Конда́к 1.

Возбра́нный чудотво́рче, и изря́дный уго́дниче Христо́в, многоцеле́бный исто́чниче и моли́твенниче о душа́х на́ших, преподо́бне о́тче Мака́рие, я́ко име́яй дерзнове́ние ко Го́споду, моли́твами твои́ми от вся́ких на́с бе́д свободи́, да зове́м ти́:

Ра́дуйся, Мака́рие, ско́рый помо́щниче и пресла́вный чудотво́рче.

И́кос 1.

А́нгела тя́ земна́го и челове́ка Небе́снаго, преподо́бне о́тче Мака́рие, ки́ими пе́нии и пе́сньми восхва́лим, ки́ими венцы́ увязе́м трудолюби́вую главу́ твою́, и ки́ими словесы́ возвели́чим многоболе́зненныя по́двиги твоя́; те́мже благогове́йно притека́юще к ра́це многоцеле́бных моще́й твои́х, усе́рдно припа́дающе, со умиле́нием взыва́ем ти́:

Ра́дуйся, ре́вностный Христо́в подража́телю; ра́дуйся, за́поведей его́ и́стинный блюсти́телю.

Ра́дуйся, а́нгелов собесе́дниче; ра́дуйся, преподо́бных похвала́.

Ра́дуйся, ве́рных слуго́ Госпо́день; ра́дуйся, усе́рдный чистоты́ и воздержа́ния храни́телю.

Ра́дуйся, сто́лпе терпе́ния; ра́дуйся, о́бразе незло́бия и кро́тости.

Ра́дуйся, смиренному́дрия наста́вниче; ра́дуйся, свети́льниче многосве́тлый.

Ра́дуйся, непосты́дное христиа́н прибе́жище; ра́дуйся, безме́здный врачу́ немощству́ющих.

Ра́дуйся, Мака́рие, ско́рый помо́щниче и пресла́вный чудотво́рче.

Конда́к 2.

Ви́дяще благоро́днии твои́ роди́телие во мла́дости тя́, богому́дре, соверше́нная му́дрствующа, Го́споду, дарова́вшему ти́ такова́я, воспева́ху благода́рственную пе́снь: Аллилу́иа.

И́кос 2.

Ра́зум неукло́нный име́л еси́, преподо́бне Мака́рие, а́ще и ю́н бы́в те́лом, но ста́р сы́й умо́м: вся́ бо ми́ра сего́ кра́сная от ю́ности твоея́ пренебре́г, де́тская игра́лища презре́л еси́, псалмы́ же и пе́сни духо́вныя Бо́гу Спаси́телю се́рдцем и усты́ непреста́нно воспева́л еси́, научи́ и на́с та́яжде му́дрствовати и де́яти, вопию́щих ти́:

Ра́дуйся, христиа́нския му́дрости и́стинное зерца́ло; ра́дуйся, я́ко боже́ственному жела́нию у́м тво́й от ю́ности впери́л еси́.

Ра́дуйся, я́ко во мла́дости твое́й вре́менная и земна́я уме́ты бы́ти вмени́л еси́; ра́дуйся, я́ко еди́ная небе́сная от сосцу́ ма́тере твоея́ возлюби́л еси́.

Ра́дуйся, я́ко от ю́ности яре́м Госпо́день на ра́мена своя́ возложи́л еси́; ра́дуйся, я́ко пло́ть порабо́тил еси́ ду́ху.

Ра́дуйся, я́ко проти́ву ко́знем диа́вольским, еще́ ю́н сы́й, ста́ти не устраши́лся еси́; ра́дуйся, я́ко от младе́нчества чте́ния Боже́ственных Писа́ний все́м се́рдцем возлюби́л еси́.

Ра́дуйся, я́ко де́нь и но́щь в чте́нии и пе́нии богодухнове́нных псалмо́в пребыва́л еси́; ра́дуйся, я́ко неплене́нный страстьми́ у́м тво́й сло́вом Бо́жиим просвети́л еси́.

