Конда́к 1.

Избра́нный от Бо́га моли́твенниче и служи́телю Христо́в, пусты́ню безмо́лвную ото́ка А́нзерскаго облагоуха́вый моли́твами твои́ми, все́м житие́м твои́м о́браз смире́ния и послуша́ния Го́споду на́м показа́вый, па́стырю и учи́телю преди́вный, Бо́гом вдохнове́нный, мно́гих искуше́ний и бе́д ве́рою Христо́вою победи́тель яви́лся еси́. Предстоя́ ны́не Престо́лу Вседержи́теля, моли́ся о на́с, рабе́х твои́х, да благода́рно вопие́м ти́:

Ра́дуйся, преподо́бне И́ове, А́нзерский пустынножи́телю.

И́кос 1.

А́нгелом Небе́сным подо́бяся любо́вию к Бо́гу, преподо́бне И́ове, Тому́ еди́ному все́ю душе́ю прилепи́вся и все́м житие́м порабо́тав, благода́ть ве́лию стяжа́л, и дарова́ний мно́гих сподо́бился еси́. Те́мже и мы́, дивя́щеся чу́дному житию́ твоему́, умиле́нно взыва́ем ти́:

Ра́дуйся, в пра́вилех добронра́вия и благоче́стия воспита́нный; ра́дуйся, от ю́ности на служе́ние Го́споду призва́нный.

Ра́дуйся, избра́нниче Бо́жий, во иере́я поста́вленный; ра́дуйся, сосу́де, Ду́ха Свята́го испо́лненный.

Ра́дуйся, служи́телю Та́ин Христо́вых благогове́йный; ра́дуйся, моли́твенниче к Бо́гу усе́рдный и дерзнове́нный.

Ра́дуйся, ревни́телю о сла́ве Бо́жии, мирску́ю же сла́ву ни во что́же вмени́вый; ра́дуйся, нача́ло прему́дрости стра́х Госпо́день положи́вый.

Ра́дуйся, преподо́бне И́ове, А́нзерский пустынножи́телю.

Конда́к 2.

Ви́дяще лю́дие о́браз Христа́, в тебе́ запечатле́нный, па́стыря до́браго тя́ позна́ша и наста́вника му́драго: прибега́ющии бо к по́мощи твое́й николи́же неуте́шени отхожда́ху, коему́ждо бо доброде́лание твое́ простира́шеся. Те́м да́р любве́ Христо́вы в тебе́ де́йствуемыя почита́юще, ра́достию воспева́ху Бо́гу: Аллилу́иа.

И́кос 2.

Ра́зумом Боже́ственным просвеща́емь, преподо́бне, вся́ земна́я и су́етная дале́че от себе́ отри́нул еси́, и́ноческому житию́ еще́ в ми́ре сы́й прилежа́л еси́, непреста́нно в моли́тве пребыва́я. Мы́ же, на предста́тельство твое́ упова́юще, ве́рно вопие́м ти́:

Ра́дуйся, свети́льниче, огне́м благода́ти возжже́нный; ра́дуйся, моли́твенниче богодухнове́нный.

Ра́дуйся, пропове́данием и́стины сердца́ люде́й воспламеня́яй; ра́дуйся, в рабо́ту Го́споду ду́ши уловля́яй.

Ра́дуйся, ве́сь живо́т сво́й Христу́ Бо́гу преда́вый; ра́дуйся, по́двиги твои́ми му́дрость духо́вную стяжа́вый.

Ра́дуйся, еле́ем благода́ти твоея́ неду́ги немощству́ющих врачу́яй; ра́дуйся, до́брыми де́лы твои́ми се́рдца своего́ сокро́вище умножа́яй.

Ра́дуйся, преподо́бне И́ове, А́нзерский пустынножи́телю.

Конда́к 3.

