Конда́к 1.

Избра́нный служи́телю Предве́чнаго Сло́ва, всехва́льне о́тче на́ш Макси́ме, в пресла́вней земли́ Гре́честей прозя́бший и в Держа́ве Росси́йстей по́двизи просия́вший, поуче́ньми и писа́нии твои́ма в благоче́стии и богообще́нии на́с утверди́вый, велича́ем ны́не многотру́дное житие́ твое́ и на предста́тельство твое́ пред престо́лом Триипоста́снаго Бо́га на́шего упова́ние свое́ возлага́я, вопие́м ти́ си́це:

Ра́дуйся, преподо́бне и богоно́сне о́тче Макси́ме, на пу́ть спасе́ния ве́чнаго на́с наставля́ющий.

И́кос 1.

А́нгелов и челове́ков Творе́ц и всея́ тва́ри Зижди́тель, содержа́яй в десни́це Свое́й судьбы́ ца́рств и наро́дов и над ка́ждым из ча́д свои́х оте́ческое промышле́ния явля́яй, произрасти́ тя́, богому́дре о́тче на́ш Макси́ме, от ко́рени имени́таго и ро́да зна́тнаго, благоволи́ украси́ти тя́ в прему́дрости оте́ц святы́х и а́ки просвети́теля всему́драго напра́ви тя́ в вели́кое кня́жество Моско́вское, да укрепи́ши наро́д ру́сский в ве́ре и́стинней и по́длинными насле́дниками духо́внаго бога́тства Византи́и ны́ сотвори́ши. Мы́, сия́ ны́не помина́юще, про́сим тя́, приклони́ к на́м милосе́рдие Всему́драго и Всемогу́щаго Отца́ Небе́снаго и приими́ ми́лостивно похвалы́ сия́:

Ра́дуйся, богодухнове́нных оте́ц досто́йных прие́мниче и сонасле́дниче; ра́дуйся, филосо́фов и ри́торов прему́дрых пречу́дный наста́вниче.

Ра́дуйся, все́х и́стины взыску́ющих небе́сным благослове́нием осеня́ющий; ра́дуйся, от путе́й собла́знов и прельще́ний и́х удаля́ющий.

Ра́дуйся, в богомы́слии ра́зум на́с утвержда́ющий; ра́дуйся, в сердца́х на́ших пла́мень любви́ к Бо́гу и бли́жним возжига́ющий.

Ра́дуйся, ти́хим све́том наде́жды ны́ благода́тно озаря́яй; ра́дуйся, в ве́ре тве́рдыми вы́ну бы́ти ны́ сподобля́яй.

Ра́дуйся, преподо́бне и богоно́сне о́тче на́ш Макси́ме, на пу́ть спасе́ния ве́чнаго на́с наставля́ющий.

Конда́к 2.

Ви́девше благочести́выя и богому́дрыя роди́теля твоя́, святы́й Макси́ме, запуще́ние отчи́зны и́х по паде́нии пресла́внаго ца́рствия Гре́ческаго, оба́че уразуме́ша, я́ко вы́ну ми́лостив е́сть Госпо́дь к ве́рным Свои́м, и во упова́нии таково́м и житии́ по за́поведем ева́нгельским тя́ утверди́ша. Мы́ же, сия́ воспомина́юще, Го́сподеви пое́м: Аллилу́иа.

И́кос 2.

Ра́зум тво́й в послуша́ние ве́ре отда́вше, пресла́вными роди́тели твои́ма и ины́ми до́брыми наста́вники поуча́емый, богоно́сне Макси́ме, в благослове́нии пред Творце́м вся́ческих нача́ток прему́дрости твоея́ и де́л благи́х положи́л еси́; по́слежде усе́рдно порабо́тал еси́ уче́ния оте́ц святы́х и филосо́фов прему́дрых постига́я, восходя́ по ле́ствице доброде́телей в ме́ру во́зраста духо́внаго. Сего́ ра́ди велича́ем тя́ си́це:

Ра́дуйся, да́ры бла́гости и до́браго сове́та на́с преобража́ющий; ра́дуйся, кро́тостию голуби́ною и му́дростию змеи́ною на́с обогоща́ющий.

Ра́дуйся, ко усе́рдному чте́нию свята́го Писа́ния ны́ побужда́яй; ра́дуйся, к уси́ленной моли́тве и в псалмопе́нии на́с утвержда́ющий.

Ра́дуйся, в трезвле́нии духо́внем и упова́нии на Бо́га все́х на́с утвержда́ющий; Ра́дуйся, душетле́нных на́выков и злы́х обы́чаев удаля́тися на́с науча́ющий.

