Конда́к 1.

Возбра́нный чудотво́рче и изря́дный уго́дниче Христо́в, все́м с ве́рою приходя́щим источа́яй многоцеле́бныя да́ры, похва́льная воспису́ем ти́, творя́щии всечестну́ю па́мять твою́, ты́ же, я́ко име́я дерзнове́ние ко Го́споду, моли́ спасти́ся душа́м на́шим, да зове́м ти́:

Ра́дуйся, Феодо́сие, вели́кий чудотво́рче.

И́кос 1.

А́нгельское твое́ во пло́ти житие́ прови́дев всея́ тва́ри Созда́тель, от ю́ности угото́ва тя́ в жили́ще Себе́, Его́ же тя́ обита́лищем бы́ти уве́девше, похва́льная воспису́ем ти́:

Ра́дуйся, благочести́вых роди́телей благоприя́тное испроше́ние; ра́дуйся, от благочести́ваго ко́рене о́трасле святе́йшая.

Ра́дуйся, от ю́ности твоея́ Бо́гу послужи́вый; ра́дуйся, воздержа́нием а́нгелов удиви́вый.

Ра́дуйся, в моли́твах те́плый предста́телю; ра́дуйся, скорбя́щих сла́дкое утеше́ние.

Ра́дуйся, прося́щим ско́рый помо́щниче; ра́дуйся, боля́щим ско́рый и безме́здный врачу́.

Ра́дуйся, земны́й а́нгеле; ра́дуйся, небе́сный челове́че.

Ра́дуйся, сосу́де избра́нный Ду́ха Свята́го; ра́дуйся, теле́с на́ших здра́вия и ду́ш спасе́ния хода́тае.

Ра́дуйся, Феодо́сие, вели́кий чудотво́рче.

Конда́к 2.

Ви́дя тщету́ мирски́х попече́ний, блаже́нне Феодо́сие, жи́знь твою́ не ми́рови, но Бо́гу посвяти́л еси́, сего́ ра́ди оста́вил до́м роди́телей твои́х, водвори́лся еси́ с рабо́тающими Бо́гу во и́ноческом житии́, во е́же непреста́нно и благоприя́тно вопи́ти Ему́: Аллилу́иа.

И́кос 2.

Ра́зум плотско́му челове́ку неразуме́нный от ю́ности твоея́ стяжа́вый, преподо́бне о́тче Феодо́сие, го́рняя му́дрствовал еси́, а не земна́я, те́мже взыва́ем ти́:

Ра́дуйся, му́дрости небе́сныя жили́ще; ра́дуйся, терпе́ния адама́нте.

Ра́дуйся, братолю́бия зерца́ло; ра́дуйся, и́ноков пра́вило.

Ра́дуйся, на скрижа́ли се́рдца твоего́ зако́н Бо́жий написа́вый; ра́дуйся, са́м себе́ и ве́сь живо́т тво́й Христу́ Бо́гу преда́вый.

Ра́дуйся, у́м тво́й к небеси́ впери́вый; ра́дуйся, стра́х Бо́жий в се́рдце твое́м до конца́ сохрани́вый.

Ра́дуйся, вме́сто тле́нных нетле́нная стяжа́вый; ра́дуйся, го́рдость мирску́ю попра́вый.

Ра́дуйся, Ду́хом Святы́м науче́нный; ра́дуйся, некни́жный па́че кни́жных просвеще́нный.

Ра́дуйся, Феодо́сие, вели́кий чудотво́рче.

Конда́к 3.

Си́ла Вы́шняго осени́ твое́ се́рдце, преподо́бне о́тче Феодо́сие, я́ко тебе́, в Спаси́телевой оби́тели Бо́га ра́ди неусы́пно потруди́вшася, и к чудотво́рней ра́це преподо́бнаго Дими́трия неле́ностно прибега́вша, яви́ соуча́стника святы́ни его́, с ни́м же и ны́не водворя́ешися в го́рней оби́тели, ди́вному во святы́х Свои́х Бо́гу всегда́ вопия́: Аллилу́иа.

И́кос 3.