Си́лою Вы́шняго осеня́емый, служи́тель Боже́ственных Та́ин непоро́чен яви́лся еси́: в чистоте́ серде́чней дерзнове́нно же́ртву Бо́гу приноси́л еси́, о́ком духо́вным бе́здну милосе́рдия Того́ созерца́я, приобща́лся еси́ ра́дости неизглаго́ланныя, воспева́я вы́ну Бо́гу: Аллилу́иа.

И́кос 3.

Име́я любо́вь ве́лию ко своему́ Влады́це, в за́поведех Его́ безпоро́чно ходи́ти восхоте́л еси́: бли́жняго любо́вию Христо́вою объе́мля, полага́л еси́ ду́шу за о́вцы твоя́. Мы́ же, прославля́юще благода́ть предста́тельства твоего́ о лю́дех к Бо́гу, умиле́нно вопие́м:

Ра́дуйся, ско́рый помо́щниче во обстоя́ниих и беда́х су́щим; ра́дуйся, те́плый уте́шителю стра́ждущим и скорбя́щим.

Ра́дуйся, миротво́рче, вражду́ющих к ми́ру и согла́сию склоня́яй; ра́дуйся, му́дре, ста́рцев в богомы́слии наставля́яй.

Ра́дуйся, па́стырю, ю́ных целому́дрию поуча́яй; ра́дуйся, о си́рых и убо́гих пред си́льными ве́ка сего́ хода́таю.

Ра́дуйся, ка́ющияся в Бо́зе утвержда́яй, и любо́вию возставля́яй па́дшия; ра́дуйся, я́ко все́м вся́ бы́л еси́, да Христа́ приобря́щеши.

Ра́дуйся, преподо́бне И́ове, А́нзерский пустынножи́телю.

Конда́к 4.

Бу́рю собла́знов и страсте́й в пучи́не смире́ния твоего́ потопи́л еси́, му́дре, чу́ждь яви́лся еси́ вся́кия скве́рны. Моли́твою и посто́м на вра́жия ополче́ния вооружи́вся, вся́ ко́зни бесо́вския победи́л еси́, Бо́гу воспева́я: Аллилу́иа.

И́кос 4.

Слы́шавше лю́дие гра́да Москвы́ о доброде́телех твои́х, стека́хуся к тебе́, вся́к во́зраст и зва́ние. Те́мже и ца́рь Пе́тр, ви́дя кро́тость и му́дрость твою́, духо́внаго наста́вника своего́ сотвори́ тя; ты́ же благоволе́ние ца́рское к де́ланию добродуше́вному твоему́ прилага́я, па́че пре́жняго бли́жнему угожда́л еси́. Сего́ ра́ди па́мятствующе доброде́тели твоя́, воспева́ем ти́:

Ра́дуйся, бе́дствующих от беды́ спаса́яй; ра́дуйся, гла́дом ги́блющих пи́щею земно́ю и Небе́сною снабдева́яй.

Ра́дуйся, ще́дро напая́яй жа́ждущих духо́внаго наставле́ния; ра́дуйся, исто́чник благода́ти твоея́ оби́льно излива́яй ча́ющим спасе́ния.

Ра́дуйся, в темни́цах заключе́нным уте́шителю и покрови́телю; ра́дуйся, в та́йне от люде́й по́двигов мно́гих соверши́телю.

Ра́дуйся, в моли́тве и богомы́слии вы́ну пребыва́вый; ра́дуйся, Ца́рство Бо́жие вну́трь се́рдца своего́ стяжа́вый.

Ра́дуйся, преподо́бне И́ове, А́нзерский пустынножи́телю.

Конда́к 5.

Боже́ственным све́том озаря́емый, Бо́гом вдохновля́емый, мно́гими де́лы благи́ми освяти́лся еси́, те́мже мно́зем лю́дем по́мощь твоя́ благода́тная ко спасе́нию служа́ше. Ра́дуяся же о бли́жнем, любве́ Христо́вы соприча́стниче, воспева́л еси́ Бо́гу: Аллилу́иа.

