Конда́к 1.

Избра́нный воево́до ратобо́рцев за ве́ру Христо́ву и пресла́вный уго́дниче Бо́жий, кре́пкий победи́телю враго́в держа́вы Ру́сския и чудотво́рче преди́вный, преподо́бне о́тче Илие́, прославля́юще Го́спода Сла́вы, да́вшаго тя́ все́м правосла́вным засту́пника и моли́твенника, похва́льная воспису́ем ти́ пе́ние. Ты́ же, предстоя́ Престо́лу Святы́я Тро́ицы, от вся́ких зо́л и напа́стей сохраня́й с ве́рою и любо́вию зову́щих ти́:

Ра́дуйся, преподо́бне о́тче Илие́, святы́й во́ине и вели́кий засту́пниче Ру́сския земли́.

И́кос 1.

А́нгелов и челове́ков Творе́ц призва́ тя́, уго́дниче Бо́жий Илие́, да бу́деши все́м лю́дем ру́сским о́браз му́жества и ве́рности во бране́х лю́тых со враги́ оте́чества на́шего. Мы́ же, прославля́юще чу́дный по́двиг земны́х трудо́в твои́х, благогове́йно зове́м ти́:

Ра́дуйся, от рожде́ния твоего́ Бо́гом избра́нный; ра́дуйся, в безве́стности нача́ло жи́зни своея́ сохрани́вый.

Ра́дуйся, при креще́нии и́мя вели́каго проро́ка Бо́жия Илии́ получи́вый; ра́дуйся, благода́тию Христо́вою от неду́га тя́жкаго исцеле́нный.

Ра́дуйся, на во́инское служе́ние Го́сподем призва́нный; ра́дуйся, избра́ние твое́ по́двиги мно́гими оправда́вый.

Ра́дуйся, проро́ку Илии́ в ре́вности по Бо́зе и спасе́нии люде́й подража́вый; ра́дуйся, любо́вь нелицеме́рную от наро́да своего́ сниска́вый.

Ра́дуйся, обе́ты и́ночества житие́ свое́ увенча́вый; ра́дуйся, в со́нме преподо́бных отце́в Ки́ево-Пече́рских просла́вленный.

Ра́дуйся, ду́шу свою́ за дру́ги полага́вый; ра́дуйся, к во́инству Небе́сному сопричте́нный.

Ра́дуйся, преподо́бне о́тче Илие́, святы́й во́ине и вели́кий засту́пниче Ру́сския земли́.

Конда́к 2.

Ви́девше роди́тели тебе́, преподо́бне, три́десять ле́т в разслабле́нии су́ща, недоумева́ху, оба́че с ве́рою и наде́ждою моля́ху Еди́наго и и́стиннаго Бо́га, подаю́щаго стра́ждущим исцеле́ние, и вку́пе с тобо́ю воспева́ху ему́: Аллилу́иа.

И́кос 2.

Ра́зум небе́сный свы́ше дарова́ся тебе́, егда́ гла́с посла́нников Бо́жиих услы́шал еси́ и по сло́ву и́х, воста́в со одра́ твоего́, а́ки николи́же боле́вый, в ра́дости неизглаго́ланней благодари́л еси́ безме́зднаго Врача́ твоего́, Христа́. Мы́ же, дивя́щеся таково́му о тебе́ Бо́жию промышле́нию, со умиле́нием вопие́м ти́:

Ра́дуйся, благочести́вых роди́телей твои́х ча́до возлю́бленное; ра́дуйся, наде́ждо и утеше́ние серде́ц и́х боголюби́вых.

Ра́дуйся, ра́дости роди́телей твои́х исполне́ние; ра́дуйся, благове́рия пре́дков твои́х насле́дниче.

Ра́дуйся, от рожде́ния благода́тию Бо́жиею покрове́нный; ра́дуйся, от ю́ности Го́спода возлюби́вый.

Ра́дуйся, гра́да Му́рома духо́вное украше́ние; ра́дуйся, Ру́сския страны́ благода́тное озаре́ние.

Ра́дуйся, кре́пости Бо́жией тезоимени́те; ра́дуйся, я́ко по и́мени твоему́ и житие́ твое́ блаже́нно бы́сть.

Ра́дуйся, я́ко о тебе́ ра́дуются а́нгели на Небеси́; ра́дуйся, я́ко о тебе́ Бо́га сла́вят челове́цы на земли́.

Ра́дуйся, преподо́бне о́тче Илие́, святы́й во́ине и вели́кий засту́пниче Ру́сския земли́.

