Конда́к 1.
Избра́нный по предуве́дению Бо́жию уго́дниче Христо́в, преподо́бне о́тче Евфи́мие! Прославля́юще Го́спода Сла́вы, да́вшаго в тебе́ гра́ду Су́здалю и все́й правосла́вной держа́ве ру́сской кре́пкаго засту́пника и моли́твенника, и в беда́х помо́щника и уте́шителя, похва́льное воспису́ем ти́ пе́ние; ты́ же твои́ми те́плыми моли́твами у Престо́ла Святы́я Тро́ицы от вся́ких бе́д душе́вных и теле́сных вся́ ны́ изба́ви, зову́щия ти́:
Ра́дуйся, Евфи́мие, ско́рый помо́щниче и пресла́вный чудотво́рче.
И́кос 1.
А́нгельское житие́ и́ночествующих от ю́ности возлюби́л еси́, преподо́бне Евфи́мие, и Бо́гу Еди́ному рабо́тати все́м се́рдцем еще́ в о́трочестве свое́м возревнова́л еси́. Сего́ ра́ди взыва́ем ти́:
Ра́дуйся, отроча́ кро́ткое и благопоко́рливое; ра́дуйся, роди́телей утеше́ние.
Ра́дуйся, с любо́вию прилежа́вый кни́жному уче́нию; ра́дуйся, ве́дению Го́спода и Его́ за́поведей учи́тися возлюби́вый.
Ра́дуйся, вся́ уте́хи де́тския презре́вый; ра́дуйся, Боже́ственными то́кмо от ю́ности веселя́йся.
Ра́дуйся, селе́ния Го́спода Си́л па́че всего́ возлюби́вый; ра́дуйся, душе́ю свое́ю и скончава́тися во дво́рех Госпо́дних возжела́вый.
Ра́дуйся, в хра́ме Бо́жием, я́коже пред Лице́м Самого́ Го́спода, вы́ну предстоя́вый; ра́дуйся, у́м сво́й ве́сь к Еди́ному Бо́гу устреми́вый.
Ра́дуйся, я́ко ничто́же земно́е в хра́ме помышля́л еси́; ра́дуйся, со стра́хом и тре́петом Бо́гу предстоя́вый.
Ра́дуйся, Евфи́мие, ско́рый помо́щниче и пресла́вный чудотво́рче.
Конда́к 2.
Ви́дя по́двиги и моли́твенныя труды́ Диони́сия, в пеще́ре бли́з Ни́жняго Нова́града жи́тельствующа, прите́кл еси́ к нему́, и лобыза́я но́зе его́, со слеза́ми того́ моли́л еси́, е́же причте́ну ти́ бы́ти к ли́ку и́ноков, да вопие́ши ку́пно с ни́ми: Аллилу́иа.
И́кос 2.
Ра́зум слы́шаннаго тобо́ю словесе́ Ева́нгельскаго: «Ка́я по́льза челове́ку, а́ще ми́р ве́сь приобря́щет, ду́шу же свою́ погуби́т», до́бре уразуме́в и на скрижа́лех се́рдца то́е начерта́в, мирска́я вся́ презре́л еси́, о спасе́нии же души́ твоея́ то́чию ревнова́л еси́, Ца́рствия Бо́жия и пра́вды его́ пре́жде всего́ иска́ти науча́я вся́ ны́, вопию́щия ти́:
Ра́дуйся, земна́я презре́вый; ра́дуйся, небе́сная возлюби́вый.
Ра́дуйся, я́ко от ю́ности на стражбу́ Бо́жию ста́л еси́, да у́треннюеши к Бо́гу; ра́дуйся, в чте́ниих и пе́ниих церко́вных поуча́выйся де́нь и но́щь.
Ра́дуйся, из мла́да млеко́м сло́ва жи́зни пита́выйся; ра́дуйся, во благода́ти у Бо́га и челове́к непреста́нно возраста́вый.
Ра́дуйся, в та́йне от люде́й моли́тися возлюби́вый; ра́дуйся, от Ви́дящаго я́же в та́йне, я́ве просла́вленный.
