Конда́к 1.

Избра́нному уго́днику Бо́жия Ма́тере и послуша́ния те́плому рачи́телю, богому́дрому о́птинскому ста́рцу Ио́сифу похва́льная принесе́м песнопе́ния, я́ко да изба́вит на́с от вся́кия беды́ и напа́сти и наста́вит на стези́ пра́выя вопию́щих ему́ любо́вию:

Ра́дуйся, Ио́сифе, Бо́жия Ма́тере люби́миче блаже́нный.

И́кос 1.

От ю́ности твоея́, о́тче преподо́бне, и́грам не внима́л еси́ младе́нческим, но все́ жела́ние души́ твоея́ в небе́сная напра́вив, сего́ ра́ди яви́ся ти́ Богоро́дица на о́блаце, назна́менующи, я́ко уго́дник Ея́ бу́деши от ю́ности твоея́. Те́мже сицево́му явле́нию чудя́щеся, похва́льная тебе́ пое́м:

Ра́дуйся, о́трочище, Богоро́дицею избра́нное; ра́дуйся, роди́телей твои́х пресла́вное велича́ние.

Ра́дуйся, благочести́вое ве́ры процвете́ние; ра́дуйся, плоды́ яви́вый богопозна́ния.

Ра́дуйся, отроко́м прекра́сный о́браз подража́ния; ра́дуйся, ю́ношам благоуха́нный кри́не целому́дрия.

Ра́дуйся, я́ко из у́ст младе́нческих Бо́г тобо́ю похваля́ется; ра́дуйся, я́ко от ю́ности твоея́ Богоро́дица прославля́ется.

Ра́дуйся, Ио́сифе, Бо́жия Ма́тере люби́миче блаже́нный.

Конда́к 2.

Си́лою свы́ше осене́н бы́л еси́ благода́тию Пресвята́го Ду́ха, и́же обучи́ тя́ пра́во не внима́ти обольще́нием лука́ваго ду́ха, сего́ ра́ди от мирски́х красо́т я́ко от уме́т отврати́лся еси́ и стопы́ твоя́ напра́вил еси́ по и́ноческому пути́, поя́ Бо́гу: Аллилу́иа.

И́кос 2.

Из ми́ра изше́л еси́, я́ко от ра́бства фарао́ня, и Бо́гу в ри́зе де́вства твоего́ предста́л еси́, те́мже я́ко втора́го и прекра́снаго Ио́сифа тя́ похваля́ем и целому́дренней душе́ твое́й пое́м:

Ра́дуйся, духо́внаго де́вства избра́нный сосу́де; ра́дуйся, чистоты́ и целому́дрия ве́рный супру́же.

Ра́дуйся, я́ко ду́шу свою́ уневе́стивый Христу́ Жениху́; ра́дуйся, я́ко те́ло твое́ обле́кл еси́ в нетле́ния чистоту́.

Ра́дуйся, я́ко копие́м воздержа́ния пробо́л еси́ зми́я; ра́дуйся, я́ко дости́гл еси́ А́нгельския чи́ны.

Ра́дуйся, ча́ша Боже́ственныя любве́ испо́лнена; ра́дуйся, е́юже напая́еши ча́да твоя́.

Ра́дуйся, Ио́сифе, Бо́жия Ма́тере люби́миче блаже́нный.

Конда́к 3.

Я́ко звезда́ пресве́тлая в О́птину пу́стынь устреми́лся еси́, Ио́сифе, иде́же богосве́тлый Амвро́сий на тве́рди церко́вней я́ко со́лнце возсия́, и́же во объя́тия своя́ тя́ прия́т оте́ческая и доброде́тельными лучи́ облиста́, Бо́гу благода́рне воззва́в: Аллилу́иа.

И́кос 3.

При исхо́дищах прему́дрости ста́рчестей водвори́лся еси́, о́тче Ио́сифе, при ногу́ Амвро́сиеву три́десять ле́т пожи́в. Те́мже по стезя́м любому́дрия ста́рца твоего́ ходи́ти изво́лил еси́, к ни́мже и на́с напра́ви, вопию́щих тебе́ сия́:

Ра́дуйся, благопослу́шное ча́до оте́ческаго преда́ния; ра́дуйся, любому́дрый учениче́` свяще́ннаго писа́ния.

