Конда́к 1.
Избра́нный от Бо́га и к ли́ку преподо́бных сопричте́нный, от ю́ности кре́ст сво́й взе́м, Христу́ после́довал еси́, в моли́твах, поще́нии, во бде́нии и злострада́нии житие́ твое́ проводя́; те́м же Госпо́дь, воззре́в на твоя́ труды́, чудесы́ тя́ прославля́ет и воспева́ти науча́ет:
Ра́дуйся, преподо́бне о́тче Моисе́е, земли́ Уфи́мския похвало́ и моли́твенниче о на́с преди́вный.
И́кос 1.
А́нгелов Творе́ц избра́ тя́ изнача́ла и всели́ в ю́ное се́рдце твое́ любо́вь к моли́тве, чте́нию Сло́ва Бо́жия и святы́х жития́, и́миже поуча́яся, укрепля́лся еси́ во благоче́стии, ни во что́ же вменя́я суету́ ми́ра сего́. Мы́ же с любо́вию вопие́м тебе́ такова́я:
Ра́дуйся, от младе́нчества Бо́гом избра́нный; ра́дуйся, от купе́ли Креще́ния благода́тию Ду́ха Свята́го испо́лненный.
Ра́дуйся, от о́трочества моли́твою к Бо́гу горе́вый; ра́дуйся, ве́лие попече́ние о спасе́нии души́ своея́ изде́тска име́вый.
Ра́дуйся, духо́вную усла́ду в се́м обрета́вый; ра́дуйся, се́мя Христо́ва уче́ния в се́рдце свое́м возрасти́вый.
Ра́дуйся, му́дрость ми́ра сего́ ни во что́ же вмени́вый; ра́дуйся, вся́кия мирски́я суеты́ избега́вый.
Ра́дуйся, на небеси́ и на земли́ просла́вленный; ра́дуйся, вопло́щшемуся Бо́гу Сло́ву ве́рно послужи́вый.
Ра́дуйся, в пропове́дании Ева́нгелия Пра́вды ре́вность ве́лию яви́вый; ра́дуйся, Пресла́дкаго Го́спода Иису́са все́м се́рдцем твои́м возлюби́вый.
Ра́дуйся, таи́нниче Бо́жий, еще́ на земли́ Небе́сных бла́г вкуси́вый.
Ра́дуйся, преподо́бне о́тче Моисе́е, земли́ Уфи́мския похвало́ и моли́твенниче о на́с преди́вный.
Конда́к 2.
Ви́дя Госпо́дь ду́шу твою́, гла́дом духо́вным томи́му, вложи́ в се́рдце твое́ стремле́ние иска́ти хра́м Бо́жий. Ты́ же, смотре́нием Бо́жиим, изше́л еси́ из до́ма роди́тельскаго во гра́д Уфу́, иде́же обре́л еди́нственный хра́м Преподо́бнаго Се́ргия и благода́рственно воспе́л еси́ хвалу́ Бо́гу: Аллилу́иа.
И́кос 2.
Ра́зум Богопросвеще́н име́я, возжеле́л еси́ Еди́ному Христу́ рабо́тати, в хра́м, обре́тенный тобо́ю, неле́ностно притека́л еси́, моли́твы приле́жныя со умиле́нием та́мо вознося́ и духо́внаго руково́дства взыску́я. Сего́ ра́ди из глубины́ се́рдца вопие́м ти́:
Ра́дуйся, до́м оте́ческий смотре́нием Бо́жиим оста́вивый; ра́дуйся, во гра́д Уфу́ Про́мыслом Его́ притеки́й.
Ра́дуйся, еди́нственный хра́м Преподо́бнаго Се́ргия та́мо обреты́й; ра́дуйся, обре́тением сего́ сокро́вища духо́вно возвесели́выйся.
Ра́дуйся, благодаре́ние Го́споду за сие́ обре́тение от всего́ се́рдца вознесы́й;
Ра́дуйся, моли́тися в хра́ме се́м вся́кую возмо́жность иска́вый.
Ра́дуйся, духо́вным хле́бом та́мо насыща́емый; ра́дуйся, дру́га по душе́ свое́й на ве́сь живо́т сво́й та́мо обреты́й.
Ра́дуйся, и́го Христо́во, благо́е и ле́гкое, на Ра́мо твое́ восприе́мый; ра́дуйся, приме́ром твои́м святы́м вся́ ны́ к после́дованию Христо́ву привлека́яй.
Ра́дуйся, ре́вности тезоимени́тый ревни́телю о сла́ве Бо́жией; ра́дуйся, немо́лчный благове́стниче ева́нгельскаго душеспаси́тельнаго уче́ния.
