Конда́к 1.
Возбра́нный уго́дниче Христо́в, и́же я́ко Авраа́м изше́л еси́ от земли́ твоея́, и от ро́да твоего́ и от до́му отца́ твоего́, и прише́л еси́ в зе́млю, ю́же ти́ Христо́с показа́, сотвори́ о на́с мольбу́ к Нему́, да взы́дя на Го́ру Госпо́дню, и ста́в на Ме́сте Святе́м Его́, рце́м Ти́:
Ра́дуйся, Михаи́ле, вели́кий подви́жниче Христо́в.
И́кос 1.
А́нгелом безпло́тным во пло́ти свое́й хотя́ подража́ти, себе́ сама́го отре́клся еси́, я́ко в ле́поту глаго́лати к тебе́:
Ра́дуйся, ангелоподо́бный му́жу; ра́дуйся от чре́ва ма́терняго в купе́ли креще́ния, я́ко в ми́ре свяще́нном омы́выйся.
Ра́дуйся, я́ко даны́ бы́ста тебе́ два́ кри́ла орла́ вели́каго, да пари́ши от зми́я дре́вняго; ра́дуйся, два́десяти ста́рцев от ю́ности послу́шавый.
Ра́дуйся, благоче́стия рачи́телю; ра́дуйся, его́же благоде́телей исчи́слити не мо́жем.
Ра́дуйся, я́ко вели́к еси́ ро́дом и высо́к де́лы; ра́дуйся, благоче́стие от прароди́телей я́ко предража́йшее сокро́вище получи́вый.
Ра́дуйся, я́ко бога́т еси́ неви́димыми сокро́вищи; ра́дуйся, от чре́ва ма́терняго Бо́гу освяще́нный.
Ра́дуйся, от пеле́н соедине́ние с Бо́гом возыме́вый; ра́дуйся, в поползнове́ннейшем к преткнове́нию во́зрасте в доброде́тели укрепи́выйся.
Ра́дуйся, Михаи́ле, вели́кий подви́жниче Христо́в.
Конда́к 2.
Ви́дящи у́мным о́ком, я́ко мно́го вя́щше между́ после́дними бы́ти у Бо́га, не́же пе́рвенство у земна́го царя́ носи́ти, взыска́л еси́ е́же предстоя́ти вы́ну Бо́гу и взыва́ти: Аллилу́иа.
И́кос 2.
Ра́зум Бо́жий в ду́шу твою́ прия́в, возлюби́л еси́ поноше́ние Христо́во, па́че великокня́жеских по́честей, и возрасти́л еси́ в се́рдце свое́м би́сер духо́вных сокро́вищ, е́же зря́ в тебе́, преподо́бне о́тче Михаи́ле, вопие́м:
Ра́дуйся, зде́шняя презре́вый, та́мошняя же взалка́вый; ра́дуйся, Го́спода твоего́ па́че все́х возлюби́вый.
Ра́дуйся, доброде́тели высо́кия в се́рдце твое́м вкорени́вый; ра́дуйся, в за́поведех Госпо́дних вся́ дни́ живота́ твоего́ ходи́вый.
Ра́дуйся, благода́ть Госпо́дню в се́рдце твое́ заключи́вый; ра́дуйся, и те́ло твое́ то́ю просвети́вый.
Ра́дуйся, благода́ть по́мощи на́м гре́шным у Го́спода стяжа́вый; ра́дуйся, о́ную и по сме́рти сохрани́вый.
Ра́дуйся, му́жеством укра́шенный; ра́дуйся, смире́нием и кро́тостию Бо́гу угоди́вый.
Ра́дуйся, я́ко се́рдце твое́ Го́споду прине́сл еси́; ра́дуйся, Святы́я Тро́ицы селе́ние.
Ра́дуйся, Михаи́ле, вели́кий подви́жниче Христо́в.
Конда́к 3.
Си́ла Бо́жия укрепля́ше тя́ на по́двиги, блаже́нне Михаи́ле, егда́ из преде́лов моско́вских изше́д, вся́ку го́рдость ми́ра презре́в и вре́менная оста́вив, взыска́л еси́ ве́чная, воспева́юще Бо́гу: Аллилу́иа.
