Конда́к 1.

Небе́снии ра́дуются и земни́и веселя́тся, восхваля́я многотру́дный по́двиг тво́й, святы́й Иоа́нне Многострада́льный. Вои́стину бо претерпе́л еси́ ско́рби мно́ги ра́ди исполне́ния обе́та чистоты́, да́ннаго тобо́ю Небе́сному Жениху́ Христу́, сего́ ра́ди и мы́ вопие́м ти́:

Ра́дуйся, святы́й Иоа́нне многострада́льный, ско́рый во бране́х помо́щниче и те́плый моли́твенниче о душа́х на́ших.

И́кос 1.

Ангелоподо́бное житие́ в пеще́ре те́сней провожда́ше, ве́лии труды́ и по́двиги ди́внии подъя́л еси́ да Христа́ приобря́щеши, те́мже и от на́с немощны́х приими́ похвалы́ сия́:

Ра́дуйся, от ве́ка на по́двиг ди́вный предъизбра́нный; ра́дуйся, ра́ди избра́ния твоего́ мно́гими страда́ньми увенча́нный.

Ра́дуйся, терпе́нием се́рдце свое́ укрепи́вый; ра́дуйся, пути́ Госпо́дни сохрани́вый.

Ра́дуйся, те́м Го́споду угоди́вый и мзду́ ве́лию за сие́ получи́вый.

Ра́дуйся, святы́й Иоа́нне многострада́льный, ско́рый во бране́х помо́щниче и те́плый моли́твенниче о душа́х на́ших.

Конда́к 2.

Си́лою Вы́шняго укрепля́емый во многотру́днем по́двизе твое́м и боре́нии непреста́ннем с по́хотию плотско́ю, а́лчбою и жа́ждою умерщвля́л еси́ себя́, непреста́нно поя́ Бо́гу: Аллилу́иа.

И́кос 2.

Име́л еси́ безме́рное терпе́ние и непреста́нную моли́тву, ра́зум же неукло́нен на по́мощь свы́ше в страда́нии твое́м и борьбе́, да просла́вится в тебе́ Госпо́дь, во упова́ние пою́щим:

Ра́дуйся, страда́ниями твои́ми диа́вола победи́вый; ра́дуйся, а́лчбу и жа́жду претерпе́вый.

Ра́дуйся, вся́каго поко́я себя́ лиши́вый; ра́дуйся, бу́рю плотски́я бра́ни ути́шивый.

Ра́дуйся, со все́ми избра́нными на Небеси́ ца́рствуеши.

Ра́дуйся, святы́й Иоа́нне многострада́льный, ско́рый во бране́х помо́щниче и те́плый моли́твенниче о душа́х на́ших.

Конда́к 3.

Ви́дя Госпо́дь тве́рдую во́лю твою́ во бра́ни с пло́тию, наста́ви тя́ испроси́ти моли́твою твое́ю по́мощи первонаста́вника Анто́ния преподо́бнаго, и я́же пребы́в де́нь и но́щь в пеще́ре его́, моля́щеся у гро́ба его́, пою́ще непреста́нно Бо́гу: Аллилу́иа.

И́кос 3.

Име́яй кре́пкое упова́ние на Го́спода, да моли́твою преподо́бнаго Анто́ния исцеле́н бу́деши, не посрами́ тя́ Госпо́дь, но во́лею Госпо́днею прорече́ ти́ из гро́ба преподо́бный Анто́ний велегла́сно: «Иоа́нне, Иоа́нне, затвори́ся зде́ в пеще́ре се́й от ми́ра и пребу́ди в молча́нии, да си́м побо́риши борю́щую тя́ стра́сть,»– сего́ ра́ди и мы́ ра́достно ти́ зове́м:

Ра́дуйся, три́десять ле́т в пеще́ре те́мней и те́сней пребы́вый; ра́дуйся, при конце́ жи́зни свое́й, прише́дшу ти́ бра́ту, по́двиг сво́й откры́вый.

Ра́дуйся, в по́двизе терпе́ния и сокруше́ния о гресе́х пра́ведно пожи́вый; ра́дуйся, от земны́х скорбе́й к небе́сному упокое́нию прише́дый.

Ра́дуйся, при́сный моли́твенниче о все́х почита́ющих тя́.

Ра́дуйся, святы́й Иоа́нне многострада́льный, ско́рый во бране́х помо́щниче и те́плый моли́твенниче о душа́х на́ших.

