Конда́к 1.
Избра́нный от мла́дости на служе́ние Царю́ сла́вы, Го́споду Иису́су, преподо́бне о́тче на́ш Корни́лие, ми́ру яви́вый преди́вное житие́ равноа́нгельное, и чуде́с неисчерпа́емое оби́лие: ублажа́ем и восхваля́ем тя́ с любо́вию, я́ко засту́пника на́шего и предста́теля, ему́же зове́м:
Ра́дуйся, блаже́нне Корни́лие, Кры́пецкий моли́твенниче и чудотво́рче.
И́кос 1.
А́нгелов мно́жество удиви́л еси́ пресла́вным твои́м житие́м, преподо́бне Корни́лие: от ю́ности бо Го́сподеви благоугожда́я, стра́нствуя на земли́, дости́гл еси́ блаже́нства на Небесе́х, иде́же ны́не предстоя́, услы́ши на́с, пою́щих ти́ такова́я:
Ра́дуйся, чистото́ю се́рдца младе́нческаго Христа́ возлюби́вый; ра́дуйся, Тому́ до конца́ жития́ твоего́ послужи́вый.
Ра́дуйся, сотру́дниче и сонасле́дниче возлю́бленнаго ученика́ Христо́ва; ра́дуйся, пустынножи́теля Са́ввы учениче́ предо́брый.
Ра́дуйся, во́ине Христо́в, до́блественно диа́вола победи́вый; ра́дуйся, свя́тость жития́ твоего́ бу́йством мни́мым сокры́вый.
Ра́дуйся, вкуша́яй ны́не блаже́нство нищеты́ духо́вныя; ра́дуйся, боголе́пное украше́ние Це́ркве Правосла́вныя.
Ра́дуйся, земли́ Пско́вския богодарова́нный предста́телю; ра́дуйся, оби́тели Кры́пецкия неусы́пный храни́телю.
Ра́дуйся, я́ко ди́вныя цельбы́ от гро́ба твоего́ источа́еши; ра́дуйся, я́ко о все́х чту́щих тя́ усе́рдно пече́шися.
Ра́дуйся, блаже́нне Корни́лие, Кры́пецкий моли́твенниче и чудотво́рче.
Конда́к 2.
Ви́дя суету́ ми́ра сего́, от ю́ности, блаже́нне, мона́шескую жи́знь возлюби́л еси́, и отроча́ сы́й, моли́тве и слу́жбе Бо́жией зело́ прилежа́л еси́, воспева́я ди́вному во святы́х Свои́х Бо́гови: Аллилу́иа.
И́кос 2.
Ра́зум боже́ственный свы́ше прие́м, еще́ триле́тен сы́й, о е́же бы́ти тебе́ и́стинному служи́телю Святы́я Тро́ицы, потща́лся еси́, блаже́нне, вся́ земна́я оста́вити. Те́мже вопие́м ти́:
Ра́дуйся, вся́ кра́сная ми́ра сего́ ни во что́же вмени́вый; ра́дуйся, Бо́га и бли́жняго па́че себе́ возлюби́вый.
Ра́дуйся, пропове́дниче молчали́вый Ева́нгельскаго благове́стия; ра́дуйся, свеще́, возжже́нная Бо́гом, отгоня́ющая мра́к нече́стия.
Ра́дуйся, сосу́де, испо́лненный Ду́ха Свята́го; ра́дуйся, звездо́, показу́ющая пу́ть ко спасе́нию.
Ра́дуйся, в терпе́нии ду́шу свою́ стяжа́вый; ра́дуйся, в челове́цех пречу́дное удивле́ние.
Ра́дуйся, в мо́ри сле́з твои́х мно́жество де́монов потопи́вый; ра́дуйся, моли́твою и посто́м полки́ бесо́вския устраши́вый.
Ра́дуйся, го́рькия печа́ли отгони́телю; ра́дуйся, скорбя́щих ско́рый услы́шателю.
Ра́дуйся, блаже́нне Корни́лие, Кры́пецкий моли́твенниче и чудотво́рче.