Ра́дуйся, я́ко Христа́ еще́ в неви́нней души́ твое́й всели́л еси́; ра́дуйся, я́ко непоро́чным се́рдцем возжеле́л мирска́го мяте́жа уклони́тися, и в пусты́ню всели́тися.

Ра́дуйся, Мака́рие, ско́рый помо́щниче и пресла́вный чудотво́рче.

Конда́к 3.

Си́лою Ду́ха Свята́го свы́ше облече́н бы́в, и ю́ности твое́й безси́льна врага́ сотвори́л еси́: укрепи́, Богоблаже́нне Мака́рие, моли́твами твои́ми и на́с, во все́х благи́х изнемога́ющих, да сподо́бимся с тобо́ю воспева́ти вы́ну пе́снь Бо́гу: Аллилу́иа.

И́кос 3.

Име́я бога́тство чистоты́ душе́вныя, и высоту́ смире́ния, роди́тельское бога́тство и рабо́в послуже́ние ни во что́ же вмени́л еси́, и по разреше́нии плотска́го соу́за, и́мже на ма́лое вре́мя свя́зан бы́л еси́, я́ко еле́нь жа́ждущий на исто́чники водны́я, устреми́лся еси́, всеблаже́нне, в пусты́ню: в не́йже твое́ высокоро́дство на смиренному́дрие, бога́тство на убо́жество премени́л еси́, совлеки́йся оде́жды многосве́тлыя и облеки́йся в ру́бище. Те́мже удивля́ющеся таково́му твоему́ смиренному́дрию, си́це ублажа́ем тя́, вопию́ще:

Ра́дуйся, вся́ку го́рдость ми́ра презре́вый; ра́дуйся, я́ко оста́вив вре́менная, взыска́л еси́ ве́чная.

Ра́дуйся, я́ко до́м велеле́пный и черто́ги укра́шены возненави́дел еси́; ра́дуйся, я́ко возлюби́л еси́ убо́гую хи́жину па́че черто́гов преизя́щных.

Ра́дуйся, я́ко ру́бищи украси́лся еси́ па́че оде́жды златотка́нныя; ра́дуйся, я́ко вме́сто бра́шен сластопита́тельных, возлюби́л еси́ изнуря́ти пло́ть твою́ посто́м и мно́гим воздержа́нием.

Ра́дуйся, я́ко не пожела́л еси́ от рабо́в послуже́ния, но па́че са́м послужи́ти все́м изво́лил еси́; ра́дуйся, я́ко возлюби́л еси́ па́че одра́ мя́гкаго на земли́ поверже́ние.

Ра́дуйся, я́ко ве́рою пра́вою, а́ки щито́м, защити́лся еси́ от все́х искуше́ний вра́жиих; ра́дуйся, я́ко неистощи́мым терпе́нием твои́м, па́че копия́ остре́йшим, врага́ на́шего спасе́ния смерте́льно уязви́л еси́.

Ра́дуйся, я́ко неусы́пными твои́ми моли́твами, запина́теля на пути́ благоче́стия безси́льна сотвори́л еси́; ра́дуйся, я́ко сто́лпе и утвержде́ние доброде́тели на́м яви́лся еси́.

Ра́дуйся, Мака́рие, ско́рый помо́щниче и пресла́вный чудотво́рче.

Конда́к 4.

Бу́рю сумни́тельных помышле́ний укроща́я и прелага́я в тишину́ Боже́ственными уче́нии, и́миже уверя́я себе́, я́же о Ца́рствии Небе́снем, преблаже́нне Мака́рие, непреста́нно воспева́л еси́ пе́снь Бо́гу: Аллилу́иа.

И́кос 4.

Слы́шав преподо́бне Мака́рие в Ева́нгелии гла́с Спаси́теля взыва́ющ: и́же хо́щет по Мне́ ити́, отве́ржется себе́, и во́змет кре́ст сво́й, и по Мне́ гряде́т, отве́рглся еси́ себе́, и взе́м на ра́ма кре́ст тво́й, ходи́л еси́ по стопа́м Христо́вым невозвра́тно. Те́мже мы́, недосто́йнии, воспису́ем ти́ такова́я, глаго́люще:

Ра́дуйся, ева́нгельских веле́ний ве́рный блюсти́телю; ра́дуйся, Христо́вых слове́с тве́рдый храни́телю.