Конда́к 4.

Бу́рею по́мыслов обурева́емь, утружда́л еси́ те́ло свое́ посто́м и бо́дрствованием, по попуще́нию Бо́жию не дости́гши си́м поко́я, немо́лчно пе́л еси́ Го́сподеви: Аллилу́иа.

И́кос 4.

Помышля́ше о труда́х ве́лиих, понесе́нных лежа́щими ту́ в пеще́ре уго́дницех Бо́жиих и подража́юще и́м, сне́м ты́ с те́ла своего́ оде́жду и оде́яхся тяже́лыми вери́гами желе́зными; мы́ же дивля́хуся по́двизем твои́м, пое́м терпе́нию твоему́:

Ра́дуйся, жития́ святы́х отце́в Пече́рских подража́телю; ра́дуйся, кре́пкий во бране́х вои́телю.

Ра́дуйся, желе́зными вери́гами стра́сти плотски́я утесни́вый; ра́дуйся, от ю́ности Христа́ все́м се́рдцем возлюби́вый.

Ра́дуйся, и́го Христо́во на себя́ возложи́вый.

Ра́дуйся, святы́й Иоа́нне многострада́льный, ско́рый во бране́х помо́щниче и те́плый моли́твенниче о душа́х на́ших.

Конда́к 5.

Вели́кий и тягча́йший по́двиг подъя́л еси́, многострада́льный Иоа́нне, егда́ наста́ли дни́ Святы́я Четыредеся́тницы, ты́ ископа́ша глубо́кую я́му и вле́зши в ню́, засы́пал еси́ са́м ся́ земле́ю, поя́ Го́споду Си́л: Аллилу́иа.

И́кос 5.

А́нгели удиви́шася по́двизе твоему́, егда́ пребы́л еси́ под тя́жестию земли́ во вся́ дни́ Вели́каго Поста́, име́я свобо́дными то́кмо главу́ и ру́це, сего́ ра́ди приими́ от немощны́х похвалы́ по́двизе твоему́ благо́му:

Ра́дуйся, А́нгелов по́двигом свои́м удиви́вый; ра́дуйся, чистоту́ се́рдца своего́ сохрани́вый.

Ра́дуйся, де́вственников похвало́; ра́дуйся, целому́дрия зерца́ло.

Ра́дуйся, кре́пкий спобо́рниче борю́щимся со страстьми́ и похотьми́.

Ра́дуйся, святы́й Иоа́нне многострада́льный, ско́рый во бране́х помо́щниче и те́плый моли́твенниче о душа́х на́ших.

Конда́к 6.

Посто́м, моли́твою, по́двигом ди́вным пло́ть свою́ ду́хови порабо́тивый и ра́достно, укрепля́ющему тя́, Го́сподеви пе́л еси́ ди́вную пе́снь: Аллилу́иа.

И́кос 6.

Возсия́л еси́ по́двигом твои́м, о́тче Иоа́нне Многострада́льный, а́ще бо и в те́мней пеще́ре в тесноте́ и тя́жести пребыва́л еси́, оба́че луча́ми ве́ры пресве́тлыя и наде́жды непосты́дныя сия́нием озаря́емый, слы́шиши от все́х похвалы́ по́двигом твои́м:

Ра́дуйся, в заблужде́нии су́щих, руководи́телю; ра́дуйся, житие́ свое́ исправля́ющих, до́брый попечи́телю.

Ра́дуйся, малоду́шием и уны́нием коле́блемых, ве́рный помо́щниче и укрепи́телю; ра́дуйся, в небреже́нии ко спасе́нию спя́щих, неле́ностный возбуди́телю.

Ра́дуйся, до́брый страда́льче Христо́в.

Ра́дуйся, святы́й Иоа́нне многострада́льный, ско́рый во бране́х помо́щниче и те́плый моли́твенниче о душа́х на́ших.

Конда́к 7.

Хотя́ всезло́бный вра́г до́брому по́двигу твоему́ прети́ти и из земли́ нападе́ с но́вым зле́йшим кова́рством на тя́, и загоре́стася но́зи и вся́ ко́сти твоя́ в я́ме земле́ю засы́пани су́ще, ты́ же ра́довахуся душе́ю, я́ко си́м страда́нием сохрани́ся от скве́рны блу́дной и чи́стым се́рдцем взыва́л еси́ Го́споду: Аллилу́иа.

И́кос 7.

