Конда́к 1.

Возбра́нный уго́дниче Христо́в, свя́те Григо́рие, я́ко благи́й ра́б вше́дый в ра́дость Го́спода твоего́, моли́ Влады́ку небесе́ и земли́ пода́ти на́м благода́ть свы́ше, с терпе́нием до конца́ понести́ благо́е и ле́гкое и́го Его́, да зове́м ти́, я́коже ча́да ко отцу́:

Ра́дуйся, уго́дниче Христо́в Григо́рие Богому́дре.

И́кос 1.

А́нгелов ли́цы твоему́ вели́кому во спаси́тельных по́двизех терпе́нию удиви́шася; и мы́, ублажа́юще благода́тное зва́ние твое́ на служе́ние Го́споду, ра́достно возглаша́ем тебе́:

Ра́дуйся, от пеле́н избра́нный Бо́гу; ра́дуйся, добро́тами Ду́ха изде́тска украше́нный.

Ра́дуйся, чистото́ю душе́вною возсия́вый; ра́дуйся, зна́мения благода́ти я́ве в себе́ носи́вый.

Ра́дуйся, дре́во, насажде́нное посреде́ Це́ркве Бо́жия; ра́дуйся, цве́те Боже́ственнаго са́да.

Ра́дуйся, благовозде́ланная лозо́ виногра́да Христо́ва; ра́дуйся, от ю́наго во́зраста те́сным путе́м ше́ствовати избра́вый.

Ра́дуйся, от мла́дости себе́ Христу́ возложи́вый.

Ра́дуйся, уго́дниче Христо́в, Григо́рие Богому́дре.

Конда́к 2.

Ви́дя блага́я ми́ра сего́ скороте́чна и непостоя́нна, у́м тво́й ко Творцу́ возложи́в, пренебре́гл еси́ ро́да све́тлость, ле́сть бога́тства вре́меннаго, и от ю́ности возлюби́л еси́ возлюби́вшаго тя́, е́же взыва́ти к Нему́: Аллилу́иа.

И́кос 2.

Ра́зум лжеиме́нен ко спасе́нию ве́дя, озари́тися свы́ше восхоте́л еси́: сего́ ра́ди с ра́зумом и во́лю в послуша́ние пленя́я ве́ре, в терпе́нии восхоте́л еси́ стяжа́ти ду́шу твою́. Те́м и мы́, от о́трочества тя́ избра́нный сосу́д благода́ти ве́дяще, вопие́м к тебе́:

Ра́дуйся, Ду́ха Свята́го благоприя́тное обита́лище; ра́дуйся, благода́тный пло́д в души́ твое́й возде́лавый.

Ра́дуйся, насажде́ние во дво́рех до́му Бо́га на́шего красно́ процве́тшее; ра́дуйся, а́нгельское житие́ возлюби́вый.

Ра́дуйся, от млады́х ногте́й стезя́м подвигополо́жника после́довавый и ду́шу твою́ Бо́гу сочета́вый; ра́дуйся, сла́дости плотска́го сожи́тия богому́дре презре́вый.

Ра́дуйся, я́ко изволе́нием Бо́жиим и роди́телие твои́ соизво́лиша, да рабо́тавши Христу́; ра́дуйся, я́ко возлюби́в нищету́ некра́дому, бога́тство роди́телей твои́х оста́вил еси́.

Ра́дуйся, я́ко рабы́ твоя́ и рабы́ни свободи́в, всего́ себе́ Христу́ порабо́тил еси́.

Ра́дуйся, уго́дниче Христо́в, Григо́рие Богому́дре.

Конда́к 3.

Си́лою неви́димою веде́н бы́л еси́ в незна́емая и непроходи́мая места́, егда́ убега́я сла́вы челове́ческия, че́сть и достоя́ние земно́е оста́вил еси́, прише́л же еси́ во обита́лище неве́домо, хотя́ в ско́рбех научи́тися пе́ти: Аллилу́иа.

И́кос 3.