И́кос 5.

Ви́дя вра́г доброде́тели твоя́, не терпя́ше пра́веднаго жития́ твоего́, иски́й погуби́ти тя́, клевето́ю лю́тою уязви́в: сего́ ра́ди ты́, ца́рским повеле́нием во оби́тель Солове́цкую преселе́н, в ли́це и́ночестем земны́й пу́ть сво́й скончава́л еси́. Мы́ же, таково́му смотре́нию Бо́жию о тебе́ дивя́щеся, взыва́ем ти́:

Ра́дуйся, Про́мыслом Бо́жиим руководи́мый; ра́дуйся, благода́тию Его́ всегда́ храни́мый.

Ра́дуйся, незло́бием и всепроще́нием ко́зни вра́жия сокруша́яй; ра́дуйся, за оби́дящих тя́ моле́ние ко Го́споду простира́яй.

Ра́дуйся, пла́мень Боже́ственныя любве́ неуста́нно в себе́ возжига́вый; ра́дуйся, мона́шескаго жития́ о́браз все́м показа́вый.

Ра́дуйся, па́че не́жели пре́жде безмо́лвия и уедине́ния ча́явый; ра́дуйся, смире́нием и кро́тостию поко́й души́ обреты́й.

Ра́дуйся, преподо́бне И́ове, А́нзерский пустынножи́телю.

Конда́к 6.

Пропове́дует пусты́ня А́нзерская, в ню́же пресели́лся еси́, богоприя́тныя по́двиги твоя́, блаже́нне, ни́вы духо́вныя неуста́нный де́лателю, та́ин Боже́ственных недрема́нный созерца́телю. Та́мо бо умиле́нным се́рдцем А́нгелом собесе́довал еси́, вку́пе с ни́ми воспева́я Бо́гу: Аллилу́иа.

И́кос 6.

Возсия́ тобо́ю ски́тская оби́тель Пресвяты́я Тро́ицы, но́ваго тя́ нача́льника прие́млющи ко управле́нию; ты́ же, строи́тельства жре́бий прие́м, прему́дре, о́браз доброде́телей яви́л еси́ бра́тии, и по мно́зех дне́х таковы́й же явля́еши на́м. Те́м благода́рно вопие́м ти́:

Ра́дуйся, па́стырю ди́вный и му́дрый учи́телю; ра́дуйся, ото́ка А́нзерскаго украси́телю.

Ра́дуйся, преподо́бнаго Елеаза́ра ве́рный после́дователю; ра́дуйся, преподо́бнаго Зоси́мы в строи́тельстве досто́йный подража́телю.

Ра́дуйся, преподо́бному Савва́тию в моли́тве и созерца́нии ра́вный; ра́дуйся, преподо́бному Ге́рману любо́вию и кро́тостию единонра́вный.

Ра́дуйся, Боже́ственных дарова́ний прие́мниче; ра́дуйся, Ца́рства Христо́ва насле́дниче.

Ра́дуйся, преподо́бне И́ове, А́нзерский пустынножи́телю.

Конда́к 7.

Хотя́щи Пресвята́я Де́ва во ото́це А́нзерстем оби́тель в па́мять страда́ний Кре́стных Сы́на Своего́ созда́ти, избра́ тя, преблаже́нне, сему́ смотре́нию послужи́ти, я́вльшися ти́ в виде́нии све́тлем со Елеаза́ром преподо́бным вку́пе. Ты́ же, повину́яся веле́нию Цари́цы Небе́сныя, ра́достию возопия́л еси́ к Бо́гу: Аллилу́иа.

И́кос 7.

