Конда́к 1.

Изря́дному пустынножи́телю росла́вльских лесо́в, преподо́бному ста́рцу О́птинскому, и́же на мы́сленную го́ру Преображе́ния возше́д, и све́том Боже́ственным озари́вся, похва́льная пе́ние принесе́м. Ты́ же о́тче Богоно́сне от мра́ка грехо́внаго свободи́ на́с моли́твами Твои́ми, да в ра́дости зове́м ти́:

Ра́дуйся, Анто́ние, мона́шествующих утвержде́ние.

И́кос 1.

А́нгелом предста́телем яви́ся ти́ бра́т тво́й Моисе́й, в пусты́ню зовы́й тя́ Го́сподеви порабо́тати. Ты́ же ра́достно прии́м целова́ние сие́ в пусты́ню я́ко во дворе́ц ца́рский всели́лся еси́. Сего́ ра́ди восхваля́ем тя́ си́це:

Ра́дуйся, и́мже ра́дость подви́жничества сия́ет; ра́дуйся, и́мже уны́ния мра́к изчеза́ет.

Ра́дуйся, ве́тхаго нра́ва обновле́ние; ра́дуйся, сле́з серде́чных явле́ние.

Ра́дуйся, высото́ пустыннолюби́ваго отрече́ния; ра́дуйся, глубино́ безмо́лвнаго уедине́ния.

Ра́дуйся, я́ко еси́ похвало́ пусты́ни; ра́дуйся, я́ко мо́ре поче́рпл еси́ благосты́ни.

Ра́дуйся, звездо́ непреста́ннаго бде́ния; ра́дуйся, луно́ денноно́щнаго псалмопе́ния.

Ра́дуйся, и́мже к по́двигу уготовля́емся; ра́дуйся, и́мже к безмо́лвию приближа́емся.

Ра́дуйся, Анто́ние, мона́шествующих утвержде́ние.

Конда́к 2.

Безмо́лвия тишину́ богове́дения по́лну, ка́ко восприиму́ и вселю́ся в ню́, неудобоприя́тельно уму́ моему́ явля́ется, ре́кл еси́ о́тче Анто́ние, оба́че да́р па́че ме́ры прииму́ и Бо́гу воззову́: Аллилу́иа.

И́кос 2.

Вразумле́ния е́же вы́ше ра́зума иски́й, ка́ко на земли́ безпло́тных жи́тельство устроя́ется. Те́мже в послуша́ние бра́ту твоему́ вда́л еси́ себе́ от си́лы возраста́я в си́лу. О́н же со удивле́нием зовы́й тебе́ си́це:

Ра́дуйся, сове́та бра́тняго таи́нниче; ра́дуйся, незри́мое преспе́яние ве́ры.

Ра́дуйся, чуде́с послуша́ния нача́ло; ра́дуйся, веле́ний ста́рческих исполне́ние.

Ра́дуйся, ле́ствице доброде́телей е́юже сни́де Ду́х; ра́дуйся, мо́сте моли́твенный возводя́й к Не́бу.

Ра́дуйся, А́нгелом многоревни́вый подража́телю; ра́дуйся, бесо́м многобра́нное сопротивле́ние

Ра́дуйся, све́т незри́мый уве́девый; ра́дуйся, тьму́ неве́дения прогна́вый

Ра́дуйся, прему́дрых ста́рцев стяжа́вый ра́зум; ра́дуйся, подви́жническаго пути́ позна́вый смы́слы.

Ра́дуйся, Анто́ние, мона́шествующих утвержде́ние.

Конда́к 3.

Госпо́день Ду́х тогда́ осени́ тя́, о́тче богому́дре Анто́ние, и безпло́дная пусты́ня я́ко село́ сла́дкое показа́ся тебе́ хотя́щему жа́ти спасе́ние, внегда́ в безмо́лвии пе́ти си́це: Аллилу́иа.

И́кос 3

Добропло́дну соде́лал еси́ ни́ву серде́чную о́тче Анто́ние, ра́лом послуша́ния возде́лал еси́ ю́, и се́мена все́ял еси́ поста́, бде́ния и моли́твы, отону́дуже пожина́я плоды́ твоя́, прино́сим тебе́ рукоя́ти пе́сенныя:

Ра́дуйся, о́трасле по́стническия розго́; ра́дуйся, плода́ послуша́ния стяжа́ние.

