Конда́к 1.

Избра́нный из родо́в Росси́йских на служе́ние в гора́х Алта́я и просвеще́ние люде́й, живу́щих во тьме́ язы́чества, о́тче Мака́рие! Просла́вльшаго тя́ Го́спода велича́юще, тебе́ похва́льная пе́ния воспева́ем. Служе́нием свои́м язы́ки просвети́вый и све́т Богове́дения те́м яви́вый, от ско́рбных обстоя́ний и вся́ких бе́д изба́ви на́с, тебе́ зову́щих:

Ра́дуйся, преподо́бне Мака́рие, апо́столе Алта́йский.

И́кос 1.

А́нгелов Творе́ц и всея́ тва́ри Созда́тель напра́ви стопы́ твоя́, преподо́бне о́тче, к наро́ду, седя́щему во тьме́ неве́дения и и́щущему Со́лнца Пра́вды. Ты́ же, благове́стническаго служе́ния жела́я, мно́ги нау́ки с моли́твою к Бо́гу изучи́л еси́, и тала́нт, да́нный ти́ Го́сподем, в земли́ не сокры́л еси́, ра́зум сво́й на по́льзу Ма́тери Це́ркви явля́я, пе́рвый среди́ учени́к яви́лся еси́. Па́че же ины́х в моли́тве и служе́нии Го́споду преуспе́л еси́, о́тче, те́мже и мы́ с ра́достию зове́м ти́ сицева́я:

Ра́дуйся, от ю́ности Го́спода возлюби́вый; ра́дуйся, сла́дость моли́тв к Нему́ вкуси́вый.

Ра́дуйся, страны́ Алта́йския пе́рвый свяще́нниче; ра́дуйся, и ны́не о не́й ко Го́споду моли́твенниче.

Ра́дуйся, я́ко тобо́ю све́т ве́ры язы́ком яви́ся; ра́дуйся, я́ко тобо́ю алта́йский наро́д просвети́ся.

Ра́дуйся, вся́ бла́га ми́ра сего́ нивочто́же вмени́вый; ра́дуйся, свети́льниче, с верши́ны горы́ ча́да своя́ освети́вый.

Ра́дуйся, преподо́бне Мака́рие, апо́столе Алта́йский.

Конда́к 2.

Ви́дяще усе́рдие твое́, преподо́бне о́тче Мака́рие, учи́телие твои́, в ни́хже бы́сть святи́тель Филаре́т Моско́вский, на пу́ть те́сный тя́ наставля́юще и и́ноческому житию́ поуча́юще, ра́довахуся, зря́ще любо́вь твою́ ко Отцу́, И́же на небесе́х, Ему́же вси́ со умиле́нием зове́м: Аллилу́иа.

И́кос 2.

Ра́зумом ко Го́споду устремля́яся, все́ жите́йское попече́ние отложи́л еси́, преподо́бне о́тче, ста́в на го́рний пу́ть и́ноческаго жития́, Го́споду моли́лся еси́, и Тому́ еди́ному служи́л еси́. Сего́ ра́ди приими́ от на́с похвалы́ сия́:

Ра́дуйся, благочести́вых роди́телей ча́до прелюбе́зное; ра́дуйся, от ни́х получи́вый для ве́ры вся́ поле́зная.

Ра́дуйся, от отца́ любо́вь ко служе́нию и про́поведи унасле́дивый; ра́дуйся, от ма́тере да́р кро́тости и смире́ния прия́вый.

Ра́дуйся, успе́шным обуче́нием роди́телей возвесели́вый; ра́дуйся, любо́вь свою́ ко Го́споду и роди́телем мно́гажды прояви́вый.

Ра́дуйся, святи́теля Филаре́та дру́же и учениче́; ра́дуйся, в усе́рдной моли́тве пла́менный свети́льниче.

Ра́дуйся, преподо́бне Мака́рие, апо́столе Алта́йский.

Конда́к 3.