Конда́к 3.

Си́лою свы́ше укрепи́вся, услы́шал еси́, блаже́нне, гла́с муже́й, Бо́гом по́сланных: «бу́деши ты́, Илие́, богаты́рь вели́кий, и сме́рть тебе́ во бране́х не пи́сана е́сть». Ты́ же, восприя́в си́лу богаты́рскую, напра́вил еси́ стопы́ своя́ на рабо́ту крестья́нскую, я́ко Бо́г укрепля́ше тя́, поспешеству́я в труде́х твои́х. Те́мже моли́ся Бо́гу, подаю́щему на́м времена́ плодоно́сна, и укрепи́ все́х тружда́ющихся на земли́ и пою́щих Ему́: Аллилу́иа.

И́кос 3.

Име́я помышле́ние в се́рдце свое́м, послужи́ти Христу́, дарова́вшему тебе́ исцеле́ние и си́лу вели́кую, изше́л еси́ из дому́ роди́телей твои́х и ме́ч в ру́це восприи́м, напра́вился еси́ на бра́нь проти́ву си́л вра́жиих за ве́ру правосла́вную и за зе́млю Ру́сскую. Те́мже и мы́, ублажа́юще благо́е твое́ изволе́ние, с любо́вию восхваля́ем тя́ си́це:

Ра́дуйся, я́ко смотре́нием Бо́жиим три́десять ле́т в боле́зни неисце́льней пребыва́л еси́; ра́дуйся, удосто́ивыйся от Го́спода благода́тнаго посеще́ния.

Ра́дуйся, чуде́сное исцеле́ние ми́лостию Бо́жиею получи́вый; ра́дуйся, исцеле́нием от боле́зни роди́телей твои́х возвесели́вый.

Ра́дуйся, от стра́нников Бо́жиих ве́сть о служе́нии твое́м прие́мый; ра́дуйся, проро́ческое и́х прорече́ние испо́лнивый.

Ра́дуйся, здра́вие прие́мый, да послу́жиши Исцели́вшему тя́; ра́дуйся, утверди́вый мы́шцы своя́ на труды́ и рабо́ту крестья́нскую.

Ра́дуйся, на слу́жбу Го́споду я́ко во́ин призва́нный; ра́дуйся, до́м роди́тельский служе́ния ра́ди Бо́гу и отчи́зне свое́й оста́вивый.

Ра́дуйся, соверше́нную поко́рность во́ле Бо́жией показа́вый; ра́дуйся, ди́вный о́браз богатыря́ святору́сскаго в себе́ яви́вый.

Ра́дуйся, преподо́бне о́тче Илие́, святы́й во́ине и вели́кий засту́пниче Ру́сския земли́.

Конда́к 4.

Бу́рю злы́х напа́стей побежда́я, проше́л еси́ ве́сь пу́ть, тебе́ преднарече́нный, нося́ тяготы́ во́инскаго служе́ния, и та́ко благода́тию Бо́жиею храни́тель оте́чества своего́ и непобеди́мый воево́да на́шему во́инству яви́лся еси́, ратобо́рствовал бо еси́, не земно́му кня́зю угожда́я, но жела́нием и ре́вностию по Бо́гу полки́ иноплеме́нных побежда́я. Те́мже благода́рственно воспева́л еси́ пе́снь хвале́бную Го́споду: Аллилу́иа.

И́кос 4.

Ви́девше разбо́йницы, с мече́м ожида́вшии тя́ на пути́ к ма́тери градо́в ру́сских, Ки́еву, небоя́зненное твое́ му́жество и кре́пость во́инскую, убоя́шася, ты́ же презре́л еси́ и́х де́рзости и победи́л еси́ зломы́сливших на тя́. Те́мже мо́лим ти́ ся́: разбо́йники пощади́вый и к покая́нию те́х обрати́вый, напра́ви и на́ша ду́ши к покая́нию и спаси́ моли́твами твои́ми пою́щих та́ко:

Ра́дуйся, на по́двиги во́инския и духо́вныя от роди́телей твои́х благослове́нный; ра́дуйся, благослове́ние сие́ я́ко святы́ню до сме́рти соблюды́й.

Ра́дуйся, разбо́йников преще́ние ни во что́ же вмени́вый; ра́дуйся, милосе́рдием враго́в, тобо́ю побежде́нных, удиви́вый.

Ра́дуйся, вше́дый в сто́льный гра́д Ки́ев я́ко богаты́рь святору́сский; ра́дуйся, от князе́й земли́ Ру́сския досто́йно почте́нный.

