Конда́к 1.
Избра́нному ста́рцу О́птинскому, Скита́ усе́рдному строи́телю и кинови́и О́птинския возроди́телю, похва́льная принесе́м пе́ния, но я́ко име́яй дерзнове́ние от бе́д и искуше́ний избавля́ти, услы́ши на́с с любо́вию тебе́ зову́щих:
Ра́дуйся, Моисе́е, оби́тели О́птинския благоукраше́ние.
И́кос 1.
А́нгельскому житию́ подража́ти жела́я, ми́р отри́нул еси́ и доброде́тели у́зкий пу́ть избра́в, в пусты́ни пожи́л еси́ и ангелоле́пным нра́вом украси́лся еси́, сего́ ра́ди восхваля́ем тя́ си́це:
Ра́дуйся, и́мже чистота́ серде́чная сия́ет; ра́дуйся, и́мже печа́ль жите́йская изчеза́ет.
Ра́дуйся, от мирски́я суеты́ отрече́ние; ра́дуйся, а́нгельския тишины́ взыска́ние.
Ра́дуйся, высото́ моли́твеннаго преуспе́яния; ра́дуйся, глубино́ смире́ннаго му́дрствования.
Ра́дуйся, я́ко еси́ и́ночествующих утвержде́ние; ра́дуйся, я́ко еси́ мирски́м утеше́ние.
Ра́дуйся, свети́ло незаходи́мых бде́ний; ра́дуйся, таи́нниче богооткрове́ний.
Ра́дуйся, и́мже пустыннолю́бцы похваля́ются; ра́дуйся, и́мже смиреннолю́бцы взыгра́ются.
Ра́дуйся, Моисе́е, оби́тели О́птинския благоукраше́ние.
Конда́к 2.
Безмо́лвия тишину́ возлюби́л еси́, о́тче Моисе́е, со пустыннолю́бцами Росла́вльских лесо́в всели́лся еси́, и непло́дие души́ твоея́ в благопло́дие претвори́л еси́ те́плыми труда́ми послуша́ния, Бо́гу непреста́нно взыва́я: Аллилу́иа.
И́кос 2.
В ра́зум и́стинный хотя́ приити́, отре́клся еси́ ве́тхаго мудрова́ния и вы́ю подклони́л еси́ в послуша́ние отце́м духо́вным, и́же свободи́ша тя́ от пу́т мирска́го мудрова́ния. Те́мже я́ко свобо́ду во Христе́ улучи́вшему, пое́м тебе́ си́це:
Ра́дуйся, послуша́ния звездо́ восходя́щая; ра́дуйся, смире́ния зерца́ло светя́щее.
Ра́дуйся, тече́ние скоре́йшее по ле́ствице доброде́телей; ра́дуйся, отсече́ние грехо́вныя во́ли ну́жднейшее.
Ра́дуйся, Росла́вльских лесо́в небе́сный граждани́не; ра́дуйся, пусты́нных отце́в приле́жный учениче́.
Ра́дуйся, А́нгелов тихообра́зное сопребыва́ние; ра́дуйся, де́монов многоплаче́вное прогна́ние.
Ра́дуйся, духо́вное пусты́ни сокро́вище; ра́дуйся, све́тлое ча́щи обита́лище.
Ра́дуйся, сла́вию псалмогла́сный; ра́дуйся, го́лубе смиреннолюби́вый.
Ра́дуйся, Моисе́е, оби́тели О́птинския благоукраше́ние.
Конда́к 3.
Градо́м прибе́жища яви́ся ти́ де́брь Росла́вльская, в не́й же от мяте́жа гра́дскаго укры́лся еси́ и я́ко село́ сла́дкое обре́л еси́ ту́ па́жить покая́ния, плодонося́щее Бо́гу непреста́нную пе́снь: Аллилу́иа.
И́кос 3.
Добро́ и красно́ пожи́л еси́, о́тче Моисе́е, в Росла́вльских леса́х со ста́рцы твои́ми, те́мже я́ко ми́ро сходя́щее на ду́шу твою́ прия́л еси́ благода́ть Всесвята́го Ду́ха и украси́лся еси́ и́ноческими доброде́тельми. Сего́ ра́ди восхваля́ем тя́ си́це:
Ра́дуйся, садоде́лателю первозда́нныя простоты́; ра́дуйся, кри́не белови́дныя чистоты́.