Си́лою Вы́шняго укрепля́емый, преподо́бне о́тче, вся́ искуше́ния ми́ра претерпева́я, лише́ния и ско́рби кро́тостию и смире́нием побежда́я, лю́дем, от Це́ркве отше́дшим, и́стинную и живу́ю ве́ру яви́л еси́, непреста́нно вопия́ к Бо́гу: Аллилу́иа.

И́кос 3.

Име́я мы́сль бла́гу благове́стническим служе́нием Го́споду угоди́ти, стопы́ своя́ напра́вил еси́ в зе́мли Алта́йския. Ви́дя язы́цы, и́стиннаго Бо́га не позна́вшия, пропове́даше и́м Царя́ Сла́вы, наре́чие ме́стное изучи́л еси́ и сро́дным для просвеща́емых ста́л еси́. Те́мже мы́, ви́дяще такова́я, вопие́м ти́:

Ра́дуйся, о́тче, тру́дности пути́ не убоя́выйся; ра́дуйся, с любо́вию на апо́стольское служе́ние возше́дый.

Ра́дуйся, го́рная селе́ния с про́поведию обходи́вый; ра́дуйся, о Христе́ ча́д свои́х и́скренне возлюби́вый.

Ра́дуйся, Свято́е Писа́ние наро́ду алта́йскому принесы́й; ра́дуйся, от Го́спода да́р неусыпа́емыя моли́твы прия́вый.

Ра́дуйся, я́ко жи́зни осе́длой кочевы́я язы́цы научи́л еси́; ра́дуйся, я́ко о спасе́нии де́тских ду́ш моли́лся еси́.

Ра́дуйся, преподо́бне Мака́рие, апо́столе Алта́йский.

Конда́к 4.

Бу́ри искуше́ний и скорбе́й побежда́я, язы́цы наставля́л еси́ во и́стинней ве́ре и, неуста́нно пропове́дая, наро́ды Алта́йския науча́л еси́. Жи́телем же ме́стным о́браз благоче́стия в себе́ явля́я и ко спасе́нию те́х наставля́я, вои́стину преподо́бническими по́двиги украси́лся еси́, о́тче Мака́рие, Го́споду непреста́нно вопия́: Аллилу́иа.

И́кос 4.

Слы́шавше, преподо́бне Мака́рие, бли́жнии и да́льнии о про́поведи и житии́ твое́м, притека́ху к тебе́, я́ко ко исто́чнику чи́стому и исцеле́ния подаю́щему, креще́ния жела́юще и и́щуще спаси́тельнаго пути́. Ты́ же, о́тче, приходя́щих бра́тским целова́нием лобыза́я и и́стинней ве́ре науча́я, мно́гих ко спасе́нию приве́л еси́. Мы́ же, ви́девше благоразу́мие твое́, вопие́м ти́:

Ра́дуйся, благода́тию свы́ше облече́нный; ра́дуйся, му́же высокопросвеще́нный.

Ра́дуйся, от Го́спода прозорли́востию одаре́нный; ра́дуйся, к служе́нию Бо́жию Ду́хом Святы́м воззва́нный.

Ра́дуйся, алта́йским язы́ком на приро́дном и́х наре́чии Ева́нгелие да́вый; ра́дуйся, мно́ги духо́вныя пи́сьмена написа́вый.

Ра́дуйся, смире́нием и кро́тостию гне́в людски́й победи́вый; ра́дуйся, мно́гих от язы́чник к ве́ре и́стинней обрати́вый.

Ра́дуйся, преподо́бне Мака́рие, апо́столе Алта́йский.

Конда́к 5.

Боготе́чная звезда́ яви́лся еси́, о́тче, на гора́х Алта́я и, словеса́ спаси́тельная язы́ком веща́я, и́стинно Го́сподеви угоди́л еси́. О́трока Михаи́ла, прови́деннаго тобо́ю иере́ем, гра́моте обучи́в, из тьмы́ неве́дения к позна́нию Све́та И́стины приве́л еси́. И се́й яви́ся пе́рвый во иере́йстем са́не из алта́йских племе́н, Го́споду непреста́нно вопия́: Аллилу́иа.

