Конда́к 1.
Взбра́нному Воево́де и Го́споду Иису́су после́дствуя, моли́твою, посто́м и труды́ плотски́я стра́сти победи́л еси́: те́мже, я́ко до́бр во́ин, увенча́лся еси́ от Царя́ Христа́, Его́же непреста́й те́пле моли́ти о на́с, рабе́х твои́х, преподо́бне, да тобо́ю изба́вльшеся от бе́д, при́сно пое́м ти́:
Ра́дуйся, Ферапо́нте, уго́дниче Христо́в и чудотво́рче.
И́кос 1.
От младе́нчества твоего́ и да́же до престаре́ния, те́лом и душе́ю рабо́тал еси́ Го́споду Иису́су Христу́ и Пречи́стей Его́ Ма́тери, и се́ ны́не душа́ твоя́ ликовству́ет в Его́ небе́сных оби́телех, те́ло же твое́ зде́ почива́я, сия́ет чудесы́. Сего́ ра́ди вопие́м ти́ ра́достно:
Ра́дуйся, во сле́д Христа́ неукло́нно ше́дый; ра́дуйся, сло́во Его́ соблюда́вый тве́рдо.
Ра́дуйся, во сла́ву Христа́ Бо́га подвиза́выйся; ра́дуйся, Пречи́стую Христа́ Ма́терь неумо́лчно сла́вивый.
Ра́дуйся, от Христа́ и Ма́тери Его́ просла́вленный; ра́дуйся, имы́й дерзнове́ние ве́лие ко Христу́.
Ра́дуйся, защи́тниче оби́тели Лу́жецкия; ра́дуйся, храни́телю страны́ Можа́йския.
Ра́дуйся, побо́рниче кре́пкий за держа́ву Росси́йскую; ра́дуйся, добропобе́дный во́ине Правосла́вныя Це́ркве.
Ра́дуйся, все́м призыва́ющым тя́ подаю́щий ско́рую по́мощь от Христа́ Бо́га.
Ра́дуйся, Ферапо́нте, уго́дниче Христо́в и чудотво́рче.
Конда́к 2.
Пребыва́я в жите́йстей молве́, не услади́лся еси́ благи́ми, ниже́ опеча́лился еси́ злы́ми ми́ра сего́, но взира́я к по́чести вы́шняго зва́ния, под бре́менем мирски́х суе́т па́мятствовал еси́ всегда́ пе́ти Бо́гу: Аллилу́иа.
И́кос 2.
Усе́рдно де́лая дела́ мирска́го служе́ния твоего́, преподо́бне, еди́но то́чию име́л еси́ в се́рдце твое́м: да не осужде́н предста́неши на стра́шнем Суди́щи Го́спода Сла́вы, и ны́не благоче́стно к тому́ себе́ предугото́вав, слы́шиши от все́х:
Ра́дуйся, у́м тво́й впери́вый в го́рняя; ра́дуйся, от ми́ра тле́ннаго к нетле́нному о́чи возведы́й.
Ра́дуйся, па́че земны́х бла́г возлюби́вый нищету́ духо́вную; ра́дуйся, в печа́ли о гресе́х сниска́вый себе́ утеше́ние.
Ра́дуйся, кро́тостию благоукраси́выйся; ра́дуйся, взалка́вый пра́ведности пред Бо́гом.
Ра́дуйся, согреша́ющым благоснисходи́тельный; ра́дуйся, стра́ждущым сострада́вый те́пле.
Ра́дуйся, ко все́м благоприве́тливый; ра́дуйся, все́м ве́дущим тя́ прелюбе́зный.
Ра́дуйся, ми́лостыни подава́вый ще́дро.
Ра́дуйся, Ферапо́нте, уго́дниче Христо́в и чудотво́рче.
Конда́к 3.
Да не зло́ба измени́т твоего́ блага́го ра́зума, та́йно от при́сных твои́х отше́л еси́ во святу́ю оби́тель блаже́ннаго Фео́дора, да та́мо свобо́дь мирски́х суе́т, воспое́ши Бо́гу: Аллилу́иа.
И́кос 3.
От Бо́га науче́нный о тебе́ блаже́нный Фео́дор уразуме́ тя́, уже́ искуше́нна в посте́ и моли́тве, ра́достно прия́т тя́ во оби́тель свою́, и в де́нь прише́ствия твоего́ к нему́ облече́ тя́ в чи́н и́ноческий, со все́ми сподви́жники свои́ми вопия́ тебе́:
Ра́дуйся, вся́ кра́сная ми́ра презре́вый; ра́дуйся, от ми́ра льсти́ваго излете́вый, я́ко пти́ца от се́ти.