И́кос 3.
Име́я вся́кое тща́ние ко спасе́нию, всели́ся во оби́тель Живонача́льныя Тро́ицы, я́коже бо в животе́ твое́м вся́кия доброде́тели и благосты́ни испо́лнен бы́л еси́, си́це и по сме́рти добро́ твори́ти не престае́ши все́м с ве́рою призыва́ющим тя́ и вопию́щим о Бо́зе сицева́я:
Ра́дуйся, посто́м и воздержа́нием пло́ть свою́ ду́ху покори́вый; ра́дуйся, неисчерпа́емый исто́чник для жа́ждущей бра́тии и для на́с гре́шных из земли́ изводи́вый.
Ра́дуйся, от исто́чника Боже́ственнаго напое́нный; ра́дуйся, ве́чною сла́вою на небесе́х венча́нный.
Ра́дуйся, благода́тию Бо́жией насыще́нный; ра́дуйся, в ри́зу спасе́ния облече́нный.
Ра́дуйся, бра́шно неисчерпа́емое указа́вый; ра́дуйся, ма́нною сло́ва Бо́жия лю́ди напита́вый.
Ра́дуйся, му́дрый стра́нниче, иски́й оте́чества го́рняго; ра́дуйся, прише́льче, зна́тность ро́да сокры́вый глубино́ю смире́ния в ми́ре до́льне.
Ра́дуйся, ма́слино благопло́дная, на па́жити Нова́града насажде́нная; ра́дуйся, оби́тели Кло́пския све́тлая похвало́.
Ра́дуйся, Михаи́ле, вели́кий подви́жниче Христо́в.
Конда́к 4.
Бу́рею мно́гих бе́д и волне́ний жите́йских одержи́мым на́м помога́й, о́тче Михаи́ле, я́коже и в мо́ре пла́вающим помо́гл еси́, да вси́ тобо́ю вспомоществу́еми, благода́рно о тебе́ пое́м Бо́гу: Аллилу́иа.
И́кос 4.
Слы́шаще и ве́дуще тя́, прему́дре, сказа́теля Та́ин Бо́жиих и и́стиннаго проро́ка, прихожда́ху к тебе́ кня́зи и простецы́, и́мже не то́кмо гряду́щее открыва́ше, но и на пу́ть и́стины Ева́нгельския наставля́ше, сего́ ра́ди, я́ко па́стыря и отца́ на́шего, ублажа́юще зове́м ти́:
Ра́дуйся, по́честей су́етных избега́вый; ра́дуйся, юро́дство Христа́ ра́ди на ся́ восприя́вый.
Ра́дуйся, ра́бе благи́й и де́лателю до́брый; ра́дуйся, наказа́телю злы́х и прогони́телю нече́стия бо́дрый.
Ра́дуйся, доброде́тельми небе́сныя да́ры стяжа́вый; ра́дуйся, благи́м житие́м пра́отцем и проро́ком подража́вый.
Ра́дуйся, я́ко Дании́лово обита́лище Ду́ха Свята́го бы́л еси́; ра́дуйся, я́ко Илиину́ ре́вность по Бо́зе в се́рдце твое́м носи́л еси́.
Ра́дуйся, кро́тости Христо́вы подража́телю; ра́дуйся, преди́вный нестяжа́телю.
Ра́дуйся, бога́тство тле́нное презре́вый; ра́дуйся, сокро́вище духо́вное возлюби́вый.
Ра́дуйся, Михаи́ле, вели́кий подви́жниче Христо́в.
Конда́к 5.
Боготе́чную стезю́, е́юже про́йде вели́кий Предте́ча на́ш Иоа́нн, всегда́ зря́, безпреткнове́нно по́прище жи́зни сея́ ше́ствовал еси́, до́ндеже дости́гл еси́ гра́да, в не́мже мно́гия оби́тели благослове́нныя угото́ваны у Отца́ Небе́снаго от сложе́ния ми́ра, иде́же восклица́ют дру́г ко дру́гу: Аллилу́иа.
