Конда́к 1.
Избра́нному нача́льнику преподо́бных отце́в, богому́дрому Льву́ О́птинскому, ста́рчество в О́птиной пу́стыне насади́вшему и диа́вола всеконе́чне победи́вшему, похва́льная принесе́м пе́ние, ты́ же от бе́д изба́ви на́с, о́тче преподо́бне, любо́вию тебе́ зову́щих:
Ра́дуйся, о́тче Льве́, ста́рчества о́птинскаго глави́зно.
И́кос 1.
С преподо́бным преподо́бен бу́деши и со избра́нным избра́н яви́шися, сие́ помы́слив, о́тче Льве́, ми́ра отре́клся еси́ и обручи́лся и́ноческому зва́нию. Таково́е произволе́ние твое́ похваля́юще си́це тебе́ вопие́м:
Ра́дуйся, Христо́в после́дователю избра́нный; ра́дуйся, ве́чери та́инственныя рачи́телю.
Ра́дуйся, еле́й угото́вивый изря́дным доброде́ланием; ра́дуйся, свети́льник душе́вный возже́г боголю́бием.
Ра́дуйся, я́ко в бра́чную ри́зу обле́клся еси́ смире́нием; ра́дуйся, я́ко ру́бища страсте́й совле́клся еси́ послуша́нием.
Ра́дуйся, я́ко мирску́ю возненави́дел еси́ суету́ безпло́дную; ра́дуйся, я́ко и́ноческую возлюби́л еси́ тишину́ многопло́дную.
Ра́дуйся, я́ко А́нгельскаго де́лания яви́лся еси́ прича́стник; ра́дуйся, я́ко Апо́стольскаго преда́ния яви́лся еси́ храни́телю.
Ра́дуйся, на Бра́ке А́гнчем вкуси́вый трапе́зу сладча́йшую; ра́дуйся, вино́м умиле́ния напои́вый ду́шу безстра́стную.
Ра́дуйся, о́тче Льве́, ста́рчества о́птинскаго глави́зно.
Конда́к 2.
На Бо́га всю́ наде́жду возложи́в и кре́ст тво́й взе́м, о́тче Льве́, житие́ сопротивобесо́вское дерзну́л еси́ проходи́ти преподо́бне, му́жеством души́ твоея́ сласте́й стра́стныя во́лны усмири́л еси́, Христу́ моли́твенно поя́: Аллилу́иа.
И́кос 2.
Терпе́нием обле́клся еси́, богому́дре о́тче, и́ноческое житие́ я́ко а́нгельский чи́н восприя́л еси́, труды́ и боле́зни, тяготы́ и беды́ ле́гце поне́сл еси́ окриля́емь послуша́нием, сего́ ра́ди зове́м ти́:
Ра́дуйся, мона́шескаго любому́дрия присносве́тлый свети́льниче; ра́дуйся, безмо́лвническаго жития́ и́стовый люби́телю.
Ра́дуйся, све́тлая свеще́ моли́тв неусыпа́емых; ра́дуйся, лампа́до неугаси́мая бде́ний непреста́нных.
Ра́дуйся, я́ко о́гнь ко огню́ прилага́л еси́ раче́ние; ра́дуйся, я́ко неосла́бно восходи́л еси́ по ле́ствице духо́внаго восхожде́ния.
Ра́дуйся, по́стничества постоя́нное жела́ние; ра́дуйся, трудолю́бия тве́рдое понужде́ние.
Ра́дуйся, псалмопе́ния всегда́шнее любле́ние; ра́дуйся, ума́ непреста́нное хране́ние.
Ра́дуйся, я́ко на высоту́ столпа́ возше́л еси́ самоотверже́ния; ра́дуйся, я́ко во глубину́ снизше́л еси́ самоукоре́ния.
Ра́дуйся, о́тче Льве́, ста́рчества о́птинскаго глави́зно.
Конда́к 3.