Ра́дуйся, па́че Бо́гу, не́жели челове́ком, рабо́тати избра́вый; ра́дуйся, и́ночество ра́ди до́браго Бо́гу де́лания прия́вый.
Ра́дуйся, я́ко уже́ в ми́ре и́нок иску́сен угото́вался еси́; ра́дуйся, всего́ ся́ Христу́, я́ко чи́стую же́ртву, принесы́й.
Ра́дуйся, ра́ди Христа́ отверги́йся себе́ сама́го; ра́дуйся, Христо́в Кре́ст подъя́вый и́стинно.
Ра́дуйся, со Христо́м бы́ти при́сно возжела́вый; ра́дуйся, Христа́ Бо́га все́ю душе́ю возлюби́вый.
Ра́дуйся, Христу́ Бо́гу возлю́бленный.
Ра́дуйся, Ферапо́нте, уго́дниче Христо́в и чудотво́рче.
Конда́к 4.
Ста́рцу, ему́же вруче́н бы́л еси́, я́ко отцу́ рабо́тал еси́, испове́дая же ему́ на вся́к де́нь грехи́ твоя́, прогоня́л еси́ от себе́ лука́выя по́мыслы, сего́ ра́ди с ни́м чи́стым се́рдцем вопия́л еси́ Бо́гу: Аллилу́иа.
И́кос 4.
По́двигом и́ночества до́бре подвиза́яся, не мни́л еси́ ся́ до́брое что́ сотво́рша, но мни́л ся́ непотре́бна бы́ти, и припа́дая стопа́м спо́стников твои́х, сле́зно моли́л еси́ и́х, умоли́ти Пречи́стую Богоро́дицу, да спасе́т тя́ от гее́нны о́гненныя. Сие́ ве́дяще, вопие́м ти́:
Ра́дуйся, слеза́ми покая́ния очи́стивый ду́шу свою́; ра́дуйся, низложи́вый в себе́ ду́ха горды́ни.
Ра́дуйся, научи́выйся зре́ти своя́ то́чию согреше́ния; ра́дуйся, не осужда́вый ни еди́наго от согреша́вших.
Ра́дуйся, братолю́бием утиша́вый прекосло́вия; ра́дуйся, ко все́м в послуша́нии вда́вый тя́ неукло́нно.
Ра́дуйся, моли́твами бра́тии подкрепле́нный; ра́дуйся, не на себе́ сама́го, а на Пречи́стую Богоро́дицу упова́вый.
Ра́дуйся, во все́х труде́х твои́х благослове́нный от Пречи́стыя Богоро́дицы; ра́дуйся, засту́пницу себе́ стяжа́вый Благослове́нную Ма́терь Христа́ Бо́га.
Ра́дуйся, Е́ю от ве́чныя му́ки свобожде́нный.
Ра́дуйся, Ферапо́нте, уго́дниче Христо́в и чудотво́рче.
Конда́к 5.
В то́й же оби́тели блаже́ннаго Фео́дора име́л еси́ равноле́тна тебе́ дру́га, спо́стника и сомоли́твенника, преподо́бнаго Кири́лла, с ни́мже, от преподо́бнаго Се́ргия науче́нный, еди́нем се́рдцем и еди́неми усты́, непреста́нно пе́л Бо́гу: Аллилу́иа.
И́кос 5.
Спо́стницы твои́, ви́девше тя́, зело́ преспева́юща в до́бром и́ноческом житии́, в смире́нии и послуша́нии, в целому́дрии и братолю́бии, сла́виша Бо́га и Пречи́стую, да́вших ти́ такову́ю благода́ть, мы́ же, уве́девше о се́м, вопие́м ти́:
Ра́дуйся, и́ноче, и́ноков похвало́; ра́дуйся, спо́стниче преподо́бнаго Кири́лла.
Ра́дуйся, ве́рный учениче́ преподо́бнаго Се́ргия; ра́дуйся, целому́дрия о́браз яви́вый собо́ю и́стинный.
Ра́дуйся, поще́нием укрепи́вый се́рдце твое́; ра́дуйся, бде́нием окрили́вый ду́шу твою́.
Ра́дуйся, моли́твами твои́ми благоуха́ющий Бо́гу; ра́дуйся, а́нгельския чистоты́ рачи́телю.