Ра́дуйся, во о́трочестве не с земны́ми све́рстники, но с небе́сными А́нгелы содружи́выйся; ра́дуйся, всего́ себе́ Бо́гу преда́вый.
Ра́дуйся, целому́дрия ревни́телю; ра́дуйся, чистоты́ храни́телю.
Ра́дуйся, Евфи́мие, ско́рый помо́щниче и пресла́вный чудотво́рче.
Конда́к 3.
Си́ла Вы́шняго осени́ тя́, преподо́бне Евфи́мие, егда́ ми́ра отве́ргся, и́ноческое житие́ восприя́л еси́, по непрело́жному обетова́нию Бо́жию, тебе́ изрече́нному при постриже́нии: «А́ще и ма́ть забу́дет отроча́, А́з не забу́ду тебе́»; сего́ ра́ди к ли́ку и́ноков причте́н бы́в, вопия́л еси́ Бо́гу: Аллилу́иа.
И́кос 3.
Име́я в и́ночестем житии́ му́драго наста́вника блаже́ннаго Диони́сия, преуспева́л еси́, преподо́бне, в по́двизех и труде́х, восходя́ от си́лы в си́лу, да соверше́н и́нок яви́шися. Мы́ же, воспева́я по́двиги и труды́ твоя́, взыва́ем ти́ си́це:
Ра́дуйся, послуша́ния до́брый рачи́телю; ра́дуйся, на вся́кую слу́жбу Го́спода ра́ди при́сно гото́вый.
Ра́дуйся, со уготовле́нием бра́шна бра́тии у́м сво́й возводи́вый к ве́чери А́гнца, избра́нным угото́ванней; ра́дуйся, зре́нием огня́ в пещи́ возгрева́вый в себе́ па́мять огня́ гее́нскаго.
Ра́дуйся, я́ко во измове́нии ру́к тружда́яся, убели́ти ду́шу твою́, я́ко сне́г, поревнова́л еси́; ра́дуйся, я́ко, измыва́я срачи́цы, облещи́ся в хито́н заслу́г Христо́вых возлюби́л еси́.
Ра́дуйся, я́ко древа́ посека́я, из се́рдца твоего́ вся́ нечи́стыя мы́сли и жела́ния исторга́л еси́; ра́дуйся, я́ко зре́нием сухи́х древе́с, я́коже при́тчею о смоко́внице, плодоноше́нию до́брых де́л поуча́лся еси́.
Ра́дуйся, во о́браз младе́нческаго незло́бия и я́ко шле́м упова́ния ку́коль восприе́мый; ра́дуйся, во власяни́цу, я́ко в зна́мение умерщвле́ния пло́ти, облеки́йся.
Ра́дуйся, анала́в, я́ко броню́ необори́мую, на ра́мена возложи́вый; ра́дуйся, я́ко спогре́бшийся Христу́, ми́лостию оде́янный.
Ра́дуйся, Евфи́мие, ско́рый помо́щниче и пресла́вный чудотво́рче.
Конда́к 4.
Бу́ри жите́йских волне́ний в ти́хом приста́нищи оби́тели и́ноческия избе́гл еси́ и росо́ю воздержа́ния угаси́л еси́, преподо́бне, ю́ношеский пла́мень страсте́й; огне́м же страда́ний попаля́я прираже́ния ми́ра преле́стнаго, посто́м и моли́твою ду́шу твою́ светле́е луче́й со́лнечных просвети́л еси́, вопия́ Бо́гу: Аллилу́иа.
И́кос 4.