Име́я тве́рдое предложе́ние до конца́ оста́вити ми́р, по преставле́нии честны́х роди́телей твои́х, вся́ име́ния твоя́ ни́щим и убо́гим разда́л еси́, да стя́жеши себе́ сокро́вище на небеси́, его́же обрести́ сподо́би и на́с, песносло́вящих тя́:

Ра́дуйся, сла́вная ми́ра сего́ во уме́ты вмени́вый; ра́дуйся, я́ко душе́ю твое́ю предложи́вый собра́ти бога́тство нетле́нное.

Ра́дуйся, в весе́лии се́рдца кре́ст Христо́в на ра́мо твое́ взе́мый; ра́дуйся, христолюби́выми труда́ми кре́пость ду́ха стяжа́вый.

Ра́дуйся, слеза́ми, я́ко росо́ю, душе́вную ни́ву напои́вый; ра́дуйся, тща́выйся не себе́, но Христу́ жи́ти безстра́стием.

Ра́дуйся, со́вестию чи́стою в моли́твах а́ки безпло́тен бы́вый; ра́дуйся, на богокра́сную добро́ту взира́я, от плотски́я добро́ты о́ко твое́ отврати́вый.

Ра́дуйся, посто́м, бде́нием, воздержа́нием ле́сть ми́ра и пло́ти низложи́вый.

Ра́дуйся, уго́дниче Христо́в, Григо́рие Богому́дре.

Конда́к 4.

Бу́рю страсте́й, во пло́ти челове́честей волну́ющуюся, от ю́на во́зраста укроти́ти тщи́лся еси́, егда́ в се́рдце твое́ нача́ло прему́дрости стра́х Бо́жий всади́в, и бы́в испо́лнен и́м, николи́же де́тским глумле́нием примеша́лся еси́, но во дни́ и в нощи́ зако́ну Бо́жию поуча́лся, пе́сненно глаго́лал еси́: Аллилу́иа.

И́кос 4.

Слы́ша труды́ и по́двиги богоно́снаго Диони́сия, учени́к бы́л еси́ его́: преуспе́в же в доброде́телех его́, оби́тель но́ву назда́ти восхоте́л еси́. И мы́, вкуша́юще ны́не плоды́ трудо́в твои́х, в весе́лии воспева́ем:

Ра́дуйся, в по́двизех вели́кому Диони́сию соревнова́вый; ра́дуйся, в си́ле Христо́ве Ева́нгельским путе́м ше́ствовавый.

Ра́дуйся, бде́нием и моли́твою ду́шу твою́ очи́стивый; ра́дуйся, ле́ствицею доброде́телей на мы́сленное не́бо востеки́й.

Ра́дуйся, смире́нием высо́кая, нището́ю бога́тая стяжа́вый; ра́дуйся, оби́тель я́ко са́д небе́сный насади́вый.

Ра́дуйся, в по́двизех о́браз и́ноком бы́вый; ра́дуйся, пусты́нный жи́телю, в телеси́ а́нгелом подо́бивыйся.

Ра́дуйся, безмо́лвия люби́телю, ду́хом твои́м в вы́шних обита́вый.

Ра́дуйся, уго́дниче Христо́в, Григо́рие Богому́дре.

Конда́к 5.

Боготе́чное к Ца́рствию Небе́сному соверша́я ше́ствие, потща́лся еси́ в любви́ Христо́ве и ины́х на стези́ пра́выя к несконча́емей жи́зни направля́ти, да умудре́ннии тобо́ю во спасе́ние зове́м: Аллилу́иа.

И́кос 5.

Ви́девше влады́цы и кня́зи лю́дстии благоразсу́дливость и доброде́тели твоя́, преподо́бне, иска́ху просвети́тися и по́льзоватися от тебе́, я́коже сотвори́ кня́зь оте́чественныя страны́ Ю́рий, его́же ча́д креще́нием просвети́л еси́. Те́мже восхваля́ем тя́:

Ра́дуйся, и́стиннаго ра́зума учи́телю; ра́дуйся, пути́, вводя́щаго в жи́знь, наста́вниче.

Ра́дуйся, приле́жно обуча́выйся и обуча́вый благоче́стию; ра́дуйся, ве́рно утвержда́выйся и утвержда́вый в правосла́вии.

