Конда́к 1.

Избра́нный чудотво́рче и изря́дный уго́дниче Христо́в, преподо́бне о́тче на́ш Дими́трие, дру́же и собесе́дниче друга́ Бо́жия преподо́бнаго Се́ргия и Оте́чествия твоего́ при́сный засту́пниче; приими́ от на́с с любо́вию приноси́мое тебе́ хвале́бное пе́ние и, я́ко име́яй дерзнове́ние ко Го́споду, моли́твами твои́ми от вся́ких на́с бе́д свободи́, да зове́м ти́:

Ра́дуйся, Дими́трие, вели́кий чудотво́рче.

И́кос 1.

А́нгел о́бразом, а́ще и челове́к по естеству́, бы́л еси́, преподо́бне о́тче Дими́трие, а́нгельскую бо чистоту́ стяжа́л еси́ на земли́, и а́нгельскою красото́ю лице́ твое́ цветя́ше, я́ко все́м, ви́девшим тя́, чуди́тися благоле́пию твоему́. Те́мже, я́ко избра́нника Бо́жия, благоле́пнаго душе́ю и те́лом, ублажа́ем тя́ пе́сньми си́ми;

Ра́дуйся, благочести́вых роди́телей пречестно́е порожде́ние; ра́дуйся, гра́да Переяславля-Зале́сскаго свято́е прозябе́ние.

Ра́дуйся, Росси́йския страны́ духо́вное украше́ние; ра́дуйся, ева́нгельскаго по Бо́зе жития́ ревни́телю.

Ра́дуйся, от ю́ных ле́т жи́зни твоея́ еди́наго Христа́ вседу́шно возлюби́вый; ра́дуйся, сладча́йшаго Иису́са па́че все́х красо́т земны́х возжела́вый.

Ра́дуйся, бога́тство тле́нное и ку́плю вре́менную презре́вый; ра́дуйся, ку́плю духо́вную му́дро соверши́вый.

Ра́дуйся, драги́й би́сер Христа́ усе́рдно взыска́вый; ра́дуйся Его́ за́поведи святы́я све́т стезя́м твои́м име́вый.

Ра́дуйся, серафи́мскою любо́вию ко Го́споду се́рдце твое́ воспламени́вый; ра́дуйся, да́ры Свята́го Ду́ха в ду́шу твою́ досто́йно восприя́вый.

Ра́дуйся, Дими́трие, вели́кий чудотво́рче.

Конда́к 2.

Ви́девше роди́телие твои́, преподо́бне о́тче, я́ко не прилежа́ло се́рдце твое́ к бога́тству земно́му, но я́ко от млады́х ногте́й предпочита́л еси́ иска́ти еди́но на потре́бу, е́же служи́ти и благоугожда́ти Христу́ чи́стым и непоро́чным житие́м, премно́го удивля́хуся таково́му твоему́ благонра́вию и ра́достно воспева́ху Бо́гу, в ю́ности си́це тя́ укрепи́вшему, благода́рственную пе́снь: Аллилу́иа.

И́кос 2.

Ра́зум богопросвеще́нный стяжа́в, уразуме́л еси́ до́бре, о́тче Дими́трие, указу́емый Спаси́телем ми́ра пу́ть к вы́сшему соверше́нству духо́вному. Те́мже по сме́рти роди́телей твои́х а́бие ку́плю вре́менную оста́вил еси́, и все́ бога́тство твое́ ни́щим расточи́л еси́, себе́ облегча́я к непреткнове́нному тече́нию во сле́д Христа́. Сего́ ра́ди ублажа́ем тя́ благохвале́ньми таковы́ми:

Ра́дуйся, подви́жниче Бо́жий, ми́ра красота́ми не прельсти́выйся; ра́дуйся, слуго́ Госпо́день, во сле́д Влады́ки твоего́ Христа́ ра́достно потеки́й.

Ра́дуйся, нищету́ во́льную Христа́ ра́ди возлюби́вый; ра́дуйся, бога́тство мно́гое ме́ньшим бра́тиям Христо́вым разда́вый.

Ра́дуйся, ни́щия и убо́гия от име́ния твоего́ удовли́вый; ра́дуйся, наги́я оде́вый и гла́дныя напита́вый.

Ра́дуйся, вдови́цам и сирота́м оте́ц и благоде́тель бы́вый; ра́дуйся, насле́дие роди́телей твои́х богоуго́дно расточи́вый.

Ра́дуйся, кре́ст Христо́в носи́ти усе́рдно возжела́вый; ра́дуйся, смире́ние Христо́во в ду́шу твою́ насади́вый.

Ра́дуйся, целому́дрие души́ и те́ла невре́дно сохрани́вый; ра́дуйся, посто́м и воздержа́нием ю́ношеския стра́сти обузда́вый.

Ра́дуйся, Дими́трие, вели́кий чудотво́рче.