Ра́дуйся, Ру́сския держа́вы защи́тниче; ра́дуйся, прави́телем ея́ благове́рным помо́щниче кре́пкий.

Ра́дуйся, на по́двиг бра́ни во́инския и духо́вныя вдохнови́телю; ра́дуйся, оби́дящих и жестокосе́рдых гро́зный вразуми́телю.

Ра́дуйся, небе́снаго ра́ди Оте́чества земно́му оте́честву послужи́вый; ра́дуйся, Бо́гом возлю́бленный и ру́сскими людьми́ воспева́емый.

Ра́дуйся, преподо́бне о́тче Илие́, святы́й во́ине и вели́кий засту́пниче Ру́сския земли́.

Конда́к 5.

Боготе́чною звездо́ю восте́кл еси́, сла́вный Илие́, ко свято́му гра́ду Ки́еву, ре́вностию воспламеня́емь о защи́те земли́ Ру́сския, сопроти́вных побежда́я и вра́жеския полки́ прогоня́я. И ны́не наставля́еши на пу́ть служе́ния отчи́зне, к ве́чному Небе́сному Оте́честву веду́щий все́х ве́рных, пою́щих Бо́гу: Аллилу́иа.

И́кос 5

Ви́девше тя́, блаже́нне Илие́, николи́же во бране́х побежда́ема, неве́рнии еди́наго и́мене твоего́ устраша́хуся. Ты́ же, я́ко до́блий во́ин Христо́в, на стра́же пребыва́л еси́ непоколеби́м и мече́м посека́л еси́ нечести́вых в би́твах. Сего́ ра́ди, помина́юще испо́лненное ве́ры му́жество твое́, прославля́ем тя́ си́це:

Ра́дуйся, во́ине Христо́в, еще́ в земне́м житии́ от Него́ сла́вою венча́нный; ра́дуйся, и во сла́ве свое́й ду́х смиренному́дрия соблюды́й.

Ра́дуйся, мече́м богаты́рским вооруже́нный; ра́дуйся, мно́жество враго́в в би́твах победи́вый.

Ра́дуйся, си́лою Креста́ во бране́х укрепле́нный; ра́дуйся, руко́ю Всевы́шняго во все́х би́твах ди́вно охраня́емый.

Ра́дуйся, враго́в Руси́ гро́зное устраше́ние; ра́дуйся, во́инства христиа́нскаго прославле́ние.

Ра́дуйся, зло́бу и кова́рство враго́в отчи́зны твоея́ посрами́вый; ра́дуйся, Ру́сския земли́ защи́тниче ве́рный.

Ра́дуйся, лю́бящия оте́чество во́ины на побе́ду умудря́яй; ра́дуйся, я́ко заступле́нием твои́м и ны́не держа́ва Ру́сская огражда́ется.

Ра́дуйся, преподо́бне о́тче Илие́, святы́й во́ине и вели́кий засту́пниче Ру́сския земли́.

Конда́к 6.

Пропове́дует вся́ вели́кая Ру́сь о тебе́, Илие́ сла́вне, ты́ бо я́ко кре́пкий щи́т огражда́еши оте́чество на́ше непобеди́мым ору́жием, Боже́ственною благода́тию дарова́нным ти́ свы́ше. Не лиши́ и на́с, гре́шных, твоея́ по́мощи, тебе́ бо са́ми себе́ и дру́г дру́га вверя́ем и во умиле́нии серде́ц воспева́ем просла́вльшему тя́ Христу́ Бо́гу: Аллилу́иа.

И́кос 6.

Возсия́ сла́ва по́двигов твои́х не то́кмо в пресла́внем гра́де Ки́еве, но и по все́м градо́м и ве́сем страны́ на́шея. Те́мже лю́дие ру́сскии доны́не сла́ву и благодаре́ние Бо́гу прино́сят и тебе́, засту́пника своего́, похвала́ми воспева́ют та́ко:

Ра́дуйся, во́инства ру́сскаго кре́посте несокруши́мая; ра́дуйся, победи́телю вра́г ви́димых и неви́димых.

Ра́дуйся, благочести́вых во́инов в би́твах укрепля́яй; ра́дуйся, покро́вом моли́тв твои́х в де́нь бра́ни те́х осеня́яй.

Ра́дуйся, от наше́ствия иноплеме́нных на́ше огражде́ние; ра́дуйся, от междоусо́бныя бра́ни охране́ние.