Конда́к 3.
Си́ла Вы́шняго ста́до твое́, преблаже́нне, невреди́мо на па́жити сохраня́ше, егда́ ты́ в хра́ме Бо́жием воспева́л еси́ Па́стырю До́брому: Аллилу́иа.
И́кос 3.
Име́я от ю́ности неусы́пное попече́ние о стяжа́нии в се́рдцы свое́м Ду́ха Свята́го, прите́кл еси́, о́тче Корни́лие, во оби́тель преподо́бнаго Са́ввы, и та́мо прие́м о́браз и́ноческий, усе́рдно подвиза́лся еси́. Мы́ же, дивя́щеся пла́менней любви́ твое́й ко Го́споду, со стра́хом и любо́вию вопие́м:
Ра́дуйся, вы́шния красоты́ и сла́дости па́че земны́х возжела́вый; ра́дуйся, все́м се́рдцем твои́м еди́наго Бо́га возлюби́вый.
Ра́дуйся, да́нный тебе́ тала́нт преумно́живый; ра́дуйся, до́брый де́лателю са́да Бо́жия.
Ра́дуйся, вся́ кра́сная ми́ра до́льняго презре́вый; ра́дуйся, вене́ц нетле́нный восприе́мый.
Ра́дуйся, смире́ния и кро́тости учи́телю; ра́дуйся, незло́бия и терпе́ния наста́вниче.
Ра́дуйся, предста́телю о на́с пред Бо́гом при́сный; ра́дуйся, бесо́вския си́лы прогони́телю хра́брый.
Ра́дуйся, боля́щих здра́вие и врачева́ние; ра́дуйся, бе́дствующих защи́тителю и помо́щниче.
Ра́дуйся, блаже́нне Корни́лие, Кры́пецкий моли́твенниче и чудотво́рче.
Конда́к 4.
Бу́рю волну́ющагося мо́ря жите́йскаго ше́ствовал еси́, преподо́бне, до́ндеже безбе́дно благода́тию Бо́жиею дости́гл еси́ вечноблаже́ннаго приста́нища спасе́ния, иде́же со А́нгелы и все́ми святы́ми пое́ши Бо́гу: Аллилу́иа.
И́кос 4.
Слы́шаша и ви́деша и́ноцы оби́тели свята́го Са́ввы, я́ко и́маши, преподо́бне, оби́лие благода́ти Бо́жия, егда́ ста́до безслове́сных, тобо́ю пасо́мое, про́йде стезе́ю ма́лою сквозе́ се́яния, ника́коже вреди́в и́х. Сему́ дивя́щеся, вопие́м ти́ такова́я:
Ра́дуйся, ревни́телю жития́ богоуго́днаго; ра́дуйся, яви́вый житие́ равноа́нгельное.
Ра́дуйся, всего́ себе́ в Госпо́дню во́лю преда́вый; ра́дуйся, у́зы Христо́вы на ся́ возложи́вый.
Ра́дуйся, терпе́нием скорбе́й на Небесе́х блага́я улучи́вый; ра́дуйся, бога́тство преве́чное нището́ю во́льною стяжа́вый.
Ра́дуйся, в беда́х и ско́рбех ди́вный помо́щниче; ра́дуйся, о все́х на́с к Бо́гу ве́рный хода́таю.
Ра́дуйся, отра́до и увеселе́ние к тебе́ прибега́ющим; ра́дуйся, моля́щимся у моще́й твои́х пресла́дкое утеше́ние.
Ра́дуйся, Бо́жию сла́ву умно́живый труды́ твои́ми; ра́дуйся, пу́стыни Кры́пецкия предо́брое украше́ние.
Ра́дуйся, блаже́нне Корни́лие, Кры́пецкий моли́твенниче и чудотво́рче.
Конда́к 5.
Богото́чная Кро́вь Влады́чня всегда́ напая́ше ду́шу твою́, преподо́бне, изыма́ющи ю́ от рабо́ты вра́жия; ты́ же, распала́яся любо́вию ко Го́споду, непреста́нно пе́л еси́ Тому́: Аллилу́иа.