Ра́дуйся, благи́й ра́бе и ве́рный, за безме́рные по́двиги твои́ вше́дый в ра́дость Го́спода своего́.
Ра́дуйся, преподо́бне о́тче Моисе́е, земли́ Уфи́мския похвало́ и моли́твенниче о на́с преди́вный.
Конда́к 3.
Си́лою Вы́шняго, дарова́нною тебе́, преподо́бне, долготерпе́нием твои́м бы́л еси́ преукра́шен, егда́ во гра́де Уфе́, не име́я, где́ главу́ приклони́ти, непреста́нно в труде́х пребыва́ти понужде́н бы́л еси́, за вся́ благодаря́ Го́спода и с любо́вию поя́ Ему́: Аллилу́иа.
И́кос 3.
Ви́дя опа́сность лиши́тися гра́ду Уфе́ еди́нственнаго хра́ма, от богобо́рческих власте́й, ве́лиею да́нию утесня́ема, ты́, преподо́бне, ку́пно с настоя́телем сугу́быя труды́ поне́сл еси́, о́браз подава́я ве́рным подража́ти в се́м тебе́. Мы́ же, в хра́ме се́м ны́не моля́щиися, от тебе́ утеше́ние получа́юще, воспева́ем ти́ сицева́я:
Ра́дуйся, о сохране́нии хра́ма непреста́нное попече́ние име́вый; ра́дуйся, сре́дства на содержа́ние его́ вся́чески иска́вый.
Ра́дуйся, сего́ ра́ди ку́пно с настоя́телем пещи́ в дома́х ве́рных устроя́вый; ра́дуйся, свои́ми труда́ми и лю́дем по́льзу подава́вый.
Ра́дуйся, си́ми сре́дствами от закры́тия хра́м спаса́вый; ра́дуйся, для ча́д церко́вных та́ко духо́вное сие́ сокро́вище сохрани́ти помога́вый.
Ра́дуйся, я́ко и са́м, пламене́я в моли́тве, в хра́ме се́м пребыва́вый; ра́дуйся, проро́ка Бо́жия Илии́, в пеще́ре жи́вшаго, благи́й подража́телю.
Ра́дуйся, Крести́теля Христо́ва Иоа́нна, в пусты́не обита́вшаго, ре́вностный после́дователю; ра́дуйся, подви́жническое служе́ние лю́дем Бо́жиим возлюби́вый.
Ра́дуйся, мно́гая благода́тная дарова́ния стяжа́вый; ра́дуйся, Зако́н Бо́га твоего́ на скрижа́лех се́рдца твоего́ написа́вый.
Ра́дуйся, свети́льниче, о не́мже не восхоте́ Бо́г да под спу́дом пребыва́ет, но на све́щнице всенаро́днаго зре́ния и поклоне́ния поста́вится.
Ра́дуйся, преподо́бне о́тче Моисе́е, земли́ Уфи́мския похвало́ и моли́твенниче о на́с преди́вный.
Конда́к 4.
Благода́тию Свое́ю укрепи́ тя́ Госпо́дь, егда́ при́зван бы́л еси́ к несе́нию во́инской слу́жбы среди́ неве́дущих Бо́га и проти́вящихся Ему́. И та́мо ты́, не престава́я поуча́тися в Зако́не Госпо́дни, небоя́зненно пред все́ми возноси́л еси́ свои́ моли́твы ко Го́споду, из глубины́ души́ воспева́я Ему́: Аллилу́иа.
И́кос 4.
Ви́дя вра́г ро́да челове́ческаго чи́стое твое́ житие́, распали́ проти́ву тебе́ безбо́жныя военача́льники, повеле́вшия изъя́ти у тебе́ Свято́е Ева́нгелие. Ты́ же гла́д на себе́ наложи́ и преста́ повинова́тися и́м, до́ндеже не возвратя́т Святы́ню сию́, побуди́ си́м верну́ти тебе́ драго́е сокро́вище. За таково́е дерзнове́ние ублажа́юще тя́, глаго́лем си́це:
Ра́дуйся, до́брый во́ине Христо́в; ра́дуйся, си́лою ве́ры во Христа́ преиспо́лненный.
Ра́дуйся, на вся́цем ме́сте Сло́вом Бо́жиим насыща́тися жела́вый; ра́дуйся, и во́ин бы́в, разлуча́тися с Ни́м не восхоте́вый.
