Конда́к 1.

Избра́нному и Ду́ха Свята́го испо́лненному уго́днику Бо́жиему, преподо́бному Фео́дору, кня́зю Остро́жскому, соста́вим похвалу́; я́ко вся́ земна́я Христа́ ра́ди презре́вшему; сла́ву же княже́ния в пеще́рное затворе́ние преложи́вшему: Ты́ же Свя́те, я́ко име́яй ве́лие дерзнове́ние ко Го́споду; моли́тву сотвори́ Христу́ Бо́гу; во е́же за ве́ру стоя́ти на́м безстра́шно и о спасе́нии свое́м попече́ние име́ти непреста́нно; да в сле́зном умиле́нии зове́м ти́:

Ра́дуйся, Фео́доре, Остро́жская Похвало́ и моли́твенниче о на́с Бо́гу тепле́йший.

И́кос 1.

А́нгельстии чи́ни возра́довашася, о всеце́лом премене́нии души́ твоея́, преподо́бне, где́ от по́двигов бра́нных к подвиго́м духо́вным прише́л еси́ разсу́дне, и ме́чь духо́вный подъе́м на враги́ неви́димый, си́лою Бо́жиею кре́пко сия́ побежда́ше, те́мже и на́с а́нгельския ре́вности испо́лни похва́льная воспева́ти тебе́ сицева́я:

Ра́дуйся, от свята́го креще́ния прия́вый и́мя Фео́дора, я́ко да́р Бо́жий и дая́ние е́же от Отца́ све́тов в страна́х оте́чествия твоего́ име́вый яви́тися; ра́дуйся, я́ко о тебе́ свы́ше явля́емую Бо́жию си́лу и заступле́ние небе́сное позна́хом.

Ра́дуйся, во и́ночестве Феодо́сием тя́ нареко́ша, я́ко в да́р Христу́ Бо́гу самаго́ себя́ прине́сл еси́ всеце́ло; ра́дуйся, я́ко из мла́да услы́шал еси́ вну́тренний гла́с призва́вшаго тя́ Го́спода.

Ра́дуйся, сла́ву княже́ния своего́ презре́в, во убо́гий о́браз после́дуя Христу́, на́с ра́ди обнища́вшему, обле́клся еси́; ра́дуйся, земли́ Волы́нския в правосла́вии утвержде́ние и украше́ние.

Ра́дуйся, плоды́ ве́ры Боже́ственныя и светоно́сныя от ко́рене равноапо́стольнаго Влади́мира в себе́ показа́л еси́ изря́дно; ра́дуйся, из де́тства во благоче́стии и смире́нии от роди́телей свои́х наста́вленный.

Ра́дуйся, от ю́ности Христа́ все́м се́рдцем и все́ю душе́ю возлюби́вый; ра́дуйся, все́ житие́ свое́ на служе́ние Бо́гу да́же до после́дняго издыха́ния преда́вый.

Ра́дуйся, Фео́доре, Остро́жская похвало́ и моли́твенниче о на́с к Бо́гу тепле́йший.

Конда́к 2.

Ве́дяще, я́ко не ле́ть е́сть наде́ятися на кня́зи и сы́ны челове́ческия, и воо́чию ви́дящи кова́рство и за́висть сора́тников Твои́х в ратобо́рстве за правосла́вную Це́рковь и единове́рныя лю́ди твоя́, кня́же блаже́нне, отри́нул еси́ великодержа́вное и оте́чественное себялю́бие, и возревнова́л еси́ о стяжа́нии ве́дения духо́внаго, немо́лчно воспева́я Бо́гу: Аллилу́иа.

И́кос 2.

Ра́зум соверше́н и прича́стие Ду́ха Свята́го во и́ночестве стяжа́л еси́, богоно́сне Фео́доре, и отто́ле огражда́л еси́ ве́ру правосла́вную и лю́ди своя́ не ра́тными уже́ по́двиги, но си́лою моли́тв твои́х от вся́каго вре́да и ле́сти лука́выя, сего́ ра́ди приими́ от на́с хвале́бныя пе́ния сия́:

Ра́дуйся, кре́пко подвиза́выйся моли́твенниче на́ш неусы́пный; ра́дуйся, тве́рдость стоя́ния Твоего́ ча́дом Твои́м запове́дал еси́, и си́х до четве́ртаго ро́да адама́нты правосла́вныя ве́ры яви́л еси́.

Ра́дуйся, и наро́д че́шский теплото́ю моли́тв твои́х согрева́яй; ра́дуйся, святу́ю ла́вру Ки́евскую нетле́нием святы́х моще́й твои́х просла́вивый.

