Конда́к 1.

Избра́нный учениче́ вели́каго учи́теля, богоно́снаго чудотво́рца Се́ргиа, и ди́вный подража́телю жития́ его́ свята́го, преподо́бне о́тче Мефо́дие, пе́сньми восхваля́ем тя́ с любо́вию, засту́пника на́шего: ты́ же я́ко име́яй дерзнове́ние ко Го́споду, моли́ся вы́ну о спасе́нии на́с гре́шных, от вся́ких бе́д избавля́я зову́щих ти́:

Ра́дуйся, преподо́бне о́тче на́ш Мефо́дие.

И́кос 1.

А́нгелом любе́зную чистоту́ от ю́ности твоея́ возлюби́в, преподо́бне о́тче Мефо́дие, к доброде́телей подви́жнику, преподо́бному Се́ргию, в оби́тель прите́кл еси́, и от него́ во и́ночество облече́нный, подража́тель ре́вностный по́двигов его́ бы́л еси́. Те́мже сла́вим тя́ воззва́нии си́ми:

Ра́дуйся, пусты́ни до́брое прозябе́ние; ра́дуйся, ча́до и́стиннаго послуша́ния.

Ра́дуйся, Ева́нгелиа Христо́ва ве́рный после́дователю; ра́дуйся, за́поведей Иису́совых ре́вностный исполни́телю.

Ра́дуйся, богоно́снаго Се́ргиа при́сный учениче́; ра́дуйся, доброде́телей его́ насле́дниче.

Ра́дуйся, посто́м умертви́вый в себе́ душетле́нныя стра́сти; ра́дуйся, моли́твами усе́рдными отрази́вый вся́ искуше́ния диа́вольская.

Ра́дуйся, возше́дый на высоту́ соверше́нства духо́внаго; ра́дуйся, прини́кий во глубину́ смире́ния свята́го.

Ра́дуйся, сле́з твои́х тече́ньми уплодоноси́вый ни́ву душе́вную; ра́дуйся, и́же из глубины́ воздыха́нми приобреты́й чистоту́ серде́чную.

Ра́дуйся, преподо́бне о́тче на́ш Мефо́дие.

Конда́к 2.

Ви́дев Всеви́дец Госпо́дь, благо́е души́ твоея́ изволе́ние, о́тче Мефо́дие, е́же наедине́ рабо́тати Ему́ в безмо́лвии пусты́ннем, внуши́ преподо́бному Се́ргию благослови́ти тя́ на осо́бное пусты́нное пребыва́ние: ты́ же, благослове́ние свята́го с ве́рою прие́м, в пусты́ню суро́вую, в места́ бла́тная и непроходи́мая отше́л еси́, и та́мо посели́лся еси́, еди́н Еди́ному Бо́гу рабо́тая в пе́ниих, бде́ниих и поще́ниих, немо́лчно вопия́ Ему́: Аллилу́иа.

И́кос 2.

Разуме́в произволе́ние Бо́жие, преподо́бный Се́ргий, созда́тися оби́тели и́ночестей в твое́й пусты́ни, о́тче Мефо́дие, прии́де к тебе́ и избра́ ме́сто, удо́бное на сооруже́ние оби́тели, е́же благослови́в и освяти́в моли́твою свое́ю, запове́да тебе́ устро́ити та́мо кинови́ю пусты́нную: ты́ же за́поведь его́ испо́лнил еси́, и в сооруже́нии хра́ма Бо́жия и оби́тели усе́рдно потруди́лся еси́. О се́м тя́ хва́лим и зове́м:

Ра́дуйся, безмо́лвия люби́телю, пусты́ню по́двиги твои́ми освяти́вый; ра́дуйся, жесто́кое пусты́нное житие́ проходи́вый.

Ра́дуйся, псалмопе́нии немо́лчными Бо́га сла́вивый; ра́дуйся, моли́твы непреста́нныя Го́сподеви возноси́вый.

Ра́дуйся, по́стниче не изнемога́яй, бы́лием пусты́нным пита́выйся; ра́дуйся, трудолю́бче нелицеме́рный, пра́здность возненави́девый.

Ра́дуйся, худы́я и многошве́нныя ри́зы носи́вый; ра́дуйся, коленопреклоне́ния мно́гия соверша́вый.

Ра́дуйся, в терпе́нии и смире́нии преуспе́вый; ра́дуйся, равноа́нгелен на земли́ бы́вый.

