Конда́к 1.

Избра́нный уго́дниче Христо́в и Чудотво́рче, преподо́бне о́тче Ио́но, возсия́вый ми́рови, я́ко звезда́ богосве́тлая, жития́ твоего́ добро́тою и мно́жеством чудотворе́ний, восхваля́ем тя́ любо́вию в пе́снех духо́вных: ты́ же, я́ко име́яй дерзнове́ние ко Го́споду, моли́твами твои́ми от вся́ких на́с бе́д свободи́, да зове́м ти́:

Ра́дуйся, преподо́бне о́тче на́ш Ио́но, гра́да Ки́ева похвало́ и украше́ние.

И́кос 1.

А́нгельский нра́в име́л еси́, о́тче преподо́бне, и я́ко безпло́тный, непоро́чно житие́ соверши́л еси́ на земли́, ди́вный о́браз соверше́нства духо́внаго на́м оста́вив, да подража́ем доброде́телем твои́м, и зове́м ти́ си́це:

Ра́дуйся, цве́те благоуха́нный до́браго воспита́ния; ра́дуйся, сосу́де Боже́ственнаго избра́ния.

Ра́дуйся, я́ко любе́зная и кра́сная ми́ра сего́ презре́л еси́; ра́дуйся, я́ко Небе́сных и нетле́нных, жела́нием вожделе́л еси́.

Ра́дуйся, во́лею тве́рдою во́ли своея́ отреки́йся; ра́дуйся, отсече́нием страсте́й угоди́вый Бо́гу и спасы́йся.

Ра́дуйся, преподо́бне о́тче на́ш Ио́но, гра́да Ки́ева похвало́ и украше́ние.

Конда́к 2.

Ви́дя Госпо́дь ду́шу твою́, я́ко ни́ву благовозде́ланную к плодоно́сию духо́вному, от ю́ности к иска́нию еди́наго на потре́бу, напра́ви тво́й по́мысл, преподо́бне, те́мже любве́ ра́ди Христо́вы, роди́телей твои́х и до́м оте́ческий оста́вил еси́, и вся́каго пристра́стия су́етнаго свободи́вся, прите́кл еси́ в пу́стынь Саро́вскую под криле́ Серафи́ма преподо́бнаго, на по́двиги и́ноческия, зовы́й спаса́ющему тя́ Бо́гу: Аллилу́ия.

И́кос 2.

Ра́зумом богопросвеще́нным пости́гл еси́ суету́ ми́ра сего́ и непостоя́нство, в не́м же ра́дость сменя́ется ско́рбию, благополу́чие наве́туется неча́янными беда́ми. Те́мже ве́чных нетле́нных бла́г возжеле́л еси́, о́тче преподо́бне, и сия́ взыска́ти потща́лся еси́ отрече́нием мирски́х бла́г, и во́льною нището́ю, подвига́я на́с зва́ти тебе́:

Ра́дуйся, те́сный пу́ть спасе́ния от ю́ности возлюби́вый; ра́дуйся, яре́м Госпо́день на вы́ю свою́ возложи́вый.

Ра́дуйся, свяще́нными обе́ты во́лю свою́ связа́вый; ра́дуйся, себе́ и ве́сь живо́т сво́й Го́сподеви преда́вый.

Ра́дуйся, коему́ждо во бла́го усе́рдный служи́телю; ра́дуйся, боля́щих и немощны́х упокои́телю.

Ра́дуйся, преподо́бне о́тче на́ш Ио́но, гра́да Ки́ева похвало́ и украше́ние.

Конда́к 3.

Си́лою Всевы́шняго осене́нный и укрепля́емый, в и́ночестем постриже́нии вла́с главы́ твоея́, все́ плотско́е мудрова́ние отложи́л еси́, преподо́бне, и я́ко во́ин благоиску́сный, оде́жду и́ноческую в броню́ спасе́ния стяжа́в, и непобеди́мым ору́жием Креста́ Христо́ва вооружи́вся, кре́пко ра́товал еси́ проти́ву врага́ неви́димаго диа́вола, смире́нием глубо́ким побежда́я его́ вознесе́нную горды́ню, и вы́ну вопия́ ко Го́споду: Аллилу́ия.