Ра́дуйся, я́ко вели́кому му́жеству твоему́ вся́к во́зраст покланя́ется; ра́дуйся, я́ко и в земля́х за́пада просла́влено бы́сть и́мя твое́.

Ра́дуйся, люде́й ру́сских любо́вию Христо́вою возлюби́вый; ра́дуйся, ве́ру свою́ и любо́вь к Бо́гу де́лы яви́вый.

Ра́дуйся, о́браз ве́рности в служе́нии Бо́гу и оте́честву показа́вый; ра́дуйся, свято́ю ре́вностию о спасе́нии держа́вы Ру́сския пламене́вый.

Ра́дуйся, преподо́бне о́тче Илие́, святы́й во́ине и вели́кий засту́пниче Ру́сския земли́.

Конда́к 7.

Хотя́ Человеколю́бец Госпо́дь яви́ти в житии́ твое́м, богому́дре Илие́, о́браз не то́кмо во́ином христолюби́вым, но и лико́м и́ноческим, внуши́ тебе́ оста́вити сла́ву земну́ю и восприя́ти постриже́ние во оби́тели Ки́ево-Пече́рстей, в не́йже подвиза́лся еси́ до́бре посто́м, бде́нием и моли́твою, воспева́я непреста́нно Бо́гу а́нгельскую пе́снь: Аллилу́иа.

И́кос 7.

Но́вую благода́ть во и́ночестем о́бразе прие́м, преподо́бне Илие́, но́вым по́двигом украси́л еси́ житие́ твое́, подража́я во все́х доброде́телех преподо́бным отце́м Анто́нию и Феодо́сию и про́чим чудотво́рцем Пече́рским. Те́мже сла́вим тя́ по достоя́нию и глаго́лем:

Ра́дуйся, во огра́ду оби́тели Ки́ево-Пече́рския прише́дый; ра́дуйся, посто́м, бде́нием и моли́твами Христу́ Бо́гу до́бре угоди́вый.

Ра́дуйся, в а́нгельский о́браз досто́йно облече́нный; ра́дуйся, па́ки и во и́ноцех Илия́ нарече́нный.

Ра́дуйся, доспе́хи во́инския на власяни́цу и́ноческую премени́вый; ра́дуйся, пло́ть свою́ ду́ху покори́вый.

Ра́дуйся, я́ко в житии́ твое́м Анто́нию ди́вному подража́л еси́; ра́дуйся, я́ко в по́двизех твои́х Феодо́сию чу́дному ревнова́л еси́.

Ра́дуйся, по́двигов и́ноческих ревни́телю; ра́дуйся, чистоты́ и воздержа́ния храни́телю.

Ра́дуйся, в ри́зу смире́ния оде́янный; ра́дуйся, и́ноческия обе́ты до сме́рти соблюды́й.

Ра́дуйся, преподо́бне о́тче Илие́, святы́й во́ине и вели́кий засту́пниче Ру́сския земли́.

Конда́к 8.

Стра́нника и прише́льца в ми́ре се́м помышля́л еси́ себе́ бы́ти, преподо́бне о́тче Илие́, те́мже о благи́х земны́х вся́кое попече́ние отложи́л еси́ и гряду́щаго гра́да Иерусали́ма Небе́снаго взыску́я, приноси́л еси́ Го́сподеви житие́ преподо́бное, я́ко бы́ти тебе́ во пло́ти а́нгелу и небе́сному челове́ку и невозбра́нно пе́ти а́нгельскую пе́снь Бо́гу: Аллилу́иа.

И́кос 8.

Ве́сь обле́клся еси́ во вся́ ору́жия Бо́жия, я́ко во́ин Христо́в, препоя́сав чре́сла твоя́ и́стиною, обо́лкся броне́ю пра́вды, восприя́л еси́ щи́т ве́ры и шле́м спасе́ния и ме́ч духо́вный, и́миже и возмо́гл еси́ вся́ наве́ты лука́ваго победи́ти. Помози́ у́бо твои́ми моли́твами все́м на́м проти́витися искуше́нием вра́жиим и подража́ти тебе́ в по́двизех, воспева́юще ти́ хвалы́ сия́:

Ра́дуйся, во оби́тели Ки́ево-Пече́рстей приста́нище спасе́ния стяжа́вый; ра́дуйся, под кро́вом Ки́евских чудотво́рцев по́двиг и́ноческий соверши́вый.

Ра́дуйся, преподо́бных Пече́рских духо́вный учениче́; ра́дуйся, доброде́телей и́х прее́мниче.