Но́вым по́двигом твои́м посра́млен бы́сть иско́нный вра́г, егда́ ты́ предпоче́л лю́те сгоре́ти те́лом, в земли́ зары́том Го́спода ра́ди, не́жели бы́ти поруга́нным от бе́са, на сие́ мы́, у́мныма очи́ма взира́юще, си́це взыва́ем ти́:

Ра́дуйся, я́рости и хи́трости вра́жией смире́нный укроти́телю; ра́дуйся, за́поведей Бо́жиих усе́рдный исполни́телю.

Ра́дуйся, подвиза́ющимся в благоче́стнем житии́, всеси́льный покрови́телю; ра́дуйся, одолева́емых от сопроти́вных, но не отчаева́ющихся, благонаде́жный укрепи́телю.

Ра́дуйся, борю́щихся с по́хотию, нетру́дный и си́льный сора́тниче.

Ра́дуйся, святы́й Иоа́нне многострада́льный, ско́рый во бране́х помо́щниче и те́плый моли́твенниче о душа́х на́ших.

Конда́к 8.

Оста́вшимся ма́ло дне́м Четыредеся́тницы, ты́, Многострада́льне о́тче, во о́чию узре́л еси́ стра́шнаго и лю́таго зми́я, ды́шащаго на тя́ пла́менем, осыпа́юща тя́ и́скрами и хотя́щаго пожра́ти тя́, дабы́ изгна́ти из затво́ра твоего́, ве́рно пою́ща Всеблаго́му Бо́гу: Аллилу́иа.

И́кос 8.

Наступи́вшей све́тлой но́щи Христо́ва Воскресе́ния, внеза́пу нападе́ на тя́ се́й лю́тый зми́й, захвати́л еси́ в свою́ па́сть твою́ главу́ и ру́це, опаля́я власы́ на главе́ и браде́, и, находя́сь в се́й лю́тей напа́сти, ты́ о́тче Многострада́льне, из глубины́ се́рдца взыва́л Го́споду: «Бо́же Спаси́телю мо́й, почто́ оста́вил мя́ еси́, изба́ви мя́ гре́шнаго от се́ти лука́ваго, си́лящагося поглоти́ти мя́, покажи́ си́лу Твою́ и спаси́ мя́!». И то́тчас блесну́л еси́ све́т я́ко мо́лния и лю́тый зми́й исчезе́, сего́ ра́ди и мы́ велича́ем терпе́ние твое́ и вопие́м:

Ра́дуйся, глубо́ким смире́нием себя́ украси́вый; ра́дуйся, ка́ко врага́ зло́бы одолева́ти на́с научи́вый.

Ра́дуйся, зане́ по́ст и непреста́нную моли́тву, я́ко ору́жие проти́ву врага́ употреби́вый; ра́дуйся, в те́х же боголюбе́зных доброде́телях мно́гих утверди́вый.

Ра́дуйся, те́сным и приско́рбным житие́м сла́ву Бо́жию умно́живый.

Ра́дуйся, святы́й Иоа́нне многострада́льный, ско́рый во бране́х помо́щниче и те́плый моли́твенниче о душа́х на́ших.

Конда́к 9.

По осия́нию тя́ све́том а́ки мо́лниею, ты́ услы́шал еси́ гла́с Сама́го Го́спода: «Иоа́нне, Иоа́нне, се́, тебе́ дана́ бы́сть по́мощь, смотри́ са́м, да не пострада́еши в бу́дущем ве́це». Ты́ же, поклони́вшися Го́сподеви, вопроша́ше Его́: «Почто́, Го́споди, оста́вил мя́ еси́ на жесто́кое муче́ние, пою́щаго Ти́ непреста́нно: Аллилу́иа?»

И́кос 9.

«По ме́ре твоего́ терпе́ния бы́ло по́слано ти́ испыта́ние, дабы́ ты́, испы́танный огне́м искуше́ния, ста́л еси́ чи́ст я́ко зла́то. Вы́ше си́л не допу́стит Госпо́дь искуше́ния челове́ку, дабы́ не изнемо́г и не бы́л пору́ган от врага́». За тако́е терпе́ние твое́ и мы́ немощны́я вопие́м ти́:

Ра́дуйся, я́ко по́двиг тво́й Сами́м Го́сподом Вседержи́телем восприя́тый; ра́дуйся, ко Христу́ Бо́гу, о все́х чту́щих тя́, моли́твенниче неуста́нный.