Ра́дуйся, Амвро́сиевых моли́тв пло́де богодарова́нный; ра́дуйся, о́птинскаго ста́рчества прее́мственная сла́во.

Ра́дуйся, о́бразе любве́ сы́на к своему́ ста́рцу; ра́дуйся, насле́дниче даро́в богоно́снаго а́ввы.

Ра́дуйся, я́ко благопокоре́нием разори́вый де́монския тверды́ни; ра́дуйся, я́ко благоволе́нием подража́вый А́нгельским си́лам.

Ра́дуйся, Ио́сифе, Бо́жия Ма́тере люби́миче блаже́нный.

Конда́к 4.

По́двигом до́брым изво́лив подвиза́тися, о́тче преподо́бне, пе́ние, бде́ние, моли́тву и по́ст, а́ки ору́жие непобеди́мое восприи́м, ко́зни де́монския, а́ки паучи́ну, растерза́л еси́, преблаже́нне Ио́сифе, Бо́гу побе́дную воспе́л еси́ пе́снь: Аллилу́иа.

И́кос 4.

Ви́дя свято́е твое́ о Бо́зе преспе́яние, богому́дрый Амвро́сий в таи́нники своя́ тебе́ избра́, не то́кмо дарми́ тя́ обогати́ сыноположе́ния, но и па́ству свою́ тебе́ вручи́, мы́ же, па́стырским твои́м окорми́вшеся води́тельством, благода́рно тебе́ пое́м:

Ра́дуйся, мы́сленных волко́в от ста́да Христо́ва отгна́ние; ра́дуйся, слове́сных ове́ц святооте́ческое воспита́ние.

Ра́дуйся, богому́дрыя па́ствы твоея́ окормле́ние; ра́дуйся, усугу́бивый ста́рческое на тебе́ благослове́ние.

Ра́дуйся, я́ко послуша́нием яви́л еси́ о Бо́зе бы́строе преспе́яние; ра́дуйся, я́ко сотаи́нник бы́л еси́ Амвро́сиевых открове́ний.

Ра́дуйся, я́ко в ме́ру отца́ твоего́ дости́гл еси́; ра́дуйся, я́ко о не́мже дерзнове́ние пред Бо́гом возыме́л еси́.

Ра́дуйся, Ио́сифе, Бо́жия Ма́тере люби́миче блаже́нный.

Конда́к 5.

Бо́жиим смотре́нием боле́знь сме́ртная нападе́ на тя́, оба́че не ко сме́рти бы́сть сия́, но ко сла́ве Бо́жией. Криле́ бо схи́мы вели́кия на боле́зненнем одре́ прия́л еси́, те́мже обнови́лся еси́ Ду́хом я́ко о́рля, поя́ изба́вителю Бо́гу: Аллилу́иа.

И́кос 5.

На одре́ боле́зненнем лежа́щу ти́, о́тче богоно́се, Сама́ Пречи́стая Де́ва Богоро́дица прии́де к тебе́ и укрепи́ тя́ в по́двизе, и словеса́ изрече́ сладча́йшая: Потерпи́, люби́миче Мо́й, немно́го еще́, – те́мже, чудя́щеся о таково́м к тебе́ Бо́жия Ма́тере смотре́нии, со стра́хом и любо́вию тебе́ зове́м:

Ра́дуйся, от младе́нства избра́нный Бо́жия Ма́тере люби́миче; ра́дуйся, Е́юже от одра́ сме́ртнаго возста́вленный.

Ра́дуйся, о́бразе пламене́ющей любве́ к Бо́жией Ма́тери; ра́дуйся, непосты́дный пред Не́ю о на́с хода́таю.

Ра́дуйся, мона́шеских чино́в невестоводи́телю; ра́дуйся, под покро́вом Богома́тере и́х предводи́телю.

Ра́дуйся, я́ко неве́ст Христо́вых вручи́вый Богома́тери; ра́дуйся, оби́тели Ша́мординския духо́вный воспита́телю.

Ра́дуйся, Ио́сифе, Бо́жия Ма́тере люби́миче блаже́нный.

Конда́к 6.