И́кос 5.

Ви́девше тя́ ве́рная ча́да Це́ркве Христо́вы, я́ко свети́ло сия́юще безо́блачно мно́гими дарова́ньми Боже́ственными, возра́довахуся зело́. Ты́ же, о́тче, всего́ себе́ отда́л еси́ наро́ду просвеща́емому, те́мже и незабве́нным архимандри́том от сослужа́щих нарече́н бы́сть. Мы́ же, свя́те Мака́рие, вопие́м ти́ си́це:

Ра́дуйся, мно́ги сироты́ оте́ческим тепло́м согре́вый; ра́дуйся, ни́щих и убо́гих оде́ждею оде́явый.

Ра́дуйся, виногра́д духо́вный насади́вый; ра́дуйся, преподо́бие свое́ ми́ру всему́ яви́вый.

Ра́дуйся, в ве́ре о́трока утверди́вый и просвеща́ти соплеме́нных благослови́вый; ра́дуйся, духо́вно его́ возлюби́вый и вторы́м отце́м ему́ бы́вый.

Ра́дуйся, я́ко о́трок се́й, ста́в иере́ем Бо́жиим, просла́вися; ра́дуйся, я́ко чрез него́ мно́зи в ве́ре утверди́шася.

Ра́дуйся, преподо́бне Мака́рие, апо́столе Алта́йский.

Конда́к 6.

Пропове́дника богодухнове́ннаго и неусы́пнаго моли́твенника ви́дим тя́, о́тче Мака́рие, мно́зи бо предста́тельством твои́м спаса́ются и из тьмы́ язы́чества обраща́ются, ты́ же непреста́нно мо́лишися о на́с ко Го́споду, воспева́я Ему́: Аллилу́иа.

И́кос 6.

Возсия́л еси́, преподо́бне, пред Го́сподем, я́ко свети́льник ве́ры правосла́вныя на Алта́е. Мно́зи же лю́дие све́т тво́й, о́тче Мака́рие, ви́девше, Го́сподеви еди́ному служи́ти восхоте́ша. Не́кий же от язы́к, Бори́сом нарече́нный, креще́ния не жела́я и гла́су твоему́ не внима́я, во тьме́ язы́чества косне́. Ты́ же к словесе́м поуче́ний моли́тву приложи́л еси́, и чу́до яви́ся: челове́к се́й от и́дол прии́де к ве́ре и́стинней. Ви́девше у́бо си́лу моли́твы твоея́, воспева́ем ти́ похвалы́ сия́:

Ра́дуйся, по ева́нгельскому гла́су овцу́ заблу́ждшую взыска́вый; ра́дуйся, ко ослепле́нному душе́ю словеса́ и́стины мно́гажды обраща́вый.

Ра́дуйся, я́ко се́й от и́дол к покая́нию притече́ и Христо́вых Та́ин прича́стник яви́ся; ра́дуйся, я́ко Боже́ственныя литурги́и то́й с ра́достию наслади́ся.

Ра́дуйся, а́лчущих пра́вды Святы́ми Та́йнами напита́вый; ра́дуйся, жа́ждущих духо́вно дарми́ Свята́го Ду́ха напои́вый.

Ра́дуйся, пи́сьменность алта́йскую созда́вый; ра́дуйся, Боже́ственныя зако́ны на алта́йстем наре́чии изъясни́вый.

Ра́дуйся, преподо́бне Мака́рие, апо́столе Алта́йский.

Конда́к 7.

Хотя́ще служи́телие и́дольскии изгна́ти тя́, о́тче Мака́рие, от Алта́йския земли́, мно́зи ско́рби тебе́ учини́ша: угро́зы тебе́ посыла́ху и препя́тствия мно́зи де́яху. Ты́ же со смире́нием и́х поуча́ше, и о проще́нии и просвеще́нии те́х Го́спода непреста́нно моля́ше, вопия́ Ему́: Аллилу́иа.

И́кос 7.