Ра́дуйся, гра́д, тво́й Остро́г да́ром ча́стицы святы́х моще́й твои́х освяти́л еси́; ра́дуйся, и ико́ною твое́ю из да́льних пеще́р Ки́евских гра́д се́й благослови́л еси́.

Ра́дуйся, дерма́нскую оби́тель та́кожде части́цею нетле́нных моще́й твои́х услади́л еси́; ра́дуйся, все́х притека́ющих к Тебе́ на бра́нь духо́вную воздвиза́яй.

Ра́дуйся, Фео́доре, Остро́жская похвало́ и моли́твенниче о на́с к Бо́гу тепле́йший.

Конда́к 3.

Си́лою Вы́шняго, е́же обличе́н бы́л еси́ во уго́дное благода́ти Боже́ственныя ору́жие, толи́кий пла́мень ре́вности Бо́жия возжже́ в се́рдце твое́м, я́ко навы́кл еси́, по о́бразу ева́нгельскаго жития́, воздава́ти супоста́том твои́м, за зло́ добро́м и явля́ти себя́ в дея́ниих кро́тким и незло́бивым: мы́ же окая́ннии бесо́м дру́ги, страстьми́ свои́ми бы́хом и о спасе́нии свое́м небрего́хом. Оба́че ели́ко гре́шнейшии яви́хомся, толи́ко вя́щшаго сострада́ния твоего́ тре́буем, да во умиле́нии покая́ния и чистоте́ со́вести пое́м и мы́ Бо́гу: Аллилу́иа.

И́кос 3.

Име́яй бога́тство си́лы душе́вныя к восхожде́нию от ми́ра земна́го к духо́вному, и умно́жив Боже́ственною благода́тию, мра́к пеще́рный озари́л еси́ све́том Богове́дения, и́мже и на́с просвети́, во тьме́ грехо́в су́щих, да вопие́м ти́ ра́достно:

Ра́дуйся, пре́жде власо́в постриже́ния смире́нием удивля́яй лю́ди; ра́дуйся, во и́ноческом о́бразе возвесели́вый а́нгелы и просла́вивый Христа́.

Ра́дуйся, вене́ц княже́ния и земно́е бога́тство во́лею, Христа́ ра́ди отложи́вый; ра́дуйся, пеще́рное затворе́ние в лу́чший черто́г себе́ вмени́вый.

Ра́дуйся, та́йно от взо́ром челове́ческих многоле́тне свя́то подвиза́выйся; ра́дуйся, я́ко ничи́мже то́чию слеза́ми из глубины́ серде́чныя излива́ющимся, во времена́ о́ны пита́выйся.

Ра́дуйся, вмести́лище все́х сокро́вищ Госпо́дних; ра́дуйся, раздая́телю кому́ждо на по́льзу даро́в духо́вных, я́же прия́л еси́ от Го́спода.

Ра́дуйся, на подража́ние житию́ твоему́ на́с наставля́яй.

Ра́дуйся, Фео́доре, Остро́жская похвало́ и моли́твенниче о на́с к Бо́гу тепле́йший.

Конда́к 4.

Бу́рю злы́х навожде́ний и обстоя́ний укроща́я иждиве́нием свои́м, созда́л еси́ во гра́де Остро́ге це́рковь Пречи́стыя Влады́чицы, та́кожде и Сы́ну своему́ Васи́лию Кра́сному о построе́нии хра́мов Бо́жиих заве́т преда́л еси́. И́же то́й, исполня́я заве́т се́й, воздви́же от усе́рдия своего́ велеле́пный хра́м Богоявле́ния в Остро́ге и оби́тели святи́и в Дерма́ни и Ду́бно, во е́же в ни́х сла́вити Го́спода, неве́рие же и злы́я е́реси отвраща́ти, воспева́я Бо́гу: Аллилу́иа.

И́кос 4.

Слы́шай и помышля́яй, я́ко гора́ Пече́рская, я́же во гра́де Ки́еве, мо́щи святы́х покрыва́ющи, честна́ и свя́та е́сть, ты́ о́тче преподо́бне, исполня́я веле́ние се́рдца своего́, де́ло свое́ соверши́л, дво́р кня́жий оста́вил еси́, а́бие и пеще́рное затворе́ние в лу́чший черто́г себе́ вмени́л еси́ во́лею. Сего́ ра́ди те́кл еси́ к игу́мену Пече́рскому, и моли́л еси́ его́ да тя́ в свое́ сожи́тельство прии́мет и в число́ и́ночествующих впи́шет. О́н же прови́дев в тебе́ ве́лию си́лу Бо́жию, повеле́ неотлага́тельно на тя́ и́ноческий о́браз возложи́ти, его́ же ты́ обоеру́чно я́лся еси́ и со бра́тиею зде́ непреста́нно тружда́лся еси́ до конца́ дне́й свои́х, о чесо́м мы́ ве́дуще, та́ко взыва́ем ти́:

Ра́дуйся, я́ко неусы́пнаго ра́ди хвале́ния Го́спода, ти́хое приста́нище и́ночества и моли́твенный по́двиг восприя́л еси́; ра́дуйся, я́ко сего́ ра́ди, земно́е бога́тство и че́сть княже́ния своего́ в уме́ты вмени́л еси́.