И́кос 5.
Ви́деша а́нгели и челове́цы, я́коже сотвори́ тя́ Бо́г зело́ до́бра, отню́дуже и мы́ гре́шнии, не ве́дущи ка́ко нарещи́ тя́ восклица́ем:
Ра́дуйся, не́бо, благи́ми де́тельми украше́нное; ра́дуйся, земле́, хле́б стори́чный принося́щая.
Ра́дуйся, свети́ло, тьму́ безбо́жия прогоня́ющее; ра́дуйся, бы́лие, вся́кому уго́дное.
Ра́дуйся, дре́во, посреде́ рая́ Христо́ва посажде́нное; ра́дуйся, человеколю́бия бе́здно
Ра́дуйся, сострада́тельства пучи́но; ра́дуйся, стра́ха ра́ди благоче́стия не преда́вый.
Ра́дуйся, я́ко мы́сли твоя́ стра́сти не предаде́; ра́дуйся, от стра́нствия сего́ во ино́е жили́ще име́ния твоя́ предпосла́вый.
Ра́дуйся, сла́ву твою́ вну́трь име́вый; ра́дуйся, не плотска́я, но духо́вная ча́да себе́ стяжа́вый.
Ра́дуйся, Михаи́ле, вели́кий подви́жниче Христо́в.
Конда́к 6.
Пропове́дницы сла́вы Бо́жия бы́ша твоя́ сладкоглаго́ливая уста́, и́миже всегда́ велегла́сно во хра́ме Госпо́днем сло́во Бо́жие читаю́ще, ми́лость и су́д Его́ возвеща́л еси́ и глаго́лал: Аллилу́иа.
И́кос 6.
Возсия́ в се́рдце твое́м Све́т и́стинный, И́же просвеща́ет вся́каго челове́ка, гряду́щаго в ми́р. Ты́ же, я́ко му́дрыя де́вы со свети́льники свои́ми, сре́тил еси́ Его́, отону́дуже глаго́лем ти́:
Ра́дуйся, я́ко обще́ние твое́ со Отце́м и Сы́ном Его́ Иису́сом Христо́м; ра́дуйся, от ю́ности хра́м Свята́го Ду́ха бы́вый.
Ра́дуйся, Авраа́ме глаго́ляй Бо́гу: Го́споди, не мини́ раба́ Твоего́; ра́дуйся, получи́вый ве́рою обетова́ние.
Ра́дуйся, поруга́нием и ра́нами искуше́ние прие́мый; ра́дуйся, в ми́лостех прише́дый.
Ра́дуйся, угаси́вый си́лу о́гненную; ра́дуйся, Писа́ний Свяще́нных испыта́телю.
Ра́дуйся, апо́стол подража́телю; ра́дуйся, Христо́во благоуха́ние.
Ра́дуйся, немощству́ющих ду́ш прия́телю; ра́дуйся, нечести́вых наказа́телю.
Ра́дуйся, Михаи́ле, вели́кий подви́жниче Христо́в.
Конда́к 7.
Хотя́щу досто́йно почти́ти тя́ подоба́ет подража́ти свято́му житию́ твоему́: ничто́же бо благоуго́дно тебе́, то́кмо храни́ти словеса́ Госпо́дни и глаго́лати: Аллилу́иа.
И́кос 7.
Но́вую за́поведь написа́ на́м Иоа́нн, я́ко тьма́ мимохо́дит и Све́т и́стинный сия́ет, в Не́мже ты́ ходя́, ви́дел еси́ и да́льняя я́ко бли́жняя. Сего́ ра́ди вопие́м ти́:
Ра́дуйся, луче́ немерца́ющаго Со́лнца; ра́дуйся, при пото́це сло́ва Бо́жия воспита́нный.
Ра́дуйся, мно́гия доброде́тели, я́ко в вели́кий кора́бль, в свою́ ду́шу собра́вый; ра́дуйся, земле́, в не́бо претворе́нная.
Ра́дуйся, прилежа́щия пу́ты расто́ргнувый; ра́дуйся, непоро́чности храни́телю.