Слы́шав моле́ние кня́зя Су́здальскаго, о е́же дарова́ти наста́вника и строи́теля оби́тели во гра́де его́, блаже́нный Диони́сий тя́ я́ко предте́чу предпосыла́я пред собо́ю в страну́, иде́же предопредели́ ему́ Бо́г святи́тельствовати, тебе́, преподо́бне о́тче, вве́ри сие́ де́ло, и не хотя́щу ти́ удали́тися от отца́ твоего́; ты́ же, я́ко сы́н послуша́ния, во́лю свою́ Го́споду покори́вый, Его́же вся́ е́сть земля́, после́довал еси́ во́ли наста́вника; те́мже ублажа́я тя́, взыва́ем ти́ си́це:
Ра́дуйся, я́ко Авраа́м, послуша́ния ра́ди Гла́су Бо́жию, оте́чество твое́ Ни́жний Но́вград, оби́тель и зна́емых оста́вивый; ра́дуйся, Небе́снаго Оте́чества ра́ди в земне́м оте́чествии стра́нен яви́выйся.
Ра́дуйся, спасе́нию други́х послужи́ти гото́вый; ра́дуйся, и́ноческаго бра́тства до́брый вождю́.
Ра́дуйся, благослове́ние отца́ своего́ духо́внаго и моли́тву, я́ко копие́ о́строе, на пораже́ние неви́димых вра́г прие́мый; ра́дуйся, ду́хом моли́твы от него́ не отлучи́выйся.
Ра́дуйся, оби́тель свята́го Васи́лия устро́ивый и та́мо и́ноков собра́вый; ра́дуйся, при отше́ствии из оби́тели сея́ пу́тнический тво́й по́сох та́мо на благослове́ние оста́вивый.
Ра́дуйся, я́ко во гра́де Су́здале благослове́ния Бо́жия во хра́ме Пресвяты́я Богоро́дицы пре́жде всего́ иска́л еси́; ра́дуйся, я́ко святи́теля Иоа́нна благогове́йно почита́л еси́.
Ра́дуйся, я́ко от архиере́я Бо́жия моли́твы и благослове́ния на де́ло твое́ пре́жде всего́ испроси́л еси́; ра́дуйся, во е́же де́ло повеле́нное соверши́ти усе́рдно потруди́выйся.
Ра́дуйся, Евфи́мие, ско́рый помо́щниче и пресла́вный чудотво́рче.
Конда́к 5.
Боготе́чная звезда́ яви́лся еси́, преподо́бне, не́бо церко́вное украша́я, гра́д Су́здаль све́том свои́м осиява́я и пла́вающия во мра́це жите́йских попече́ний к ти́хому приста́нищу и́ночества наставля́я, да вопию́т вси́ Бо́гу: Аллилу́иа.
И́кос 5.
Ви́дев со епи́скопом и кня́зем ме́сто благопотре́бно на горе́, иде́же хра́му Преображе́ния Госпо́дня созда́тися, я́ко Пе́тр на Фаво́ре мы́слил еси́: «Добро́ на́м зде́ бы́ти, и сотвори́м се́ни бра́тии», ве́дый я́же глаго́леши; те́мже со всеусе́рдием труди́лся еси́ в созида́нии хра́ма и жили́щ и́ноком. Мы́ же, зря́ще соверше́ние де́ла и столпосте́ние оби́тели, ра́достно взыва́ем ти́:
Ра́дуйся, зда́телю му́дрый; ра́дуйся, домострои́телю ве́рный.
Ра́дуйся, я́ко моты́кою углубля́яся в зе́млю, ду́хом твои́м нисходи́л еси́ во глубину́ смире́ния; ра́дуйся, я́ко земна́я не́дра разрыва́я, возде́ловал еси́ в себе́ доброде́тели.
Ра́дуйся, при устрое́нии хра́ма Бо́жия на земли́, о хра́ме ве́чнем на небеси́ вы́ну помышля́вый; ра́дуйся, в ча́янии жи́зни ве́чныя устро́ивый гро́б себе́ под кро́вом, иде́же безкро́вная прино́сится же́ртва.
Ра́дуйся, свои́ма рука́ма истеса́вый ка́мни для гро́ба своего́; ра́дуйся, вы́ну па́мять сме́ртную име́вый.
Ра́дуйся, посто́м, моли́твою и слеза́ми ме́сто оби́тели освяти́вый; ра́дуйся, пу́сто ме́сто во благопло́дный вертогра́д Христо́в преобрази́вый.