Ра́дуйся, о́бразе ре́вности духо́вныя; ра́дуйся, я́ко еще́ на княже́нии ве́ры бы́л еси́.

Ра́дуйся, я́ко в по́двизе пече́рнем, кня́зь над страстьми́ вско́ре показа́лся еси́; ра́дуйся, плоды́ трудо́в твои́х в небе́сном вертогра́де ны́не пожина́еши.

Ра́дуйся, я́ко бра́тия Пече́рстии непреста́нную моли́тву Иису́сову, твои́ми усты́ глаго́лемую, слы́шаше, умиля́хуся; ра́дуйся, благода́тныя сле́зы из о́чию твое́ю теку́щия ви́дяще, на пу́ть пра́вый возвраща́хуся.

Ра́дуйся, Фео́доре, Остро́жская похвало́ и моли́твенниче о на́с к Бо́гу тепле́йший.

Конда́к 5.

Богоявле́нней звезде́ уподо́бился еси́, о́тче на́ш Фео́доре, луча́ми бо высо́кия святы́ни твоея́ мно́гих просвеща́ющи, мно́гих на пу́ть богове́дения наставля́ющи, мно́гих ко и́ночеству приводя́щи, мно́гих же в доброде́тельном жи́тий укрепля́ющи: сие́ Бо́жие изволе́ние до́бре в тебе́ испо́лнившееся зря́щи, ны́не тебе́, всеблаже́нне уми́льно про́сим: твоея́ неистощи́мыя любве́ лу́ч на́м низпосли́: гне́в Бо́жий, пра́ведно на ны́ дви́жимый, моли́твою твое́ю от на́с отведи́, и спаси́тельную благода́ть его́ к на́м недосто́йным низведи́,– да та́ко и мы́ житие́ свое́ испра́вити потщи́мся, кре́пость земли́ на́шея па́ки обновля́ти начне́м, враго́в же ве́ры Христо́вы безбоя́зненно отража́ти сло́вом и житие́м возревну́ем, воспева́юще велегла́сно Бо́гу: Аллилу́иа.

И́кос 5.

Ви́девши тя́, кня́же Фео́доре, николи́же во бране́х побежда́ема, всегда́ же побежда́юща инове́рнии супоста́ты и ага́ряне еди́наго и́мене твоего́ устраша́хуся: мы́ же помина́юще, испо́лненное ве́ры му́жество твое́, си́це тя́, я́ко кня́зя и во́ина ублажа́ем:

Ра́дуйся, я́ко во бране́х не своея́ сла́вы иска́л еси́, но с еретики́ за зе́млю оте́ческую пра́лся еси́; ра́дуйся, пра́отеческия ве́ры ревни́телю и злоде́ем победоно́сный отмсти́телю.

Ра́дуйся, о бла́ге наро́да твоего́ усе́рдно пеки́йся; ра́дуйся, я́ко огражда́л еси́ лю́ди твоя́ от зловре́днаго с неве́рными обще́ния.

Ра́дуйся, от нападе́ния ага́рянских по́лчищ лю́ди своя́ охраня́л еси́; ра́дуйся, бусурма́нских ра́тей неодоли́мый победи́телю, и пле́нных свободи́телю.

Ра́дуйся, сего́ ра́ди пла́менную любо́вь от наро́да своего́ сниска́вый; ра́дуйся, сего́ ра́ди и све́тлый вене́ц, от Го́спода стяжа́вый.

Ра́дуйся, Фео́доре, Остро́жская похвало́ и моли́твенниче о на́с к Бо́гу тепле́йший.

Конда́к 6.

Я́коже пропове́дник правове́рия и стоя́ния за це́рковь Бо́жию и лю́ди своя́ на княже́нии свое́м пребы́л еси́, Фео́доре блаже́нне, си́це и во и́ночестве моли́твенным по́двигом, безмо́лвием, терпе́нием и те́ла своего́ разли́чным умертве́нием, удивля́л еси́ бра́тию, сего́ ра́ди стяжа́л еси́ сугу́бый вене́ц от Царя́ Христа́, Ему́же предстае́ши ны́не вопия́: Аллилу́иа.

И́кос 6.

