Конда́к 1.

Избра́нному де́лателю смиренному́дрия и послуша́ния приле́жному наста́внику, богому́дрому ста́рцу О́птинскому, от души́ моле́ния те́плыя принесе́м. Ты́ же, о́тче, непослу́шных на́с послу́шай, я́ко послу́шающаго тебе́ Бо́га вы́ну в себе́ стяжа́вый, да вси́ зове́м ти́:

Ра́дуйся, о́тче Мака́рие, зерца́ло смиренному́дрия.

И́кос 1.

От пеле́н младе́нческих Бо́гом предъизбра́н бы́в в души́ твое́й красоту́ изобрази́ти высокотво́рнаго смире́ния, те́мже нра́вы благочести́выми обуче́н бы́в и ве́рою пра́вою утвержде́н, яви́лся еси́ роди́телем твои́м благочести́вое похвале́ние. Сего́ ра́ди зове́м ти́:

Ра́дуйся, Бо́гом избра́нный сосу́де; ра́дуйся, смире́ния и любве́ кре́пкий соу́зе.

Ра́дуйся, младе́нческий ра́зум отверги́й; ра́дуйся, зло́бою при́сно младе́нствуяй.

Ра́дуйся, разумли́вый зако́на Христо́ва свети́льниче; ра́дуйся, писа́ний оте́ческих при́сный люби́телю.

Ра́дуйся, я́ко мирско́е оста́вль мудрова́ние; ра́дуйся, я́ко к Боже́ственным прини́кнув писа́нием.

Ра́дуйся, о́тче Мака́рие, зерца́ло смиренному́дрия.

Конда́к 2.

Послуша́нию навы́к изде́тска о́тче преподо́бне, в мирски́х де́лех приле́жно обучи́л еси́ себе́. Те́мже в тщету́ вся́ вмени́л еси́ Христа́ ра́ди и во́ли Боже́ственныя послу́шати взыска́л еси́, поя́ Ему́: Аллилу́иа.

И́кос 2.

Ми́ра те́мное оста́вив мудрова́ние, неиму́щее Бо́га вну́трь себе́, к любому́дрию же мона́шескому напра́вил еси́ все́ твое́ тща́ние, е́же просвети́тися позна́нием о Христе́, сего́ ра́ди пое́м тебе́ си́це:

Ра́дуйся, му́дрость ми́ра сего́ пости́гнувый; ра́дуйся, я́ко тщету́ о́ныя уве́дел еси́.

Ра́дуйся, мусики́йския орга́ны возненави́девый; ра́дуйся, я́ко богодви́жная цевни́ца яви́лся еси́.

Ра́дуйся, я́ко му́дрый, купе́ц безце́ннаго би́сера взыска́л еси́; ра́дуйся, вся́ прода́вый и Христа́ приобре́л еси́.

Ра́дуйся, небе́снаго любому́дрия рачи́телю; ра́дуйся, мирска́го суему́дрия обличи́телю.

Ра́дуйся, о́тче Мака́рие, зерца́ло смиренному́дрия.

Конда́к 3.

Слы́шал еси́ о́тче, я́ко в О́птинстей пу́стыни свети́льник богосия́нный возже́ся на све́щнице церко́внем. Те́мже на крила́х любому́дрия к нему́ прилете́л еси́ и во све́те жития́ его́ узре́л еси́ Све́т непристу́пный, Бо́гу благода́рне возопи́в: Аллилу́иа.

И́кос 3.

Я́ко равносве́тлое со́лнце прия́т тя́ во объя́тия своя́ ста́рец Ле́в богозра́чный, мо́лниями оте́ческих уче́ний блиста́яйся, утверди́ тебе́ бы́ти ве́рна ему́ на тве́рди послуша́ния и от све́тлости в све́тлость духо́вную возраста́ти. Те́мже прино́сим тебе́ похвалу́ сию́:

Ра́дуйся, взыска́вый ста́рца по сло́ву Симео́на Богосло́ва; ра́дуйся, в богоглаго́ливем ста́рце Бо́га обреты́й.

Ра́дуйся, молниезра́чными уче́ньми озари́выйся; ра́дуйся, я́ко темнозра́чную пре́лесть попали́л еси́.

Ра́дуйся, послуша́нием уме́рый во́ли никче́мней; ра́дуйся, доброде́телию я́ко фи́никс воскресы́й.

Ра́дуйся, Льва́ преподо́бнаго ски́мне духо́вный; ра́дуйся, я́ко мы́сленных волко́в с ни́м растерза́л еси́.

Ра́дуйся, о́тче Мака́рие, зерца́ло смиренному́дрия.

