Акафист святому преподобному Илариону Троекуровскому
Не утвержден для общецерковного использования.
Избра́нный уго́дниче Христо́в Иларио́не, достосла́вне затво́рниче, ста́рче и чудотво́рче, велича́юще просла́вльшаго тя́ Го́спода, умиле́нное сие́ пе́ние тебе́ прино́сим, свобожде́ния от бе́д и напа́стей о тебе́ испроша́ющи, ве́рою и любо́вию восхваля́ем тя́, зову́ще:
А́нгелом уподо́бился еси́, преподо́бне, пло́тию еще́ на земли́ пожи́в; ду́хом бо вы́ну горе́ воспаря́я, безстра́стия безпло́тных дости́гл и дара́ми Свята́го Ду́ха преиспо́лнился еси́. Житию́ же твоему́ богоуго́дному подража́ти хотя́ще, во умиле́нии вопие́м ти́:
Ви́дящи в тебе́ бу́дущаго сла́вы Бо́жия ревни́теля, еще́ о́троком изведе́ тя́ Госпо́дь из до́му о́тчаго к престаре́лому сро́днику твоему́, у него́же в послуша́нии ду́хом возраста́я, ве́лие усе́рдие к посту́, моли́тве и хра́му Бо́жию показа́, чи́стыми де́тскими усты́ сла́вя Бо́гу: Аллилу́иа.
Ра́зумом в го́рнем пребыва́я, святы́й о́тче, повину́ющися роди́телема в супру́жество вступи́, оба́че в не́м, Алекси́ю Челове́ку Бо́жию подража́я, де́вство безпоро́чное и чистоту́ душе́вную яви́л еси́, и́маже удивля́ющеся воспева́ем ти́ похва́льная:
Си́лою свы́ше оболки́йся, кре́пость яви́ проти́ву искуше́ний от ми́ра, пло́ти и диа́вола, си́льне на тя́ вою́ющих, поколеба́ти же не могу́щих. Всего́ же себе́ в ру́це Бо́жии вверя́я, во гра́де Ки́еве от уго́дников Пече́рских в монасты́рь ити́ благослове́ние прия́л еси́, жела́я та́мо до конца́ сея́ вре́менныя жи́зни пе́ти Бо́гу: Аллилу́иа.
Иму́щи бога́тство терпе́ния, горни́ло искуше́ний проше́л еси́, преподо́бне: у́бо чрез жену́ твою́ и бра́тию мона́шескую, твоему́ высо́кому жи́тельству зави́дящих и ло́жно тя́ оклевета́вших, попусти́ Всеблаги́й Госпо́дь изгна́ние тебе́ из оби́тели, его́же с незло́бою претерпе́в, слы́шиши похвалы́ сия́:
Бу́рю но́вых гоне́ний воздви́же на тя́ зло́бный ра́тник, дре́вний зави́стник, и па́ки со вся́ким смире́нием ты́ у́бо, Иларио́не блаже́нне, с ме́ста на ме́сто преселя́лся еси́, удаля́ющеся от гони́телей и па́ки водворя́яся в пусты́ни, Бо́гу же непреста́нную хвалу́ воздая́, пою́щи: Аллилу́иа.
Слы́шаще свято́е житие́ твое́, достосла́вне Иларио́не, и ви́дяще, я́ко о мно́зех ди́вных по́двизех поревнова́л еси́, искуше́ния за сие́ претерпева́я жесто́кая, удивля́хуся лю́дие тебе́, сла́вяще Бо́га, ди́внаго во святы́х Свои́х. Та́кожде и мы́ любо́вию восхваля́ем тя́, о́тче, и вопие́м ти́ си́це:
Боже́ственная дарова́ния многоразли́чна улучи́в, смире́ние глубо́кое наипа́че возлюби́, блаже́нне о́тче; па́мятуя же не́мощь челове́ческаго естества́ и Петро́во отрече́ние помина́я, але́ктора в пеще́ре твое́й держа́, по кри́ку его́ на нощну́ю моли́тву встава́ше, ра́достне взыва́ти Бо́гу: Аллилу́иа.