Ра́дуйся, херуви́мскаго богомы́слия подража́телю; ра́дуйся, серафи́мския к Бо́гу любве́ ревни́телю.
Ра́дуйся, Ферапо́нте, уго́дниче Христо́в и чудотво́рче.
Конда́к 6.
Обходя́ страну́ Белоезе́рскую, обре́л еси́ мно́гая ме́ста кра́сная и удо́бная, во е́же та́мо в коне́чнем безмо́лвии пребыва́ти. И возжа́ждал еси́ сего́ безмо́лвия, да в не́м вта́йне Бо́гу зове́ши: Аллилу́иа.
И́кос 6.
По гла́су Пречи́стыя прише́д в страну́ Белоезе́рскую со дру́гом твои́м, преподо́бным Кири́ллом, созда́л еси́ не дале́че от него́ в де́брех безмо́лвную ке́ллию, да в не́й вта́йне усугу́биши труды́ твоя́ пред Бо́гом. Мы́ же, уве́девше я́, вопие́м ти́:
Ра́дуйся, ра́ди Бо́га возжада́вый тиша́йшаго безмо́лвия; ра́дуйся, устрое́нием Пречи́стыя приведе́нный в пусты́ню со дру́гом твои́м.
Ра́дуйся, со еди́ным то́чию дру́гом твои́м разделя́вый безмо́лвие пусты́ни; ра́дуйся, и от сего́ дру́га разлучи́выйся, да с еди́ным Христо́м бу́деши.
Ра́дуйся, пусты́нною ке́ллиею па́че ца́рскаго черто́га весели́выйся; ра́дуйся, в не́й дни́ в труде́х, но́щи же в бде́ниих проводи́вый.
Ра́дуйся, ра́ди Христа́ от тя́жких к тяжча́йшим трудо́м устремля́выйся; ра́дуйся, та́йнаго де́лания пред Отце́м Небе́сным дости́гнувый.
Ра́дуйся, гла́сом твои́м моли́твенным огласи́вый де́бри пусты́нныя; ра́дуйся, немо́лчно твои́ми усты́ сла́вивый и́мя Христо́во.
Ра́дуйся, в уме́ и се́рдце име́вый Иису́са Сладча́йшаго.
Ра́дуйся, Ферапо́нте, уго́дниче Христо́в и чудотво́рче.
Конда́к 7.
Разбо́йников я́рость нището́ю и терпе́нием посрами́л еси́, нощны́х пти́ц кли́ки и звере́й шата́ние победи́л еси́ ве́рою во Христа́, труды́ же неусы́пными до конца́ сокруши́л еси́ по́хоти и не́мощи плотски́я, немо́лчно вопия́ Бо́гу: Аллилу́иа.
И́кос 7.
Дале́че зело́ слы́шано бы́сть богоуго́дное житие́ твое́, преподо́бне. И от коне́ц земли́ Ру́сския притеко́ша к тебе́ лю́бящии безмо́лвие. Ты́ же си́х прие́мляй с любо́вию, я́ко оте́ц о обраще́нии заблу́ждших ча́д ра́довался еси́. Те́мже и мы́ вопие́м ти́:
Ра́дуйся, дре́вних отце́в пустынножи́телей подража́телю; ра́дуйся, зно́й, хла́д и гла́д в пусты́ни с терпе́нием понесы́й.
Ра́дуйся, тяготу́ дневну́ю и стра́х нощны́й любо́вию ко Христу́ победи́вый; ра́дуйся, не устраши́выйся ни звере́й ди́виих, ни злы́х челове́ков.
Ра́дуйся, до́блий низложи́телю искуше́ний диа́вольских; ра́дуйся, за та́йныя твоя́ по́двиги в пусты́ни для Бо́га просла́вленный от Бо́га я́ве.
Ра́дуйся, я́ко и в пусты́ни Госпо́дь соде́ла тя́ вождя́ и́щущим спасе́ния; ра́дуйся, благоукраси́вый пусты́ню оби́телию и́ночествующих.
Ра́дуйся, неиску́сных и́ноков до́брый вождю́ ко Христу́; ра́дуйся, освяти́вый пусты́ню устрое́нием хра́ма Бо́жия.
Ра́дуйся, в хра́ме со ученики́ твои́ми воспева́вый Бо́гу ра́достно.
Ра́дуйся, Ферапо́нте, уго́дниче Христо́в и чудотво́рче.
Конда́к 8.