Возсия́ красото́ю по́двигов и доброде́телей все́ житие́ твое́, Преподо́бне, поне́же на княже́нии вме́сто предлежа́щих тебе́ сла́достей сего́ земна́го жития́, претерпе́л еси́ кре́ст и лише́ния: в похо́дех проти́ву враго́в ве́ры пло́ть изнуря́яй и живо́т сво́й за дру́ги полага́ли, та́кожде и в мона́шестве, а́ки ра́б бра́тии угожда́яй и себе́ самаго́ смиря́яй. Помышля́юще сие́, си́це вопие́м Ти́:

Ра́дуйся, я́ко тобо́ю красоту́ благоче́стия позна́хом; ра́дуйся, я́ко тобо́ю суету́ мирску́ю в себе́ попра́хом.

Ра́дуйся, кре́ст лише́нный во́лею подъя́хом; ра́дуйся, я́ко кре́ст то́й носи́ти и на́м посо́бствуяй.

Ра́дуйся, Бо́жиих дарова́ний сокро́вище пребога́тое; ра́дуйся, христиа́н правосла́вных ро́г богоно́сный.

Ра́дуйся, доброде́тели и благоче́стия христиа́нскаго всеизря́дная похвало́; ра́дуйся, благи́й предста́телю и моли́твенниче о душа́х на́ших.

Ра́дуйся, Фео́доре, Остро́жская похвало́ и моли́твенниче о на́с к Бо́гу тепле́йший.

Конда́к 7.

Хотя́й кня́жеских услажде́ний и бога́тства тле́ннаго спе́шнее отрещи́ся, Бо́жиих же дарова́ний прии́скренне приобщи́тися, прия́л еси́, блаже́нне и́ноческий о́браз, в Не́мже смире́нным послуша́нием и безмо́лвным житие́м Царю́ Небе́сному благоугоди́л еси́. Те́мже и стяжа́л еси́ сугу́бый вене́ц от Царя́ Христа́, ему́же предстои́ши с пе́снию: Аллилу́иа.

И́кос 7.

Но́вый тру́д и но́вые по́двиги в пеще́рнем затво́ре восприя́л еси́, преподо́бне, егда́ во и́ночестве непреста́нныя моли́твы о тебе́, само́м и неве́жествиих наро́да твоего́ Влады́це Го́споду приноси́л еси́, да земно́е житие́ на́ше в тишине́ и благоче́стии пожи́вшее, сла́вы неги́бнущия насле́дницы бу́дем. Те́мже благода́рственно вопие́м ти́:

Ра́дуйся, пеще́рнаго по́двига трудолюби́вый ревни́телю; ра́дуйся, за́поведей Бо́жиих усе́рднейший исполни́телю.

Ра́дуйся, я́ко в те́сней и те́мней пеще́ре та́йно многоле́тне свя́то подвиза́лся еси́; ра́дуйся, я́ко у́зкими враты́ Ца́рствия Небе́снаго дости́гл еси́.

Ра́дуйся, моли́твы непреста́нное кади́ло; ра́дуйся, сле́з умиле́ния неистощи́мый кла́дезю.

Ра́дуйся, я́ко тобо́ю ди́вен Бо́г во святы́х свои́х явля́ется; ра́дуйся, мно́гое мно́жество муже́й и же́н, ю́ношей и де́в твоему́ подража́ти житию́ научи́вый.

Ра́дуйся, ди́вный о́браз по́двига твоего́ мно́гие неве́рные в и́стинней ве́ре утверди́вый.

Ра́дуйся, Фео́доре, Остро́жская похвало́ и моли́твенниче о на́с к Бо́гу тепле́йший.

Конда́к 8.

Стра́нное и вельми́ подви́жническое житие́ твое́ не то́кмо челове́ков на земли́, но и а́нгелов на небеси́ удиви́: ты́ бо, преподо́бне заключи́выйся в пеще́ре, а́ки в те́мном гро́бе, всеусе́рдно в теплоте́ се́рдца и души́ Еди́ному Бо́гу та́йно рабо́тал еси́, да та́, я́же во дни́ и в но́щи Созда́телю Твоему́ приноси́мая служе́ния неве́дома и незна́ема бу́дет ми́рови, ведо́ма же и зна́ема Еди́ному то́кмо Творцу́ явя́тся. Сего́ ра́ди и мы́ Бо́гу, та́ко тя́ научи́вшему и вразуми́вшему, при́сно пое́м: Аллилу́иа.

И́кос 8.

О́гнь любви́ Бо́жия в се́рдце свое́м возже́гши, Уго́дниче Бо́жий, ты́ кля́твенно обеща́лся еси́ ку́пно со свои́ми при́сными, в ве́ре правосла́вней оте́честей кре́пко и неизме́нно стоя́ти, николи́же и ника́коже о отступле́нии в инове́рие не мы́слити и от сего́ наро́да сво́й всеусе́рдно отвраща́ти: сего́ ра́ди и преде́л сво́й еще́ на две́сти ле́т вя́щшие по кончи́не твое́й от сете́й ерети́ческих огради́л еси́. Те́мже от полноты́ серде́чныя таково́е прино́сим ти́ почита́ние:

Ра́дуйся, я́сное зерца́ло апо́стольских преда́ний; ра́дуйся, живоприи́мный исто́чниче и́стинных кафоли́ческих пра́вил.