Ра́дуйся, оби́тель пусты́нную многотру́дно сооруди́вый; ра́дуйся, в не́й мно́гия ду́шы челове́ческия Христу́ уневе́стивый.

Ра́дуйся, преподо́бне о́тче на́ш Мефо́дие.

Конда́к 3.

Си́лою Бо́жиею укрепля́емый, Мефо́дие преподо́бне, труды́ вели́кия подъя́л еси́ при созида́нии оби́тели твоея́ пусты́нныя, древеса́ секи́й и зда́ния оби́тели сооружа́я рука́ма твои́ма, и при́сно моля́ся ко Го́споду, да благослови́т де́ло ру́к твои́х во сла́ву и́мени Его́ Свята́го, и на спасе́ние бли́жних твои́х, и́хже приме́ром твои́м научи́л еси́, неле́ностно возноси́ти хвале́бную пе́снь Пресвяте́й Тро́ице: Аллилу́иа.

И́кос 3.

Име́я по́мысл чи́ст и непоро́чну ду́шу, о́тче Мефо́дие, свяще́нства благода́ть досто́йно восприя́л еси́, и во игу́мена оби́тели твоея́ поста́вленный, ре́вностно подвиза́лся еси́ о спасе́нии душе́внем Бо́гом вруче́ннаго тебе́ ста́да слове́сных ове́ц. Сего́ ра́ди слы́шиши от на́с благохвале́ния такова́я:

Ра́дуйся, непоро́чный олтаря́ Госпо́дня служи́телю; ра́дуйся, досто́йный Та́инств Боже́ственных соверши́телю.

Ра́дуйся, преподо́бныя ру́це твои́ со дерзнове́нием горе́ воздея́вый; ра́дуйся, моли́твы благоумиле́нныя у престо́ла Бо́жия приноси́вый.

Ра́дуйся, учи́телю благоче́стия; ра́дуйся, наста́вниче богому́дрия.

Ра́дуйся, дре́во благосенноли́ственное, при вода́х пусты́нных возра́стшее; ра́дуйся, плоды́ сла́дкия Христу́ принесы́й.

Ра́дуйся, сотвори́вый и научи́вый, и ве́лий нарече́нный во Ца́рствии Небе́снем; ра́дуйся, за по́двиги вре́меннаго жития́ обреты́й поко́й ве́чный.

Ра́дуйся, спасе́ния мно́гих ду́ш челове́ческих вино́вниче; ра́дуйся, ангелонра́вный челове́че.

Ра́дуйся, преподо́бне о́тче на́ш Мефо́дие.

Конда́к 4.

Бу́рю многомяте́жную жите́йскаго мо́ря безбе́дно преше́д еси́, преподо́бне, и в при́стань безстра́стия дости́гл еси́, окормля́емь за́поведьми Христа́ Бо́га, я́же бы́ша свети́льник нога́м твои́м, и све́т стезя́м твои́м. Те́мже ны́не в го́рних оби́телех водворя́ешися, и сла́дце пое́ши Триеди́ному Бо́гу: Аллилу́иа.

И́кос 4.

Слы́шавше мно́зи о богоуго́днем житии́ твое́м, о́тче Мефо́дие, прихожда́ху к тебе́, о́ви послу́шати поуче́ний твои́х душеполе́зных, о́ви же сожи́тельствовати тебе́ в оби́тели твое́й пусты́нней, и́хже ты́ с оте́ческою любо́вию прие́мля, руково́дствовал еси́ стезе́ю пра́вою ко спасе́нию, я́ко все́м зва́ти тебе́:

Ра́дуйся, пра́вило ве́ры и́стинныя; ра́дуйся, о́бразе кро́тости духо́вныя.

Ра́дуйся, челове́че Бо́жий, преподо́бием украше́нный; ра́дуйся, во́ине Христо́в, полки́ неви́димых враго́в победи́вый.

Ра́дуйся, ми́ра до́льняго му́дрый стра́нниче; ра́дуйся, в доброде́телех благоиску́сный подви́жниче.

Ра́дуйся, вели́ких пустынножи́телей ве́рный подража́телю; ра́дуйся, дре́вних богоно́сных оте́ц ре́вностный после́дователю.

Ра́дуйся, преподо́бнаго Се́ргиа нра́вы себе́ усво́ивый; ра́дуйся, того́ житию́ богоуго́дному поревнова́вый.

Ра́дуйся, сыно́внюю любо́вь к нему́ стяжа́вый; ра́дуйся, и от него́ зело́ возлю́бленный.

Ра́дуйся, преподо́бне о́тче на́ш Мефо́дие.

