Конда́к 1.

Избра́нный чудотво́рче и преди́вный уго́дниче Христо́в, ско́рый помо́щниче и моли́твенниче на́ш, пра́ведне о́тче Космо́! Велича́юще просла́вльшаго тя́ Го́спода, похва́льная воспису́ем ти́, к ра́це моще́й твои́х притека́юще. Ты́ же, я́ко име́яй дерзнове́ние ко Го́споду, от вся́ких на́с бе́д свободи́, зову́щих:

Ра́дуйся, преподо́бне о́тче на́ш Космо́, те́плый о на́с к Бо́гу моли́твенниче.

И́кос 1.

А́нгельскому поревнова́в житию́ и вели́ким во отце́х подо́бяся, всего́ себе́ отреши́л еси́ мирска́го сплете́ния, к подвиго́м же по́стничества му́жески вооружи́вся, опа́сно путе́м Бо́жиих за́поведей ше́ствовал еси́, блаже́нне. Те́мже и мы́, ве́рно чту́щии твою́ свяще́нную па́мять, похвала́ми ублажа́ем тя́ си́ми:

Ра́дуйся, а́нгельскаго жития́ подража́телю; ра́дуйся, дре́вних вели́ких оте́ц житию́ прие́мниче.

Ра́дуйся, за́поведей Бо́жиих храни́телю усе́рдный; ра́дуйся, неви́димых враго́в му́жественный победи́телю:

Ра́дуйся, оте́ческих Богодухнове́нных преда́ний отва́жный ревни́телю; ра́дуйся, мона́шескаго по́стническаго жи́тельства законоположи́телю.

Ра́дуйся, преподо́бне о́тче на́ш Космо́, те́плый о на́с к Бо́гу моли́твенниче.

Конда́к 2.

Ви́дя Богопромысли́тель Госпо́дь души́ твое́й добро́ту, напра́ви по́мысл тво́й ко иска́нию еди́наго на потре́бу. Ты́ же, сего́ возжела́в, навы́кл еси́ непреста́нно взыва́ти к Бо́гу: Аллилу́иа.

И́кос 2.

Разуме́я, я́ко Сама́ Влады́чица Небе́сная, яви́в чрез тебе́, святы́й Космо́, в леса́х я́хромских чудотво́рный о́браз сво́й, призвала́ е́сть тя́ к служе́нию Е́й и Спаси́телю на́шему, ты́, прехва́льне о́тче, оста́вил еси́ боля́рина твоего́ и вся́ кра́сная ми́ра, дабы́ то́кмо Го́сподеви и Всенепоро́чней Ма́тери Его́ служи́ти. Си́це про́сим тя́: моли́ся, да сотвори́т все́х на́с Всенепоро́чная Де́ва бы́ти ве́рными ученика́ми Сы́на Своего́. Ны́не же, во сла́ве неизрече́нной Цари́цу Небе́сную созерца́я, не забу́ди и на́с, взыва́ющих ти́ си́це:

Ра́дуйся, Пресвяте́й Богоро́дице ве́рно послужи́вый; ра́дуйся, во дни́ и но́щи моли́твы к Не́й сле́зно возноси́вый.

Ра́дуйся, мы́сль бла́гу в се́рдце от Нея́ влага́ему свя́то сохраня́вый; ра́дуйся, ико́ны Ея́ благогове́йно почита́ти на́с науча́ющий.

Ра́дуйся, милосе́рдие и благослове́ние Ея́ к на́м приклоня́ющий; ра́дуйся, ку́пно с Не́ю о спасе́нии на́шем Христа́ умоля́ющий.

Ра́дуйся, преподо́бне о́тче на́ш Космо́, те́плый о на́с к Бо́гу моли́твенниче.

Конда́к 3.

