Конда́к 1.

Избра́нному Царя́ си́л Го́спода Иису́са, духо́вному воево́де и ди́вному чудотво́рцу, богоно́сному отцу́ на́шему Кири́ллу благода́рственная воспису́ем, я́ко храни́телю на́шему и те́плому предста́телю. Ты́ же, я́ко име́яй дерзнове́ние у Престо́ла Христо́ва ве́рою чту́щих тя́ моли́твою твое́ю сохраня́й, да с ра́достию зове́м ти́:

Ра́дуйся, преподо́бне о́тче на́ш Кири́лле, вели́кий чудотво́рче.

И́кос 1.

А́нгельское во пло́ти твое́ жи́тельство прови́дев всея́ тва́ри Созда́тель, еще́ во утро́бе ма́терней, во вре́мя боже́ственнаго пе́ния, трикра́тным возглаше́нием, показа́ тя́ ми́ру и́стиннаго уго́дника бы́ти Святы́я Тро́ицы. Те́мже ублажа́ем тя́, вопию́ще:

Ра́дуйся, о́трасле пречестна́я ко́рене благочести́ваго; ра́дуйся, благочести́вых роди́телей до́брый и избра́нный пло́де.

Ра́дуйся, я́ко и́маши во пло́ти а́нгел бы́ти предусмо́тренный; ра́дуйся, от чре́ва ма́терня на сие́ предъизбра́нный.

Ра́дуйся, во утро́бе ма́терни Святе́й Тро́ице троекра́тно трисвяту́ю хвалу́ возгласи́вый; ра́дуйся, от ма́терня чре́ва Святы́я Тро́ицы оби́тель свята́я я́ве бы́вый.

Ра́дуйся, еще́ пре́жде рожде́ния орга́н Свята́го Ду́ха предъявле́нный; ра́дуйся, от утро́бы ма́терни освяще́нный.

Ра́дуйся, трикра́тным твои́м во чре́ве возглаше́нием роди́тели удиви́вый; ра́дуйся, чрез сие́ дела́ Бо́жия пресла́вная яви́вый.

Ра́дуйся, я́ко тобо́ю прогоня́ются ско́рби; ра́дуйся, я́ко тобо́ю от Го́спода подаю́тся на́м ве́лия ми́лости.

Ра́дуйся, преподо́бне о́тче на́ш Кири́лле, вели́кий чудотво́рче.

Конда́к 2.

Ви́дяще удивля́емся, о́тче преди́вне Кири́лле, я́ко о́троку еще́ су́щу ю́ну те́лом, и не доспе́вшу соверше́ннаго во́зраста, прии́де жела́ние ти́, е́же бы́ти ти́ мона́ху, и вта́й удали́лся еси́ от роди́телей свои́х на реку́ Обно́ру, и водвори́ся еси́ с рабо́тающими Бо́гу во оби́тели, соста́вленней от преподо́бнаго Корни́лиа, во е́же непреста́нно вопи́ти Ему́: Аллилу́иа.

И́кос 2.

Ра́зумом просвеще́нным свы́ше, разуме́л еси́, преподо́бне Кири́лле, я́ко в ми́ре се́м вся́ческая суета́ и тле́нию прича́стна: еди́но же е́сть на потре́бу челове́ком, е́же благоугоди́ти Го́сподеви. Сего́ ра́ди возлюби́в доброде́тельное по Бо́зе житие́, не поскорбе́л еси́ по роди́телех твои́х, ни о до́ме, ни о сро́дницех, ниже́ от име́ния что́ взя́л еси́, кроме́ еди́ныя ри́зы: но во все́м упова́ние положи́в на Бо́га и Пречи́стую Его́ Ма́терь, удали́лся еси́ во оби́тель преподо́бнаго Корни́лиа, неле́ностно порабо́тати Христу́. Те́мже вопие́м ти́:

Ра́дуйся, отроча́ добродуше́вное и благонаде́жное; ра́дуйся, дитя́ боголюбе́зное, благода́ти Ду́ха Бо́жия испо́лненное.

Ра́дуйся, во мла́дости твое́й ста́рческую му́дрость стяжа́вый; ра́дуйся, ю́ность твою́ непоро́чностию жи́тельства украси́вый.

Ра́дуйся, я́ко Бо́жия любве́ огне́м измла́да твое́ се́рдце те́пле разжже́ся; ра́дуйся, я́ко мирска́го ду́ха похотьми́ с душе́ю и те́ло не оскверни́ся.

Ра́дуйся, всего́ ми́ра кра́сная я́ко ско́ро исчеза́ющая презре́вый; ра́дуйся, доброде́тельное по Бо́зе житие́ возлюби́вый.

Ра́дуйся, по любви́ к Го́споду, благоду́шно оста́вивый роди́тели своя́, до́м, сро́дники и име́ние; ра́дуйся, дости́гий к неистощи́мому бога́тству.