Конда́к 5.

Боготе́чное свети́ло бы́в, все́х к со́лнцу пра́вды Христу́ путеводи́л еси́, уго́дниче Бо́жий, сло́вом и приме́ром жития́ твоего́ свята́го, е́же все́ посвяще́но бы́сть на служе́ние Бо́гу и бли́жним твои́м: ни́щыя и безкро́вныя пита́л еси́ в оби́тели твое́й щедролю́бно, и рука́ твоя́ никогда́же оскуде́ на подая́ние ми́лостыни тоя́ тре́бующым. Те́мже блаже́нство ми́лостивых унасле́довал еси́, преподо́бне о́тче, и со святы́ми пое́ши ве́чно хвале́бную пе́снь Спаси́телю Бо́гу: Аллилу́иа.

И́кос 5.

Ви́дим тя́, преподо́бне о́тче Мефо́дие, дости́гшаго в му́жа соверше́нна о Христе́ и преиспо́лненнаго дарова́ний боже́ственных, в Ева́нгелии Христо́вом обетова́нных ве́рным после́дователем вопло́щшагося Бо́га Сло́ва. Те́мже чудя́щеся твои́м по́двигом, вопие́м ти́ хвале́бно:

Ра́дуйся, блаже́нный иска́телю бла́г ве́чных и нетле́нных; ра́дуйся, неусы́пный де́лателю виногра́да Христо́ва.

Ра́дуйся, обреты́й во глубину́ се́рдца твоего́ би́сер драги́й Го́спода Иису́са; ра́дуйся, и́мя Его́ боже́ственное вы́ну име́вый во уста́х и в се́рдце твое́м.

Ра́дуйся, и́скренно возлюби́вый и́го Христо́во благо́е и ле́гкое; ра́дуйся, терпели́во носи́вый кре́ст скорбе́й и лише́ний пусты́нных.

Ра́дуйся, алка́вый и жажда́вый на земли́, ны́не же насыща́яйся нетле́нныя пи́щи на небеси́; ра́дуйся, нищету́ храни́вый, да обогати́шися да́ры боже́ственными.

Ра́дуйся, до́брый настоя́телю общежи́тия и́ноческаго; ра́дуйся, благоиску́сный врачу́ боле́знующих грехми́.

Ра́дуйся, оте́чески возлюби́вый всю́ о Христе́ бра́тию твою́; ра́дуйся, учи́вый благовре́менно и безвре́менно ча́да твоя́ духо́вная богоугожде́нию и́стинному.

Ра́дуйся, преподо́бне о́тче на́ш Мефо́дие.

Конда́к 6.

Пропове́дник бы́л еси́ ева́нгельских доброде́телей бра́тии твое́й, преподо́бне о́тче Мефо́дие, и ча́да твоя́ духо́вная ве́рно руководи́л еси́ к Сио́ну, иде́же е́сть жили́ще все́х спасе́нных милосе́рдием Христа́ Бо́га, прише́дшаго в ми́р спасти́ па́дшее челове́чество, и да́вшаго Своя́ спаси́тельныя за́поведи во спасе́ние все́м, и́же подо́бно тебе́ возлюби́ша Его́ се́рдцем чи́стым, и навыко́ша пе́ти Ему́: Аллилу́иа.

И́кос 6.

Возсия́в в пусты́ни твое́й я́ко богосве́тлое свети́ло, о́тче Мефо́дие, све́том до́брых де́л твои́х озари́л еси́ ду́шы и сердца́ челове́ков, иска́вших от тебе́ наста́витися во спасе́ние. Мно́зи бо ве́дяху тя́ равноа́нгельна житие́м, и прихожда́ху к тебе́, да слы́шат от тебе́ глаго́лы живота́ ве́чнаго. Тебе́ у́бо, свято́му учи́телю небе́сныя и́стины, сотвори́вшему и научи́вшему, и мы́ смире́ннии зове́м хвале́бно:

Ра́дуйся, Ева́нгелиа Христо́ва немо́лчный пропове́дниче; ра́дуйся, апо́стольских преда́ний ре́вностный храни́телю.

Ра́дуйся, Правосла́вия святы́я догма́ты в души́ твое́й до́бре утверди́вый; ра́дуйся, ве́рою пра́вою и де́лы благи́ми Бо́гу угоди́вый.

Ра́дуйся, во сле́д себе́ ко Христу́ приведы́й собо́р ученико́в твои́х; ра́дуйся, с ни́ми, я́ко оте́ц со ча́ды, возше́дый прия́ти мзду́ небе́сную от Го́спода.