Конда́к 3.

Си́ла духо́вная свы́ше от Го́спода тебе́ дарова́ся, преподо́бне о́тче, егда́ в постриже́нии и́ночестем а́нгельский о́браз на ся́ восприя́л еси́, и вся́кое плотско́е мудрова́ние соверше́нно отложи́л еси́ я́ко бы́ти тебе́ вои́стину после́дователем Христо́вым; на Христа́ бо еди́наго при́сно взира́л еси́ у́мныма очи́ма души́ твоея́, и Его́ за́поведи святы́я вы́ну име́л еси́ пред собо́ю, я́ко свети́льник путеводя́щий, зовы́й Ему́ от любве́ те́плыя: Аллилу́иа.

И́кос 3.

Име́я попече́ние о спасе́нии души́ твоея́, безмо́лвия возжела́л еси́, преподо́бне о́тче, и на ме́сте бла́тнем и пусты́ннем бли́з гра́да Переяславля-Зале́сскаго посели́лся еси́, еди́н еди́ному Христу́ рабо́тая в посте́ и моли́твах; оба́че не утаи́ся житие́ твое́ преподо́бное от согра́ждан твои́х, и́же прихожда́ху к тебе́, о́ви моли́тв и благослове́ния от тебе́ прося́ще, о́ви наста́витися во спасе́ние от тебе́ жела́я, ини́и же жи́тельствовати с тобо́ю хотя́ху, под твои́м духо́вным руково́дством; ты́ же гряду́щих к тебе́ не отгоня́л еси́, но спасе́нию ду́ш челове́ческих ре́вностно служи́л еси́, е́же воспомина́я, хвале́бно вопие́м ти́:

Ра́дуйся, учи́телю благоче́стия, приме́ром жития́ твоего́ все́х поуча́вый; ра́дуйся, наста́вниче богому́дрия, словесы́ твои́ми богодухнове́нными ученики́ твоя́ во спасе́ние назида́вый.

Ра́дуйся, и́ночества богоуго́днаго пра́вило изве́стное; ра́дуйся, пути́ те́снаго, во Ца́рствие небе́сное веду́щаго, указа́телю неле́стный.

Ра́дуйся, ева́нгельских за́поведей ве́рный исполни́телю; ра́дуйся, апо́стольских преда́ний ре́вностный храни́телю.

Ра́дуйся, непоколеби́мый сто́лпе Правосла́вия; ра́дуйся, небоя́зненный обличи́телю вся́каго иносла́вия.

Ра́дуйся, сотвори́вый и научи́вый и ве́лий нарече́нный во Ца́рствии Небе́снем; ра́дуйся, со усе́рдием послужи́вый спасе́нию мно́гих ду́ш челове́ческих.

Ра́дуйся, о́тче, отце́в красото́; ра́дуйся, богому́дрия испо́лненная свяще́нная главо́.

Ра́дуйся, Дими́трие, вели́кий чудотво́рче.

Конда́к 4.

Бу́рное треволне́ние жите́йскаго мо́ря безбе́дно преплы́л еси́, всеблаже́нне о́тче, и в ти́хое приста́нище пусты́ни дости́гл еси́, в не́й же оби́тель и́ноком возгради́л еси́ во и́мя святи́теля и чудотво́рца Никола́я, и са́м освяще́ния иере́йскаго сподо́бился еси́, игу́мен богому́дрый оби́тели твоея́ бы́в, кро́тко пасы́й Бо́гом вруче́нныя тебе́ слове́сныя о́вцы, и немо́лчно воспева́я ку́пно с ни́ми хвале́бную пе́снь Пресвяте́й Тро́ице: Аллилу́иа.

И́кос 4.

Слы́шав о ди́вней красоте́ лица́ твоего́, о́тче Дими́трие, еди́на от имени́тых боля́рынь гра́да Переяславля-Зале́сскаго, возжела́ наслади́тися лицезре́ния твоего́ и сего́ ра́ди прии́де к ке́ллии твое́й, в ню́же око́нцем прини́кнув, узре́ тя́ на моли́тве стоя́ща и све́том небе́сным облистава́ема, сама́ же а́бие все́м те́лом разслабе́ и па́дши а́ки ме́ртва на земли́ лежа́ше; ты́ же, послу́шествуя проше́нию бра́тии твое́й, моли́твою твое́ю исцели́л еси́ ю́ и поучи́л, да про́чее уцелому́дрится и не назира́ет чужды́я красоты́, те́м же мы́, чту́ще такову́ю чистоту́ души́ твоея́, вопие́м ти́ си́це:

Ра́дуйся, свети́льниче Бо́жия благода́ти, дара́ми Ду́ха Свята́го све́тло блиста́ющий; ра́дуйся, еще́ на земли́ све́том небе́сным озаре́нный.