Ра́дуйся, и́ноков Ки́ево-Пече́рския Ла́вры украше́ние; ра́дуйся, подвиза́ющихся в не́й благонаде́жное заступле́ние.

Ра́дуйся, приходя́щих в ню́ на поклоне́ние благи́й предста́телю; ра́дуйся, оби́тели твоея́ неотсту́пный храни́телю.

Ра́дуйся, гра́да Ки́ева све́тлое ра́дование; ра́дуйся, ру́сских и́ноков сла́во.

Ра́дуйся, го́рняго ми́ра жи́телю; ра́дуйся, до́льняго ми́ра му́дрый стра́нниче.

Ра́дуйся, преподо́бне о́тче Илие́, святы́й во́ине и вели́кий засту́пниче Ру́сския земли́.

Конда́к 9.

Все́ естество́ а́нгельское удиви́ся пресла́вней кончи́не твое́й, о́тче преподо́бне, е́юже житие́ твое́ досто́йно венча́л еси́. Та́кожде и Це́рковь Ру́сская Правосла́вная, ку́пно со все́ми чудотво́рцы Пече́рскими в моли́твенники тя́ прие́мши, благода́рне о тебе́ вопие́т Бо́гу: Аллилу́иа.

И́кос 9.

Вети́и многовеща́ннии недоуме́ют досто́йно восхвали́ти и просла́вити по́двиги твоя́, преподо́бне Илие́, я́же твори́л еси́ на земли́, но и по преставле́нии твое́м в ве́чное ца́рство сла́вы не оставля́еши на́с, гре́шных, и в пеще́рах Ки́евских нетле́нными твои́ми моща́ми пребыва́еши, в шу́йце имы́й ору́жия я́зву, десни́цу же троепе́рстно сложе́нную. Те́мже, я́ко жи́ву су́щу с на́ми, от всего́ се́рдца гла́с хвалы́ прино́сим ти́:

Ра́дуйся, пра́ведно и богоуго́дно тече́ние земно́е соверши́вый; ра́дуйся, ду́х тво́й с весе́лием в ру́це Госпо́дни преда́вый.

Ра́дуйся, пред кончи́ною свое́ю персты́ десни́цы троепе́рстно во и́мя Святы́я Тро́ицы сложи́вый; ра́дуйся, к Трисо́лнечному Све́ту восше́дый.

Ра́дуйся, те́лом сме́ртным во оби́тели Пече́рстей погребе́нный; ра́дуйся, душе́ю же безсме́ртною к Сио́ну го́рнему воспари́вый.

Ра́дуйся, от оби́тели земны́я во оби́телех Небе́сных водвори́выйся; ра́дуйся, честны́я и многоцеле́бныя мо́щи твоя́ святы́я на́м оста́вивый.

Ра́дуйся, в со́нме преподо́бных Пече́рских звездо́ сия́ющая; ра́дуйся, Ла́вры Пече́рския сла́во и ра́дование.

Ра́дуйся, все́х преподо́бных Ру́сских сподви́жниче; ра́дуйся, к Богоро́дице моли́твенниче на́ш неусы́пный.

Ра́дуйся, преподо́бне о́тче Илие́, святы́й во́ине и вели́кий засту́пниче Ру́сския земли́.

Конда́к 10.

Спасти́ хотя́ зе́млю Ру́сскую от наше́ствий вра́жиих, Моисе́ю и Дави́ду и про́чим вожде́м люде́й Бо́жиих подража́я, му́жественно во бране́х подвиза́лся еси́, о́тче преподо́бне. Те́мже и на Небеси́ с ни́ми, я́ко победи́тель, торжеству́еши, моля́ся о во́инствующих за пра́вду и благода́рственно вопию́щих Бо́гу: Аллилу́иа.

И́кос 10.

Стена́ еси́ и огражде́ние от враго́в ви́димых и неви́димых земли́ Ру́сския, в не́йже, о́тче Илие́, жи́тельствовал еси́, и ны́не пребыва́еши нетле́нным телесе́м твои́м. Сего́ ра́ди и мы́, гре́шнии, во дни́ сму́ты и нестрое́ний в стране́ на́шей припа́даем к тебе́, о́тче святы́й, и сле́зно взыва́ем: охраня́й и ны́не оте́чество на́ше от наше́ствий иноплеме́нных, от раздо́ров и междоусо́бныя бра́ни, да не поги́бнет Ру́сь Правосла́вная и Бо́гом люби́мая и да не преста́нет велича́ти тя́ си́це:

Ра́дуйся, ди́вную любо́вь ко оте́честву земно́му показа́вый; ра́дуйся, по все́й Ру́сской земли́ Бо́гом просла́вленный.