Си́лою и благода́тию Бо́жиею просвеща́емь и укрепля́емь бе́, всехва́льный о́тче на́ш Космо́, во дни́ земна́го жития́ твоего́, от си́лы в си́лу восходи́л еси́, да просла́вится в тебе́ Христо́с, Его́ же ра́ди подвиза́лся еси́, Его́ же возлюби́л еси́, Его́ же Еди́наго вожделе́ душа́ твоя́, и, во́лю Боже́ственнаго Спаси́теля на́шего исполня́я, за вся́ благодари́л еси́ Вседержи́теля. Мы́ же ны́не про́сим тя́: наста́ви и на́с на моли́тву благодаре́ния и славосло́вия, да ку́пно с тобо́ю воспое́м Го́споду Всеблаго́му, ми́лующему и спаса́ющему на́с: Аллилу́иа.

И́кос 3.

Иму́ще в се́рдце твое́м, святы́й о́тче, любы́ ко Го́споду, и во́ле Спаси́теля сле́дуя, пресели́лся еси́ во сла́вный Ки́ев-гра́д, иде́же нача́ло ве́лиих по́двиг твои́х духо́вных положи́л еси́, мы́ же сие́ ны́не у́бо помина́юще про́сим тя́: жа́ждущая на́ша сердца́, росо́ю ороси́ духо́вною, да Вертогра́дарю небе́сному принесе́м плоды́ доброде́тельныя, тебе́ же наста́внику небе́сному на́шему си́це воспева́я:

Ра́дуйся, му́дрый стра́нниче, иска́вый оте́чества го́рняго; ра́дуйся, Бо́жий избра́нниче, от ю́га на се́вер пресели́выйся во спасе́ние.

Ра́дуйся, благо́ю стезе́ю ше́ствовавый подви́жничества соверше́ннаго; ра́дуйся, неосла́бно труди́выйся во бде́ниих, пе́ниих и поще́ниих.

Ра́дуйся, доброде́телей чисте́йшее зерца́ло; ра́дуйся, Ду́ха Свята́го сладкогла́сный орга́не.

Ра́дуйся, преподо́бне о́тче на́ш Космо́, те́плый о на́с к Бо́гу моли́твенниче.

Конда́к 4.

Бу́рю волну́ющагося жите́йскаго мо́ря благода́тию Бо́жиею безбе́дно преплы́вше, о́тче преподо́бне, благоразу́мне разсуди́в и вмени́вше я́ко уме́ты вся́ бы́ти, кра́ткость сея́ жи́зни и приобре́тения ра́ди Христа́, дости́гл еси́ вечноблаже́ннаго приста́нища спасе́ния, иде́же со А́нгелы и все́ми святы́ми пое́ши Бо́гови: Аллилу́иа.

И́кос 4.

Слы́шавше поуче́ние наста́вник духоно́сных и Отце́в дре́вних святы́я Ки́евския Ла́вры житию́ подража́я, богоно́сне о́тче на́ш Космо́ приснопа́мятне, непреста́нно моли́твою и ума́ тре́звостию Бо́гу взыва́л еси́, преподо́бне, и То́й услы́ша тя́ вои́стинну. Те́м и я́ко безпло́тен на земли́ пожи́в, воздержа́нием стра́сти умертви́л еси́ и доброде́тели богоуго́дныя стяжа́л еси́; си́це и мы́ велича́ем тя́:

Ра́дуйся, сокро́вище Боже́ственных разуме́ний; ра́дуйся, научи́выйся исполне́нию Боже́ственных хоте́ний.

Ра́дуйся, реко́, наводне́нная водо́ю Бо́жия благода́ти; ра́дуйся, тихообра́зно во смире́нии и кро́тости твою́ жи́знь соверши́вый.

Ра́дуйся, христоподража́тельныя кро́тости о́браз все́м бы́вый; ра́дуйся, из под спу́да пусты́ннаго я́сно све́тиши заря́ми чуде́с.

Ра́дуйся, преподо́бне о́тче на́ш Космо́, те́плый о на́с к Бо́гу моли́твенниче.

Конда́к 5.