Ра́дуйся, креста́ своего́ усе́рдный носи́телю; ра́дуйся, и́го Христо́во и бре́мя Его́ благоду́шно подъе́мый.

Ра́дуйся, я́ко не обрати́выйся вспя́ть в ше́ствии к Го́рнему Иерусали́му; ра́дуйся, неизсяка́емый сосу́де благода́ти Христо́вы.

Ра́дуйся, чи́стое прия́телище Ду́ха Свята́го; ра́дуйся, я́ко вся́ стра́сти плотски́я воздержа́нием мно́гим умертви́л еси́.

Ра́дуйся, вертогра́да Христо́ва всеусе́рдный насади́телю; ра́дуйся, я́ко у́м тво́й к безстра́стию возвы́сил еси́.

Ра́дуйся, вся́ блага́я земли́, Небе́снаго ра́ди Ца́рствия, за уме́ты вмени́вый; ра́дуйся, равноа́нгельное житие́ до конца́ возлюби́вый.

Ра́дуйся, Мака́рие, ско́рый помо́щниче и пресла́вный чудотво́рче.

Конда́к 5.

Бо́гом направля́емь, всеблаже́нне о́тче, безмо́лвное в пусты́ни житие́ обре́л еси́, и псало́мски воспе́л еси́: се́ поко́й мо́й в ве́к ве́ка, зде́ вселю́ся: в не́йже и подвиза́лся еси́ до́бльственно в посте́ и бде́нии, и от о́чию мно́ги сле́зы излива́я, непреста́нно воспева́л еси́ Бо́гу: Аллилу́иа.

И́кос 5.

Ви́дев су́етных име́ний рачи́тель неукло́нное твое́ в пусты́ни пребыва́ние, диа́вольским науще́нием возжига́емь, восхоте́ умертви́ти тя́: но ра́ди пости́гшия его́ сме́ртныя боле́зни прише́л в чу́вство, паде́ пред нога́ма твои́ма, прося́ у тебе́ проще́ния и в пусты́ни с тобо́ю пребыва́ния. Ты́ же я́ко па́стырь до́брый и незло́бивый, прия́л еси́ его́ с ра́достию, я́ко овча́ поги́бшее, проща́я ему́ вся́ и причита́я его́ к избра́нному твоему́ ста́ду. Таково́е у́бо твое́ незло́бие, и о спасе́нии заблу́ждших мно́гое попече́ние слы́шавше, по до́лгу воспева́ем ти́ си́це:

Ра́дуйся, незло́бия при́сный храни́телю; ра́дуйся, смиренному́дрия и́скренний люби́телю.

Ра́дуйся, о́бразе кро́тости и терпе́ния; ра́дуйся, наста́вниче целому́дрия.

Ра́дуйся, светоно́сный сто́лпе, просвеща́яй су́щия во тьме́; ра́дуйся, оби́тели и́ноков вели́кое украше́ние.

Ра́дуйся, я́ко широ́кий пу́ть, веду́щий в па́губу, ненави́дети поуча́л еси́; ра́дуйся, я́ко те́сною и приско́рбною стезе́ю ше́ствовати благоиску́сно внуша́л еси́.

Ра́дуйся, дре́во благопло́дное, при исхо́дищах во́д Боже́ственныя благода́ти насажде́нное, и мно́ги пита́ющее; ра́дуйся, дре́во благосенноли́ственное, мно́ги от зно́я прохлажда́ющее.

Ра́дуйся, избра́ннаго твоего́ ста́да стра́жу неусы́пный; ра́дуйся, благохо́тных подража́телей твои́х житие́м и уче́нием на Не́бо руководи́телю и сопу́тствователю.

Ра́дуйся, Мака́рие, ско́рый помо́щниче и пресла́вный чудотво́рче.