Ра́дуйся, Ру́сския страны́ огражде́ние; ра́дуйся, Правосла́вия в не́й утвержде́ние.

Ра́дуйся, вражду́ющих на зе́млю на́шу укроти́телю; ра́дуйся, о ми́ре держа́вы Ру́сския пред Го́сподем предста́телю.

Ра́дуйся, за До́м Пресвяты́я Богоро́дицы, страну́ Ру́сскую, да́же до сме́рти стоя́ти науча́яй; ра́дуйся, в по́двизех и страда́ниих за пра́вду ве́рных укрепля́яй.

Ра́дуйся, нетле́нием моще́й твои́х сла́вно от Бо́га возвели́ченный; ра́дуйся, все́м с ве́рою приходя́щим к ни́м исцеле́ния подава́яй.

Ра́дуйся, о все́х граде́х и ве́сех Ру́сских моли́твенниче; ра́дуйся, я́ко моли́твами твои́ми лю́дие расточе́ннии любо́вию собира́ются.

Ра́дуйся, преподо́бне о́тче Илие́, святы́й во́ине и вели́кий засту́пниче Ру́сския земли́.

Конда́к 11.

Пе́ние моле́бное, с любо́вию приноси́мое дне́сь в па́мять твою́ ми́лостивно услы́ши, преподо́бне Илие́, и бу́ди во вся́ дни́ благи́й на́ш предста́тель и при́сный за ны́ ко Го́споду моли́твенник, да о тебе́ ра́дующеся, вси́ сы́нове ру́сстии еди́ными усты́ и еди́нем се́рдцем просла́вят Бо́га, пою́ще Ему́: Аллилу́иа.

И́кос 11.

Све́тлое пра́зднество твое́, преподо́бне Илие́, я́ко торжество́ ве́ры и пра́вды соверша́ет свята́я Це́рковь Христо́ва, созыва́ющи на духо́вную трапе́зу ве́рная ча́да своя́. Приими́ у́бо гла́сы хвале́ния, тебе́, небе́сному засту́пнику на́шему, с любо́вию от на́с возноси́мыя:

Ра́дуйся, Це́ркве Ру́сския свети́льниче; ра́дуйся, а́нгеле земны́й и челове́че небе́сный.

Ра́дуйся, я́ко с горя́щим свети́льником вше́л еси́ в ра́дость Христа́; ра́дуйся, я́ко и на́с благода́тным све́том просвеща́еши.

Ра́дуйся, све́том жития́ твоего́ страну́ на́шу озари́вый; ра́дуйся, я́ко ви́дяще по́двиги твоя́, челове́цы Отца́ Небе́снаго прославля́ют.

Ра́дуйся, хра́мы Бо́жия, во и́мя твое́ освяще́нныя, благоволе́нием твои́м осени́вый; ра́дуйся, я́ко моли́твою пред ико́ною твое́ю душе́вное утеше́ние прие́млем.

Ра́дуйся, блаже́нства святы́х удосто́енный; ра́дуйся, сострада́ния к лю́дем преиспо́лненный.

Ра́дуйся, я́ко с преподо́бными и пра́ведными весели́шися; ра́дуйся, я́ко со все́ми святы́ми при́сно торжеству́еши.

Ра́дуйся, преподо́бне о́тче Илие́, святы́й во́ине и вели́кий засту́пниче Ру́сския земли́.

Конда́к 12.

Благода́ть ми́ра и едине́ния наро́дом слове́нским, благоде́нствие держа́ве Ру́сской и земли́ на́шей тишину́ испроси́ у Бо́га, преподо́бне, я́ко да и мы́, от все́х раско́лов и разделе́ний свобо́ждшеся, в ми́ре воспои́м просла́вльшему тя́ Еди́ному Миротво́рцу все́х Го́споду: Аллилу́иа.

И́кос 12.

Пою́ще равноа́нгельное житие́ твое́, преподо́бне, хва́лим, сла́вим и велича́ем укрепи́вшаго тя́ Го́спода, дарова́вшаго на́м в тебе́ богатыря́ духо́внаго святору́сския земли́ я́ко о́браз достоподража́тельный до сконча́ния ве́ка. Приими́ у́бо, уго́дниче Христо́в, от на́с, смире́нных, с любо́вию тя́ почита́ющих, похвалы́ сия́:

Ра́дуйся, наро́дом слове́нским засту́пниче; ра́дуйся, оте́честву на́шему печа́льниче нелицеме́рный.