Ра́дуйся, ше́ствовавый с неве́домым ста́рцем ко оби́тели Корни́лиеве; ра́дуйся, чрез сие́ разуме́вый Бо́жие посеще́ние.

Ра́дуйся, преподо́бне о́тче на́ш Кири́лле, вели́кий чудотво́рче.

Конда́к 3.

Си́лою свы́ше облещи́ся сподо́бился еси́, преподо́бне о́тче на́ш Кири́лле, во оби́тели Корни́лиеве, егда́ прия́л еси́ а́нгельский о́браз: прише́д бо в монасты́рь, моли́л еси́ преподо́бнаго Корни́лиа со слеза́ми, да бу́деши мона́х. Ви́дев же тя́ преподо́бный, и уразуме́в прозорли́выма очи́ма, я́ко сосу́д избра́н Свята́го Ду́ха хо́щеши бы́ти, постриже́ тя, и нарече́ и́мя ти́ Кири́лл. Те́мже с весе́лием не преста́л еси́, се́рдцем и усты́ поя́, воспева́ти Бо́га: Аллилу́иа.

И́кос 3.

Име́яй всегда́ пред очи́ма твои́ма Го́спода, ве́сь преда́лся еси́ Бо́гови, и вда́л еси́ себе́ на труды́ мно́ги, со вся́ким воздержа́нием смиря́я твою́ ду́шу, те́ло же твое́ труды́ и по́двиги утомля́я толи́ко, я́ко преподо́бному Корни́лию и все́й бра́тии зело́ удивля́тися вели́кому твоему́ смире́нию, покоре́нию, послуша́нию, и толи́кому в ю́ности твое́й благонра́вию, укрепле́нию и бо́дрости, и прославля́ху о тебе́ Бо́га. Те́мже ра́дующеся о тебе́, зове́м ти́:

Ра́дуйся, у́м тво́й к небеси́ впери́вый; ра́дуйся, са́м себе́ и всю́ жи́знь Христу́ Бо́гу преда́вый.

Ра́дуйся, все́ житие́ посвяти́вый на хвалу́ и прославле́ние Бо́га; ра́дуйся, вели́чием твои́х трудо́в и подвиго́в сла́вы преподо́бных дости́гнувый.

Ра́дуйся, вели́кое воздержа́ние и по́стничество на́м явля́яй; ра́дуйся, о́ными мно́гих приводя́й в удивле́ние и увеселя́яй.

Ра́дуйся, во пло́ти а́нгела, высото́ю жи́тельства, в себе́ яви́вый; ра́дуйся, смире́нием нелицеме́рным и послуша́нием все́х удиви́вый.

Ра́дуйся, я́ко не любя́ сла́вы челове́ческия, подо́бне Авраа́му изво́лил еси́ изы́ти от земли́ твоея́; ра́дуйся, я́ко от сего́ наме́рения на вре́мя удержа́н бы́л еси́, Бо́гу твое́ спасе́ние стро́ящу.

Ра́дуйся, вождю́ ко а́нгельскому о́бразу отца́ и ма́тере боголюби́вых; ра́дуйся, в житии́ и́ночестем твоего́ роди́теля наста́вниче.

Ра́дуйся, преподо́бне о́тче на́ш Кири́лле, вели́кий чудотво́рче.

Конда́к 4.

Бу́ря недоуме́ния смуща́ет ми́ у́м, ка́ко досто́йно пе́ти стра́нническое житие́ твое́, блаже́нне о́тче Кири́лле: в еди́ней раздра́нней ри́зе обходи́л еси́ вся́ Помо́рския страны́, Подмоско́вския и Пско́вския и Новогра́дския, не ве́дый поко́я во труде́х твои́х, не имы́й себе́ ме́ста поко́йна и со зверьми́ пожи́вый мно́гое вре́мя. Ты́ же, на ка́мени Христо́вою ве́рою утвержде́нный, укрепля́ющему тя́ Иису́су Христу́ пе́снь воспева́л еси́: Аллилу́иа.

И́кос 4.

Слы́шал еси́ во вре́мя моли́твы твоея́, преподо́бне о́тче на́ш, гла́с с небесе́ глаго́лющ: «О блаже́нне Кири́лле, возлю́бленниче Мо́й, уже́ мно́гия доброде́тели и труды́ восприя́л еси́, Мои́м за́поведем бы́л еси́ храни́тель, те́сный и приско́рбный проше́л еси́ пу́ть, и ны́не гряди́ к Белу́ е́зеру: та́мо бо угото́вах тебе́ ме́сто, в не́мже возмо́жеши спасти́ся». И а́бие со гла́сом о́ным, све́т ве́лий возсия́ к полу́нощным страна́м Бе́ла е́зера, и гла́сом о́ным а́ки пе́рстом пока́зоваше ме́сто, иде́же ны́не монасты́рь стои́т. Мы́ же, удивля́ющеся вели́чию на тебе́ явле́нных, усе́рдно воспева́ем хвалы́ сия́:

Ра́дуйся, блаже́нне Кири́лле, стра́нническое житие́ на земли́ преше́дый; ра́дуйся, пустынножи́телей, вели́каго Ону́фриа, Ма́рка и Петра́, ходи́вый следы́.