Ра́дуйся, розго́ безмо́лвнаго весе́лия; ра́дуйся, гро́зде серде́чнаго умиле́ния.
Ра́дуйся, воздержа́ния трапе́зо прия́тная; ра́дуйся, трезве́ния высото́ проза́рная.
Ра́дуйся, я́ко цветни́к оте́ческий процвета́еши; ра́дуйся, я́ко арома́том моли́твы благоуха́еши.
Ра́дуйся, подви́жничества пра́вило верне́йшее; ра́дуйся, страсте́й побежде́ние си́льнейшее.
Ра́дуйся, я́ко возде́лал еси́ в души́ твое́й са́д нетле́ния; ра́дуйся, я́ко стяжа́л еси́ плоды́ богопозна́ния.
Ра́дуйся, Моисе́е, оби́тели О́птинския благоукраше́ние.
Конда́к 4.
Еди́наго Бо́га взыска́л еси́ у́мною моли́твою, Еди́ному вручи́л еси́ все́ житие́ твое́, преподо́бне, и во объя́тии О́тча про́мысла при́сно поко́ился еси́, благода́рно взыва́я: Аллилу́иа.
И́кос 4.
Жела́ние монахолюби́ваго иера́рха Филаре́та услы́шал еси́, о́тче Моисе́е, и́же устро́ити Ски́т по о́бразу дре́вних подви́жников восхоте́, необину́яся прите́кл еси́ в да́льнии преде́лы Калу́жския. О́н же прозре́в в тебе́ богому́драго настоя́теля, возра́довася зело́, глаго́ля си́це:
Ра́дуйся, пусты́ни воспита́ние; ра́дуйся, Предте́чи подража́ние.
Ра́дуйся, чистоты́ усе́рдное хране́ние; ра́дуйся, Предте́чева хра́ма украше́ние.
Ра́дуйся, по́стничеством я́ко ди́виим ме́дом себе́ пита́вый; ра́дуйся, подви́жничеством я́ко вельблю́жим ме́хом себе́ согре́вый.
Ра́дуйся, оте́ческих преда́ний основа́тельное водруже́ние; ра́дуйся, и́ноческих уста́вов неукло́нное соблюде́ние.
Ра́дуйся, тве́рдое безмо́лвия огражде́ние; ра́дуйся, невозмути́мое моли́твенником оти́шие.
Ра́дуйся, и́мже Ски́т устроя́ется; ра́дуйся, и́мже О́птина пу́стынь возрожда́ется.
Ра́дуйся, Моисе́е, оби́тели О́птинския благоукраше́ние.
Конда́к 5.
Звезду́ боготе́чну узре́в в Скиту́ Про́мыслом явле́нную, ико́ну Богоро́дичную «Зна́мение», ю́же я́ко свети́льник поста́вил еси́ с бра́том твои́м в це́ркви Предте́чевой, Тоя́ бо ра́ди хода́тайства позна́сте Промысли́теля ва́шего и моли́твою достиго́сте Недостижи́маго в ра́дости пою́ще Ему́: Аллилу́иа.
И́кос 5.
И́ноческия по́двиги ва́ша ви́дя монахолюби́вый иера́рх, и́же поста́ви вы́ в главу́ у́гла О́птины пу́стыни, бра́та твоего́ во игу́мены Скита́, тебе́ же в настоя́теля богому́драго. Сего́ ра́ди восхваля́ем тя́ си́це:
Ра́дуйся, Скита́ кре́пкое основа́ние; ра́дуйся, О́птины пу́стыни благостоя́ние.
Ра́дуйся, красото́ мона́шескаго богослуже́ния; ра́дуйся, долгото́ ски́тскаго псалмопе́ния.
Ра́дуйся, Введе́нския оби́тели святоизбра́нный па́стырю; ра́дуйся, О́птинскаго ста́рчества му́дрый созида́телю.
Ра́дуйся, мона́шествующих любвеоби́льное попече́ние; ра́дуйся, па́ствы твоея́ слове́сною пи́щею утучне́ние.
Ра́дуйся, грехо́вных на́выков отсече́ние; ра́дуйся, доброде́тельных плодо́в прозябе́ние.