Ра́дуйся, не сокры́вый тала́нт, тебе́ вруче́нный Всевы́шним Домовлады́кою; ра́дуйся, ку́плю мно́гу и́м сотвори́вый, спасе́ние ду́ш челове́ческих.

Ра́дуйся, твои́ми бо уче́нми гре́шнии покая́нием Бо́гу угоди́ша; ра́дуйся, твои́ми бо наставле́ньми заблу́ждшии пра́вый пу́ть спасе́ния обрето́ша.

Ра́дуйся, бли́жния твоя́ и́скренно возлюби́вый; ра́дуйся, спасе́нию и́х душе́вному усе́рдно послужи́вый.

Ра́дуйся, преподо́бне о́тче на́ш Мефо́дие.

Конда́к 7.

Хоте́ние еди́но име́л еси́, преподо́бне о́тче, е́же Бо́гу благоугожда́ти, и спасе́нию душе́вному бли́жних твои́х благоче́стно служи́ти: те́мже оби́тель твоя́ свята́я бы́сть приста́нище благоути́шное вся́кому челове́ку, треволне́нием мо́ря жите́йскаго утомле́нному. Ты́ бо, я́ко ко́рмчий бо́дрый, вся́ ученики́ твоя́ наставля́л еси́ сло́вом и приме́ром твои́м, вдали́ ми́ра и его́ суе́т, се́рдцем и усты́ немо́лчно возглаша́ти Бо́гу: Аллилу́иа.

И́кос 7.

Но́ваго тя́ Анто́ниа Вели́каго, наста́вника душеспаси́тельнаго, позна́вше, преподо́бне о́тче, в пусты́нней оби́тели твое́й, сла́вныя во́ды мо́ря жите́йскаго безбе́дно преше́дшаго, и в приста́нище безстра́стия дости́гшаго, к нему́же и ча́да твоя́ духо́вная благоприя́тно приводи́л еси́, неле́ностно и усе́рдно рабо́тати Го́сподеви в преподо́бии и чистоте́, научи́хомся зва́ти тебе́:

Ра́дуйся, кри́не пусты́ннаго прозябе́ния; ра́дуйся, ми́ро Христо́ва благоуха́ния.

Ра́дуйся, пусты́ню духо́вно уплодоноси́вый; ра́дуйся, селе́ние и́ноческое в не́й возгради́вый.

Ра́дуйся, ча́да послуша́ния и смире́ния в не́й насели́вый; ра́дуйся, оте́ц чадолюби́вый ученико́м твои́м бы́вый.

Ра́дуйся, па́ству твою́ слове́сную упасы́й на па́житех живоно́сных Ева́нгелиа Христо́ва; ра́дуйся, оби́тель твою́ пусты́нную созида́вый по преда́нию святы́х и богоно́сных оте́ц.

Ра́дуйся, преподо́бнаго Се́ргиа пра́вила и уста́вы себе́ усво́ивый; ра́дуйся, его́ благослове́нием и моли́твою освяще́нный.

Ра́дуйся, ди́вный учениче́ ди́внаго учи́теля; ра́дуйся, соверше́нный подража́телю соверше́ннаго о Христе́ отца́ твоего́ духо́внаго.

Ра́дуйся, преподо́бне о́тче на́ш Мефо́дие.

Конда́к 8.

Стра́нника и прише́льца в ми́ре се́м помышля́л еси́ себе́ бы́ти, Мефо́дие преблаже́нне, те́мже о бога́тстве земно́м вся́кое попече́ние отложи́л еси́, и оби́тель твою́ во убо́жестве зе́льнем созида́л еси́, вся́кое стяжа́ние су́етное в не́й возбраня́я, ни́щыя же и убо́гия от трапе́зы твоея́ щедролю́бно пита́л еси́, разделя́я хле́б тво́й с неиму́щею бра́тиею, в и́хже лице́ самому́ Христу́ служи́л еси́, зовы́й Ему́ от любве́ те́плыя: Аллилу́иа.

И́кос 8.

Ве́сь в Бо́зе бы́в, о́тче преподо́бне, о Бо́зе и угожде́нии Ему́, при́сно бесе́довал еси́ со ученики́ твои́ми, и сле́зы мно́гия излива́л еси́ от оче́с твои́х при бесе́дах си́х, умоля́я ча́да твоя́ духо́вная, ничто́же предпочита́ти па́че Любве́ Христо́вы. Помина́юще у́бо таковы́я твоя́ душеспаси́тельныя бесе́ды, зове́м ти́ си́це:

Ра́дуйся, ти́хостию слове́с твои́х гре́шники на покая́ние наста́вивый; ра́дуйся, благоумиле́нною бесе́дою твое́ю миролю́бцы ко Христу́ обрати́вый.