Ра́дуйся, при реце́ веселя́щей гра́д, оби́тель и́ноков я́ко мо́ст к небеси́ преводя́й, устро́ивый; ра́дуйся, строи́телю оби́тели, процве́тшия я́ко кри́н в стране́ Су́здальстей.
Ра́дуйся, Евфи́мие, ско́рый помо́щниче и пресла́вный чудотво́рче.
Конда́к 6.
Пропове́дник богоно́сный бы́в, преподо́бне, и́стинному богове́дению и благоче́стию поуча́л еси́ при́сно бра́тию свою́ и вся́ лю́ди земли́ Су́здальския сло́вом спасе́ния, па́че же о́бразом жития́ своего́ наставля́я на пу́ть спасе́ния, да вопию́т вси́ Бо́гу: Аллилу́иа.
И́кос 6.
Возсия́ благове́рному кня́зю свя́тость жития́ твоего́, о́тче Евфи́мие, егда́ узре́ А́нгела Бо́жия сослужа́ща ти́ и святи́телю Иоа́нну при Боже́ственней литурги́и, я́коже иногда́ спо́стнику и собесе́днику твоему́ преподо́бному Се́ргию; мы́ же, та́ко просла́вивша тя́ Го́спода сла́вяще, вопие́м ти́:
Ра́дуйся, па́стырю до́брый вве́ренных тебе́ слове́сных а́гнцев; ра́дуйся, вождю́ до́брый, си́льный сло́вом и де́лом.
Ра́дуйся, виногра́да Христо́ва насади́телю и храни́телю; ра́дуйся, вертогра́да Госпо́дня благоиску́сный де́лателю.
Ра́дуйся, та́ин богоизбра́нный строи́телю; ра́дуйся, не́мощей бра́тии врачу́ богому́дрый и ско́рый цели́телю.
Ра́дуйся, свире́ль доброгла́сная, пе́сньми духо́вными веселя́щая ду́ши челове́ков; ра́дуйся, псалти́рь, сла́ву Бо́жию возвеща́ющая.
Ра́дуйся, печа́льных утеше́ние; ра́дуйся, оби́димых заступле́ние.
Ра́дуйся, Бо́жия благода́ти струе́ неизсяка́ющая; ра́дуйся, ми́лостей Бо́жиих при́сный хода́таю.
Ра́дуйся, Евфи́мие, ско́рый помо́щниче и пресла́вный чудотво́рче.
Конда́к 7.
Хотя́ до́бре упа́ствити вве́ренную ти́ от Бо́га па́ству, запове́дал еси́ в хра́ме и трапе́зе молча́ние, в ке́ллии моли́твенное пребыва́ние, вся́каго мудрова́ния отсече́ние, свои́х стяжа́ний отчужде́ние, чистоты́ и целому́дрия хране́ние, и все́х и́ноческих обе́тов ве́рное соблюде́ние, да возмо́жеши, предста́в Стра́шному Суди́щу Христо́ву, рещи́: «Се́ а́з и де́ти, я́же ми́ да́л еси́», и воспе́ти вку́пе с ни́ми: Аллилу́иа.
И́кос 7.
Но́ваго тя́ моли́твенника, засту́пника и помо́щника в беда́х стяжа́ша лю́дие су́здальстии: ты́ бо гла́дным пита́ние, больны́м упокое́ние, должнико́м искупле́ние, утесня́емым на суде́ заступле́ние подава́л еси́; мы́ же си́х ра́ди благода́рственная ти́ воспису́юще, взыва́ем к тебе́ си́це:
Ра́дуйся, любве́ Отца́ Небе́снаго подража́телю; ра́дуйся, бра́тию твою́ любо́вию Христо́вою возлюби́вый.
Ра́дуйся, бли́жним, я́коже и Христу́ Самому́, служи́вый; ра́дуйся, благослове́ние Отца́ Небе́снаго ми́лостынею насле́довати поревнова́вый.
Ра́дуйся, по́двиги поста́, моли́твы и бде́ния любо́вию увенча́вый; ра́дуйся, любо́вь — соу́з соверше́нства стяжа́вый.