Ра́дуйся, све́том лица́ твоего́ ве́лию све́тлость души́ твоея́ прояви́вый; ра́дуйся, небе́сным све́том жену́ нескро́мную уцелому́дривый.

Ра́дуйся, разслабле́нием теле́сным нескро́мность ея́ наказа́вый; ра́дуйся, моли́твою твое́ю ми́лостивно ю́ исцели́вый.

Ра́дуйся, словесы́ твои́ми духо́вными до́бре ю́ поучи́вый; ра́дуйся, про́чее храни́ти опа́сно целому́дрие ю́ увеща́вый.

Ра́дуйся, кри́не де́вства и чистоты́, на земли́ процве́тший; ра́дуйся, непоро́чность души́ и те́ла твоего́ соблюды́й ве́рно.

Ра́дуйся, красоту́ лица́ твоего́ заве́сою и́ноческаго ку́коля сокрыва́вый от нечи́стых воззре́ний оче́с челове́ческих; ра́дуйся, опа́сно себе́ храни́вый от искуше́ний, от обраще́ния и собесе́дований с жена́ми быва́емых.

Ра́дуйся, Дими́трие, вели́кий чудотво́рче.

Конда́к 5.

Богосве́тлое свети́ло бы́в, о́тче Дими́трие, вели́каго свети́льника пусты́ни Ра́донежския, богоно́снаго Се́ргия, подви́гл еси́ посети́ти тя́, в безве́стней и бла́тней пусты́ни жи́вшаго; его́ же с любо́вию о Христе́ ра́достно прия́л еси́ и духо́вным собесе́дованием с ни́м уте́шился еси́, и от того́ вре́мени дру́г при́сный и сотаи́нник ему́ соде́лался еси́, ны́не же вку́пе с ни́м предстои́ши небе́сному Престо́лу Триеди́наго Бо́га и сла́дце пое́ши ему́: Аллилу́иа.

И́кос 5.

Ви́девше тя́, преподо́бне о́тче Дими́трие, к богоно́сному отцу́ Се́ргию, любо́вь ве́лию о Христе́ стяжа́вшаго, на собесе́дование к нему́ духо́вное от пусты́ни твоея́ пешеходи́вшаго, с ни́м вку́пе бде́ния всено́щныя соверша́вшаго, при ни́х же лучи́на свещи́ ва́м заменя́ше, моли́тва же ва́ша, я́ко пла́мень о́гненный, до небе́с досяза́ше, диви́мся таково́му содру́жеству твоему́ с вели́ким уго́дником Бо́жиим и си́це тебе́ зове́м:

Ра́дуйся, дру́же святы́х, при́сный Бо́гу; ра́дуйся, спо́стниче и собесе́дниче преподо́бнаго Се́ргия.

Ра́дуйся, всесве́тлаго со́лнца земли́ Росси́йския сопу́тствующая денни́це; ра́дуйся, всеросси́йскаго засту́пника и моли́твенника люби́мый сомоли́твенниче.

Ра́дуйся, от у́ст Се́ргиевых глубину́ прему́дрости духо́вныя почерпну́вый; ра́дуйся, сотаи́нник ему́ ве́рен бы́вый.

Ра́дуйся, содру́жество с ни́м до конца́ живота́ твоего́ сохрани́вый; ра́дуйся, ве́лию любо́вь о Христе́ к нему́ стяжа́вый.

Ра́дуйся, восше́дый на высоту́ соверше́нства духо́внаго; ра́дуйся, прини́кий во глубину́ смире́ния свята́го.

Ра́дуйся, земны́й а́нгеле, на земли́ небе́сно пожи́вый; ра́дуйся, небе́сный челове́че, во пло́ти безпло́тным поревнова́вый.

Ра́дуйся, Дими́трие, вели́кий чудотво́рче.

Конда́к 6.

Пропове́дника тя́ благоумиле́ннаго позна́в, о́тче Дими́трие, благове́рный вели́кий кня́зь Дими́трий зело́ тя́ возлюби́ и отца́ духо́внаго себе́ сотвори́, восприе́мником же от свята́го Креще́ния еди́ному от сынове́й свои́х тя́ избра́, да бу́деши при́сный наста́вник и моли́твенник ему́ со ча́ды; ты́ же преподо́бне, не возгорди́лся еси́ толи́кою любо́вию к тебе́ вели́каго кня́зя Росси́йскаго, но па́че преуспева́л еси́ во святе́м смире́нии, зовы́й просла́вльшему тя́ Влады́це Бо́гу: Аллилу́иа.

И́кос 6.