Слы́шав о тебе́ и о сподви́жниках твои́х, преподо́бне, благове́рный кня́зь Андре́й все́м се́рдцем вознесе́ хвалу́ Бо́гу, благослови́вшему о́тчину его́ таковы́ми обита́тельми, и воспе́ ра́достно Бо́гу: Аллилу́иа.
И́кос 8.
Возжела́ благове́рный кня́зь Андре́й прия́ти благослове́ние от святы́ни твоея́, преподо́бне, и пригласи́ тя́ во сво́й гра́д, ты́ же, моле́нию его́ и бра́тии повину́яся, ле́та ста́рости и тру́д далеча́йшаго пути́ презре́в, ско́ро ко кня́зю прите́кл еси́ слы́шай от него́:
Ра́дуйся, ле́ты, наипа́че же благому́дрием укра́шенный; ра́дуйся, подви́жниче Христо́в неизме́нный.
Ра́дуйся, Ду́ха Свята́го преиспо́лненный; ра́дуйся, Ма́терию Бо́га возлю́бленный.
Ра́дуйся, и́мени Ея́ оби́тель и́ноков созда́вый; ра́дуйся, ста́ду твоему́ о́браз и́стинный.
Ра́дуйся, чадолюби́вый о́тче и́ноков; ра́дуйся, и́ноки твои́ми люби́мый, я́ко оте́ц чадолюби́вейший.
Ра́дуйся, все́х притека́ющих к тебе́ исполня́яй ра́дости; ра́дуйся, все́м подая́й ско́рое утеше́ние.
Ра́дуйся, любве́ и ми́ра насади́телю.
Ра́дуйся, Ферапо́нте, уго́дниче Христо́в и чудотво́рче.
Конда́к 9.
Ра́достию возра́довася благове́рный кня́зь Андре́й, ви́дев твое́ к нему́ прише́ствие и, да не разлучи́тся с тобо́ю, моле́нием умоли́ тя́, бли́з него́ созда́ти но́вую оби́тель и́ноков, в не́йже бы вы́ну пе́ти Бо́гу: Аллилу́иа.
И́кос 9.
А́ще бо зело́ отрица́лся еси́, оба́че, не кня́зю то́чию, но Самому́ Бо́гу повину́яся, на ме́сте кра́снем бли́з гра́да Можа́йска созда́л еси́ хра́м Пречи́стыя и но́вую оби́тель и́ноков, и́мже са́м в наста́вника бы́л еси́ до конца́ дне́й твои́х, те́мже слы́шиши от все́х:
Ра́дуйся, благо́е жела́ние кня́зя благове́рнаго соверши́вый му́дре; ра́дуйся, вторы́я своея́ оби́тели и́ноков во и́мя Богома́тери учреди́телю.
Ра́дуйся, в сию́ оби́тель собра́вый мно́жество спаса́ющихся; ра́дуйся, насади́телю в не́й до́браго жития́.
Ра́дуйся, напои́вый ю́ твои́ми наставле́нии; ра́дуйся, возрасти́вый ю́ мно́гими слеза́ми твои́ми.
Ра́дуйся, я́ко мно́гими труды́ и благи́ми по́двиги твои́ми благоукраси́л еси́ ю́; ра́дуйся, я́ко моли́твами твои́ми твори́ши ю́ чи́сту неве́сту Христо́ву.
Ра́дуйся, ра́достно преда́вый в не́й Христу́ ду́шу твою́ чи́стую; ра́дуйся, те́лом твои́м пребыва́яй при́сно в се́й оби́тели твое́й.
Ра́дуйся, из нея́ сия́яй ми́рови чудесы́.
Ра́дуйся, Ферапо́нте, уго́дниче Христо́в и чудотво́рче.
Конда́к 10.
Чи́стая душа́ твоя́, преподо́бне, мно́гими по́двиги и скорбьми́ усугу́бившая своя́ тала́нты, принесе́ к Да́вшему я́ Бо́гу, и вни́де в ра́дость Го́спода своего́, ны́не вопию́щи Ему́ ра́достно: Аллилу́иа.
И́кос 10.
А́ще и до конца́ дне́й твои́х не престава́л еси́ жела́ти возвраще́ния твоего́ в пе́рвую твою́ оби́тель, Белоезе́рскую, но прите́кл же к пе́рвейшей и вожделе́ннейшей оби́тели небе́сней, оста́вил еси́ в покро́в и защи́ту вторы́я оби́тели твоея́, Лу́жецкия, свято́е те́ло твое́, и́мже храни́мии зове́м ти́:
Ра́дуйся, на земли́ пожи́вый равноа́нгельно; ра́дуйся, на небеси́ лику́ющий со а́нгелы.