И́кос 3.

Име́я сле́з исто́чник изоби́льный, уго́дниче Бо́жий, и умиле́ния ве́лию благода́ть, хле́б тво́й слеза́ми ороша́л еси́, и питие́ пла́чем растворя́л, от преизбы́тка жела́ния боже́ственнаго и любве́ ко Го́споду. Те́мже и мы́ ублажа́ем тя́ зва́нии си́ми:

Ра́дуйся, по́мыслы плотски́я си́лою моли́твы прогоня́яй; ра́дуйся, сомня́щихся в ве́ре сло́вом Бо́жиим утвержда́яй.

Ра́дуйся, лише́нии теле́сными мно́га бла́га духо́вная собра́вый; ра́дуйся, нището́ю дарова́ния небе́сная стяжа́вый.

Ра́дуйся, молча́ния изря́дный храни́телю; ра́дуйся, стро́гий уста́вов и́ноческих блюсти́телю.

Ра́дуйся, преподо́бне о́тче на́ш Ио́но, гра́да Ки́ева похвало́ и украше́ние.

Конда́к 4.

Бу́ря искуше́ний и устремле́ний диа́вольских не возмо́же поколеба́ти хра́мины твоея́ душе́вныя, преподо́бне о́тче, основа́нна бо бе́ на тве́рдом ка́мени ве́ры во Христа́, и храни́ма трезве́нием и моли́твами непреста́нными, и́ми же вы́ну противобо́рствовал еси́ врагу́ спасе́ния челове́ческаго, и непреткнове́нно восходи́л еси́ по стезя́м доброде́телей к соверше́нству духо́вному в ме́ру во́зраста Христо́ва, воспева́я Бо́гу: Аллилу́ия.

И́кос 4.

Слы́шаша преподо́бне о́тче Ио́но, бли́жнии и да́льнии ангелоподо́бное твое́ житие́, и благода́ти чуде́с струю́ вы́ну теку́щую, я́ко моли́твою твое́ю прокаже́ннии очища́ются, слепи́и прозира́ют, хроми́и хо́дят и разнообра́зных неду́г с ве́рою притека́ющии, а́ще и инове́рнии, здра́вие улуча́ют, си́х изба́вльшеся вопия́ху к тебе́ такова́я:

Ра́дуйся, боля́щим, я́ко бра́тии Христо́вой, служи́телю; ра́дуйся, высо́ких по́двигов жития́ христиа́нскаго ревни́телю.

Ра́дуйся, новонача́льных иску́сный руководи́телю; ра́дуйся, неизме́нное пра́вило поста́ и смире́ния.

Ра́дуйся, умира́ющия возставля́яй на покая́ние; ра́дуйся, все́м внуша́яй Жи́зни Ве́чныя взыска́ние.

Ра́дуйся, преподо́бне о́тче на́ш Ио́но, гра́да Ки́ева похвало́ и украше́ние.

Конда́к 5.

Боготе́чная пресве́тлая звезда́ яви́лся еси́, преподо́бне о́тче на́ш Ио́но, не́бо церко́вное украша́яй и все́х блужда́ющих по мо́рю стра́стнаго жития́ сего́ да́нною тебе́ от Со́лнца Пра́вды Христа́ Иису́са, и́стиннаго Бо́га, благода́тию озаря́яй, мра́к печа́лей и мглу́ вся́ких неду́г и скорбе́й прогоня́яй, наставля́еши все́х к тебе́ с ве́рою притека́ющих на пу́ть спасе́ния, к ве́чному Небе́сному Оте́чествию веду́щий, пою́щих Бо́гу: Аллилу́ия.

И́кос 5.

Ви́девше а́нгельстии чи́нове равноа́нгельное житие́ твое́ о́тче богоблаже́нне, смире́ния твоего́ глубину́, моли́твы неотсту́пность, воздержа́ния тве́рдость и ве́лию ре́вность ду́ха твоего́ о чистоте́, удиви́шася и просла́виша Человеколю́бца Бо́га, укрепля́ющаго немощно́е естество́ челове́ческое. Мы́ же ублажа́ем тя́ и зове́м:

Ра́дуйся, миря́ном наста́вниче жи́зни богоуго́дныя; ра́дуйся, основа́телю оби́тели благопло́дныя.