Возсия́ доброде́телей твои́х све́т ве́лий во всю́ страну́ Росси́йскую, преподо́бне о́тче на́ш Дими́трие, и мно́зи прихожда́ху к тебе́ издале́ча наслади́тися богодухнове́нных твои́х уче́ний; бы́ша бо уста́ твоя́ по́лна сла́дкаго уче́ния духо́внаго, язы́к же тво́й, я́ко тро́сть кни́жника скоропи́сца, написова́ше на сердца́х челове́ческих словеса́ жи́зни ве́чныя. Те́м же я́ко благоумиле́ннаго учи́теля и к покая́нию де́йственнаго возбуди́теля восхваля́ем тя́ по достоя́нию си́це:

Ра́дуйся, врачу́ благоиску́сный неду́гов душе́вных; ра́дуйся, пла́стырем слове́с твои́х богодухнове́нных исцели́вый я́звы грехо́вныя мно́гих.

Ра́дуйся, возбуди́вый к покая́нию спя́щия со́вести; ра́дуйся, умягчи́вый ко исправле́нию окамене́лая сердца́.

Ра́дуйся, князе́й и боля́р до́брый наста́вниче; ра́дуйся, и́ноков и миря́н ко спасе́нию ве́рный руководи́телю.

Ра́дуйся, пра́вило ве́ры и́стинныя; ра́дуйся, о́бразе кро́тости духо́вныя.

Ра́дуйся, пра́вды Бо́жией нелицеприя́тный провозве́стниче; ра́дуйся, си́льных ми́ра, о пра́вде неради́вых, небоя́зненный обличи́телю.

Ра́дуйся, оби́димых и гони́мых многомо́щный защи́тниче; ра́дуйся, вдови́ц и сиро́т благосе́рдый покрови́телю.

Ра́дуйся, Дими́трие, вели́кий чудотво́рче.

Конда́к 7.

Хоте́ние усе́рдное име́л еси́, преподо́бне о́тче, да в безмо́лвии невозбра́нно порабо́таеши Бо́гу, и сего́ ра́ди убега́я молвы́ приходи́вших к тебе́ люде́й, оста́вил еси́ та́йно оби́тель твою́ и гра́д оте́чествия твоего́ и с ученико́м твои́м Пахо́мием удали́лся еси́ в преде́лы во́логодския, в пусты́ню безлю́дную, в не́йже ке́ллию себе́ ма́лу сооруди́в, та́мо пребыва́л еси́ безмо́лвно в по́двизех пусты́нных, немо́лчно воспева́я Христу́ Бо́гу а́нгельскую пе́снь: Аллилу́иа.

И́кос 7.

Но́вую оби́тель и́ноческую, зачина́емую в пусты́ни, ви́девше окре́стныя жи́телие, гру́бостию нра́ва содержи́мии, гне́вахуся на тя́, преподо́бне о́тче, и поноша́ху тя́, я́ко посели́лся еси́ на земли́ и́х; ты́ же, по ева́нгельскому Христо́ву глаго́лу, ме́сто гне́ву и́х уступа́я, отше́л еси́ от тоя́ пусты́ни и ко гра́ду Во́логде прибли́зился еси́, в предгра́дии его́, на Прилу́цех, посели́тися возжеле́в, иде́же мы́ ны́не честву́ем тя́, я́ко отца́ и первонача́льника и́ноков во́логодских, и пе́сненно тебе́ вопие́м:

Ра́дуйся, пустыннолюби́вая го́рлице, от шу́ма мирска́го в благооти́шие пусты́ни отлете́вшая; ра́дуйся, незло́бивая голуби́це, гне́вом неразу́мных челове́ков неуязвле́нная.

Ра́дуйся, му́дрый стра́нниче, иски́й оте́чествия го́рняго; ра́дуйся, Бо́жий избра́нниче, презре́вый вся́ красоты́ ми́ра до́льнаго.

Ра́дуйся, худы́я и многошве́нныя ри́зы носи́вый; ра́дуйся, вери́гами желе́зными те́ло твое́ обложи́вый.

Ра́дуйся, Кре́ст Христо́в, я́ко ору́жие непобеди́мое, спу́тника себе́ стяжа́вый; ра́дуйся, ико́ну Пресвяты́я Богоро́дицы, я́ко сте́ну огражде́ния, всегда́ с собо́ю име́вый.

Ра́дуйся, звездо́ богосия́нная, от ю́га к се́веру прите́кшая; ра́дуйся, преде́лы во́логодския духо́вно просвети́вый.

Ра́дуйся, пусты́ню безпло́дную благода́тно уплодоноси́вый; ра́дуйся, на Прилу́цех ме́сто вселе́нию твоему́ возлюби́вый.

Ра́дуйся, Дими́трие, вели́кий чудотво́рче.

Конда́к 8.