На небеса́ восхо́д души́ своея́ богому́дрый Амвро́сий устроя́я, я́ко Илия́, колесни́цу доброде́телей себе́ впряже́нну стяжа́в, на не́йже восходя́, я́ко ми́лоть, благода́ть любве́ своея́ тебе́ оста́вив, в ню́же обле́клся еси́, сугу́бейше Бо́гу благода́рне возва́в: Аллилу́иа.

И́кос 6.

Ски́том о́птинским богому́дрое восприи́м управле́ние, по заве́ту ста́рцев о́птинских води́ти потща́лся еси́ мона́шеская ста́да, те́мже, благода́ть ста́рческую на тебе́ зря́ще почива́ющую, о́вцы слове́сныя единогла́сно воззва́ша тебе́:

Ра́дуйся, ста́рца твоего́ досто́йный прее́мниче; ра́дуйся, Амвро́сиевых даро́в насле́дниче.

Ра́дуйся, прозорли́выма очи́ма зре́вый та́йны серде́чныя; ра́дуйся, испове́данием врачева́вый я́звы душе́вныя.

Ра́дуйся, богому́дрыми сове́ты к небеси́ восхо́д указа́вый; ра́дуйся, обличи́тельными словесы́ от грехо́вных у́з разреша́вый.

Ра́дуйся, о́птинскаго ста́рчества све́тлое зерца́ло; ра́дуйся, утеше́ние бога́тно все́м подава́яй.

Ра́дуйся, Ио́сифе, Бо́жия Ма́тере люби́миче блаже́нный.

Конда́к 7.

Бу́рю страсте́й премину́л еси́ на ле́гцем корабле́ послуша́ния, ве́трилом окормля́емь моли́твами ста́рцев твои́х, во оти́шие безстра́стия дости́гл еси́, благода́тию Бо́жией охраня́емь. Те́мже изми́ и на́с моли́твами твои́ми от пото́па грехо́внаго, да спаса́ющему тобо́ю Всеще́дрому Бо́гу благода́рне вопие́м: Аллилу́иа.

И́кос 7.

Я́ко гра́д, верху́ горы́ стоя́, та́ко бы́сть душа́ твоя́ ве́рою утвержде́нна в Го́споде, и я́ко свети́льник во тьме́ светя́й, та́ко бы́ша сове́ти твои́ приходя́щим к тебе́ за по́мощию. Сего́ ра́ди сбытие́ слове́с Ева́нгельских на тебе́ зря́ще, похва́льная тебе́ зове́м:

Ра́дуйся, ка́мень смире́ния положи́вый во основа́ние зда́ния доброде́телей; ра́дуйся, ка́менем те́м сокруши́вый главу́ зми́я-мироде́ржца.

Ра́дуйся, гра́д душе́вный устро́ивый по о́бразу Го́рняго Иерусали́ма; ра́дуйся, в не́мже не бе́ хра́м, но Госпо́дь его́ хра́м и свети́ло.

Ра́дуйся, свети́льник разсужде́ния вы́ну име́я горя́щий; ра́дуйся, и́мже от бе́д спаса́яй к тебе́ приходя́щих.

Ра́дуйся, тве́рдое в искуше́ниих ве́рным прибе́жище; ра́дуйся, от треволне́ний душе́вных светле́йшее разреше́ние.

Ра́дуйся, Ио́сифе, Бо́жия Ма́тере люби́миче блаже́нный.

Конда́к 8.

Све́т пречу́ден с небе́с тебе́ облиста́, о́тче Ио́сифе, егда́ на моли́тве уми́льно тебе́ предстоя́щу, ви́ден бы́сть я́ве тво́й ли́к светоза́рен и ра́достен. Те́мже, чудя́щеся такове́й благода́ти, на тебе́ почива́ющей, Бо́гу, даю́щему моли́тву моля́щемуся, вопие́м: Аллилу́иа.

И́кос 8.

К Бо́гу прибли́жився непреста́нным моле́нием и прича́стием обожа́емь, я́ко свети́льник Боже́ствен бы́л еси́, чудоде́йствы светя́, сего́ ра́ди просвети́вшихся житие́м твои́м, о́тче богоно́се, светлоплодови́тых сотвори́ на́с, пою́щих тебе́ сия́:

Ра́дуйся, светоза́рное Це́ркве ру́сския сия́ние; ра́дуйся, непоколеби́мое благоче́стия утвержде́ние.

