́тче на́ш, огня́ исхожде́нием и во́ды излия́нием от него́ возбрани́в хоте́вшим обрести́ твоя́ мо́щи: ты́ бо смире́н сы́й, и по сме́рти не восхоте́л еси́ яви́ти моще́й твои́х ми́ру, си́м поуча́я на́с благода́тному смире́нию, да во умиле́нии смиренному́дренно пое́м Бо́гу: Аллилу́иа.

И́кос 12.

Пою́ще святоподви́жное и равноа́нгельное житие́ твое́, преподо́бне о́тче, хва́лим, сла́вим и велича́ем укрепи́вшаго тя́ Го́спода, дарова́вшаго на́м в тебе́ приме́р святы́й и достоподража́тельный навсегда́. Приими́ у́бо, уго́дниче Христо́в, от на́с смире́нных, с любо́вию серде́чною тя́ почита́ющих, сия́ неле́стныя похвалы́:

Ра́дуйся, Пресвяты́я Живонача́льныя Тро́ицы благоволе́нием увенча́нный; ра́дуйся, Пресвяты́я Влады́чицы Богоро́дицы ми́лостьми уще́дренный.

Ра́дуйся, а́нгельских во́инств содру́жества сподо́бленный; ра́дуйся, блаже́нства святы́х удосто́енный.

Ра́дуйся, сонасле́дниче преподо́бных; ра́дуйся, по́стников благода́тное удобре́ние.

Ра́дуйся, пещерножи́телей сла́во и похвало́; ра́дуйся, всея́ страны́ правосла́вно-росси́йския кре́пкое огражде́ние.

Ра́дуйся, святы́я Ла́вры твоея́ непосты́дное упова́ние; ра́дуйся, подвиза́ющимся в не́й спасе́ния ве́чнаго хода́таю.

Ра́дуйся, телеса́ на́ша безме́здно врачу́яй прикоснове́нием к честно́му твоему́ гро́бу; ра́дуйся, ду́ши на́ша возводя́й к насле́дию блаже́нства ра́йскаго святы́ми твои́ми моли́твами.

Ра́дуйся, Анто́ние, мона́шескаго в Росси́и жития́ первонача́льниче.

Конда́к 13.

О вели́кий первонача́льниче и́ноков росси́йских, и пресла́вный чудотво́рче, преподо́бне о́тче на́ш Анто́ние! Мы́ ча́да твоя́ духо́вная, и о́вцы па́жити твоея́, сия́ ма́лыя пе́сни хвале́бныя усе́рдно тебе́ принося́ще, мо́лим тя́: яви́ на́м оте́ческую любо́вь твою́, и умоли́ Го́спода Бо́га, изба́вити на́с гее́нны, и удосто́ити Ца́рствия Небе́снаго, да пое́м Ему́ со святы́ми: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгел во пло́ти бы́л еси́, преподо́бне о́тче Анто́ние, а́ще и на земли́ роди́лся еси́ во гра́де Лю́бечи, но вы́шний гра́д, Иерусали́м прекра́сный, граждани́на тя́ стяжа́: обита́еши в не́м со А́нгелы и святы́ми, и чуде́с луча́ми озаря́еши вы́ну Оте́чествие твое́ земно́е, от на́с же чту́щих тя́ услы́ши похва́льное пе́ние сицево́е:

Ра́дуйся, роди́телей благочести́вых сы́не; ра́дуйся, гра́да Лю́беча свято́е прозябе́ние.

Ра́дуйся, рая́ Иису́сова ве́твь многопло́дная; ра́дуйся де́лы благи́ми Христу́ благоугоди́вый.

Ра́дуйся, от младе́нчества Бо́гом избра́нный; ра́дуйся, от ю́ности Бо́га все́ю душе́ю возлюби́вый.

Ра́дуйся, вся́ за́поведи Госпо́дни ве́рно сохрани́вый; ра́дуйся, в оправда́ниих Влады́чних непоро́чно ходи́вый.

Ра́дуйся, чи́стое вмести́лище доброде́телей; ра́дуйся, кра́сное селе́ние Ду́ха Свята́го.

Ра́дуйся, целому́дрия рачи́телю; ра́дуйся, смире́ния люби́телю.

Ра́дуйся, Анто́ние, мона́шескаго в Росси́и жития́ первонача́льниче.

Конда́к 1.

Избра́нный уго́дниче Христо́в, и́ноков росси́йских первонача́льниче и вели́кий чудотво́рче, преподо́бне о́тче на́ш Анто́ние, с любо́вию прино́сим ти́ сия́ хвале́бныя пе́сни, небе́сному предста́телю на́шему: ты́ же я́ко име́яй дерзнове́ние ко Го́споду, моли́ся о спасе́нии на́с гре́шных, да зове́м ти́ благода́рно:

Ра́дуйся, Анто́ние, мона́шескаго в Росси́и жития́ первонача́льниче.

Моли́тва.

О до́брый на́ш па́стырю наста́вниче, приснопомина́емый и́ноков росси́йских первонача́льниче, преподо́бне и богоно́сне о́тче на́ш Анто́ние! Ты́ горе́ на небеси́ пребыва́еши, мы́ ни́зу на земли́, удале́нии су́ще от тебе́ не толи́ко ме́стом, коли́ко грехо́вною нечистото́ю на́шею; оба́че па́мятуя оте́ческую любо́вь твою́ к лю́дем, ти́ сро́дным, припа́даем и мо́лимтися с умиле́нием и ве́рою: помози́ на́м, гре́шным, покая́нием очи́ститися и досто́йным бы́ти поми́лования и проще́ния от Го́спода и Созда́теля на́шего. Умоли́ Его́ бла́гость дарова́ти на́м вели́кия и бога́тыя ми́лости: земли́ плодоно́сие, возду́ха благорастворе́ние, ми́р глубо́к, братолю́бие и́скреннее, благоче́стие нелицеме́рное, жите́йских потре́б дово́льство, и да не во зло́ обрати́м блага́я, да́руемая на́м от щедротода́тельныя Его́ десни́цы, но во сла́ву и́мени Его́ свята́го и во спасе́ние на́ше. Соблюди́, чудотво́рче святы́й, благомо́щными твои́ми моли́твами росси́йския гра́ды, оби́тель твою́ и всю́ страну́ православноросси́йскую невреди́мы от вся́каго зла́, и вся́ лю́ди, жи́тельствующия в оби́тели твое́й и на поклоне́ние в ню́ приходя́щия, осени́ небе́сным твои́м благослове́нием, и в ско́рбех, беда́х и боле́знех утеше́ние, избавле́ние и исцеле́ние и́м пода́ждь, да благода́рно сла́вим, хва́лим и велича́ем просла́вльшаго тя́ Го́спода, чрез тебе́ ди́вно благоде́тельствующаго на́м, Безнача́льнаго Отца́, Единоро́днаго Его́ Сы́на и Единосу́щнаго Его́ Ду́ха, Тро́ицу Живонача́льную и Неразде́льную, и твое́ свято́е заступле́ние во ве́ки веко́в. Ами́нь.