Стра́нник и пришле́ц бы́л еси́ во гра́де Во́логде, преподо́бне о́тче на́ш Дими́трие, ны́не же при́сный предста́тель и засту́пник его́ явля́ешися на́м, с любо́вию воспомина́ющим свято́е твое́ прише́ствие; ви́дев бо гра́д, це́рквами святы́ми благоукраше́нный, возлюби́л еси́ его́ и, по умоле́нию жи́телей его́, на Прилу́цех, в предгра́дии его́, ме́сто уедине́нное обре́т, на не́м всели́лся еси́ и, честны́й Кре́ст рука́ма свои́ма соде́лав, водрузи́л еси́, нача́ло оби́тели Спа́совой полага́я и при́сно воспева́я распе́ншемуся на Кресте́ Царю́ Сла́вы Христу́: Аллилу́иа.

И́кос 8.

Ве́сь в Бо́зе бы́в, преблаже́нне о́тче, о вре́менных ве́щех не забо́тился еси́, и оби́тель твою́ на Прилу́цех не толи́ко бога́тством, коли́ко слеза́ми и по́двигами твои́ми моли́твенными созида́л еси́, всеце́ло упова́я на Спа́са Христа́, я́ко Са́м препита́ет тя́ с бра́тиею твое́ю; и та́ко бы́сть по ве́ре и моли́тве твое́й; ни в чесо́м бо лише́н бы́л еси́, но во все́х потре́бных к житию́ изоби́ловал еси́ Про́мыслом Бо́жиим ди́вным. О се́м тя́ хва́лим и взыва́ем си́це:

Ра́дуйся, ве́рою пра́отцу Авраа́му подража́вый; ра́дуйся с по́сохом стра́нническим во гра́д Во́логду прише́дый.

Ра́дуйся, в не́м второ́е оте́чествие себе́ обреты́й; ра́дуйся, любо́вию о Христе́ кре́пце его́ возлюби́вый.

Ра́дуйся, оби́тель Спа́сову в предгра́дии его́ сооруди́вый; ра́дуйся, по́двиги твои́ми сию́ просла́вивый.

Ра́дуйся, гра́да Во́логды Бо́гом дарова́нный небе́сный засту́пниче; ра́дуйся, святы́я оби́тели твоея́ неусы́пный храни́телю.

Ра́дуйся, я́ко оте́ц чадолюби́вый, моли́твенно назира́яй ча́да твоя́ духо́вныя; ра́дуйся, я́ко воево́да благоиску́сный огражда́яй лю́ди твоя́ от вся́каго зла́.

Ра́дуйся, проро́че ди́вный, бу́дущая я́ко настоя́щая прови́девый; ра́дуйся, цели́телю безме́здный, боля́щих моли́твою твое́ю исцеля́вый.

Ра́дуйся, Дими́трие, вели́кий чудотво́рче.

Конда́к 9.

Вси́ а́нгели небе́снии и святы́х ли́цы срето́ша тя́ ра́достно, преподо́бне о́тче Дими́трие, егда́ свята́я твоя́ душа́, кончи́ною преподо́бною разреши́вшися от соу́за плотска́го, восхожда́ше в оби́тели го́рния; и Са́м Творе́ц а́нгелов и Святы́й Святы́х, Христо́с Госпо́дь, тобо́ю от ю́ности возлю́бленный, увенча́ тя́ венце́м нетле́нныя сла́вы и сопричте́ ли́ку святы́х, вы́ну воспева́ющих Ему́ пе́снь хвалы́ и славосло́вия: Аллилу́иа.

И́кос 9.

Вети́й челове́ческих благослове́сие не довле́ет к досто́йному прославле́нию мно́гих по́двигов твои́х, преподо́бне о́тче на́ш Дими́трие, и́миже житие́ твое́ свято́е я́ко цвета́ми благоукраша́ется и духо́вно благоуха́ет; от ра́нния бо ю́ности твоея́ и до ста́рости масти́тыя неосла́бно Бо́гу благоугожда́л еси́ и во́лю Его́ святу́ю при́сно твори́л еси́, чесо́ ра́ди кончи́ну пра́ведную я́ко вене́ц по́двигом твои́м от Го́спода получи́л еси́, и благоуха́ние сла́достное от моще́й твои́х а́бие по кончи́не твое́й истече́, всю́ оби́тель твою́ облагоуха́в. Те́мже и мы́, таково́е преставле́ние твое́ прославля́юще, зове́м ти́ си́це:

Ра́дуйся, вели́кий уго́дниче Бо́жий, от земли́ преше́дый к оби́телем небе́сным; ра́дуйся, блаже́нный насле́дниче Ца́рствия Христо́ва, досто́йное возме́здие получи́вый по дело́м твои́м благи́м.

Ра́дуйся, возду́х облагоуха́вый восхожде́нием души́ твоея́ святы́я в селе́ния го́рняя; ра́дуйся, оби́тель твою́ освяти́вый многоцеле́бными твои́ми моща́ми.