Ра́дуйся, ерети́ческих басносло́вий прему́дрый истреби́телю; ра́дуйся, глубины́ правосла́вных догма́тов иску́сный изме́рителю.

Ра́дуйся, ты́ и единокро́вное на́м пле́мя че́шское ко правосла́вной ве́ре приближа́ти тща́лся еси́; ра́дуйся, ты́ от лати́нскаго наше́ствия и́х огражда́л еси́.

Ра́дуйся, ве́ру свою́ оте́ческую во искуше́ниих до сме́рти сохрани́вый невреди́му; ра́дуйся, и на́с среди́ мра́ка неве́рия и нече́стия в правове́рие утверди́вый.

Ра́дуйся, Фео́доре, Остро́жская похвало́ и моли́твенниче о на́с к Бо́гу тепле́йший.

Конда́к 9.

Все́ю душе́ю возлюби́в Бо́га, ты́, о́тче преподо́бне, пропове́дник правосла́вныя ве́ры и благоче́стия чрез все́ житие́ твое́ во стране́ на́шей пребы́л еси́: сего́ ра́ди мо́лим тя́: я́звы ду́ш на́ших от вра́г ви́димых и неви́димых наложе́нныя исцели́, и от бе́д и обстоя́ний на́с огради́, а́ще и недосто́йных, но твоему́ предста́тельству ве́рующих те́пле, да и мы́ в покая́нии согла́сно вопие́м Бо́гу: Аллилу́иа.

И́кос 9.

Вети́и и провозве́стницы сла́вы твоея́ духо́вныя яви́шася по место́м, преподо́бне о́тче: Свята́я ла́вра Ки́евская, твое́ нетле́нное те́ло показу́ющи ве́рным, Остро́г гра́д, я́же ма́лую ча́сть твои́х нетле́нных моще́й прия́ти сподо́бивыйся, а́ки насле́дие княже́ния твоего́, и свята́я оби́тель Дерма́нская, я́же твои́ми доброде́тельми тщи́тся украси́тися. Вси́ же вку́пе, согла́сно воспева́юще терпе́ние твое́ и ве́ру, взыва́ют ти́ та́ко:

Ра́дуйся, от присночестна́го ро́да князе́й остро́жских ты́ еди́н стяжа́л еси́ высо́кое зва́ние чудотво́рца Пече́рскаго; ра́дуйся, во князе́х ратобо́рец и во и́ноцех усе́рдный моли́твенник яви́выйся.

Ра́дуйся, сего́ ра́ди и ли́к святы́х Пече́рских собо́ю умно́живый; ра́дуйся, гра́д сво́й Остро́г святы́нею свое́ю ознаменова́вый.

Ра́дуйся, те́ми зловре́дное безбо́жие и отсту́пства я́вно облича́яй; ра́дуйся, и на́с проща́ти враго́в свои́х науча́яй.

Ра́дуйся, и на́с в долготерпе́нии утвержда́яй; ра́дуйся, су́щих в разсе́янии сыно́в и дще́рей на́ших охрани́телю.

Ра́дуйся, ни́щих, сиро́т и вдови́ц от междоусо́бныя бра́ни яви́вшихся уте́шитель.

Ра́дуйся, Фео́доре, Остро́жская похвало́ и моли́твенниче о на́с к Бо́гу тепле́йший.

Конда́к 10.

Спасе́ния на́шего бу́ди ны́не при́сный хода́тай, Фео́доре преподо́бне, зане́ ви́диши зе́млю на́шу от нечести́вых уче́ний обурева́ему, зри́ши бо оскуде́ние любве́ на́шея от Христа́ предрече́нное и ду́ш челове́ческих разслабле́ние и пра́вде Бо́жией нераде́ние: сего́ ра́ди уми́льно тя́, су́щих в плене́нии, темни́цах и заточе́нии бра́тии на́ших, изря́днее же в гоне́ниих, от язы́к безбо́жных за ве́ру на́шу оте́ческую укрепи́, уте́ши и вско́ре изба́ву и́м испроси́, да в ра́довании серде́ц вопие́м о тебе́ Бо́гу: Аллилу́иа.

И́кос 10.

