Конда́к 1.
Избра́нный чудотво́рче, и преди́вный уго́дниче Христо́в Иа́кове, источа́яй неоску́дно исцеле́ния приходя́щих к тебе́ с ве́рою, с любо́вию похва́льная воспису́ем ти́, преподо́бне; ты́ же, я́ко име́яй дерзнове́ние ко Святе́й Тро́ице, от вся́ких на́с бе́д твои́ми моли́твами изба́ви, и вся́ поле́зная испроси́ зову́щим ти́:
Ра́дуйся, Иа́кове, богому́дре о́тче на́ш.
И́кос 1.
А́нгел земны́й и небе́сный челове́к яви́лся еси́, преподо́бне о́тче на́ш Иа́кове; а́ще бо и челове́к естество́м бы́в, но я́ко безпло́тен на земли́ пожи́л еси́, вся́кое жите́йское отложи́в попече́ние, да Еди́ному благоугоди́ши Бо́гу; те́мже тя́, я́ко уго́дника Христо́ва и при́снаго собесе́дника А́нгелов любо́вию почита́юще, похва́льными пе́сньми ублажа́ем си́це:
Ра́дуйся, Костромски́х преде́лов сла́вное прозябе́ние; ра́дуйся, отца́ благочести́ваго о́трасле.
Ра́дуйся, ма́тере благогове́йныя пло́де; ра́дуйся, Христа́ Бо́га от ю́ности па́че всего́ возлюби́вый.
Ра́дуйся, стезя́м Того́ после́довати всеусе́рдно возжеле́вый; ра́дуйся, вся́ кра́сная ми́ра сего́ во уме́ты вмени́вый.
Ра́дуйся, за́поведь Ева́нгелия, е́же ни о чесо́м же от су́щих в ми́ре пещи́ся, с любо́вию испо́лнивый; ра́дуйся, ве́лиим воздержа́нием измла́да те́ло твое́ изнури́вый.
Ра́дуйся, пло́ть твою́ ду́хови покори́вый; ра́дуйся, благи́й ра́бе и ве́рный, да́нный тебе́ тала́нт сугу́бо возрасти́вый.
Ра́дуйся, слуго́ Госпо́день, преблагу́ю во́лю Влады́ки своего́ сотвори́вый; ра́дуйся, от у́тра до ве́чера твоея́ жи́зни в виногра́де Христо́ве потруди́выйся.
Ра́дуйся, Иа́кове, богому́дре о́тче на́ш.
Конда́к 2.
Ви́дя суету́ земны́х попече́ний, мирска́го мяте́жа избе́гнути потща́лся еси́, богому́дре Иа́кове, возлюби́в же тишину́ и безмо́лвие, в пусты́ни всели́тися восхоте́л еси́, да еди́н Еди́ному Бо́гу рабо́таеши, при́сно воспева́я: Аллилу́иа.
И́кос 2.
Ра́зум недоразуме́нный и́мамы, ка́ко восхвали́ти по достоя́нию по́двиги и труды́ твоя́, преподо́бне о́тче Иа́кове; сего́ ра́ди мо́лим тя́, моли́, уго́дниче Христо́в, пода́ти на́м свы́ше ра́зум, да возмо́жем по до́лгу воспе́ти богоуго́дное житие́ твое́; благогове́йне соверша́юще святу́ю па́мять твою́, вопие́м ти́ си́це:
Ра́дуйся, я́ко бла́га земна́я еще́ ю́н сы́й, презре́л еси́; ра́дуйся, я́ко вся́ име́ния твоя́, от роди́телей оста́вшаяся, ни́щим разда́л еси́.
Ра́дуйся, я́ко ни к чему́ же от су́щих в ми́ре се́рдцем твои́м прилепи́лся еси́; ра́дуйся, я́ко Ду́хом Святы́м от суе́т земны́х воззва́н бы́л еси́, во е́же рабо́тати Го́сподеви.
Ра́дуйся, я́ко в во́инство слу́г Христо́вых вписа́тися преи́скренне восхоте́л еси́; ра́дуйся, я́ко ку́плями жите́йскими не обяза́лся еси́, да Небе́сному Воево́де уго́ден бу́деши.