Ра́дуйся, до́бре во все́м пожи́вый; ра́дуйся, я́ко тебе́ су́щу на земли́ поста́ви Христо́с хра́мину нерукотворе́ну на небеси́.
Ра́дуйся, А́велю, себе́ сама́го Бо́гу в же́ртву принесы́й; ра́дуйся, но́вый Мафуса́ле, не де́вять со́т шестьдеся́т де́вять ле́т, но во ве́ки живы́й.
Ра́дуйся, Дави́де, мы́сленнаго Голиа́фа победи́вый; ра́дуйся, Илие́, ре́вностию по Бо́зе ревнова́вый.
Ра́дуйся, Михаи́ле, вели́кий подви́жниче Христо́в.
Конда́к 8.
Стра́нное виде́ние: я́ко ты́, челове́к сы́й, твори́л еси́ па́че челове́ка. Все́ бо земно́е благоро́дие оста́вив, Христа́ ра́ди на земли́ юро́д бы́л еси́, и са́м отрыва́л еси́ от себе́ тщесла́вие: безче́стие и укори́зны претерпе́л еси́, сего́ ра́ди невозбра́нен восхо́д к небеси́ обре́л еси́, глаго́ля: Аллилу́иа.
И́кос 8.
Ве́сь Бо́гу преда́вся же́ртву жи́ву себе́ сама́го прине́сл еси́ Ему́, Его́ же ра́ди слы́шиши от на́с:
Ра́дуйся, Богови́дцев нра́вом уподо́бивыйся; ра́дуйся, ревни́телю проро́ков.
Ра́дуйся, словесы́ твои́ми Вели́кий Но́вград облагоуха́вый; ра́дуйся, небе́сных вра́т дости́гнувый.
Ра́дуйся, бу́дущее предсказа́вый; ра́дуйся, а́лчущия ду́ши напита́вый.
Ра́дуйся, я́ко ты́ еси́ пи́щею нетле́нною в живо́т ве́чный мно́гия руково́дствовал еси́; ра́дуйся, тьму́ нече́стия прогоня́яй.
Ра́дуйся, я́ко пе́снь Бо́гу безпреста́нно воспева́л еси́; ра́дуйся, я́ко слу́х тво́й к Нему́ преклони́л еси́.
Ра́дуйся, рая́ кра́снаго кри́не святы́й, благоуха́ние ему́ бы́вый; ра́дуйся, благоче́стия учи́телю.
Ра́дуйся, Михаи́ле, вели́кий подви́жниче Христо́в.
Конда́к 9.
Вся́кое жите́йское попече́ние отложи́в, у́зким и приско́рбным путе́м ше́л еси́, еди́ножды в седми́це вкуша́я хле́ба и воды́, и та́ко всю́ жи́знь твою́ сконча́л еси́, широ́кий же и простра́нный пу́ть возненави́дел еси́, во е́же зва́ти Бо́гу: Аллилу́иа.
И́кос 9.
Вити́я многовеща́нныя бы́ша дея́ния жи́зни твоея́: и́миже, я́ко многочи́сленными уста́ми научи́л еси́ взыва́ти к тебе́:
Ра́дуйся, призва́нный во обще́ние Го́спода на́шего Иису́са Христа́; ра́дуйся, я́ко ты́ благове́стия апо́стольскаго послу́шал еси́.
Ра́дуйся, я́ко тебе́ сло́во кре́стное, е́же погиба́ющим юро́дство е́сть, си́ла Бо́жия бы́сть; ра́дуйся, попра́вый прему́дрость ми́ра сего́.
Ра́дуйся, обогати́выйся благода́тию Бо́жиею; ра́дуйся, сло́во Бо́жие черни́лом и тро́стию на хартии́ начерта́вый.
Ра́дуйся, я́ко ты́ и са́м спа́слся еси́ и послу́шающии тебе́; ра́дуйся, не ту́не хле́б тво́й я́дший.
Ра́дуйся, при труда́х свои́х непреста́нно мы́сливый о Бо́зе; ра́дуйся, за благодея́ния Его́ благодаре́ние воздава́яй.