Ра́дуйся, возврати́ти отъя́тое у тебе́ Ева́нгелие неповинове́нием безбо́жным нача́льником дерзну́вый; ра́дуйся, в се́м с по́мощию Бо́жиею преуспе́вый.
Ра́дуйся, си́м злоухищре́ния искуси́теля победи́вый; ра́дуйся, моли́твами твои́ми и от на́с тьму́ напа́стей отгоня́яй.
Ра́дуйся, ми́р и вся́ кра́сная его́ презре́вый; ра́дуйся, о Го́рних бла́гах вы́ну помышля́вый.
Ра́дуйся, сто́лпе и свети́ло, указу́яй пу́ть пра́вый хотя́щим обрести́ его́.
Ра́дуйся, преподо́бне о́тче Моисе́е, земли́ Уфи́мския похвало́ и моли́твенниче о на́с преди́вный.
Конда́к 5.
Бу́ии ве́ка сего́, ви́дя непоколеби́мую ве́ру твою́ и любо́вь ко Го́споду, от во́инския слу́жбы тя́ отстрани́ша и безу́мным тя́, блаже́нне, наименова́ша. Ты́ же вся́ сия́ в терпе́нии неся́, за оби́дящих тя́ моли́твы возноси́л еси́, науча́я и на́с за вся́ благодари́ти Го́спода, воспева́я Ему́ хвале́бную пе́снь: Аллилу́иа.
И́кос 5.
Пропове́стся в ми́ре до́блесть по́двига твоего́, преподо́бне. Вся́ терпе́л еси́: гла́д, лише́ния, поруга́ния. Нищету́ и юро́дство, и яре́м на́с ра́ди Обнища́вшаго на ра́мена своя́ взе́м, Тому́ после́довал еси́. Помина́й на́с, о́тче Моисе́е, любо́вию чту́щих тя́, из глубины́ души́ зову́щих ти́:
Ра́дуйся, в по́двизех земно́е житие́ соверши́вый; ра́дуйся, одея́нием стра́нным и ру́бищем па́че оде́жды драги́я украси́тися вожделе́вый.
Ра́дуйся, древя́ный кре́ст, на па́перти хра́ма стра́нником ти́ да́нный, ку́пно с ико́ною на пе́рсех свои́х носи́вый; ра́дуйся, сего́ ра́ди укоре́ния и поноше́ния, я́ко хвалу́, приима́вый.
Ра́дуйся, бие́ния и ины́я досажде́ния смире́нно терпе́вый; ра́дуйся, кре́ст сво́й усе́рдно Христа́ ра́ди понесы́й.
Ра́дуйся, приима́вый па́че одра́ мя́гкаго на земли́ поверже́ние; ра́дуйся, во хра́ме то́чию в притво́ре моли́твы своя́ приноси́ти дерза́вый.
Ра́дуйся, я́ко све́т до́брых де́л твои́х немерца́емо све́тится при́сно; ра́дуйся, смире́ния свята́го преиспо́лненный и слеза́ми моли́твенными себе́ ороша́вый.
Ра́дуйся, преподо́бне о́тче Моисе́е, земли́ Уфи́мския похвало́ и моли́твенниче о на́с преди́вный.
Конда́к 6.
Ви́дя смире́ние и кро́тость твою́, Госпо́дь сподо́би тя́ пе́рваго послуша́ния во хра́ме, его́же исполня́я, с тре́петом ве́лиим входи́л еси́ во святы́й Алта́рь, благода́рственно поя́ Бо́гу А́нгельскую пе́снь: Аллилу́иа.
И́кос 6.
Узре́в смире́ние и послуша́ние твое́ и ре́вностное усе́рдие ко хра́му Госпо́дню, Архипа́стырь Уфи́мский Иоа́нн в пра́здник Преображе́ния Госпо́дня удосто́и тя́ а́нгельскаго о́браза и диа́конства и вско́ре ко служе́нию свяще́нства призва́. Ты́ же, ра́дости о се́м испо́лнився и восприя́тою в хирото́нии благода́тию облече́ся, всего́ себе́ на служе́ние Го́споду и па́стве преда́л еси́. Те́м же и слы́шиши от на́с похвалы́ сия́:
Ра́дуйся, за смире́ние свое́ а́нгельскаго о́браза восприя́тия сподо́бльшийся; ра́дуйся, во пло́ти а́нгельски пожи́в.
Ра́дуйся, и ко иере́йскому служе́нию свои́м Архипа́стырем призва́нный; ра́дуйся, сугу́бую благода́ть от Го́спода восприя́вый.