Ра́дуйся, во вре́мя земна́го стра́нствия бы́лие, траву́, ва́хту и кору́ сосно́вую в пи́щу себе́ име́вый, и за сицевы́й по́двиг воздержа́ния и поста́, небе́сная бла́га себе́ стяжа́вый; ра́дуйся, во океа́новых помо́рских пусты́нях со зверьми́ мно́гое вре́мя пожи́вый и а́нгельскаго лицезре́ния сподо́бивыйся.

Ра́дуйся, слы́шавый с небесе́ гла́с, блаже́нна тя́ нарица́ющь; ра́дуйся, уразуме́вый то́йже небе́сный гла́с, боголюбе́зна тя́ и храни́теля за́поведей Христо́вых явля́ющь.

Ра́дуйся, лучеза́рностию ве́лия све́та, зре́вый ме́сто на поко́й твое́й ста́рости; ра́дуйся, си́м испо́лнивыйся премно́гия ра́дости.

Ра́дуйся, моле́ний твои́х и проше́ний прие́мый исполне́ние; ра́дуйся, от Христа́ Спа́са прие́мый о си́х благо́е извеще́ние.

Ра́дуйся, от си́х получи́вый мно́гую ра́дость; ра́дуйся, си́ми в се́рдце твое́м ощути́вый неисповеди́мую сла́дость.

Ра́дуйся, преподо́бне о́тче на́ш Кири́лле, вели́кий чудотво́рче.

Конда́к 5.

Боготе́чною звездо́ю преше́л еси́ в Помо́рских и Подмоско́вских страна́х и Новогра́дских, блаже́нне Кири́лле, блиста́яй и́ноческими твои́ми по́двиги и доброде́телию. Те́мже я́ко благосия́тельная звезда́ яви́лся еси́, преблаже́нне, во страна́х Но́ва е́зера, на пу́ть спаси́тельный к ве́чному Небе́сному Оте́честву веду́щая, егда́, приме́ром ве́рных ду́шы назида́я, научи́л еси́ благода́рно пе́ти: Аллилу́иа.

И́кос 5.

Ви́дев, блаже́нне Кири́лле, я́ко не презре́ Госпо́дь проше́ния твоего́, ра́дуяся поте́кл еси́ в Ти́хфин монасты́рь Пречи́стыя Богоро́дицы и яви́ся ти́ во сне́ чрез три́ дни́ Пречи́стая Богоро́дица, и рече́ ти́хим гла́сом: «Уго́дниче Пресвяты́я Тро́ицы, ра́бе Мо́й Кири́лле, пойди́ на восто́чную страну́ к Белу́ е́зеру, и яви́т тебе́ Госпо́дь, Сы́н Мо́й и Бо́г, поко́й ста́рости твое́й». Ты́ же, блаже́нне, явле́нием Бо́жия Ма́тере наставля́емь и того́ сия́нием озаря́емь, дости́гл еси́ предука́занныя ти́ пусты́ни: иде́же уви́дев о́гненный сто́лп, по сему́ благода́тному зна́мению основа́л еси́ та́мо пречестну́ю оби́тель. Сего́ ра́ди срета́ем тя́ приве́тствии си́ми:

Ра́дуйся, уго́дниче Пресвяты́я Тро́ицы; ра́дуйся, ра́бе Пречи́стыя Богома́тере.

Ра́дуйся, зри́телю боже́ственных виде́ний; ра́дуйся, усе́рдный исполни́телю Бо́жиих хоте́ний.

Ра́дуйся, сподо́бивыйся ви́дети во сне́ Пресвяту́ю Богоро́дицу; ра́дуйся, удосто́ивыйся слы́шати ти́хий Ея́ гла́с.

Ра́дуйся, сто́лп о́гнен ви́девый на Кра́сном о́строве, твое́ образу́ющь в ду́се соверше́нство; ра́дуйся, чрез сие́ прие́мый от Го́спода благо́е извеще́ние о явле́ннем ме́сте.

Ра́дуйся, огневи́дный сто́лпе, наставля́яй на пу́ть спасе́ния; ра́дуйся, светоза́рный свети́льниче, ве́рныя просвеща́яй.

Ра́дуйся, до́брый де́лателю вертогра́да Христо́ва; ра́дуйся, досто́ин бы́вый а́нгельскаго явле́ния.

Ра́дуйся, преподо́бне о́тче на́ш Кири́лле, вели́кий чудотво́рче.

Конда́к 6.