Стена́ и заступле́ние бу́ди на́м, преподо́бне о́тче, мо́щным твои́м хода́тайством, утоля́я гне́в Бо́жий, пра́ведно на ны́ дви́жимый, гре́х ра́ди на́ших: ве́мы бо ве́мы, я́ко малоду́шие на́ше и ле́ность духо́вная дале́че от твоея́ па́жити ны́ отрыва́ет и вся́каго омерзе́ния досто́йны ны́ соде́лывает, оба́че милосе́рдие твое́ ко враго́м твои́м помина́юще, и́мже па́ки защи́тник яви́лся еси́, ра́внаго милосе́рдия твоего́ и на́с сподо́би, да уми́льно вопие́м тебе́ си́це:

Ра́дуйся, злостра́ждущих от духо́в зло́бы ско́рый помо́щниче; ра́дуйся, притека́ющих к тебе́ с ве́рою от треволне́ний, страсте́й изба́вителю.

Ра́дуйся, во вражде́ су́щих ско́ро умиротворя́яй; ра́дуйся, чту́щим па́мять твою́ по́мощь подава́яй.

Ра́дуйся, ко Го́споду дерзнове́ние стяжа́вый; ра́дуйся, от Того́ благода́ть исцеле́ний прия́вый.

Ра́дуйся, ны́не пред Престо́лом Бо́жиим на Небеси́ о Це́ркви предста́телю; ра́дуйся, милосе́рдия Бо́жия к на́м хода́таю.

Ра́дуйся, слепо́тствующих в зако́не Госпо́днем пречу́дный руководи́телю; ра́дуйся, вруча́ющим себе́ твоему́ хода́тайству в ча́с сме́рти до́брый уте́шителю.

Ра́дуйся, Фео́доре, Остро́жская похвало́, и моли́твенниче о на́с к Бо́гу тепле́йший.

Конда́к 11.

Пе́ние на́ше похва́льно, от убо́жества и любве́ душе́вныя на́ми приноси́мое, не́сть дово́льно, уго́дниче Бо́жий, к похвале́нию пресла́вных подвиго́в и трудо́в твои́х, я́ко и́стиннаго слуги́ Бо́жия, но да не неблагода́рны яви́мся о твои́х благодея́ниих на на́с бы́вших, вопие́м просла́вльшему тя́, Го́споду: Аллилу́иа.

И́кос 11.

Свети́льник правосла́вный ве́ры бы́л еси́ во стране́ на́шей, преподо́бне о́тче, сло́вом, житие́м, ве́рою и чистото́ю; в ни́х же и на́с твои́ми моли́твами укрепи́, вся́кия же отсту́пства и безбо́жие дале́че отжени́, да вопие́м ти́ от полноты́ серде́чныя:

Ра́дуйся, Бо́жий избра́нниче; ра́дуйся, А́нгелов собесе́дниче.

Ра́дуйся, ре́вности о спасе́нии свое́м на́с науча́яй; ра́дуйся, служи́ти спасе́нию бли́жних науча́яй.

Ра́дуйся, Творцу́ Бо́гу твоему́ во вре́меннем житии́ до́бре угоди́вый; ра́дуйся, и ко исхо́ду от сея́ жи́зни до́бре себе́ угото́вавый.

Ра́дуйся, ра́бе Христо́в благи́й и ве́рный; ра́дуйся, вше́дый в ра́дость Го́спода своего́.

Ра́дуйся, нетле́нием моще́й твои́х о́браз воскреше́ния на́шего яви́вый; ра́дуйся, я́ко и́мя твое́ по все́й стране́ на́шей прославля́ется.

Ра́дуйся, страны́ на́шей кре́пкое огражде́ние; ра́дуйся, при́сное пред Бо́гом на́ше защище́ние.

Ра́дуйся, Фео́доре, Остро́жская похвало́ и моли́твенниче о на́с к Бо́гу тепле́йший.

Конда́к 12.

Благода́ть непреста́нныя моли́твы и о те́ле небреже́ние, ра́дости же духо́вныя и к бли́жним сострада́ние в житии́ твое́м оби́льно стяжа́л еси́ о́тче Фео́доре, те́мже мо́лим тя́, и на́с лени́вых и гре́шных твоея́ добро́ты прича́стники сотвори́ твои́м всемо́щным предста́тельством, да и мы́ сподо́бимся ку́пно с тобо́ю воспева́ти на небесе́х: Аллилу́иа.

И́кос 12.

Пою́ще, твоя́ ди́вные по́двиги и венча́вшаго тя́ Христа́ прославля́юще, покланя́емся моще́м твои́м честны́м и ико́ну твою́ облагода́тствованную лобыза́ем, и мо́лим тя́, о́тче блаже́нне: отврати́ от на́с находя́щий на ны́ бра́ни и страхова́ния бра́ней, от ле́сти ересе́й и неве́рия, да в ра́довании избавле́ния от па́губнаго безбо́жия вопие́м тебе́ си́це:

Ра́дуйся, Волы́нския земли́ похвало́ и благоче́стия пра́вило; ра́дуйся, я́ко отцы́ на́ши еще́ из дре́вле ко твоему́ заступле́нию навыко́ша притека́ти.