Богоявле́нней звезде́, пу́ть ве́рным ко Отцу́ Небе́сному указу́ющий, вои́стину подо́бен яви́лся еси́, верну́вшись в родны́я края́ твои́, благослове́нный Космо́, я́ко ты́ ученико́м, друзья́м и врага́м, а пре́жде всего́, бли́жним твои́м явля́л еси́ о́браз доброде́тельной жи́зни, озаря́л еси́ все́х о́крест тебя́ су́щих све́том и́стины Христо́вой и ны́не, на́с, воспомина́ющих по́двизи твоя́ подвига́еши ра́достно воспева́ти Сладча́йшему Иису́су, вы́ну тя́ свое́ю благода́тию укрепля́вшему, а́нгельское пе́ние: Аллилу́иа.

И́кос 5.

Ви́девше, я́ко ты́ Космо́ блаже́нне, бы́л еси́ па́стырь и наста́вник после́дующым равноа́нгельному житию́ твоему́, возра́довася зело́ вели́кий кня́зь моско́вский Иоа́нн и попече́ние свое́ ти́ и оби́тели твоея́ сотвори́, ты́ бо собо́р ча́д твои́х духо́вных к сорабо́тничеству тебе́ привле́кл еси́, о́браз любве́ Боже́ственней яви́л еси́, преподо́бне о́тче. Си́це мо́лим тя́: приклони́ и к на́м милосе́рдие Бо́жие и приими́ благогове́йно приноси́мыя ти́ велича́ния сия́:

Ра́дуйся, покая́ния глубо́каго, и́же е́сть се́рдце духо́вныя жи́зни, сниска́вый; ра́дуйся, любо́вию к Бо́гу и челове́ком пламене́вый.

Ра́дуйся, я́ко тебе́ призыва́ющия бы́стро предваря́еши; ра́дуйся, я́ко лю́бящих тя́ от разли́чных бе́д и напа́стей изыма́еши.

Ра́дуйся, здра́вия теле́снаго пода́телю; ра́дуйся, душе́внаго спасе́ния хода́таю.

Ра́дуйся, преподо́бне о́тче на́ш Космо́, те́плый о на́с к Бо́гу моли́твенниче.

Конда́к 6.

Пропове́дник любве́ милосе́рдныя и ревни́тель жития́ преподо́бническаго, благослове́нный Космо́, вои́стину яви́лся еси́, устро́ив оби́тель в преде́лех Я́хромских, и просла́вил еси́ ея́ мно́гими чудесы́ и исцеле́нии, та́кожде и ны́не возведи́ в сердца́х ве́рных оби́тели Ду́ха Всесвята́го, да с тобо́ю просвеща́ющему и на́с преобража́ющему Уте́шителю Всеблаго́му воспои́м: Аллилу́иа.

И́кос 6.

Возсия́л еси́ а́ки ве́ры свети́льник, о́тче Космо́, оби́тели твое́й та́кожде и окре́стным лю́дем, я́ко мно́гих ве́рою христиа́нскою озари́л еси́, неви́димый хра́м Ду́ха Бо́жия в себе́ нося́, чу́дныя хра́мы основа́л еси́, та́кожде и стра́ждущим послужи́л еси́, да вси́ обря́щут врачева́ние неду́г свои́х душе́вных и теле́сных. Сего́ ра́ди просла́влен еси́ от Подвигополо́жника Христа́, от на́с же прие́млеши сия́ похва́льныя пе́сни:

Ра́дуйся, пло́д пра́вды, соверше́нство доброде́телей в себе́ возрасти́вый; ра́дуйся, ми́лостью наставле́ниями о спасе́нии ду́ш горе́вый.

Ра́дуйся, ди́внии глаго́лы благода́ти Бо́жия в душе́ свое́й слага́вый; ра́дуйся, жела́нное упокое́ние в Кресте́ Христо́вом обреты́й.

Ра́дуйся, в ве́рности и сто́йкости на́с все́х утвержда́яй; ра́дуйся, не удаля́тися от исто́чника животво́рныя благода́ти наставля́й.