Но́вое ча́до яви́ся Го́споду о́трок Иоа́нн, тобо́ю просвеще́нный, о́тче Мака́рие. Гро́зный же роди́тель сего́, и́дольския же́ртвы принося́, возпыла́ на тя́, о́тче, гне́вом, и погуби́ти тя́ хотя́й, со мно́гими сро́дники к ме́сту, иде́же ты́ обрета́лся еси́, со стра́шною зло́бою устреми́ся и, прите́кше, би́ти уже́ хоте́. Ко́нь же того́ споткну́ся, язы́чник о зе́млю уда́рися и е́ле жи́в оста́ся. Ты́ же, о́тче, любо́вь свою́ явля́я, боля́щему всю́ но́щь служа́, Го́спода о проще́нии неразу́мнаго моля́ше. Мы́ же, ви́дяще любо́вь твою́ ко враго́м свои́м, восхваля́ем тя́:

Ра́дуйся, о́трока пе́рвое ча́до Го́споду в земли́ Алта́йстей яви́вый; ра́дуйся, и́менем Иоа́нн, си́речь благода́ть Бо́жия, при святе́м Креще́нии его́ нареки́й.

Ра́дуйся, я́ко лю́таго поноси́теля с кро́тостию прия́л еси́; ра́дуйся, я́ко о проще́нии того́ Го́спода умоли́л еси́.

Ра́дуйся, поноси́телю своему́ при одре́ служи́вый; ра́дуйся, незло́бием ко́зни диа́вольския разруши́вый.

Ра́дуйся, пра́ведным гне́вом возгоре́выйся на ху́ливших Го́спода Сла́вы; ра́дуйся, смире́нием свои́м покори́вый же́стоки нра́вы.

Ра́дуйся, преподо́бне Мака́рие, апо́столе Алта́йский.

Конда́к 8.

Стра́нное и пресла́вное чу́до ви́дится все́м, о́тче Мака́рие, я́ко земля́ Алта́йская во язы́честем суеве́рии погиба́ющая, обрати́ся твои́ми труды́ ко Све́ту И́стины. Ча́да же ея́, не́когда не ве́девшии всея́ тва́ри Творца́, ны́не усе́рдно вопию́т ему́: Аллилу́иа.

И́кос 8.

Все́ житие́ твое́, о́тче, яви́ся о́браз служе́ния Бо́гу и лю́дем, и́бо лове́ц челове́к соде́лался еси́, чрез хо́лми бо и ре́ки, тру́дности пути́ превозмога́я, ше́ствоваше к ча́ющим спаси́тельнаго сло́ва, моли́твою и бесе́дою те́х утеша́я и на пу́ть спасе́ния наставля́я. Мы́ же прино́сим ти́ похвалы́ сия́:

Ра́дуйся, сия́нием любве́ твоея́ ко Христу́ тьму́ безбо́жия победи́вый; ра́дуйся, и́стинно ве́ровати мно́гия научи́вый.

Ра́дуйся, ду́ши мно́зи из руки́ велиа́ра исхи́тивый; ра́дуйся, моли́твою ко Го́споду вся́ ко́зни того́ низложи́вый.

Ра́дуйся, свети́льниче, под спу́дом не сокрыва́емый; ра́дуйся, гра́де, верху́ горы́ устроя́емый.

Ра́дуйся, неусы́пный моли́твенниче земли́ Алта́йския; ра́дуйся, жи́телю селе́ний ра́йских.

Ра́дуйся, преподо́бне Мака́рие, апо́столе Алта́йский.

Конда́к 9.

Вся́к притека́яй к тебе́, о́тче Мака́рие, сло́вом любве́ и наставле́нием в ве́ре встре́чен бы́сть, мно́зи же утеше́ние ве́лие получи́ша и духо́внаго наста́вника в тебе́ обрето́ша. Ты́ же, о́тче, мно́го воздыха́л еси́ о наро́де, младе́нствовавшем во Христе́, непреста́нно воспева́я Бо́гу: Аллилу́иа.

И́кос 9.