Ви́дев преподо́бный житие́ сие́ я́ко се́нь мимоходя́щее и я́коже со́ние востаю́щаго исчеза́ющее, то́чию о жи́зни бу́дущаго ве́ка прилежа́. Те́мже с ра́достию и благодаре́нием неисче́тныя ско́рби и боле́зни понесе́, мы́сленне стра́сти Христо́вы созерца́я. Мы́ же, безстра́стию его́ дивя́щеся, хвале́бное пе́ние прино́сим:
Пропове́дник вои́стину благоче́стия яви́лся еси́, уго́дниче Христо́в, я́ко на вся́к де́нь Боже́ственную Литурги́ю посеща́л еси́, духо́вныя си́лы ча́стым приобще́нием Святы́х Христо́вых Та́ин укрепля́я, по причаще́нии же свети́лся еси́, сла́вяще распе́ншагося за ны́ Христа́: Аллилу́иа.
Возсия́ в тебе́ ди́вный чудотво́рец, егда́ затво́рнице Мела́нии Еле́цкой, тя́ ви́дети хотя́щей, я́ве на Па́сху яви́лся еси́, в то́ежде вре́мя у супру́г боголюби́вых бы́ти не престая́, яково́му чу́ду о тебе́ бы́вшему дивя́щеся, ти́и вси́ воспе́ша тебе́ такова́я:
Хотя́й безмо́лвие моли́твенное улучи́ти, не имя́ше поко́я и на ма́лое вре́мя от мно́жества люде́й, к тебе́ приходя́щих, преподо́бне, я́ко и на дре́ве для у́мнаго де́лания принужде́н бе́ скрыва́тися, иде́же дни́е и но́щи в моли́тве и посте́ пребыва́ше, а́ки ра́йская пти́ца поя́ Бо́гу: Аллилу́иа.
Но́ваго ви́девше тя́ избра́нника Бо́жия, благода́тныя да́ры изоби́льно стяжа́вшаго во е́же ду́ши и телеса́ исцеля́ти, ду́си нечи́стии изгоня́ти и коему́ждо блага́я ко спасе́нию подава́ти, издале́че притека́ху к тебе́ лю́дие и взыва́ху ти́ благода́рне такова́я:
Стра́нник и пришле́ц бы́в на земли́, преподо́бне, те́сным и терни́стым путе́м в Небе́сное Оте́чество ше́ствова и други́м се́й пу́ть освеща́л еси́ оте́ческим наставле́нием и руково́дством спаси́тельным, все́м к тебе́ прибега́ющим, науча́я и́х Бо́га сла́вити все́м се́рдцем: Аллилу́иа.
Ве́сь в го́рнем умо́м пребыва́, преподо́бне, и на́с, суето́ю омраче́нных, не оставля́ше любо́вию свое́ю. Извеще́ние же от Го́спода получи́вше, всели́лся еси́ в Троеку́рово, иде́же до конца́ свои́х дне́й бе́ служа́ Бо́гу и бли́жним. Сего́ ра́ди приими́ от на́с благохвале́ния сия́:
Все́х вопроша́ющих тя́ любо́вию назида́л еси́, до́брый пу́ть ко спасе́нию указу́ющи, те́мже и преподо́бнаго Амвро́сия, еще́ безве́стна миряни́на су́ща, в О́птину пу́стынь напра́вил еси́, проро́чески вели́каго в не́м ста́рца прови́дя, благословя́ща Бо́га: Аллилу́иа.
Вети́и красноречи́выя ви́дим посра́мленныя о благода́ти слове́с твои́х, богому́дре Иларио́не, я́ко коему́ждо из притека́ющих за сове́том к тебе́ поле́зная ко спасе́нию подава́л еси́, во́лю Бо́жию о челове́ке возвеща́я. Разсужде́ние же твое́ богому́дрое похваля́я, та́ко вопие́м ти́:
Спаси́тельное в тебе́ прибе́жище обрето́ша собра́вшиися о́крест тебе́ се́стры боголюби́выя, в мона́шестве подвиза́тися хотя́щия, и́мже ты́, преподо́бне Иларио́не, предре́кл еси́ на ме́сте се́м святе́й оби́тели бы́ти, вы́ну боголю́бицам оте́ческую любо́вь и забо́ту явля́ше, подвиза́я все́х пе́ти Бо́гу: Аллилу́иа.