Конда́к 6.

Пропове́дницы бы́ша твоего́ незло́бия и прозорли́вости та́тие, егда́ похи́щенная и́ми живо́тная к тебе́ возврати́ша, и вме́сто наказа́ния прия́ша от тебе́ оте́ческое наставле́ние, ви́девше же тако́е твое́ незло́бие, со мно́гим удивле́нием отше́дше, воспе́ша пе́снь Бо́гу: Аллилу́иа.

И́кос 6.

Возсия́л еси́ в пусты́ни, я́ко заря́ пресве́тлая, преподо́бне о́тче, просвеща́я и наставля́я на пу́ть спасе́ния вся́ к тебе́ притека́ющия, сего́ ра́ди со мно́гим удивле́нием взыва́ем ти́ си́це:

Ра́дуйся, заре́ пресве́тлая, от пусты́ни восходя́щая и ду́ши ве́рных озаря́ющая; ра́дуйся, заблу́ждших и́стинный наста́вниче.

Ра́дуйся, целому́дрия зерца́ло; ра́дуйся, и́стинный о́бразе благоче́стия.

Ра́дуйся, алтаря́ Госпо́дня благогове́йный служи́телю; ра́дуйся, и́ноческаго равноа́нгельнаго жития́ ревни́телю.

Ра́дуйся, безмо́лвия дре́вних Богоно́сных оте́ц подража́телю; ра́дуйся, сто́лпе о́гненный, наставля́яй на пу́ть спасе́ния.

Ра́дуйся, со́лнце светоза́рное, я́ко свои́ми луча́ми ду́ши на́ша, от мра́за грехо́внаго погиба́ющыя, согрева́еши; ра́дуйся, луна́ пресве́тлая, я́ко но́щь на́шего неразу́мия прогоня́еши.

Ра́дуйся, Боже́ственнаго о лю́дях промышле́ния всеусе́рдный служе́бниче; ра́дуйся, ве́чныя на́шея ра́дости те́плый хода́таю.

Ра́дуйся, Мака́рие, ско́рый помо́щниче и пресла́вный чудотво́рче.

Конда́к 7.

Хотя́ разсла́бленный Заха́рия соверше́нное получи́ти себе́ здра́вие, моли́ принести́ себе́ и положи́ти пред нога́ма твои́ма, преподо́бне о́тче, да твои́ми моли́твами полу́чит исцеле́ние. Ты́ же я́ко вра́ч прему́дрый, уврачева́л неду́ги его́ теле́сныя вку́пе же и душе́вныя, воспе́л еси́ Го́споду благода́рственную пе́снь: Аллилу́иа.

И́кос 7.

Ди́вное име́л еси́ житие́, и ди́вныя чудеса́ сотвори́л еси́ на земли́, преподо́бне о́тче Мака́рие, егда́ узре́в еди́наго ю́ношу, мно́гое вре́мя бе́сом му́чима, умили́вся прослези́лся еси́, и воздохну́в сотвори́л еси́ моли́тву к Бо́гу: а́бие же изы́де бе́с из стра́ждущаго, и бы́сть здра́в. Мы́ же такова́я слы́шавше, с ра́достию взыва́ем ти́ си́це:

Ра́дуйся, лука́вых духо́в кре́пкий победи́телю; ра́дуйся, душепа́губных волко́в прогони́телю.

Ра́дуйся, во́ине Христо́в непобеди́мый; ра́дуйся, ра́бе Бо́жий, благи́й и ве́рный.

Ра́дуйся, врачу́ ско́рый с ве́рою тебе́ призыва́ющих; ра́дуйся, лозо́ благоплодови́тая.

Ра́дуйся, я́ко твои́м посо́бием сокруша́ются ко́зни вра́жия; ра́дуйся, совои́телю прему́дрый, ра́тующим проти́ву си́л а́довых.

Ра́дуйся, неоску́дный пото́к чудесе́м; ра́дуйся, оби́льный благода́тию исто́чниче исцеле́ний.