Ра́дуйся, прему́дрости Боже́ственныя возглаго́лание; ра́дуйся, суеты́ мирски́я оглаго́лание.

Ра́дуйся, Све́том Боже́ственным с небеси́ облиста́выйся; ра́дуйся, земному́дрствующих на́с просвеща́яй.

Ра́дуйся, я́ко наста́вил еси́ на спаси́тельныя стези́ заблужда́ющих; ра́дуйся, я́ко та́йны Боже́ственныя ве́рным открыва́еши.

Ра́дуйся, Ио́сифе, Бо́жия Ма́тере люби́миче блаже́нный.

Конда́к 9.

На высо́цем престо́ле разсужде́ния утверди́л еси́ сво́й у́м, Ио́сифе, и порфи́рою целому́дрия, я́ко оде́ждею ца́рскою, оде́явся, но́в Ио́сиф Прекра́сный яви́лся еси́, богому́дре о́тче, и над страстьми́ я́ко то́й над Еги́птом ца́рствовал еси́. Сего́ ра́ди богове́дения хле́бы напита́й ча́да твоя́, и от стра́стнаго изба́ви плене́ния вопию́щих Христу́: Аллилу́иа.

И́кос 9.

Се́рдце ми́лостивое стяжа́л еси́, о́тче Ио́сифе, я́ко тре́бующим твоея́ по́мощи усе́рдно благотвори́л еси́, о́вем у́бо подая́ веще́ственную ми́лостыню, о́вем у́бо невеще́ственную, я́ко чудоде́йственную си́лу. Те́мже свы́ше богатя́щеся твое́й по́мощию да́же и доны́не, благода́рный ти́ прино́сим гла́с:

Ра́дуйся, Христа́ щедрода́тельная десни́це; ра́дуйся, Богома́терь похваля́ющая уста́.

Ра́дуйся, се́рдце ми́лостивое стяжа́вый я́ко престо́л благода́ти; ра́дуйся, чудоде́йственныя то́ки источи́вый от твоея́ ра́ки.

Ра́дуйся, моли́твою избавля́яй от тирани́и страсте́й; ра́дуйся, прикоснове́нием исцеля́яй от теле́сных не́мощей.

Ра́дуйся, ни́щим отве́рстая сокро́вищница сребра́; ра́дуйся, мона́шествующим духо́вное зла́то.

Ра́дуйся, Ио́сифе, Бо́жия Ма́тере люби́миче блаже́нный.

Конда́к 10.

Насле́дник отце́в бы́л еси́, преподо́бне Ио́сифе, те́х после́дуя житию́ и уче́нию, и о спасе́нии люде́й попече́нию, непоколеби́мое яви́лся еси́ ста́рчества о́птинскаго утвержде́ние. С ни́миже я́ко дерзнове́ние ко Го́споду име́я, проси́ на́м согреше́ний проще́ния и спасе́ния вопию́щим Бо́гу, прославля́ющему святы́я своя́: Аллилу́иа.

И́кос 10.

Я́ко возде́лыватель богому́дрый вертогра́да мона́шескаго, цвета́ми Ду́ха украси́л еси́ и́ноческия чи́ны и Амвро́сиевых де́л продолжа́тель яви́лся еси́, богоблаже́нне, благоцвету́щими доброде́тельми испле́л еси́ себе́ сугу́быя венцы́; мы́ же похва́льная глаго́лем ти́ си́це:

Ра́дуйся, я́ко ке́др лива́нский возвы́сивыйся в о́птинстем скиту́; ра́дуйся, я́ко благово́нный кипари́с облагоуха́вый мона́шеское сосло́вие.

Ра́дуйся, я́ко уподо́бивыйся ма́слине мно́гим твои́м милосе́рдием; ра́дуйся, я́ко благово́нный фимиа́м, испо́лнен бы́л еси́ богоприя́тным моле́нием.