Ра́дуйся, преподо́бне о́тче на́ш Космо́, те́плый о на́с к Бо́гу моли́твенниче.

Конда́к 7.

Хотя́ще вы́ну Госпо́дни за́поведи исполня́ти, кро́ток и незло́бив бы́л еси́, о́тче, смире́н и про́ст, и во все́х доброде́телех благоиску́сен, те́м и Свята́го Ду́ха орга́н яви́лся еси́, прему́дре, науча́я и вразумля́я ча́да твоя́ досто́йно ходи́ти во сле́д Христу́, во смире́нии Тому́ служа́щым, спасе́ние подаю́щаго, с покая́нием и наде́ждою воспева́ющим Ему́: Аллилу́иа.

И́кос 7.

Но́ваго и преблагослове́ннаго ски́тскаго жи́тельства наста́вника тя́ почита́ем, о́тче на́ш Космо́, твое́ю бо стезе́ю вои́стинну пра́во ходи́ти в безмо́лвии пусты́ни позна́хом: пра́вый бо пу́ть сего́ жи́тельства словесы́ и де́лы показу́я, я́ко о́браз одушевле́н, сама́го себе́ на́м предста́вил еси́. И блаже́н еси́ и́стинно, я́ко, сотвори́в, научи́л еси́, те́м и ве́лий в Ца́рствии Небе́снем, по глаго́лу Госпо́дню, наре́клся еси́. Си́це и мы́ таковы́я похвалы́ прино́сим ти́:

Ра́дуйся, чи́сто се́рдце оби́телию Бо́жией сотвори́вый; ра́дуйся, ми́р чрез умале́ние зла́ и бога́тство любви́ источа́вый.

Ра́дуйся, заве́ты Ева́нгелия Христо́ва благовести́вый; ра́дуйся, нището́ю ду́ха смиренному́дрием облече́нный.

Ра́дуйся, пла́ч, омыва́ющий и утеша́ющий ду́шу обреты́й; ра́дуйся, кро́тостию, я́же зло́ добро́м побежда́яй себе́ украси́вый;

Ра́дуйся, преподо́бне о́тче на́ш Космо́, те́плый о на́с к Бо́гу моли́твенниче.

Конда́к 8.

Стра́нно бе́ лю́дем теплохла́дным ви́дети пречу́дное житие́ твое́, Космо́ богоблаже́нный, я́ко все́ отложи́в мирско́е пристра́стие, преподо́бне, и кре́ст тво́й на ра́мо взе́м, чи́стым и немяте́жным умо́м Христу́ после́довал еси́: в пусты́ни, я́ко в раи́, живы́й, Тому́ угоди́л еси́, я́ко безпло́тен, на земли́ жи́тельствуя, посто́м и моли́твою, и всено́щными стоя́нии стра́сти умертви́л еси́, молча́нием же и богомы́слием Бо́гу соедини́лся еси́, еще́ на земле́ сы́й, а́нгельское пе́ние воспева́я Ему́: Аллилу́иа.

И́кос 8.

Всего́ себе́ на служе́ние Бо́гу упра́вил еси́, о́тче богоблаже́нне, во́лю Бо́жию вы́ну творя́ и умо́м на небесе́х пребыва́я; сего́ ра́ди духо́внаго ми́ра созерца́телем сподо́бился еси́ бы́ти, вну́тренняго де́лания высоты́ моли́твою непреста́нной дости́гл еси́, отону́дуже у́мными оча́ми серде́чными Све́т присносу́щный вои́стинну сподо́бился еси́ зре́ти, и́мже вельми́ озаре́нный са́м светови́ден ве́рным показа́лся еси́, те́мже приими́ от на́с такова́я:

Ра́дуйся, я́ко ру́це твоя́ в моли́тве мно́гажды простира́л еси́; ра́дуйся, я́ко но́зе твоя́ во бде́ниих зело́ претруди́л еси́.