Конда́к 4.

Па́стырем от па́стыря и ста́рцем от ста́рца Бо́гом произво́лено бы́ти тебе́. Те́мже све́т разсужде́ния в тебе́ возсия́л е́сть ярча́йше, и́мже преле́стную бесо́вскую тьму́ попали́л еси́, све́тло взыва́я Христу́: Аллилу́иа.

И́кос 4.

В горни́ле скорбе́й, о́тче преподо́бне, и на накова́льне по́двигов мона́шескаго жития́ сосу́д души́ твоея́ златокова́н соде́лав, вню́дуже сокро́вище Ду́ха Госпо́дь вмести́. Те́мже, я́ко блиста́ющее сокро́вище тя́ стяжа́вше, вы́ну тебе́ вопие́м от души́:

Ра́дуйся, сокро́вище даро́в оте́ческих преда́ний; ра́дуйся, бога́тство ду́ха ни́щим подава́яй.

Ра́дуйся, ве́ры адама́нте кре́пкий; ра́дуйся, любве́ амети́сте све́тлый.

Ра́дуйся, наде́жды сре́бряная ча́ша; ра́дуйся, печа́льным сла́дкая отра́да.

Ра́дуйся, прее́мственная сла́во ста́рцев богоно́сных; ра́дуйся, писа́ний богому́дрых исто́чниче живоно́сный.

Ра́дуйся, о́тче Мака́рие, зерца́ло смиренному́дрия.

Конда́к 5.

Ски́т по о́бразу дре́вних отце́в святи́телем Филаре́том устро́енный, ты́ потща́лся еси́ ангелоподо́бным жи́тельством обустро́ити, учреди́л еси́ в не́м пе́ние сладкогла́сное на подо́бны церко́вныя и тре́звенным умо́м непреста́нно взыва́ти Христу́: Аллилу́иа.

И́кос 5.

Боголе́пное о все́х Бо́жие промышле́ние вручи́ тебе́ па́стырское о ча́дех твои́х попече́ние. Ты́ же я́ко дои́лица кормя́щая с ла́скою па́ству твою́ окорми́л еси́, оба́че и о на́с заблу́ждших моли́тися не преста́ни вопию́щих тебе́ сия́:

Ра́дуйся, па́стырскою любо́вию о́вцы к себе́ призыва́яй; ра́дуйся, слове́сною ма́нною те́х насыща́яй.

Ра́дуйся, волко́в в ове́чьей ко́же от ста́да отгна́ние; ра́дуйся, ко́злищ заблу́ждших богому́дрое наказа́ние.

Ра́дуйся, Ангелоподо́бное пе́ние в це́рквах устро́ивый; ра́дуйся, трезвомы́сленное жи́тельство в Скиту́ учреди́вый.

Ра́дуйся, дре́вних отце́в пусты́нных но́вая похвало́; ра́дуйся, ста́рчества о́птинскаго неувяда́емая сла́во.

Ра́дуйся, о́тче Мака́рие, зерца́ло смиренному́дрия.

Конда́к 6.

Кни́жник богому́дрый яви́лся еси́ в стране́ Росси́йстей, о́тче Мака́рие, я́коже от ка́мене Христо́с — ме́д, та́кожде ты́ от кни́г — све́т произве́л еси́ си́х напечатле́нием. Те́мже сла́вим Христа́, вразуми́вшаго тя́ и пое́м Ему́: Аллилу́иа.

И́кос 6

Све́т от письме́н твои́х возблиста́, я́коже от и́скр возгара́ется пла́мя, те́мже усте́н твои́х поуче́ния стра́сти душе́вныя попали́ша. Сего́ ра́ди све́том уче́ний твои́х озаря́еми, похва́льная ти́ вопие́м:

Ра́дуйся, скрижа́ле испи́санная Боже́ственными письмены́; ра́дуйся, тро́сте дви́жимая Ду́хом Святы́м.

Ра́дуйся, святооте́ческое слове́с изъясне́ние; ра́дуйся, богодохнове́нное и́ноком вспоможе́ние.

Ра́дуйся, разсужде́ния свети́ло ярча́йшее; ра́дуйся, в кни́зе живо́тней печа́те всекра́сная.

Ра́дуйся, неосла́бное о Бо́зе раче́ние; ра́дуйся, на́с лени́вых во Христе́ воздвиже́ние.

Ра́дуйся, о́тче Мака́рие, зерца́ло смиренному́дрия.

Конда́к 7.