Ра́дуйся, де́лателю подви́жнических трудо́в; ра́дуйся, сади́телю се́мен доброде́тельных.

Ра́дуйся, ни́во растя́щая мона́шеское всепло́дие; ра́дуйся, трапе́зо нося́щая оби́лие утеше́ния.

Ра́дуйся, я́ко са́д духо́вный процвета́еши; ра́дуйся, я́ко приста́нище ча́дам гото́виши.

Ра́дуйся, арома́тное кади́ло моли́твы; ра́дуйся, о все́м ми́ре сле́зное моле́ние

Ра́дуйся, я́ко Бо́жие подви́гл еси́ благоутро́бие; ра́дуйся, я́ко дерзнове́ние стяжа́л еси́ непосты́дное.

Ра́дуйся, Анто́ние, мона́шествующих утвержде́ние.

Конда́к 4.

Еди́н со Еди́ным пребы́л еси́ о́тче Анто́ние, во оти́шии безмо́лвия живы́й, бу́рю помышле́ний су́етных прогна́л еси́ моли́твою непреста́нною, и чистоту́ душе́вную стяжа́л еси́ у́мно взыва́я Христу́: Аллилу́иа.

И́кос 4.

Жела́ние благочести́ваго иера́рха Филаре́та услы́шал еси́ о́тче Анто́ние, и́же устро́ити ски́т по о́бразу дре́вних подви́жников восхоте́, необину́яся отпра́вился еси́ с бра́том твои́м в да́льния преде́лы калу́жския. О́н же прозре́в в тебе́ богому́драго скитонача́льника возра́довася зело́ глаго́ля си́це:

Ра́дуйся, го́рлице пустыннолюби́вая; ра́дуйся, па́стырю слове́сных ове́ц.

Ра́дуйся, мы́сленных та́тей прогони́телю; ра́дуйся, ви́димых яви́телю чуде́с.

Ра́дуйся, я́ко небе́сное возлюби́л еси́ па́че земна́го; ра́дуйся, я́ко земна́я покори́л еси́ Небе́сному.

Ра́дуйся, апо́стольския ве́ры храни́телю; ра́дуйся, по́стничества дерзнове́ный страстоте́рпче.

Ра́дуйся, тве́рдый благоче́стия сто́лпе; ра́дуйся, све́тлый моли́твы свети́льниче.

Ра́дуйся, и́мже ски́т созида́ется; ра́дуйся, и́мже безмо́лвие восхваля́ется.

Ра́дуйся, Анто́ние, мона́шествующих утвержде́ние.

Конда́к 5.

Звезду́ боготе́чну узре́в в скиту́ Про́мыслом явле́нную, ико́ну Богоро́дичную Зна́мение, ю́же я́ко свети́льник поста́вил еси́ с бра́том твои́м в Це́ркви Предте́чевой, Тоя́ бо ра́ди хода́тайства позна́сте Промысли́теля ва́шего и моли́твою достиго́сте Недостижи́маго в ра́дости пою́ще Ему́: Аллилу́иа.

И́кос 5.

И́ноческия по́двиги ва́ша ви́дя благочести́вый иера́рх, поста́ви вы́ во главу́ у́гла О́птины пу́стыни, бра́та твоего́ во игу́мены монастыря́, тебе́ же во скитонача́льника любе́знаго. Сего́ ра́ди похваля́ет тя́ си́це:

Ра́дуйся, скита́ восходя́щая звездо́; ра́дуйся, оби́тели заре́ та́инственная.

Ра́дуйся, пре́лести пла́мень угаша́яй; ра́дуйся, ве́дение и́стинное подава́яй.

Ра́дуйся, мучи́телей де́монов от оби́тели отгоня́яй; ра́дуйся, А́нгелов человеколюби́вых к скиту́ привлека́яй.

Ра́дуйся, стра́стнаго избавля́й влече́ния; ра́дуйся, грехо́внаго изыма́яй плене́ния.