Огнедохнове́нное ева́нгельское сло́во слы́шал еси́ о́тче, я́ко учени́к в ме́ру учи́теля прихо́дит, потща́лся еси́ взыска́ти учи́теля моли́твы у́мныя, да к соверше́нному едине́нию с Бо́гом приведе́т тя́, и обре́т Фео́дора я́ко да́р Бо́жий, благода́рне возопи́л еси́ Бо́гу: Аллилу́иа.
И́кос 3.
Адама́нта крепча́йшее житие́ Фео́дора, бы́сть тебе́, о́тче Льве́, я́ко обре́тение сокро́вища многоце́ннаго, ему́же после́дуя житию́ и уче́нию ду́шу снабди́л еси́ дара́ми благода́ти многоцеле́бныя. Сего́ ра́ди цели́ши и богати́ши вопию́щия тебе́ такова́я:
Ра́дуйся, бога́тство тле́нное ни во что́ же вмени́вый; ра́дуйся, сокро́вище непреходя́щее на Небеси́ стяжа́вый.
Ра́дуйся, златоукра́шенная две́ре та́ин церко́вных; ра́дуйся, златокова́нный ключу́ та́инств духо́вных.
Ра́дуйся, отверза́яй вхо́д моли́тве у́мней; ра́дуйся, затворя́яй вхо́д страсте́м безу́мным.
Ра́дуйся, учениче́ благи́й и ве́рный; ра́дуйся, храни́телю Паи́сиевых уче́ний.
Ра́дуйся, благоумиле́нное к моли́тве прилежа́ние; ра́дуйся, благодерзнове́нное страсте́й умерщвле́ние.
Ра́дуйся, све́точе доброде́телей Боже́ственных; ра́дуйся, исто́чниче даро́в духо́вных.
Ра́дуйся, о́тче Льве́, ста́рчества о́птинскаго глави́зно.
Конда́к 4.
Ко исто́чнику прите́кл еси́ Боже́ственных писа́ний, я́ко еле́нь жа́ждущий, и струя́ми святооте́ческих уче́ний напои́л еси́ ду́шу твою́, богому́дре Льве́. Сего́ ра́ди жа́жду утоли́л еси́ мно́гих люде́й, приходя́щих к тебе́, в благода́рности зову́щих Бо́гу, Аллилу́иа.
И́кос 4.
Разу́мно вше́л еси́ в приста́нище безмо́лвия я́ко в Боже́ственное поко́ище, иде́же со блаже́нным Фео́дором я́ко земны́й а́нгел непреста́нно бесе́довал еси́ ко Христу́. Мы́ же зря́ще тя́ я́ко небе́снаго челове́ка, прино́сим тебе́ похвалу́ сию́:
Ра́дуйся, го́рлице пустыннолюби́вая, Христа́ взыску́ющая; ра́дуйся, пте́нче орли́ный, обнови́вый ю́ность твою́.
Ра́дуйся, Богозво́нкую возлюби́вый тишину́ А́нгельскую; ра́дуйся, злошу́мнаго удали́выйся мяте́жа страсте́й.
Ра́дуйся, я́ко Херуви́м носи́л еси́ Бо́га, в тебе́ почива́ющаго; ра́дуйся, я́ко Серафи́м зре́л еси́ та́йны, в се́рдце твое́м явля́ющияся.
Ра́дуйся, я́ко Со́лнце возше́л еси́, в пусты́не изсуша́яй коре́ния страсте́й; ра́дуйся, всено́щными бде́нии твои́ми я́ко по́лная луна́ разто́ргл еси́ тьму́ вра́жиих се́тей.
Ра́дуйся, безмо́лвия сто́лпе непоколеби́мый; ра́дуйся, подви́жничества основа́ние неиспровержи́мое.
Ра́дуйся, по́стничества похвало́ изря́дная; ра́дуйся, пустынножи́тельства тишино́ домови́тая.
Ра́дуйся, о́тче Льве́, ста́рчества о́птинскаго глави́зно.