Ра́дуйся, я́ко и́ноческое житие́ зело́ возлюби́л еси́; ра́дуйся, я́ко богому́драго наста́вника на пу́ть спасе́ния взыска́л еси́.
Ра́дуйся, я́ко преподо́бному и богоно́сному Се́ргию всеусе́рдно в послуша́ние себе́ преда́л еси́; ра́дуйся, я́ко к богособра́нному ста́ду духо́вных ча́д его́ причте́н бы́л еси́.
Ра́дуйся, я́ко благи́й яре́м и́ноческаго жития́ от преподо́бных ру́к его́ с ра́достию восприя́л еси́; ра́дуйся, я́ко труды́, ско́рби и тесноты́ и́ноческаго жития́ ра́ди Го́спода Иису́са поне́сл еси́ до конца́.
Ра́дуйся, Иа́кове, богому́дре о́тче на́ш.
Конда́к 3.
Си́ла Боже́ственныя любве́, е́юже измла́да испо́лнено бы́сть се́рдце твое́, толи́ко укрепи́ тя́ в по́двизех, я́ко возло́жь ру́ку твою́ на ра́ло, ника́коже вспя́ть обрати́лся еси́, ра́достно воспева́я Бо́гу: Аллилу́иа.
И́кос 3.
Зря́ще равноа́нгельное твое́ житие́, ка́ко кто́ возмо́жет пове́дати глубину́ твоего́ смире́ния, высоту́ самоотрече́ния и широту́ твоея́ любве́, я́же к Бо́гу; по си́ле же на́шей, хвале́бными пе́сньми ублажа́юще, зове́м ти́:
Ра́дуйся, му́жу жела́ний Госпо́дних; ра́дуйся, Ца́рства Небе́снаго и́скренний иска́телю.
Ра́дуйся, сто́лпе благоче́стия непоколеби́мый; ра́дуйся, ве́рный исполни́телю Уста́вов Святы́я Це́ркве.
Ра́дуйся, многосу́етнаго ми́ра любве́ ра́ди Бо́жия отреки́йся; ра́дуйся, благо́е и́го Христо́во на себе́ восприя́вый.
Ра́дуйся, ве́чное спасе́ние души́ твоея́ па́че всего́ взыска́вый; ра́дуйся, в богомы́слии и па́мятовании сме́рти всю́ жи́знь препроводи́вый.
Ра́дуйся, го́рняя му́дрствовати, а не земна́я, от ра́нняго во́зраста научи́выйся; ра́дуйся, води́тельству Небе́сныя Му́дрости всего́ себе́ вручи́вый.
Ра́дуйся, вся́кое плотско́е мудрова́ние дале́че от себе́ отри́нувый; ра́дуйся, не име́вый зде́ пребыва́ющаго гра́да, но гряду́щаго взыска́вый.
Ра́дуйся, Иа́кове, богому́дре о́тче на́ш.
Конда́к 4.
Бу́рею уны́ния и ту́ги серде́чныя, я́же воздви́же на тя́ ненави́дяй вся́каго добра́ диа́вол, ника́коже сокруши́ти возмо́же кре́пкаго твоего́ произволе́ния, е́же рабо́тати Го́сподеви, ни воспрети́ти от блага́го твоего́ начина́ния; наде́ждею бо на по́мощь укрепи́вся, Спаса́ющему тя́ от малоду́шия и от бу́ри, взыва́л еси́ Бо́гу: Аллилу́иа.
И́кос 4.
Слы́шав во Ева́нгелии гла́с Го́спода, глаго́лющий: и́же хо́щет по мне́ ити́, да отве́ржется себе́, и во́змет кре́ст сво́й и по мне́ гряде́т, ни еди́ноже испо́лнил еси́ плотски́х похоте́ний твои́х, но всеусе́рдно взе́м на ра́мена своя́ кре́ст сво́й, после́довал еси́ во все́м Го́споду Иису́су Христу́; сего́ ра́ди досто́йно е́сть велича́ти тя́ си́це:
Ра́дуйся, я́ко в зако́не Госпо́дни де́нь и но́щь поуча́лся еси́; ра́дуйся, я́ко за́поведи Бо́жии поста́вил еси́ а́ки свети́льник нога́ма твои́ма, и све́т стезя́м твои́м.