Ра́дуйся, благода́тными дара́ми изоби́льно преиспо́лненный; ра́дуйся, всесве́тлым хра́мом благода́ти Бо́жия себе́ показа́вый.
Ра́дуйся, Алтаря́ Госпо́дня благогове́йным служи́телем себе́ яви́вый; ра́дуйся, я́ко Безкро́вныя Же́ртвы досто́йным соверши́телем бы́вый.
Ра́дуйся, о́рле небопа́рный, крила́ми Богомы́слия возлете́вый зре́ти немерца́ющую све́тлость Со́лнца Пра́вды, Иису́са Христа́; ра́дуйся, по́стников воздержа́ние и у́ме чисте́йший, не оскверни́выйся пре́лестьми мирски́ми.
Ра́дуйся, на е́же ве́рою взира́л еси́, ны́не лице́м к лицу́ Непристу́пнаго Божества́ сла́ву созерца́еши.
Ра́дуйся, преподо́бне о́тче Моисе́е, земли́ Уфи́мския похвало́ и моли́твенниче о на́с преди́вный.
Конда́к 7.
Боже́ственным Све́том просвети́тися хотя́, по́стническое житие́ в воздержа́нии вся́цем проводи́л еси́, пра́вило святы́х оте́ц до́бре соблюда́я и Преподо́бному Серафи́му подража́я, стяжа́л еси́ ду́х ми́рен, о́тче Моисе́е, да си́м подви́гнеши ко спасе́нию ча́д свои́х и научи́ши воспева́ти хвале́бную пе́снь Бо́гови: Аллилу́иа.
И́кос 7.
Ве́сь благода́тных дарова́ний испо́лненный, преподо́бне Моисе́е, по́двиги твои́ми гра́д Уфу́ осия́л еси́. Мы́ же, иму́щее тя́ те́плаго моли́твенника и предста́теля пред Го́сподем о на́с, недосто́йных, со умиле́нием зове́м ти́:
Ра́дуйся, вся́кое услажде́ние отложи́вый и посто́м себе́ пита́вый; ра́дуйся, вме́сто сла́дкого пития́ слеза́ми покая́ния себе́ напоя́вый.
Ра́дуйся, по́двигами поста́ и моли́твы пло́ть свою́ ду́хови покори́вый; ра́дуйся, вся́ мы́сленная враги́ ору́жием креста́ победи́вый.
Ра́дуйся, я́ко те́ло твое́ си́м умертви́л еси́; ра́дуйся, я́ко ду́шу твою́ бде́нными моли́твами оживи́л еси́.
Ра́дуйся, в житии́ твое́м дре́вним подви́жником подража́вый; ра́дуйся, о́бразом по́двигов твои́х и на́м пу́ть спасе́ния указа́вый.
Ра́дуйся, усе́рдный исполни́телю Бо́жиих веле́ний и терпе́нием твои́м удиви́вый А́нгелов и челове́ков; ра́дуйся, притека́ющим под кро́в тво́й сла́дкое упокое́ние.
Ра́дуйся, во вся́ких ну́ждах призыва́ющим тя́ ско́рый помо́щниче; ра́дуйся, хотя́щим твоему́ непоро́чному житию́ после́довати укрепи́телю.
Ра́дуйся, путевождю́ во тме́ неве́рия блудя́щим; ра́дуйся, наде́ющимся на тя́ защище́ние непосты́дное.
Ра́дуйся, преподо́бне о́тче Моисе́е, земли́ Уфи́мския похвало́ и моли́твенниче о на́с преди́вный.
Конда́к 8.
Пропове́дник бы́л еси́ Ева́нгельския любве́ житие́м твои́м, о́тче преподо́бне, егда́ воздвиза́ху на тя́ гоне́ния. Вся́ сия́ любо́вию побежда́л еси́, добро́м за зло́ воздава́я и непреста́нно поя́ Бо́гу: Аллилу́иа.
И́кос 8.
Возсия́л еси́, блаже́нне, добро́тою души́ твоея́ к лю́дем, всего́ себе́ на служе́ние па́стве свое́й отдава́я. Благочести́вии же лю́дие, ви́дяще в тебе́ до́браго па́стыря и учи́теля, с ра́достию притека́ху к тебе́ и ве́лие утеше́ние и осла́бу в ско́рбех свои́х по моли́тве твое́й приима́ху. Мы́ же, прославля́я Го́спода, да́вшаго ти́ такову́ю благода́ть, прино́сим тебе́ сицева́я:
Ра́дуйся, огне́м любве́ к Бо́гу и бли́жним в се́рдце свое́м горе́вый; ра́дуйся, благогове́йным служе́нием свои́м ве́рных ко хра́му Бо́жию привлека́вый.