Ра́дуйся, в собла́знех и прельще́нии су́щих по́мощь небе́сную посыла́ющий; ра́дуйся, в милосе́рдии к себе́ и бли́жним на́ших возраста́ти на́м помога́ющий.

Ра́дуйся, преподо́бне и богоно́сне о́тче на́ш Макси́ме, на пу́ть спасе́ния ве́чнаго на́с наставля́ющий.

Конда́к 3.

Си́лою благода́ти Бо́жия храни́мый, блаже́нне Макси́ме, в земли́ итали́йстей сы́й, не врежде́н пребы́л еси́ от тлетво́рнаго ду́ха ве́ка того́, и, пчеле́ трудолюби́вей подо́бно, некта́р благи́й му́дрости отовсю́ду собира́л еси́, в позна́нии и́стины Христо́вей возраста́я; Иерони́му благочести́вому внима́я к и́ноческому житию́ устреми́л еси́ му́дрое се́рдце твое́, о́тче святы́й; Го́сподеви же неуста́нно возноси́л еси́ пе́ние а́нгельское: Аллилу́иа.

И́кос 3.

Иму́ще в души́ твоея́ ре́вностное жела́ние Спаси́телю На́шему, за ны́ Распя́тому, всеусе́рдно послужи́ти удали́лся еси́, богосла́вне Макси́ме, из чу́дней земли́ Итали́йстей на пресла́вну го́ру Афо́нскую, иде́же мона́шество и свяще́нство сподо́бился еси́ прия́ти: наставле́нием ста́рец святого́рских сле́дуя, от доброде́тели к доброде́тели восходи́л еси́, уго́дниче Христо́в, вну́треннею челове́ка обновля́юще и о́браз Бо́жий в себе́ отверза́я. Сему́ же де́ланию духо́вному и на́с наста́ви, да зове́м ти́:

Ра́дуйся, от суеты́ мирски́я к свяще́нному безмо́лвию притеки́й; ра́дуйся, упокое́ние от невзго́д и треволне́ний в тихи́х оби́телех обреты́й.

Ра́дуйся, све́т нетва́рный еще́ на земли́ созерца́вый; ра́дуйся, неизрече́нную сла́дость богообще́ния позна́вый.

Ра́дуйся, духо́вныя о́чи на́ша ко зре́нию Бо́га изощря́ющий; ра́дуйся, ушеса́ на́ша к слы́шанию небе́сных глаго́л отверза́ющий.

Ра́дуйся, да́ром различе́ния духо́в на́с обогащая́яй; ра́дуйся, от заблужде́ний и паде́ний духо́вных на́с свобожда́яй.

Ра́дуйся, преподо́бне и богоно́сне о́тче на́ш Макси́ме, на пу́ть спасе́ния ве́чнаго на́с наставля́ющий.

Конда́к 4.

Бу́рю страсте́й и сомне́ний грехо́вных моли́твою, посто́м и трезве́нием серде́чным победи́л еси́, всехва́льне о́тче на́ш Макси́ме, и́бо на тве́рдом ка́мени и́стиннаго и непрело́жнаго испове́дания Христо́ва положи́л еси́ основа́ние душе́вной хра́мины твоея́. Сего́ ра́ди мо́лим тя́: утверди́ и на́с в непрело́жнем упова́нии на Милосе́рдие Святе́й Тро́ицы, да с тобо́ю сподо́бимся во ве́ки воспева́ти: Аллилу́иа.

И́кос 4.

Слы́шавше благове́рный вели́кий кня́зь Моско́вский Васи́лий Тре́тий, я́ко во оби́телех Афо́нских кни́жницы велему́дрыя и филосо́фы богопросвеще́нныя обрета́ются, повеле́ призва́ти о́ныя в держа́ву свою́, дабы́ наро́д ру́сский в ве́ре Христо́вой и де́лании за́поведей ева́нгельских утверди́ти и укрепи́ти. Ты́ же, преблагослове́нный Макси́ме, благода́тию Бо́жиею присноукрепля́емый, отбы́л еси́ в преде́лы моско́вския, дабы́ во́лю Бо́жию испо́лнити и пра́вду Его́ яви́ти в стране́ на́шей. Сего́ ра́ди про́сим тя́: на́с, сла́бых в ве́ре и в упова́нии на Христа́, Го́спода На́шего, укрепи́, да зове́м ти́ си́це:

Ра́дуйся, тяго́т доро́ги да́льния и жития́ в преде́лех се́верных не убоя́выйся; ра́дуйся, чу́ждый кро́вию, оба́че ду́хом свои́м для ру́сскаго наро́да ста́вший.