Ра́дуйся, я́ко оправда́ния Госпо́дня безпоро́чна сохрани́л еси́; ра́дуйся, я́ко Пресвяте́й Тро́ице всеусе́рдно послужи́л еси́.
Ра́дуйся, я́ко любо́вию твое́ю к Бо́гу Отцу́ приближа́лся еси́; ра́дуйся, я́ко послуша́нием твои́м Бо́гу Сы́ну после́довал еси́.
Ра́дуйся, я́ко чистото́ю твое́ю Бо́гу Ду́ху Свято́му во оби́тель себе́ угото́вал еси́; ра́дуйся, я́ко утверди́л еси́ мы́шцы твоя́ на труды́ и́ноческаго послуша́ния.
Ра́дуйся, я́ко связа́л еси́ ру́це твои́ для вся́каго де́ла, Бо́гу неуго́днаго; ра́дуйся, я́ко но́зе твои́ ско́ры соде́лал еси́ к тече́нию на вся́кия доброде́тели.
Ра́дуйся, я́ко стопы́ твоя́ уклони́л еси́ от ше́ствия по пути́ гре́шных; ра́дуйся, я́ко уста́ твоя́ отверза́л еси́ то́чию на славосло́вие Бо́жие и моли́тву.
Ра́дуйся, Иа́кове, богому́дре о́тче на́ш.
Конда́к 5.
Боготе́чная звезда́ яви́лся еси́, преподо́бне Иа́кове, руководя́щая мно́гих ко спаси́тельному пути́; посто́м бо, моли́твами, и всено́щными бде́нии очи́стив ду́шу твою́, возше́л еси́ на высоту́ доброде́телей, воспева́я Бо́гу: Аллилу́иа.
И́кос 5.
Ви́дев, смиренному́дре о́тче Иа́кове, мно́гих во оби́тели преподо́бнаго Се́ргия безмо́лвию прилежа́щих, потща́лся еси́ подража́тель си́х бы́ти, и усто́м твои́м положи́л еси́ хране́ние, в молча́нии вы́ну пребыва́я; удивля́ющеся у́бо таково́му по́двигу твоему́, ублажа́ем тя́ си́це:
Ра́дуйся, житию́ богоно́снаго наста́вника твоего́ Се́ргия поревнова́вый; ра́дуйся, в посте́ и воздержа́нии дре́вних вели́ких отце́в подража́вый.
Ра́дуйся, в бде́ниих неутоми́ма себе́ яви́вый; ра́дуйся, дни́ и но́щи в моли́твах препроводи́вый.
Ра́дуйся, вся́кий ви́д доброде́телей испра́вити вожделе́вый; ра́дуйся, о́браз нестяжа́ния все́м бы́вый.
Ра́дуйся, во́льную нищету́ возлюби́вый; ра́дуйся, то́ю бога́тство ве́чное стяжа́вый.
Ра́дуйся, чистоту́ душе́вную, вку́пе и теле́сную сохрани́вый; ра́дуйся, по́двиг молча́ния с любо́вию понесы́й.
Ра́дуйся, незло́бием и братолю́бием ду́шу твою́ украси́вый; ра́дуйся, вся́кое теле́сное озлобле́ние с ра́достию претерпе́вый.
Ра́дуйся, Иа́кове, богому́дре о́тче на́ш.
Конда́к 6.
Пропове́дник немо́лчный и́стиннаго смире́ния все́м бы́л еси́, блаже́нне Иа́кове, и с сокруше́нным се́рдцем непреста́нно взыва́л еси́ Бо́гу: Аллилу́иа.
И́кос 6.
Возсия́л еси́, я́ко звезда́ пресве́тлая посреде́ богособра́ннаго со́нма и́ноков во оби́тели вели́каго во отце́х Се́ргия, светоле́пным житие́м твои́м, преподо́бне Иа́кове; труды́ бо к труда́м прилага́л еси́, но́щи провожда́я во бде́ниих и коленопреклоне́ниих, на пра́вило же церко́вное и на вся́кое оби́тельное послуша́ние пе́рвый явля́яся. Воспомина́юще сия́, любо́вию вопие́м ти́ си́це:
Ра́дуйся, я́ко на ка́мени Правосла́вныя ве́ры себе́ утверди́л еси́; ра́дуйся, я́ко стра́х Бо́жий в се́рдце твое́м от ю́ности насади́л еси́.