Ра́дуйся, вели́кий на́ш учи́телю братолю́бия и о́бразе Ева́нгельскаго жития́; ра́дуйся, я́ко све́том де́л твои́х просла́вися Оте́ц на́ш Небе́сный.

Ра́дуйся, я́ко сего́ ра́ди в Ра́йских оби́телях ны́не наслажда́ешися блаже́нства; ра́дуйся, я́ко та́мо боже́ственными луча́ми трисо́лнечнаго све́та осиява́ешися.

Ра́дуйся, и на́м прия́ти сию́ ра́дость и сла́ву непреста́нно хода́тайствуеши.

Ра́дуйся, Фео́доре, Остро́жская похвало́ и моли́твенниче о на́с к Бо́гу тепле́йший.

Конда́к 13.

О всеблаже́нне о́тче Фео́доре, правосла́вныя ве́ры вели́кий ревни́телю: ны́нешнее на́ше прии́меши пе́ние,– мо́лим тя́: бра́тию на́шу, отступи́вшую от ве́ры отце́в и в нече́стие впа́дшую све́том уче́ния Христо́ва просвети́ и ко свято́й апо́стольстей, собо́рней це́ркви возврати́, да та́ко вси́, в едине́нии серде́ц, вопие́м ку́пно с тобо́ю Всеблаго́му Бо́гу: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгельстии чи́ни возра́довашася, о всеце́лом премене́нии души́ твоея́, преподо́бне, где́ от по́двигов бра́нных к подвиго́м духо́вным прише́л еси́ разсу́дне, и ме́чь духо́вный подъе́м на враги́ неви́димый, си́лою Бо́жиею кре́пко сия́ побежда́ше, те́мже и на́с а́нгельския ре́вности испо́лни похва́льная воспева́ти тебе́ сицева́я:

Ра́дуйся, от свята́го креще́ния прия́вый и́мя Фео́дора, я́ко да́р Бо́жий и дая́ние е́же от Отца́ све́тов в страна́х оте́чествия твоего́ име́вый яви́тися; ра́дуйся, я́ко о тебе́ свы́ше явля́емую Бо́жию си́лу и заступле́ние небе́сное позна́хом.

Ра́дуйся, во и́ночестве Феодо́сием тя́ нареко́ша, я́ко в да́р Христу́ Бо́гу самаго́ себя́ прине́сл еси́ всеце́ло; ра́дуйся, я́ко из мла́да услы́шал еси́ вну́тренний гла́с призва́вшаго тя́ Го́спода.

Ра́дуйся, сла́ву княже́ния своего́ презре́в, во убо́гий о́браз после́дуя Христу́, на́с ра́ди обнища́вшему, обле́клся еси́; ра́дуйся, земли́ Волы́нския в правосла́вии утвержде́ние и украше́ние.

Ра́дуйся, плоды́ ве́ры Боже́ственныя и светоно́сныя от ко́рене равноапо́стольнаго Влади́мира в себе́ показа́л еси́ изря́дно; ра́дуйся, из де́тства во благоче́стии и смире́нии от роди́телей свои́х наста́вленный.

Ра́дуйся, от ю́ности Христа́ все́м се́рдцем и все́ю душе́ю возлюби́вый; ра́дуйся, все́ житие́ свое́ на служе́ние Бо́гу да́же до после́дняго издыха́ния преда́вый.

Ра́дуйся, Фео́доре, Остро́жская похвало́ и моли́твенниче о на́с к Бо́гу тепле́йший.

Конда́к 1.

Избра́нному и Ду́ха Свята́го испо́лненному уго́днику Бо́жиему, преподо́бному Фео́дору, кня́зю Остро́жскому, соста́вим похвалу́; я́ко вся́ земна́я Христа́ ра́ди презре́вшему; сла́ву же княже́ния в пеще́рное затворе́ние преложи́вшему: Ты́ же Свя́те, я́ко име́яй ве́лие дерзнове́ние ко Го́споду; моли́тву сотвори́ Христу́ Бо́гу; во е́же за ве́ру стоя́ти на́м безстра́шно и о спасе́нии свое́м попече́ние име́ти непреста́нно; да в сле́зном умиле́нии зове́м ти́:

Ра́дуйся, Фео́доре, Остро́жская Похвало́ и моли́твенниче о на́с Бо́гу тепле́йший.

Моли́тва.