Ра́дуйся, я́ко твои́м предста́тельством от ра́спрей и междоусо́бий свобожда́емся; ра́дуйся, я́ко в почита́нии твое́м во еди́но бра́тство соединя́емся.

Ра́дуйся, могу́щества и сла́вы держа́вы Ру́сския утверди́телю; ра́дуйся, во́инскаго и богаты́рскаго ду́ха в не́й насади́телю.

Ра́дуйся, враго́в иноплеме́нных смиря́яй; ра́дуйся, ско́рбь на́шу в ра́дость претворя́яй.

Ра́дуйся, я́ко во успе́нии свое́м на́с не оставля́еши; ра́дуйся, я́ко о проще́нии грехо́в на́ших Го́спода Бо́га умоля́еши.

Ра́дуйся, я́ко тобо́ю милосе́рдие Бо́жие призыва́ем; ра́дуйся, я́ко тобо́ю спасе́ние ве́чное получи́ти упова́ем.

Ра́дуйся, преподо́бне о́тче Илие́, святы́й во́ине и вели́кий засту́пниче Ру́сския земли́.

Конда́к 13.

О преди́вный уго́дниче Христо́в, преподо́бне о́тче Илие́, засту́пниче и во́ине земли́ Ру́сския, приими́ от на́с, недосто́йных, сие́ ма́лое моле́ние, с любо́вию тебе́ приноси́мое, и умоли́ Всеблага́го Го́спода си́лу свы́ше правосла́вному во́инству пода́ти, сохрани́ гра́д тво́й, оби́тель твою́ и вся́ лю́ди страны́ на́шея от вся́каго зла́. Благоприя́тным твои́м хода́тайством испроси́ на́м у Христа́ Бо́га проще́ния прегреше́ний на́ших, да с тобо́ю и все́ми святы́ми в Ца́рствии Небе́снем сподо́бимся пе́ти Спаси́телю на́шему: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгелов и челове́ков Творе́ц призва́ тя́, уго́дниче Бо́жий Илие́, да бу́деши все́м лю́дем ру́сским о́браз му́жества и ве́рности во бране́х лю́тых со враги́ оте́чества на́шего. Мы́ же, прославля́юще чу́дный по́двиг земны́х трудо́в твои́х, благогове́йно зове́м ти́:

Ра́дуйся, от рожде́ния твоего́ Бо́гом избра́нный; ра́дуйся, в безве́стности нача́ло жи́зни своея́ сохрани́вый.

Ра́дуйся, при креще́нии и́мя вели́каго проро́ка Бо́жия Илии́ получи́вый; ра́дуйся, благода́тию Христо́вою от неду́га тя́жкаго исцеле́нный.

Ра́дуйся, на во́инское служе́ние Го́сподем призва́нный; ра́дуйся, избра́ние твое́ по́двиги мно́гими оправда́вый.

Ра́дуйся, проро́ку Илии́ в ре́вности по Бо́зе и спасе́нии люде́й подража́вый; ра́дуйся, любо́вь нелицеме́рную от наро́да своего́ сниска́вый.

Ра́дуйся, обе́ты и́ночества житие́ свое́ увенча́вый; ра́дуйся, в со́нме преподо́бных отце́в Ки́ево-Пече́рских просла́вленный.

Ра́дуйся, ду́шу свою́ за дру́ги полага́вый; ра́дуйся, к во́инству Небе́сному сопричте́нный.

Ра́дуйся, преподо́бне о́тче Илие́, святы́й во́ине и вели́кий засту́пниче Ру́сския земли́.

Конда́к 1.

Избра́нный воево́до ратобо́рцев за ве́ру Христо́ву и пресла́вный уго́дниче Бо́жий, кре́пкий победи́телю враго́в держа́вы Ру́сския и чудотво́рче преди́вный, преподо́бне о́тче Илие́, прославля́юще Го́спода Сла́вы, да́вшаго тя́ все́м правосла́вным засту́пника и моли́твенника, похва́льная воспису́ем ти́ пе́ние. Ты́ же, предстоя́ Престо́лу Святы́я Тро́ицы, от вся́ких зо́л и напа́стей сохраня́й с ве́рою и любо́вию зову́щих ти́:

Ра́дуйся, преподо́бне о́тче Илие́, святы́й во́ине и вели́кий засту́пниче Ру́сския земли́.