Ра́дуйся, покланя́выйся Бо́гу ду́хом и и́стиною; ра́дуйся, служи́вый Ему́ во испове́дании усте́н и се́рдца.

Ра́дуйся, ве́ры и́стинныя блюсти́телю; ра́дуйся, уста́вов и законоположе́ний Це́ркве храни́телю.

Ра́дуйся, и́ноков богосве́тлый вождю́.

Ра́дуйся, уго́дниче Христо́в, Григо́рие Богому́дре.

Конда́к 6.

Пропове́дуют ве́рнии миротворе́ние твое́, преподо́бне, егда́ услы́шав нестрое́ние дву́х князе́й, еди́наго низве́ржена со престо́ла, друга́го же на́гло похи́тивша чу́ждое насле́дие, потща́лся еси́ ше́ствовати в ца́рственный гра́д Москву́ и примире́нию кня́жеску послужи́ти, да при восприя́тии ки́имждо своего́ воспева́еши с ни́ми: Аллилу́иа.

И́кос 6.

Возсия́ ре́вность твоя́ по достоя́нии Христо́ве благосе́рде, егда́ стропти́вый кня́зь Дими́трий прии́де зло́бно на гра́д Во́логду со ра́тию и мно́га зла́ лю́дем сотвори́; ты́ же небоя́зненно обличи́в неи́стовство его́, я́ко миротво́рец, безче́стие и поруга́ние претерпе́л еси́. Сего́ ра́ди ви́дяще миролю́бный по́двиг тво́й, досто́йно восхваля́ем тя́:

Ра́дуйся, ми́ра и правоты́ в лю́дех блюсти́телю; ра́дуйся, мще́ния и зло́бы от серде́ц искорени́телю.

Ра́дуйся, тве́рдый защи́тниче неви́нности и непра́ведных умышле́ний обличи́телю; ра́дуйся, градо́в и гра́ждан умири́телю.

Ра́дуйся, гото́вый в напа́стех защи́тниче; ра́дуйся, властолю́бия прогони́телю.

Ра́дуйся, от сму́т и треволне́ний жите́йских исхити́телю; ра́дуйся, хода́таю о лю́дех пред Бо́гом и пред кня́зи люди́й.

Ра́дуйся, я́ко тобо́ю познае́м, ко́ль красно́ бы́ти в ми́ре.

Ра́дуйся, уго́дниче Христо́в, Григо́рие Богому́дре.

Конда́к 7.

Хотя́щу ти́ спасти́ ча́д, тобо́ю со́бранных, любо́вь, ко́рень все́х благи́х, запове́дал еси́ име́ти и́м между́ собо́ю, ю́же храня́щим обеща́л еси́ ни в чесо́мже име́ти оскуде́ние. Испроси́ и на́м у Человеколю́бца Христа́ благода́ть братолю́бия, да пое́м: Аллилу́иа.

И́кос 7.

Но́ва тя́ показа́ Госпо́дь уго́дника и все́й Росси́йстей, па́че же Во́логодстей, стране́; оби́тель бо угото́вав себе́ Ду́ху Свято́му, оби́тель для спасе́ния и́ночествующих созда́л еси́, в не́йже труды́ ко трудо́м прилага́я, христоподража́тельный приме́р ученико́м твои́м оста́вил еси́, на́нь же взира́юще, тебе́ ве́рнаго наста́вника восхваля́ем:

Ра́дуйся, благода́ти жили́ще в себе́ угото́вавый; ра́дуйся, до́ме Ду́ха Свята́го, до́м для примета́ющихся к до́му Бо́жию устро́ивый.

Ра́дуйся, пустынолю́бный о́рле, для птенце́в твои́х пусты́ню ми́ра избра́вый; ра́дуйся, наста́вниче безмо́лвствующих.

Ра́дуйся, на воде́ поко́йне сле́з и умиле́ния воспита́выйся; ра́дуйся, то́южде пи́щею поста́ и воздержа́ния и после́дователей твои́х пита́вый.