Ра́дуйся, зе́млю гре́ческую и росси́йскую па́ки и па́ки в ве́ре соединя́ющий; ра́дуйся, от суеты́ и преходя́щих пристра́стий ны́ исцеля́ющий.

Ра́дуйся, к ве́чней пра́вде Бо́жией взо́ры ду́ха обраща́ти ны́ науча́ющий; ра́дуйся, и́долы духо́вныя о ка́мень и́стины Христо́вей разбива́ющий.

Ра́дуйся, Христа́ – Спаси́теля па́че всего́ земна́го чти́ти подвиза́ющий; ра́дуйся, ми́лость Всенепоро́чней Богома́тери к на́м приклоня́ющий.

Ра́дуйся, преподо́бне и богоно́сне о́тче на́ш Макси́ме, на пу́ть спасе́ния ве́чнаго на́с наставля́ющий.

Конда́к 5.

Богоявле́нней и боготе́чней звезде́, пу́ть ко Христу́ озаря́ющей и освеща́ющей вои́стину уподо́бился еси́, преподо́бне о́тче на́ш Макси́ме, егда́ в преде́лех росси́йских сы́й, и́стину Бо́жию безстра́шно испове́дал и пропове́дал еси́, суеве́рия язы́ческия и звездопокло́нническую е́ресь, мздои́мство и неправдолю́бие, забве́ние за́поведей и любви́ к бли́жнему всеусе́рдно облича́л еси́. Сего́ ра́ди про́сим тя́, всеблаги́й наста́вниче на́ш, научи́ на́с то́кмо Спаси́телю служи́ти, не соблазни́ся земны́ми преходя́щима бла́гами и сподо́би во ве́ки ну́жно с тобо́ю вы́ну воспева́ти Христу́: Аллилу́иа.

И́кос 5.

Ви́девше тя́, благослове́нне о́тче на́ш Макси́ме, благочести́выя ру́сстии лю́ди, поча́ху приходи́ти к тебе́ в прехва́льную Чу́да Свята́го архистрати́га Михаи́ла оби́тель, и́же во гра́де Москвы́, сове́та, наставле́ния, утеше́ния и моли́твы твоея́ ра́ди. Ты́ же, никого́ от прише́дших не отри́нув, ко по́льзе бли́жних твои́х всеусе́рдно послужи́л еси́. Мы́ же, ве́руя, я́ко ты́ ны́не во благода́ти Госпо́дней сы́й, сугу́бо вне́млеши мольба́м на́шим с наде́ждою, отра́дою и умиле́нием воспева́ем ти́ си́це:

Ра́дуйся, ста́рче благи́й, в возраста́нии богопозна́ния бли́жних твои́х утвержда́вый; ра́дуйся, от духо́вной дремо́ты и пра́здности ду́ха приходи́вших к тебе́ исцеля́вый.

Ра́дуйся, по́длинному благоче́стию и любви́ к бли́жнему я́ науча́вый; ра́дуйся, в упова́нии на Прему́дрость Милосе́рдаго Творца́ и́х укрепля́вый.

Ра́дуйся, от заква́ски фарисе́йския и лицеме́рия пресла́вно исцеля́яй; ра́дуйся, от теплохла́дия и омертве́ния серде́чнаго благода́тно избавля́яй.

Ра́дуйся, о просвеще́нии духо́вных оче́с на́ших Бо́га умоля́яй; ра́дуйся, в тишине́ по́мыслов хвали́ти Христа́ все́х на́с подвиза́яй.

Ра́дуйся, преподо́бне и богоно́сне о́тче на́ш Макси́ме, на пу́ть спасе́ния ве́чнаго на́с наставля́ющий.

Конда́к 6.

Пропове́дник и ревни́тель жития́ благочести́ваго вои́стину яви́лся еси́, всеблагохва́льне о́тче на́ш Макси́ме Святого́рче, я́ко тве́рдо и неукосни́тельно облича́л еси́, незна́ние и́стин ве́ры Христо́вой, несоблюде́ние за́поведей Спа́совых, исполне́ние то́кмо вне́шняго обря́да, без вся́каго по́двига духо́внаго в су́етней наде́жде то́кмо на вне́шнее благоче́стие, наставля́л бо еси́ все́м се́рдцем и все́м помышле́нием, все́м естество́м на́шим возлюби́ти Иису́са Сладча́йшаго и умиле́нно воспева́ти Ему́ благодаре́ния: Аллилу́иа.

И́кос 6.