Ра́дуйся, я́ко любо́вию кре́пко, а́ки сме́рть, ко Христу́ Бо́гу прилепи́лся еси́; ра́дуйся, я́ко наде́жду во все́м на Еди́наго Бо́га возложи́л еси́.
Ра́дуйся, я́ко го́рдость жите́йскую дале́че от себе́ отри́нул еси́; ра́дуйся, я́ко воздержа́нием стра́сти плотски́я умертви́л еси́.
Ра́дуйся, я́ко от ми́ра до́льняго в Го́рний ми́р у́м и се́рдце твое́ впери́л еси́; ра́дуйся, я́ко вме́сто тле́нных бла́г нетле́нная и ве́чная возлюби́л еси́.
Ра́дуйся, я́ко вся́ку Ева́нгельскую доброде́тель на се́рдце твое́м изобрази́л еси́; ра́дуйся, я́ко все́ми благи́ми де́лы Го́сподеви всеусе́рдно послужи́л еси́.
Ра́дуйся, я́ко в нощи́ бде́л еси́, пребыва́я в моли́твах и моле́ниих к Бо́гу; ра́дуйся, я́ко во пло́ти сы́й, безпло́тных житию́ поревнова́л еси́.
Ра́дуйся, Иа́кове, богому́дре о́тче на́ш.
Конда́к 7.
Хотя́ преи́скренне к вя́щшим подвиго́м устреми́тися, умоли́л еси́ богому́драго наста́вника твоего́ Се́ргия отпусти́ти тя́ в пусты́ню на одино́кое пребыва́ние. Благослове́ние у́бо прие́м, и моли́тву мно́гу сотвори́в Живонача́льней Тро́ице, отше́л, преподо́бне Иа́кове, в пу́ть сво́й, Го́споду Бо́гу со умиле́нием взыва́я: Аллилу́иа.
И́кос 7.
Ве́лия ра́дости испо́лнися се́рдце твое́, достоблаже́нне Иа́кове, егда́ прише́д в Желе́зный Боро́к реко́мый, обре́л еси́ ме́сто, иде́же сподо́бился еси́ ви́дети пресве́тлое сия́ние; отону́дуже уразуме́в, я́ко благоуго́дно е́сть ме́сто сие́ Го́сподеви, и Кре́ст ту́ водрузи́в, ма́лую ке́ллию устро́ил еси́; по́слежде и оби́тель твои́ми моли́твами, по́ты же и труды́, возгради́ся, на спасе́ние приходя́щих с тобо́ю. Мы́ у́бо, духо́вная ча́да твоя́, святу́ю па́мять твою́ соверша́юще, сия́ тебе́ любо́вию воспису́ем:
Ра́дуйся, удали́тися в пусты́ню соверше́ннаго ра́ди безмо́лвия вожделе́вый; ра́дуйся, в сокрове́ннем от челове́к ме́сте рабо́тати Го́сподеви изво́ливый.
Ра́дуйся, я́ко пустыннолюби́вая го́рлица уедине́ннаго обита́лища взыска́вый; ра́дуйся, градо́в и населе́нных ве́сей удали́выйся.
Ра́дуйся, сла́ву и похвалу́ от челове́к возненави́девый; ра́дуйся, в преде́лех оте́ческаго гра́да Костромы́ всели́тися восхоте́вый.
Ра́дуйся, ве́сь Железноборо́вскую свои́м прише́ствием просвети́вый; ра́дуйся, сподо́бивыйся та́мо Боже́ственнаго виде́ния.
Ра́дуйся, по́мощию Бо́жиею, твои́ми моли́твами и труды́ оби́тель устро́ивый; ра́дуйся, ли́к и́ноков в не́й собра́вый.
Ра́дуйся, пречестны́й хра́м во и́мя Вели́каго во проро́цех Крести́теля Иоа́нна сооруди́вый; ра́дуйся, до́брый па́стырю и благи́й наста́вниче и́щущим спасе́ния.