Ра́дуйся, любве́ к бли́жнему основа́ние в любви́ к Бо́гу положи́вый; ра́дуйся, ве́ру свою́ и любо́вь к Бо́гу де́лы яви́вый.
Ра́дуйся, я́ко сы́н пра́выя ве́ры и чи́стыя любве́ Бо́гу усынови́выйся; ра́дуйся, Святы́я Тро́ицы благоугото́ванное селе́ние яви́выйся.
Ра́дуйся, в Бо́зе пребыва́яй; ра́дуйся, я́ко Бо́г в тебе́ пребыва́ет.
Ра́дуйся, Евфи́мие, ско́рый помо́щниче и пресла́вный чудотво́рче.
Конда́к 8.
Стра́нен и убо́г вне́шним ви́дом явля́лся еси́, преподо́бне, худы́ми ри́зами прикрове́н и ми́лотию ве́тхою оде́ян, то́южде в зно́и ле́тнем и в хла́де зи́мнем, вну́трь же доброде́тельми преукра́шен бы́л и чистото́ю сия́л еси́, воспева́я Бо́гу: Аллилу́иа.
И́кос 8.
Вся́ страна́ Су́здальская, све́том твои́х до́брых де́л и поле́зных уче́ний осиява́ема, прославля́ше о тебе́ Отца́ Небе́снаго и я́ко а́нгела земна́го и челове́ка небе́снаго тя́ почита́ше. Те́мже и мы́ отону́ду пе́ти научи́хомся тебе́ такова́я:
Ра́дуйся, вся́кия доброде́тели усе́рдный де́лателю; ра́дуйся, смире́ния избра́нный сосу́де.
Ра́дуйся, моли́твою и слеза́ми ду́шу очи́стивый; ра́дуйся, посто́м и вери́гами желе́зными пло́ть умертви́вый.
Ра́дуйся, Ца́рство Небе́сное нището́ю ду́ха насле́дивый; ра́дуйся, ве́чное весе́лие пла́чем исхода́тайствовавый.
Ра́дуйся, в насле́дие зе́млю Небе́сную кро́тостию улучи́вый; ра́дуйся, я́ко за а́лчбу и жа́жду пра́вды восприя́л еси́ насыще́ние бла́гами ве́чными.
Ра́дуйся, я́ко ми́лости ра́ди от Бо́га поми́лован бы́л еси́; ра́дуйся, чистото́ю се́рдца зре́ти Бо́га сподо́бивыйся.
Ра́дуйся, я́ко миротворе́ния ра́ди, в сыне́х Бо́жиих нарещи́ся сподо́бился еси́; ра́дуйся, я́ко терпе́нием и злострада́нии мзду́ мно́гую стяжа́л еси́.
Ра́дуйся, Евфи́мие, ско́рый помо́щниче и пресла́вный чудотво́рче.
Конда́к 9.
Вся́кое духо́вное утеше́ние почерпа́л еси́, преподо́бне, от содру́жества с вели́ким Се́ргием, сло́вом спасе́ния в бесе́дах назида́яся, по́двиги и́ноческия с ни́м разделя́я и ку́пно воспева́я Бо́гу: Аллилу́иа.
И́кос 9.
Вети́йствующий язы́к не мо́жет по достоя́нию восхвали́ти труды́ твоя́, по́двиги и вся́кую доброде́тель твою́: от ю́ности бо до масти́тыя ста́рости неуста́нно Бо́гу рабо́тал еси́, труды́ ко трудо́м прилага́я и восходя́ от си́лы в си́лу, да вообрази́тся в тебе́ Христо́с, Его́же ра́ди подвиза́лся еси́, Его́же возлюби́л еси́, Его́же вожделе́ душа́ твоя́. Наста́ви у́бо на пу́ть Христо́вых за́поведей и на́с, взыва́ющих к тебе́ си́це:
Ра́дуйся, от млады́х ногте́й до престаре́ния всю́ жи́знь твою́ Бо́гу посвяти́вый; ра́дуйся, де́лая в вертогра́де Христо́ве, тяготу́ и ва́р дне́ понесы́й.