Пропове́дник де́лом бы́л еси́, о́тче на́ш Кири́лле: де́йствуя во пе́рвее, учи́л еси́ своя́ ду́шы вве́ривших твоему́ му́дрому руково́дству, и к небеси́ все́х наста́вил еси́, до́бре после́дующих спаси́тельным твои́м уче́нием и подо́бящихся твоему́ житию́ доброде́тельному. С ни́миже тя́ почита́ем, свяще́нно в преставле́нии твое́м ра́дующеся и вопию́ще Бо́гу: Аллилу́иа.

И́кос 6.

Возсия́ в богохрани́мей души́ твое́й и́стинный све́т богове́дения, егда́ нача́л еси́ созида́ти оби́тель: поста́вил еси́ себе́ ке́ллийцу ма́лу, и другу́ю ке́ллию бли́з тоя́ поста́вил еси́ для бра́тий, хотя́щих с тобо́ю жи́ти; в прииду́щее же ле́то, устро́ил еси́ це́рковь ма́лу во и́мя Воскресе́ния Христо́ва, и другу́ю во и́мя Пречи́стыя Богоро́дицы Одиги́трии, и про́чая потре́бная монасты́рская обита́лища; и мно́жество ревни́телей твоему́ житию́, и́ночествующих та́мо собра́л еси́ Го́сподеви. Те́мже восхваля́юще тя́, усе́рдно вопие́м:

Ра́дуйся, сподо́бивыйся хра́мы и оби́тель устро́ити и во о́ну и́ноков мно́жество собра́ти; ра́дуйся, уподо́бивыйся дре́вним общежи́тия нача́льником.

Ра́дуйся, го́рлице пустыннолюби́вая; ра́дуйся, дре́во, посреде́ происходя́щих во́д насажде́нное.

Ра́дуйся, мона́хом светлоя́снейший о́бразе богоугожде́ния; ра́дуйся, де́ятельно указа́вый те́м пра́вый пу́ть спасе́ния.

Ра́дуйся, собра́вый ли́к учени́к, тебе́ единонра́вных; ра́дуйся, си́х присоедини́вый лико́м избра́нных.

Ра́дуйся, зри́телю преми́рных и вышечу́вственных виде́ний; ра́дуйся, руководи́телю ко спаси́тельному созерца́нию.

Ра́дуйся, яви́вый тя́ ста́ду твоему́ о́браз кро́тости и смиренному́дрия; ра́дуйся, все́м и́ноком показу́яй в себе́ о́браз ве́рнаго Бо́гу служе́ния.

Ра́дуйся, преподо́бне о́тче на́ш Кири́лле, вели́кий чудотво́рче.

Конда́к 7.

Хотя́щу ти́ угоди́ти еди́ному Бо́гу, блаже́нне Кири́лле, и пребыва́ющу посреде́ Но́ва е́зера, ве́сь вда́лся еси́ безме́рным подвиго́м и глубине́ смире́ния: труды́ твоя́, и моли́твы, и поще́ние, ко́е сло́во изглаго́лати мо́жет; овогда́ же на се́яние и сажде́ние сне́дей зе́млю копа́л еси́, овогда́ же древеса́ на устрое́ние монасты́рское гото́вил еси́. Сего́ ра́ди ны́не превознесе́н еси́, предстоя́ Бо́гу с пе́снию: Аллилу́иа.

И́кос 7.

Но́ваго тя́ наста́вника мона́шествующих и благотеку́щих обучи́теля разуме́ем, о́тче святы́й Кири́лле; про́йде бо о тебе́ сла́ва повсю́ду, и мно́зи прихожда́ху к тебе́ благослове́ния ра́ди и моли́твы, и слы́шания ра́ди душеспаси́тельных слове́с, ини́и же и сожи́тельствовати с тобо́ю жела́юще: ты́ же все́х приима́л еси́ с любо́вию, и поуча́л еси́ и́х от боже́ственнаго Писа́ния, е́же твори́ти за́поведи Госпо́дни, храни́ти чистоту́ теле́сную и име́ти любо́вь нелицеме́рную дру́г ко дру́гу. Те́мже благода́рственно вопие́м ти́:

Ра́дуйся, до́брый ста́да твоего́ и́ночествующих наста́вниче и прави́телю; ра́дуйся, притека́ющих к тебе́ благослове́ния ра́ди и моли́твы, и слы́шания ра́ди душеспаси́тельных слове́с, моли́твенниче и учи́телю.

Ра́дуйся, за́поведи Госпо́дни твори́ти науча́яй; ра́дуйся, храни́ти чистоту́ теле́сную повелева́яй.

Ра́дуйся, братолю́бия христиа́нскаго преи́скренний ревни́телю; ра́дуйся, любве́ учи́теля твоего́ ко бра́тии подража́телю.

Ра́дуйся, за́поведей Христо́вых, я́же о любви́, ве́рный исполни́телю; ра́дуйся, и все́х на́с в любви́ дру́г ко дру́гу ди́вный наста́вниче.

Ра́дуйся, благогове́йный служи́телю Бо́жий, о ве́рных умоля́яй; ра́дуйся, не сло́вом то́чию, но па́че житие́м поуча́яй.