Возсия́л еси́ све́том богодарова́нныя прему́дрости твоея́, о всехва́льне о́тче на́ш Макси́ме, в земле́ Ру́сстей, я́ко мно́зех во и́стине Христо́вой пресла́вно утверди́л, я́ко кни́зи Писа́ния свяще́ннаго, святы́х оте́ц творе́ния и толкова́ния переве́л еси́ с наре́чия гре́ческаго и лати́нскаго на язы́к слове́нский, я́ко богому́дрия сочине́ния в назида́ние и по́льзу на́м оста́вил еси́, преподо́бне. Сего́ ра́ди, велича́я прехва́льныя труды́ твоя́, глаго́лем ти́ си́це:

Ра́дуйся, от мра́ка неве́жества к све́ту Прему́дрости Бо́жия возводя́й; ра́дуйся, заблужда́ющихся и сомнева́ющихся ко и́стине Христо́вой кро́тце приводя́й.

Ра́дуйся, тру́д перево́дчиков и кни́жных спра́вщиков с небе́с благословля́ющий; ра́дуйся, филоло́гом и языкове́дом по́мощь твою́ посыла́ющий.

Ра́дуйся, ра́зум богосло́вов и благове́стников све́том Небе́сным осеня́ющий; ра́дуйся, и́ноков и миря́н в богоуго́дном житии́ и милосе́рдии укрепле́ние.

Ра́дуйся, пресви́теров в благоче́стии и трезвле́нии утвержде́ние; ра́дуйся, архиере́ев во труде́х и́х благода́тное удобре́ние.

Ра́дуйся, преподо́бне и богоно́сне о́тче на́ш Макси́ме, на пу́ть спасе́ния ве́чнаго на́с наставля́ющий.

Конда́к 7.

Хотя́ще на́м сла́вити тя́, о богоно́сне о́тче на́ш Макси́ме, ве́даем у́бо, я́ко язы́к челове́ческий не возмо́жет досто́йно воспе́ти всю́ полноту́ богоуго́дных по́двигов твои́х, все́ терпе́ние твое́, я́же подъя́л еси́, егда́ иера́рси нечести́выя Та́йн Боже́ственных тя́ лиши́ша. Ка́ко у́бо возмо́жно воспе́ти глубину́ смире́ния твоего́ и высоту́ упова́ния на Всемогу́щество и Любо́вь Отца́ На́шего Небе́снаго, и́же, а́ки слугу́ своего́ возлю́бленнаго и ученика́ Христо́ва прия́ тя́ и на ло́не Авраа́мовем на ве́ки упоко́и тя́? Сего́ ра́ди на предста́тельство твое́ наде́яние на́ше возлага́я, пои́м о тебе́ Вседержи́телю: Аллилу́иа.

И́кос 7.

Но́вый Макси́м – испове́дник вои́стину яви́лся еси́, преподо́бне о́тче, я́ко же и святы́й тво́й покрови́тель испове́дал еси́ пред власти́телями нечести́выми и́стину уче́ния Спаси́теля На́шего, от ко́ей ни одесну́ю и ни ошу́юю не отше́л еси́, о́тче святы́й и богому́дрый. Сего́ же ра́ди от власте́й придержа́щих лише́ния, изгна́ние и заточе́ние темни́чное претерпе́л еси́. Мы́ же, испове́днические по́двизи твоя́ жела́я славосло́вити, таковы́я похвалы́ прино́сим ти́:

Ра́дуйся, во страда́ниях твои́х десни́цею Всевы́шняго укрепле́нный; ра́дуйся, я́ко зла́то в горни́ле испыта́ний тя́жких преображе́нный.

Ра́дуйся, ку́пно с испове́дническими ли́ки во сла́ве ны́не торжеству́яй; ра́дуйся, ку́пно с благове́стники и просвети́тели хвалу́ Бо́гу воспева́яй.

Ра́дуйся, подо́бно Златоу́сту, за вся́ благодари́ти Творца́ на́с науча́яй; ра́дуйся, в ра́дости и благоде́нствии по́мнити о ми́лостех Госпо́дних подвиза́яй.

Ра́дуйся, в ча́с ско́рби упова́ние на вы́сшее милосе́рдие возлага́ти наставля́яй; ра́дуйся, го́рести и страда́ния на́ши в отра́ду и благополу́чие пречу́дно претворя́яй.

Ра́дуйся, преподо́бне и богоно́сне о́тче на́ш Макси́ме, на пу́ть спасе́ния ве́чнаго на́с наставля́ющий.

Конда́к 8.