И́кос 5.
Ви́де юро́дивый Васи́лий тя́, блаже́нне, негра́мотна су́ща, и те́м укори́ тя. Ты́ же, о́тче Корни́лие, отвеща́л еси́ дерзнове́нно: «Е́же пти́цы глаго́лют, и то́ а́з ве́даю». Сего́ ра́ди прославля́юще Бо́га, дарова́вшаго тебе́ неземну́ю му́дрость, та́ко воспева́ем:
Ра́дуйся, не гра́мматою челове́ческою, но прему́дростию Бо́жиею наста́вленный; ра́дуйся, подви́жниче прозорли́вый и богопросла́вленный.
Ра́дуйся, в кро́тости и смире́нии Христу́ Бо́гу подража́вый; ра́дуйся, терпе́нием поноше́ний И́ову себе́ уподо́бивый.
Ра́дуйся, скорбя́щих о непра́вде ско́рое услы́шание; ра́дуйся, печа́льми обурева́емым ти́хое приста́нище.
Ра́дуйся, моли́твою твое́ю от ну́жды избавля́яй; ра́дуйся, от тя́жкаго сна́ грехо́внаго пробужда́яй.
Ра́дуйся, любве́ Христо́вы и́стинный храни́телю; ра́дуйся, вся́ким о́бразом Влады́це твоему́ угоди́вый.
Ра́дуйся, правосла́вныя ве́ры лучеза́рный свети́льниче; ра́дуйся, Святы́я Це́ркве похвало́ и ра́дование.
Ра́дуйся, блаже́нне Корни́лие, Кры́пецкий моли́твенниче и чудотво́рче.
Конда́к 6.
Пропове́дник ди́вный и́стиннаго богове́дения и благоче́стия яви́лся еси́, блаже́нне, не то́кмо во оби́тели Кры́пецкой, но и во все́й земли́ Пско́вской; те́мже у́бо наста́ви и на́с на пу́ть спаси́тельный, да и мы́ вопие́м ко Го́споду: Аллилу́иа.
И́кос 6.
Возсия́вша благода́тна свети́льника яви́ тя Госпо́дь, егда́ твои́ми моли́твами, о́тче Корни́лие, спасе́на бы́сть от ги́бели пу́стынь Кры́пецкая; сего́ ра́ди тебе́, о на́с хода́таю те́плому, благода́рственно вопие́м такова́я:
Ра́дуйся, я́ко моли́твою оби́тель Кры́пецкую при́сно огражда́еши; ра́дуйся, я́ко и ны́не гне́в Бо́жий на ми́лость прелага́еши.
Ра́дуйся, земли́ Пско́вския прозябе́ние пречестно́е; ра́дуйся, кла́дязю, от него́же напая́ем ду́ши на́ша.
Ра́дуйся, дре́вним подви́жником благоче́стия подража́вый; ра́дуйся, похвало́ мона́хов благогове́йных.
Ра́дуйся, зерца́ло соверше́ннаго терпе́ния; ра́дуйся, о́бразе и́стиннаго смире́ния.
Ра́дуйся, та́йная и бу́дущая прови́девый; ра́дуйся, немощны́м и стра́ждущим целе́бниче.
Ра́дуйся, и́щущим предста́тельства неусы́пный засту́пниче; ра́дуйся, на земли́ и на Небеси́ Бо́гом просла́вленный.
Ра́дуйся, блаже́нне Корни́лие, Кры́пецкий моли́твенниче и чудотво́рче.
Конда́к 7.
Хотя́щу тебе́ благоугоди́ти Творцу́ своему́, не седмы́й то́кмо, но вся́кий де́нь жития́ твоего́ освяща́л еси́, начертава́я в се́рдцы и́мя Го́спода Бо́га твоего́, устны́ же непреста́нно воспева́я Ему́: Аллилу́иа.
И́кос 7.