Но́выя оби́тели нача́льник яви́лся еси́, преподо́бне, в горе́, ю́же нарече́ Богома́ти втору́ю Голго́фу, скита́ Распя́тскаго строи́телю ди́вный, вся́ му́дростию ко сла́ве Христа́ Бо́га и бра́тскому спасе́нию соверша́л еси́. Те́м си́лу Бо́жию в тебе́ чудотворя́щу сла́вяще, пое́м ти́ си́це:

Ра́дуйся, послу́шниче Бо́жия Ма́тере избра́нный; ра́дуйся, посеще́ния от Нея́ удосто́енный.

Ра́дуйся, Страсте́й Христо́вых усе́рдный почита́телю; ра́дуйся, оби́тели Распя́тия Госпо́дня в морсте́м ото́це основа́телю.

Ра́дуйся, непреста́нныя моли́твы ко Го́споду возноси́вый; ра́дуйся, те́ми от разбо́йник оби́тель сохрани́вый.

Ра́дуйся, уста́ва ски́тскаго стро́гий блюсти́телю; ра́дуйся, ре́вностный о душа́х попечи́телю.

Ра́дуйся, преподо́бне И́ове, А́нзерский пустынножи́телю.

Конда́к 8.

Стра́нное чу́до явле́но бы́сть тобо́ю, преподо́бне: исто́чник воды́ сла́дкия даде́ся бра́тии твое́й в горе́ оби́тельней милосе́рдием Пречи́стыя, прикло́ньшияся к моле́нию твоему́ сле́зному. Возвесели́шася же и́ноцы о такове́м Ея́ благоволе́нии, и воспе́ша Бо́гу: Аллилу́иа.

И́кос 8.

Всего́ себе́ Го́споду посвяти́в, в за́поведех Его́ безпоро́чно ходи́л еси́, во́ли своея́ отверга́яся и свои́х си́ не ища́й: бли́жняго я́ко Христа́ Самаго́ прие́мля, мно́гими дарова́нии от Того́ укра́шен бы́л еси́. Те́м преподо́бие твое́ почита́юще, восхваля́ем тя́ си́це:

Ра́дуйся, и́стинный дру́же Госпо́день и ве́рный; ра́дуйся, во́ли Его́ исполни́телю тве́рдый.

Ра́дуйся, печа́льных уте́шителю и боля́щих цели́телю; ра́дуйся, страсте́й врачева́телю и бе́д прогони́телю.

Ра́дуйся, из бе́здны грехо́вныя люде́й изводя́й; ра́дуйся, к покая́нию те́х призыва́яй.

Ра́дуйся, благода́тныя по́мощи ско́рый пода́телю; ра́дуйся, возлю́бленному тобо́ю Христу́ подража́телю.

Ра́дуйся, преподо́бне И́ове, А́нзерский пустынножи́телю.

Конда́к 9.

Вся́ во́инства Безпло́тных, а́нгельскому житию́ твоему́ удиви́вшеся, собесе́дника досто́йна избра́ша тя́, блаже́нне, и́мже во открове́ниих Боже́ственных о́бщник бы́л еси́, ра́достию воспева́я Бо́гу: Аллилу́иа.

И́кос 9.

Вети́и многовеща́ннии не мо́гут изрещи́, ни разуме́ти си́лы Бо́жия, в не́мощи твое́й соверша́ющияся, преподо́бне, е́юже искуше́ний лю́тых победи́тель яви́лся еси́, и в ста́рчестве нача́ло но́вому жи́тельству положи́л еси́. Покланя́ющеся таково́й в тебе́ де́йствуемей благода́ти, во умиле́нии глаго́лем:

Ра́дуйся, в послуша́ние Бо́гу себе́ всеце́ло преда́вый; ра́дуйся, и́го благо́е строи́тельства ски́тскаго любо́вию прие́мый.

Ра́дуйся, ча́дом твои́м воспита́телю до́брый; ра́дуйся, по́мощи духо́вныя пода́телю неоску́дный.

Ра́дуйся, покая́ния тве́рдый пропове́дниче; ра́дуйся, и́ноков в Бо́зе ве́рный наста́вниче.