Ра́дуйся, огня́ доброде́тели возжже́ние; ра́дуйся, пла́мене страсте́й остуже́ние.

Ра́дуйся, и́ночествующим наста́вниче целому́дрия; ра́дуйся, все́х подвиза́ющихся весе́лие.

Ра́дуйся, Анто́ние, мона́шествующих утвержде́ние.

Конда́к 6.

Кре́ст игу́менскаго служе́ния отяжеле́ на тебе́ о́тче Анто́ние, егда́ от скита́ переведе́н бы́л еси́ в малояросла́вецкий монасты́рь по назначе́нию. Оба́че де́ло Про́мысла Бо́жия просла́вил еси́ и благодаре́ние Ему́ возда́л еси́ взыва́я: Аллилу́иа.

И́кос 6.

Луче́м благоче́стия просвети́л еси́ оби́тель Нико́льскую преподо́бне Анто́ние, о́браз бра́тии бы́л еси́ де́лом, сло́вом и по́двигом, сего́ ра́ди благоче́стием твои́м бра́тия озаря́ема, вопия́ху тебе́ сицева́я:

Ра́дуйся, исправле́ние нра́вов; ра́дуйся, низпаде́ние поро́ков.

Ра́дуйся, мона́шескую ре́вность возста́вивый; ра́дуйся, бесо́вскую ле́сть обличи́вый.

Ра́дуйся, в мо́ри безмо́лвия потопи́вый суету́ мирску́ю; ра́дуйся, на Ка́мене краеуго́льнем оби́тель назда́вый святу́ю.

Ра́дуйся, о́гненный сто́лпе моли́твы су́щим в де́лании; ра́дуйся, покро́ве бра́тии от де́монских нападе́ний.

Ра́дуйся, безгне́вное за гре́х обличе́ние; ра́дуйся, безпеча́льное оби́д претерпе́ние.

Ра́дуйся, к земле́ обетова́ния ве́дый бра́тию; ра́дуйся, духо́вных утеше́ний и́м пода́телю.

Ра́дуйся, Анто́ние, мона́шествующих утвержде́ние.

Конда́к 7.

Мно́гия ско́рби и боле́зни подъя́л еси́ о́тче Анто́ние я́коже отяготи́тися ду́ху твоему́, оба́че виде́нием уте́ши ду́шу твою́ Госпо́дь: предста́ ти́ со́нм святы́х от ни́х же святи́тель Митрофа́н ре́к тебе́: «я́ко в скиту́ жи́л еси́ а́ки в раю́ ны́не же труди́ся моли́ся и не лени́ся» Си́м виде́нием уте́шен бы́в возопи́л еси́ благода́рне Христу́: Аллилу́иа.

И́кос 7

Но́вую показа́ ми́лость на тебе́ Госпо́дь о́тче Анто́ние, по труде́х мно́зех во оби́тели малояросла́встей в о́птинскую оби́тель тя́ возврати́, бра́тия же ви́дяще тя́ украше́ннаго мно́гими побе́дными венца́ми, потща́шася и слове́сными тя́ украси́ти почестьми́:

Ра́дуйся, цве́те благоче́стия; ра́дуйся, ко́реню смиренному́дрия.

Ра́дуйся, мона́шескаго о́браза печа́те; ра́дуйся, А́нгельскаго жития́ нача́тие.

Ра́дуйся, кипари́се святоблагово́нный от него́же удаля́ются де́моны; ра́дуйся, ке́дре благосенноли́ственный и́мже прикры́шася греси́ бра́тии.

Ра́дуйся, в се́рдце нося́й Христо́во и́мя; ра́дуйся, глубину́ явля́яй Бо́жией благосты́ни.

Ра́дуйся, бра́тии с Бо́гом примире́ние; ра́дуйся, мно́гих грехопаде́ний проще́ние.

Ра́дуйся, уны́лых и́ноков воздви́жение; ра́дуйся, мона́шескаго любому́дрия всепобежда́ющее жела́ние.

Ра́дуйся, Анто́ние, мона́шествующих утвержде́ние.

Конда́к 8.