Ра́дуйся, Иа́кове, богому́дре о́тче на́ш.
Конда́к 8.
Стра́нен бы́л еси́ вся́каго мирска́го пристра́стия, приснопа́мятне о́тче на́ш Иа́кове; па́мять бо сме́ртную во уме́ и се́рдце непреста́нно име́л еси́, и душе́вныма очи́ма Го́спода Сла́вы, на Престо́ле Седя́щаго, вы́ну созерца́л еси́, воспева́я Ему́: Аллилу́иа.
И́кос 8.
Вся́ дни́ и но́щи в труде́х препроводи́л еси́, Преподо́бне о́тче на́ш Иа́кове, о́браз бы́л еси́ терпе́ния и кро́тости; сего́ ра́ди досто́ин яви́лся еси́ по́чести вы́шняго зва́ния, и насле́довал еси́ Ца́рствие Небе́сное, иде́же водворя́яся, помина́й на́с, похва́льная вопию́щих ти́:
Ра́дуйся, я́ко бо́дренно и неусы́пно стоя́л еси́ на стра́же души́ твоея́; ра́дуйся, я́ко положи́л еси́ хране́ние усто́м твои́м, е́же не глаго́лати тщеты́, и вся́кия непра́вды.
Ра́дуйся, я́ко загради́л еси́ ушеса́ твоя́ от праздносло́вия душевре́днаго; ра́дуйся, я́ко слу́х тво́й изощри́л еси́ то́чию на слы́шание песнопе́ний Боже́ственных.
Ра́дуйся, я́ко и в глубо́цей ста́рости обы́чных ти́ по́двигов не оста́вил еси́; ра́дуйся, я́ко в ископа́нии водны́х храни́лищ са́м, па́че ины́х потруди́лся еси́.
Ра́дуйся, я́ко бра́тии твое́й о́браз трудолю́бия бы́л еси́; ра́дуйся, я́ко му́дрыми словесы́, па́че же благи́м житие́м твои́м, на пу́ть спасе́ния наста́вил еси́.
Ра́дуйся, я́ко и безмо́лвием твои́м па́че сло́ва мно́гих поучи́л еси́; ра́дуйся, я́ко мно́гая чудеса́, еще́ жи́в сы́й, сотвори́л еси́.
Ра́дуйся, я́ко мно́жество гла́дных люде́й во оби́тели твое́й пропита́л еси́; ра́дуйся, я́ко николи́же оскуде́ти е́й обеща́л еси́.
Ра́дуйся, Иа́кове, богому́дре о́тче на́ш.
Конда́к 9.
Вся́кия собра́л еси́ в души́ твое́й плоды́ духо́внаго де́лания, и си́х ра́ди честно́е обита́лище Пресвята́го Ду́ха бы́л еси́, во смире́нии се́рдца при́сно воспева́я: Аллилу́иа.
И́кос 9.
Вити́йствующий язы́к не мо́жет изрещи́, коли́кия напа́сти и искуше́ния претерпе́л еси́, Богоблаже́нне Иа́кове, непреста́нную имы́й бра́нь проти́ву тьмы́ предста́теля; оба́че по́мощию Бо́жиею, твои́м же смире́нием и умиле́нными ко Го́споду моли́твами до конца́ того́ низложи́л еси́. Те́мже тя́ велича́ем си́ми:
Ра́дуйся, проти́ву кня́зя тьмы́ му́жественно ратобо́рствовавый; ра́дуйся, му́дростию твоего́ разсужде́ния ле́стныя по́мыслы, от врага́ наноси́мыя, изобличи́вый.
Ра́дуйся, бесо́вския страхова́ния а́ки призра́к вмени́вый; ра́дуйся, си́лою Кре́стною по́лчища де́монская дале́че от себе́ прогна́вый.
Ра́дуйся, твои́ми моли́твами, а́ки мече́м, всю́ си́лу вра́жию порази́вый; ра́дуйся, бу́дущая предве́дети благода́ть прие́мый.
Ра́дуйся, прозира́яй бу́дущая, а́ки настоя́щая; ра́дуйся, благове́рному кня́зю Васи́лию о рожде́нии сы́на прореки́й.