Ра́дуйся, на Небеси́ вчине́нный со все́ми святы́ми; ра́дуйся, на земли́ чудесы́ просла́вленный.
Ра́дуйся, ве́рный храни́телю оби́тели, в не́йже почива́ет те́ло твое́; ра́дуйся, избавля́яй оби́тель сию́ от разруше́ния.
Ра́дуйся, смиря́яй в не́й враго́в иноплеме́нных; ра́дуйся, низлага́яй все́х ея́ ви́димых и неви́димых вра́г.
Ра́дуйся, вся́кия напа́сти от нея́ прогоня́яй; ра́дуйся, подая́й на́м моли́твами твои́ми вся́ благопотре́бная к ве́чней жи́зни.
Ра́дуйся, разруши́телю вражды́ и насади́телю братолю́бия.
Ра́дуйся, Ферапо́нте, уго́дниче Христо́в и чудотво́рче.
Конда́к 11.
О́браз бы́л еси́ ста́ду твоему́ во все́м и яви́лся еси́ все́м, гряду́щым с тобо́ю ко Христу́ по те́сному пути́, во́ждь к ве́чней сла́ве, в не́йже ны́не со все́ми святы́ми вопие́ши Бо́гу: Аллилу́иа.
И́кос 11
Пе́ние на́ше тебе́ побежда́ется оби́лием и вели́чием по́двигов и вся́ких доброде́телей и чуде́с твои́х. Оба́че любо́вию к тебе́ горя́щии, молча́ти не могу́ще, мо́лим: приими́ от на́с сицевы́я, а́ще и вельми́ ску́дныя, похвалы́:
Ра́дуйся, о́бразе смире́ния, кро́тости и послуша́ния; ра́дуйся, похвало́ де́вствующым.
Ра́дуйся, в душе́вных по́двизех и в теле́сных труде́х помо́щниче на́ш; ра́дуйся, исцеля́яй на́с от страсте́й.
Ра́дуйся, врачу́ ско́рый в неду́зех и боле́знех; ра́дуйся, засту́пниче си́рых и все́х оби́димых.
Ра́дуйся, уте́шителю на́ш в ско́рбех и беда́х и вся́ких напа́стех; ра́дуйся, от огня́ и от потопле́ния избавля́яй на́с.
Ра́дуйся, пита́телю на́ш во дни́ гла́да и ску́дости; ра́дуйся, подая́й на́м оби́лие плодо́в и благорастворе́ние возду́хов.
Ра́дуйся, я́ко Бо́га твори́ши ко все́м на́м ми́лостива твои́ми хода́тайствы к Нему́.
Ра́дуйся, Ферапо́нте, уго́дниче Христо́в и чудотво́рче.
Конда́к 12.
Пою́ще твое́ по Бо́зе житие́, тво́й и́ночествующым о́браз, и все́м твою́, преподо́бне, по́мощь благодаря́ще, сла́вим просла́вльших тя́, Бо́га и пречи́стую Богоро́дицу, и вопие́м И́м с тобо́ю: Аллилу́иа.
И́кос 12.
Пропове́дник Правосла́вия яви́лся еси́, преподо́бне, гра́ду твоему́ и окре́стней стране́, и дале́че от ни́х моли́твами твои́ми упраздня́еши вся́кая уче́ния лжи́вая льсти́вых и лука́вых челове́ков, мы́ же с тобо́ю в пра́вой ве́ре утвержда́емии вопие́м ти́:
Ра́дуйся, пра́вило ве́ры Христо́вы; ра́дуйся, о́бразе и́стинный любве́ к Бо́гу.
Ра́дуйся, неусы́пный па́стырю ста́да Христо́ва; ра́дуйся, нече́стия обличи́телю.
Ра́дуйся, низложи́телю злове́рных; ра́дуйся, утвержде́ние ве́рных.
Ра́дуйся, все́м правосла́вным охрани́телю; ра́дуйся, все́м заблужда́ющым подая́й ско́рое исправле́ние.
Ра́дуйся, тму́ неве́рия разгоня́яй; ра́дуйся, все́х приводя́й ко Христу́ Бо́гу.
Ра́дуйся, Ферапо́нте, уго́дниче Христо́в и чудотво́рче.