Ра́дуйся, во все́м покори́выйся и́стине; ра́дуйся, я́ко ты́ ду́хом наче́н, ду́хом и скончава́лся еси́.
Ра́дуйся, Михаи́ле, вели́кий подви́жниче Христо́в.
Конда́к 10.
Хотя́ спасти́ себе́ и на́с от потопле́ния лука́ваго, я́коже апо́столи ко Христу́, спя́щу на корабли́, вопи́л еси́ моли́твою: Го́споди, спаси́ ны́, погиба́ем. О́н же восста́в, запрети́ злы́м по́мыслом, ве́тром и мо́рю пре́лестей, и бы́сть в души́ твое́й тишина́ ве́лия. Мы́ же, чудя́щеся ве́тры и мо́ре укроща́ющему, глаго́лем: Аллилу́иа.
И́кос 10
Стена́ тебе́ бы́сть благода́ть Бо́жия спаси́тельная все́м челове́ком, я́ко е́сть кре́пость, утвержде́ние и прибе́жище на́ше. Ея́ же ра́ди приве́тствуем тя́:
Ра́дуйся, я́ко изба́ви тебе́ Христо́с от мы́сленнаго фарао́на; ра́дуйся, я́ко проведе́ тебе́ чрез мо́ре искуше́ний, я́ко по су́ху.
Ра́дуйся, сто́лпе неколеби́мый вра́жиими прило́ги; ра́дуйся, посрами́вый терпе́нием врага́.
Ра́дуйся, благоче́стия реко́; ра́дуйся, чуде́с ту́чами обогаще́нный.
Ра́дуйся, сокро́вище некра́домое; ра́дуйся, отча́янных засту́пниче.
Ра́дуйся, Христа́ всели́вый в ду́шу твою́; ра́дуйся, Вели́каго Нова́града похвале́ние.
Ра́дуйся, Михаи́ле, вели́кий подви́жниче Христо́в.
Конда́к 11.
Пе́ние и благодаре́ние Влады́це возсыла́ше челове́к, его́же ты́ в мо́ри с корабле́м потопля́ема по вода́м ходя́ изба́вил еси́ от потопле́ния. Мы́ же удивля́ющеся таково́му Бо́жиему чудеси́, вопие́м: Аллилу́иа.
И́кос 11.
Светоприе́мную свещу́ во оби́тели Святы́я Тро́ицы зри́м тебе́, иде́же ты́ Ду́ха Свята́го име́я в се́рдце твое́м, во́лею в юро́дство преложи́лся еси́ на по́льзу, я́ко глаго́лати к тебе́:
Ра́дуйся, и́стинный учениче́ Христо́в; ра́дуйся, у́м сво́й впери́вый к Нему́.
Ра́дуйся, Ваа́лу ми́ра сего́ не послужи́вый; ра́дуйся, Ева́нгельскому сове́ту от ю́ности повину́выйся.
Ра́дуйся, наста́вниче мона́хом; ра́дуйся, а́нгеле, пло́тию оде́янный.
Ра́дуйся, ласка́тельством мирски́х сыно́в не уловле́нный; ра́дуйся, игра́ние пло́ти обузда́вый.
Ра́дуйся, смире́ния Христо́ва ревни́телю; ра́дуйся, я́ко ты́ посто́м свои́м и бде́нием мно́ги удиви́л еси́.
Ра́дуйся, благослове́нием свои́м тщи́я жи́тницы хле́ба испо́лнивый;
ра́дуйся, свети́льниче светле́йший со́лнца.
Ра́дуйся, Михаи́ле, вели́кий подви́жниче Христо́в.
Конда́к 12.
Благода́ть воз благода́ть прия́вшая ма́терь на́ша Це́рковь водо́ю и ду́хом породи́ тебе́, ча́до свое́, е́же вы́ну благодари́ти Бо́гу и зва́ти на́м: Аллилу́иа.
И́кос 12.