Ра́дуйся, я́ко росо́ю чуде́с кропи́ши тебе́ моля́щияся; ра́дуйся, от ра́ки моще́й твои́х исцеле́ния подава́яй к тебе́ приходя́щим.

Ра́дуйся, я́ко благокра́сный ши́пок, оби́тель о́птинскую украша́яй; ра́дуйся, я́ко благопло́дная лоза́, оби́тель ша́мординскую осеня́яй.

Ра́дуйся, Ио́сифе, Бо́жия Ма́тере люби́миче блаже́нный.

Конда́к 11.

Пе́ние ко Пресвяте́й Богоро́дице прино́сиши, блаже́нне о́тче Ио́сифе, я́ко уго́дник Ея́ изря́ден сы́й пред престо́лом Святы́я Тро́ицы, и уми́льно хода́тайствуеши о все́х, к ра́це моще́й твои́х припа́дающих, да получи́вше си́лу свы́ше, вси́ благоче́стно пою́т Бо́гу: Аллилу́иа.

И́кос 11.

Но́вое чу́до во обре́тении моще́й твои́х яви́ся, богоблаже́нне ста́рче Ио́сифе, я́ко во сла́ву ста́рца твоего́ обле́клся еси́, и от земны́х не́др чудоде́йствовав пресла́вными зна́меньми, смиренному́дрием богопослу́шно покры́лся еси́. Те́мже, промышле́нию Бо́жию о тебе́ чудя́щеся, похва́льная тебе́ зове́м:

Ра́дуйся, я́ко вся́ оте́ческая хоте́ния о тебе́ испо́лнивый; ра́дуйся, кре́пкий послу́шниче во́ли Бо́жией.

Ра́дуйся, я́ко и по сме́рти послуша́ние ста́рцу твоему́ яви́вый; ра́дуйся, я́ко та́инственным обре́тением моще́й твои́х все́х удиви́вый.

Ра́дуйся, я́ко унасле́довал еси́ Амвро́сиеву сла́ву; ра́дуйся, я́ко чудесы́ боже́ственными украси́вый его́ честну́ю ра́ку.

Ра́дуйся, О́птиной пу́стыни нетле́ния пе́рвый цве́т яви́вый; ра́дуйся, Рая́ Иису́сова кри́не, благоуха́ния испо́лненный.

Ра́дуйся, Ио́сифе, Бо́жия Ма́тере люби́миче блаже́нный.

Конда́к 12.

Покая́ния изря́дный пропове́дниче, о́тче Ио́сифе, чистоты́ и целому́дрия неусы́пный рачи́телю, я́ко показа́вый на́м о́браз всеприле́жнаго о Бо́зе подвиза́ния, не отри́ни на́ша моле́ния, в разслабле́нии су́щих, но поспе́шествуй твои́ми моли́твами, да после́дующе тебе́, бо́дренно зове́м Бо́гу: Аллилу́иа.

И́кос 12.

Посеща́ти на́с от небе́сныя высоты́ непреста́й, преподо́бне Ио́сифе, отгоня́я всю́ жите́йскую тесноту́ к Бо́гу твои́ми моли́твами, я́ко попремно́гу ублажа́ем боле́зни и труды́ твоя́, я́же во бде́нии и поще́нии со все́ми избра́нники Бо́жия Ма́тере всеусе́рдне поне́сл еси́. Сего́ ра́ди, благода́рни су́ще сицево́му предста́тельству твоему́, уми́льно зове́м ти́:

Ра́дуйся, я́ко тесното́ю по́двига в широту́ Ра́йскую дости́гл еси́; ра́дуйся, я́ко от небе́сных вы́сей в тесноте́ живу́щим снисхо́диши.

Ра́дуйся, ско́рый предста́телю о все́х, тя́ призыва́ющих; ра́дуйся, от искуше́ний внеза́пных па́че ча́яния избавля́яй.

Ра́дуйся, в ско́рбех су́щих к весе́лию незри́мо приводя́й; ра́дуйся, сатану́ злоу́мнаго пя́тою смиренному́дрия попира́яй.

Ра́дуйся, я́ко к Ма́тери Бо́жией прино́сиши на́ша моле́ния; ра́дуйся, я́ко со ста́рцы О́птинскими вкуша́еши ра́йское весе́лие.