Ра́дуйся, в жи́зни при́сно о сме́рти помышля́вый; ра́дуйся, вы́ну предста́ти Стра́шному Суди́щу Христо́ву гото́вивыйся.
Ра́дуйся, уме́рый ми́ру и пло́ти пре́жде успе́ния своего́; ра́дуйся, воскресы́й ду́хом пре́жде преи́тия в ра́йская селе́ния.
Ра́дуйся, по́двигом до́брым подвиза́выйся; ра́дуйся, че́стне земно́е тече́ние сконча́вый.
Ра́дуйся, ра́бе ве́рный, в ра́дость Го́спода своего́ вше́дый; ра́дуйся, до́блий во́ине Царя́ Небе́снаго, вене́ц сла́вы ве́чныя прия́вый.
Ра́дуйся, я́ко Престо́лу Царя́ Сла́вы предстои́ши; ра́дуйся, я́ко Христу́ Царю́ моли́твы о на́с прино́сиши.
Ра́дуйся, Евфи́мие, ско́рый помо́щниче и пресла́вный чудотво́рче.
Конда́к 10.
Спасти́ хотя́ все́х, твоего́ наставле́ния тре́бующих, гре́шных призыва́л еси́ к покая́нию, боля́щим подава́л еси́ исцеле́ния моли́твою твое́ю, бра́тии име́ти любо́вь между́ собо́ю запове́дал еси́, и в ча́с сме́ртный, все́х благословля́я и проще́ние коему́ждо подава́я, неотсту́пен от оби́тели твоея́ обеща́лся еси́ пребы́ти ду́хом твои́м, его́же с ми́ром пре́дал еси́ Бо́гу, вопия́ Ему́: Аллилу́иа.
И́кос 10.
Стена́ бы́л еси́ и огражде́ние и по преставле́нии оби́тели твоея́ и до́брых уста́вов и́ноческаго жития́: небрегу́ща бо об оби́тели архимандри́та Евфи́мия огне́вицею порази́л еси́, кела́ря же Киприа́на, уста́ва, да́ннаго тобо́ю, не соблю́дша, разслабле́нием вразуми́л еси́; те́мже мы́, прославля́я тя́, я́ко неусы́пнаго стра́жа оби́тели, взыва́ем ти́ такова́я:
Ра́дуйся, я́ко па́ству твою́, с не́ю жи́вый, до́бре упа́сл еси́; ра́дуйся, я́ко и по сме́рти благоустроя́ти ю́ не престае́ши.
Ра́дуйся, уста́ва до́браго общежи́тия насади́телю; ра́дуйся, при́сный его́ охрани́телю.
Ра́дуйся, нерадя́щих стро́гий обличи́телю; ра́дуйся, ка́ющимся ско́рое проще́ние подава́яй.
Ра́дуйся, па́стырей умудре́ние; ра́дуйся, и́ноков науче́ние.
Ра́дуйся, обеща́вый, я́ко не оскуде́ет оби́тель твоя́; ра́дуйся, обетова́ния сего́ исполне́ние исхода́тайствовавый.
Ра́дуйся, дерзнове́ние к Бо́гу получи́вый; ра́дуйся, при́сно о ча́дех твои́х предста́тельствуяй.
Ра́дуйся, Евфи́мие, ско́рый помо́щниче и пресла́вный чудотво́рче.
Конда́к 11.
Пе́ние всеумиле́нное прино́сим ди́вному во святы́х Бо́гу, за е́же мо́щи твоя́, уго́дниче Бо́жий, я́ко сосу́д благода́ти по́лный и преизлива́яйся, на́м дарова́л е́сть: презре́нием бо тле́ннаго ми́ра и пло́ти умерщвле́нием не то́кмо ве́чное блаже́нство ду́хом, но и пло́ти нетле́ние улучи́л еси́, и исте́кшим сту́ ле́том пребыва́ния в земле́ све́тел лице́м и в ри́зах неистле́нных обре́тен бы́л еси́; сего́ ра́ди вопие́м Бо́гу: Аллилу́иа.
И́кос 11.