Конда́к 5.
О́стров Валаа́м я́ко приста́нище от мирски́я молвы́ избра́л еси́, о́тче, во́ньже всели́лся еси́ со блаже́нным Фео́дором, иде́же ку́плю духо́вную де́яв, зла́том смиренному́дрия мно́гих богатя́. Те́мже обнища́вшия ны́ смире́нием ко о́строву покая́ния приведи́ твои́ми моли́твами, Бо́гу вопи́ти: Аллилу́иа.
И́кос 5.
Целому́дрием украси́лся еси́ о́тче Льве́, я́ко препоя́сан бы́л еси́ подви́жничеством, в схи́му же вели́кую я́ко в ангелоподо́бную си́лу обле́клся еси́, А́нгельския обвеселя́я чи́ны. Сего́ ра́ди мона́шества красота́ на тебе́ изобрази́ся, мы́ же тя́ я́ко наста́вника и́ноческих чино́в похваля́ем си́це:
Ра́дуйся, ку́колем незло́бия покры́выйся; ра́дуйся, в ма́нтию любому́дрия облеки́йся.
Ра́дуйся, парама́н на себе́ возложи́в терпе́ния; ра́дуйся, препояса́выйся по́ясом сугу́баго раче́ния.
Ра́дуйся, санда́лии обу́вый благовествова́ния ми́ру; ра́дуйся, щито́м послуша́ния стре́лы вра́жия отрази́вый.
Ра́дуйся, мече́м моли́твенным по́лчища де́монския сокруши́вый; ра́дуйся, богодарова́нное разсужде́ние я́ко свещу́ неугаси́мую вже́гл еси́.
Ра́дуйся, я́ко на кре́ст сугу́бым отрече́нием от ми́ра возше́л еси́; ра́дуйся, я́ко в нищете́ духо́вной пожи́л еси́.
Ра́дуйся, бога́тство нестяжа́ния; ра́дуйся, ми́ра попра́ние.
Ра́дуйся, о́тче Льве́, ста́рчества о́птинскаго глави́зно.
Конда́к 6.
Мона́хов наста́вника и миря́н уте́шителя, яви́ тя́ Бо́г в стране́ Росси́йстей, о́тче преподо́бне Льве́, и стра́ждущим цели́теля и бесо́в прогони́теля и от вся́ких зо́л изба́вителя люде́й к тебе́ с ве́рою притека́ющих и пою́щих Бо́гу: Аллилу́иа.
И́кос 6.
Егда́ в О́птину Пу́стынь прише́л еси́ о́тче Льве́, я́коже в вертогра́д богонасажде́нный, тогда́ я́ко де́латель прему́дрый водрузи́л еси́ сто́лп ста́рческаго окормле́ния и моли́твенную огра́ду и точи́ло смире́ния по ева́нгельскому сло́ву, сего́ ра́ди пу́стынь процвете́ хвала́ми тебе́ славосло́вящи:
Ра́дуйся, Моисе́ю и Анто́нию сподви́жниче богодарова́нный; ра́дуйся, Филаре́ту иера́рху дру́же и наста́вниче избра́нный.
Ра́дуйся, Мака́рию смиренному́дрому вождю́ боговдохнове́нный; ра́дуйся, Исаа́кию препро́стому проро́че богооткрове́нный.
Ра́дуйся, Фео́дора блаже́ннаго учениче́ благопослу́шный; ра́дуйся, Паи́сиева любому́дрия ли́ро вдохнове́нная.
Ра́дуйся, оте́ческих изрече́ний кни́го одушевле́нная; ра́дуйся, Амвро́сия благослове́ннаго из по́лы в полу́ Мака́рию преда́вый.
Ра́дуйся, святооте́ческими наставле́ньми его́ я́ко оте́ц чадолюби́вый наказа́вый; ра́дуйся, святи́теля Игна́тия богому́дрый воспита́телю.