Ра́дуйся, вра́жией горды́ни кре́пкий смири́телю; ра́дуйся, вра́жиих наве́тов и служе́ния врагу́ достохва́льный упраздни́телю.

Ра́дуйся, вра́жиих сете́й и па́губных ко́зней врага́ му́жественный искорени́телю.

Ра́дуйся, святы́й Иоа́нне многострада́льный, ско́рый во бране́х помо́щниче и те́плый моли́твенниче о душа́х на́ших.

Конда́к 10.

«Я́ко разу́мный хозя́ин поруча́ет кре́пким и си́льным рабо́м бо́льшую и тя́жкую рабо́ту, а малоси́льным – ле́гкую, та́ко и ты́ во бра́ни твое́й с теле́сною по́хотию, а́ще и проси́л еси́ да изба́влю тя́ от нея́, но пребыва́л еси́ в неукло́ннем терпе́нии и смире́нии пред во́лею Мое́ю, сего́ ра́ди помоли́ся у́бо бли́з лежа́щему от тебя́ уго́днику Моему́, дабы́ о́н исцели́л тебя́ от блу́дной стра́сти». Ты́ же, не зна́я и́мени лежа́щаго ту́ бра́та, воскли́кнул: «Го́споди! Моли́твами сего́ преподо́бнаго исцели́ мя́, да вопию́ Ти́: Аллилу́иа».

И́кос 10.

Осия́й тя́ несказа́нный све́т, в ко́ем пребы́л еси́ до отше́ствия твоего́, не нужда́яся в све́те ни дне́м, ни но́щию, и вси́ досто́йныя, ви́дяще то́й све́т и утеше́ние, я́же по́слано ти́ бы́сть в но́щь Воскресе́ния Христо́ва, дабы́ лю́ди име́ли еси́ наде́жду на бу́дущий све́т, сла́вили просла́вльшаго тя́ Го́спода. Сего́ ра́ди и мы́ хвале́бно взыва́ем ти́:

Ра́дуйся, убо́гих и в ско́рбной нищете́ су́щих, всеще́дрый обогати́телю; ра́дуйся, нестерпи́мо пали́мых и утесня́емых преди́вный прохлади́телю.

Ра́дуйся, бе́дствующим и бори́мым ско́рый помо́щниче; ра́дуйся, озлобля́емых и оби́димых изве́стный защи́тниче.

Ра́дуйся, обурева́емых тя́жкими прило́гами предо́брый ко́рмчий.

Ра́дуйся, святы́й Иоа́нне многострада́льный, ско́рый во бране́х помо́щниче и те́плый моли́твенниче о душа́х на́ших.

Конда́к 11.

Исполня́я рече́нное ти́ гла́сом Госпо́дним, взя́л еси́ от моще́й лежа́щаго ту́ преподо́бнаго Моисе́я еди́ну ко́сть, приложи́л еси́ к своему́ те́лу и да́в бра́ту, прише́дшему к тебе́ с таки́м же неду́гом, воспева́я вку́пе с ни́м Го́сподеви: Аллилу́иа.

И́кос 11.

В то́й же ча́с, а́ки приложи́ша ко́сть к те́лу своему́, замерла́ в телеси́ твое́м стра́сть блу́дная и ты́ возда́л еси́ хвалу́ Бо́гу, И́же избы́сть тя́ муче́ний от пло́ти свое́й, просла́ви Го́спода исцели́вшаго тя́; те́мже вси́ зове́м ти́:

Ра́дуйся, кре́пкий и непреодоли́мый в борьбе́ со стра́стию уго́дниче Бо́жий; ра́дуйся, богоприя́тных де́л вмести́лище и сосу́д благода́ти предо́брый.

Ра́дуйся, Творцу́ и Го́споду в житии́ свое́м до́бре угоди́вый; ра́дуйся, мзду́ ве́лию за страда́ния своя́ от Бо́га получи́вый.

Ра́дуйся, в небе́сное жили́ще безпрепя́тственно вше́дый.

Ра́дуйся, святы́й Иоа́нне многострада́льный, ско́рый во бране́х помо́щниче и те́плый моли́твенниче о душа́х на́ших.

Конда́к 12.

Благода́ть ве́лию Всеми́лостивый и Всеще́дрый Госпо́дь от Свои́х щедро́т пода́вше ти́, ты́ же, я́ко зе́рно в зе́млю вве́рженное, стори́цею пло́д возрасти́л еси́ и в селе́ния Небе́сныя всели́лся еси́, поя́ Бо́гу: Аллилу́иа.