Ра́дуйся, и́ночествующим стено́ неразори́мая; ра́дуйся, ски́тником приста́нище невла́емое.
Ра́дуйся, Моисе́е, оби́тели О́птинския благоукраше́ние.
Конда́к 6.
Кре́ст па́стырскаго служе́ния от святи́теля Филаре́та прия́л еси́, о́тче Моисе́е, и́же за́поведь тебе́ даде́ вве́ренную па́ству в Ца́рствие Небе́сное путеводи́ти, ты́ же, послуша́ние сие́ до́бре проходя́, Пастыренача́льнику Христу́ укрепи́вшему тя́, не преста́л еси́ вопи́ти: Аллилу́иа.
И́кос 6.
Ли́к мона́шествующих собра́л еси́, о́тче Моисе́е, и все́м приме́р незло́бия твоего́ показа́л еси́, о́браз бы́л еси́ сло́вом и де́лом и я́ко со́лнце кра́сное оби́тель твою́ чуде́сными заря́ми облиста́в. Мы́ же, луча́ми любве́ твоея́ согре́тии, воспева́ем тебе́ си́це:
Ра́дуйся, преподо́бных похвало́; ра́дуйся, мона́шествующих весе́лие.
Ра́дуйся, многому́драя простото́; ра́дуйся, херуви́мское многоочи́тое бде́ние.
Ра́дуйся, я́ко во глубине́ безмо́лвия обре́л еси́ би́сер многоце́нный; ра́дуйся, я́ко в чистоте́ серде́чней узре́л еси́ све́т преве́чный.
Ра́дуйся, я́ко по́лк мона́шествующих предво́диши; ра́дуйся, я́ко ра́ть бесо́вскую низлага́еши.
Ра́дуйся, наста́вниче иску́сный преуспева́ющих; ра́дуйся, наказа́телю тепле́йший новонача́льнейших.
Ра́дуйся, богослуже́ния приле́жный служи́телю; ра́дуйся, богоугожде́ния худо́жный учи́телю.
Ра́дуйся, Моисе́е, оби́тели О́птинския благоукраше́ние.
Конда́к 7.
Мона́шествующим при́стань тиша́йшую устро́ити жела́я, О́птину пу́стынь, я́ко духо́вную кре́пость сози́ждил еси́. Не то́кмо сте́ны сооружа́я, но и хра́мы душе́внии благоустроя́я, е́же жи́ти бра́тии вку́пе и вопи́ти в ми́ре: Аллилу́иа.
И́кос 7.
Небеси́ подо́бный гра́д мона́шествующим согради́ти хотя́й, О́птину пу́стынь я́ко оби́тель устро́ил еси́ небожи́телей. Крестообра́зно хра́мы и колоко́льню в не́й размести́л еси́, и седмью́ ба́шнями украси́л еси́ сию́ сообра́зно да́рам Свята́го Ду́ха, те́мже восхваля́ем тя́ си́це:
Ра́дуйся, кре́посте благоче́стия; ра́дуйся, крестоявле́нное благоле́пие.
Ра́дуйся, церкве́й прему́дрый зижди́телю; ра́дуйся, целому́дрия ве́рный блюсти́телю.
Ра́дуйся, седмиба́шенное огражде́ние мона́шескаго гра́да; ра́дуйся, седмистре́льное уязвле́ние мы́сленнаго велиа́ра.
Ра́дуйся, до небеси́ досяза́яй богозда́нный сто́лпе; ра́дуйся, с Небеси́ приника́яй моли́твенный све́те.
Ра́дуйся, ка́меню оглажде́нный мно́гими искуше́ньми; ра́дуйся, сапфи́ре, сия́яй иску́сными уче́ньми.
Ра́дуйся, общежи́тия градодержа́телю; ра́дуйся, а́нгельскому ликостоя́нию подража́телю.
Ра́дуйся, Моисе́е, оби́тели О́птинския благоукраше́ние.
Конда́к 8.
О́птинскаго ста́рчества богора́сленным ке́дром яви́лся еси́, о́тче Моисе́е, от Росла́вльских лесо́в насажде́н бы́в в Скиту́, иде́же возрасти́л еси́ дубра́ву ста́рчества, плодонося́щую спасе́ние и вопию́щую Бо́гу: Аллилу́иа.