Но́вый вои́стину Дании́л яви́лся еси́, преподо́бне Корни́лие, прови́дев гряду́щия судьбы́ держа́вы Росси́йския: си́м и на́с к покая́нию возста́ви. Мы́ же, тайнозре́нию твоему́ дивя́щеся, со умиле́нием тебе́ прино́сим сицева́я:
Ра́дуйся, прови́дче дерзнове́нный и преди́вный; ра́дуйся, ве́дый да́льняя, я́ко бли́з су́щая.
Ра́дуйся, бу́дущая я́ко настоя́щая прорица́яй; ра́дуйся, прегреше́ния сокрове́нная прозорли́во облича́яй.
Ра́дуйся, покая́нием от бе́д избавля́тися науча́яй; ра́дуйся, наде́ждою на ми́лость Бо́жию окриля́яй.
Ра́дуйся, уны́ния от ду́ш на́ших прогони́телю; ра́дуйся, я́ко тобо́ю милосе́рдия Бо́жия бе́здну призыва́ем.
Ра́дуйся, веле́ний Госпо́дних усе́рдный послу́шниче; ра́дуйся, о спасе́нии люде́й земли́ Ру́сския богоуго́дный моли́твенниче.
Ра́дуйся, хра́ме живы́й Пресвята́го Ду́ха; ра́дуйся, еди́наго И́стиннаго Бо́га ве́рный покло́нниче.
Ра́дуйся, блаже́нне Корни́лие, Кры́пецкий моли́твенниче и чудотво́рче.
Конда́к 8.
Стра́нное и неизрече́нное смире́ние к на́м низше́дшаго Бо́га Сло́ва подража́я, блаже́нне, са́м испо́лнился еси́ вели́каго смире́ния и незло́бия. Испроси́ у́бо сию́ боголюбе́зную доброде́тель и на́м, одержи́мым горды́нею, да и мы́ в смире́нии и кро́тости воспое́м Бо́гу: Аллилу́иа.
И́кос 8.
Все́м притека́ющим к свяще́нней ра́це моще́й твои́х вои́стину еси́ хода́тай и моли́твенник ко Го́споду, преподо́бне Корни́лие, те́мже оби́лие чуде́с твои́х все́х подвиза́ет вопи́ти в похвалу́ тебе́ сицева́я:
Ра́дуйся, свеще́ неугаси́мая, моли́твою пламене́ющая; ра́дуйся, свети́льниче, тьму́ грехо́вную озаря́яй.
Ра́дуйся, зла́то, седмери́цею от скве́рны очище́нное; ра́дуйся, исто́чниче, нечистоту́ ду́ш на́ших омыва́яй.
Ра́дуйся, розго́ добропло́дная лозы́ Христо́вы; ра́дуйся, горо́, доброде́тельми Небе́с досяза́ющая.
Ра́дуйся, я́ко тобо́ю ве́рнии страсте́й безче́стных избавля́ются; ра́дуйся, я́ко тобо́ю к покая́нию гре́шнии подвиза́ются.
Ра́дуйся, боля́щих, врача́ми оста́вленных, исцели́телю; ра́дуйся, житию́ благонра́вному научи́телю.
Ра́дуйся, лю́бящим и чту́щим тя́ хода́таю спасе́ния; ра́дуйся, прича́стниче сла́вы гряду́щаго Воскресе́ния.
Ра́дуйся, блаже́нне Корни́лие, Кры́пецкий моли́твенниче и чудотво́рче.
Конда́к 9.
Вся́кий по́мысл к Бо́гу возводя́, блаже́нне, обогати́лся еси́ мно́гими дарова́ньми духо́вными. Потщи́ся у́бо испроси́ти и на́м, о́тче Корни́лие, во благовре́мении вся́, я́же к ве́чней жи́зни потре́бная, да с тобо́ю ку́пно в селе́нии пра́ведных воспое́м Бо́гу: Аллилу́иа.
И́кос 9.
Вети́я суему́дренныя ми́ра сего́ ви́дим тобо́ю посра́мленныя, преподо́бне, егда́ Са́м Бо́г просла́ви тя́ в Це́ркви земно́й и Небе́сней, излия́в на тя́ оби́лие благода́ти Своея́. Те́мже мо́лим тя́: не отри́ни зову́щих ти́ любо́вию такова́я:
Ра́дуйся, о любви́, Христо́м запове́данней, ревни́телю бла́гостный; ра́дуйся, ра́ди бла́г Небе́сных презре́вый вся́ земны́я сла́дости.