Ра́дуйся, благове́рней княги́не Софи́и ско́рое и ле́гкое от бре́мене разреше́ние у Го́спода испроси́вый; ра́дуйся, исто́чниче благода́тных утеше́ний князе́м и все́м, с ве́рою притека́ющим к тебе́.
Ра́дуйся, сподо́бивыйся са́на игу́менскаго чрез блаже́ннаго Святи́теля Ио́ну; ра́дуйся, я́ко после́довал еси́ того́ уче́нию и житию́.
Ра́дуйся, Иа́кове, богому́дре о́тче на́ш.
Конда́к 10.
Спасти́ хотя́ ду́шу твою́, присноблаже́нне Иа́кове, всего́ себе́ Го́споду Бо́гу пре́дал еси́, су́щу ти́ зде́, на земли́, и в ра́йских селе́ниих со все́ми святы́ми воспева́еши Ему́: Аллилу́иа.
И́кос 10.
Стена́ еси́ незы́блема, и гра́д убе́жища необори́мый все́м, с ве́рою притека́ющим к заступле́нию твоему́, и во все́х ну́ждах в по́мощь тя́ призыва́ющим. Сего́ ра́ди тебе́, Преподо́бне о́тче на́ш Иа́кове, я́ко при́сному к Бо́гу моли́твеннику вопие́м:
Ра́дуйся, я́ко о все́х прося́щих у тебе́ по́мощи и заступле́ния хода́тайствуеши пред Бо́гом; ра́дуйся, я́ко вся́ поле́зная и ко спасе́нию потре́бная у Го́спода про́сиши.
Ра́дуйся, я́ко немощны́м и неду́жным подае́ши исцеле́ния; ра́дуйся, я́ко нечи́стыя ду́хи от стра́ждущих челове́к отгоня́еши.
Ра́дуйся, я́ко от все́х бе́д и напа́стей на́с избавля́еши; ра́дуйся, я́ко скорбя́щим и уныва́ющим утеше́ние подае́ши.
Ра́дуйся, я́ко вдови́цам и си́рым покрови́тель явля́ешися; ра́дуйся, я́ко оби́димых и неви́нно гони́мых защища́еши.
Ра́дуйся, я́ко оби́тель твою́ свои́ми моли́твами огражда́еши и сохраня́еши; ра́дуйся, я́ко духо́вная ча́да своя́ при́сно посеща́еши.
Ра́дуйся, я́ко и окре́стныя ве́си твои́м предста́тельством от находя́щих зо́л невреди́мы сохраня́ются; ра́дуйся, твои́м бо хода́тайством от губи́тельных боле́зней избавля́ются.
Ра́дуйся, Иа́кове, богому́дре о́тче на́ш.
Конда́к 11.
Светоза́рный свети́льник яви́лся еси́, Преподо́бне Иа́кове, не то́чию в Костромски́х преде́лех, но и все́й Росси́йстей земли́; лучи́ бо чуде́с от цельбоно́снаго о́браза твоего́ истека́ющи, достига́ют и до́льних преде́лов. Те́мже прославля́юще Просла́вльшаго тя́ Го́спода Бо́га, воспева́ем Ему́: Аллилу́иа.
И́кос 11.
Предстоя́ Престо́лу Царя́ Сла́вы вку́пе с ли́ки А́нгельскими и все́ми святы́ми, не пре́зри при́сно, о́тче, моле́ния на́шего, и не забу́ди на́с, вопию́щих ти́ сицева́я:
Ра́дуйся, в те́плейшей к Бо́гу любве́ земно́е по́прище твое́ сконча́вый; ра́дуйся, в ча́с кончи́ны твоея́ Пресвята́го Те́ла и Пречестны́я Кро́ве приобщи́выйся.
Ра́дуйся, в ми́ре ду́х тво́й в ру́це Бо́га Отца́ преда́вый; ра́дуйся, от земны́я юдо́ли в Небе́сное Ца́рствие пресели́выйся.
Ра́дуйся, с ли́ки А́нгельскими на Небеси́ торжеству́яй; ра́дуйся, со́нму Преподо́бных оте́ц и по́стников сопричте́нный.