Ра́дуйся, трисо́лнечнаго све́та пресве́тлая луче́; ра́дуйся, челове́че Бо́жий, преподо́бием и и́стиною, а́ки по́ясом златы́м, препоя́санный.

Ра́дуйся, Мака́рие, ско́рый помо́щниче и пресла́вный чудотво́рче.

Конда́к 8.

Ди́вное и неизрече́нное чу́до благода́ти Небе́сныя, явля́ется ны́не во о́чию все́х ве́рных: долготерпели́вый бо и многоми́лостивый Госпо́дь не прогне́вался на ны́ до конца́ за беззако́ния на́ша, но, помяну́в щедро́ты Своя́, дарова́ на́м тебе́, досточу́дне о́тче, засту́пника изря́дна, и та́ко вознесе́ ро́г спасе́ния на́шего, да вы́ну пое́м ему́: Аллилу́иа.

И́кос 8.

Ве́сь еси́ в вы́шних, но и ни́жних не оставля́еши, преподо́бне о́тче Мака́рие, при́сно со Христо́м ца́рствуеши, и о на́с, гре́шных, моли́твы к Нему́ возно́сиши: не то́чию бо припа́дающих к цельбоно́сным моще́м твои́м, но и дале́че отстоя́щих, призыва́ющих же всечестно́е и́мя твое́, предста́тельством твои́м соблюда́еши от вся́каго зла́. Те́мже во умиле́нии зове́м ти́:

Ра́дуйся, прибе́жище на́ше во все́х ско́рбех; ра́дуйся, ско́рый помо́щниче все́х в беда́х су́щих.

Ра́дуйся, цели́телю боле́зней душе́вных вку́пе и теле́сных; ра́дуйся, на неви́димыя враги́ на́ша си́льный побо́рниче.

Ра́дуйся, посети́телю благосе́рдый в не́мощи лежа́щих; ра́дуйся, уте́шителю в печа́ли су́щих.

Ра́дуйся, я́ко тобо́ю престае́т рыда́ние; ра́дуйся, я́ко тобо́ю подае́тся ра́дование.

Ра́дуйся, я́ко Христу́ до́бльственно после́довал еси́; ра́дуйся, я́ко Сладча́йшему Иису́су до конца́ послужи́л еси́.

Ра́дуйся, я́ко наслажда́ешися лицезре́ния Бо́жия; ра́дуйся, я́ко сподо́бился еси́ зре́ти невече́рний де́нь Ца́рствия Его́.

Ра́дуйся, Мака́рие, ско́рый помо́щниче и пресла́вный чудотво́рче.

Конда́к 9.

Вся́кия ско́рби претерпе́л еси́, и мно́ги труды́ и по́двиги до́бльственно соверши́л еси́, ше́ствуя по пути́ спасе́ния до масти́тыя ста́рости, облече́н во всеору́жие Бо́жие, во пло́ти а́ки безпло́тен, умерщвля́я стра́сти и сокруша́я наве́ты миродержи́теля тьмы́ ве́ка сего́, те́мже к Небе́сным сопричи́слен си́лам, ку́пно с ни́ми воспева́еши Бо́гу: Аллилу́иа.

И́кос 9.

Вети́я многовеща́нныя недоуме́ют досто́йно восхвали́ти тя́, богому́дре Мака́рие: кто́ бо дово́лен разуме́ти вся́ боре́ния твоя́ с миродержи́тели тьмы́ ве́ка сего́; или́ кто́ изочте́т труды́, боле́зни и по́двиги твоя́, в ни́х же пустыннолю́бное житие́ соверша́л еси́; оба́че мы́, любо́вию твое́ю побежда́еми, благода́рно тебе́ зове́м:

Ра́дуйся, зако́на Бо́жия исполни́телю всеусе́рдный; ра́дуйся, чистото́ю и целому́дрием, многоце́ннаго би́сера честне́йший.

Ра́дуйся, в терпе́нии и боре́нии проти́ву пло́ти, адама́нта тверде́йший; ра́дуйся, смиренному́дрием и кро́тостию па́че сла́вных земли́ просла́вленный.