Ра́дуйся, свети́льниче многосве́тлый, возведы́й ко Христу́ мона́хов мно́жества; ра́дуйся, предводи́телю до́брый в пути́ спасе́ния.

Ра́дуйся, преподо́бне о́тче на́ш Кири́лле, вели́кий чудотво́рче.

Конда́к 8.

Стра́нны и ди́вны твоя́ зри́м по́двиги кро́тости и терпе́ния, о́тче богому́дре Кири́лле: ви́девше бо бе́си себе́ поруга́емыя от тебе́, мно́гая озлобле́ния ти́ творя́ху; иногда́ же и ловцы́, приходя́щии на Но́во е́зеро ры́бы лови́ти, мно́го оскорбля́ху тя́. Те́мже и стяжа́л еси́ сугу́бый вене́ц от Царя́ Христа́, Ему́же предстои́ши ны́не, вопия́: Аллилу́иа.

И́кос 8.

Все́ю душе́ю послужи́в Го́споду и все́м житие́м благоугоди́в Ему́, просла́вился еси́ терпе́нием твои́м, взира́я на Нача́льника ве́ры и соверши́теля Иису́са, о́тче преподо́бне Кири́лле. «Что́ ми́ ско́рби мно́ги и озлобле́ния наносите́, лю́дие» — глаго́лал еси́ ко оскорби́вшым тя́. «Потре́ба, о́тче, терпе́ния и моли́твы», — глаго́ла ти́ учени́к тво́й Диони́сий. Мы́ же, помина́юще терпе́ние твое́, ублажа́ем тя́, глаго́люще:

Ра́дуйся, вели́кий благоче́стия сто́лпе; ра́дуйся, зерца́ло досточу́днаго терпе́ния.

Ра́дуйся, терпе́нию Христо́ву ве́рно подража́вый; ра́дуйся, си́лу за́поведи Христо́вы, я́же о любви́ ко враго́м, прему́дре уразуме́вый.

Ра́дуйся, во искуше́нии от люде́й хи́трость лука́ваго прозре́вый; ра́дуйся, и во все́м житии́ твое́м ухищре́ния сатаны́ проразуме́вый.

Ра́дуйся, зло́е благи́м всегда́ препобежда́вый; ра́дуйся, ско́рби мно́ги со упова́нием терпе́вый.

Ра́дуйся, терпе́нием зло́бу врага́ попра́вый; ра́дуйся, мно́гия ко́зни бесо́в си́лою Бо́жиею победи́вый.

Ра́дуйся, крило́ма богомы́слия се́ти вра́жия сокруши́вый; ра́дуйся, смире́нием возвыша́емый, в небе́сныя оби́тели дости́гнувый.

Ра́дуйся, преподо́бне о́тче на́ш Кири́лле, вели́кий чудотво́рче.

Конда́к 9.

Вся́кое ри́торское сло́во не довле́ет к досто́йному песнохвале́нию твоему́, Кири́лле преблаже́нне: пачеесте́ственно бо подвиза́лся еси́ в немощне́й пло́ти, чу́дне, отону́дуже и просла́вился еси́ от Бо́га, чуде́с бога́тством тя́ обогати́вшаго. Те́ми озаря́еми, благода́рственно вопие́м Христу́ Бо́гу, тя́ просла́вльшему: Аллилу́иа.

И́кос 9.

Вити́и многовеща́ннии недоуме́ют изобрази́ти благодея́ния и чудеса́ твоя́, я́же соде́ял еси́ в житии́ твое́м, досточу́дне Кири́лле, о́тче на́ш: но мы́ немо́лчно, а́ще и не по достоя́нию, любо́вию вопие́м ти́:

Ра́дуйся, блаже́нне Кири́лле, ви́девый све́т ве́лий, осия́вший тя́ с преподо́бным Ники́фором; ра́дуйся, согре́шшым проти́ву тебе́ разбо́йником, изба́вленным тобо́ю от слепоты́, любо́вь и́стинную показа́вый.

Ра́дуйся, удосто́ивыйся во вре́мя соверше́ния Боже́ственныя Литурги́и а́нгельскаго сослуже́ния; ра́дуйся, проси́вшим у тебе́ с ве́рою моли́твы о рожде́нии и воспита́нии ча́д, подава́яй утеше́ние и ра́дость.

Ра́дуйся, боле́знь кня́зя зело́ тя́жкую уврачева́вый; ра́дуйся, ничто́же отню́д ви́дящей о́ком прозре́ние дарова́вый.

Ра́дуйся, утопа́ющих ско́рое и изве́стное спасе́ние; ра́дуйся, закоснева́ющих гре́шников та́тей исправле́ние.

Ра́дуйся, стра́ждущих от бесо́в цели́телю; ра́дуйся, тьмо́ю страсте́й плотски́х омраче́нных просвети́телю.