Ра́дуйся, в новонача́лии его́ уро́ков смире́ния пода́телю; ра́дуйся, мно́гия ча́да твоя́ к Бо́гу приведы́й.
Ра́дуйся, о́тче Льве́, ста́рчества о́птинскаго глави́зно.
Конда́к 7.
Посели́лся еси́ в пче́льнице скита́ я́ко пчела́ люботру́дная, некта́р подви́жнических трудо́в твои́х в де́лех и чудесе́х явля́я и поуче́нии свои́ми ча́да твоя́ пита́я, любо́вию вопию́щия Бо́гу: Аллилу́иа.
И́кос 7.
Ме́д у́мнаго де́лания в се́рдце твое́м собра́л еси́ богому́дре о́тче, я́ко Иису́сово сла́дкое и́мя бы́сть тебе́ утеше́ния исто́чник, и́мже го́речь страсте́й на сла́дость доброде́телей преложи́л еси́, понужде́нием духо́вным. Сего́ ра́ди сла́дкия со́ты похвалы́ тебе́ прино́сим:
Ра́дуйся, А́нгелом сла́дкое пе́ние; ра́дуйся, де́моном го́рькое воспомина́ние.
Ра́дуйся, цветниче́ целому́дрия духо́внаго; ра́дуйся, Раю́ молитвосло́вия церко́внаго.
Ра́дуйся, у́мныя моли́твы де́лателю боговдохнове́нный; ра́дуйся, серде́чнаго умиле́ния носи́телю всеблагогове́йный.
Ра́дуйся, я́ко сле́зныя струи́ источи́л еси́ всецеле́бныя; ра́дуйся, я́ко благода́тию просвети́л еси́ души́ вожделе́ние.
Ра́дуйся, непреста́нное па́мятование о Бо́зе; ра́дуйся, пламене́ющая любы́ в Ду́се.
Ра́дуйся, медото́чная словеса́ источа́яй; ра́дуйся, сладкозре́ние ча́дом твои́м.
Ра́дуйся, о́тче Льве́, ста́рчества о́птинскаго глави́зно.
Конда́к 8.
О́птинскому ста́рчеству яви́лся еси́ я́ко благома́сленный ко́реню, еле́ем намаща́я уче́ний твоя́ ученики́ и от лампа́ды присногоря́щия пома́занием целя́ неду́жныя, в ра́дости пою́щия благода́рно Бо́гу: Аллилу́иа.
И́кос 8.
Сла́ва по́двигов твои́х промча́ся по лицу́ земли́ росси́йския и заря́ чуде́с твои́х облиста́ концы́ ея́, сего́ ра́ди притека́ху цели́тися к тебе́ бесны́я и неду́жныя, вопию́ще тебе́ сия́:
Ра́дуйся, неду́гов избавле́ние; ра́дуйся, грехо́в разреше́ние.
Ра́дуйся, врачева́ние боле́зней неудобоисцели́мых; ра́дуйся, освобожде́ние от вери́г неудобоно́сных.
Ра́дуйся, бы́строе премене́ние ско́рби на ра́дость; ра́дуйся, ско́рое исцеле́ние ра́ковыя я́звы.
Ра́дуйся, одержи́мых от бесо́в избавля́яй; ра́дуйся, отча́янным отра́ду подава́яй.
Ра́дуйся, безнаде́жным ве́ру возраща́яй; ра́дуйся, еле́ем от лампа́ды исцеля́яй.
Ра́дуйся, я́ко тобо́ю здра́вие получа́ем; ра́дуйся, я́ко тобо́ю уны́ние побежда́ем.
Ра́дуйся, о́тче Льве́, ста́рчества о́птинскаго глави́зно.
Конда́к 9.