Стра́нно бе́ лю́дем благочести́вым и благосе́рдым зре́ти, я́ко ты́, святы́й Макси́ме, в темни́це заключе́нный и пра́во писа́ти лише́нный, у́глием на стена́х кано́н Всесвято́му Ду́ху-Пара́клиту написа́л еси́; мы́ же, велича́я ве́ру твою́ в животворя́щую благода́ть Всеблага́го Уте́шителя, смире́ние и незло́бие твое́ воспева́ем со умиле́нием и про́сим тя́, о́тче святы́й, сподо́би и на́с ми́лости и даро́в Свята́го Ду́ха, да пое́м Ему́ всера́достно: Аллилу́иа.

И́кос 8.

Всего́ себе́ подви́гл еси́ на служе́ние Го́сподеви, богосла́вне о́тче на́ш Макси́ме, и́бо несомне́нне ве́ровал еси́, я́ко «во Отце́ су́щественне и Ду́х: от Него́ бо, а́ки от Еди́наго Нача́ла, соприсносу́щна О́ба сия́ют и пребыва́ют о Себе́ в Живонача́льных Ипоста́сех Свои́х». Мы́ же ны́не велича́ем тя́, святы́й о́тче, неизрече́нных та́йн Боже́ственных созерца́теля всеблагогове́йнаго, еще́ на земли́ нетва́рным сия́нием осене́ннаго и про́сим тя́: моли́твы благоприя́тными твои́ма озари́ и на́с све́том Фаво́рским и приими́ благоскло́нно ли́ки сия́:

Ра́дуйся, Живонача́льныя и Единосу́щныя Тро́ицы Всесвяты́я прему́дрый служи́телю; ра́дуйся, велича́я Отца́ Предве́чнаго и Безнача́льнаго всеблаги́й тайнозри́телю.

Ра́дуйся, Сы́на Бо́жия, Искупи́теля, ве́рнейший после́дователю; ра́дуйся, милосе́рдия Всесвята́го Паракли́та к на́м всеусе́рдный приклони́телю.

Ра́дуйся, а́нгельских хоро́в и собо́ра пра́ведных вседосто́йный сонасле́дниче; ра́дуйся, преподо́бных оте́ц афо́нских сомоли́твенниче и собесе́дниче.

Ра́дуйся, земли́ Росси́йския и Е́ллинския вседраго́е украше́ние; ра́дуйся, Вселе́нския Це́ркви Христо́вой преизря́дное похвало́ и утвержде́ние.

Ра́дуйся, преподо́бне и богоно́сне о́тче на́ш Макси́ме, на пу́ть спасе́ния ве́чнаго на́с наставля́ющий.

Конда́к 9.

Вся́ческия му́ки душе́вныя и теле́сныя с досто́инством священнои́нока и кро́тостию претерпе́л еси́, всеблаже́нне Макси́ме; сего́ же ра́ди утеше́ния пресла́внаго сподо́бился еси́ от Го́спода На́шего, и́же посла́ к тебе́ еди́наго от а́нгел свои́х, и́же возвести́ ти́, я́ко терпе́нием твои́м вене́ц нетле́нный на небесе́х обрести́ и́маши. Ты́ же, о́тче преподо́бне, с благода́рностию воспе́л еси́ Го́сподеви: Аллилу́иа.

И́кос 9.

Вити́я многовеща́нныя и пии́ты всеиску́сныя, а́ки ры́бы безгла́сныя, немо́тствуют пред вели́чием по́двигов твои́х, богоблаже́нне о́тче на́ш Макси́ме, и́бо кто́ возмо́жет досто́йно и всепра́ведно воспе́ти вся́ труды́ твоея́, я́же подъя́л еси́ вя́щшей сла́вы Бо́жия ра́ди и по́льзы и просвеще́ния бли́жних твои́х, в страна́х Итали́йской, Гре́ческой и в преде́лех Держа́вы Росси́йстей, и́бо кто́ по достоя́нию воспое́т терпе́ния и му́ки твоея́, и́же с наде́ждою ве́лиею и кро́тостию а́нгельскаго прия́л еси́, оба́че на ми́лость твою́ к на́м упова́я, смире́нным се́рдцем возно́сим ти́ похвалы́ сия́:

Ра́дуйся, усыпле́нных со́вестей ско́рый возбуди́телю; ра́дуйся, сомне́ний и треволне́ний душе́вных бла́гостный умири́телю.

Ра́дуйся, все́х чту́щих па́мять твою́ пресла́вный храни́телю; ра́дуйся, носи́телей и́мени твоего́ благода́тный попечи́телю.

Ра́дуйся, благи́х де́л и милосе́рдия богому́дрый наста́вниче; ра́дуйся, изгна́нных, уни́женных и обездо́ленных небе́сный засту́пниче.

Ра́дуйся, пра́вды ра́ди подвиза́ющихся всеблаги́й покрови́телю; ра́дуйся, непра́ведно гони́мых и оби́димых предо́брый уте́шителю.