Моли́тва пе́рвая.

О вели́кий подви́жниче и уго́дниче Христо́в, преподо́бне о́тче Илие́! Ты́ в во́инстем чи́не за и́мя Христо́во кре́пко подвиза́лся еси́ и насле́дие держа́вы Ру́сския огражда́л еси́. Ты́, оста́вив сла́ву земну́ю, избра́л еси́ безмо́лвное житие́ в монастыре́ Ки́ево-Пече́рском и яви́лся еси́ гра́ду Ки́еву и оби́тели твое́й засту́пник кре́пок. О, хра́брый в ра́тех, враго́м прогони́телю и оби́димым засту́пниче, бу́ди на́м побо́рник на вся́ ви́димыя и неви́димыя враги́ на́ша, помози́ и на́м пребы́ти тве́рдым, непоколеби́мым в испыта́ниях, да твое́ю по́мощию и кре́пким предста́тельством посра́мятся вси́ явля́ющии на́м зла́я. о́тче святы́й, ускори́ ны́не на по́мощь, утвержда́я ми́р и тишину́ в земли́ на́шей, и умоли́ Го́спода все́х на́с сохрани́ти от гла́да, губи́тельства, тру́са и пото́па, от огня́ и меча́, от нахожде́ния иноплеме́нных и междоусо́бныя бра́ни, и от тлетво́рных ве́тр, и от смертоно́сныя я́звы, и от вся́каго зла́ изба́вити, ра́спри и раздо́ры, посреде́ единове́рных бра́тий возника́ющия, умири́ти, отпа́дших па́ки в единомы́слие привести́ и все́х на́с едине́нием ду́ха и любве́ во Еди́ней Святе́й Собо́рней и Апо́стольстей Це́ркви соедини́ти. Не забу́ди, свя́тче Бо́жий, ми́лостиво присеща́ти гра́д тво́й и оби́тель твою́ и вся́ гра́ды и ве́си страны́ на́шея правосла́вныя, сохраня́я и́х моли́твами твои́ми от вся́каго зла́. Помяни́ все́х ве́ру и любо́вь к тебе́ иму́щих, и́мя твое́ моли́твенно призыва́ющих и на поклоне́ние моще́м твои́м святы́м приходя́щих, и вся́ во благи́х проше́ния и́х ми́лостиво испо́лни, и сподо́би на́с по́мощию твое́ю спасе́ние ве́чное получи́ти и Ца́рствие Небе́сное насле́довати, да славосло́вим непреста́нно Отца́, и Сы́на, и Свята́го Ду́ха во ве́ки веко́в. Ами́нь.

Моли́тва втора́я.

О преподо́бне и богоно́сне о́тче на́ш Илие́, гра́да Му́рома и всея́ земли́ Ру́сския украше́ние, хра́брый во бране́х враго́м прогони́телю и оби́димым засту́пниче! Со́браннии в хра́ме твое́м и пред ико́ною твое́ю покланя́ющиися лю́дие, мо́лим тя́, умоли́ милосе́рдаго Бо́га, да ми́лостивно услы́шит на́с и да́рует стране́ на́шей побе́ду на сопроти́вныя; и па́ки, припа́дающе, мо́лим тя́: укрепи́ да́нною тебе́ благода́тию во бране́х во́инство правосла́вное, разруши́ си́лы восстаю́щих на ны́ враго́в, да постыдя́тся и посра́мятся, и де́рзость и́х да сокруши́тся, и да уве́дят и уразуме́ют, я́ко Госпо́дь е́сть защи́тник на́ш, по на́м побо́рствуяй. О ско́рый на́ш помо́щниче и засту́пниче, укрепи́ моли́твами твои́ми сла́бую во́лю на́шу, во е́же обрести́ на́м му́жество духо́вное и сокруше́ние о гресе́х на́ших; моли́ся о Це́ркви Ру́сстей, гра́де твое́м и оби́тели Пече́рстей, в не́йже нетле́нныя мо́щи твоя́ святы́я почива́ют, и о все́м оте́честве на́шем. Е́й, о́тче святы́й, не забу́ди на́с, всегда́ моля́щихся тебе́ о по́мощи, и сподо́би на́с, гре́шных, получи́ти от Бо́га неизрече́нная блага́я, я́же угото́ва лю́бящим Его́, я́ко да с тобо́ю и со все́ми святы́ми просла́вим Отца́, и Сы́на, и Свята́го Ду́ха, ны́не и при́сно и во ве́ки веко́в. Ами́нь.