О́птинскаго ста́рчества яви́лся еси́ кре́пкое утвержде́ние, о́тче Анто́ние, и ски́тскаго жи́тельства изря́дное насажде́ние. Вся́ бо по о́бразу дре́вних отце́в в по́двизе твое́м испра́вил еси́ и по во́ле Бо́жией житие́ твое́ напра́вил еси́ вопия́: Аллилу́иа.

И́кос 8.

По́двиг ти́хаго уедине́ния избра́л еси́ о́тче Анто́ние, в скиту́ живы́й я́коже иногда́ в пусты́не, нището́ю обогати́лся еси́ и смире́нием высоты́ духо́вныя дости́г еси́, А́нгельским подража́я си́лам. Сего́ ра́ди похва́льная прино́сим тебе́ пе́ние:

Ра́дуйся, я́ко в при́стань безмо́лвия вше́л еси́; ра́дуйся, я́ко Бо́жия та́йны уве́дел еси́.

Ра́дуйся, непревра́тное ума́ устрое́ние; ра́дуйся, любоче́стное се́рдца стремле́ние.

Ра́дуйся, колесни́це моли́твы духодви́жныя; ра́дуйся, поко́ище Ду́ха благооти́шное.

Ра́дуйся, преесте́ственных доброде́телей вселе́ние; ра́дуйся, пло́ти ду́ху повинове́ние.

Ра́дуйся, и́мже усе́рдствуем в по́двизе; ра́дуйся, и́мже в безмо́лвие вво́димся.

Ра́дуйся, Анто́ние, мона́шествующих утвержде́ние.

Конда́к 9.

Раче́нию твоему́ о́тче Анто́ние удиви́шася бра́тия, ка́ко пло́тию стражда́ ду́хом не измени́лся еси́, а́ще и в Це́рковь по боле́зни не возмо́гл еси́ ходи́ти, в ке́ллии всено́щная бде́ния соверша́л еси́, воспева́я кре́пости пода́телю: Аллилу́иа.

И́кос 9.

Све́т ви́девше Боже́ственный от твоея́ ке́ллии иду́щ вве́рх, бра́тия скита́ позна́ша тя́ уго́дника Бо́жия бы́ти и моли́твенника те́плейшаго. Сего́ ра́ди от Светода́вца Христа́ прии́мшаго такову́ю благода́ть восхваля́ем тя́ си́це:

Ра́дуйся, све́та Боже́ственнаго прия́телище; ра́дуйся, моли́твы о́блако восходя́щее.

Ра́дуйся, небому́дренное житие́ явля́яй; ра́дуйся, хитросплете́нныя по́мыслы облича́яй.

Ра́дуйся, я́ко обуя́ша де́монская кова́рства; ра́дуйся, я́ко увядо́ша по́мыслов прираже́ния.

Ра́дуйся, неудобореши́мыя вопро́сы разреша́яй; ра́дуйся, неве́стнически ду́ши уготовля́яй.

Ра́дуйся, из глубины́ пре́лести извлача́яй; ра́дуйся, на высоту́ смире́ния возводя́й.

Ра́дуйся, ко́рмчий моли́твы у́мныя; ра́дуйся, приста́нище Боже́ственных созерца́ний.

Ра́дуйся, Анто́ние, мона́шествующих утвержде́ние.

Конда́к 10.

Терпе́нием мно́гих боле́зней ду́шу твою́ златокова́нну соде́лал еси́, среброукра́сив ю́ многоце́нными доброде́тельми. Те́мже яви́лся еси́ я́ко одушевле́нный Бо́жий орга́н и труба́ богогла́сная пою́щая Бо́гу:

Аллилу́иа.

И́кос 10.

Умно́жившимся ле́том твои́м, умно́жишася и по́двиги твоя́ от ни́х же я́ко от се́мене благопло́дна прозябо́ша духо́вная ча́да твоя́, и́хже препита́л еси́ млеко́м слове́с твои́х и по́двига твоего́ тве́рдою пи́щею. Сего́ ра́ди насы́тившиися вопия́ху ти́ си́це:

Ра́дуйся, моли́твы сто́лпе; ра́дуйся, врата́ по́двига.