Вети́йство челове́ческое не довле́ет к досто́йному прославле́нию твои́х трудо́в, преподо́бне Мака́рие, оба́че приими́ тебе́ приноси́мыя пе́ния на́ша. Ско́рби у́бо и по́двиги твоя́, приснопа́мятне, ублажа́юще, с ве́рою и любо́вию вопие́м ти́ си́це:

Ра́дуйся, мно́ги язы́ки ко Христу́ приведы́й; ра́дуйся, ча́да духо́вныя во мно́жестве обреты́й.

Ра́дуйся, но́вых ча́д Бо́жиих ре́вностный учи́телю; ра́дуйся, си́рых и убо́гих при́сный попечи́телю.

Ра́дуйся, на́шего спасе́ния ве́рный помо́щниче; ра́дуйся, о лю́бящих Го́спода кре́пкий моли́твенниче.

Ра́дуйся, у Престо́ла Го́спода Вседержи́теля ча́д свои́х при́сно помина́яй; ра́дуйся, Бо́гом увенча́нный, в моли́твах свои́х на́с не оставля́яй.

Ра́дуйся, преподо́бне Мака́рие, апо́столе Алта́йский.

Конда́к 10.

Спасти́ хотя́ мно́ги слове́сныя о́вцы от волко́в, губя́щих я́, непреста́нно пропове́дал еси́ и́стину новопросвеще́нным язы́ком, о́тче Мака́рие, сострада́ние и любо́вь оте́ческую к те́м явля́я и спасе́ния ду́ш ча́дом свои́м жела́я, и труды́ мно́ги полага́л еси́, во е́же Алта́ю воспе́ти Го́сподеви: Аллилу́иа.

И́кос 10

Стена́ неруши́мая бы́сть ве́ра твоя́, о́тче Мака́рие, и служе́ние твое́ Го́сподеви — ми́ро пред Ни́м благово́нное. И егда́ ты́, преподо́бне, отъезжа́ше от преде́л Алта́йских, мно́зи лю́дие собра́шася со слеза́ми, егда́ па́ства, тобо́ю ко Го́споду приведе́нная, провожда́ тя́, о́тче, в да́льний пу́ть, стена́ние и пла́ч стоя́ста над гора́ми. Мы́ же, ви́дяще такову́ю любо́вь к тебе́ ча́д твои́х, вопие́м сицева́я:

Ра́дуйся, кра́я го́рняго просвети́телю; ра́дуйся, неусы́пный та́ин духо́вных строи́телю.

Ра́дуйся, па́ствы твоея́ при́сный люби́миче; ра́дуйся, неуста́нный о на́с ко Го́споду моли́твенниче.

Ра́дуйся, я́ко не́нависть се́рдца твоего́ николи́же косну́ся; ра́дуйся, я́ко уста́ твоя́ осужде́ния отверго́шася.

Ра́дуйся, непреста́нно труды́ своя́ во сла́ву Бо́жию полага́вый; ра́дуйся, труды́ те́ми язы́ки све́том И́стины просвети́вый.

Ра́дуйся, преподо́бне Мака́рие, апо́столе Алта́йский.

Конда́к 11.

Пе́нию а́нгельскому уподо́бися, преподо́бне Мака́рие, служе́ние, тобо́ю Го́сподеви приноси́мое, моли́твою бо твое́ю мно́зи чудеса́ соде́яшася, язы́цы, благода́тию Свята́го Ду́ха, на тебе́ почива́ющей, прихожда́ху ко обще́нию со Христо́м и вопия́ху Тому́: Аллилу́иа.

И́кос 11.

Све́т Христо́в просвеща́ет все́х, си́це ты́ возгласи́л еси́, о́тче преподо́бне, егда́ душа́ твоя́ от те́ла разлуча́шеся, и та́ко показа́л еси́ всея́ жи́зни твоея́ вене́ц. Те́ло же твое́, по веле́нию архиере́я три́жды о́крест престо́ла обнесе́нное, в кри́пте сокры́то бы́сть и нетле́ния сподо́бися; душа́ же твоя́ в селе́ниих го́рних всели́ся, сла́вою Бо́жиею осиява́ема. Мы́ же, ви́девше такову́ю твою́ ми́рную кончи́ну о Го́споде, вопие́м си́це:

Ра́дуйся, в Боже́ственных черто́зех водвори́выйся; ра́дуйся, нетле́нными твои́ми мощьми́ во Алта́й па́ки возврати́выйся.