Слы́шаша лю́дие о́крест живу́щии, я́ко подана́ ти́ бы́сть от Бо́га Прему́дрости сла́дкая вода́, притека́ху к тебе́ томи́мии жа́ждею сло́ва Бо́жия. Ты́ же слове́сныя ре́ки уче́ний твои́х испусти́л еси́ ще́дре, на ра́дость лю́дем пою́щим Христу́: Аллилу́иа.

И́кос 7.

Житие́ мона́шеское яви́л еси́ во цве́те первозда́ннем, о́тче Мака́рие, я́коже в Раи́ насади́л еси́ в О́птинстей пу́стыни благоче́стия цве́ты, по́ст и трудолю́бие и моли́тву непреста́нную, сего́ ра́ди сла́дкия прине́сл еси́ плоды́ Христу́. Мы́ же от плодо́в твои́х наслади́вшеся, похва́льная тебе́ зове́м:

Ра́дуйся, де́лателю вертогра́да о́птинскаго; ра́дуйся, насади́вый в не́м благоче́стия цве́ты.

Ра́дуйся, мона́шескаго любому́дрия ши́пок благово́ннейший; ра́дуйся, ева́нгельскаго смиренному́дрия кри́не чистоты́.

Ра́дуйся, искореня́яй в сердца́х на́ших нече́стие; ра́дуйся, насыща́яй ра́зумы на́ша Боже́ственными словесы́.

Ра́дуйся, ке́дре богоразу́мием укра́шенный; ра́дуйся, я́ко на вéтвех твои́х вита́ют духо́вныя птенцы́.

Ра́дуйся, о́тче Мака́рие, зерца́ло смиренному́дрия.

Конда́к 8.

Сла́дкими словесы́ твои́ми привле́кл еси́ филосо́фов горча́йшее житие́ и ме́дом прему́дрости ева́нгельския услади́л еси́ те́х сла́ное мудрова́ние. Те́мже от суему́дрия мирска́го отврати́шася сии́, и ко исто́чнику Прему́дрости Христу́ притеко́ша, пою́ще: Аллилу́иа.

И́кос 8.

Мо́ре преплы́л еси́ писа́ний оте́ческих я́коже лодия́ небу́рне ходя́щая, и до́брый би́сер богопозна́ния извле́кл еси́, ева́нгельскому купцу́ уподо́бился еси́, о́тче Мака́рие. Те́мже нищету́ на́шу богати́ти не преста́й оте́ческим преда́нием, да в ра́дости духо́вней пое́м тебе́ похва́льная:

Ра́дуйся, сокро́вищница оте́ческих преда́ний златоукра́шенная; ра́дуйся, мирополо́жница апо́стольских рече́ний благово́ннейшая.

Ра́дуйся, недове́домых та́ин явле́ние; ра́дуйся, неразу́мных серде́ц умудре́ние.

Ра́дуйся, высото́ смиренному́дрия, врагу́ недостижи́мая; ра́дуйся, глубино́ богопозна́ния, челове́ком явле́нная.

Ра́дуйся, широто́ любве́ Боже́ственныя; ра́дуйся, долгото́ моли́тв неусыпа́емых.

Ра́дуйся, о́тче Мака́рие, зерца́ло смиренному́дрия.

Конда́к 9.

Ко́рень смиренному́дрия в души́ твое́й насади́в при исхо́дищих Ду́ха Свята́го, богоблаже́нне Мака́рие, я́ко ке́др лива́нский процве́л еси́ в Скиту́ и умно́жил еси́ древеса́ Рая́ Иису́сова. Те́мже в се́ни са́да сего́ ве́рнии отдохнове́ние прие́млют и Христа́ воспева́ют: Аллилу́иа.

И́кос 9.

Ду́ха Свята́го преизоби́лующую благода́ть стяжа́вый, Е́юже боговмести́тельное се́рдце твое́ духо́вная ча́да оте́чески породи́. Боле́зновал еси́ го́рце и моли́лся еси́ сла́дце, до́ндеже изобрази́тся в ни́х Христо́с. Те́мже почита́ем тя́, я́ко отца́ чадолюби́ва и си́це тебе́ пое́м:

Ра́дуйся, Амвро́сия богому́драго духо́вно роди́вый; ра́дуйся, Иларио́на преди́внаго оте́чески возрасти́вый.

Ра́дуйся, Анато́лия светоза́рнаго превы́спренне воскрили́вый; ра́дуйся, Исаа́кия благочести́ваго прозорли́во предуказа́вый.

Ра́дуйся, Моисе́ю и Анто́нию кре́посте единомы́слия; ра́дуйся, богоно́снаго Льва́ дру́же и́скренний.

Ра́дуйся, о́птинскаго ста́рчества це́пе златокова́нная; ра́дуйся, собо́ра венцено́снаго ка́меню богоизбра́нный.