И́кос 8.
Предте́ченский Ски́т соде́лал еси́ разса́дником благоче́стия, в не́мже я́ко кри́ны се́льныя уче́ние ста́рца Паи́сия процвете́ и распространи́ся по все́й земли́ Ру́сстей. Сего́ ра́ди пожина́я кла́сы уче́ний, приноша́ем тебе́ хвалы́:
Ра́дуйся, процвете́ние целому́дрия; ра́дуйся, цветоно́сие воздержа́ния.
Ра́дуйся, терно́вник страсте́й посеца́яй; ра́дуйся, трезве́нием мы́сли очища́яй.
Ра́дуйся, лесо́в Росла́вльских благоуха́нный пло́де; ра́дуйся, ски́тскаго вертогра́да сладкосо́чный гро́зде.
Ра́дуйся, я́ко О́птинскую ни́ву удобри́л еси́ святооте́ческим уче́нием; ра́дуйся, я́ко снопы́ пожа́л еси́ укра́шенныя благоче́стием.
Ра́дуйся, ке́дре ста́рческаго окормле́ния; ра́дуйся, окри́не духо́внаго ороше́ния.
Ра́дуйся, и́мже угобзи́ся жи́тница Сло́ва; ра́дуйся, и́мже наста́влени к ве́дению Бо́га.
Ра́дуйся, Моисе́е, оби́тели О́птинския благоукраше́ние.
Конда́к 9.
Раде́л еси́ о изда́тельстве кни́жнем, о́тче Моисе́е, е́же учреди́в во оби́тели твое́й святе́й, я́ко же пе́рвее в леса́х Росла́вльских словеса́ святы́х полууста́вом спи́сывал еси́, ны́не же всю́ зе́млю Ру́сскую кни́жным уче́нием напои́л еси́. Сего́ ра́ди сло́во прему́дрости тебе́ Пода́вшему вопие́м: Аллилу́иа.
И́кос 9.
Словеса́ твоя́ я́ко со́ль спаси́тельная все́м бы́ша, да́ром бо разсужде́ния увенча́л бы́л еси́, те́мже и наказа́ния во вре́мя благопотре́бно подава́л еси́ и немощны́м любо́вию снисходи́л еси́, си́це и на́с осоли́ сло́вом твоея́ прему́дрости, воспева́ющих ти́ сладкопе́ния сия́:
Ра́дуйся, прему́дрости таи́нниче; ра́дуйся, кро́тости наста́вниче.
Ра́дуйся, кни́го одушевле́нная слове́с оте́ческих; ра́дуйся, свире́ле духо́вная пе́сней па́стырских.
Ра́дуйся, медоречи́вая устна́ вразумле́ния; ра́дуйся, сладкоглаго́ливый язы́че назида́ния.
Ра́дуйся, реко́ уче́ний приснотеку́щая; ра́дуйся, руко́ ми́лостей приснодаю́щая.
Ра́дуйся, я́ко затми́л еси́ уче́ния ерети́ческия; ра́дуйся, я́ко яви́л еси́ красоту́ Правосла́вия.
Ра́дуйся, тро́сте му́дрых изрече́ний; ра́дуйся, сви́тче та́йных изъявле́ний.
Ра́дуйся, Моисе́е, оби́тели О́птинския благоукраше́ние.
Конда́к 10.
Терпе́ние соверше́нное стяжа́л еси́, о́тче Моисе́е, бы́л еси́ я́коже сто́лп непоколеби́м в напа́стех и беда́х твои́х и дости́гл еси́ в небу́рное приста́нище безстра́стия, Умири́телю ми́ра взыва́я: Аллилу́иа.
И́кос 10.
Упоко́ился еси́ в во́ли Бо́жией, о́тче Моисе́е, всю́ наде́жду твою́ на Про́мысл Бо́жий возложи́л еси́, отону́дуже и попече́ние о оби́тели Домострои́телю спасе́ния на́шего вве́рил еси́, И́же и сози́жде оби́тель твою́ я́ко гра́д святы́х. Сего́ ра́ди восхваля́ем тя́ си́це:
Ра́дуйся, ве́ро адамантосве́тлая; ра́дуйся, наде́ждо твердостоя́тельная.