Ра́дуйся, преподо́бне и богоно́сне о́тче на́ш Макси́ме, на пу́ть спасе́ния ве́чнаго на́с наставля́ющий.

Конда́к 10.

Спаси́тельный по́двиг тво́й, о всесла́вне Макси́ме, соверши́вше, в ру́це Бо́жии ду́х тво́й преда́л еси́, с наде́ждою и отра́дою ве́лиею; А́нгелы же Госпо́дни вознесо́ша ду́шу твою́ во оби́тели О́тчия; иде́же Вседержи́тель венча́ тя́ нетле́нным венце́м; сего́ ра́ди про́сим тя́, святы́й о́тче на́ш Макси́ме, егда́ же и мы́ о́ным сно́м сме́ртным усыпа́ти на́чнем, умоли́ Го́спода кро́тко ду́шу на́шу от те́ла отдели́ти и вла́сти бесо́вския ны́ изба́вити, да с тобо́ю ку́пно Всесвяте́й Тро́ице воспои́м: Аллилу́иа.

И́кос 10.

Стено́ю всеблагомо́щных моли́тв твои́х храни́ши дне́сь ве́сь ро́д христиа́нский, о преподо́бне о́тче на́ш Макси́ме, и во вся́ком ско́рбнем обстоя́нии по́мощь твою́ да́руеши все́м, и́мя твое́ всечестно́е призыва́ющим. Ты́ бо во дни́ бра́ни со шве́дами яви́лся еси́ свято́му благове́рному царю́ Фео́дору Пе́рвому, и́же опочи́ под сто́гнами гра́да Ю́рьева и глаго́лал еси́ ему́: «Изы́ди из шатра́, да не убие́н бу́деши», и та́ко живо́т его́ сохрани́, по́слежде и ины́х чуде́с мно́жество сотвори́л еси́. Сего́ ра́ди мы́ с любо́вию таковы́я похвалы́ тебе́ прино́сим:

Ра́дуйся, благочести́вейшаго госуда́ря от поги́бели лю́тей на по́ле бра́ни сохрани́вый; ра́дуйся, благоволе́ние и ми́лость твою́ ве́лиему мно́жеству чту́щих тя́ яви́вый.

Ра́дуйся, от опасе́ний и злы́х челове́к вы́ну на́с оберега́яй; ра́дуйся, от прельще́ний и искуше́ний бесо́вских ны́ избавля́яй.

Ра́дуйся, благогове́нию пред святы́нею церко́вною на́с обогаща́ющий; ра́дуйся, у́зким путе́м ше́ствовати ко Го́споду науча́ющий.

Ра́дуйся, от широ́ких доро́г собла́знов ны́ удаля́ющий; ра́дуйся, от у́з неве́дения, заблужде́ний и недоуме́ний ско́ро разреша́ющий.

Ра́дуйся, преподо́бне и богоно́сне о́тче на́ш Макси́ме, на пу́ть спасе́ния ве́чнаго на́с наставля́ющий.

Конда́к 11

Пе́ния ака́фистное ра́достно прино́сим ти́, о богоблаже́нне о́тче на́ш Макси́ме, и мо́лим у́бо тя́: всеблагомо́щным предста́тельством твои́м исцели́ неду́ги на́ши душе́вныя и боле́зни теле́сныя, отврати́ от суеты́ помышле́ния на́ши, наста́ви на́с в благочести́вом житии́, бе́дным отра́ду и утеше́ние ниспошли́, бога́тых к милосе́рдию и благотворе́нию подви́гни, и все́х на́с наста́ви нелицеме́рно Го́сподеви воспева́ти: Аллилу́иа.

И́кос 11.

Све́т нетва́рный ку́пно с со́нмом оте́ц преподо́бных созерца́еши ны́не, богоблаже́нне о́тче на́ш Макси́ме, я́ко предстоя́й пред престо́лом Всесвяты́я и Единосу́щныя Тро́ицы и мо́лишися о спасе́нии и благоде́нствии все́х христиа́н. Мы́ же, Святу́ю па́мять твою́ почита́юще, с наде́ждою взыва́ем к тебе́, уго́дниче Христо́в, сотвори́ твою́ моли́тву о на́с, да отстрани́мся от греха́ и возмо́жем еще́ на земли́ су́ще возра́доватися о Го́споде, моли́твами уго́дников свои́х, ми́лующаго преизоби́льно и спаса́ющаго ны́. Сего́ ра́ди мы́ па́ки со умиле́нием произно́сим ти́ похвалы́ сия́:

Ра́дуйся, благове́стников в дела́х про́поведи Ева́нгелия укрепля́ющий; ра́дуйся, де́лателей на пусту́ющия ни́вы Госпо́дни посыла́ющий.