Ра́дуйся, си́лу Христо́ву в не́мощи яви́вый и то́юже си́лою благоду́шно не́мощи немощны́х носи́вый; ра́дуйся, моли́твенниче, моли́твы твоя́ о вруче́нных тебе́ приле́жно возноси́вый.

Ра́дуйся, те́миже моли́твами ста́до твое́ утвержда́вый.

Ра́дуйся, уго́дниче Христо́в, Григо́рие Богому́дре.

Конда́к 8.

Стра́нно и прише́льчески жи́тельствовати на земли́ Христа́ ра́ди изво́ливый, стра́нное для су́щих от ми́ра житие́ пожи́л еси́: до́лу бо го́рняя мы́сля, и на земли́ небе́сная де́я, и в ми́ре сы́й не бы́л еси́ от ми́ра. Те́мже мы́, ублажа́юще небе́сное на земли́ жи́тельство твое́, глаго́лем Бо́гу: Аллилу́иа.

И́кос 8.

Все́м се́рдцем пре́дан бы́л еси́ Христу́ Бо́гу в животе́ твое́м, богоно́се, Ему́же и рабо́тал еси́ в преподо́бии и пра́вде; сего́ ра́ди и Госпо́дь, ви́дя труды́ твоя́, бде́ние же и поще́ние, еще́ в жи́зни просла́ви тя́ по́двигами свя́тости, я́же воспева́юще, тебе́ глаго́лем:

Ра́дуйся, та́йн Бо́жиих ве́рный строи́телю; ра́дуйся, ве́рный священноде́йствователю служе́ния Госпо́дня.

Ра́дуйся, свети́льниче, на све́щнице благода́тнем поста́вленный; ра́дуйся, бо́дренный де́лателю вертогра́да Христо́ва.

Ра́дуйся, му́дрствовавый я́же во Христе́ Иису́се; ра́дуйся, я́ко де́я учи́л еси́ презира́ти пло́ть, прилежа́ти же о души́, ве́щи безсме́ртней.

Ра́дуйся, пло́ть уму́, а у́м ду́ху покори́вый; ра́дуйся, ду́хом ходи́вый и по́хоти плотски́я отгна́вый.

Ра́дуйся, разли́чными страстьми́ бори́мым помо́щниче.

Ра́дуйся, уго́дниче Христо́в, Григо́рие Богому́дре.

Конда́к 9.

Вся́кое тща́ние прилага́л еси́, богоблаже́нне, е́же возгражде́нную от тебе́ оби́тель соде́лати вертогра́дом благопло́дным, да де́лателие его́, наслажда́ющеся во вре́мя свое́ плода́ми трудо́в твои́х, воспева́ют согла́сно Бо́гу в де́нь ве́чнаго весе́лия: Аллилу́иа.

И́кос 9.

Вити́и многовеща́ннии су́ть дея́ния жития́ твоего́, и́миже, я́ко благоглаго́ливыми уста́ми, науча́еши на́с возвеща́ти хвалу́ Госпо́дню и глаго́лати к тебе́:

Ра́дуйся, богому́драя добро́то; ра́дуйся, небе́сный челове́че и земны́й а́нгеле.

Ра́дуйся, смиренному́дрия рачи́телю; ра́дуйся, свети́льниче, в но́щи ми́ра сего́ на́с озаря́яй.

Ра́дуйся, за́поведий влады́чних бо́дрственный блюсти́телю; ра́дуйся, ше́ствующих путе́м Христо́вым спу́тниче и води́телю.

Ра́дуйся, коле́блющихся в ве́ре утвержде́ние; ра́дуйся, ослабева́ющих в по́двизех укрепле́ние.

Ра́дуйся, световоди́телю блужда́ющих в стезя́х стро́потных.

Ра́дуйся, уго́дниче Христо́в, Григо́рие Богому́дре.

Конда́к 10.

Спасти́ хотя́ во оби́тель твою́ прите́кших, егда́ позна́л еси́ отше́ствие твое́ от ми́ра к преми́рней жи́зни и от трудо́в к поко́ю, призва́л еси́ бра́тию твою́, ю́же, я́ко до́брый па́стырь, наста́вив рабо́тати в ми́ре Го́споду, вручи́л еси́ и́х но́ву игу́мену, ду́шу же твою́ Бо́гу пре́дал еси́, воспева́я: Аллилу́иа.