Иму́ще тя́, о́тче Феодо́сие, преподо́бный Дими́трий Прилу́цкий, па́че про́чих избра́нна и любе́зна, предугото́ва тя́ к вя́щшим по́двигом спаси́тельным, егда́ от междоусо́бия росси́йских вельмо́ж, и от каза́нских тата́р и череми́с, мно́гия ско́рби, иму́щия бы́ти предрече́, та́же побе́ду над о́ными и коне́чное разоре́ние ца́рства Каза́нскаго провозвести́, да и ты́ с ни́м предста́неши ко Го́споду с те́плым свои́м предста́тельством. Мы́ же, ве́дуще вся́ сбы́вшаяся, и уразуме́вше тя́ кре́пка моли́твенника о душа́х на́ших, вопие́м ти́:

Ра́дуйся, во пло́ти удосто́енный собесе́дования со святы́м Дими́трием; ра́дуйся, вели́кий благоче́стия сто́лпе.

Ра́дуйся, зерца́ло соверше́ннаго терпе́ния; ра́дуйся, миролю́бцев обличи́телю.

Ра́дуйся, сластолю́бцев наказа́телю; ра́дуйся, вражде́бных испра́вителю.

Ра́дуйся, малоду́шных уте́шителю; ра́дуйся, к воздержа́нию путеводи́телю.

Ра́дуйся, тре́звеннаго жития́ наста́вниче; ра́дуйся, во уны́нии закоснева́ющих испра́вителю.

Ра́дуйся, мно́гих ко Го́споду обрати́вый; ра́дуйся, ко́зни лука́ваго победи́вый.

Ра́дуйся, Феодо́сие, вели́кий чудотво́рче.

Конда́к 4.

Бу́ря я́рости и зве́рство безбо́жных, мно́гих бра́тии твоея́ зле́ исторга́я жи́знь при очесе́х твои́х, ве́лия причини́ тебе́ ско́рби и тесноту́. Оба́че ты́, я́ко до́блий во́ин Христо́в, му́жественно моли́твою себе́ вооружа́я, под уда́рами зло́бы не измени́лся еси́, всегда́ вопия́ Бо́гу: Аллилу́иа.

И́кос 4.

Слы́ша игу́мен от бра́тии твое́ терпеливоду́шное в безмо́лвии житие́, преблаже́нне, по расхище́нии пога́ными, а́ще и не хотя́ща отлучи́тися святы́я оби́тели, восхоте́ посла́ти тя́ во гра́д То́тьму на строе́ние солена́го варе́ния. Ты́ же, апо́стольскими стопа́ми послуша́ния ра́ди ше́ствовав, пу́ть тво́й до́бре соверши́л еси́, сего́ ра́ди срета́ем тя́ приве́тствии си́ми:

Ра́дуйся, и́го Христо́во и бре́мя Его́ понесы́й измла́да; ра́дуйся, не обрати́выйся вспя́ть в ше́ствии до го́рняго гра́да.

Ра́дуйся, во умерщвле́нии страсте́й до́бре подвиза́выйся; ра́дуйся, в духо́вном му́жестве с дре́вними отца́ми сравне́нный.

Ра́дуйся, моли́твами твои́ми ди́вная сотвори́вый; ра́дуйся, госпо́дствию ду́ха пло́ть покори́вый.

Ра́дуйся, ми́ром небе́сным приосене́нный; ра́дуйся, долготерпе́ния иску́с стяжа́вый.

Ра́дуйся, земна́я мудрова́ния презре́вый; ра́дуйся, еди́наго Го́спода вседу́шно поиска́вый.

Ра́дуйся, невре́дно сохрани́вый целому́дрие; ра́дуйся, я́ко ве́рный ра́б пред Го́сподем во вся́ дни́ благоче́стно ше́ствовавый.

Ра́дуйся, Феодо́сие, вели́кий чудотво́рче.

Конда́к 5.

Боготе́чная звезда́ яви́лся еси́ во стране́ То́темской, всеблаже́нне, на пу́ть спаси́тельный к ве́чному небе́сному оте́честву веду́щая, егда́ приме́ром ве́рных ду́ши назида́я, научи́л еси́ я́ благода́рно пе́ти Бо́гу: Аллилу́иа.