Конда́к 13.
О преблаже́нне и досточу́дне о́тче на́ш Ферапо́нте! Все́х на́с, ны́не тебе́ усе́рдно моля́щихся, от бе́д и ве́чных му́к изба́ви, прия́тными Бо́гу твои́ми моли́твами, да пое́м с тобо́ю Бо́гу: Аллилу́иа.
И́кос 1.
От младе́нчества твоего́ и да́же до престаре́ния, те́лом и душе́ю рабо́тал еси́ Го́споду Иису́су Христу́ и Пречи́стей Его́ Ма́тери, и се́ ны́не душа́ твоя́ ликовству́ет в Его́ небе́сных оби́телех, те́ло же твое́ зде́ почива́я, сия́ет чудесы́. Сего́ ра́ди вопие́м ти́ ра́достно:
Ра́дуйся, во сле́д Христа́ неукло́нно ше́дый; ра́дуйся, сло́во Его́ соблюда́вый тве́рдо.
Ра́дуйся, во сла́ву Христа́ Бо́га подвиза́выйся; ра́дуйся, Пречи́стую Христа́ Ма́терь неумо́лчно сла́вивый.
Ра́дуйся, от Христа́ и Ма́тери Его́ просла́вленный; ра́дуйся, имы́й дерзнове́ние ве́лие ко Христу́.
Ра́дуйся, защи́тниче оби́тели Лу́жецкия; ра́дуйся, храни́телю страны́ Можа́йския.
Ра́дуйся, побо́рниче кре́пкий за держа́ву Росси́йскую; ра́дуйся, добропобе́дный во́ине Правосла́вныя Це́ркве.
Ра́дуйся, все́м призыва́ющым тя́ подаю́щий ско́рую по́мощь от Христа́ Бо́га.
Ра́дуйся, Ферапо́нте, уго́дниче Христо́в и чудотво́рче.
Конда́к 1.
Взбра́нному Воево́де и Го́споду Иису́су после́дствуя, моли́твою, посто́м и труды́ плотски́я стра́сти победи́л еси́: те́мже, я́ко до́бр во́ин, увенча́лся еси́ от Царя́ Христа́, Его́же непреста́й те́пле моли́ти о на́с, рабе́х твои́х, преподо́бне, да тобо́ю изба́вльшеся от бе́д, при́сно пое́м ти́:
Ра́дуйся, Ферапо́нте, уго́дниче Христо́в и чудотво́рче.
Моли́тва.
О всечестны́й и преблаже́нный о́тче на́ш Ферапо́нте! Тебе́ даде́ся благода́ть моли́тися о на́с, и ве́мы, я́ко предстоя́ Престо́лу Го́спода, при́сно явля́еши любо́вь твою́ к на́м непреста́нными о на́с твои́ми хода́тайствы. Но поне́же мы́ ежеча́сно умножа́юще грехи́ на́ша, кра́йняго твоего́ отвраще́ния досто́йни сотвори́хомся, сего́ ра́ди в покая́нии, со слеза́ми припа́дающе, мо́лим тя́: не премени́ твоея́ ми́лости к на́м на гне́в за нече́стия и скве́рны на́ша, яви́ у́бо на́м ми́лость твою́ до конца́ и согреша́ющих на́с очи́сти твои́ми моли́твами, возведи́ к покая́нию, укрепи́ на дела́ блага́я, сохрани́ в правосла́вии и во вся́кой святы́ни. Да́руй на́м пребыва́ти в ми́ре, тишине́ и братолю́бии, испроси́ на́м времена́ безмяте́жна и изоби́лие плодо́в земны́х, изба́ви от огня́ и от потопле́ния и от лю́тых боле́зней и от смертоно́сныя я́звы. Посли́ тружда́ющымся благи́й успе́х, путеше́ствующым пу́ть безпреткнове́нный, в мо́ри пла́вающым приста́нище ти́хое, плене́нным осла́бу и освобожде́ние, си́рым по́мощь и заступле́ние. Умоли́ Бо́га: да изведе́т от поги́бели живо́т на́ш; да любо́вию твое́ю огражде́ннии, благода́рственная при́сно пое́м, просла́вившему тя́, Го́споду Иису́су Христу́, Ему́же подоба́ет вся́кая сла́ва и че́сть, со Безнача́льным Его́ Отце́м и с Пресвяты́м и Животворя́щим Его́ Ду́хом во ве́ки веко́в. Ами́нь.