И́кос 12.

Пою́ще твое́ безмо́лвное и ско́рбное житие́, похваля́ем многоболе́зненныя труды́ твоя́ и по́двиги, почита́ем умерщвле́ния пло́ти твоея́ и боре́ния непреста́нныя, воспомина́ем ку́пно и воздая́ния, я́же от Пра́веднаго Судии́ оби́льно восприя́л еси́ и си́це вопие́м ти́:

Ра́дуйся, в небе́сной несконча́емой сла́ве лику́ющий; ра́дуйся, в со́нме му́чеников, я́ко мно́го Христа́ ра́ди претерпе́вый, пребыва́ющий.

Ра́дуйся, с де́вственными возвели́ченный; ра́дуйся, лицезре́нием Пресвято́й Тро́ицы насыще́нный.

Ра́дуйся, со все́ми Святы́ми, Бо́гу угоди́вшими, насле́дие обреты́й.

Ра́дуйся, святы́й Иоа́нне многострада́льный, ско́рый во бране́х помо́щниче и те́плый моли́твенниче о душа́х на́ших.

Конда́к 13.

О, святы́й, преблаже́нный и вся́кия че́сти досто́йный, Иоа́нне Многострада́льный, приими́ сие́ ма́лое моле́ние на́ше от любве́ тебе́ приноси́мое, да изба́виши на́с моли́твами твои́ми от все́х нападе́ний и наве́тов вра́жиих, от стра́сти блу́дной и мечта́ний скве́рных, умоли́ Го́спода о все́х на́с немощны́х, во мно́гия беды́ впа́дших, да избавле́нии тобо́ю от напа́сти вра́жия, воспое́м Спа́су Бо́гу на́шему: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

Ангелоподо́бное житие́ в пеще́ре те́сней провожда́ше, ве́лии труды́ и по́двиги ди́внии подъя́л еси́ да Христа́ приобря́щеши, те́мже и от на́с немощны́х приими́ похвалы́ сия́:

Ра́дуйся, от ве́ка на по́двиг ди́вный предъизбра́нный; ра́дуйся, ра́ди избра́ния твоего́ мно́гими страда́ньми увенча́нный.

Ра́дуйся, терпе́нием се́рдце свое́ укрепи́вый; ра́дуйся, пути́ Госпо́дни сохрани́вый.

Ра́дуйся, те́м Го́споду угоди́вый и мзду́ ве́лию за сие́ получи́вый.

Ра́дуйся, святы́й Иоа́нне многострада́льный, ско́рый во бране́х помо́щниче и те́плый моли́твенниче о душа́х на́ших.

Конда́к 1.

Небе́снии ра́дуются и земни́и веселя́тся, восхваля́я многотру́дный по́двиг тво́й, святы́й Иоа́нне Многострада́льный. Вои́стину бо претерпе́л еси́ ско́рби мно́ги ра́ди исполне́ния обе́та чистоты́, да́ннаго тобо́ю Небе́сному Жениху́ Христу́, сего́ ра́ди и мы́ вопие́м ти́:

Ра́дуйся, святы́й Иоа́нне многострада́льный, ско́рый во бране́х помо́щниче и те́плый моли́твенниче о душа́х на́ших.

Моли́тва.

О, святы́й уго́дниче Бо́жий, Иоа́нне Многострада́льный, услы́ши на́ше недосто́йное моле́ние, в ско́рби вели́цей тебе́ приноси́мое. Я́коже и тя́ услы́шал еси́ Госпо́дь, вопию́щаго в ско́рби твое́й, та́ко и ты́ услы́ши на́с, изнемога́ем бо под тя́жестию беззако́ний на́ших, вра́жиими ко́знями уловля́еми и в нощи́ страсте́й и скорбе́й су́щих, при́зри на ны́, да моли́твами твои́ми изба́вимся от наве́тов вра́жиих; ю́ность в целому́дрии, супру́жество в чистоте́ и смире́нии утверди́, уврачу́й не́мощи на́ша, си́лу на покая́ние на́м да́руй. Умоли́ Пра́веднаго Судию́ преложи́ти гне́в пра́вды Своея́ на поми́лование на́с гре́шных. Ему́ же сла́ва подоба́ет Отцу́ и Сы́ну и Свято́му Ду́ху, ны́не и при́сно, и во ве́ки веко́в. Ами́нь.