Ра́дуйся, о почита́ющих па́мять твою́ вы́ну моля́йся; ра́дуйся, мона́шествующих в по́двизех укрепля́яй.
Ра́дуйся, обличи́телю вся́каго нече́стия; ра́дуйся, до́брый се́ятелю благоче́стия.
Ра́дуйся, на пра́выя стези́ все́х наставля́яй; ра́дуйся, пу́ть ве́ры и наде́жды на́м указу́яй.
Ра́дуйся, Ду́ха Боже́ственнаго селе́ние; ра́дуйся, испо́лненный кро́тости и смире́ния.
Ра́дуйся, ве́лие к Бо́гу имы́й дерзнове́ние; ра́дуйся, все́х христиа́н удобре́ние.
Ра́дуйся, блаже́нне Корни́лие, Кры́пецкий моли́твенниче и чудотво́рче.
Конда́к 10.
Спасти́ хотя́ ду́шу свою́, преподо́бне, подъя́л еси́ многотру́дныя по́двиги мона́шества и юро́дства, смири́в себе́ да́же до сме́рти; сего́ ра́ди Са́м Госпо́дь превознесе́ и́мя твое́, па́че мно́гих све́рстник твои́х. Мы́ же, сла́вяще ди́внаго во святы́х Свои́х Бо́га, вопие́м Ему́: Аллилу́иа.
И́кос 10.
Стена́ еси́ все́м прибега́ющим к твоему́ предста́тельству, блаже́нне Корни́лие, те́мже и на́с, в доброде́лании убо́гих, огради́ от де́монскаго ополче́ния, свобожда́я от скорбе́й, боле́зней и ну́жд многоразли́чных, да с ве́рою тебе́ моля́щеся, взыва́ем си́це:
Ра́дуйся, я́ко ве́ру непоро́чну соблю́л еси́; ра́дуйся, я́ко су́етная и тле́нная попра́л еси́.
Ра́дуйся, се́рдце от за́висти и зло́бы очи́стивый; ра́дуйся, ру́це лихоима́нием и хище́нием не оскверни́вый.
Ра́дуйся, во е́же не суди́ти бра́та, язы́к сво́й обузда́вый; ра́дуйся, от страсте́й поги́бельных на́с избавля́яй.
Ра́дуйся, диа́вола мучи́теля посрамле́ние; ра́дуйся, вражду́ющих благо́е примире́ние.
Ра́дуйся, звездо́ пресве́тлая, во Пско́вской земли́ просия́вшая; ра́дуйся, уго́дниче Бо́жий и́стинный.
Ра́дуйся, в напа́стех и во бра́ни помога́яй; ра́дуйся, сокро́вище нетле́нное моли́твами твои́ми подава́яй.
Ра́дуйся, блаже́нне Корни́лие, Кры́пецкий моли́твенниче и чудотво́рче.
Конда́к 11.
Пе́нием вся́ким прославля́л еси́ Бо́га Преве́чнаго, всеблаже́нне, живы́й на земли́, от нея́же в де́нь предуве́денный пресе́лься в ве́чную оби́тель Небе́сную, та́мо непреста́нно во дни́ невече́рнем славосло́виши Святу́ю Тро́ицу, взыва́я: Аллилу́иа.
И́кос 11.
Многосве́тлыми луча́ми, о́тче Корни́лие, сия́ху мо́щи твоя́ чудесы́ мно́гими из-под спу́да, иде́же де́вятьдесят и четы́ре ле́та пребыва́ху. Егда́ же благоволи́ Госпо́дь, испо́лнися проро́чествие твое́ о ра́дости сугу́бей: утише́нии бе́дствий на Руси́ и обре́тении моще́й твои́х. Те́мже дерза́ем пе́ти тебе́ си́це:
Ра́дуйся, гряду́щаго в житии́ земне́м предсказа́телю нело́жный; ра́дуйся, Бо́жиих суде́б тайнозри́телю преди́вный.