Ра́дуйся, наставле́ньми твои́ми богому́дрыми сластолю́бцы воздержа́нию научи́вый; ра́дуйся, нищелю́бец соверше́нный бы́вый.

Ра́дуйся, блаже́нство ни́щих ду́хом унасле́дивый; ра́дуйся, о́браз соверше́нства о Христе́ в себе́ яви́вый.

Ра́дуйся, ни́щыя пита́вый и упокоева́вый в твое́й оби́тели; ра́дуйся, во дни́ гла́да все́м приходи́вшим к тебе́ пи́щу подава́вый.

Ра́дуйся, после́дния укру́хи хле́ба твоего́ с неиму́щими разделя́ти возжела́вый; ра́дуйся, любо́вь твою́ к Бо́гу, любо́вию к бли́жним твои́м свиде́тельствовавый.

Ра́дуйся, Бо́гом возлю́бленный и бли́жними твои́ми благословля́емый; ра́дуйся, похвала́ми моли́твенными до дне́сь в оби́тели твое́й почита́емый.

Ра́дуйся, преподо́бне о́тче на́ш Мефо́дие.

Конда́к 9.

Все́м приходи́вшим в оби́тель твою́ святу́ю, моли́твы и благослове́ния ра́ди, преподо́бне о́тче, ди́вно бы́сть ви́дети тя́, в раздра́нней и многошве́нной ри́зе ходи́вшаго, и зело́ ни́щетно в ке́ллии твое́й пребыва́вшаго, оба́че ты́ все́х ра́вною любо́вию принима́л еси́, бога́тых и убо́гих, вельмо́ж и просты́х, и коему́ждо сло́во на по́льзу душе́вную изрека́л еси́, поуча́я и́х благоче́стно служи́ти и благоугожда́ти Бо́гу, ве́рою пра́вою и де́лы благи́ми, и зва́ти Ему́: Аллилу́иа.

И́кос 9.

Вети́й прему́дрых превзоше́л еси́, преподо́бне о́тче, благода́тным пома́занием слове́с твои́х, и́миже гре́шныя на покая́ние приводи́л еси́, ка́ющыяся уцелому́дрил еси́, подвиза́ющыяся в доброде́тели укрепи́л еси́, и все́м пу́ть спаси́тельный ко Христу́ показа́л еси́, по нему́же са́м неукло́нно ше́ствовал еси́ до блаже́нныя твоея́ кончи́ны, досто́йный вои́стинну похва́л таковы́х:

Ра́дуйся, написа́вый на скрижа́лех се́рдца твоего́ зако́н Христо́в; ра́дуйся, от глубины́ серде́чныя износи́вый до́брая и душеспаси́тельная наставле́ния челове́ком.

Ра́дуйся, я́ко бы́ша словеса́ твоя́ ме́да сладча́йша жа́ждавшим уче́ния духо́внаго; ра́дуйся, я́ко твои́ми наставле́ньми спасо́шася мно́зи.

Ра́дуйся, главо́ свята́я, благода́тию Бо́жиею осене́нная; ра́дуйся, пропове́дниче сладкоглаго́ливый, веща́вый словеса́ жи́зни ве́чныя.

Ра́дуйся, пусты́нный граждани́не, гра́ды и ве́си напо́лнивый сла́вою твои́х по́двигов; ра́дуйся, ма́слино Бо́жия благослове́ния, ея́же плоды́ напита́шася ве́рнии.

Ра́дуйся, приведы́й ко Христу́ ученики́ твоя́, в доброде́телех преуспе́вшия; ра́дуйся, угото́вавый уче́нми твои́ми Го́сподеви подви́жники соверше́нныя.

Ра́дуйся, воево́до благоиску́сный полка́ и́ноческаго; ра́дуйся, руководи́телю предо́брый пустынножи́телей.

Ра́дуйся, преподо́бне о́тче на́ш Мефо́дие.

Конда́к 10.