И́кос 5.

Ви́девый, преподо́бне о́тче, в ва́рницах со́ли о́гненный жа́р ве́лий, мы́сленно представля́л еси́ себе́ жесто́кость огня́ в гряду́щем ве́це, на гре́шников нераска́янных угото́ваннаго, и внегда́ пребыва́л при варе́нии пи́щныя со́ли, име́я служа́щия лю́ди, я́ко при́сныя себе́ ча́да, всегда́ внуша́л еси́ и́м стра́х Бо́жий, растворя́я со́лию сло́ва Бо́жия, са́м же на бо́льшия по́двиги в доброде́тели поуча́лся еси́, те́мже вопие́м ти́:

Ра́дуйся, о́бразе кро́тости духо́вныя; ра́дуйся, умертви́вый пло́ть твою́ посто́м и бде́нием.

Ра́дуйся, умертви́вый язы́к тво́й на глаго́лание тщеты́; ра́дуйся, умертви́вый у́ши твои́ на слы́шание глаго́л душевре́дных.

Ра́дуйся, умертви́вый ру́це на грабле́ние и творе́ние зла́; ра́дуйся, умертви́вый чре́во на объяде́ние и пия́нство.

Ра́дуйся, труда́ми ме́ртва соде́лавый чресла́ своя́ на нечистоту́; ра́дуйся, умертви́вый но́зе к тече́нию на сове́т нечести́вых.

Ра́дуйся, на ка́мени Христо́вою ве́рою утвержде́нный; ра́дуйся, Бо́жиим свиде́тельством возвы́шенный.

Ра́дуйся, не пре́нием, но ве́рою возмога́ти научи́вый; ра́дуйся, некни́жный, мно́гих кни́жных посрами́вый.

Ра́дуйся, Феодо́сие, вели́кий чудотво́рче.

Конда́к 6.

Пропове́дник немо́лчный яви́лся еси́ все́м зря́щим тя́, преподо́бне, прему́дрости ева́нгельския, всегда́шния чистоты́ и му́жественнаго терпе́ния, а́ще и в безмо́лвии храни́л еси́ в се́рдце твое́м сокро́вище ве́ры, наде́жды и любви́, и воспева́л еси́ Бо́гу: Аллилу́иа.

И́кос 6.

Возсия́ богохрани́мой души́ твое́й и́стинный богове́дения све́т, егда́ на́чал еси́ помышля́ти о созда́нии но́выя оби́тели при гра́де То́тьме, и всели́тися ту́, зна́менуя те́м Бо́жие лю́дем благослове́ние, а о благоде́нственной и́х жи́зни могу́щественное к Бо́гу предста́тельство. Мы́ же, ви́девше твое́, преподо́бне, не то́чию о себе́, а па́че о спасе́нии бли́жних попече́ние, воспева́ем тя́ си́це:

Ра́дуйся, сро́дники по пло́ти Христа́ ра́ди оста́вивый; ра́дуйся, всю́ наде́жду на Него́ возложи́вый.

Ра́дуйся, любве́ нелицеме́рныя храни́телю; ра́дуйся, служи́телю Бо́жий, о ве́рных Бо́га умоля́яй.

Ра́дуйся, наста́вниче гре́шных, к небе́сным направля́яй; ра́дуйся, и сло́вом и житие́м поуча́яй.

Ра́дуйся, о́бразе а́гнцем и па́стырем; ра́дуйся, блаже́нныя ве́чности иска́телю.

Ра́дуйся, непостижи́мыя сла́вы святы́х созерца́телю; ра́дуйся, струе́ напая́ющая благоче́стием Це́рковь.

Ра́дуйся, свети́льниче, непреста́нным богомы́слием сия́ющий; ра́дуйся, све́щниче, любо́вию к Бо́гу и к бли́жнему светя́щий.

Ра́дуйся, Феодо́сие, вели́кий чудотво́рче.

Конда́к 7.