Ра́дуйся, я́ко с ве́рою тече́ние до́бре сконча́л еси́; ра́дуйся, я́ко испо́лнися тобо́ю прорече́нное в земли́ Ру́сской.
Ра́дуйся, а́ки учени́к возлю́бленный, Христа́ возлюби́вый; ра́дуйся, ко гряду́щему Гра́ду Небе́сному ве́рный путеводи́телю.
Ра́дуйся, дру́га Бо́жия преподо́бнаго Са́ввы при́сный дру́же; ра́дуйся, досто́йный по благода́ти его́ прее́мниче.
Ра́дуйся, мно́жеством чуде́с от Го́спода просла́вленный; ра́дуйся, помо́щниче все́м тре́бующим твоея́ по́мощи.
Ра́дуйся, заре́, времена́ безбе́дная предуказу́ющая; ра́дуйся, безнаде́жных утеше́ние и наде́яние.
Ра́дуйся, блаже́нне Корни́лие, Кры́пецкий моли́твенниче и чудотво́рче.
Конда́к 12.
Благода́ть, да́нную ти́ от Бо́га, зри́м, блаже́нне, я́ко еще́ сы́й на земли́, помога́л еси́ все́м к тебе́ притека́ющим; те́мже и на́с не оста́ви в ну́ждах, ско́рбех и боле́знех, и вся́ на́ша я́же ко спасе́нию проше́ния услы́ши, да благода́рно вопие́м Бо́гу: Аллилу́иа.
И́кос 12.
Пою́ще чу́дная дела́ Бо́жия, на земли́ Ру́сской твои́м неусы́пным предста́тельством явле́нная, взыва́ем ти́, преподо́бне о́тче на́ш Корни́лие: бу́ди всегда́ о вся́ком де́ле бла́зе ско́рый хода́тай, на́м зову́щим ти́ с любо́вию такова́я:
Ра́дуйся, не в гада́нии, но лице́м к лицу́ созерца́яй Бо́га; ра́дуйся, све́тлая луче́, направля́ющая к Ца́рствию Бо́жию.
Ра́дуйся, прелюби́мый и́ноков наста́вниче; ра́дуйся, в жи́знь ве́чную все́м ка́ющимся путеводи́телю.
Ра́дуйся, я́ко душевре́дное уны́ние ско́ро истребля́еши; ра́дуйся, я́ко ми́р Христо́в в сердца́х водворя́еши.
Ра́дуйся, неусы́пный засту́пниче лю́дем пско́вским; ра́дуйся, похвало́ и утвержде́ние преде́л се́верных.
Ра́дуйся, я́ко твои́ми моли́твами ми́лость Госпо́дня явля́ется; ра́дуйся, о спасе́нии держа́вы Росси́йския дерзнове́нный проси́телю.
Ра́дуйся, о ве́рных ча́дех ма́тере Це́ркве попечи́телю; ра́дуйся, о все́х призыва́ющих тя́ в моли́твах те́плый хода́таю.
Ра́дуйся, блаже́нне Корни́лие, Кры́пецкий моли́твенниче и чудотво́рче.
Конда́к 13.
О всехва́льный, преблаже́нный уго́дниче Бо́жий и преди́вный чудотво́рче, преподо́бне о́тче на́ш Корни́лие, приими́ от на́с ны́не по си́ле приноси́мое тебе́ моле́ние, и богоприя́тным твои́м предста́тельством изба́ви на́с от вся́каго зла́, утверди́ в правосла́вней ве́ре и ве́чныя изми́ му́ки, да сподо́бимся вку́пе с тобо́ю в ра́дости блаже́нней воспева́ти Бо́гу: Аллилу́иа.
И́кос 1.