Пою́щия твоя́ ше́ствия к го́рним селе́ниим, о́тче Михаи́ле, не ктому́ в зерца́ле и гада́ниих, но лице́м к лицу́ зри́ши Святу́ю Тро́ицу, взыва́ем ти́:
Ра́дуйся, я́ко ты́ досто́йную трудо́м свои́м по́честь стяжа́л еси́; ра́дуйся, со Христо́м победи́вый ми́р.
Ра́дуйся, я́ко сме́рть твоя́ не е́сть сме́рть, но преставле́ние; ра́дуйся, я́ко ты́ на небеса́ вше́л еси́.
Ра́дуйся, я́ко ты́ в не́дрех Авраа́млих воспочи́л еси́; ра́дуйся, я́ко го́рняго све́та исполня́ешися.
Ра́дуйся, я́ко ты́ Вели́кому Царю́ предстои́ши вы́ну; ра́дуйся, я́ко ты́ к Самому́ Исто́чнику красоты́ прише́л еси́.
Ра́дуйся, тя́жкаго узи́лища жи́зни избежа́вый; ра́дуйся, я́ко ты́ за труды́ досто́йную мзду́ обре́л еси́.
Ра́дуйся, я́ко ты́ чу́дным блаже́нством наслажда́ешися; ра́дуйся, даро́в небе́сных вмести́лище.
Ра́дуйся, Михаи́ле, вели́кий подви́жниче Христо́в.
Конда́к 13.
О, всехва́льне и преблаже́нне Михаи́ле, ему́же Госпо́дь и Спа́с на́ш Иису́с Христо́с со Ду́хом Святы́м даде́ пред Престо́лом Свои́м предстоя́ти! Помяни́ вся́ ны́, ве́рою па́мять твою́ почита́ющия, и моли́ о ми́ре всего́ ми́ра, да святи́тся вы́ну и́мя Пресвято́й Тро́ицы егда́ глаго́лем: Аллилу́иа.
И́кос 1.
А́нгелом безпло́тным во пло́ти свое́й хотя́ подража́ти, себе́ сама́го отре́клся еси́, я́ко в ле́поту глаго́лати к тебе́:
Ра́дуйся, ангелоподо́бный му́жу; ра́дуйся от чре́ва ма́терняго в купе́ли креще́ния, я́ко в ми́ре свяще́нном омы́выйся.
Ра́дуйся, я́ко даны́ бы́ста тебе́ два́ кри́ла орла́ вели́каго, да пари́ши от зми́я дре́вняго; ра́дуйся, два́десяти ста́рцев от ю́ности послу́шавый.
Ра́дуйся, благоче́стия рачи́телю; ра́дуйся, его́же благоде́телей исчи́слити не мо́жем.
Ра́дуйся, я́ко вели́к еси́ ро́дом и высо́к де́лы; ра́дуйся, благоче́стие от прароди́телей я́ко предража́йшее сокро́вище получи́вый.
Ра́дуйся, я́ко бога́т еси́ неви́димыми сокро́вищи; ра́дуйся, от чре́ва ма́терняго Бо́гу освяще́нный.
Ра́дуйся, от пеле́н соедине́ние с Бо́гом возыме́вый; ра́дуйся, в поползнове́ннейшем к преткнове́нию во́зрасте в доброде́тели укрепи́выйся.
Ра́дуйся, Михаи́ле, вели́кий подви́жниче Христо́в.
Конда́к 1.
Возбра́нный уго́дниче Христо́в, и́же я́ко Авраа́м изше́л еси́ от земли́ твоея́, и от ро́да твоего́ и от до́му отца́ твоего́, и прише́л еси́ в зе́млю, ю́же ти́ Христо́с показа́, сотвори́ о на́с мольбу́ к Нему́, да взы́дя на Го́ру Госпо́дню, и ста́в на Ме́сте Святе́м Его́, рце́м Ти́:
Ра́дуйся, Михаи́ле, вели́кий подви́жниче Христо́в.
Моли́тва пе́рвая.