Хотя́ обеща́нное Бо́гу испо́лнити, прия́л еси́ пу́ть ко игу́мену и бра́тии, они́ же, и не хотя́ще разлучи́тися с тобо́ю, с че́стию из оби́тели тя́ проводи́ша. Ше́д у́бо в пу́ть сво́й, ра́дуяся, егда́ дости́гл еси́ ме́ста к сооруже́нию оби́тели, назнача́емаго на бре́гу Ко́вды реки́, водрузи́в кре́ст, Бо́гу с ра́достными слеза́ми возопи́л еси́: Аллилу́иа.

И́кос 7.

Но́выя ра́дости и благодаре́ния Бо́гу излия́л еси́ сле́зы, преподо́бне о́тче, егда́ преше́д реку́ и возше́д на го́ру, поста́вил еси́ ку́щу и водрузи́в кре́ст на ме́сте, назнача́емом для сооруже́ния хра́ма, с коленопреклоне́нием и со слеза́ми моля́ся, ре́кл еси́: «благослове́н Бо́г, И́же показа́ ми́ ме́сто, иде́же вселю́ся в ве́к ве́ка». Сего́ ра́ди вопие́м ти́:

Ра́дуйся, от горы́ сея́ возше́дый на го́ру Небе́сную; ра́дуйся, дре́вним общежи́тия нача́льником уподо́бивыйся.

Ра́дуйся, и́стинный Бо́гу покло́нниче; ра́дуйся, вели́кий Ему́ уго́дниче.

Ра́дуйся, де́лателю виногра́да Христо́ва неле́ностный; ра́дуйся, благи́й и ве́рный Его́ ра́бе.

Ра́дуйся, да́нный ти́ тала́нт благоче́стия возрасти́вый; ра́дуйся, в ма́ле бы́в ве́рен, над мно́гими ны́не поста́вленный.

Ра́дуйся, го́рлице пустыннолюби́вая; ра́дуйся, дре́во, посреде́ происходя́щих во́д насажде́нное.

Ра́дуйся, гряду́щая, я́ко настоя́щая, предсказа́вый; ра́дуйся, душе́вныма очи́ма вы́ну Го́спода созерца́яй.

Ра́дуйся, Феодо́сие, вели́кий чудотво́рче.

Конда́к 8.

Стра́нно бе́ ви́дети, ка́ко убо́гий ста́рец еди́н обита́ет в пусты́ни на горе́, презира́я ви́димых и неви́димых враго́в, возлю́бленный же и́м гра́д оби́тель тому́ устро́ити и святы́нею обогати́тися тщи́тся. Мы́ же, очи́ма на́шима вся́ по во́ли от Бо́га соверша́емая зря́ще, благода́рно Ему́ вопие́м: Аллилу́иа.

И́кос 8.

Ве́сь, пречу́дный Феодо́сие, душе́ю и те́лом посвяти́л еси́ себе́ Бо́гу, пребыва́я в непреста́нных труде́х, моли́твах, посте́х и бде́ниих, е́же ви́девше окре́стнии лю́дие, кро́тости и терпе́нию твоему́ удивля́ющеся, нача́ша служи́ти потре́бными к построе́нию святы́я оби́тели. О чесо́м хода́тайствовати трудолю́бно поте́кл еси́ во гра́д ца́рствующий ко вели́кому кня́зю. Мы́ же по́двиги твоя́ восхваля́ем си́це:

Ра́дуйся, соверше́нный в доброде́телех челове́че; ра́дуйся, лени́вых подви́гнувый твои́ми нра́вы.

Ра́дуйся, кро́тости навы́кнувый от А́гнца, взе́млющаго грехи́ ми́ра; ра́дуйся, за по́двиги получи́вый ве́чная блага́я.

Ра́дуйся, щито́м ве́ры стре́лы лука́ваго разжже́нныя угаси́вый; ра́дуйся, моли́твою и посто́м главу́ ему́ сокруши́вый.

Ра́дуйся, предводи́телю до́брый в пути́ спасе́ния; ра́дуйся, преспева́вый доброде́тельми и труды́.