А́нгелов мно́жество удиви́л еси́ пресла́вным твои́м житие́м, преподо́бне Корни́лие: от ю́ности бо Го́сподеви благоугожда́я, стра́нствуя на земли́, дости́гл еси́ блаже́нства на Небесе́х, иде́же ны́не предстоя́, услы́ши на́с, пою́щих ти́ такова́я:
Ра́дуйся, чистото́ю се́рдца младе́нческаго Христа́ возлюби́вый; ра́дуйся, Тому́ до конца́ жития́ твоего́ послужи́вый.
Ра́дуйся, сотру́дниче и сонасле́дниче возлю́бленнаго ученика́ Христо́ва; ра́дуйся, пустынножи́теля Са́ввы учениче́ предо́брый.
Ра́дуйся, во́ине Христо́в, до́блественно диа́вола победи́вый; ра́дуйся, свя́тость жития́ твоего́ бу́йством мни́мым сокры́вый.
Ра́дуйся, вкуша́яй ны́не блаже́нство нищеты́ духо́вныя; ра́дуйся, боголе́пное украше́ние Це́ркве Правосла́вныя.
Ра́дуйся, земли́ Пско́вския богодарова́нный предста́телю; ра́дуйся, оби́тели Кры́пецкия неусы́пный храни́телю.
Ра́дуйся, я́ко ди́вныя цельбы́ от гро́ба твоего́ источа́еши; ра́дуйся, я́ко о все́х чту́щих тя́ усе́рдно пече́шися.
Ра́дуйся, блаже́нне Корни́лие, Кры́пецкий моли́твенниче и чудотво́рче.
Конда́к 1.
Избра́нный от мла́дости на служе́ние Царю́ сла́вы, Го́споду Иису́су, преподо́бне о́тче на́ш Корни́лие, ми́ру яви́вый преди́вное житие́ равноа́нгельное, и чуде́с неисчерпа́емое оби́лие: ублажа́ем и восхваля́ем тя́ с любо́вию, я́ко засту́пника на́шего и предста́теля, ему́же зове́м:
Ра́дуйся, блаже́нне Корни́лие, Кры́пецкий моли́твенниче и чудотво́рче.
Моли́тва.
О святы́й, преблаже́нный и богопросла́вленный уго́дниче и чудотво́рче, преподо́бне о́тче на́ш Корни́лие, ско́рый помо́щниче и усе́рдный засту́пниче все́х, с ве́рою и любо́вию к тебе́ прибега́ющих! Ты́ от ю́ности твоея́ ми́р су́етный возненави́дел еси́, избра́в ко спасе́нию и к Ца́рствию Небе́сному пу́ть до́блественный мона́шества и Христа́ ра́ди юро́дства; прише́д же во оби́тель [сию́] свята́го Са́ввы, и в не́й трудолю́бно и богоуго́дне подвиза́вся, го́рняго Сио́на дости́гл еси́. Ублажа́юще у́бо тя́, пра́ведный челове́че Бо́жий, про́сим и мо́лим: испроси́ на́м у Созда́теля на́шего вели́кия и бога́тыя да́ры бла́гости Его́: земли́ благопло́дие, возду́ха благорастворе́ние, дожди́ благовре́менны; ми́р во дне́х на́ших, и благоче́стия умноже́ние; боля́щим здра́вие, скорбя́щим утеше́ние, уныва́ющим ободре́ние, си́рым по́мощь, убо́гим снабде́ние, подвиза́ющимся преспе́яние, умира́ющим благу́ю христиа́нскую кончи́ну, и все́м правове́рующим ве́чное спасе́ние; держа́ву же на́шу и гра́д се́й [или́: ве́сь сию́, или́: святу́ю оби́тель сию́] соблюди́ в ми́ре и благоустрое́нии. Е́й, уго́дниче Бо́жий, не посрами́ упова́ния на́шего, но яви́ на́м свято́е твое́ заступле́ние, да велича́ем тя́ немо́лчно, я́ко вели́каго предста́теля на́шего, и прославля́ем неизрече́нное человеколю́бие ди́внаго во святы́х Свои́х Триеди́наго Бо́га, Отца́, и Сы́на, и Свята́го Ду́ха, во ве́ки веко́в. Ами́нь.