Ра́дуйся, я́ко душа́ твоя́ в руце́ Бо́жией храни́ма е́сть наве́ки; ра́дуйся, я́ко про́чее не прико́снется тебе́ ни ско́рбь, ни боле́знь.

Ра́дуйся, я́ко и те́ло твое́ на земли́ благоуха́нием ди́вным просла́вися от Го́спода; ра́дуйся, я́ко мо́щи твоя́ святы́я исцеле́ния благода́тныя ве́рным источа́ют.

Ра́дуйся, я́ко моще́й твои́х де́моны трепе́щут; ра́дуйся, я́ко прия́л еси́ от Го́спода вла́сть на ду́хи нечи́стыя.

Ра́дуйся, я́ко моли́твами твои́ми сокруша́еши всю́ и́х си́лу, а́ки паучи́ну; ра́дуйся, я́ко предста́тельством твои́м освобожда́еши челове́ки от зла́го и́х наси́лия.

Ра́дуйся, Дими́трие, вели́кий чудотво́рче.

Конда́к 10.

Спа́са Христа́ умоля́еши за гра́д тво́й и лю́ди твоя́, преподо́бне чудотво́рче Дими́трие; сие́ бо показа́л еси́ я́ве, во дни́ обложе́ния ра́тнаго Во́логды, я́влься еди́ней благочести́вей иноки́не с двема́ све́тлыми белори́зцы от скуде́льницы, обходя́ стены́ гра́да и утвержда́я и́х, да непоколеби́мы пребу́дут от нападе́ния вражде́бныя ра́ти, я́же вско́ре со студо́м отступи́ от гра́да, не возмо́гши его́ победи́ти, лю́ди же во́логодстии прославля́ху твое́ заступле́ние и вопия́ху Бо́гу: Аллилу́иа.

И́кос 10.

Царя́ Небе́снаго, Го́спода Иису́са, ве́рный ра́б и уго́дник бы́л еси́, преподо́бне о́тче Дими́трие, и от Него́ получи́в ве́лию благода́ть, царю́ земно́му благове́рному вели́кому кня́зю Иоа́нну, победи́ти ца́рство Каза́нское помо́гл еси́, я́влься среди́ полко́в росси́йских и побора́я и́м на ага́ряны нечести́выя, я́ко по́мощию твое́ю небе́сною, вско́ре взя́ти и́м сто́льный гра́д и́х Каза́нь. Сие́ явле́ние твое́ мы́ воспомина́я, благода́рственно зове́м ти́:

Ра́дуйся, свя́тче Бо́жий, со святы́ми обита́яй и за гре́шныя Бо́га умоля́яй; ра́дуйся, уго́дниче Христо́в, от го́рних высо́т к земноро́дным ми́лостивно приника́яй.

Ра́дуйся, любо́вь твою́ к оте́чествию земно́му и по сме́рти сохрани́вый; ра́дуйся, по́мощь твою́ святу́ю стране́ росси́йстей чуде́сно прояви́вый.

Ра́дуйся, я́ко архистрати́г во́ем росси́йским на ага́ряны побора́вый; ра́дуйся, гра́д Каза́нь взя́ти и́м ди́вно помога́вый.

Ра́дуйся, гра́д тво́й Во́логду от нападе́ний ра́тных мно́жицею изба́вивый; ра́дуйся, ико́ну твою́ честну́ю чудесы́ мно́гими просла́вивый.

Ра́дуйся, от моще́й твои́х святы́х исцеле́ния благода́тныя оби́льно источи́вый; ра́дуйся, еди́ным призыва́нием и́мене твоего́ неду́ги тя́жкия уврачева́вый.

Ра́дуйся, сострада́ния преиспо́лненный и в ми́лости бога́тый; ра́дуйся, оби́тели твоея́ святы́я стра́же неотсту́пный.

Ра́дуйся, Дими́трие, вели́кий чудотво́рче.

Конда́к 11.

Пе́ние на́ше моле́бное ми́лостиво приими́, уго́дниче Бо́жий, преподо́бне о́тче Дими́трие, и щедро́ты твоя́ целе́бныя да́руй на́м в неду́зех на́ших; тебе́ бо стяжа́хом врача́ изря́днаго и немздоприи́мнаго, при́сно гото́ваго помога́ти на́м и исцеля́ти неду́ги на́ша, да́нною ти́ от Го́спода благода́тию, ю́же прославля́я, от благода́рныя души́ вопие́м тобо́ю благоде́явшему на́м Бо́гу: Аллилу́иа.

И́кос 11.

Све́тлыми луча́ми чуде́с твои́х благода́тно просвеща́еши, свя́те чудотво́рче Дими́трие, не то́кмо гра́д тво́й и оби́тель твою́, но и всю́ страну́ росси́йскую, в не́йже, я́ко вели́кий уго́дник Бо́жий, усе́рдно прославля́ешися от ве́рных, бли́жним и да́льним щедро́ты твоя́ целе́бныя ми́лостиво да́руяй, да вси́ ра́достно взыва́ют ти́ си́це:

Ра́дуйся, великоимени́тый всеросси́йский на́ш засту́пниче; ра́дуйся, ангелонра́вный челове́че.