Ходя́й я́ко ле́в диа́вол и рыка́яй кого́ поглоти́ти, я́ко ви́де тя́ о́тче Льве́, облече́ннаго благода́тию Пресвята́го Ду́ха, ужасе́ся и тре́петен бы́сть и я́ко пе́с худы́й от ста́да твоего́ отбеже́, си́лою гони́мый твоего́ к Бо́гу дерзнове́ния, и́мже взыва́л еси́: Аллилу́иа.
И́кос 9.
Лука́вый сове́т сотвори́ де́мон и гоне́ния на тя́ воздви́же о́тче Льве́, ты́ же беды́ до́бльственне вся́ претерпе́л еси́, глаго́ля: «А́ще в ссы́лку пойду́, а́ще во о́гнь, а́з бу́ду то́йже Леони́д, при́сно велича́яй Бо́га». Мы́ же му́жеству твоему́ дивя́щеся си́це вопие́м:
Ра́дуйся, несокруши́мый адама́нте; ра́дуйся, небоявле́нный сто́лпе.
Ра́дуйся, горо́ несеко́мая скорбя́ми; ра́дуйся, высото́ неземны́я ра́дости.
Ра́дуйся, пра́вды ра́ди гони́мый без пра́вды; ра́дуйся, лжесвиде́тели оклевета́нный.
Ра́дуйся, клену́щия тя́ благословля́яй; ра́дуйся, оби́дящим тя́ благотворя́й.
Ра́дуйся, незло́бием твои́м Христу́ подража́яй; ра́дуйся, зло́бных де́монов в бе́здну вверга́яй.
Ра́дуйся, смире́нный ле́в – от Фео́дора нарече́нный; ра́дуйся, блаже́нства гони́мых за Бо́га прича́стниче.
Ра́дуйся, Вы́шняго Иерусали́ма досто́йный насле́дниче.
Ра́дуйся, о́тче Льве́, ста́рчества о́птинскаго глави́зно.
Конда́к 10.
Ве́рен Бо́гу пребы́л еси́ о́тче Льве́ да́же до сме́рти, оте́ческия заве́ты со опа́ством храня́, а́ще и оклевета́н бы́л еси́ я́ко неве́рен, но чи́стым испове́дание твое́ правосла́вным показа́. Сего́ ра́ди я́ко избра́нный сосу́д Це́ркве Ру́сския яви́лся еси́ и гу́сль Бо́гу пою́щая при́сно: Аллилу́иа.
И́кос 10.
Ангелоподо́бное житие́ твое́, о́тче Льве́, вписа́ тя в небожи́тели и богодарова́нное разсужде́ние твое́ над мно́гими людьми́ поста́ви тя́ в руководи́теля. Сего́ ра́ди от мно́гих бе́д и заблужде́ний изба́вил еси́ па́ству твою́, любо́вию тебе́ пою́щую:
Ра́дуйся, па́стырю на́ш до́брый; ра́дуйся, слове́сных пита́телю ове́ц.
Ра́дуйся, неудобореши́мых вопро́сов разъясне́ние; ра́дуйся, неудободержи́мых страсте́й усмире́ние.
Ра́дуйся, я́ко пре́лести пу́ты я́ко паучи́ну растерза́л еси́; ра́дуйся, я́ко ра́зума духо́внаго стези́ сказа́л еси́.
Ра́дуйся, смиренному́дрый враго́в примири́телю; ра́дуйся, заматоре́вшия горды́ни искорени́телю.
Ра́дуйся, забы́тых грехо́в обнаруже́ние; ра́дуйся, сокры́тых тала́нтов явле́ние.
Ра́дуйся, я́ко тобо́ю исцеля́ются я́звы неисце́льныя; ра́дуйся, я́ко тобо́ю изсуша́ются сле́з исто́чницы.
Ра́дуйся, о́тче Льве́, ста́рчества о́птинскаго глави́зно.
Конда́к 11.
Арома́тами моли́твы твоея́ у́мно-серде́чныя облагово́ни ча́да твоя́, тебе́ пою́щия, и вложи́ в на́ша сердца́ моли́тву богодарова́нную, да сла́вим Го́спода Иису́са Христа́, непреста́нно вопию́ще: Аллилу́иа.