Ра́дуйся, я́ко блага́я начина́ния твоя́ Христо́с благослови́; ра́дуйся, я́ко сотру́дника тебе́ в лице́ держа́внаго яви́.

Ра́дуйся, о́бщее житие́ мона́шествующих основа́вый; ра́дуйся, те́м всеору́жие благоче́стия и́м пода́вый.

Ра́дуйся, преподо́бне о́тче на́ш Ио́но, гра́да Ки́ева похвало́ и украше́ние.

Конда́к 6.

Пропове́дует ми́р ве́сь правосла́вный тебе́, преподо́бне о́тче на́ш Ио́но, де́монов прогони́теля, боле́зней исцели́теля и ины́х мно́гих чуде́с соверши́теля. Мы́ же, Бо́га о тебе́ прославля́юще, вопие́м Ему́: Аллилу́ия.

И́кос 6.

Возсия́л еси́ на гора́х Зверине́цких богосве́тлое свети́ло, и на спасе́ния стезю́ наста́вил еси́ мно́ги ду́ши челове́ческия: яви́ бо тя́ Христо́с наста́вника и учи́теля и́ноком пустыннолюби́вым, и́же стека́хуся к тебе́, я́ко о́вцы к па́стырю, могу́щу упасти́ и́х на па́жити живоно́сней. Те́мже, я́ко сотвори́вшаго и научи́вшаго, честву́ем тя́ си́ми похва́льными словесы́:

Ра́дуйся, о́бщими труды́ пра́здных по́мыслов шата́ния упраздни́вый; ра́дуйся, те́ми я́ко броне́ю, страсте́й разжже́нныя стре́лы отрази́вый.

Ра́дуйся, всели́вый во оби́тели ду́х о́бщаго воздержа́ния; ра́дуйся, потреби́вый в не́й пле́велы любостяжа́ния.

Ра́дуйся, бо́дрствованию духо́вному мно́ги и́ноки научи́вый; ра́дуйся, до конца́ жития́ пе́рвый в тружда́ющихся бы́вый.

Ра́дуйся, преподо́бне о́тче на́ш Ио́но, гра́да Ки́ева похвало́ и украше́ние.

Конда́к 7.

Хотя́ Человеколюби́вый Госпо́дь просла́вити ме́сто сие́, я́ко виногра́д по́двигов твои́х, о́тче, посла́ Пресвяту́ю Влады́чицу на́шу Богоро́дицу благовести́ти тебе́, я́ко бу́дет в сто́льном гра́де Ки́еве оби́тель и́ноком во спасе́ние, украше́нная хра́мом во и́мя Святы́я Тро́ицы. Ты́ же явле́нием Пречи́стыя просвеще́н, с ра́достным тре́петом внима́л еси́ благове́стию небе́сному, зовы́й во смире́нии ду́ха Влады́це А́нгелов и челове́ков: Аллилу́ия.

И́кос 7.

Но́вое зна́мение благоволе́ния Бо́жия дарова́ся тебе́, преподо́бне, егда́ безмо́лвствующу ти́ в Вы́дубицком монастыре́, в нощи́ све́т ве́лий облиста́ ве́домую ти́ ке́ллию, и Сама́ Пречи́стая с со́нмом Святы́х предста́ пред тобо́ю, ми́р тебе́ да́руя и повелева́я, да устро́иши та́мо оби́тель и́ноческую, и в не́й хра́м во и́мя Святы́я Тро́ицы. Дивя́ся у́бо сему́ пречу́дному трикра́тному Богома́тернему тро́ическому явле́нию, зове́м ти́:

Ра́дуйся, му́дре предначерта́вый оби́тель но́ву; ра́дуйся, поревнова́вый нищетолю́бному житию́ Христо́ву.

Ра́дуйся, святы́я хра́мы во оби́тели созда́вый; ра́дуйся, мно́г собо́р мона́шествующих собра́вый.

Ра́дуйся, я́ко тру́д тво́й Свы́ше благослови́ся; ра́дуйся, я́ко свято́е жела́ние се́рдца твоего́ соверши́ся.