Ра́дуйся, о́тче Мака́рие, зерца́ло смиренному́дрия.

Конда́к 10.

За́поведь Госпо́дню соблю́л еси́ непрело́жно: «а́ще кто́ уда́рит тя́ в лани́ту десну́ю, обрати́ к нему́ и другу́ю». Те́мже зауши́вшую тя́ исцели́л еси́ от одержи́мости и смире́нием твои́м зауши́л еси́ го́рдых бесо́в, не пою́щих Бо́гу: Аллилу́иа.

И́кос 10.

Ду́х прему́дрости и ра́зума на тебе́ почи́л е́сть, о́тче Мака́рие, ду́х сове́та и кре́пости, ду́х ве́дения и ду́х благоче́стия. Те́мже отве́рзеся в тебе́ исцеле́ний исто́чник кипя́щий дарова́ньми Боже́ственными, от ни́хже пию́щии возопи́ша в весе́лии:

Ра́дуйся, честно́е даро́в Боже́ственных вмести́лище; ра́дуйся, бога́тое Христо́вы благода́ти излия́ние.

Ра́дуйся, многоплете́нных грехо́в разреше́ние; ра́дуйся, многоразли́чных неду́гов исцеле́ние.

Ра́дуйся, прозорли́вый страсте́й искорени́телю; ра́дуйся, богому́дрый доброде́телей насади́телю.

Ра́дуйся, Херуви́мскаго разсужде́ния богодохнове́нный де́лателю; ра́дуйся, Серафи́мскому славосло́вию благозву́чный подража́телю.

Ра́дуйся, о́тче Мака́рие, зерца́ло смиренному́дрия.

Конда́к 11.

Ма́тери Бо́жией угоди́л еси́ в та́йне души́ твоея́, богоблаже́нне о́тче Мака́рие, смире́нным и боголюби́вым твои́м житие́м. Те́мже похваля́ет тя́ я́ве и уго́дника Своего́ нарица́ет. Мы́ же чудя́щеся таково́му твоему́ соверше́нству, Бо́гу пое́м: Аллилу́иа.

И́кос 11.

Све́том твои́х святы́х поуче́ний све́тиши на́м с высоты́ сла́вы твоея́ святы́я су́щим в нощи́ неве́дения, и к ве́дению и дея́нию наставля́еши ны́ смы́слом твои́х рече́ний. Те́мже во све́те твои́х наставле́ний ходя́ще, си́це тебе́ вопие́м:

Ра́дуйся реки́й: смире́ние а́ще стя́жеши, вся́ те́м и́маши; ра́дуйся реки́й: а́ще о́ное не и́маши, ничто́же и́маши.

Ра́дуйся реки́й: погружа́яй мы́сль во глубину́ смире́ния, обрета́ет Госпо́дне призре́ние; ра́дуйся реки́й: духо́вное охлажде́ние предваря́ется высо́ким о себе́ мне́нием.

Ра́дуйся реки́й: Иису́сова моли́тва со смире́нием посека́ет вра́жия прираже́ния; ра́дуйся реки́й: трудо́м и смире́нием устроя́ется богоуго́дное доброде́лание.

Ра́дуйся реки́й: внима́яй оте́ческим писа́нием я́сно зри́т свое́ устрое́ние; ра́дуйся реки́й: идя́й путе́м креста́ и смире́ния срета́ет духо́вная наслажде́ния.

Ра́дуйся, о́тче Мака́рие, зерца́ло смиренному́дрия.

Конда́к 12.

А́ще и за́йде в Бо́зе я́ко со́лнце богокра́сное твое́ житие́, оба́че сме́рти но́щь не сокры́ дея́ний твои́х светоза́рную сла́ву, мы́ же зря́ще я́ко зве́зды многоле́пную сла́ву твою́, Творцу́ небе́с пое́м хвалу́: Аллилу́иа.

И́кос 12.

Вене́ц похва́л приими́, о́тче Мака́рие, и́же от мно́гия любве́ дерза́ем принести́ тебе́ убо́гая ча́да твоя́, ты́ же венце́м смиренному́дрия, и́мже венча́ тя́ Христо́с, венча́й ны́, воспева́ющия Тебе́ сия́:

Ра́дуйся, я́ко неувяда́емая сла́ва святы́х на версе́ твое́м почи́; ра́дуйся, я́ко приснослову́щую похвалу́ в раи́ душа́ твоя́ вкуси́.

Ра́дуйся, я́ко сле́з твои́х се́яние ни́ву Госпо́дню угобзи́; ра́дуйся, я́ко снопы́ трудо́в твои́х Христу́ принесы́й.