Ра́дуйся, в послуша́нии и смире́нии бра́тию утвержда́яй; ра́дуйся, к жи́зни ве́чней те́х соблюда́яй.

Ра́дуйся, преподо́бне И́ове, А́нзерский пустынножи́телю.

Конда́к 10.

Спасти́ хотя́ ду́шу, не щади́л еси́ ю́, Го́спода Бо́га и словесе́ Его́ ра́ди: себе́ отверга́яся, вся́ лу́чшая Го́сподеви в да́р приноси́л еси́, ве́руя, я́ко па́че лу́чшаго То́й мо́жет да́ти. Ве́ра твоя́ никогда́же посра́млена бе́; те́м благода́ть воз благода́ть прие́мля, досточу́дне, воспева́л еси́ вы́ну Бо́гу: Аллилу́иа.

И́кос 10.

Сте́ну огражде́ния моли́твою созда́л еси́ себе́, преподо́бне, ю́же вра́г отню́д не возмо́же сокруши́ти: чистото́ю у́мною и серде́чною ми́л соде́лался еси́ Ду́ху благода́ти, обита́ющу в тебе́. Тому́ покланя́ющеся, воспева́ем ти́ такова́я:

Ра́дуйся, ору́жие ве́рное моли́тву избра́вый; ра́дуйся, е́юже вы́ну врага́ низлага́вый.

Ра́дуйся, о́ком духо́вным по́мыслы злы́х челове́к прозре́вый; ра́дуйся, наказа́нием со́нным к покая́нию сердца́ и́х возгре́вый.

Ра́дуйся, и ине́х наложе́нием неви́димых у́з от у́з а́довых изба́вивый; ра́дуйся, мно́гия на пу́ть благоче́стия и пра́вды наста́вивый.

Ра́дуйся, поги́бели гре́шником николи́же хоте́вый; ра́дуйся, боре́ния лю́тая о вся́кой души́ с мироде́ржцем име́вый.

Ра́дуйся, преподо́бне И́ове, А́нзерский пустынножи́телю.

Конда́к 11.

Пе́ние непреста́нное Бо́гу умиле́нною душе́ю возноси́л еси́, преподо́бне, те́мже, егда́ душа́ твоя́ от многотру́днаго телесе́ разлуча́шеся, А́нгели Небе́снии, прие́мше ю́ и на Не́бо вознося́ще, ра́достию воспева́ху Бо́гу: Аллилу́иа.

И́кос 11.

Светопода́тельна свети́льника име́яху тя́ ученицы́ твои́, я́ко мно́жество све́щ, от тебе́ возжига́ющеся любо́вию к Бо́гу; ты́ же и по сме́рти светоно́сен яви́лся еси́. Не оставля́й на́с моли́твами твои́ми, да вопие́м ти́:

Ра́дуйся, жития́ твоего́ ра́ди свята́го сподо́бивыйся кончи́ны блаже́нныя; ра́дуйся, о дни́ упокое́ния твоего́ Го́сподем предызвеще́нный.

Ра́дуйся, ублажа́вый А́нгелов в житии́ твое́м, те́мже и ти́и ублажи́ша тя́ во успе́нии; ра́дуйся, возвесели́вый Си́лы Небе́сныя во оби́тели го́рния преселе́нием.

Ра́дуйся, поки́нувый юдо́ль земну́ю на зау́трии дне́ воскре́снаго; ра́дуйся, я́ко тебе́ отверзо́шася врата́ Ца́рствия Небе́снаго.

Ра́дуйся, а́ще и те́лом от на́с разлучи́выйся, ду́хом при́сно с на́ми пребыва́яй; ра́дуйся, мощьми́ святы́ми твои́ми во оби́тели Распя́тстей почива́яй.

Ра́дуйся, преподо́бне И́ове, А́нзерский пустынножи́телю.