Светлосия́ющую свещу́, су́щим во тьме́ явле́нную, зри́м ра́ку святы́х моще́й твои́х, преподо́бне Евфи́мие; при не́й бо мра́ком беснова́ния одержи́мии просвеща́ются, изступле́ннии умо́м и разсла́бленнии те́лом здра́вы содева́ются, о́гнь тряса́вицы угаша́ется, и мно́гая неисче́тная чудеса́ соверша́ются, о ни́хже дивя́щеся, вопие́м ти́:
Ра́дуйся, я́ко восходя́ на не́бо, мо́щи твоя́ святы́я на́м оста́вил еси́; ра́дуйся, я́ко мо́щи твоя́ исцеля́ют вся́кия ско́рби и боле́зни.
Ра́дуйся, я́ко моще́й твои́х де́мони трепе́щут; ра́дуйся, я́ко твоя́ мо́щи кому́ждо в приклю́чшихся печа́лех быва́ют утеше́ние.
Ра́дуйся, я́ко вери́ги и же́зл тво́й чудоде́йствуют; ра́дуйся, исто́чниче, струю́ оби́льную исцеле́ний точа́щий.
Ра́дуйся, многообра́зных чуде́с пода́телю; ра́дуйся, по твое́м отше́ствии от земли́ на́с не оставля́яй.
Ра́дуйся, из небе́сных сокро́вищ бла́га на́м, на земли́ су́щим, низпосыла́яй; ра́дуйся, на земны́я ско́рби и ну́жды на́ша призира́яй.
Ра́дуйся, к моли́твам ско́ро слу́х сво́й преклоня́яй; ра́дуйся, на по́мощь бы́стро гото́вый.
Ра́дуйся, Евфи́мие, ско́рый помо́щниче и пресла́вный чудотво́рче.
Конда́к 12.
Благода́ть свы́ше прия́л еси́, преподо́бне, заблужда́ющияся на пу́ть и́стины обраща́ти, гре́шников к покая́нию призыва́ти; не пре́зри под кро́вом оби́тели твоея́ тре́бующих духо́внаго врачева́ния и целе́ния, вся́кое неправомы́слие исправля́я и вся́кий грехо́вный неду́г отгоня́я, да вси́ еди́ными усты́ и чи́стым се́рдцем вопие́м Бо́гу: Аллилу́иа.
И́кос 12.
Пою́ще мно́гия твоя́, преподо́бне Евфи́мие, по́двиги и труды́ в жи́зни се́й, ублажа́ем приснопа́мятное успе́ние твое́, торжеству́ем и о Боже́ственней сла́ве твое́й в Небе́сном Ца́рствии, и, припа́дающе к ра́це многоцеле́бных моще́й твои́х, со умиле́нием взыва́ем ти́ си́це:
Ра́дуйся, му́жу жела́ний, в телеси́ и душе́ Бо́га просла́вивый; ра́дуйся, в невече́рний де́нь Ца́рствия Бо́жия зре́ти сподо́бивыйся.
Ра́дуйся, в кни́гу живо́тную впи́санный; ра́дуйся, Го́рняго Иерусали́ма жи́телю.
Ра́дуйся, в раю́ сла́дости водо́ю жи́зни напая́емый; ра́дуйся, плода́ми дре́ва жи́зни насыща́емый.
Ра́дуйся, в све́те Сла́вы Бо́жия и свети́льника А́гнца обита́яй; ра́дуйся, Престо́лу Го́спода Вседержи́теля предстоя́й.
Ра́дуйся, в селе́ния, отню́дуже отбеже́ вся́ка печа́ль и воздыха́ние, всели́выйся; ра́дуйся, в го́рней ски́нии Бо́жией, на не́йже почи́ет благослове́ние, веселя́йся.
Ра́дуйся, Ве́чери бра́ка А́гнча приобщи́выйся; ра́дуйся, со все́ми святы́ми во Ца́рствии Небе́снем ликовству́яй.
Ра́дуйся, Евфи́мие, ско́рый помо́щниче и пресла́вный чудотво́рче.