Ра́дуйся, звездо́ у́тренняя, мра́к нече́стия прогоня́ющая; ра́дуйся, забра́ло необори́мое от вра́г ви́димых и неви́димых.

Ра́дуйся, моли́твами твои́ми святы́ми гра́д тво́й огражда́яй; ра́дуйся, предста́тельством твои́м небе́сным оби́тель твою́ от вся́каго зла́ соблюда́яй.

Ра́дуйся, приходя́щим на поклоне́ние моще́м твои́м святы́м да́ры целе́бныя ще́дро подава́яй; ра́дуйся, ве́рно моля́щимся тебе́ на по́мощь ускоря́яй.

Ра́дуйся, в со́ниих и виде́ниих благочести́выя посеща́яй; ра́дуйся, о́гненное запале́ние призыва́нием твоего́ и́мени угаша́яй.

Ра́дуйся, безпомо́щных ско́рый помо́щниче; ра́дуйся, благода́ти Бо́жией многоцеле́бный исто́чниче.

Ра́дуйся, Дими́трие, вели́кий чудотво́рче.

Конда́к 12.

Благода́ти прича́стное изображе́ние лица́ твоего́ дарова́л еси́ на́м в благослове́ние и утеше́ние, преподо́бне о́тче Дими́трие, и от него́ чудеса́ мно́гая соверши́л еси́ я́ко чудотво́рец пресла́вный. Те́мже с ве́рою и любо́вию покланя́емся чудотво́рней ико́не твое́й, святы́й на́ш предста́телю, и, велича́я возвели́чившаго тя́ Христа́ Го́спода, хвале́бно зове́м Ему́: Аллилу́иа.

И́кос 12.

Пою́ще мно́гая твоя́ чудеса́ и ве́лие сострада́ние твое́ к лю́дем ти́ сро́дним, Дими́трие богоблаже́нне, благоумиле́нно про́сим тя́, небе́снаго засту́пника на́шего; принеси́ за ны́ усе́рдныя моли́твы твоя́ ко Го́споду и испроси́ на́м кончи́ну живота́ благу́ю и непосты́дную; да по́мощию твое́ю свято́ю спасе́ние ве́чное унасле́дуем и вку́пе с тобо́ю водвори́мся та́мо, иде́же присеща́ет све́т лица́ Бо́жия и весели́т вся́ от ве́ка пра́ведники. О се́м тя́ мо́лим и зове́м:

Ра́дуйся, благоволе́нием Пресвяты́я Тро́ицы осене́нный; ра́дуйся, лицезре́ния Пресвяты́я Богоро́дицы удосто́енный.

Ра́дуйся, а́нгельских лико́в собесе́дниче; ра́дуйся, все́х святы́х при́сный дру́же.

Ра́дуйся, А́гнцу Бо́жию после́довавый на земли́; ра́дуйся, с де́вственными ли́ки предстоя́й Ему́ на небеси́.

Ра́дуйся, со избра́нники Бо́жиими покланя́яйся Творцу́; ра́дуйся, дерзнове́ние моли́твенное стяжа́вый к небе́сному Отцу́.

Ра́дуйся, о Не́м же ра́дуются и Бо́га сла́вят челове́цы; ра́дуйся, Его́ же трепе́щут и боя́тся ду́си тьмы́.

Ра́дуйся, ду́ш и теле́с на́ших благода́тное врачева́ние; ра́дуйся, по Бо́зе и Пресвяте́й Богоро́дице кре́пкое на́ше упова́ние.

Ра́дуйся, Дими́трие, вели́кий чудотво́рче.

Конда́к 13.

О вели́кий чудотво́рче и ско́рый в беда́х помо́щниче, преподо́бне о́тче на́ш Дими́трие! Тебе́ мо́лимся и тебе́ про́сим с ве́рою и любо́вию; приими́ ми́лостивно сие́ ма́лое хвале́бное пе́ние, от усе́рдия на́шего тебе́ приноси́мое, и умоли́ Го́спода Бо́га, в де́нь стра́шный Суда́ Его́, поми́ловати на́с и изба́вити осужде́ния ве́чнаго, но да сподо́бимся блаже́нныя ча́сти одесну́ю Его́ стоя́щих, и ра́достно Ему́ воспое́м: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгел о́бразом, а́ще и челове́к по естеству́, бы́л еси́, преподо́бне о́тче Дими́трие, а́нгельскую бо чистоту́ стяжа́л еси́ на земли́, и а́нгельскою красото́ю лице́ твое́ цветя́ше, я́ко все́м, ви́девшим тя́, чуди́тися благоле́пию твоему́. Те́мже, я́ко избра́нника Бо́жия, благоле́пнаго душе́ю и те́лом, ублажа́ем тя́ пе́сньми си́ми;

Ра́дуйся, благочести́вых роди́телей пречестно́е порожде́ние; ра́дуйся, гра́да Переяславля-Зале́сскаго свято́е прозябе́ние.