Спасе́ния наде́жду стяжа́л еси́ при исхо́де твое́м, преподо́бне о́тче Мефо́дие, и я́ко пшени́ца зре́лая, во вре́мя пожа́тая, кончи́ною благо́ю пресели́лся еси́ от земли́ в оби́тели го́рния, прия́ти мзду́ от руки́ пра́веднаго Мздовоздая́теля Христа́, И́же вчини́ ду́шу твою́ со ду́си святы́х, немо́лчно возглаша́ющих пред Престо́лом сла́вы Его́, побе́дную пе́снь: Аллилу́иа.

И́кос 10.

Царя́ Небе́снаго Христа́ ве́рный ра́б и после́дователь бы́л еси́, о́тче Мефо́дие, те́мже по нело́жному Его́ глаго́лу: «Иде́же е́смь А́з, ту́ и слуга́ мо́й бу́дет», мы́ чту́щии тя́, ве́руем несомне́нно, я́ко ты́ со Христо́м в оби́телех блаже́нства ве́чнаго водворя́ешися, и ра́дости нетле́нныя наслажда́ешися, я́ко и́стинный Того́ уго́дник, от на́с же слы́шиши благохвале́ния сия́:

Ра́дуйся, ра́достно преда́вый ду́шу твою́ в ру́це Бо́жии; ра́дуйся, святу́ю кончи́ну получи́вый в возме́здие твои́м по́двигом.

Ра́дуйся, пресели́выйся от земли́ к оби́телем небе́сным; ра́дуйся, та́мо со святы́ми наслажда́яйся блаже́нства ве́чнаго.

Ра́дуйся, со а́нгельскими во́и воспева́яй Творца́ а́нгелов и челове́ков; ра́дуйся, открове́нным лице́м созерца́яй сла́ву Трисия́ннаго Божества́.

Ра́дуйся, те́лом сме́ртным в оби́тели твое́й погребе́нный; ра́дуйся, душе́ю безсме́ртною к Сио́ну Го́рнему воспари́вый.

Ра́дуйся, пла́чь неуте́шен ученико́м твои́м кончи́ною твое́ю сотвори́вый; ра́дуйся, слеза́ми те́плыми от ни́х почте́нный.

Ра́дуйся, во гро́бе смире́ннем от ни́х с любо́вию положе́нный; ра́дуйся, чудесы́ мно́гими просла́вленный.

Ра́дуйся, преподо́бне о́тче на́ш Мефо́дие.

Конда́к 11.

Пе́ние Пресвяте́й Тро́ице горе́ прино́сиши, преподо́бне о́тче на́ш Мефо́дие, и о оби́тели твое́й святе́й, и подвиза́ющихся в не́й, при́сно хода́тайствуеши, прося́ ми́ра свы́ше, и благопоспеше́ния во все́м благо́м ча́дом твои́м духо́вным, от ни́хже почита́ешися достодо́лжными похвалы́, с пе́нием Триеди́ному Бо́гу: Аллилу́иа.

И́кос 11.

Свети́льника тя́ до́брых де́л, преподо́бне о́тче, испове́дуем бы́ти, и прославля́ем просла́вльшаго тя́ Го́спода, И́же чудесы́ мно́гими гро́б тво́й озна́менова: струи́ бо исцеле́ний благода́тных источа́еши от него́ неду́жным, и подвиза́еши ве́рныя вопи́ти тебе́:

Ра́дуйся, земны́й а́нгеле и небе́сный челове́че; ра́дуйся, безме́зднаго врачева́ния исто́чниче.

Ра́дуйся, сокро́вищница даро́в Бо́жия благода́ти; ра́дуйся, ми́ра многоцеле́бнаго преиспо́лненный фиа́ле.

Ра́дуйся, от го́рних высо́т к земноро́дным ми́лостиво приника́яй; ра́дуйся, от ра́ки твоея́ святы́я исцеле́ния оби́льно подава́яй.

Ра́дуйся, скорбя́щих уте́шителю; ра́дуйся, боля́щих цели́телю.

Ра́дуйся, уныва́ющих ободри́телю; ра́дуйся, бе́дствующих изба́вителю.

Ра́дуйся, в со́ниих и виде́ниих ве́рныя посеща́яй; ра́дуйся, оби́тель твою́ святу́ю от вся́ких бе́д соблюда́яй.

Ра́дуйся, преподо́бне о́тче на́ш Мефо́дие.

Конда́к 12.