Ра́дуйся, все́х притека́вших к тебе́ му́дрыми словесы́ ко и́стине наставля́вый; ра́дуйся, в ча́с недоуме́ния мы́сль бла́гу на се́рдце полага́вый.
Ра́дуйся, помо́щником бы́л еси́ в не́мощех лежа́щим; ра́дуйся, во вся́ко вре́мя посеща́л еси́ ско́рбных и боля́щих.
Ра́дуйся, му́дрый к Бо́гу руководи́телю; ра́дуйся, за́поведей Госпо́дних ве́рный исполни́телю.
Ра́дуйся, и на земли́ Бо́гом со́браннаго твоего́ ста́да бо́дрый храни́телю; ра́дуйся, я́ко укрепля́еши после́дующих ти́ к му́жественному со враго́м боре́нию.
Ра́дуйся, я́ко хода́тайствуеши и́м венцы́, досто́йныя трудо́в и по́двигов и́х, от Христа́ Бо́га;
Ра́дуйся, я́ко и са́м пра́вы стези́ Госпо́дни соде́лал еси́ и все́х притека́ющих к тебе́ те́ми же стезя́ми ше́ствовати науча́еши.
Ра́дуйся, преподо́бне о́тче Моисе́е, земли́ Уфи́мския похвало́ и моли́твенниче о на́с преди́вный.
Конда́к 9.
Трудо́в твои́х ра́ди мно́гих, воздая́ние от Го́спода прии́м, преподо́бне: благода́тных дарова́ний прозорли́вости и исто́чник чуде́с яви́лся еси́, неду́ги душе́вныя и теле́сныя отгоня́ти. Не лиши́ и на́с твоея́ моли́твенныя по́мощи, любо́вию тя́ почита́ющих и воспева́ющих Ди́вному во святы́х Го́споду: Аллилу́иа.
И́кос 9.
Вети́й челове́ческих похвалы́ не довле́ют пости́гнути свято́е житие́ твое́, преподо́бне о́тче Моисе́е. Кто́ бо мо́жет досто́йно восхвали́ти тя́ за труды́ и по́двиги твоя́: все́х бо притека́вших к тебе́ от неду́гов душе́вных и теле́сных врачева́л еси́, грехо́вныя я́звы исцеля́я, скорбя́щих утеша́я, все́м потре́бная ко спасе́нию подава́я. Сего́ ра́ди благода́рни су́щи благоде́ющему тобо́ю Бо́гу, вопие́м ти́ си́це:
Ра́дуйся, непостижи́мыя судьбы́ Бо́жия предви́девый; ра́дуйся, благу́ю во́лю Бо́жию ве́рным открыва́вый.
Ра́дуйся, непреме́нно исполня́ти ю́ побужда́вый; ра́дуйся, наруши́телей Во́ли Бо́жией и сове́тов духо́вных прему́дре вразумля́вый.
Ра́дуйся, избра́нный собра́тиями, послуша́ние духовни́чества смире́нно понесы́й; ра́дуйся, ве́лие попече́ние о духо́вных ча́дех име́вый.
Ра́дуйся, благода́тным учи́телем для бра́тии бы́вый; ра́дуйся, неле́гкий кре́ст и́м нести́ моли́твами свои́ми помога́вый.
Ра́дуйся, я́ко от Сама́го Го́спода лови́тве духо́вней научи́лся еси́; ра́дуйся, я́ко чрез житие́ твое́ свято́е Правосла́вие в душа́х на́ших утвержда́ется.
Ра́дуйся, гра́да Уфы́ и всего́ Ура́ла многоце́нное чуде́с сокро́вище и украше́ние; ра́дуйся, и́ноков богому́дрый руководи́телю.
Ра́дуйся, преподо́бне о́тче Моисе́е, земли́ Уфи́мския похвало́ и моли́твенниче о на́с преди́вный.
Конда́к 10.
Спаси́тельный по́двиг земна́го жития́ твоего́ заверша́я, сподо́бился еси́, блаже́нне, прозре́ти кончи́ну свою́, потща́лся наставля́ти ча́д свои́х после́дним напу́тствием в жи́зни се́й во вся́ком благоче́стии и пра́вде проходи́ти ю́, воспева́я чи́стым се́рдцем хвалу́ Бо́гу: Аллилу́иа.
И́кос 10.