Конда́к 13.
О пресла́вный чудотво́рче, преподо́бне и богоно́сне о́тче Евфи́мие! Приими́ ны́не сие́ усе́рдное моле́ние на́ше и умоли́ Ми́лостиваго Бо́га, да да́рует Це́ркви ми́р и тишину́, все́м на́м душе́вное спасе́ние и от все́х бе́д избавле́ние, и твои́м те́плым хода́тайством бу́дущия изми́ му́ки на́с, а́ще и недосто́йне, вопию́щих Бо́гу: Аллилу́иа.
И́кос 1.
А́нгельское житие́ и́ночествующих от ю́ности возлюби́л еси́, преподо́бне Евфи́мие, и Бо́гу Еди́ному рабо́тати все́м се́рдцем еще́ в о́трочестве свое́м возревнова́л еси́. Сего́ ра́ди взыва́ем ти́:
Ра́дуйся, отроча́ кро́ткое и благопоко́рливое; ра́дуйся, роди́телей утеше́ние.
Ра́дуйся, с любо́вию прилежа́вый кни́жному уче́нию; ра́дуйся, ве́дению Го́спода и Его́ за́поведей учи́тися возлюби́вый.
Ра́дуйся, вся́ уте́хи де́тския презре́вый; ра́дуйся, Боже́ственными то́кмо от ю́ности веселя́йся.
Ра́дуйся, селе́ния Го́спода Си́л па́че всего́ возлюби́вый; ра́дуйся, душе́ю свое́ю и скончава́тися во дво́рех Госпо́дних возжела́вый.
Ра́дуйся, в хра́ме Бо́жием, я́коже пред Лице́м Самого́ Го́спода, вы́ну предстоя́вый; ра́дуйся, у́м сво́й ве́сь к Еди́ному Бо́гу устреми́вый.
Ра́дуйся, я́ко ничто́же земно́е в хра́ме помышля́л еси́; ра́дуйся, со стра́хом и тре́петом Бо́гу предстоя́вый.
Ра́дуйся, Евфи́мие, ско́рый помо́щниче и пресла́вный чудотво́рче.
Конда́к 1.
Избра́нный по предуве́дению Бо́жию уго́дниче Христо́в, преподо́бне о́тче Евфи́мие! Прославля́юще Го́спода Сла́вы, да́вшаго в тебе́ гра́ду Су́здалю и все́й правосла́вной держа́ве ру́сской кре́пкаго засту́пника и моли́твенника, и в беда́х помо́щника и уте́шителя, похва́льное воспису́ем ти́ пе́ние; ты́ же твои́ми те́плыми моли́твами у Престо́ла Святы́я Тро́ицы от вся́ких бе́д душе́вных и теле́сных вся́ ны́ изба́ви, зову́щия ти́:
Ра́дуйся, Евфи́мие, ско́рый помо́щниче и пресла́вный чудотво́рче.
Моли́тва.
Преподо́бне и преблаже́нне о́тче на́ш Евфи́мие, вонми́ на́м, к тебе́ смире́нно припа́дающим и твоего́ заступле́ния те́пле прося́щим. Ве́си не́мощи на́ша, ве́си грехи́ на́ша, но и усе́рдие на́ше не утаи́ся от тебе́. Умоли́ Ми́лостиваго Спаси́теля на́шего, Го́спода Иису́са Христа́, дарова́ти на́м оставле́ние мно́гих согреше́ний на́ших и утверди́ти на́с на пути́ де́лания за́поведей Его́. Огради́ на́с твои́ми моли́твами от все́х искуше́ний и бе́д, отврати́ належа́щия на́м ско́рби и напа́сти, да́руй на́м в здра́вии, ми́ре, тишине́ и благоугожде́нии Бо́гу провожда́ти дни́ жития́ на́шего, испроси́ на́м вре́мя на покая́ние и отве́т благоприя́тен на Стра́шнем Суди́щи Христо́ве, да с тобо́ю и со все́ми избра́нными сла́вим ве́чно Отца́ и Сы́на и Свята́го Ду́ха. Ами́нь.