Ра́дуйся, словеса́ Бо́жия на се́рдце твое́м начерта́вый; ра́дуйся, главо́, о Го́споде при́сно любому́дрствующий.

Ра́дуйся, заре́, от но́щи к Бо́гу у́треннюющий; ра́дуйся, за́поведи Ева́нгельския до конца́ соверши́вший.

Ра́дуйся, преподо́бне о́тче на́ш Космо́, те́плый о на́с к Бо́гу моли́твенниче.

Конда́к 9.

Все́ отложи́в мирско́е пристра́стие, о́тче преподо́бне, и кре́ст тво́й на ра́мо взе́м, чи́стым и немяте́жным умо́м Христу́ после́довал еси́: служе́ние игу́менское с де́ланием вну́тренним уме́ло и благопло́днейше сопряга́я, и та́ко Христу́ угоди́л еси́, а́нгельски на земли́ жи́тельствуя, богомы́слием Бо́гу соедини́лся еси́, и ны́не со а́нгелы и пра́ведников собо́рами воспева́еши Творцу́: Аллилу́иа.

И́кос 9.

Вити́я многовеща́нныя и ри́торы доброгла́сныя по достоя́нию не возмо́гут возсла́вити тя́, богоно́сне о́тче на́ш Космо́, и воспе́ти свя́тость жития́ и служе́ния твоего́, милосе́рдие, ве́ру ве́лию, я́ко все́м житие́м и по́двиги Це́рковь Ру́сскую просла́вил еси́, преподо́бне, я́ко дости́гл еси́ обоже́ния, и со́нму святы́х приобщи́лся еси́. Ны́не со все́ми святы́ми и а́нгелы мо́лишися о на́с, вопию́щих ти́ си́це:

Ра́дуйся, душе́ю бли́зость Бо́га, Его́ любо́вь восприя́вый; ра́дуйся, Христа́ Бо́га в се́рдце твое́м вмести́вый.

Ра́дуйся, и́мя Его́ спаси́тельное в уме́ всегда́ носи́вый; ра́дуйся, моли́твенную сла́дость се́рдцем твои́м позна́вый.

Ра́дуйся, с ве́рою и любо́вию за ве́сь ми́р моли́выйся; ра́дуйся, сле́з благода́тных пото́к умили́тельный источи́вый.

Ра́дуйся, преподо́бне о́тче на́ш Космо́, те́плый о на́с к Бо́гу моли́твенниче.

Конда́к 10.

Спаси́тельнаго по́двига тече́ние многотру́дное соверша́я, преподо́бне о́тче на́ш Космо́, вои́стину сна́ твои́ма очи́ма не да́л еси́, ниже́ пло́ти твое́й упокое́ния, угото́вал еси́ в себе́ ме́сто Го́сподеви и селе́ние Бо́гу Иа́ковлю, те́м и во дворы́ Его́, ра́дуяся, вше́л еси́, иде́же все́х веселя́щихся жили́ще, но, о́тче приснопа́мятне, о на́с моля́ся не преста́й, да и мы́ возмо́жем с тобо́ю ку́пно Го́сподеви воспева́ти: Аллилу́иа.

И́кос 10.

Стена́ тве́рдая и прибе́жище благоути́шное все́м с моли́твою те́плою и ве́рою несомне́нною к заступле́нию твоему́ притека́ющим яви́лся еси́, и́щущим спасе́ния то́ки благода́ти Бо́жия источа́я, я́ко Го́сподеви Всемилосе́рдому трудолю́бно порабо́тав и вра́жию всю́ си́лу, ко́зни и лови́тельства, я́ко паучи́ну, растерза́в, победоно́сец показа́лся еси́ и ко Христу́ венцено́сец восте́кл еси́, ра́дуяся. Сего́ ра́ди и мы́ славосло́вие тебе́ прино́сим си́це:

Ра́дуйся, ра́н грехо́вных врачева́телю благоиску́сный; ра́дуйся, серде́ц скорбя́щих уте́шителю благослове́нный.