Сте́ны ка́менныя кре́пльше бе́ любо́вь твоя́ к Бо́гу, до после́дних бо дне́й жития́ твоего́ соверша́л еси́ слу́жбы Бо́жия, не взира́я на не́мощь своего́ телесе́. То́кмо в де́нь преставле́ния твоего́ не возмо́гл еси́ приити́ в хра́м, Архипа́стыря Анато́лия о се́м извеща́я. Приими́, уго́дниче Христо́в, от на́ших лю́бящих тя́ серде́ц пе́ния сицева́я:
Ра́дуйся, и́мя Бо́жие до после́дняго издыха́ния призыва́яй; ра́дуйся, я́ко пра́ведною кончи́ною сконча́лся еси́.
Ра́дуйся, до конца́ в послуша́нии Це́ркви пожи́вый; ра́дуйся, я́ко ты́ ве́рным лю́дем всю́ жи́знь послужи́вый.
Ра́дуйся, за служе́ние сие́ от Го́спода вене́ц получи́вый; ра́дуйся, блаже́нство ве́чное со святы́ми унасле́довавый.
Ра́дуйся, со А́нгелы Престо́лу Бо́жию предстоя́й; ра́дуйся, о на́с гре́шных непреста́нно моли́тву пред Ни́м вознося́й.
Ра́дуйся, преподо́бне о́тче, взира́вый на Кре́ст Святы́й и за лю́ди моли́выйся, всегда́ та́ко глаго́лал еси́: «Кре́сте Всечестны́й и Животворя́щий, его́ же глава́ до небе́с дости́же, подно́жие же врата́ а́да сокруши́», да́руй на́м спасе́ние; ра́дуйся, преподо́бне о́тче, взира́я на Кре́ст Святы́й и та́ко за на́с моли́выйся: «Ра́дуйся, Кре́сте достопокланя́емый, восприе́мый Влады́ку моего́ и разбо́йника спасы́й, дарова́вый тому́ плоды́ испове́дания, и на́с ра́дости испо́лни обетова́нием спасе́ния на́шего».
Ра́дуйся, преподо́бне о́тче и дру́же Христо́в, с ра́достию мно́гая страда́ния на земли́ се́й за Него́ претерпе́вый и на́с научи́вый не боя́тися сме́рти, испове́дающе Го́спода Иису́са; ра́дуйся, преподо́бне о́тче, вся́кое испыта́ние во спасе́ние души́ понести́ гото́вый и то́кмо благоизволе́ния Бо́га Промысли́теля взыска́вый.
Ра́дуйся, преподо́бне о́тче Моисе́е, земли́ Уфи́мския похвало́ и моли́твенниче о на́с преди́вный.
Конда́к 11.
Мно́гое мно́жество ча́д духо́вных твои́х притеко́ша во хра́м ко гро́бу твоему́ в де́нь твоего́ погребе́ния, воздава́я после́днее целова́ние, лобыза́ху мо́щи твоя́, преподо́бне, и в глубо́цей ско́рби в после́дний пу́ть провожа́ху, воспева́я пе́снь Бо́гови: Аллилу́иа.
И́кос 11.
А́ще пло́тию и погребе́н бы́л, блаже́ннее Моисе́е, но ду́хом не оста́вил еси́ ско́рбных ча́д твои́х. Сие́ ве́дяще, мно́зи ча́да твоя́ ко гро́бу твоему́, я́ко к жи́ву ти́ притека́ху, и вся́ка проше́ния своя́ ти́ приноша́ху. И не посра́млена бы́сть ве́ра и́х, и́бо никто́же от гро́ба твоего́ то́щь и неуте́шен отхожда́ше и по моли́твам твои́м вся́ на по́льзу проси́мая от Го́спода приима́ху. Мы́ же, благода́рни су́ще просла́вльшему тя́ Го́споду, тебе́, уго́днику Его́, воспису́ем си́це:
Ра́дуйся, я́ко и по сме́рти ча́д свои́х не оста́вил еси́; ра́дуйся, я́ко с ве́рою ко гро́бу твоему́ приходя́щих моли́твам вне́млющий.
Ра́дуйся, я́ко по моли́твам и́х чудеса́ и исцеле́ния и́м да́руеши; ра́дуйся, я́ко от страсте́й благода́тию, да́нною ти́ от Бо́га, ду́ши на́ша свобожда́еши.
Ра́дуйся, я́ко сле́зы и воздыха́ния скорбя́щих с любо́вию утоля́еши; ра́дуйся, я́ко проше́ния тружда́ющихся и обремене́нных ско́ро исполня́еши.