И́кос 10.

Сте́ну кре́пку в не́мощех и забра́ло необори́мо от вся́ких наве́тов вра́жиих, показа́ тя́ Вседе́тель чудоде́йствием во святе́м преставле́нии твое́м: нача́вшу бо соверша́тися обы́чному надгро́бному о тебе́ пе́нию и целова́нию после́днему, бе́сный исцеле́, и одержи́мый боле́знию оче́с и́нок тогда́ же испове́да пред все́ми внеза́пное свое́ исцеле́ние; обра́дованная же бра́тия и ученицы́, ви́девше таково́е прославле́ние свы́ше своего́ па́стыря, воспе́ша еди́неми усты́:

Ра́дуйся, а́вво всеблаже́нне, бо́дрственно соверши́вый до́брый по́двиг; ра́дуйся, к преми́рному возше́дый пребыва́нию.

Ра́дуйся, кла́сы присноживо́тия пожа́вый; ра́дуйся, благода́ть чуде́с от Бо́га прие́мый.

Ра́дуйся, бесо́вския полки́ победи́вый; ра́дуйся, вся́ стре́лы лука́ваго разжже́нныя угаси́вый.

Ра́дуйся, мо́ре жите́йское благооти́шно преплы́вый; ра́дуйся, к нестаре́ющейся жи́зни преше́дый.

Ра́дуйся, небе́сный поко́й о́наго ве́ка улучи́вый.

Ра́дуйся, уго́дниче Христо́в, Григо́рие Богому́дре.

Конда́к 11.

Пе́ние благода́рственное в се́рдцы вы́ну принося́ Христу́, приве́дшему тя́ непреткнове́нна посреде́ сете́й мно́гих; оба́че от мно́гаго смиренному́дрия, во очище́ние души́ и те́ла твоего́, ди́вная пред отше́ствием твои́м завеща́л еси́: да те́ло твое́, на не́мже носи́л еси́ я́звы Христо́вы, егда́ сконча́ешися, вле́кше вве́ргнут в бла́то. Благогове́ющая же ко отцу́ ча́да, по преставле́нии твое́м, че́стне преда́ша земли́ те́ло твое́, провожда́юще ду́х на небеса́ све́тлою пе́снию Бо́гу: Аллилу́иа.

И́кос 11.

Светоза́рную лучу́ ду́ха я́ве показа́л еси́ и в богоно́снем те́ле твое́м, егда́ в преставле́нии благоуха́ние разлия́ся от моще́й твои́х и цельбоно́сная си́ла истече́, я́ко от исто́чника, последи́ же и мо́щи твоя́ нетле́нны яви́шася. И ны́не, в невече́рнем све́те с пра́ведными ликовству́я, по досто́инству слы́шиши от на́с:

Ра́дуйся, ве́рный ра́бе и дру́же Бо́жий; ра́дуйся, за ве́рность твою́ вше́дый в ра́дость Го́спода твоего́.

Ра́дуйся, извести́вый зва́ние де́лы; ра́дуйся, пра́ведным житие́м твои́м собра́вый ли́к ше́ствующих по тебе́ к Бо́гу.

Ра́дуйся, свети́льниче, светя́й и горя́й о на́с пред Бо́гом; ра́дуйся, вознося́ к Бо́гу моли́твы на́ша, я́ко кади́ло.

Ра́дуйся, путевождю́ к Ца́рству Сла́вы; ра́дуйся, денни́це, явля́ющая зря́щим горе́ со́лнце пра́вды.

Ра́дуйся, приста́нище взыска́ющим благооти́шия Небе́снаго.

Ра́дуйся, уго́дниче Христо́в, Григо́рие Богому́дре.

Конда́к 12.