О, преподо́бне и преблаже́нне о́тче на́ш Михаи́ле, ты́, возжела́в усе́рдно ше́ствовати во сле́д Го́спода на́шего Иису́са Христа́, вся́ плотска́я мудрова́ния отри́нул еси́: ты́ оте́чество свое́, ро́д и вре́менное благоро́дство и земна́го ца́рствия насле́дие оста́вив, мона́шества и юро́дства пу́ть ко спасе́нию и к насле́дию Ца́рствия Небе́снаго предызбра́л еси́; прише́д же ди́вне во оби́тель Пресвяты́я Тро́ицы, в не́й трудолю́бно и богоуго́дно подвиза́яся, по премно́гу ко устрое́нию ея́ споспешествова́л еси́ и, от все́х бе́д, от гла́да, вра́жьего нахожде́ния, и о́гненнаго запале́ния, от вся́каго зла́ о́ную сохраня́я и защища́я живу́щих в не́й и к не́й притека́ющих, пути́ Госпо́дню поуча́л еси́; ты́ и ны́не, Пресвяте́й Тро́ице со все́ми святы́ми предстоя́ и непреста́нно насыща́яся зре́ния Божества́ Трисве́тлаго, помина́й, мо́лим тя́, чту́щих святу́ю па́мять твою́, не премолчи́, уго́дниче Христо́в, ко Го́споду моля́ся, да О́н, благода́тию свое́ю осеня́я притека́ющих к тебе́ и мо́щи твоя́ уста́ми и се́рдцем лобза́ющих, здра́вы и невреди́мы сохрани́т и от вся́кия напа́сти свободи́т, подая́ путеше́ствующим в пути́ благопоспе́шество, боля́щим здра́вие, печа́льным утеше́ние, си́рым, вдови́цам и все́м напа́ствуемым ско́рое заступле́ние и вспоможе́ние и от вра́жиих наве́тов тве́рдое огражде́ние и защище́ние. Не преста́й же моля́ся и о Богохрани́мей стране́ на́шей, я́ко да, твои́м предста́тельством и моли́твами сохраня́еми, вси́ возмо́жем по́двиг тече́ния небла́зненно соверши́ти, сла́вящее Святу́ю Тро́ицу, Отца́ и Сы́на и Свята́го Ду́ха, и твое́ заступле́ние, ны́не и при́сно и во ве́ки веко́в. Ами́нь.
Моли́тва втора́я.
О, всехва́льне уго́дниче Христо́в и чудотво́рче преди́вный Михаи́ле! Услы́ши у́бо ны́не моле́ние на́ше и ми́лостив сотвори́ся к на́м гре́шным, с ве́рою на честны́й о́браз тво́й взира́ющим и к ра́це святы́х моще́й твои́х припа́дающим. Ты́ а́ще и жи́л еси́ на земли́, оба́че дела́ а́нгельския твори́л еси́. Неукло́нно во́лю Бо́жию исполня́я мно́гия доброде́тели стяжа́л еси́ и по́двигом юро́дства Христа́ сугу́бо просла́вил еси́. Ны́не же в ца́рстве сла́вы ве́чно пребыва́еши и мо́лишися за ны́, сро́дницы твоя́ земны́я. Мо́лим тя́, о́тче преподо́бне, воззри́ ми́лостиво на ны́, немощны́я ча́да твоя́ духо́вныя, испроси́ на́м на враги́ одоле́ние, в ско́рбех заступле́ние, Це́ркви Правосла́вной ми́р и утвержде́ние, архипа́стырем кре́пкое в и́стине стоя́ние и духо́вное прозре́ние, па́стырем милосе́рдие и долготерпе́ние, па́стве кро́тость и послуша́ние, мона́шествующим смиренному́дрие и и́стинное покая́ние, помози́ сохрани́тися на́м от вся́каго прило́га диа́вольскаго неврежде́нны и да́же до конца́ моли́твами твои́ми неосужде́нных на́с свободи́, я́ко да твои́м заступле́нием и по́мощию спаса́еми в любви́ и единомы́слии просла́вим Бо́га, да́вшаго тебе́ кре́пость, Ему́ же покланя́емся и благоче́стно воспева́ем Триипоста́сную Держа́ву Отца́, и Сы́на и Свята́го Ду́ха во ве́ки веко́в. Ами́нь.