Ра́дуйся, я́ко духо́в зло́бы вся́кия наве́ты побежда́ти помога́еши; ра́дуйся, я́ко на стезю́ спасе́ния все́х наставля́еши.
Ра́дуйся, неве́дущих Бо́га и окамене́нных се́рдцем к покая́нию пробужда́яй; ра́дуйся, я́ко твои́ми моли́твами ка́ющиися пле́на грехо́внаго свобожда́ются.
Ра́дуйся, я́ко по моли́твам твои́м Врата́ Небе́сная ве́рным отверза́ются; ра́дуйся, в ско́рбех и печа́лех су́щим, исто́чник ра́дости в Бо́зе указа́вый.
Ра́дуйся, преподо́бне о́тче Моисе́е, земли́ Уфи́мския похвало́ и моли́твенниче о на́с преди́вный.
Конда́к 12.
Ви́дя Сердцеве́дец Госпо́дь тя́, преподо́бне о́тче Моисе́е, житие́ свое́ на земли́ непоро́чно пожи́вша, по́двиги мно́ги поне́сша, ве́ру в чистоте́ соблю́дша, и я́ко мно́зи лю́дие Ура́льскаго кра́я за сие́ с те́плою любо́вию почита́ют па́мять твою́, во укрепле́ние ве́ры и́х и ве́лие утеше́ние, просла́ви тя́, я́ко уго́дника Своего́, в ли́ке преподо́бных. Мы́ же, ра́дости исполня́яся о се́м, Ди́вному во святы́х Свои́х Го́споду, из глубины́ души́ вопие́м: Аллилу́иа.
И́кос 12.
Храни́т Госпо́дь вся́ ко́сти пра́ведных, и ни еди́на от ни́х сокруши́тся. И твоя́ святы́я мо́щи ди́вно яви́ Госпо́дь по твое́м прославле́нии на утеше́ние на́ше, я́ко животво́рный исто́чник благода́ти, ю́же изоби́льно почерпа́юще вси́ притека́ющии в хра́м к ра́це моще́й твои́х, в ра́дости возсыла́я хвалу́ Бо́гу, вопию́т ти́ такова́я:
Ра́дуйся, к ли́ку преподо́бных причте́нный; ра́дуйся, прославле́нием твои́м ве́рныя лю́ди Уфи́мския земли́ ра́дости испо́лнивый.
Ра́дуйся, о́тче святы́й, духо́вныя ча́да своя́ у ра́ки моще́й твои́х собира́яй; ра́дуйся, вся́ проше́ния и́х прие́мляй и Престо́лу Вседержи́теля принося́й.
Ра́дуйся, я́ко ве́лие утеше́ние и благода́тную по́мощь вси́ приходя́щии к тебе́ прие́млют; ра́дуйся, я́ко за вся́ сия́ из глубины́ души́ благоде́ющему чрез тя́ Го́споду благодаре́ние прино́сят.
Ра́дуйся, я́ко с новому́ченики и испове́дники земли́ Уфи́мския ны́не на Небеси́ торжеству́еши; ра́дуйся, я́ко со все́ми святы́ми о на́с, гре́шных, Го́спода умоля́еши.
Ра́дуйся, пред ико́ною Богома́тери Влади́мирския умре́ти сподо́бившийся; ра́дуйся, по́сле сме́рти уте́шивший па́ству твою́ чуде́сным свои́м возвраще́нием.
Ра́дуйся, одино́ких и оста́вленных оте́ческое заступле́ние и боле́зней на́ших врачева́телю; ра́дуйся, похвало́ А́нгелов, мона́хов же и всея́ Святы́я Це́ркве.
Ра́дуйся, преподо́бне о́тче Моисе́е, земли́ Уфи́мския похвало́ и моли́твенниче о на́с преди́вный.
Конда́к 13.
О, пресвяты́й и преди́вный о́тче на́ш Моисе́е, уте́шителю скорбя́щих, гра́да Уфы́ похвало́ и Це́ркве Христо́вы украше́ние, ны́не на́ше приими́ ма́лое сие́ моле́ние, с любо́вию тебе́ приноси́мое, и принеси́ е́ ко Христу́ Бо́гу на́шему, да сохрани́т О́н на́с от все́х вра́г ви́димых и неви́димых, от неду́га и гла́да, от вся́кия ско́рби и внеза́пныя сме́рти, и бу́дущаго ве́чнаго муче́ния изба́вит моли́твами твои́ми и сподо́бит Ца́рствия Своего́ все́х, с тобо́ю вопию́щих Ему́: Аллилу́иа.
И́кос 1.