Ра́дуйся, Бо́га лицезре́ния наслажда́яйся; ра́дуйся, у Престо́ла Го́спода Сла́вы непреста́нно о земле́ Алта́йской моля́йся.

Ра́дуйся, я́ко мно́гим язы́ком Све́т Христо́в яви́л еси́; ра́дуйся, я́ко от Го́спода в земли́ Алта́йстей просла́влен еси́.

Ра́дуйся, с преподо́бными ублажа́емый; ра́дуйся, со апо́столы прославля́емый.

Ра́дуйся, преподо́бне Мака́рие, апо́столе Алта́йский.

Конда́к 12.

Благода́тию, да́нною ти́ свы́ше, преподо́бне о́тче Мака́рие, ми́ссию в гора́х Алта́йских основа́л и обустро́ил еси́. По зо́ву же твоему́ мно́зи па́стыри притеко́ша в ню́, служе́нием свои́м укрепля́юще ве́ру и́стинную, и со мно́гими новообраще́нными вопия́ша Бо́гу: Аллилу́иа.

И́кос 12.

Пою́ще служе́ние твое́, ублажа́ем тя́, преподо́бне о́тче Мака́рие! Бу́ди на́м непреста́нный моли́твенник и защи́тник от стре́л лука́ваго, укрепля́я и наставля́я на́с ко пропове́данию Сло́ва Бо́жия среди́ язы́чник и безбо́жных. Оба́че приими́ похвалы́, тебе́, о́тче, приноси́мыя, и услы́ши ны́, во умиле́нии вопию́щия ти́ сицева́я:

Ра́дуйся, ско́рый моля́щихся услы́шателю; ра́дуйся, та́ин Бо́жиих созерца́телю.

Ра́дуйся, пропове́дником ве́ры и́стинныя помо́щниче; ра́дуйся, прише́дших ко Христу́ от злы́х пресле́дований защи́тниче.

Ра́дуйся, я́ко А́нгели о твои́х по́двизех ра́дуются; ра́дуйся, я́ко мно́зи челове́цы по твоему́ приме́ру и предста́тельству спаса́ются.

Ра́дуйся, насле́дниче Ца́рства Христо́ва, по́двигом свои́м Алта́й украси́вый; ра́дуйся, я́ко пу́ть, веду́щий к Бо́гу, мно́гим освети́вый.

Ра́дуйся, преподо́бне Мака́рие, апо́столе Алта́йский.

Конда́к 13.

О пречу́дный пропове́дниче и пресла́вный уго́дниче Бо́жий, земли́ Алта́йския моли́твенниче, преподо́бне о́тче на́ш Мака́рие, приими́ от на́с ма́лое моле́ние, тебе́ ны́не приноси́мое! Го́споду ты́ угоди́л еси́ на земли́, с Ни́м же и пребыва́еши на Небесе́х. Непреста́нно моли́ся о на́с, да и мы́ сподо́бимся в селе́ниих го́рних вопи́ти Ему́: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгелов Творе́ц и всея́ тва́ри Созда́тель напра́ви стопы́ твоя́, преподо́бне о́тче, к наро́ду, седя́щему во тьме́ неве́дения и и́щущему Со́лнца Пра́вды. Ты́ же, благове́стническаго служе́ния жела́я, мно́ги нау́ки с моли́твою к Бо́гу изучи́л еси́, и тала́нт, да́нный ти́ Го́сподем, в земли́ не сокры́л еси́, ра́зум сво́й на по́льзу Ма́тери Це́ркви явля́я, пе́рвый среди́ учени́к яви́лся еси́. Па́че же ины́х в моли́тве и служе́нии Го́споду преуспе́л еси́, о́тче, те́мже и мы́ с ра́достию зове́м ти́ сицева́я:

Ра́дуйся, от ю́ности Го́спода возлюби́вый; ра́дуйся, сла́дость моли́тв к Нему́ вкуси́вый.