Ра́дуйся, умерщвле́нием страсте́й ми́ру уме́рый; ра́дуйся, возде́лыванием доброде́тели живы́й Бо́гови.

Ра́дуйся, себе́ самаго́, я́ко ю́нца в же́ртву Бо́гу посвяти́вый; ра́дуйся, свети́льниче, еле́ем благода́ти кипя́щий.

Ра́дуйся, Феодо́сие, вели́кий чудотво́рче.

Конда́к 9.

Вся́кое естество́ а́нгельское удиви́ся твои́м по́двигом и христоподража́тельному житию́ твоему́: почита́ху бо тя́ и на земли́ во вре́мя трудо́в твои́х жи́вшии, не я́ко про́ста челове́ка, но я́ко а́нгела Бо́жия посреде́ и́х светя́щася, и прему́дростию уче́ния в доброде́тели все́х превосходя́ща. Мы́ же прославля́ющемуся чрез тебе́ Бо́гу взыва́ем: Аллилу́иа.

И́кос 9.

Вити́йство челове́ческое твое́ о Христе́ му́жество, всеблаже́нне, изрещи́ не мо́жет, я́ко преуспева́я во бде́ниих и поще́ниих, вери́гами тя́жкими и власяни́цею обле́клся еси́, претерпева́я боле́зни любве́ ра́ди Бо́жия, пло́ть твою́ ду́хови порабо́тил еси́. Сего́ ра́ди вопие́м ти́:

Ра́дуйся, алка́я и жажда́я пра́вды, ны́не насыща́ешися; ра́дуйся, в послуша́ние Бо́гу Отцу́ себе́ отда́вый.

Ра́дуйся, нището́ю твое́ю Бо́гу Сы́ну подража́вый; ра́дуйся, чистоту́ твою́ Бо́гу Ду́ху сохрани́вый.

Ра́дуйся, во пло́ти а́нгельски пожи́вый; ра́дуйся, во́ине Христо́в непобеди́мый.

Ра́дуйся, ку́плями жите́йскими не обяза́выйся, да Воево́де уго́ден бу́деши; ра́дуйся, не восхоте́вый двема́ господи́нома рабо́тати.

Ра́дуйся, от ю́ности на пло́ть, ми́р и диа́вола вооружи́выйся; ра́дуйся, си́х враго́в сла́вно победи́вый.

Ра́дуйся, оте́ц по ду́ху чадолюби́вый; ра́дуйся, оби́тель ди́вну насади́вый.

Ра́дуйся, Феодо́сие, вели́кий чудотво́рче.

Конда́к 10.

Спасти́ хотя́ ду́шу твою́, сла́вы мирски́я всеме́рно бе́гал еси́, и егда́ окре́стнии наро́ди нача́ша тя́ я́ко ве́лия о Христе́ подви́жника почита́ти, ты́ во гра́де пред все́ми я́вно сла́дкими пита́лся еси́, и от безу́мных люде́й укоре́ния и бие́ния с ра́достию претерпева́л еси́, Бо́гу я́ко в тимпа́не во умерщвле́нии телесе́ непреста́нно вопия́: Аллилу́иа.

И́кос 10.

Стена́, огражда́ющая от все́х прило́гов диа́вольских, бы́л еси́ бра́тии, па́че по кончи́не твое́й, в не́й же о прославле́нии оби́тели и заступле́нии тре́бующих твои́х моли́тв предре́кл еси́. Ны́не у́бо, предрече́нию исполня́емая зря́ще, благода́рно вопие́м ти́:

Ра́дуйся, ду́шу свою́ за челове́ки положи́вый; ра́дуйся, от оби́тели земны́я в небе́сную пресели́выйся.

Ра́дуйся, душе́ю та́мо, те́лом же зде́ пребыва́яй; ра́дуйся, от моще́й твои́х неду́гов целе́ния источа́яй.

Ра́дуйся, в вели́ких по́двизех тече́ние соверши́вый; ра́дуйся, розго́ мно́г пло́д о Христе́ сотво́ршая.

Ра́дуйся, гро́зде ви́нный, пита́ющий и веселя́щий на́с; ра́дуйся, омраче́нныя просвети́вый.