Благода́ть Госпо́дню испроси́ на́м, преподо́бне о́тче Мефо́дие, почита́ющым с любо́вию святу́ю па́мять твою́, и усе́рдно притека́ющым к честне́й ра́це моще́й твои́х, от нея́же чуде́сная исцеле́ния подае́ши неду́жным. Те́мже тебе́, чудотворе́ния да́ром от Го́спода просла́вленному, приле́жно мо́лимся: исцели́ на́ша неду́ги душе́вныя и теле́сныя, и помози́ на́м предста́тельством твои́м спасе́ние ве́чное получи́ти, да вку́пе с тобо́ю воспое́м Ди́вному во святы́х Свои́х Бо́гу: Аллилу́иа.

И́кос 12.

Пою́ще по́двиги твоя́, преподо́бне о́тче, ублажа́ем равноа́нгельное житие́ твое́, диви́мся мно́гим чудотворе́нием твои́м, моли́твенно почита́ем святу́ю па́мять твою́, и припа́дающе к ра́це моще́й твои́х, уми́льно глаго́лем:

Ра́дуйся, Пресвяты́я Тро́ицы ве́рный служи́телю; ра́дуйся, Пресвяты́я Богоро́дицы досто́йный предстоя́телю.

Ра́дуйся, а́нгельских лико́в собесе́дниче; ра́дуйся, все́х святы́х сожи́телю.

Ра́дуйся, пустынножи́телей сла́во и похвало́; ра́дуйся, Росси́йскаго ца́рства духо́вное украше́ние.

Ра́дуйся, святы́я оби́тели твоея́ при́сное охране́ние; ра́дуйся, подвиза́ющихся в не́й благонаде́жное заступле́ние.

Ра́дуйся, приходя́щих в ню́ на поклоне́ние благи́й предста́телю; ра́дуйся, почита́ющих святу́ю па́мять твою́ небе́сный покрови́телю.

Ра́дуйся, душе́вных неду́гов благосе́рдный целе́бниче; ра́дуйся, теле́сных боле́зней преди́вный врачу́.

Ра́дуйся, преподо́бне о́тче на́ш Мефо́дие.

Конда́к 13.

О преподо́бне и богоно́сне о́тче Мефо́дие! Ты́ горе́ на небеси́, мы́ до́лу на земли́, удале́нныя от тебе́ не толи́ко ме́стом, коли́ко грехо́вною нечистото́ю на́шею, оба́че дерза́ем приноси́ти тебе́ сие́ ма́лое похва́льное пе́ние, е́же ми́лостивно прие́м, моли́ Го́спода и Влады́ку на́шего, изба́вити на́с поги́бели ве́чныя, и сподо́бити блаже́нства святы́х, вопию́щих Ему́ ве́чно хвале́бную пе́снь: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгелом любе́зную чистоту́ от ю́ности твоея́ возлюби́в, преподо́бне о́тче Мефо́дие, к доброде́телей подви́жнику, преподо́бному Се́ргию, в оби́тель прите́кл еси́, и от него́ во и́ночество облече́нный, подража́тель ре́вностный по́двигов его́ бы́л еси́. Те́мже сла́вим тя́ воззва́нии си́ми:

Ра́дуйся, пусты́ни до́брое прозябе́ние; ра́дуйся, ча́до и́стиннаго послуша́ния.

Ра́дуйся, Ева́нгелиа Христо́ва ве́рный после́дователю; ра́дуйся, за́поведей Иису́совых ре́вностный исполни́телю.

Ра́дуйся, богоно́снаго Се́ргиа при́сный учениче́; ра́дуйся, доброде́телей его́ насле́дниче.

Ра́дуйся, посто́м умертви́вый в себе́ душетле́нныя стра́сти; ра́дуйся, моли́твами усе́рдными отрази́вый вся́ искуше́ния диа́вольская.

Ра́дуйся, возше́дый на высоту́ соверше́нства духо́внаго; ра́дуйся, прини́кий во глубину́ смире́ния свята́го.

Ра́дуйся, сле́з твои́х тече́ньми уплодоноси́вый ни́ву душе́вную; ра́дуйся, и́же из глубины́ воздыха́нми приобреты́й чистоту́ серде́чную.

Ра́дуйся, преподо́бне о́тче на́ш Мефо́дие.

Конда́к 1.

Избра́нный учениче́ вели́каго учи́теля, богоно́снаго чудотво́рца Се́ргиа, и ди́вный подража́телю жития́ его́ свята́го, преподо́бне о́тче Мефо́дие, пе́сньми восхваля́ем тя́ с любо́вию, засту́пника на́шего: ты́ же я́ко име́яй дерзнове́ние ко Го́споду, моли́ся вы́ну о спасе́нии на́с гре́шных, от вся́ких бе́д избавля́я зову́щих ти́:

Ра́дуйся, преподо́бне о́тче на́ш Мефо́дие.