Ра́дуйся, ве́рными после́довательми Сы́на Бо́жия на́с бы́ти сподобля́ющий; ра́дуйся, жела́ние к де́ланию доброде́телей внуша́ющий;

Ра́дуйся, возлага́ющим упова́ние на тя́ ро́сту духо́вному посо́бствующий; ра́дуйся, все́х с ве́рою приходя́щих к тебе́ благода́тно освяща́ющий.

Ра́дуйся, преподо́бне о́тче на́ш Космо́, те́плый о на́с к Бо́гу моли́твенниче.

Конда́к 11.

Пе́ние немо́лчное да́же до дне́сь соверша́ется у святы́я ра́ки твое́й, уго́дниче Бо́жий Космо́: мно́зи бо, в ну́ждах су́щии, ве́дят тя́ помо́щника благопоспе́шлива и моли́твенника благоуве́тлива. Те́мже ны́не вся́ Влади́мирская земля́ благода́рне вопие́т просла́вльшему тя́ Бо́гу: Аллилу́иа.

И́кос 11.

Светоза́рное свети́ло, луча́ми христиа́нских доброде́телей сия́ющее, яви́лся еси́, не́бо церко́вное украша́я, богому́дре, си́це про́сим тя́, преподо́бне Космо́, не забу́ди и ны́не на́с, воспомина́ющих по́двизи свята́го жития́ твоего́ и пе́снь усе́рдно тебе́ принося́щым хода́тайствуй во спасе́ние: тя́ бо, о всеблаже́нне, моли́твенника и предста́теля ко Го́споду стяжа́вше, наде́жды не отщети́мся, ве́рно тя́ чту́щих и си́це вопию́щих:

Ра́дуйся, Бо́га Отца́ Безнача́льнаго благогове́йный служи́телю; ра́дуйся, Ипоста́снаго Бо́га Сло́ва неумо́лчный провозве́стниче.

Ра́дуйся, Бо́га Ду́ха Всесвята́го избра́нное жили́ще; ра́дуйся, Живонача́льныя Тро́ицы носи́ло и похвале́ние.

Ра́дуйся, у́мственныя и́долы на́ши ско́ро сокруша́ющий; ра́дуйся, ко Христу́ Распя́тому взо́ры ду́ха направля́ющий;

Ра́дуйся, преподо́бне о́тче на́ш Космо́, те́плый о на́с к Бо́гу моли́твенниче.

Конда́к 12.

Благода́ть да́нную ти́ от Бо́га ве́дяще благогове́йно покланя́емся святы́м моще́м твои́м, лобыза́ем святоле́пное изображе́ние ли́ка твоего́ и про́сим тя́, святы́й и многоми́лостивый покрови́телю на́ш: при́зри на ны́, по Бо́зе и Богоро́дице на тя́ наде́жду возлага́ющих и вознеси́ о на́с те́плую моли́тву к Бо́гу, да, гре́х ра́ди на́ших, не отврати́т Лица́ Своего́ от на́с, егда́ вопие́м Ему́: Аллилу́иа.

И́кос 12.

Воспева́я пра́ведное житие́ твое́, велича́ем тебя́, святы́й о́тче Космо́, сла́вим пра́ведное житие́ твое́, засту́пниче преблаги́й на́ш, и про́сим тя́: па́ки воспламени́ среди́ наро́да росси́йскаго о́гнь ве́ры Христо́вой, дабы́ ревну́я благочести́вым дея́нием прароди́телей свои́х, лю́ди си́и верну́лися ко Спаси́телю и за́поведем Его́. Мы́ же с наде́ждою па́ки зове́м ти́ си́це:

Ра́дуйся, от суеты́ многообра́зной у́м на́ш свобожда́яй; ра́дуйся, к позна́нию блага́го про́мысла Бо́жия на́с обраща́яй.