Стена́ огражде́ния яви́лся еси́ а́гницам избра́ннаго ста́да Христо́ва не то́чию при жи́зни, но и по блаже́нней кончи́не твое́й, я́ко и воздви́гнутое на ни́х от власте́й гоне́ние небе́сным твои́м предста́тельством угаси́л еси́, и общи́на вско́ре утверди́ся. Вы́ну по́мощь и заступле́ние твое́ прие́млющи, си́це тя́ сла́вяху духо́вная ча́да твоя́:
Пе́ние непреста́нное Го́споду Иису́су вознося́, дости́гл еси́ жития́ твоего́ сконча́ния, преподо́бне; ду́хом бо́др бя́ше, пло́тию же па́че и па́че изнемога́я, я́ко не возмощи́ тебе́ в хра́м Бо́жий ходи́ти, ни приходя́щих к тебе́ приима́ти, чрез келе́йника си́м отвещава́я, да не без утеше́ния оти́дут. Зна́мение же ви́димое приближе́ния кончи́ны твоея́ от Бо́га улучи́в, воспе́ Ему́: Аллилу́иа.
Светопода́тельный свети́льник бы́в в житии́, и по преставле́нии твое́м не оставля́еши на́с, преподо́бне: оби́тель устроя́я, прося́щим помога́я, неве́рующих в свя́тость твою́ в со́ниих кро́тко вразумля́я. Безбо́жну же лихоле́тию сконча́вшуся, и оби́тель твоя́ возроди́ся, и яви́ на́м Госпо́дь мо́щи твоя́ благоуха́нныя, к ни́мже ве́рнии притека́юще, с любо́вию взыва́ют ти́ си́це:
Благода́тнаго тя́ пред Бо́гом предста́теля све́дуще, приле́жно мо́лим ти́ ся́, о́тче святы́й: не преста́й моля́щи Христа́ Бо́га, да свободи́т держа́ву на́шу от наше́ствия духо́внаго иноплеме́нников, от тлетво́рных инозе́мных обы́чаев, от безбо́жия и нищеты́, да спасе́ние те́м улучи́вше, пое́м тобо́ю благоде́ющему на́м Бо́гу: Аллилу́иа.
Пою́щи с ра́достию и любо́вию твое́ прославле́ние, преподо́бне Иларио́не, восхваля́ем тя́, я́ко многомо́щнаго моли́твенника о на́с пред Бо́гом, ско́раго помо́щника все́м с ве́рою у тебе́ прося́щим, огражде́ние же необори́мое от вся́ких бе́д и напа́стей, и ве́рно взыва́ем ти́:
О, пречу́дный уго́дниче Бо́жий, преподо́бне о́тче Иларио́не! Приими́ моле́ние сие́ ма́лое, от усе́рдия тебе́ приноси́мое, и умоли́ Го́спода Сла́вы, да не осу́дит на́с Пра́ведный Судия́ во о́гнь гее́нский, но Своего́ Ца́рствия ве́чнаго да сподо́бит, в жи́зни гряду́щей пе́ти Ему́: Аллилу́иа.
Этот конда́к читается трижды, затем и́кос 1-й и конда́к 1-й.