Ра́дуйся, нача́льниче мона́шескаго ополче́ния; ра́дуйся, пода́телю боже́ственнаго вдохнове́ния.

Ра́дуйся, ты́ бо обо́дрил еси́ уны́лыя ду́ши; ра́дуйся, ты́ бо обра́довал еси́ печа́льная сердца́.

Ра́дуйся, орга́не слове́снаго наставле́ния; ра́дуйся, многозву́чное доброде́телей звуча́ние.

Ра́дуйся, черто́же серде́чнаго умиле́ния; ра́дуйся, о ча́дех твои́х приле́жное моле́ние.

Ра́дуйся, до́брое новонача́льным воспита́ние; ра́дуйся, невестоле́пное души́ украше́ние.

Ра́дуйся, Анто́ние, мона́шествующих утвержде́ние.

Конда́к 11.

Фаво́рский све́т прия́л еси́ в ду́шу твою́ о́тче Анто́ние, егда́ на го́ру безмо́лвнаго жития́ возше́л еси́, и облиста́лся еси́ луча́ми пресве́тлаго осия́ния. Те́мже во све́те дея́ний и поуче́ний твои́х светоно́сных, наста́ви ны́ ко Све́ту Непристу́пному восходи́ти зову́ще: Аллилу́иа.

И́кос 11.

Хотя́ от су́етнаго ве́ка сего́ преста́витися ко Све́ту преве́чному, многоболе́зненный пу́ть подви́жничества соверши́л еси́ о́тче Анто́ние. Те́мже во вторы́й де́нь пра́здника преображе́ния Госпо́дня ду́шу твою́ во све́тлии ру́це Христо́вы преда́л еси́, и́же све́том я́ко ри́зою оде́яв тебе́. Мы́ же чудя́щеся велеле́пой красоте́ твое́й си́це тебе́ вопие́м:

Ра́дуйся, луче́ моли́твы непреста́нныя; ра́дуйся, свети́ло со́вести непоро́чныя.

Ра́дуйся, ри́зою све́та ду́шу одева́яй; ра́дуйся, мо́лнией созерца́ний враги́ попаля́яй.

Ра́дуйся, я́ко присносве́тлаго дости́гл еси́ приста́нища; ра́дуйся, я́ко усугу́бил твое́ за ны́ предста́тельство.

Ра́дуйся, по́двига живоно́сный о́бразе; ра́дуйся, безмо́лвия непоколеби́мый сто́лпе.

Ра́дуйся, бра́тских не́мощей подъя́тие; ра́дуйся, ду́ха уны́ния прогна́ние.

Ра́дуйся, светоза́рное Преображе́ние прие́мляй; ра́дуйся, просвеще́ние на́м свы́ше посыла́яй.

Ра́дуйся, Анто́ние, мона́шествующих утвержде́ние.

Конда́к 12.

Целому́дрия са́д процвете́ в души́ твое́й о́тче Анто́ние благоуха́яй присноцвету́щими доброде́тельми, от ни́х же вкуси́вше ча́да твоя́, сла́дости насы́тишася Боже́ственнаго ве́дения. Те́мже целому́дренный по́мысл иму́ще де́вственно возопи́ша ду́ш Жениху́: Аллилу́иа.

И́кос 12.

Чистоту́ серде́чную приобре́л еси́ мно́гими по́двиги и па́стырским раде́нием любы́ Христо́ву стяжа́л еси́ о́тче Анто́ние. Сего́ ра́ди в черто́зе ве́чныя сла́вы лицезре́ния Бо́жия наслажда́яся на́с пою́щих тебе́ сия́ помина́й:

Ра́дуйся, вселе́ние Бо́га в чистоте́ се́рдце; ра́дуйся, упокое́ние Ду́ха в теле́сной хра́мине.

Ра́дуйся, ски́ние моли́твы непреста́нныя; ра́дуйся, сокро́вище ве́ры неоскудева́емое.

Ра́дуйся, ра́зуме прекра́сный ста́рцев богому́дры; ра́дуйся, изря́дная похвало́ иере́ев благогове́йных.

Ра́дуйся, оби́тели непоколеби́мый сто́лпе; ра́дуйся, скита́ неруши́мая стено́.