Ра́дуйся, во пло́ти а́ки безпло́тен на земли́ пожи́вый; ра́дуйся, живы́ми и спаси́тельными слеза́ми о́гнь по́хоти угаси́вый.

Ра́дуйся, борю́щимся со страстьми́ и похотьми́ помо́щниче благоуспе́шный; ра́дуйся, в труде́х, бде́нии и воздержа́нии вели́ким по́стником подража́телю ре́вностнейший.

Ра́дуйся, в духо́вней му́дрости наста́вниче благоиску́снейший; ра́дуйся, подвиго́в и́ноческих показа́телю рачи́тельнейший.

Ра́дуйся, пустынножи́телей красота́; ра́дуйся, го́рлице пустынолю́бная и доброви́дная.

Ра́дуйся, Мака́рие, ско́рый помо́щниче и пресла́вный чудотво́рче.

Конда́к 10.

Храня́й вся́ ко́сти пра́ведных, я́ко ни еди́ней от ни́х сокруши́тися, Госпо́дь и Бо́г на́ш Иису́с Христо́с яви́л на́м твое́ те́ло нетле́нное на земли́, преподо́бне о́тче, я́ко живоно́сную купе́ль, врачу́ющую вся́ку боле́знь и вся́ку я́зю в лю́дех. Те́мже прия́вше такова́го целе́бника и моли́твенника, благода́рственно вопие́м ему́: Аллилу́иа.

И́кос 10.

Сте́ну тя́ тве́рду и моли́твенника изря́дна стяжа́в свята́я оби́тель твоя́, и вси́ страны́ Росси́йстии хва́лятся заступле́нием твои́м. Те́мже и мы́ гре́шнии, я́ко ча́да отца́ мо́лим: заступи́ и сохрани́ на́с от искуше́ний и скорбе́й, бе́д и напа́стей моли́твами твои́ми, да взыва́ем ти́ ра́достно:

Ра́дуйся, благово́нный кри́не ра́йскаго вертогра́да; ра́дуйся, кипари́се, ве́рных сердца́ благово́нием исполня́яй.

Ра́дуйся, немощны́х целе́бниче; ра́дуйся, же́зле, па́дающих подкрепля́яй.

Ра́дуйся, наде́жде и оти́шие в мо́ри жития́ сего́ пла́вающих; ра́дуйся, тве́рдое огражде́ние и прибе́жище усе́рдно Бо́гу рабо́тающих.

Ра́дуйся, все́х усе́рдно притека́ющих к тебе́, от искуше́ний и бе́д ско́рое избавле́ние; ра́дуйся, все́х обурева́емых покро́ве тве́рдый.

Ра́дуйся, я́ко от оби́тели земны́я в оби́тель Небе́сную пресели́лся еси́; ра́дуйся, я́ко от оби́тели Небе́сныя в оби́тели земны́я благотворя́ нисхо́диши.

Ра́дуйся, я́ко и по отше́ствии твое́м с на́ми пребыва́еши; ра́дуйся, я́ко и по преставле́нии твое́м, умерщвле́нныя грехми́ ду́ши на́ша моли́твами твои́ми воскреша́еши.

Ра́дуйся, Мака́рие, ско́рый помо́щниче и пресла́вный чудотво́рче.

Конда́к 11.

Пе́ния и пе́сни духо́вныя Тро́ице Единосу́щней, се́рдцем и усты́ на земли́ вы́ну приноси́л еси́, блаже́нне Мака́рие: те́мже и ны́не на Небесе́х, с а́нгельскими чи́нми Тро́ическому предстоя́ Престо́лу, непреста́нно воспева́еши Боже́ственную пе́снь: Аллилу́иа.

И́кос 11.