Ра́дуйся, Ио́сифе, Бо́жия Ма́тере люби́миче блаже́нный.

Конда́к 13.

О изря́дный уго́дниче Бо́жия Ма́тере и те́плый послуша́ния рачи́телю, не пре́зри на́шея мольбы́ тебе́, я́ко ско́рому хода́таю о на́шей не́мощи приноси́мыя, но яви́ всегда́шнее твое́ заступле́ние, избавля́я на́с от зо́л и напа́стей сего́ развраще́ннаго ве́ка, да храни́мии твои́м моли́твенным заступле́нием, Бо́гу благодаря́ще о все́м пое́м: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

От ю́ности твоея́, о́тче преподо́бне, и́грам не внима́л еси́ младе́нческим, но все́ жела́ние души́ твоея́ в небе́сная напра́вив, сего́ ра́ди яви́ся ти́ Богоро́дица на о́блаце, назна́менующи, я́ко уго́дник Ея́ бу́деши от ю́ности твоея́. Те́мже сицево́му явле́нию чудя́щеся, похва́льная тебе́ пое́м:

Ра́дуйся, о́трочище, Богоро́дицею избра́нное; ра́дуйся, роди́телей твои́х пресла́вное велича́ние.

Ра́дуйся, благочести́вое ве́ры процвете́ние; ра́дуйся, плоды́ яви́вый богопозна́ния.

Ра́дуйся, отроко́м прекра́сный о́браз подража́ния; ра́дуйся, ю́ношам благоуха́нный кри́не целому́дрия.

Ра́дуйся, я́ко из у́ст младе́нческих Бо́г тобо́ю похваля́ется; ра́дуйся, я́ко от ю́ности твоея́ Богоро́дица прославля́ется.

Ра́дуйся, Ио́сифе, Бо́жия Ма́тере люби́миче блаже́нный.

Конда́к 1.

Избра́нному уго́днику Бо́жия Ма́тере и послуша́ния те́плому рачи́телю, богому́дрому о́птинскому ста́рцу Ио́сифу похва́льная принесе́м песнопе́ния, я́ко да изба́вит на́с от вся́кия беды́ и напа́сти и наста́вит на стези́ пра́выя вопию́щих ему́ любо́вию:

Ра́дуйся, Ио́сифе, Бо́жия Ма́тере люби́миче блаже́нный.

Моли́тва.

О преподо́бне и богоно́сне о́тче на́ш Ио́сифе, ста́рчества о́птинскаго преди́вное украше́ние, воззри́ на на́с ми́лостивно, к земли́ приве́рженных, и к небе́сней возведи́ высоте́, я́ко ве́лие дерзнове́ние ко Всеми́лостивому Влады́це стяжа́вый и Пресвяты́я Богоро́дицы посеще́ния сподо́бивыйся. Моли́ся, богоблаже́нне о́тче, в любви́ и непоро́чности на́м на земли́ пожи́ти, стра́сти плотски́я попра́ти и доброде́тельный прекра́сный вене́ц по́стническим и любому́дрым житие́м себе́ соплета́ти.

Ты́ у́бо ве́даеши, о́тче, ко́ль опа́сно е́сть в ны́нешнем ве́це разсла́бленно жи́ти, иде́же собла́зны и раско́лы я́ко во́лцы хи́щницы ста́до Христо́во расхища́ют. Те́мже у́бо, о́тче, испроси́ на́м в ве́ре пра́вой до сме́рти пребыва́ти и преда́ния святы́х оте́ц со опа́стством храни́ти, да вну́трь двора́ Це́ркве Христо́выя пребу́дем, благода́тию храни́мии Всесвята́го Ду́ха и твои́м заступле́нием. Е́й, о́тче, моли́ и Ма́терь Све́та Пресвяту́ю Богоро́дицу, да не оста́вит на́с си́рых, егда́ душе́ю бу́дем разлуче́ни от те́ла сего́ бре́ннаго, но да прово́дит на́с безбе́дно ми́мо го́рьких мыта́рств испыта́ния ко Престо́лу Всеми́лостиваго Сы́на Своего́, Ему́ же поклоне́ние и сла́ву возсыла́ем, со Безнача́льным Его́ Отце́м и Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.