Ра́дуйся, и́мже воздви́жутся па́дшия; ра́дуйся, и́мже низлага́ются де́моны.

Ра́дуйся, теле́сных боле́зней врачева́ние; ра́дуйся, душе́вных неду́гов искорене́ние.

Ра́дуйся, Анто́ние, мона́шествующих утвержде́ние.

Конда́к 13.

О, боголюби́вый безмо́лвниче о́тче на́ш Анто́ние, на́с в суете́ мирсте́й мяту́щихся убезмо́лви ти́хим предста́тельством Твои́м у Престо́ла Святы́я Тро́ицы, научи́ на́с ми́рствовать в себе́, да ти́хое и безмо́лвное житие́ поживе́м во вся́ком благоче́стии и чистоте́, воспева́я Христу́ ми́ра Пода́телю: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгелом предста́телем яви́ся ти́ бра́т тво́й Моисе́й, в пусты́ню зовы́й тя́ Го́сподеви порабо́тати. Ты́ же ра́достно прии́м целова́ние сие́ в пусты́ню я́ко во дворе́ц ца́рский всели́лся еси́. Сего́ ра́ди восхваля́ем тя́ си́це:

Ра́дуйся, и́мже ра́дость подви́жничества сия́ет; ра́дуйся, и́мже уны́ния мра́к изчеза́ет.

Ра́дуйся, ве́тхаго нра́ва обновле́ние; ра́дуйся, сле́з серде́чных явле́ние.

Ра́дуйся, высото́ пустыннолюби́ваго отрече́ния; ра́дуйся, глубино́ безмо́лвнаго уедине́ния.

Ра́дуйся, я́ко еси́ похвало́ пусты́ни; ра́дуйся, я́ко мо́ре поче́рпл еси́ благосты́ни.

Ра́дуйся, звездо́ непреста́ннаго бде́ния; ра́дуйся, луно́ денноно́щнаго псалмопе́ния.

Ра́дуйся, и́мже к по́двигу уготовля́емся; ра́дуйся, и́мже к безмо́лвию приближа́емся.

Ра́дуйся, Анто́ние, мона́шествующих утвержде́ние.

Конда́к 1.

Изря́дному пустынножи́телю росла́вльских лесо́в, преподо́бному ста́рцу О́птинскому, и́же на мы́сленную го́ру Преображе́ния возше́д, и све́том Боже́ственным озари́вся, похва́льная пе́ние принесе́м. Ты́ же о́тче Богоно́сне от мра́ка грехо́внаго свободи́ на́с моли́твами Твои́ми, да в ра́дости зове́м ти́:

Ра́дуйся, Анто́ние, мона́шествующих утвержде́ние.

Моли́тва.

Преподо́бне и Богоно́сне о́тче Анто́ние, услы́ши ны́ гре́шныя, [с ве́рою ко святы́м моще́м твои́м припа́дающыя], и с умиле́нием на Святы́й тво́й о́браз взира́ющыя. Ты́ бо в житии́ твое́м я́ко свети́льник бы́л еси́, све́т любве́ Христо́вы ще́дро лю́дем да́руя. Ты́, я́ко оте́ц чадолюби́вый, и ны́не призира́еши на ны́ с небе́сных высо́т: те́ло бо твое́ с на́ми на земли́ пребыва́ет, но душа́ твоя́ престо́лу Тро́ическому предстои́т. Те́мже я́ко име́яй моли́твенное дерзнове́ние ко Святе́й Тро́ице, мо́лим тя́, о́тче: испроси́ на́м у Го́спода благорастворе́ние возду́хов, земли́ плодоро́дие, от гла́да, пото́па и мо́ра изба́ви, Це́рковь правосла́вную в чистоте́ и свя́тости соблюди́, наро́д ея́ в благоче́стии утверди́, архиере́и и иере́и прему́дрости испо́лни, мона́шеския оби́тели сохрани́, мона́хов стра́ху Бо́жию научи́, и к моли́твенному де́ланию наста́ви: да вси́ чи́стым се́рдцем просла́вим Бо́га, в Тро́ице еди́наго, Отца́, и Сы́на, и Свята́го Ду́ха. Ами́нь.