Ра́дуйся, просвеще́нныя утверди́вый; ра́дуйся, отра́до к тебе́ прибега́ющим.

Ра́дуйся, Росси́и на сопроти́вныя побе́ду содева́ющий; ра́дуйся, все́м правове́рным проше́ния исполня́ющий.

Ра́дуйся, Феодо́сие, вели́кий чудотво́рче.

Конда́к 11.

Пе́ние немо́лчное принося́ Святе́й Тро́ице о сохране́нии и укрепле́нии Всеросси́йскаго госуда́рства, все́й держа́ве Росси́йстей от си́лы в си́лу приходя́щей моли́ спасти́ся, да с ра́достию вопие́м Бо́гу: Аллилу́иа.

И́кос 11.

Светоза́рный свети́льник яви́лся еси́, егда́ моще́й твои́х просвети́лся еси́ нетле́нием, источа́я све́т благода́ти Бо́жия целе́бными да́ры твои́ми. Сего́ ра́ди мы́, я́ко ча́да Це́ркве Христо́вы стека́ющеся, благода́рственная принося́ще Бо́гу, вопие́м к тебе́:

Ра́дуйся, преиспо́лненный вся́кия благосты́ни; ра́дуйся, ми́лости превели́кия сокро́вище.

Ра́дуйся, промышле́ния о лю́дех прия́телище; ра́дуйся, кри́не ра́йскаго селе́ния.

Ра́дуйся, ми́ро Христо́ва благоуха́ния; ра́дуйся, дре́во чудото́чное рая́ Иису́сова.

Ра́дуйся, ча́ше, излива́ющая то́ки милосе́рдия Бо́жия; ра́дуйся, чуде́с пучи́но, свы́ше излия́нная.

Ра́дуйся, и́ноков удобре́ние; ра́дуйся, всея́ Росси́и укрепле́ние.

Ра́дуйся, То́темская похвало́; ра́дуйся, все́х смиренному́дрствующих сла́во.

Ра́дуйся, Феодо́сие, вели́кий чудотво́рче.

Конда́к 12.

Благода́ть цельбы́ стяжа́вшаго, преподо́бнаго Феодо́сия почти́м се́рдцем и усты́, и да вя́щшую воздади́м по́честь святы́м его́ моща́м, потщи́мся всеме́рно подража́ти ве́ре его́, всегда́ вопию́ще прославля́ющему святы́х Свои́х Бо́гу: Аллилу́иа.

И́кос 12.

Пою́ще твое́, свя́те Феодо́сие, те́плое предста́тельство, от враго́в ви́димых и неви́димых ско́рое заступле́ние, призыва́юще тя́ уми́льно про́сим, не возгнуша́йся на́с, гре́шных, но услы́ши вопию́щих к тебе́:

Ра́дуйся, вся́кий неду́г теле́сный и душе́вный врачу́ющий; ра́дуйся, в невече́рнем дни́ Ца́рствия Бо́жия приснопочива́ющий.

Ра́дуйся, злы́х по́мыслов прогони́телю; ра́дуйся, бесну́емых ско́рый цели́телю.

Ра́дуйся, закоснева́ющих гре́шников исправле́ние; ра́дуйся, немо́лчный наста́вниче.

Ра́дуйся, ломо́тныя и опу́хольныя боле́зни уврачева́вый; ра́дуйся, тряса́вичныя и огне́вичныя неду́ги отгна́вый.

Ра́дуйся, слепы́м прозре́ние дарова́вый; ра́дуйся, хромы́м и разсла́бленным хожде́ние исправля́яй.

Ра́дуйся, в Бо́зе на́м потре́бная созерца́ющий; ра́дуйся, мно́гим проше́ния предваря́ющий.

Ра́дуйся, Феодо́сие, вели́кий чудотво́рче.

Конда́к 13.