Ра́дуйся, разли́чныя неду́ги неисце́льныя исцеля́яй моли́твами твои́ми; ра́дуйся, врачу́ боле́зней не то́кмо теле́сных, но и душе́вных.

Ра́дуйся, преподо́бне о́тче на́ш Кири́лле, вели́кий чудотво́рче.

Конда́к 10.

Спаса́яй ду́шы учени́к твои́х и разуме́вый е́же к Бо́гу твое́ отше́ствие, преподо́бне и преблаже́нне Кири́лле, призва́л еси́ бра́тию, ре́к и́м: «Се́ уже́, бра́тие моя́, коне́ц жи́зни моея́ прибли́жися, и а́з отхожду́ от жития́ сего́: ва́с же предаю́ в ру́це Сы́на Бо́жия, да сохрани́т вы́ и утверди́т в любви́ Свое́й: а́ще бо теле́сне и отхожду́ от ва́с, но ду́хом с ва́ми неотсту́пен бу́ду». И о прославле́нии оби́тели твое́й, име́ющем бы́ти по кончи́не твое́й, предре́кл еси́. Ны́не у́бо, по предрече́нию исполня́емая зря́ще, благода́рно вопие́м Бо́гу: Аллилу́иа.

И́кос 10.

Стена́ и приста́нище спасе́ния бы́л еси́ бра́тии, о́тче на́ш Кири́лле богоно́сне, па́че же по кончи́не: восхоте́в бо и по отше́ствии твое́м при́сно поуча́ти ча́да твоя́, я́ко живы́й, завеща́л еси́ и́м вся́ потре́бная ко спасе́нию; та́же благослови́в бра́тию и причасти́вся Боже́ственных и Животворя́щих Христо́вых Та́ин, пре́дал еси́ святу́ю твою́ ду́шу в ру́це Бо́жии. Сего́ ра́ди из глубины́ серде́ц вопие́м ти́:

Ра́дуйся, и́скреннюю любо́вь к Бо́гу в души́ и се́рдце твое́м непреста́нно име́вый; ра́дуйся, то́юже любо́вию к духо́вным ча́дом твои́м и бли́жним при отше́ствии твое́м преиспо́лненный.

Ра́дуйся, я́ко и на́с твои́х ча́д оте́чески назира́еши; ра́дуйся, я́ко жи́в сы́й, и на́с уче́ньми твои́ми просвеща́еши.

Ра́дуйся, по внуше́нию Ду́ха Бо́жия гряду́щая, я́ко настоя́щая предсказа́вый; ра́дуйся, ско́ра помо́щника в ско́рбех и ну́ждах на́м себе́ яви́вый.

Ра́дуйся, благоче́стно тече́ние вре́менныя жи́зни твоея́ сконча́вый; ра́дуйся, ве́ру соблюды́й всеце́лу.

Ра́дуйся, досто́йно от Бо́га сла́ву и вели́чие, от на́с же пе́ние прие́мляй; ра́дуйся, твои́х трудо́в и подвиго́в плоды́ вожделе́нныя взе́мляй.

Ра́дуйся, нетле́нными твои́ми моща́ми зде́ почива́яй, ду́хом же на́м сопрису́тствуяй и моли́твенно тя́ призыва́ющыя посеща́яй; ра́дуйся, от моще́й твои́х исцеле́ния неду́гов источа́яй.

Ра́дуйся, преподо́бне о́тче на́ш Кири́лле, вели́кий чудотво́рче.

Конда́к 11.

Пе́ние погреба́льное слеза́ми растворя́шеся у гро́ба твоего́, блаже́нне Кири́лле: ученицы́ твои́ пла́кахуся, я́ко о блаже́ннем отце́ свое́м и учи́тели, и рыда́ния прерыва́ху умиле́нную пе́снь и́х к Бо́гу: Аллилу́иа.

И́кос 11.

Светоза́рное свети́ло в Правосла́вно-Росси́йском ца́рствии и во все́й вселе́нней, благода́тию немерца́ющаго со́лнца Христа́ Иису́са просвеща́ющею возсия́вшее, зри́м тя́, богому́дре о́тче Кири́лле: и по честне́м твое́м успе́нии, све́тиши на́м зна́меньми и чудесы́, истека́ющими от честны́х и святы́х моще́й твои́х. Бо́га бо изволе́нием, тя́ прославля́ющаго, из под спу́да земли́ изъя́ты, достоле́пно я́ве во хра́ме положи́шася, да входя́щии ви́дят исто́чник неисчерпа́емыя благода́ти исцеле́ний. Сего́ ра́ди, благода́рственная принося́ще Бо́гу, вопие́м к тебе́:

Ра́дуйся, нетле́нием моще́й сла́вно от Бо́га возвели́ченный; ра́дуйся, се́ бо нетле́нныя твоя́ мо́щи вручи́ на́м чуде́с Бо́г, я́ко да́р вожделе́нный.