Светопода́тельнаго свети́льника, просвеща́ющаго ду́ши на́ша, ве́рою ви́дим тебе́, преблаже́нне о́тче, пред Престо́лом Бо́жиим стоя́ща, и твои́м блиста́нием озаря́еми, зове́м ти́ такова́я:

Ра́дуйся, о́блаче светоза́рный, просвеща́яй души́ на́ша; ра́дуйся, водо́ спаси́тельная, все́х напая́ющая.

Ра́дуйся, па́стырю преди́вный; ра́дуйся, учи́телю прему́дрый.

Ра́дуйся, чистоты́ селе́ние; ра́дуйся, печа́льных утеше́ние.

Ра́дуйся, си́рых пита́телю; ра́дуйся, оби́димых предста́телю.

Ра́дуйся, прему́дрости Бо́жия прия́телище; ра́дуйся, неисчерпа́емый исто́чниче благода́ти исцеле́ний.

Ра́дуйся, провозве́стниче Бо́жиих веле́ний; ра́дуйся, сокро́вище милосе́рдия Бо́жия неистощи́мое.

Ра́дуйся, Мака́рие, ско́рый помо́щниче и пресла́вный чудотво́рче.

Конда́к 12.

Благода́ть свы́ше ти́ да́нную позна́вше, благогове́йно лобыза́ем честны́я мо́щи твоя́, я́же Госпо́дь благоволи́л ди́вно яви́ти на́м. Те́мже благода́рственно вопие́м Христу́ Бо́гу на́шему: Аллилу́иа.

И́кос 12.

Пою́ще твое́ к Бо́гу отше́ствие, преподо́бне Мака́рие, почита́ем свяще́нную па́мять твою́, велича́ем твое́ смиренному́дрие, хва́лим твое́ долготерпе́ние, сла́вим незло́бие твое́, ублажа́ем по́двиги твоя́ и кончи́ну тече́ния твоего́, я́ко вене́ц пра́вды прия́л еси́ от Го́спода, Судии́ пра́веднаго. Те́мже моля́щеся усе́рдно, о е́же сподо́битися и на́м неосужде́нно предста́ти Стра́шному Суди́щу Христо́ву, взыва́ем ти́:

Ра́дуйся, у Престо́ла Бо́жия те́плый о на́с предста́телю; ра́дуйся, му́жу, просла́вивый Бо́га в души́ и в телеси́ твое́м.

Ра́дуйся, соверше́нный в доброде́телех челове́че; ра́дуйся, ди́вный подража́телю Отца́ на́шего Небе́снаго.

Ра́дуйся, устрои́телю оби́тели мона́шествующих; ра́дуйся, преблаги́й и до́брый наста́вниче и́ноков.

Ра́дуйся, все́х правосла́вных ско́рый помо́щниче и засту́пниче; ра́дуйся, Царя́ Небе́снаго изве́стный умилостиви́телю.

Ра́дуйся, мно́гажды заступле́нием твои́м проше́ния предваря́яй; ра́дуйся, Небе́сный граждани́не.

Ра́дуйся, я́ко с преподо́бными и пра́ведными весели́шися; ра́дуйся, я́ко со все́ми избра́нными Бо́жиими при́сно торжеству́еши.

Ра́дуйся, Мака́рие, ско́рый помо́щниче и пресла́вный чудотво́рче.

Конда́к 13.

О пресла́вный и преди́вный о́тче Мака́рие, приими́ благоутро́бно сие́ ма́лое моле́ние на́ше, и твои́м си́льным и благоприя́тным пред Бо́гом хода́тайством, изба́ви на́с от все́х вра́г ви́димых и неви́димых, от вся́кия напа́сти и ско́рби, от внеза́пныя сме́рти и бу́дущия му́ки, да сподо́бимся с тобо́ю и со все́ми святы́ми во ве́ки воспева́ти Бо́гу Спаси́телю на́шему благода́рную пе́снь: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгела тя́ земна́го и челове́ка Небе́снаго, преподо́бне о́тче Мака́рие, ки́ими пе́нии и пе́сньми восхва́лим, ки́ими венцы́ увязе́м трудолюби́вую главу́ твою́, и ки́ими словесы́ возвели́чим многоболе́зненныя по́двиги твоя́; те́мже благогове́йно притека́юще к ра́це многоцеле́бных моще́й твои́х, усе́рдно припа́дающе, со умиле́нием взыва́ем ти́:

Ра́дуйся, ре́вностный Христо́в подража́телю; ра́дуйся, за́поведей его́ и́стинный блюсти́телю.