Благода́ть Го́спода Иису́са испо́лни се́рдце твое́ да́ры Ду́ха Свята́го в житии́ твое́м, а по сме́рти осия́ тя́ сла́вою безсме́ртия. Мы́ же, от ра́ки моще́й твои́х восприе́млюще то́ки благода́ти, напая́ющия ду́ши на́ша во спасе́ние, всеконе́чне вопие́м о тебе́ Бо́гу: Аллилу́иа.

И́кос 12.

Пою́ще твое́ досточу́дное житие́, богоблаже́нне, восхвали́ти тебе́ недоумева́ем по достоя́нию; оба́че горя́ще любо́вию к присноживо́тней па́мяти твое́й, не умолчи́м вопи́ти тебе́:

Ра́дуйся, тече́ние по́стническое до́бре сконча́вый; ра́дуйся, путе́м пра́вым непреткнове́нно ше́ствовавый.

Ра́дуйся, я́ко се́явый слеза́ми, ны́не плоды́ спасе́ния в ра́дости пожина́еши; ра́дуйся, земны́ми по́двиги небе́сная дарова́ния стяжа́вый.

Ра́дуйся, я́ко в ми́ре жи́знь сконча́вый, в земли́ кро́тких досто́йно водворя́ешися; ра́дуйся, я́ко свяще́нник во свяще́нницех и пустынножи́тель в пустынножи́телех жре́бий тво́й восприя́л еси́.

Ра́дуйся, зре́нием лица́ Бо́жия веселя́йся; ра́дуйся, во сла́ве небе́сней Престо́лу Пресвяты́я Тро́ицы предстоя́й.

Ра́дуйся, о оби́тели и ста́де твое́м, е́же трудолю́бно собра́л еси́, моля́йся; ра́дуйся, я́ко о все́й Правосла́вней Це́ркви и благочести́вем ца́рстве Росси́йстем вы́ну предста́тельствуяй.

Ра́дуйся, уго́дниче Христо́в, Григо́рие Богому́дре.

Конда́к 13.

О свяще́нная главо́, преподо́бне о́тче Григо́рие! Моли́ непреста́нно Христа́ Го́спода, да не оскуде́ет в на́с ве́ра и святи́и по́двизи твои́, да бу́дет ми́р в бра́тии твое́й и оби́лие во огра́де оби́тели твоея́ и во все́м ми́ре Госпо́дни; тогда́ испо́лнятся ра́дости сердца́ на́ша и язы́к на́ш весе́лия, и вси́ воспое́м еди́неми усты́ Влады́це Бо́гу: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгелов ли́цы твоему́ вели́кому во спаси́тельных по́двизех терпе́нию удиви́шася; и мы́, ублажа́юще благода́тное зва́ние твое́ на служе́ние Го́споду, ра́достно возглаша́ем тебе́:

Ра́дуйся, от пеле́н избра́нный Бо́гу; ра́дуйся, добро́тами Ду́ха изде́тска украше́нный.

Ра́дуйся, чистото́ю душе́вною возсия́вый; ра́дуйся, зна́мения благода́ти я́ве в себе́ носи́вый.

Ра́дуйся, дре́во, насажде́нное посреде́ Це́ркве Бо́жия; ра́дуйся, цве́те Боже́ственнаго са́да.

Ра́дуйся, благовозде́ланная лозо́ виногра́да Христо́ва; ра́дуйся, от ю́наго во́зраста те́сным путе́м ше́ствовати избра́вый.

Ра́дуйся, от мла́дости себе́ Христу́ возложи́вый.

Ра́дуйся, уго́дниче Христо́в, Григо́рие Богому́дре.

Конда́к 1.

Возбра́нный уго́дниче Христо́в, свя́те Григо́рие, я́ко благи́й ра́б вше́дый в ра́дость Го́спода твоего́, моли́ Влады́ку небесе́ и земли́ пода́ти на́м благода́ть свы́ше, с терпе́нием до конца́ понести́ благо́е и ле́гкое и́го Его́, да зове́м ти́, я́коже ча́да ко отцу́:

Ра́дуйся, уго́дниче Христо́в Григо́рие Богому́дре.

Моли́тва пе́рвая.