Ра́дуйся, со все́ми святы́ми неизрече́ннаго весе́лия наслажда́яйся; ра́дуйся, от А́нгелов с торжество́м в ра́дость Го́спода твоего́ введе́нный.
Ра́дуйся, вене́ц Ца́рствия от Христа́, Царя́ Сла́вы, по достоя́нию по́двигов твои́х прие́мый; ра́дуйся, я́ко ца́рствуеши на Небеси́ со Христо́м, Ему́же сраспина́лся еси́ на земли́.
Ра́дуйся, ублажа́емый на земли́; ра́дуйся, прославля́емый на Небеси́.
Ра́дуйся, Иа́кове, богому́дре о́тче на́ш.
Конда́к 12.
Благода́ть Бо́жия и доны́не излива́ется от целе́бнаго о́браза твоего́ на все́х, с ве́рою и любо́вию приступа́ющих к нему́, и моли́твенно в ско́рбех, в боле́знех же и злы́х обстоя́ниих тя́ призыва́ющих, Бо́гу же вопию́щих: Аллилу́иа.
И́кос 12.
Пое́м твоя́ по́двиги, ублажа́ем равноа́нгельное житие́ твое́, почита́ем па́мять твою́, ди́вный уго́дниче Христо́в Иа́кове; от избы́тка се́рдца вопие́м ти́ си́це:
Ра́дуйся, по́стников похвало́ и утвержде́ние; ра́дуйся, мона́шествующих до́брый па́стырю и наста́вниче.
Ра́дуйся, Костромски́х преде́лов украше́ние; ра́дуйся, те́плый и при́сный о на́с ко Христу́ Бо́гу моли́твенниче.
Ра́дуйся, сея́ страны́ свети́льниче пресве́тлый; ра́дуйся, Бо́жия благода́ти на́м хода́таю.
Ра́дуйся, немощны́х врачу́ и неду́жных цели́телю; ра́дуйся, теле́с на́ших здра́вия храни́телю.
Ра́дуйся, ду́ш на́ших на стезя́х спасе́ния руководи́телю; ра́дуйся, все́м правосла́вным христиа́ном во все́х ну́ждах помо́щниче.
Ра́дуйся, Иа́кове, богому́дре о́тче на́ш.
Конда́к 13.
О, Преблаже́нне и Богому́дре о́тче на́ш Иа́кове, ны́нешнее на́ше прие́мши приноше́ние, умоли́ Го́спода Бо́га, о е́же изба́витися на́м от вся́кия ско́рби, бе́д и напа́стей, и смертоно́сных боле́зней, па́че же ве́чных му́к; Ца́рствие же небе́сное со все́ми святы́ми насле́довати, да сподо́бимся вы́ну с тобо́ю воспева́ти: Аллилу́иа.
И́кос 1.
А́нгел земны́й и небе́сный челове́к яви́лся еси́, преподо́бне о́тче на́ш Иа́кове; а́ще бо и челове́к естество́м бы́в, но я́ко безпло́тен на земли́ пожи́л еси́, вся́кое жите́йское отложи́в попече́ние, да Еди́ному благоугоди́ши Бо́гу; те́мже тя́, я́ко уго́дника Христо́ва и при́снаго собесе́дника А́нгелов любо́вию почита́юще, похва́льными пе́сньми ублажа́ем си́це:
Ра́дуйся, Костромски́х преде́лов сла́вное прозябе́ние; ра́дуйся, отца́ благочести́ваго о́трасле.
Ра́дуйся, ма́тере благогове́йныя пло́де; ра́дуйся, Христа́ Бо́га от ю́ности па́че всего́ возлюби́вый.
Ра́дуйся, стезя́м Того́ после́довати всеусе́рдно возжеле́вый; ра́дуйся, вся́ кра́сная ми́ра сего́ во уме́ты вмени́вый.
Ра́дуйся, за́поведь Ева́нгелия, е́же ни о чесо́м же от су́щих в ми́ре пещи́ся, с любо́вию испо́лнивый; ра́дуйся, ве́лиим воздержа́нием измла́да те́ло твое́ изнури́вый.
Ра́дуйся, пло́ть твою́ ду́хови покори́вый; ра́дуйся, благи́й ра́бе и ве́рный, да́нный тебе́ тала́нт сугу́бо возрасти́вый.