Ра́дуйся, преподо́бне о́тче на́ш Ио́но, гра́да Ки́ева похвало́ и украше́ние.

Конда́к 8.

Странноле́пно яви́ся ти́ на возду́се Ма́терь Бо́жия со апо́столы и му́ченики и преподо́бными и про́чими святы́ми, указу́яй ме́сто, на не́мже хра́м во и́мя Живонача́льныя Тро́ицы и оби́тель но́ву име́л еси́ воздви́гнути на горе́ Зверине́цтей, преподо́бне о́тче, его́же Бо́жиим поспеше́нием соверши́в и освяти́в, со ученики́ твои́ми немо́лчныя хвалы́ возсыла́л еси́ в не́м Го́сподеви, зовы́й: Аллилу́ия.

И́кос 8.

Ве́сь еси́ любо́вь неоскудева́ющая и по́двига зерца́ло нетускне́ющее бы́л еси́, преподо́бне Ио́но. Ви́дяще же ре́вностное по Бо́зе и жесто́кое житие́ твое́ и бра́тии, непреста́нно в труде́х и поще́нии подвиза́ющихся и ходя́щих в ру́бищных и худы́х оде́ждах, не́цыи от и́нок и вся́каго чи́на мирски́х люде́й и князе́й людски́х не то́чию си́х не отвраща́хуся, но па́че ре́вностию духо́вною горя́ще и во оби́тели ку́пно с ни́ми подвиза́тися жела́юще, приноша́ху ту́ име́ния своя́ на по́льзу о́бщую; те́мже зда́телю тоя́ возглаша́ем та́ко:

Ра́дуйся, я́ко во оби́тели твое́й мно́зи ду́ши своя́ спасо́ша; ра́дуйся, я́ко из нея́ пастыренача́льницы изыдо́ша.

Ра́дуйся, благочести́вых отра́до и утеше́ние; ра́дуйся, коле́блющихся в ве́ре тве́рдое огражде́ние.

Ра́дуйся, отчаява́ющихся утвержда́яй во упова́нии; ра́дуйся, просвети́вый мно́гих Святы́ми писа́нии.

Ра́дуйся, преподо́бне о́тче на́ш Ио́но, гра́да Ки́ева похвало́ и украше́ние.

Конда́к 9.

Вся́кое естество́ а́нгельское и подви́жников мно́жество удиви́шася смире́нию и человеколю́бию твоему́, о́тче на́ш Ио́но, егда́, архимандри́тства Межиго́рскаго послуша́ние восприя́в, Феодо́сию игу́мену Пече́рскому, я́ко жи́тий о́бщих на Руси́ учреди́телю уподо́бился еси́. И о бра́тии святы́я оби́тели сея́, я́ко о ча́дех Бо́жиих, попече́ние не оста́вивый. Бо́гу, лю́бящему вся́кое Свое́ созда́ние, о те́х взыва́л еси́: Го́споди, посли́ Ду́ха Свята́го Твоего́ и уте́ши ско́рбныя ду́ши рабо́в Твои́х си́х. Та́ко бо во вся́ком послуша́нии смиренному́дрия красоту́ показу́я, непреста́нно взыва́л еси́ Бо́гу: Аллилу́ия.

И́кос 9.

Вити́йство челове́ческое не довле́ет изрещи́ оби́лие ра́дости духо́вныя, е́юже преисполня́лся еси́, о́тче богоно́сне, егда́ во вре́мя моли́твы твоея́ нощны́я, явля́шеся ти́ Пресвята́я Богоро́дица с ли́ками чино́в подви́жнических, и обетова́нии непрело́жными ду́шу твою́ возвесели́, я́ко при́сная Засту́пница оби́тели твоея́ бу́дет, снабдева́ющи и покрыва́ющи ю́ по вся́ дни́. Те́мже и мы́ сия́ ра́достная тебе́ прино́сим глаго́лы:

Ра́дуйся, ше́ствовавый путе́м тру́дным и те́сным; ра́дуйся, возводя́й други́х к Оби́телем Небе́сным.

Ра́дуйся, наде́ждо све́тлая в ну́жде и обстоя́нии су́щих; ра́дуйся, покрови́телю си́рых и кро́ва неиму́щих.