Моли́тва пе́рвая.

О свяще́нная главо́, земны́й а́нгеле и небе́сный челове́че, преподо́бне и богоно́сне о́тче на́ш Мефо́дие! Припа́даем к тебе́ с ве́рою и любо́вию, и мо́лимся приле́жно: яви́ на́м смире́нным и гре́шным свято́е оте́ческое твое́ заступле́ние. Се́ бо гре́х ра́ди на́ших, не и́мамы свобо́ды ча́д Бо́жиих проси́ти о потре́бах на́ших Го́спода и Влады́ку на́шего, но тебе́, моли́твенника благоприя́тнаго к Нему́ предлага́ем, и про́сим тя́ со усе́рдием мно́гим, испроси́ на́м у бла́гости Его́ благопотре́бныя да́ры душа́м и телесе́м на́шым: ве́ру пра́ву, наде́жду спасе́ния несомне́нну, любо́вь ко все́м нелицеме́рну, в искуше́ниих му́жество, в злострада́ниих терпе́ние, в моли́твах постоя́нство, ду́ш и теле́с здра́вие, земли́ плодоно́сие, возду́ха благорастворе́ние, жите́йских потре́б дово́льство, ми́рное и безмяте́жное житие́, благу́ю христиа́нскую кончи́ну, и до́брый отве́т на Стра́шном Суде́ Христо́ве.

Испроси́, уго́дниче Бо́жий, у Царя́ ца́рствующих и Го́спода госпо́дствующих на́м, вопию́щым: стра́ждущую страну́ Росси́йскую от лю́тых безбо́жник и вла́сти и́х да свободи́т, и да возста́вит престо́л правосла́вных прави́телей; ве́рных рабо́в Его́. В ско́рби и печа́ли де́нь и но́щь вопию́щих к Нему́, многоболе́зный во́пль да услы́шит и да изведе́т от поги́бели живо́т на́ш.

Не забу́ди, свя́тче Бо́жий, и оби́тель твою́ святу́ю, тобо́ю созда́нную и при́сно тя́ чту́щую, но соблюди́ ю́, и все́х подвиза́ющихся в не́й, и на поклоне́ние в ню́ приходя́щих невреди́мыми от искуше́ний диа́вольских и вся́каго зла́. Е́й, преподо́бне о́тче! Не лиши́ на́с по́мощи твоея́ небе́сныя, но моли́твами твои́ми все́х на́с приведи́ в приста́нище спасе́ния, и насле́дники яви́ на́с бы́ти всесве́тлаго Ца́рствия Христо́ва: да пое́м и сла́вим неизрече́нныя щедро́ты Человеколю́бца Бо́га, Отца́, и Сы́на, и Свята́го Ду́ха, и твое́ свято́е заступле́ние, во ве́ки веко́в. Ами́нь.

Моли́тва втора́я.

О вели́кий уго́дниче Христо́в и пресла́вный чудотво́рче, преподо́бне о́тче на́ш Мефо́дие! При́зри на ны́ гре́шныя, обурева́емыя треволне́нием жите́йских страсте́й, и к тебе́ вопию́щыя: мы́ бо ча́да твоя́ духо́вныя, и огра́ды твоея́ слове́сныя о́вцы, на тя́, по Бо́зе и Богоро́дице, упова́ние на́ше возлага́ем, и тя́ со умиле́нием про́сим; твои́м хода́тайством ко Го́споду Бо́гу испроси́ на́м ми́р, здра́вие, долгоде́нствие, возду́ха благорастворе́ние, земли́ плодоно́сие, дожди́ благовре́менны, и вся́ ны́ изба́ви от вся́ких бе́д: гра́да, гла́да, пото́па, огня́, меча́, вредоно́снаго че́рвия снеда́ющаго плоды́ земны́я, тлетво́рных ве́тров, смертоно́сныя я́звы и напра́сныя сме́рти, и во вся́ких ско́рбех и печа́лех на́ших, бу́ди на́м уте́шитель благи́й и помо́щник ско́рый, сохраня́я на́с моли́твами твои́ми от паде́ний грехо́вных, и сподобля́я насле́дники бы́ти Ца́рствия Небе́снаго. Да прославля́ем вку́пе с тобо́ю все́х бла́г Пода́теля, в Тро́ице сла́вимаго и покланя́емаго Бо́га, Отца́, и Сы́на, и Свята́го Ду́ха, во ве́ки веко́в. Ами́нь.