Ра́дуйся, я́ко Богозри́тельную чистоту́ Бо́г се́рдцу твоему́ дарова́; ра́дуйся, я́ко от чре́ва твоего́, по сло́ву Христа́, истече́ Ду́ха Свята́го река́.

Ра́дуйся, нищету́ духо́вную, я́ко сокро́вище некра́домое при́сно в на́с сохраня́яй; ра́дуйся, кро́тостию и незло́бием я́ко щито́м духо́вным при́сно на́с покрыва́яй.

Ра́дуйся, о́тче Мака́рие, зерца́ло смиренному́дрия.

Конда́к 13.

О изве́стнейший рачи́телю смиренному́дрия, богоно́се о́тче Мака́рие, я́ко от Бо́га дарова́ся ти́ свети́льник разсужде́ния, и́мже просвети́л еси́ су́щия во тьме́ неве́дения, да́ждь и на́м стяжа́ти Благода́ть Свята́го Ду́ха, да избе́гнувше тьмы́ грехо́вныя, зове́м Христу́: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

От пеле́н младе́нческих Бо́гом предъизбра́н бы́в в души́ твое́й красоту́ изобрази́ти высокотво́рнаго смире́ния, те́мже нра́вы благочести́выми обуче́н бы́в и ве́рою пра́вою утвержде́н, яви́лся еси́ роди́телем твои́м благочести́вое похвале́ние. Сего́ ра́ди зове́м ти́:

Ра́дуйся, Бо́гом избра́нный сосу́де; ра́дуйся, смире́ния и любве́ кре́пкий соу́зе.

Ра́дуйся, младе́нческий ра́зум отверги́й; ра́дуйся, зло́бою при́сно младе́нствуяй.

Ра́дуйся, разумли́вый зако́на Христо́ва свети́льниче; ра́дуйся, писа́ний оте́ческих при́сный люби́телю.

Ра́дуйся, я́ко мирско́е оста́вль мудрова́ние; ра́дуйся, я́ко к Боже́ственным прини́кнув писа́нием.

Ра́дуйся, о́тче Мака́рие, зерца́ло смиренному́дрия.

Конда́к 1.

Избра́нному де́лателю смиренному́дрия и послуша́ния приле́жному наста́внику, богому́дрому ста́рцу О́птинскому, от души́ моле́ния те́плыя принесе́м. Ты́ же, о́тче, непослу́шных на́с послу́шай, я́ко послу́шающаго тебе́ Бо́га вы́ну в себе́ стяжа́вый, да вси́ зове́м ти́:

Ра́дуйся, о́тче Мака́рие, зерца́ло смиренному́дрия.

Моли́тва.

О свяще́нная и богому́драя главо́, богоно́се о́тче на́ш Мака́рие. За труды́ и по́двиги твоя́, и́миже Христа́ просла́вил еси́ и от гла́да духо́внаго лю́ди росси́йския изба́вил еси́, Христо́с Госпо́дь Воплоще́нная на́с ра́ди Прему́дрость излия́ на ве́рх тво́й неувяда́емую сла́ву смиренному́дрия. И́мже вся́ супоста́ты вра́жия низложи́л еси́ и басносло́вное суему́дрие филосо́фов обличи́л еси́. Те́мже у́бо о́тче, я́ко со святы́ми вмени́лся еси́ и боголе́пное житие́ в Раи́ живе́ши, не оста́ви на́с си́рых, гре́шная и неразу́мная ча́да твоя́. Но боголюби́вою твое́ю моли́твою на́с посети́: изба́ви от неразу́мия умы́ на́ша в суете́ мирсте́й вы́ну шата́ющияся, утверди́ сердца́ на́ша Стра́хом Бо́жиим и́же плоди́т нача́тки прему́дрости, коле́блющуюся во́лю на́шу остени́ за́поведьми Христо́выми да не на одесну́ю ниже́ шу́юю отсту́пим от зако́на Всевы́шняго. Оте́ческим преда́нием научи́ ны́ внима́ти и со опа́стсвом ты́я храни́ти, да насле́дницы святы́х отце́в яви́мся. При́сно же сохрани́ насле́дие твое́ и оби́тель твою́ в не́йже добропобе́дный по́двиг соверши́л еси́ и те́ло твое́ я́ко драгоце́нный би́сер в не́й оста́вил еси́. Да вси́ притека́ющии к ра́це моще́й твои́х исцеле́ния прие́млют и Бо́га просла́вят Ди́внаго во святы́х Свои́х всегда́ ны́не и при́сно и во ве́ки веко́в. Ами́нь.