Ра́дуйся, к неле́ностному творе́нию моли́твы привлека́яй; ра́дуйся, благопло́дностию души́ на́ша наполня́ющий.

Ра́дуйся, благословля́ти вся́каго челове́ка науча́ющий; ра́дуйся, от теплохла́дности и су́етности сердца́ на́ша исцеля́ющий.

Ра́дуйся, преподо́бне о́тче на́ш Космо́, те́плый о на́с к Бо́гу моли́твенниче.

Конда́к 13.

О святы́й преподо́бный и богоно́сный о́тче на́ш Космо́! При́зри на на́с немощны́х, во мно́гия согреше́ния по вся́ дни́ впа́дающих и благоприя́тным твои́м хода́тайством изба́ви на́с от вся́каго искуше́ния проти́внаго и стра́х Бо́жий всели́ в сердца́ на́ша, да в доброде́тели, творе́нии де́л благи́х и богоуго́дных пожи́вше в ве́це се́м, блаже́нныя кончи́ны жи́зни сподо́бимся и со все́ми в ра́дости несконча́емей воспое́м: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгельскому поревнова́в житию́ и вели́ким во отце́х подо́бяся, всего́ себе́ отреши́л еси́ мирска́го сплете́ния, к подвиго́м же по́стничества му́жески вооружи́вся, опа́сно путе́м Бо́жиих за́поведей ше́ствовал еси́, блаже́нне. Те́мже и мы́, ве́рно чту́щии твою́ свяще́нную па́мять, похвала́ми ублажа́ем тя́ си́ми:

Ра́дуйся, а́нгельскаго жития́ подража́телю; ра́дуйся, дре́вних вели́ких оте́ц житию́ прие́мниче.

Ра́дуйся, за́поведей Бо́жиих храни́телю усе́рдный; ра́дуйся, неви́димых враго́в му́жественный победи́телю:

Ра́дуйся, оте́ческих Богодухнове́нных преда́ний отва́жный ревни́телю; ра́дуйся, мона́шескаго по́стническаго жи́тельства законоположи́телю.

Ра́дуйся, преподо́бне о́тче на́ш Космо́, те́плый о на́с к Бо́гу моли́твенниче.

Конда́к 1.

Избра́нный чудотво́рче и преди́вный уго́дниче Христо́в, ско́рый помо́щниче и моли́твенниче на́ш, пра́ведне о́тче Космо́! Велича́юще просла́вльшаго тя́ Го́спода, похва́льная воспису́ем ти́, к ра́це моще́й твои́х притека́юще. Ты́ же, я́ко име́яй дерзнове́ние ко Го́споду, от вся́ких на́с бе́д свободи́, зову́щих:

Ра́дуйся, преподо́бне о́тче на́ш Космо́, те́плый о на́с к Бо́гу моли́твенниче.

Моли́тва.

О, преподо́бне о́тче на́ш Космо́, а́ще и сконча́л еси́ свою́ вре́менную жи́знь, но ду́хом свои́м не отступа́й от ме́ста сего́ свята́го. Мо́лим тя́, име́я дерзнове́ние ко Всеми́лостивому Спа́су и Пречи́стой Его́ Ма́тери, принеси́ к престо́лу Царя́ все́х на́ши недосто́йныя и гре́шныя моле́ния о ско́рбех, ну́ждах и напа́стех на́ших; не оста́ви твое́ю по́мощию. Укрепи́ на́с ше́ствовати по стезя́м за́поведей Госпо́дних, и безро́потно нести́ кре́ст сво́й до конца́. Сохрани́ на́с от враго́в ви́димых и неви́димых. Да́руй на́м христиа́нскую кончи́ну и на стра́шном суде́ Христо́вом яви́ся на́шим засту́пником и хода́таем. Да твои́ма моли́твами соблюда́емы и сохраня́емы пребу́дем, сла́вяще Святу́ю Тро́ицу Отца́ и Сы́на и Свята́го Ду́ха. Ами́нь.