Ра́дуйся, Росси́йския страны́ духо́вное украше́ние; ра́дуйся, ева́нгельскаго по Бо́зе жития́ ревни́телю.

Ра́дуйся, от ю́ных ле́т жи́зни твоея́ еди́наго Христа́ вседу́шно возлюби́вый; ра́дуйся, сладча́йшаго Иису́са па́че все́х красо́т земны́х возжела́вый.

Ра́дуйся, бога́тство тле́нное и ку́плю вре́менную презре́вый; ра́дуйся, ку́плю духо́вную му́дро соверши́вый.

Ра́дуйся, драги́й би́сер Христа́ усе́рдно взыска́вый; ра́дуйся Его́ за́поведи святы́я све́т стезя́м твои́м име́вый.

Ра́дуйся, серафи́мскою любо́вию ко Го́споду се́рдце твое́ воспламени́вый; ра́дуйся, да́ры Свята́го Ду́ха в ду́шу твою́ досто́йно восприя́вый.

Ра́дуйся, Дими́трие, вели́кий чудотво́рче.

Конда́к 1.

Избра́нный чудотво́рче и изря́дный уго́дниче Христо́в, преподо́бне о́тче на́ш Дими́трие, дру́же и собесе́дниче друга́ Бо́жия преподо́бнаго Се́ргия и Оте́чествия твоего́ при́сный засту́пниче; приими́ от на́с с любо́вию приноси́мое тебе́ хвале́бное пе́ние и, я́ко име́яй дерзнове́ние ко Го́споду, моли́твами твои́ми от вся́ких на́с бе́д свободи́, да зове́м ти́:

Ра́дуйся, Дими́трие, вели́кий чудотво́рче.

Моли́тва.

О свяще́нная главо́, преди́вный чудотво́рче, преподо́бне и богоно́сне о́тче на́ш Дими́трие! Усе́рдно припа́дающе к тебе́, мо́лимся; яви́ на́м, смире́нным и гре́шным многомо́щное твое́ заступле́ние. Се́ бо гре́х ра́ди на́ших не и́мамы дерзнове́ния ко Го́споду проси́ти Его́ даро́в, на́м благопотре́бных, но тебе́, моли́твенника к нему́ благоприя́тнаго, предлага́ем и про́сим; испроси́ на́м у бла́гости Его́ вся́, я́же на по́льзу душа́м и телесе́м на́шим; ве́ру пра́ву, наде́жду несомне́нну, любо́вь нелицеме́рну, во искуше́ниих му́жество, в злострада́ниих терпе́ние, в моли́твах постоя́нство, в благоче́стии преуспе́яние, вожделе́нное здра́вие, земли́ плодоно́сие, возду́ха благорастворе́ние, дожди́ благовре́менны, жите́йских потре́б дово́льство, ми́р во дне́х на́ших и благослове́ние свы́ше на вся́ блага́я дела́ и начина́ния на́ша, и да не во зло́ обрати́м да́ры Его́, но в сла́ву и́мени Его́ свята́го и в прославле́ние твоего́ о на́с хода́тайства. Испроси́, уго́дниче Христо́в, у Царя́ ца́рствующих и Го́спода госпо́дствующих богохрани́мей стране́ на́шей Росси́йстей тишину́ и благострое́ние, на враги́ же побе́ду и одоле́ние. Не забу́ди, чудотво́рче святы́й, ми́лостивно присеща́ти гра́д тво́й и оби́тель твою́, и вся́ гра́ды и ве́си страны́ на́шея правосла́вныя, сохраня́я и соблюда́я и́х моли́твами твои́ми от вся́каго зла́. Помяни́ все́х, ве́ру и любо́вь к тебе́ иму́щих, и́мя твое́ моли́твенно призыва́ющих, и на поклоне́ние моща́м твои́м святы́м приходя́щих, и вся́ во благи́х проше́ния и́х ми́лостиво испо́лни, осеня́я и́х свы́ше святооте́ческим твои́м благослове́нием. Е́й, свя́тче Бо́жий! Не лиши́ и на́с гре́шных твоего́ многомо́щнаго заступле́ния, но сподо́би на́с кончи́ну жития́ благу́ю улучи́ти и Ца́рствие небе́сное унасле́дити; да воспое́м и просла́вим ди́внаго во святы́х Свои́х Бо́га на́шего, Отца́, и Сы́на, и Свята́го Ду́ха, во ве́ки веко́в. Ами́нь.