Во́инствование земно́е на духо́вную бра́нь преложи́вый и о лю́дех свои́х до́брое попече́ние показа́вый, блаже́нне Фео́доре преподо́бне! К тебе́ в смяте́нии серде́ц на́ших прибега́ем и твоея́ по́мощи стране́ на́шей и душа́м на́шим смире́нно проси́ти дерза́ем. Ве́мы, уго́дниче Бо́жий, я́ко малоду́шие на́ше и ле́ность духо́вная дале́че от твоея́ па́жити ны́ отрева́ет и вся́каго омерзе́ния досто́йны ны́ соде́ловает: но милосе́рдие твое́ ко враго́м и преда́телем свои́м помина́юще, и́мже па́ки защи́тник яви́лся еси́, ра́внаго милосе́рдия твоего́ и на́м недосто́йным мо́лим. Ты́ у́бо уго́дниче Христо́в, от ага́рян разоре́нную зе́млю на́шу и от инове́рных подавля́ему, жа́лостию и любо́вию объе́мля, па́ки к бо́дренному житию́ ве́рныя призва́л еси́, ели́ко во́инскими побе́дами, толи́ко и моли́твою, и о́бразом жития́ своего́ а́ки све́щник златы́й блиста́яся; ты́ мирска́го жития́ суету́ оста́вль са́м у́бо о души́ свое́й попече́нию в пеще́рнем уедине́нии преда́лся еси́, земли́ же на́шея попече́ние и исцеле́ние сла́вному ро́ду твоему́ запове́дал еси́, и та́ко преде́л сво́й еще́ на две́сти ле́т и вя́щше по кончи́не твое́й от сете́й ерети́ческих огради́л еси́. Ты́ и дале́че су́щее единокро́вное на́м пле́мя че́шское ко правосла́вней ве́ре приближа́ти тща́лся еси́ и от лати́нскаго наше́ствия огражда́л еси́. Ты́ и ны́не на небесе́х душе́ю со а́нгелы водворя́яся, нетле́нным же те́лом посреде́ на́с почива́яй, на́ших не отри́ни гла́сы ско́рбныя, но моли́твенный пла́ч согреша́ющих сыно́в земли́ на́шея услы́ши. Согреши́хом бо непра́вдовахом и от заве́т Бо́жиих отступи́хом, в развраще́нныя обы́чаи зле́ впадо́хом и е́же еди́но на потре́бу е́сть, ду́ш на́ших спасе́ние в небреже́нии оста́вихом, тебе́ в Бо́зе пра́вда и сла́ва о́тче преподо́бне, на́м же стыде́ние лица́. О́ва ели́ко гре́шнейшии яви́хомся толи́ко вя́щшаго сострада́ния твоего́ тре́буем и в покая́нии зове́м ти́ си́це: твоея́ неистощи́мыя любве́ лу́ч на́м ниспосли́, гне́в Бо́жий, пра́ведно на ны́ дви́жимый, моли́твою твое́ю от на́с отведи́, спаси́тельную благода́ть Его́ к на́м недосто́йным предста́тельством твои́м низведи́ и от грехо́вныя бе́здны к высоте́ покая́ния на́с возведи́, да та́ко и мы́ житие́ свое́ испра́вити потщи́мся, кре́пость земли́ на́шея па́ки обновля́ти начне́м, враго́в же ве́ры Христо́вы и злы́х преле́стников безбоя́зненно отража́ти сло́вом и житие́м возревну́ем и Спаси́теля на́шего со все́ми святы́ми благода́рно воспева́ти бу́дем, сла́вяще Его́ со Отце́м и Святы́м Ду́хом, во ве́ки веко́в. Ами́нь.

Моли́тва ина́я.

О преподо́бне о́тче Фео́доре, земли́ Волы́нския похвало́ и прибе́жище, святы́я же ла́вры Пече́рския сла́во и украше́ние! При́зри на предстоя́щия лю́ди, твоея́ по́мощи с ве́рою прося́щия и согреше́ния своя́ тебе́ испове́дающия, приими́ те́х усе́рдныя моли́твы и от вся́кия ско́рби и ну́жды предста́тельством твои́м изба́ви. Помози́ на́м, уго́дниче Бо́жий, в ми́ре и покая́нии житие́ на́ша зде́ прово́дите, во благополу́чии па́мятование о за́поведех Бо́жиих всеми́рно храни́ти, в беда́х же от ро́пота и уны́ния огражда́тися, оба́че и по́мыслом лу́чшим сердца́ на́ша испо́лни, да твоего́ благоутро́бия и я́же о ве́ре ре́вности подража́тели бы́вше, о́ных сподо́бимся ве́чных бла́г, и́миже дне́сь украша́яся, моли́твы о спасе́нии на́шем возно́сиши ко Го́споду, Ему́же сла́ва подоба́ет Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.