Ра́дуйся, ревнова́ти о спасе́нии бли́жних на́с науча́ющий; ра́дуйся, словеса́ му́дрыя во уста́ на́ши влага́ющий.

Ра́дуйся, от сомне́ний и малове́рия ско́ро исцеля́ющий; ра́дуйся, в ча́с недоуме́ния ра́зум на́ш мы́слию благо́ю озаря́ющий.

Ра́дуйся, вну́тренний мра́к ду́ш на́ших све́том Христо́вым озаря́ющий; ра́дуйся, от теплохла́дия и немилосе́рдия сердца́ на́ша свобожда́ющий.

Ра́дуйся, преподо́бне и богоно́сне о́тче на́ш Макси́ме, на пу́ть спасе́ния ве́чнаго на́с наставля́ющий.

Конда́к 12.

Благода́ть и да́ры Преблага́го и Всесвята́го Ду́ха Уте́шителя, Храни́теля жи́зни на́шея испроси́ на́м, всеблагослове́нне о́тче Макси́ме, ты́ бо ны́не во сла́ве ку́пно со пра́ведными сы́ны Бо́жиими и со́нмами Херуви́мов и Серафи́мов предстои́ши огнезра́чному престо́лу Триипоста́снаго Бо́га На́шего и простира́еши преподо́бническия ру́це твои́ ко Отцу́ Све́та и Творцу́ ми́ра и взыва́ющи Ему́: Аллилу́иа.

И́кос 12.

Стено́ю богоприя́тных моли́тв твои́х, преподо́бне о́тче на́ш Макси́ме, огради́ ны́ от вся́каго зла́, скорбе́й и боле́зней изба́ви ны́, не посрами́ у́бо упова́ния на́шего, ве́мы бо, я́ко мно́го мо́жет моли́тва твоя́, о́тче пра́ведный, у Царя́ Небе́снаго, я́ко ты́ в со́нме преподо́бных оте́ц предстои́ши пред престо́лом Всевы́шняго и предста́тельствуеши о все́х, вопию́щих ти́ си́це:

Ра́дуйся, покая́нием ду́ши на́ши обновля́ти науча́яй; ра́дуйся, от уны́ния и тоски́ все́х на́с исцеля́яй.

Ра́дуйся, от ро́пота и неве́рия благода́тное свобожде́ние; ра́дуйся, милосе́рдия Бо́жия к на́м приклоне́ние.

Ра́дуйся, не творе́ние, а Творца́ Предве́чнаго, чти́ти ны́ науча́ющий; ра́дуйся, от суему́дрия и пустосло́вия ны́ отвраща́ющий.

Ра́дуйся, в преподо́бии и пра́вде ны́ пресла́вно утвержда́ющий; ра́дуйся, в Бо́зе все́ житие́ на́ше благода́тно устроя́ющий.

Ра́дуйся, преподо́бне и богоно́сне о́тче на́ш Макси́ме, на пу́ть спасе́ния ве́чнаго на́с наставля́ющий.

Конда́к 13.

О преблагослове́нне о́тче, предо́брый на́ш засту́пниче и люби́мый покрови́телю, всехва́льне Макси́ме Святого́рче! Ми́лостивно приими́ усе́рдное возноси́мое тебе́ пе́ние и хвале́ние, наста́ви ны́, по́льзуяся бла́гами земны́ми, не греши́ти проти́в Го́спода на́шего; сподо́би ве́ру на́шу плодотво́рней бы́ти де́л благи́х ра́ди, я́ко да сподо́бимся в ми́ре сконча́ти земно́е житие́ на́ша и возмо́жем с тобо́ю ку́пно Иису́су Сладча́йшему во ве́ки воспева́ти: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгелов и челове́ков Творе́ц и всея́ тва́ри Зижди́тель, содержа́яй в десни́це Свое́й судьбы́ ца́рств и наро́дов и над ка́ждым из ча́д свои́х оте́ческое промышле́ния явля́яй, произрасти́ тя́, богому́дре о́тче на́ш Макси́ме, от ко́рени имени́таго и ро́да зна́тнаго, благоволи́ украси́ти тя́ в прему́дрости оте́ц святы́х и а́ки просвети́теля всему́драго напра́ви тя́ в вели́кое кня́жество Моско́вское, да укрепи́ши наро́д ру́сский в ве́ре и́стинней и по́длинными насле́дниками духо́внаго бога́тства Византи́и ны́ сотвори́ши. Мы́, сия́ ны́не помина́юще, про́сим тя́, приклони́ к на́м милосе́рдие Всему́драго и Всемогу́щаго Отца́ Небе́снаго и приими́ ми́лостивно похвалы́ сия́:

Ра́дуйся, богодухнове́нных оте́ц досто́йных прие́мниче и сонасле́дниче; ра́дуйся, филосо́фов и ри́торов прему́дрых пречу́дный наста́вниче.