Конда́к 12.

Благода́ти в тебе́ су́щей дивя́щеся, ве́мы, я́ко вся́ у Бо́га испроси́ти мо́жеши. Те́мже наде́ющеся на кре́пкое твое́ о на́с пред Ни́м предста́тельство, ра́дующеся такове́й ти́ да́нней си́ле, с тобо́ю вку́пе воспева́ем Бо́гу: Аллилу́иа.

И́кос 12.

Пою́ще а́нгельское житие́ твое́, благословля́ем по́двиги твоя́ пред Бо́гом, преподо́бне, и́хже никто́же возмо́жет изрещи́. Дерзнове́ние твое́ пред Го́сподем ве́дуще, на по́мощь твою́, свы́ше посыла́емую, упова́ем, и велегла́сно вопие́м:

Ра́дуйся, Ду́ха Свята́го сосу́де избра́нный; ра́дуйся, на спасе́ние на́м Бо́гом дарова́нный.

Ра́дуйся, все́м се́рдцем свои́м Христа́ возлюби́вый; ра́дуйся, и́го благо́е Того́ на себе́ возложи́вый.

Ра́дуйся, иере́ев похвало́ и утвержде́ние; ра́дуйся, преподо́бных сла́во и мона́хов удобре́ние.

Ра́дуйся, о́бразе па́стырей и пусты́нников наста́вниче; ра́дуйся, Прему́дрости Бо́жия досто́йный избра́нниче.

Ра́дуйся, преподо́бне И́ове, А́нзерский пустынножи́телю.

Конда́к 13.

О преди́вный уго́дниче Бо́жий, вели́кий моли́твенниче и хода́таю о все́х христиа́нех, оби́тели Солове́цкия похвало́ и ото́ка А́нзерскаго сла́во! Приими́ моле́ние сие́ на́ше, любо́вию тебе́ приноси́мое, предста́ни те́плою твое́ю моли́твою о все́х, по́мощи твоея́ прося́щих; сокруши́ си́лу вра́жию, ны́ борю́щую, на пу́ть покая́ния на́с наста́ви, и изба́вити ны́ муче́ния ве́чнаго Го́спода умоли́, да спа́сшеся тобо́ю, ра́достию воспое́м Христу́ Бо́гу: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгелом Небе́сным подо́бяся любо́вию к Бо́гу, преподо́бне И́ове, Тому́ еди́ному все́ю душе́ю прилепи́вся и все́м житие́м порабо́тав, благода́ть ве́лию стяжа́л, и дарова́ний мно́гих сподо́бился еси́. Те́мже и мы́, дивя́щеся чу́дному житию́ твоему́, умиле́нно взыва́ем ти́:

Ра́дуйся, в пра́вилех добронра́вия и благоче́стия воспита́нный; ра́дуйся, от ю́ности на служе́ние Го́споду призва́нный.

Ра́дуйся, избра́нниче Бо́жий, во иере́я поста́вленный; ра́дуйся, сосу́де, Ду́ха Свята́го испо́лненный.

Ра́дуйся, служи́телю Та́ин Христо́вых благогове́йный; ра́дуйся, моли́твенниче к Бо́гу усе́рдный и дерзнове́нный.

Ра́дуйся, ревни́телю о сла́ве Бо́жии, мирску́ю же сла́ву ни во что́же вмени́вый; ра́дуйся, нача́ло прему́дрости стра́х Госпо́день положи́вый.

Ра́дуйся, преподо́бне И́ове, А́нзерский пустынножи́телю.

Конда́к 1.