И́кос 11.
Возже́гл еси́ в души́ твое́й свети́льник моли́твы у́мныя, от нея́же вся́ блага́я прия́л еси́, я́ко де́латель бы́л еси́ смиренному́дрый. Те́мже наста́ви и на́с на стезю́ сию́ те́сную оба́че благода́ти испо́лненную, вопию́щих тебе́ сия́:
Ра́дуйся, де́лателю непреле́стный; ра́дуйся, подви́жниче неле́ностный.
Ра́дуйся, све́тлая стезе́ у́мнаго де́лания; ра́дуйся, сла́дкая струе́ серде́чнаго умиле́ния.
Ра́дуйся, сто́лпе, восходя́й терпе́нием к Не́бу; ра́дуйся, же́зле, поража́яй де́монов в бе́здне.
Ра́дуйся, чи́стаго се́рдца оби́телище; ра́дуйся, благи́я со́вести поко́ище.
Ра́дуйся, Боже́ственнаго све́та таи́нниче; ра́дуйся, преле́стныя тьмы́ прогони́телю.
Ра́дуйся, зри́тельныя моли́твы достиже́ние; ра́дуйся, слепо́тствующих серде́ц просвеще́ние.
Ра́дуйся, о́тче Льве́, ста́рчества о́птинскаго глави́зно.
Конда́к 12.
Луча́ми сла́вы твоея́ облиста́й, о́тче Льве́, пою́щих твоя́ добропобе́дныя по́двиги, я́же в те́ле на земли́ соверши́, на́м же оземлени́вшим сво́й у́м жите́йским попече́нием пода́ждь ра́зум духо́вный Бо́гу непреста́нно пе́ти: Аллилу́иа.
И́кос 12.
Ангелоле́пно сконча́л еси́ пу́ть земны́й, о́тче Льве́, и в ра́йския ку́щи пресели́лся еси́ присносла́вне, на земли́ оста́вль я́коже други́й ра́й о́птинский ски́т, труда́ми возде́ланный твои́х подвиго́в, в не́мже плоды́ духо́вныя вкуша́юще, ны́не вопие́м ти́:
Ра́дуйся, дре́во плодонося́щее вожделе́нное безстра́стие; ра́дуйся, ни́во гобзу́ющая мно́жество спаса́ющихся.
Ра́дуйся, ке́дре в его́же ве́твех укры́шася Небе́снии орли́; ра́дуйся, кипари́се благоуха́яй по́стничества арома́ты.
Ра́дуйся, лозо́ точа́щая вино́ умиле́ния; ра́дуйся, гро́зде испо́лненный Боже́ственнаго утеше́ния.
Ра́дуйся, кри́не А́нгельскаго целому́дрия; ра́дуйся, медото́чивый язы́че оте́ческих изрече́ний.
Ра́дуйся, мирово́нная устне́ испо́лнь утеше́ния; ра́дуйся, миротво́рче преди́вный серде́ц непокори́вых.
Ра́дуйся, я́ко тобо́ю сла́дости духо́вныя наслажда́емся; ра́дуйся, я́ко тобо́ю го́речи страсте́й избавля́емся.
Ра́дуйся, о́тче Льве́, ста́рчества о́птинскаго глави́зно.
Конда́к 13.
О богому́дре о́тче Льве́! ста́рчества О́птинскаго боговдохнове́нный вождю́, изба́ви на́с тя́ воспева́ющих от пле́на грехо́внаго, да́ждь на́м незаблу́дный пу́ть, веду́щий вну́трь се́рдца, иде́же е́сть Ца́рствие Бо́жие, да вше́дше в о́ное, непреста́нно пое́м Бо́гу: Аллилу́иа. (три́жды)
И́кос 1.