Ра́дуйся, а́нгелов собесе́дниче; ра́дуйся, преподо́бных похвала́.

Ра́дуйся, ве́рных слуго́ Госпо́день; ра́дуйся, усе́рдный чистоты́ и воздержа́ния храни́телю.

Ра́дуйся, сто́лпе терпе́ния; ра́дуйся, о́бразе незло́бия и кро́тости.

Ра́дуйся, смиренному́дрия наста́вниче; ра́дуйся, свети́льниче многосве́тлый.

Ра́дуйся, непосты́дное христиа́н прибе́жище; ра́дуйся, безме́здный врачу́ немощству́ющих.

Ра́дуйся, Мака́рие, ско́рый помо́щниче и пресла́вный чудотво́рче.

Конда́к 1.

Возбра́нный чудотво́рче, и изря́дный уго́дниче Христо́в, многоцеле́бный исто́чниче и моли́твенниче о душа́х на́ших, преподо́бне о́тче Мака́рие, я́ко име́яй дерзнове́ние ко Го́споду, моли́твами твои́ми от вся́ких на́с бе́д свободи́, да зове́м ти́:

Ра́дуйся, Мака́рие, ско́рый помо́щниче и пресла́вный чудотво́рче.

Моли́тва.

О свяще́нная главо́, преподо́бне о́тче, преблаже́нне а́вво Мака́рие! Не забу́ди убо́гих свои́х до конца́, но помина́й на́с во святы́х свои́х и благоприя́тных моли́твах к Бо́гу. Помяни́ ста́до свое́, е́же са́м упа́сл еси́, и не забу́ди посеща́ти ча́д свои́х. Моли́ за ны́, о́тче свяще́нный, за де́ти своя́ духо́вныя, я́ко име́я дерзнове́ние к Небе́сному Царю́. Не премолчи́ за ны́ ко Го́споду, и не пре́зри на́с, ве́рою и любо́вию чту́щих тя́. Помина́й на́с, недосто́йных, у Престо́ла Вседержи́телева, и не преста́й моля́ся о на́с ко Христу́ Бо́гу: и́бо дана́ тебе́ бы́сть благода́ть за ны́ моли́тися. Не мни́м бо тя́ су́ща ме́ртва: а́ще бо и те́лом преста́вился еси́ от на́с, но и по сме́рти жи́в сы́й пребыва́еши. Не отступа́й от на́с ду́хом, сохраня́я на́с от стре́л вра́жиих, и вся́кия пре́лести бесо́вския, и ко́зней диа́вольских, па́стырю на́ш до́брый. А́ще бо и моще́й твои́х ра́ка пред очи́ма на́шима ви́дима е́сть всегда́, но свята́я твоя́ душа́ с а́нгельскими во́инствы, с безпло́тными ли́ки, с Небе́сными Си́лами у Престо́ла Вседержи́телева предстоя́щи, досто́йно весели́тся. Ве́дуще бо тя́ вои́стину и по сме́рти жи́ва су́ща, тебе́ припа́даем и тебе́ мо́лимся: е́же моли́тися о на́с Всеси́льному Бо́гу о по́льзе ду́ш на́ших и испроси́ти вре́мя на покая́ние, и о невозбра́нном преи́тии от земли́ на Не́бо, мыта́рств же го́рьких, бесо́в возду́шных князе́й и ве́чныя му́ки изба́витися, и Небе́сному Ца́рствию насле́дником бы́ти со все́ми пра́ведными, от ве́ка угоди́вшими Го́споду на́шему Иису́су Христу́: Ему́же подоба́ет вся́кая сла́ва, че́сть и поклоне́ние со Безнача́льным Его́ Отце́м, и Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.