Избра́нный от Бо́га моли́твенниче и служи́телю Христо́в, пусты́ню безмо́лвную ото́ка А́нзерскаго облагоуха́вый моли́твами твои́ми, все́м житие́м твои́м о́браз смире́ния и послуша́ния Го́споду на́м показа́вый, па́стырю и учи́телю преди́вный, Бо́гом вдохнове́нный, мно́гих искуше́ний и бе́д ве́рою Христо́вою победи́тель яви́лся еси́. Предстоя́ ны́не Престо́лу Вседержи́теля, моли́ся о на́с, рабе́х твои́х, да благода́рно вопие́м ти́:

Ра́дуйся, преподо́бне И́ове, А́нзерский пустынножи́телю.

Моли́тва пе́рвая.

О преподо́бне о́тче И́ове, предста́телю на́ш к Бо́гу неусы́пный, моли́твенниче о душа́х на́ших дерзнове́нный, пусты́ни А́нзерския красото́ пресве́тлая, оби́тели Голгофо-Распя́тския си́ло духо́вная! Мно́гими труды́ тя́ Бо́гу потруди́вшася, и на коне́ц жития́ к ли́ку и́ноческому приобщи́вшася, сподо́би Пресвята́я Богоро́дица спаси́тельным Страсте́м Христо́вым послужи́ти, го́ру безмо́лвну тобо́ю освяти́вши, ю́же нарече́ Голго́фу, вручи́вши ти́ устро́ити оби́тель ски́тскую. О́ная и процвете́ чу́дными по́двиги и по́стническим житие́м твои́м и учени́к твои́х, и благода́ть почи́ на не́й, и сла́ва Небе́сная облече́ ю́. По́слежде же па́ки оправди́ся и́мя горе́ се́й за мно́жество зде́ претерпе́вших гоне́ния и сме́рть, ве́ры Христо́вы и пра́вды ра́ди, и и́на сла́ва му́ченическая осия́ твою́ оби́тель. Ны́не воста́вшей то́й от запусте́ния и поруга́ний, и ми́лостию Бо́жиею Тому́ рабо́тающей, иде́же и святы́я мо́щи твоя́, я́ко многоце́нное сокро́вище, во хра́ме тобо́ю созда́ннем обрето́шася, [предстоя́ще се́й святы́ни,] усе́рдно мо́лим тя́, достоблаже́нне о́тче: да́ждь на́м Креста́ у́мное зре́ние в себе́ име́ти и благодаре́ние серде́чное за ны́ распе́ншемуся Христу́ Бо́гу: воскресе́ния наде́жду и упова́ние спасе́ния простира́юще к Тому́, кре́ст жития́ своего́ взе́мше, со вся́ким послуша́нием ше́ствовати путе́м Госпо́дним: покая́ния трудо́м сниска́ти благода́ть и ду́х любве́ Христо́вы в душа́х на́ших. И́ночествующих сподо́би по́двигом до́брым подвиза́тися, и все́м правосла́вным испроси́ досто́йно зва́ния в за́поведех Бо́жиих хожде́ние и исполне́ние доброде́телей и, в не́же ты́ безпреткнове́нно вше́л еси́, Ца́рства Небе́снаго приобще́ние, да и мы́ с тобо́ю наслажда́емся та́мо Боже́ственныя сла́вы, и воспева́ем Всесвяту́ю Тро́ицу, Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.

Моли́тва втора́я.