Ра́дуйся, стено́ неразори́мая искуше́ниями; ра́дуйся, забра́ло проти́ву диа́вольских нападе́ний.
Ра́дуйся, ты́ бо киновиа́рхом яви́лся еси́ богодохнове́нным; ра́дуйся, ты́ бо безмолвнолю́бцам бы́л еси́ наста́вником прему́дрым.
Ра́дуйся, оби́тели незы́блемое основа́ние; ра́дуйся, бра́тии незло́бивое наказа́ние.
Ра́дуйся, блюсти́телю Боже́ственнаго смотре́ния; ра́дуйся, внеза́пное ску́дости восполне́ние.
Ра́дуйся, сребролю́бия изгна́ние; ра́дуйся, нищелю́бия стяжа́ние.
Ра́дуйся, Моисе́е, оби́тели О́птинския благоукраше́ние.
Конда́к 11.
Фимиа́м твои́х ми́лостей к Престо́лу Бо́жию возне́сл еси́, о́тче Моисе́е, И́же и призре́ на духо́вныя же́ртвы твоя́ и умно́жил е́сть ми́лость Свою́ к оби́тели твое́й, же́ртву хвалы́ Ему́ принося́щую: Аллилу́иа.
И́кос 11.
Христоподо́бную любы́ стяжа́л еси́, о́тче блаже́нне Моисе́е, я́ко напита́л еси́ вся́каго стра́нна и ни́ща и убо́гих ми́ловал еси́, от ни́хже благода́рственная тебе́ прино́сится похвала́:
Ра́дуйся, бе́дствующим вспоможе́ние; ра́дуйся, си́рых и убо́гих отдохнове́ние.
Ра́дуйся, милосе́рдия све́тлая пала́то; ра́дуйся, благотворе́ния ца́рская хра́мино.
Ра́дуйся, щедро́т Бо́жиих мо́ре неисчерпа́емое; ра́дуйся, благоутро́бия ми́лости неоскудева́емое.
Ра́дуйся, я́ко неистощи́мое еси́ ни́щих сокро́вище; ра́дуйся, я́ко неиждева́емое тружда́ющихся еси́ вознагражде́ние.
Ра́дуйся, терпеливоду́шное моли́твенное извеще́ние; ра́дуйся, чуде́сное монасты́рския казны́ обогаще́ние.
Ра́дуйся, безсре́бреников соприча́стниче; ра́дуйся, беззла́тников наста́вниче.
Ра́дуйся, Моисе́е, оби́тели О́птинския благоукраше́ние.
Конда́к 12.
Ца́рствие Бо́жие насле́дити сподо́бился, еси́ о́тче Моисе́е, я́ко пре́жде всего́ попече́ние о стяжа́нии Того́ име́л еси́ и я́ко му́дрый купе́ц нището́ю ду́ха бога́тства небе́сная приобре́л еси́. Те́мже Христу́ обогати́вшему тя́ неподку́пным зла́том смире́ния, благода́рно воззва́л еси́: Аллилу́иа.
И́кос 12.
Чистото́ю серде́чною мра́к страсте́й разгна́л еси́, преподо́бне, чи́сто зри́ши ны́не Тро́ицы Пречи́стый Све́т и наслажда́ешися ра́йскими красота́ми неизрече́нными, но не забу́ди ча́д твои́х во мра́ке грехо́внем су́щих и благода́тнаго посеще́ния сподо́би с любо́вию тебе́ зову́щих:
Ра́дуйся, черто́же моли́твеннаго озаре́ния; ра́дуйся, пучи́но сле́знаго очище́ния.
Ра́дуйся, кро́тости и безгне́вия ти́хое поко́ище; ра́дуйся, духо́внаго разсужде́ния све́тлое обита́лище.
Ра́дуйся, О́птинскаго ста́рчества кре́пкое благособра́ние; ра́дуйся, Предте́ченскаго Скита́ тве́рдое благостоя́ние.
Ра́дуйся, одушевле́нный о́бразе самопринужде́ния; ра́дуйся, мона́шеских чино́в благоустрое́ние.
Ра́дуйся, любве́ оте́ческия неизсяка́емый исто́чниче; ра́дуйся, ми́лости Боже́ственныя та́инственный напе́рсниче.