Ра́дуйся, благода́ти исто́чник твою́ свяще́нную ра́ку показу́яй; ра́дуйся, во́ды спаси́тельных целе́б оби́льно от тоя́ пролива́яй.

Ра́дуйся, хромы́м и разсла́бленным, припа́дающым ко гро́бу твоему́, хожде́ние ми́лостивно сотворя́яй; ра́дуйся, слепы́м возвраща́яй моли́твою твое́ю зре́ние.

Ра́дуйся, царю́ Иоа́нну дарова́вый избавле́ние от напра́сныя сме́рти; ра́дуйся, разли́чныя боле́зни уврачева́вый.

Ра́дуйся, одержи́мым от бесо́в подава́яй свобожде́ние; ра́дуйся, в погу́бльших ра́зум возставля́яй разуме́ние.

Ра́дуйся, тряса́вичныя неду́ги отгна́вый; ра́дуйся, проси́вшим у тебе́ с ве́рою непло́дствия у́зы разреши́вый.

Ра́дуйся, преподо́бне о́тче на́ш Кири́лле, вели́кий чудотво́рче.

Конда́к 12.

Благода́ть ве́лия даде́ся ти́ от Бо́га, приснопа́мятне Кири́лле о́тче на́ш, цели́ти стра́сти не́мощей челове́ческих и бе́сы от ни́х прогоня́ти: вси́ бо, с ве́рою приходя́щии, бога́тно насыща́ются благода́ти даро́в, пролива́емых от святы́х моще́й твои́х, прие́млюще во вся́ких ну́ждах поможе́ние и в ско́рбех утеше́ние. Те́мже и мы́, о Бо́жиих тобо́ю на́м оби́льно подава́емых дарова́ниих благода́рни су́ще, Бо́гу, в тебе́ свои́ми благодея́нии прославля́емому благода́рственными усты́ пое́м: Аллилу́иа.

И́кос 12.

Пою́ще твоя́ вели́кия по́двиги, пресла́вная чудеса́, ско́рое на́м во вся́ких ну́ждах и печа́лех поможе́ние, восхваля́ем тя́ любо́вию, преподо́бне о́тче на́ш: и́бо в тебе́ Госпо́дь Сла́вы, Христо́с Бо́г на́ш, ди́вно просла́вися. Те́мже в пе́снех си́це ти́ вопие́м:

Ра́дуйся, Кири́лле преподо́бне и богоно́сне, небе́сный челове́че, земны́й а́нгеле; ра́дуйся, во удале́нии от ми́ра су́етнаго пусты́нную оби́тель основа́вый, и в не́й, на Кра́снем о́строве, святы́я хра́мы устро́ивый.

Ра́дуйся, я́ко во оби́тели твое́й и́нок мно́жество собра́л еси́, и от ни́х слы́шиши си́це реку́щих: ра́дуйся, и́нокующым о спасе́нии хода́таю.

Ра́дуйся, уныва́ющым о́бразе утеше́ния; ра́дуйся, от наве́т вра́жиих изба́вителю.

Ра́дуйся, на́м су́щым в печа́лех и ско́рбных обстоя́ниих ско́рый помо́щниче и ко Христу́ Бо́гу о на́с те́плый моли́твенниче; ра́дуйся, скорбя́щым душе́ю сла́дкое утеше́ние и ра́дости боже́ственныя пода́телю.

Ра́дуйся, на́ш предста́телю и изба́вителю; ра́дуйся, преподо́бне о́тче на́ш Кири́лле, и́ноком удобре́ние.

Ра́дуйся, моля́йся Христу́ Бо́гу, е́же пода́ти Держа́ве на́шей твои́ми моли́твами ми́р и благоде́нствие; ра́дуйся, пра́во пра́вящих сло́во и́стины и все́х правосла́вных ско́рый помо́щниче и засту́пниче.

Ра́дуйся, преподо́бне о́тче на́ш Кири́лле, вели́кий чудотво́рче.

Конда́к 13.

О вели́кий уго́дниче, пресла́вный чудотво́рче Кири́лле преблаже́нне! Приими́ с благосе́рдием сие́ смиренноусе́рдное от на́с приноси́мое тебе́ пе́ние: и, я́ко ми́лостив, изба́ви ны́ хода́тайством твои́м от вся́ких бе́д душе́вных и теле́сных, от все́х томле́ний, и прило́гов диа́вольских, и бу́дущия му́ки, да сподо́бимся с тобо́ю воспева́ти в ра́дости Бо́гу Спаси́телю на́шему вечнохвале́бную пе́снь: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгельское во пло́ти твое́ жи́тельство прови́дев всея́ тва́ри Созда́тель, еще́ во утро́бе ма́терней, во вре́мя боже́ственнаго пе́ния, трикра́тным возглаше́нием, показа́ тя́ ми́ру и́стиннаго уго́дника бы́ти Святы́я Тро́ицы. Те́мже ублажа́ем тя́, вопию́ще:

Ра́дуйся, о́трасле пречестна́я ко́рене благочести́ваго; ра́дуйся, благочести́вых роди́телей до́брый и избра́нный пло́де.