Ра́дуйся, слуго́ Госпо́день, преблагу́ю во́лю Влады́ки своего́ сотвори́вый; ра́дуйся, от у́тра до ве́чера твоея́ жи́зни в виногра́де Христо́ве потруди́выйся.
Ра́дуйся, Иа́кове, богому́дре о́тче на́ш.
Конда́к 1.
Избра́нный чудотво́рче, и преди́вный уго́дниче Христо́в Иа́кове, источа́яй неоску́дно исцеле́ния приходя́щих к тебе́ с ве́рою, с любо́вию похва́льная воспису́ем ти́, преподо́бне; ты́ же, я́ко име́яй дерзнове́ние ко Святе́й Тро́ице, от вся́ких на́с бе́д твои́ми моли́твами изба́ви, и вся́ поле́зная испроси́ зову́щим ти́:
Ра́дуйся, Иа́кове, богому́дре о́тче на́ш.
Моли́тва пе́рвая.
О, Преподо́бне и Богому́дре о́тче на́ш Иа́кове! Ве́мы, я́ко с ли́ки А́нгельскими и все́ми святы́ми предстои́ши при́сно Престо́лу Го́спода Вседержи́теля, и ве́лие и́маши к Нему́ дерзнове́ние моли́тися о все́х, с ве́рою и умиле́нными слеза́ми в по́мощь тя́ призыва́ющих. Не премолчи́ у́бо, вопия́ за ны́, недосто́йныя, ко Го́споду Бо́гу, да отврати́т гне́в сво́й, пра́ведно за беззако́ния на́ша на ны́ дви́жимый, и да изба́вимся вся́ких скорбе́й, бе́д же и напа́стей, и злы́х обстоя́ний, и благоче́стно поживе́м в бу́дущем ве́це, ходя́ще в за́поведех и оправда́ниих Госпо́дних непоро́чно. О, Преблаже́нне и Боголюбе́зне о́тче на́ш Иа́кове! Умоли́ Го́спода, да не оскуде́ют во оби́тели твое́й и́стинныя ревни́тели и́ноческаго жития́ и подража́тели свято́му и богоуго́дному житию́ твоему́; сохрани́ предста́тельством твои́м к Бо́гу оби́тель и страну́ сию́ от огня́, гла́да, меча́, наше́ствия иноплеме́нных и от вся́каго зла́, и все́м, с ве́рою и любо́вию притека́ющим во твою́ оби́тель испроси́ у Го́спода Бо́га грехо́в проще́ние, телесе́м здра́вие, исправле́ние грехо́внаго жития́ и ве́чное спасе́ние; да с тобо́ю и все́ми святы́ми сподо́бимся прославля́ти в Тро́ице Сла́вимаго Бо́га, Отца́, и Сы́на и Свята́го Ду́ха, во ве́ки веко́в. Ами́нь.
Моли́тва втора́я.
Преподо́бне и богоно́сне о́тче на́ш Иа́кове! Приими́ ны́не на́с тебе́ усе́рдно моля́щихся и припа́дающих ко всечестно́му и многоцеле́бному твоему́ гро́бу, иде́же свято́е твое́ и многотру́дное поко́ится те́ло, ду́хом же на Небесе́х предстоя́ Святе́й Тро́ице со а́нгелы и преподо́бных оте́ц ли́ки; моли́ся о ча́дех твои́х, о́тче, да изба́вимся от вся́ких скорбе́й, боле́зней и обстоя́ний, и благоче́стно поживе́м в настоя́щем житии́, ходя́ще в за́поведех и оправда́ниих Госпо́дних безпоро́чно, и да яви́мся после́дователи свято́му и равноа́нгельному житию́ твоему́. Е́й, Преподо́бне о́тче, мо́лим тя́, испроси́ на́м же и все́м, ве́рою к тебе́ притека́ющим грехо́в проще́ние, телесе́м здра́вие, исправле́ние жития́ и ве́чное спасе́ние. Я́ко да твои́м предста́тельством спасе́ннии, сла́ву возсыла́ти сподо́бимся в Тро́ице сла́вимому Бо́гу, Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.