А́нгелов Творе́ц избра́ тя́ изнача́ла и всели́ в ю́ное се́рдце твое́ любо́вь к моли́тве, чте́нию Сло́ва Бо́жия и святы́х жития́, и́миже поуча́яся, укрепля́лся еси́ во благоче́стии, ни во что́ же вменя́я суету́ ми́ра сего́. Мы́ же с любо́вию вопие́м тебе́ такова́я:
Ра́дуйся, от младе́нчества Бо́гом избра́нный; ра́дуйся, от купе́ли Креще́ния благода́тию Ду́ха Свята́го испо́лненный.
Ра́дуйся, от о́трочества моли́твою к Бо́гу горе́вый; ра́дуйся, ве́лие попече́ние о спасе́нии души́ своея́ изде́тска име́вый.
Ра́дуйся, духо́вную усла́ду в се́м обрета́вый; ра́дуйся, се́мя Христо́ва уче́ния в се́рдце свое́м возрасти́вый.
Ра́дуйся, му́дрость ми́ра сего́ ни во что́ же вмени́вый; ра́дуйся, вся́кия мирски́я суеты́ избега́вый.
Ра́дуйся, на небеси́ и на земли́ просла́вленный; ра́дуйся, вопло́щшемуся Бо́гу Сло́ву ве́рно послужи́вый.
Ра́дуйся, в пропове́дании Ева́нгелия Пра́вды ре́вность ве́лию яви́вый; ра́дуйся, Пресла́дкаго Го́спода Иису́са все́м се́рдцем твои́м возлюби́вый.
Ра́дуйся, таи́нниче Бо́жий, еще́ на земли́ Небе́сных бла́г вкуси́вый.
Ра́дуйся, преподо́бне о́тче Моисе́е, земли́ Уфи́мския похвало́ и моли́твенниче о на́с преди́вный.
Конда́к 1.
Избра́нный от Бо́га и к ли́ку преподо́бных сопричте́нный, от ю́ности кре́ст сво́й взе́м, Христу́ после́довал еси́, в моли́твах, поще́нии, во бде́нии и злострада́нии житие́ твое́ проводя́; те́м же Госпо́дь, воззре́в на твоя́ труды́, чудесы́ тя́ прославля́ет и воспева́ти науча́ет:
Ра́дуйся, преподо́бне о́тче Моисе́е, земли́ Уфи́мския похвало́ и моли́твенниче о на́с преди́вный.
Моли́тва.
О, па́стырю до́брый, преподо́бне о́тче на́ш Моисе́е, ты́ от мяте́жа ми́ра сего́ изше́д, отверже́нием бла́г преходя́щих Христу́ после́довал еси́, и равноа́нгельское житие́ на земли́ пожи́в, безпло́тных по́чести сподо́бился еси́. Мы́ же, па́мятуя любо́вь твою́ ко все́м, я́ко ча́да ко отцу́, к тебе́ прибега́ем и мо́лимся со умиле́нием: не оста́ви, уго́дниче Бо́жий, заступле́нием твои́м на́с немощны́х, грехми́ и скорбми́ мно́гими обремене́нных, умоли́ Христа́ Бо́га на́шего дарова́ти на́м по́мыслов ми́р, от па́губных страсте́й и вся́кия скве́рны воздержа́ние, ко все́м лю́дем любо́вь и́скреннюю. Озари́, преблаже́нне, у́м на́ш све́том лица́ Бо́жия, и́же ны́не осиява́ет тя́; укрепи́ благода́тию Госпо́днею произволе́ние на́ше, да утверди́вшеся в зако́не Христо́ве, неле́ностно тече́м путе́м соблюде́ния за́поведей святы́х; осени́ твои́м благослове́нием все́х в ско́рбех су́щих, боле́зньми душе́вными и теле́сными обдержи́мых, исцеле́ние, утеше́ние и избавле́ние да́руя; испроси́ у Го́спода на́м ду́х кро́тости и смире́ния, ду́х терпе́ния и покая́ния, да и про́чее вре́мя живота́ на́шего поживе́м в ве́ре и сокруше́нии серде́чнем и та́ко, по сконча́нии сего́ вре́меннаго жития́, сподо́бимся насле́довати блаже́нство ве́чное и вме́сте со все́ми святы́ми и с тобо́ю, отце́м на́шим, просла́вим от все́х сла́вимаго Бо́га, Безнача́льнаго Отца́, со Единоро́дным Его́ Сы́ном и Всесвяты́м и Благи́м и Животворя́щим Его́ Ду́хом, ны́не и при́сно и во ве́ки веко́в. Ами́нь.