Ра́дуйся, все́х и́стины взыску́ющих небе́сным благослове́нием осеня́ющий; ра́дуйся, от путе́й собла́знов и прельще́ний и́х удаля́ющий.

Ра́дуйся, в богомы́слии ра́зум на́с утвержда́ющий; ра́дуйся, в сердца́х на́ших пла́мень любви́ к Бо́гу и бли́жним возжига́ющий.

Ра́дуйся, ти́хим све́том наде́жды ны́ благода́тно озаря́яй; ра́дуйся, в ве́ре тве́рдыми вы́ну бы́ти ны́ сподобля́яй.

Ра́дуйся, преподо́бне и богоно́сне о́тче на́ш Макси́ме, на пу́ть спасе́ния ве́чнаго на́с наставля́ющий.

Конда́к 1.

Избра́нный служи́телю Предве́чнаго Сло́ва, всехва́льне о́тче на́ш Макси́ме, в пресла́вней земли́ Гре́честей прозя́бший и в Держа́ве Росси́йстей по́двизи просия́вший, поуче́ньми и писа́нии твои́ма в благоче́стии и богообще́нии на́с утверди́вый, велича́ем ны́не многотру́дное житие́ твое́ и на предста́тельство твое́ пред престо́лом Триипоста́снаго Бо́га на́шего упова́ние свое́ возлага́я, вопие́м ти́ си́це:

Ра́дуйся, преподо́бне и богоно́сне о́тче Макси́ме, на пу́ть спасе́ния ве́чнаго на́с наставля́ющий.

Моли́тва.

Преподо́бне о́тче Макси́ме! Воззри́ на на́с ми́лостивно и к земли́ приве́рженных возведи́ к высоте́ небе́сней. Ты́ горе́ на небеси́, мы́ на земли́ низу́, удалены́ от тебе́, не толи́ко ме́стом, ели́ко грехми́ свои́ми и беззако́нии, но к тебе́ прибега́ем и взыва́ем: наста́ви на́с ходи́ти путе́м твои́м, вразуми́ и руково́дствуй. Вся́ твоя́ свята́я жи́знь бы́сть зерца́лом вся́кия доброде́тели. Не преста́ни, уго́дниче Бо́жий, о на́с вопия́ ко Го́споду. Испроси́ предста́тельством свои́м у Всеми́лостиваго Бо́га на́шего ми́р Це́ркви Его́, под зна́мением креста́ во́инствующей, согла́сие в ве́ре и единому́дрие, суему́дрия же и раско́лов истребле́ние, утвержде́ние во благи́х де́лех, больны́м исцеле́ние, печа́льным утеше́ние, оби́женным заступле́ние, бе́дствующим по́мощь. Не посрами́ на́с, к тебе́ с ве́рою притека́ющих. Вси́ правосла́внии христиа́не, твои́ми чудесы́ испо́лненнии и ми́лостьми облагоде́тельствованнии, испове́дуют тя́ бы́ти своего́ покрови́теля и засту́пника. Яви́ дре́вния ми́лости твоя́, и и́хже отце́м всепомоществова́л еси́, не отри́ни и на́с, ча́д и́х, стопа́ми и́х к тебе́ ше́ствующих. Предстоя́ще всечестне́й ико́не твое́й, я́ко тебе́ жи́ву су́щу, припа́даем и мо́лимся: приими́ моле́ния на́ша и вознеси́ и́х на же́ртвенник благоутро́бия Бо́жия, да прии́мем тобо́ю благода́ть и благовре́менную в ну́ждех на́ших по́мощь. Укрепи́ на́ше малоду́шие и утверди́ на́с в ве́ре, да несомне́нно упова́ем получи́ти вся́ блага́я от благосе́рдия Влады́ки моли́твами твои́ми. О, превели́кий уго́дниче Бо́жий! Все́м на́м, с ве́рою притека́ющим к тебе́, помози́ предста́тельством твои́м ко Го́споду, и все́х на́с упра́ви в ми́ре и покая́нии сконча́ти живо́т на́ш и пресели́тися со упова́нием в блаже́нныя не́дра Авраа́мова, иде́же ты́ ра́достно во труде́х и по́двизех ны́не почива́еши, прославля́я со все́ми святы́ми Бо́га, в Тро́ице сла́вимаго, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.