Ра́дуйся, и́мже доброде́тели послуша́ния науча́емся; ра́дуйся, и́мже к смиренному́дрию наставля́емся.
Ра́дуйся, Моисе́е, оби́тели О́птинския благоукраше́ние.
Конда́к 13.
О преподо́бне о́тче Моисе́е, киновиа́рше богодохнове́нне, при́зри на на́с ове́ц заблу́ждших и я́ко па́стырь до́брый к богоуго́дному житию́ приведи́, наста́ви на́с на стези́ спасе́ния, да избе́гнув путе́й грехо́внаго своево́лия, еди́неми усты́ и еди́нем се́рдцем вку́пе с тобо́ю пое́м Бо́гу: Аллилу́иа.
И́кос 1.
А́нгельскому житию́ подража́ти жела́я, ми́р отри́нул еси́ и доброде́тели у́зкий пу́ть избра́в, в пусты́ни пожи́л еси́ и ангелоле́пным нра́вом украси́лся еси́, сего́ ра́ди восхваля́ем тя́ си́це:
Ра́дуйся, и́мже чистота́ серде́чная сия́ет; ра́дуйся, и́мже печа́ль жите́йская изчеза́ет.
Ра́дуйся, от мирски́я суеты́ отрече́ние; ра́дуйся, а́нгельския тишины́ взыска́ние.
Ра́дуйся, высото́ моли́твеннаго преуспе́яния; ра́дуйся, глубино́ смире́ннаго му́дрствования.
Ра́дуйся, я́ко еси́ и́ночествующих утвержде́ние; ра́дуйся, я́ко еси́ мирски́м утеше́ние.
Ра́дуйся, свети́ло незаходи́мых бде́ний; ра́дуйся, таи́нниче богооткрове́ний.
Ра́дуйся, и́мже пустыннолю́бцы похваля́ются; ра́дуйся, и́мже смиреннолю́бцы взыгра́ются.
Ра́дуйся, Моисе́е, оби́тели О́птинския благоукраше́ние.
Конда́к 1.
Избра́нному ста́рцу О́птинскому, Скита́ усе́рдному строи́телю и кинови́и О́птинския возроди́телю, похва́льная принесе́м пе́ния, но я́ко име́яй дерзнове́ние от бе́д и искуше́ний избавля́ти, услы́ши на́с с любо́вию тебе́ зову́щих:
Ра́дуйся, Моисе́е, оби́тели О́птинския благоукраше́ние.
Моли́тва.
О, Преподо́бне о́тче Моисе́е, кинови́и О́птинския возроди́телю и Скита́ Предте́ченскаго строи́телю! Ты́ от ю́ности твоея́ Христу́ после́довал еси́ и в де́брех Росла́вльских непреста́нною моли́твою Ему́ усе́рдно послужи́л еси́. По́слежде Про́мыслом Бо́жиим при́зван бы́л еси́ кре́ст игу́менскаго служе́ния в О́птинстей пу́стыни понести́, иде́же ангелоподо́бное общежи́тие насади́л еси́ и безмо́лвный Ски́т устро́ил еси́, из него́же я́ко от черто́га О́птинское ста́рчество зе́млю на́шу заре́ю благоче́стия осия́ло су́ть.
Сего́ ра́ди про́сим тя́, я́ко ве́рна домоправи́теля строе́ния Христо́ва и богому́драго па́стыря слове́снаго ста́да: утоли́ти раздо́ры в на́с су́щия и на стези́ единомы́слия наста́вити слепо́тствующии умы́ на́ша. Приведи́ на́с на зла́чныя поля́ святооте́ческих преда́ний и чи́стою водо́ю умиле́ния напо́й жа́ждущия ду́ши на́ша. Вдохни́ в на́с си́лу благоче́стия свы́ше к по́двигу, е́же после́довати твоему́ житию́ богоуго́дному, да отреши́вшеся страсте́й, сою́зом любви́ свя́заннии, тобо́ю приведе́ни бу́дем к Пастыренача́льнику Христу́, Ему́ же че́сть и поклоне́ние возсыла́ем со Безнача́льным Его́ Отце́м и Пресвяты́м и Благи́м и Животворя́щим Его́ Ду́хом ны́не и при́сно и во ве́ки веко́в. Ами́нь.