Ра́дуйся, гла́дом погиба́ющих пита́телю; ра́дуйся, жела́емых бла́г прише́дшим к тебе́ пода́телю.

Ра́дуйся, преподо́бне о́тче на́ш Ио́но, гра́да Ки́ева похвало́ и украше́ние.

Конда́к 10.

Спасти́ хотя́ ду́ши учени́к твои́х, оте́чески назида́л еси́ и́х, богому́дре, о́ваго де́йственным сло́вом, о́ваго приме́ром жития́ твоего́, с любо́вию облича́я и увещава́я и́х преуспева́ти во благоче́стии и чистоте́: наипа́че же пред кончи́ною твое́ю, вся́ ко спасе́нию душе́вному благопотре́бная запове́дал еси́ и́м, и научи́л еси́ и́х в моли́твах бо́дрствовати, и немо́лчно пе́ти Бо́гу: Аллилу́ия.

И́кос 10.

Стена́ заступле́ния бы́ша моли́твы твоя́, чудотво́рче святы́й, все́м с ве́рою к тебе́ притека́ющим во вся́кой ско́рби, и́бо чистоты́ ра́ди твоея́ серде́чныя, си́ла духо́вная от Бо́га тебе́ дарова́ся боля́щих исцеля́ти, бе́дствующим помога́ти, бу́дущая прорица́ти, я́ко сла́вити бли́жним и да́льним вели́чия Бо́жия, в тебе́ явле́нная, и зва́ти тебе́ си́це:

Ра́дуйся, ми́лости исто́чниче неистощи́мый; ра́дуйся, скорбя́щих уте́шителю незри́мый.

Ра́дуйся, после́дняя твоя́ взаи́м Бо́гови да́вый; ра́дуйся, до́брым раче́нием и расточе́нием су́щих бога́тая собра́вый.

Ра́дуйся, досточу́дный о́бразе терпе́ния; ра́дуйся, наста́вниче неле́стнаго благогове́ния.

Ра́дуйся, преподо́бне о́тче на́ш Ио́но, гра́да Ки́ева похвало́ и украше́ние.

Конда́к 11.

Пе́ние всеумиле́нное прине́сл еси́ Пресвяте́й Тро́ице во вре́мя кончи́ны твоея́, преподо́бне, и моли́тве су́щей на усте́х твои́х. преда́л еси́ святу́ю ду́шу твою́ в ру́це Жива́го Бо́га, Его́же от ю́ности возлюби́л еси́, и ему́же до ста́рости масти́тыя рабо́тал еси́ нелицеме́рно, те́мже со упова́нием благи́м ра́достно преше́л еси́ к оби́телем небе́сным, со А́нгельскими ли́ки пе́ти Триипоста́сному Бо́гу: Аллилу́ия.

И́кос 11.

Ми́рную кончи́ну твою́ ви́девше твои́ ученицы́, вели́кий уго́дниче Бо́жий, ско́рбь разлуче́ния с тобо́ю утеше́нием благода́тным раствори́ша. в упова́нии всеси́льнаго предста́тельства твоего́ горе́ у престо́ла Бо́жия, иде́же слы́шиши с любо́вию тебе́ зову́щих:

Ра́дуйся, благопотре́бне во оте́чествии твое́м возсия́вый; ра́дуйся, ве́ру в де́лех жития́ твоего́ показа́вый.

Ра́дуйся, разу́мных и препро́стых благоиску́сный учи́телю; ра́дуйся, чистоты́ душе́вныя и теле́сныя усе́рдный храни́телю.

Ра́дуйся, вну́треннею Креста́ Христо́ва красото́ю восхище́нный; ра́дуйся, си́лою свы́ше на тру́д Крестоноше́ния облече́нный.

Ра́дуйся, преподо́бне о́тче на́ш Ио́но, гра́да Ки́ева похвало́ и украше́ние.

Конда́к 12.