О преподо́бне и богоно́сне о́тче на́ш И́ове, пусты́ни А́нзерския безмо́лвный обита́телю, обе́тов мона́шеских и́стинный ревни́телю, А́нгелов любе́зный собесе́дниче, и́ноков в Бо́зе ве́рный наста́вниче! Чу́дно житие́ твое́, неисчи́слими по́двизи твои́, ве́лие пред Бо́гом дерзнове́ние твое́! Мо́лим тя́, избра́нниче Христо́в, посети́ немощству́ющия ду́ши на́ша, простри́ о на́с те́плую к Бо́гу моли́тву твою́, огради́ заступле́нием твои́м оби́тель, тебе́ во изгна́нии прии́мшую и на по́двиг безмо́лвия тебе́ вдохнови́вшую. Ты́, неуста́нно в покая́нном пла́чи пребыва́вый, поуча́я бра́тию, я́ко сие́ е́сть клю́ч к Ца́рству Небе́сному, помози́ на́м, погиба́ющим в нечу́вствии и окая́нстве, твои́м благода́тным предста́тельством отве́ргнутися вся́кия грехо́вныя скве́рны, и плоды́ и́стиннаго покая́ния Го́споду принести́. Ты́, украси́вый собо́ю со́нм и́ноков Солове́цких, украси́ на́ше ску́дное житие́, призыва́я на на́с благослове́ние Бо́жие, да оста́вивше вся́ до́лу влеку́щая, обрати́м мы́сленнеи о́чи свои́ к Бо́гу, и и́стинных Небе́сных бла́г наслади́мся. О досточу́дне И́ове, во смире́нии твое́м возвели́чивыйся, и нището́ю твое́ю обогати́выйся! Умоли́ Христа́ Бо́га смире́нием ду́ши на́ша украси́ти, оскуде́вшая сердца́ на́ша Небе́сными дарова́нии испо́лнити. Сподо́би на́с нищету́ Христо́ву возлюби́ти и стяжа́ния еди́наго Ду́ха Свята́го в се́рдце свое́м при́сно жела́ти. Ты́, до конца́ за́поведь Бо́жию о любви́ испо́лнивый, безме́рную любо́вь к лю́дем до после́дняго вздо́ха в се́рдце носи́вый, неду́гующим и стра́ждущим со усе́рдием ве́лиим вы́ну служи́вый, научи́ и на́с се́й вя́щшей доброде́тели, умоли́ Го́спода Иису́са Христа́, да излие́т от приснотеку́щаго исто́чника Своея́ Боже́ственныя любве́ во обнища́вшая сердца́ на́ша, да не то́кмо посто́м и бде́нием, моли́твою и коленопреклоне́нием, но наипа́че незло́бием и всепроще́нием, дру́г дру́га не́мощей ноше́нием прикло́ним к себе́ милосе́рдие Го́спода, И́же е́сть всесоверше́нная Любо́вь, и в Ца́рство Небе́сное, Ца́рство ве́чныя ра́дости, благода́тию Его́ вни́дем. Достоблаже́нне И́ове, моли́твенниче к Бо́гу усе́рднейший и благоприя́тнейший, глубино́ю серде́чною сокрове́нныя та́йны Бо́жия созерца́ти сподо́бивыйся, научи́ на́с те́плая и сокруше́нная моле́ния к Тому́ простира́ти, неусы́пно Бо́га пред очи́ма вну́треннима име́ти, и́мя Его́ сладча́йшее, я́ко не́кое многоце́нное сокро́вище, в се́рдце при́сно благода́рно храни́ти. Мо́лим тя́, преблаги́й о́тче, богоуго́днаго жития́ твоего́ ра́ди сподо́бившагося посеще́ния Ма́тере Бо́жия, и повеле́ние оби́тель Распя́тию Христа́ Бо́га созда́ти от Нея́ прии́мшаго, испроси́ на́м твое́ю благомо́щною моли́твою Тоя́ заступле́ние и покро́в, да никогда́же оста́вит на́с всеси́льная по́мощь Цари́цы Небе́сныя. Помина́й обеща́ние твое́, му́дре, ду́хом при́сно пребыва́ти с на́ми, не отлуча́йся на́с, ра́б твои́х, ве́рою тебе́ моля́щихся, и во благовре́менную по́мощь тя́ призыва́ющих. Моли́ за оби́тель сию́, да процвете́т в не́й святы́ня Госпо́дня, да не исче́знут в не́й сокрове́ннии в Бо́зе подви́жницы и моли́твенницы, да не умо́лкнет гла́с воспева́ющих Бо́га, Ему́же сла́ва, че́сть и поклоне́ние, во ве́ки веко́в. Ами́нь.