Ра́дуйся, я́ко и́маши во пло́ти а́нгел бы́ти предусмо́тренный; ра́дуйся, от чре́ва ма́терня на сие́ предъизбра́нный.

Ра́дуйся, во утро́бе ма́терни Святе́й Тро́ице троекра́тно трисвяту́ю хвалу́ возгласи́вый; ра́дуйся, от ма́терня чре́ва Святы́я Тро́ицы оби́тель свята́я я́ве бы́вый.

Ра́дуйся, еще́ пре́жде рожде́ния орга́н Свята́го Ду́ха предъявле́нный; ра́дуйся, от утро́бы ма́терни освяще́нный.

Ра́дуйся, трикра́тным твои́м во чре́ве возглаше́нием роди́тели удиви́вый; ра́дуйся, чрез сие́ дела́ Бо́жия пресла́вная яви́вый.

Ра́дуйся, я́ко тобо́ю прогоня́ются ско́рби; ра́дуйся, я́ко тобо́ю от Го́спода подаю́тся на́м ве́лия ми́лости.

Ра́дуйся, преподо́бне о́тче на́ш Кири́лле, вели́кий чудотво́рче.

Конда́к 1.

Избра́нному Царя́ си́л Го́спода Иису́са, духо́вному воево́де и ди́вному чудотво́рцу, богоно́сному отцу́ на́шему Кири́ллу благода́рственная воспису́ем, я́ко храни́телю на́шему и те́плому предста́телю. Ты́ же, я́ко име́яй дерзнове́ние у Престо́ла Христо́ва ве́рою чту́щих тя́ моли́твою твое́ю сохраня́й, да с ра́достию зове́м ти́:

Ра́дуйся, преподо́бне о́тче на́ш Кири́лле, вели́кий чудотво́рче.

Моли́тва.

О богоизбра́нный, вы́шняго гра́да, небе́снаго Иерусали́ма, небе́сный граждани́не, очище́нный Ду́хом Святы́м у́ме, земны́й а́нгеле, небе́сный челове́че, чи́стаго де́вства до́брый ревни́телю, досточу́днаго терпе́ния преизя́щный о́бразе, богохрани́мое Ду́ха Свята́го жили́ще, до́блественный Христо́в во́ине, Кири́лле преподо́бне! Проси́ у Христа́ Бо́га, всеблага́го Творца́ на́шего. Испроси́ же у Го́спода Бо́га ми́р це́рквам святы́м, лю́дем же Росси́йским тишину́ и благоде́нствие и плодо́в земны́х изоби́лие. Да сохрани́т же Госпо́дь Оте́чество на́ше от все́х напа́стей, бе́д и скорбе́й, от нападе́ния вра́жия, от смертоно́сныя я́звы и от вся́каго зла́. На́с же, ста́до твое́, во святе́й се́й оби́тели пребыва́ющее, и все́х с ве́рою и любо́вию ко всечестне́й ра́це многоцеле́бных моще́й твои́х припа́дающих и о́браз подо́бия твоего́ любе́зно целу́ющих, и все́х правосла́вных христиа́н к тебе́ приходя́щих, моли́твами твои́ми соблюди́ и ко Христу́ приведи́, Ему́же, со Отце́м и Святы́м Ду́хом, подоба́ет вся́кая сла́ва, че́сть и поклоне́ние, ны́не и при́сно и во ве́ки веко́в. Ами́нь.

Моли́тва ина́я.

О вели́кий уго́дниче, пресла́вный чудотво́рче, Кири́лле блаже́нне! Душе́ю на небеси́ престо́лу Бо́жию предстоя́й и Тро́ичныя сла́вы наслажда́яйся, те́лом же на земли́ в Боже́ственнем хра́ме се́м почива́яй и от него́ да́нною ти́ свы́ше благода́тию разли́чная источа́яй чудеса́: при́зри ми́лостивым о́ком на предстоя́щия честне́й твое́й ри́зе лю́ди и прося́щия си́льныя твоея́ по́мощи. Ты́ у́бо, я́ко стяжа́вый дерзнове́ние, испроси́ Це́ркви благостоя́ние, возду́ха благорастворе́ние, земли́ плодоно́сие. Изба́ви все́х, ве́рою несумне́нною к Бо́гу приходя́щих и многоцеле́бныя мо́щи твоя́ благогове́йно почита́ющих, от вся́ких бе́д душе́вных и теле́сных, от все́х томле́ний и прило́гов диа́вольских. Я́ко да твои́ми моли́твами наставля́еми, пу́ть на земли́ маловре́меннаго жития́ на́шего безбе́дне соверши́м: улучи́м же на небеси́ неконча́емый поко́й и просла́вим ку́пно с тобо́ю все́х благи́х Да́теля, еди́наго в Тро́ице сла́вимаго Бо́га, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.