О свяще́нная главо́, преподо́бне о́тче, преблаже́нне а́вво Григо́рие! Не забу́ди ча́д твои́х, и́хже породи́л еси́ богоуго́дными труда́ми и моли́твенными по́двиги, помина́й во святы́х твои́х благоприя́тных моли́твах и назида́й предста́тельством твои́м ста́до твое́, е́же са́м па́сл еси́; моли́ за ны́, о́тче свяще́нный, де́ти твоя́ духо́вныя, я́ко име́я дерзнове́ние к Небе́сному Царю́, не премолчи́ за ны́ ко Христу́ и не пре́зри на́с, ве́рою и любо́вию чту́щих тя́. Помина́й недосто́йных на́с пред Престо́лом Вседержи́теля, тебе́ бо даде́ся благода́ть моли́тися за ны́. А́ще бо те́лом преста́вился еси́ от на́с, но и по сме́рти жи́в во Христе́ пребыва́еши. Не отступи́ от на́с ду́хом, сохраня́й на́с от стре́л вра́жиих, от пре́лести бесо́вския и ко́зней диа́вольских, па́стырю на́ш до́брый. Се́ бо, ра́кою моще́й твои́х пребыва́я с на́ми, свято́ю твое́ю душе́ю с небе́сными си́лами у Престо́ла Вседержи́телева предстоя́, досто́йно сла́виши Го́спода. Те́мже, припа́дающе со умиле́нием, мо́лимся тебе́ о спасе́нии ду́ш на́ших: испроси́ на́м вре́мя на покая́ние и невозбра́нно прейти́ от земли́ на не́бо чрез мыта́рства го́рьких бесо́в, да твои́м предста́тельством ве́чныя му́ки изба́вльшеся. Небе́сное Ца́рствие насле́довати сподо́бимся со все́ми пра́ведными, от ве́ка угоди́вшими Христу́ Го́споду на́шему, Ему́же подоба́ет вся́кая сла́ва, че́сть и поклоне́ние, ны́не и в безконе́чныя ве́ки веко́в. Ами́нь.

Моли́тва втора́я.

О до́брый на́ш па́стырю и богому́дрый наста́вниче, преподо́бне о́тче Григо́рие! Услы́ши на́с моля́щихся тебе́ и призыва́ющих в по́мощь ско́рое предста́тельство Твое́. Ви́ждь на́с гре́шных в толи́цех обстоя́ниих су́щих, ви́ждь на́с немощны́х отвсю́ду уловля́емых и вся́каго бла́га лише́нных, и умо́м от малоду́шия помраче́нных. Потщи́ся, уго́дниче Бо́жий, не оста́вити на́с во грехо́внем плену́ бы́ти, да не бу́дем в ра́дость враго́м на́шим и не у́мрем в лука́вых дея́ниих на́ших. Моли́ о на́с недосто́йных Спа́са Го́спода, Ему́же ты́ со безпло́тными ли́ки предстои́ши. Ми́лостива к на́м сотвори́ Соде́теля на́шего в ны́нешнем ве́це и в бу́дущем, да не возда́ст на́м по дело́м на́шим и по нечистоте́ серде́ц на́ших, но по Свое́й, бла́гости да возда́ст на́м. На твое́ бо хода́тайство упова́юще, твои́м предста́тельством хва́лимся, твое́ заступле́ние на по́мощь призыва́ем, и к цельбоно́сному гро́бу твоему́ припа́дающе недосто́йнии, исцеле́ния про́сим. Изба́ви на́с, уго́дниче Христо́в, от злы́х, находя́щих на ны́, и укроти́ во́лны страсте́й и бе́д возстаю́щих на на́с, да ра́ди святы́х твои́х моли́тв не обы́мет на́с напа́сть, и не погря́знем в пучи́не грехо́вней и в ти́не страсте́й на́ших. Моли́, преподо́бне о́тче на́ш Григо́рие, Христа́ Бо́га на́шего, да пода́ст на́м ми́рное жи́тельство, оставле́ние грехо́в и душа́м на́шим спасе́ние и ве́лию ми́лость, ны́не и во ве́ки веко́в. Ами́нь.