О, вели́кий чудотво́рче Феодо́сие! Моле́ние на́ше прие́м, умоли́ подвигополо́жника Иису́са, да изба́вит ца́рствующия гра́ды и вся́кий гра́д и страну́ христиа́нскую от нахожде́ния иноплеме́нных, от ересе́й и раско́лов, от боле́зней и грехо́в, и от вся́кия напа́сти, да с тобо́ю в селе́нии пра́ведных сподо́бимся пе́ти Триипоста́сному Бо́гу: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгельское твое́ во пло́ти житие́ прови́дев всея́ тва́ри Созда́тель, от ю́ности угото́ва тя́ в жили́ще Себе́, Его́ же тя́ обита́лищем бы́ти уве́девше, похва́льная воспису́ем ти́:

Ра́дуйся, благочести́вых роди́телей благоприя́тное испроше́ние; ра́дуйся, от благочести́ваго ко́рене о́трасле святе́йшая.

Ра́дуйся, от ю́ности твоея́ Бо́гу послужи́вый; ра́дуйся, воздержа́нием а́нгелов удиви́вый.

Ра́дуйся, в моли́твах те́плый предста́телю; ра́дуйся, скорбя́щих сла́дкое утеше́ние.

Ра́дуйся, прося́щим ско́рый помо́щниче; ра́дуйся, боля́щим ско́рый и безме́здный врачу́.

Ра́дуйся, земны́й а́нгеле; ра́дуйся, небе́сный челове́че.

Ра́дуйся, сосу́де избра́нный Ду́ха Свята́го; ра́дуйся, теле́с на́ших здра́вия и ду́ш спасе́ния хода́тае.

Ра́дуйся, Феодо́сие, вели́кий чудотво́рче.

Конда́к 1.

Возбра́нный чудотво́рче и изря́дный уго́дниче Христо́в, все́м с ве́рою приходя́щим источа́яй многоцеле́бныя да́ры, похва́льная воспису́ем ти́, творя́щии всечестну́ю па́мять твою́, ты́ же, я́ко име́я дерзнове́ние ко Го́споду, моли́ спасти́ся душа́м на́шим, да зове́м ти́:

Ра́дуйся, Феодо́сие, вели́кий чудотво́рче.

Моли́тва.

О, до́брый на́ш па́стырю и богому́дрый наста́вниче, преподо́бне о́тче Феодо́сие! Услы́ши на́с, гре́шных, моля́щихся тебе́, и призыва́ющих в по́мощь ско́рое предста́тельство твое́: ви́ждь на́с, гре́шных, в толи́цех обстоя́ниих су́щих, ви́ждь на́с, немощны́х, отвсю́ду уловля́емых, вся́каго бла́га лише́нных и умо́м от малоду́шия помраче́нных. Потщи́ся, уго́дниче Бо́жий, не оста́вити на́с в грехо́вном плену́ бы́ти, да не бу́дем в ра́дость враго́м на́шим, и не у́мрем в лука́вых дея́ниих на́ших. Моли́ о на́с, недосто́йных, Спа́са Го́спода, Ему́ же ты́ со безпло́тными ли́ки предстои́ши. Ми́лостива к на́м сотвори́ Соде́теля на́шего в ны́нешнем ве́це и в бу́дущем, да не возда́ст на́м по дело́м на́шим, и по нечистоте́ серде́ц на́ших, но по Свое́й бла́гости возда́ст на́м. На твое́ бо хода́тайство упова́юще, твои́м предста́тельством хва́лимся, твое́ заступле́ние на по́мощь призыва́ем и к цельбоно́сному гро́бу твоему́ припа́дающе, недосто́йнии, исцеле́ния про́сим: изба́ви на́с, уго́дниче Христо́в, от злы́х находя́щих на на́с, и укроти́ во́лны страсте́й и бе́д востаю́щих на на́с, да ра́ди святы́х твои́х моли́тв не объи́мет на́с напа́сть, и не погря́знем в пучи́не грехо́вней и в ти́не страсте́й на́ших. Моли́, преподо́бне о́тче Феодо́сие, Христа́ Бо́га на́шего, да пода́ст на́м ми́рное жи́тельство, оставле́ние грехо́в, душа́м на́шим спасе́ние и ве́лию ми́лость. Ами́нь.