Благода́ти прича́стна яви́ся свяще́нная ра́ка, тобо́ю сами́м сооруже́нная, содержа́щая многоцеле́бныя мо́щи твоя́, чудотво́рче святы́й, и́хже по ле́тех мно́зех яви́ Госпо́дь во скле́пе церко́внем нетле́нными, и па́ки по надруга́нию безбо́жник сокры́, и па́ки яви́ в не́дрех земли́ невреди́мы, исцеле́ния неоску́дно источа́ющия, и вся́к неду́г врачу́ющия си́лою Бо́га, ди́внаго во святы́х Свои́х, ди́вно же просла́вльшаго тя́ на небеси́ и на земли́, Ему́же воспева́ем: Аллилу́ия.

И́кос 12.

Пою́ще ра́достную пе́снь хвалы́ и благодаре́ния Человеколю́бцу Бо́гу, просла́вльшему тя́ в земли́ Ру́сстей чудотво́рца ди́внаго и ми́лостиваго, мо́лим тя́, преподо́бне о́тче на́ш Ио́но: бу́ди хода́тай к Нему́, и моли́твенник при́сный о на́с, зову́щих ти́:

Ра́дуйся, стрела́ми вра́жиих наве́т неуязви́мый; ра́дуйся, спаса́емых вождю́ непобеди́мый.

Ра́дуйся, и по отше́ствии оби́тель твою́ соблюда́яй; ра́дуйся, моля́щимся благопотре́бная подава́яй.

Ра́дуйся, от Го́спода вене́ц пра́вды восприя́вый; ра́дуйся, сла́вою чудотворе́ний просия́вый.

Ра́дуйся, преподо́бне о́тче на́ш Ио́но, гра́да Ки́ева похвало́ и украше́ние.

Конда́к 13.

О вели́кий и пресла́вный чудотво́рче, преподо́бне о́тче на́ш Ио́но! Ми́лостиво прия́в сие́ ма́лое моле́ние на́ше, моли́твами твои́ми сохрани́ на́с от неду́гов душе́вных и теле́сных в жи́зни се́й, и от гряду́щих муче́ний ве́чных изба́ви, и сподо́би на́с вку́пе с тобо́ю во Ца́рствии Небе́снем вы́ну пе́ти Бо́гу: Аллилу́ия, Аллилу́ия, Аллилу́ия.

Этот кондак читается трижды, затем икос 1-й и кондак 1-й.

Моли́тва.

О свяще́нная главо́, а́нгеле земны́й и челове́че небе́сный, преподо́бне и богоно́сне о́тче на́ш Ио́но, изря́дный уго́дниче Пресвяты́я и Единосу́щныя Тро́ицы, явля́ющий мно́гия ми́лости живу́щим во святе́й оби́тели твое́й, и все́м, с ве́рою и любо́вию притека́ющим к тебе́. Испроси́ на́м вся́ благопотре́бная к житию́ сему́ вре́менному, и ну́жная к ве́чному спасе́нию на́шему. Посо́бствуй предста́тельством твои́м, уго́дниче Бо́жий, все́м на́м, к моще́м твои́м святы́м припа́дающим, на враги́ ви́димыя и неви́димыя одоле́ние, да в ми́ре глубо́це пребу́дет Свята́я Правосла́вная Це́рковь Христо́ва, и в благоустрое́нии зи́ждется оби́тель, ю́же ты́ основа́, во вся́ком благоче́стии неруши́мо. Бу́ди все́м на́м, чудотво́рче святы́й, помо́щник ско́рый во вся́кой ско́рби и обстоя́нии. Наипа́че же в ча́с кончи́ны на́шея яви́ся на́м засту́пник благосе́рдный, да не пре́дани бу́дем на мыта́рствах возду́шных вла́сти зло́бнаго мироде́ржца, но да сподо́бимся непреткнове́ннаго восхо́да в Ца́рствие Небе́сное. Е́й, о́тче, моли́твенниче на́ш при́сный. Не посрами́ упова́ния на́шего, не пре́зри смире́нная моле́ния на́ша, и предста́тельствуй за на́с пред престо́лом Живонача́льныя Тро́ицы, да сподо́бимся вку́пе с тобо́ю и со все́ми святы́ми, мы́ недосто́йнии, в селе́ниих ра́йских сла́вити вели́чие, благода́ть и ми́лость Еди́наго в Тро́ице Бо́га, Отца́ и Сы́на и Свята́го Ду́ха, во ве́ки веко́в. Ами́нь.