Ра́дуйся, страны́ Алта́йския пе́рвый свяще́нниче; ра́дуйся, и ны́не о не́й ко Го́споду моли́твенниче.

Ра́дуйся, я́ко тобо́ю све́т ве́ры язы́ком яви́ся; ра́дуйся, я́ко тобо́ю алта́йский наро́д просвети́ся.

Ра́дуйся, вся́ бла́га ми́ра сего́ нивочто́же вмени́вый; ра́дуйся, свети́льниче, с верши́ны горы́ ча́да своя́ освети́вый.

Ра́дуйся, преподо́бне Мака́рие, апо́столе Алта́йский.

Конда́к 1.

Избра́нный из родо́в Росси́йских на служе́ние в гора́х Алта́я и просвеще́ние люде́й, живу́щих во тьме́ язы́чества, о́тче Мака́рие! Просла́вльшаго тя́ Го́спода велича́юще, тебе́ похва́льная пе́ния воспева́ем. Служе́нием свои́м язы́ки просвети́вый и све́т Богове́дения те́м яви́вый, от ско́рбных обстоя́ний и вся́ких бе́д изба́ви на́с, тебе́ зову́щих:

Ра́дуйся, преподо́бне Мака́рие, апо́столе Алта́йский.

Моли́тва.

О свяще́нная главо́, преподо́бне о́тче, преблаже́нне а́вво Мака́рие, земли́ Алта́йския похвало́ и гра́ду Барнау́лу украше́ние, помина́й на́с всегда́ во святы́х твои́х и благоприя́тных моли́твах к Бо́гу: помяни́ ста́до твое́, е́же са́м упа́сл еси́, и не забу́ди убо́гих твои́х до конца́. Моли́ за ны́, о́тче свяще́нный, за де́ти твоя́ духо́вныя, Христо́м просвеще́нныя, я́ко име́яй дерзнове́ние к Небе́сному Царю́; не премолчи́ за ны́ ко Го́споду, и не пре́зри лю́ди алта́йския и все́х, ве́рою и любо́вию чту́щих тя́; помина́й на́с недосто́йных у Престо́ла Вседержи́телева, и не преста́й моля́ся о на́с ко Христу́ Бо́гу, и́бо дана́ тебе́ бы́сть благода́ть моли́тися за ны́. Не мни́м бо тя́ су́ща ме́ртва: а́ще бо те́лом и преста́вился еси́ от на́с, но и по сме́рти жи́в сы́й пребыва́еши, не отступа́й от на́с ду́хом, сохраня́я на́с от стре́л вра́жиих и вся́кия пре́лести бесо́вския и ко́зней диа́вольских, па́стырю на́ш до́брый. А́ще бо и моще́й твои́х ра́ка пред очи́ма на́шима ви́дима е́сть всегда́, но свята́я твоя́ душа́ со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся. Ве́дуще у́бо тя́ вои́стину и по сме́рти жи́ва су́ща, тебе́ припа́даем и тебе́ мо́лимся: те́плый на́ш моли́твенниче и земли́ Алта́йския свети́льниче, осени́ Го́рним благослове́нием на́с рабо́в Бо́жиих [и́мя ре́к], в ско́рбех су́щих, и пода́ждь утеше́ние и избавле́ние от боле́зней душе́вных и теле́сных; испроси́ на́м свы́ше ве́ру де́йственную, ду́х кро́тости, целому́дрия, смиренному́дрия, терпе́ния и любве́, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных, ве́чныя му́ки изба́вимся, и Небе́снаго Ца́рствия насле́дницы бу́дем со все́ми пра́ведными, от ве́ка угоди́вшими Го́споду на́шему Иису́су Христу́, Ему́же подоба́ет вся́кая сла́ва, че́сть и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.