С преподо́бным преподо́бен бу́деши и со избра́нным избра́н яви́шися, сие́ помы́слив, о́тче Льве́, ми́ра отре́клся еси́ и обручи́лся и́ноческому зва́нию. Таково́е произволе́ние твое́ похваля́юще си́це тебе́ вопие́м:
Ра́дуйся, Христо́в после́дователю избра́нный; ра́дуйся, ве́чери та́инственныя рачи́телю.
Ра́дуйся, еле́й угото́вивый изря́дным доброде́ланием; ра́дуйся, свети́льник душе́вный возже́г боголю́бием.
Ра́дуйся, я́ко в бра́чную ри́зу обле́клся еси́ смире́нием; ра́дуйся, я́ко ру́бища страсте́й совле́клся еси́ послуша́нием.
Ра́дуйся, я́ко мирску́ю возненави́дел еси́ суету́ безпло́дную; ра́дуйся, я́ко и́ноческую возлюби́л еси́ тишину́ многопло́дную.
Ра́дуйся, я́ко А́нгельскаго де́лания яви́лся еси́ прича́стник; ра́дуйся, я́ко Апо́стольскаго преда́ния яви́лся еси́ храни́телю.
Ра́дуйся, на Бра́ке А́гнчем вкуси́вый трапе́зу сладча́йшую; ра́дуйся, вино́м умиле́ния напои́вый ду́шу безстра́стную.
Ра́дуйся, о́тче Льве́, ста́рчества о́птинскаго глави́зно.
Конда́к 1.
Избра́нному нача́льнику преподо́бных отце́в, богому́дрому Льву́ О́птинскому, ста́рчество в О́птиной пу́стыне насади́вшему и диа́вола всеконе́чне победи́вшему, похва́льная принесе́м пе́ние, ты́ же от бе́д изба́ви на́с, о́тче преподо́бне, любо́вию тебе́ зову́щих:
Ра́дуйся, о́тче Льве́, ста́рчества о́птинскаго глави́зно.
Моли́тва.
О Пречестна́я богому́драя главо́ и собо́ра Ста́рцев О́птинских изря́дное и перволе́пное украше́ние, богопросвеще́нне о́тче Льве́! Тебе́, я́ко ча́да отцу́, дерза́ем приноси́ти сие́ ака́фистное пе́ние, ты́ же не пренебрези́ ма́лаго сего́ приноше́ния, я́ко па́че до́лжни мы́ не то́кмо пе́нии, но де́лы тя́ почестви́ти. Ты́ бо оста́вил еси́ на́м бога́тство твоего́ жития́ богоуго́днаго, в не́мже я́ко в зерца́ле зри́тся о́браз богоше́ственных отце́в в по́двизе Бо́гу угоди́вших. А́ще и не́мощны е́сть мы́ тебе́ подража́ти, но жела́нием лу́чшаго от тебе́ не отступа́ем и под кри́ла моли́тв твои́х прибега́ем и я́ко неключи́мии тебе́ вопие́м: изгони́ от на́с вся́кое нераде́ние, искорени́ злы́я стра́сти в сердца́х на́ших гнездя́щияся, прожени́ бесо́в на ны́ непреста́нно вою́ющих, да́ждь по́мощь благода́тную, я́ко си́лен е́сть и еще́ при жи́зни твое́й бесо́в прогоня́л еси́ и цели́л еси́ вся́кую боле́знь и не́мощь тая́щуюся. Си́це и в пре́днее вре́мя посеща́й ны́ ду́хом твои́м и жезло́м па́стырския моли́твы твоея́ порази́ волко́в мы́сленных ста́до твое́ и́щущих расхи́тити. На́с же я́ко па́стырь до́брый, при́сно зови́ свире́лию поуче́ний твои́х в Ца́рствие Бо́жие иде́же с тобо́ю по преставле́нии на́шем вку́пе да обря́щемся, прославля́я Отца́ и Сы́на и Свята́го Ду́ха в безконе́чныя ве́ки. Ами́нь.