А́нгелом уподо́бился еси́, преподо́бне, пло́тию еще́ на земли́ пожи́в; ду́хом бо вы́ну горе́ воспаря́я, безстра́стия безпло́тных дости́гл и дара́ми Свята́го Ду́ха преиспо́лнился еси́. Житию́ же твоему́ богоуго́дному подража́ти хотя́ще, во умиле́нии вопие́м ти́:
Избра́нный уго́дниче Христо́в Иларио́не, достосла́вне затво́рниче, ста́рче и чудотво́рче, велича́юще просла́вльшаго тя́ Го́спода, умиле́нное сие́ пе́ние тебе́ прино́сим, свобожде́ния от бе́д и напа́стей о тебе́ испроша́ющи, ве́рою и любо́вию восхваля́ем тя́, зову́ще:
О свяще́нная главо́, преблаже́нне о́тче Иларио́не! Не забу́ди убо́гих твои́х до конца́, но помина́й на́с всегда́ во святы́х твои́х и благоприя́тных моли́твах к Бо́гу. Помяни́ ста́до твое́, е́же са́м упа́сл еси́, и не забу́ди посеща́ти ча́д твои́х. Моли́, о́тче свяще́нный, за ны́, де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны́ ко Го́споду, и не пре́зри на́с, ве́рою и любо́вию чту́щих тя́. Помина́й на́с недосто́йных у Престо́ла Вседержи́теля, и не преста́й моля́ся о на́с ко Христу́ Бо́гу: я́ко дана́ тебе́ благода́ть моли́тися за ны́. Не мни́м бо тя́ ме́ртва су́ща: а́ще бо те́лом и преста́вился еси́ от на́с, но и по сме́рти жи́в сы́й пребыва́еши. Не отступа́й от на́с ду́хом, сохраня́я на́с от стре́л вра́жиих и вся́кия пре́лести бесо́вския, и ко́зней диа́вольских, па́стырю на́ш до́брый. А́ще бо и моще́й твои́х ра́ка пред очи́ма на́шима ви́дима е́сть всегда́, но свята́я твоя́ душа́ со А́нгельскими во́инствы, со безпло́тными ли́ки, досто́йно весели́тся. Ве́дущи у́бо тя́ и по сме́рти жи́ва су́ща, тебе́ припа́даем и тебе́ мо́лимся: моли́ся о на́с Всеси́льному Бо́гу, о по́льзе ду́ш на́ших, и испроси́ на́м вре́мя на покая́ние, да невозбра́нно пре́йдем от земли́ на не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да яви́мся со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, че́сть и поклоне́ние, со Безнача́льным Его́ Отце́м, и с Пресвяты́м, и Благи́м, и Животворя́щим Его́ Ду́хом, ны́не и при́сно, и во ве́ки веко́в. Ами́нь.
О, преди́вный уго́дниче Бо́жий, преподо́бне и Богоно́сне о́тче на́ш Иларио́не, Троеку́ровский затво́рниче и чудотво́рче, земли́ Ли́пецкия сла́во и похвало́! Чрез все́ житие́ твое́ неукло́нно Бо́гу после́довав, любве́ ра́ди к Нему́ мно́зи по́двизи, ско́рби и боле́зни поне́сл еси́ и еще́ на земли́ хра́м че́стен Свята́го Ду́ха чистото́ю души́ твоея́ соде́лался еси́. Те́мже да́р разсужде́ния и сове́та, да́р прозорли́вости, да́р исцеле́ния и чудотворе́ния еще́ в земно́й твое́й жи́зни в изоби́лии от Го́спода прия́л еси́. Ве́дуще ве́лие твое́ пред Бо́гом дерзнове́ние, с ве́рою и любо́вию к тебе́ притека́ем и усе́рдно мо́лим тя́: испроси́ у Го́спода Вседержи́теля ми́ру умире́ние, жития́ христиа́нскаго на Руси́ утвержде́ние, от гла́да и па́губы избавле́ние, душа́м же на́шим спасе́ние. Умоли́ Всеще́драго Влады́ку, да угаси́т пла́мень страсте́й на́ших и низпо́слет ро́су благода́ти Своея́ на изсо́хшия сердца́ на́ша, да и мы́ моли́твами твои́ми пло́д духо́вный принесе́м и сподо́бимся стра́нствие земно́е непосты́дно сконча́ти и в Оте́честве Небе́снем ча́сть со святы́ми улучи́ти, да сла́вим и пое́м Всесвято́е и́мя Отца́, и Сы́на, и Свята́го Ду́ха, во ве́ки веко́в. Ами́нь.