Конда́к 1.

Богоблаже́нному ста́рцу Некта́рию я́ко благоуха́нному кри́ну О́птины пу́стыни, и́же источа́ет боже́ственный некта́р духо́внаго жития́ и благово́нит и́м Це́рковь Бо́жию, похва́льная принесе́м пе́ния, ты́ же, о́тче богому́дре, от мо́ря су́етствий и бе́д многоразли́чных изба́ви ста́до твое́ любо́вию тебе́ зову́щее:

Ра́дуйся, блаже́нне Некта́рие, О́птиной пу́стыни благоуха́ние.

И́кос 1.

От ко́рене благоче́стия процве́л еси́, о́тче Некта́рие, пото́ки ева́нгельскими напая́емь и стра́хом Бо́жиим окормля́емь изде́тска, я́ко непоро́чный а́гнец от ма́тере в да́р Бо́гу прине́слся еси́, я́ко всесожже́ние ту́чное. Мы́ же воню́ обоня́юще трудо́в твои́х, похва́льная тебе́ зове́м:

Ра́дуйся, благочести́вых роди́телей процвете́ние; ра́дуйся, боголюби́вых ревни́телей прираще́ние.

Ра́дуйся, доброде́телей цветозла́чное одея́ние; ра́дуйся, доброво́нное целому́дрия пома́зание.

Ра́дуйся, я́ко в дому́ Бо́жии примета́яйся изде́тска; ра́дуйся, я́ко в раю́ сла́дости вчини́выйся изря́дне.

Ра́дуйся, ко́реню, напоя́емый вода́ми ве́ры; ра́дуйся, гро́зде источа́яй вино́ наде́жды.

Ра́дуйся, блаже́нне Некта́рие, О́птиной пу́стыни благоуха́ние.

Конда́к 2.

Услы́шав о́тче я́ко в О́птиной пу́стыни вертогра́д ста́рчества Бо́гом насажде́н бы́сть, устреми́лся еси́ во́нь на крила́х любому́дрия и почи́л еси́ на лу́зе ски́тском сла́дость вкуша́я некта́ра духо́внаго, Бо́гу взыва́я: Аллилу́иа.

И́кос 2.

Под крыло́ма Предте́чи водвори́выйся о́тче Некта́рие и в хра́ме его́ я́ко на мы́сленнем не́бе живы́й, послуша́нию церко́вному прилежа́л еси́, я́ко а́нгельскому служе́нию. Те́мже прино́сим тебе́ похва́льное пе́ние:

Ра́дуйся, от Предте́чи всыновле́ние прие́мый; ра́дуйся, от ста́рцев вразумле́ние получи́вый.

Ра́дуйся, у́тварь мы́сленная хра́ма Бо́жия; ра́дуйся, укоре́ние чу́вственное греха́ го́рдости.

Ра́дуйся, А́нгельскими дея́ньми себе́ окрыли́вый; ра́дуйся, и́ноческими доброде́тельми себе́ украси́вый.

Ра́дуйся, послуша́нием обреты́й миросве́тлый восхо́д; ра́дуйся, прилежа́нием откры́вый преми́рный восто́к

Ра́дуйся, блаже́нне Некта́рие, О́птиной пу́стыни благоуха́ние.

Конда́к 3.

Я́ко розга́, в о́птинстей пу́стыни прозя́бл еси́, о́тче Некта́рие, напая́емь богому́дрыми словесы́ ста́рцев твои́х, и в точи́ле послуша́ния изгнета́емь, мсто́ сладча́йшее иска́пал еси́ нощебде́нных твои́х моли́тв, Бо́гу поя́: Аллилу́иа.

И́кос 3.

В те́сней хра́мине твое́й а́ки в затво́ре пожи́л еси́, о́тче Некта́рие, ду́хом при́сно в го́рнее восходя́, о земны́х небре́гл еси́ попече́ниих, оба́че любому́дрием ду́шу твою́ а́ки зла́том богатя́. Те́мже сокро́вищем души́ твоея́ дивя́щеся, си́це тебе́ рце́м:

Ра́дуйся, нощебде́нных моли́тв свети́льниче; ра́дуйся, днесве́тлых трудо́в пропове́дниче.

Ра́дуйся, затво́рниче боголюбе́знейший; ра́дуйся, засту́пниче благодерзнове́ннейший.

Ра́дуйся, я́ко во глубине́ безмо́лвия би́сер обре́л еси́ духо́вный; ра́дуйся, я́ко в тишине́ безстра́стия гла́с хла́да яви́ся ти́ то́нка.

Ра́дуйся, я́ко тесното́ю по́двига широту́ обре́л еси́ Рая́; ра́дуйся, я́ко высото́ю смире́ния глубины́ избе́гл еси́ а́да.

Ра́дуйся, блаже́нне Некта́рие, О́птиной пу́стыни благоуха́ние.

Конда́к 4.

В тишине́ безмо́лвия Бо́гу порабо́тал еси́ о́тче, ми́ра тщету́ и ти́ну страсте́й отря́сл еси́, чи́стым о́ком Бо́жия та́йны уве́дел еси́ богому́дре, те́мже ча́дам твои́м запове́дал еси́ во все́м иска́ти вели́каго смы́сла, Бо́гу благода́рне взыва́я: Аллилу́иа.

И́кос 4.

Се́рдце, я́ко кни́гу богопи́санну возыме́л еси́, о́тче, начерта́нием в не́м Бо́жиих та́ин и суде́б. Кни́жник я́влься богому́дрый, источа́яй позна́ния неле́стная, и напая́яй сла́достию боже́ственною все́х вопию́щих тебе́:

Ра́дуйся, скрижа́ле непи́санная жите́йскими письмены́; ра́дуйся, сви́тче испи́санный тро́стию благода́ти.

Ра́дуйся, та́ин Боже́ственных честно́е вмести́лище; ра́дуйся, суде́б Госпо́дних таи́нниче преизря́дный.

Ра́дуйся, несмы́сленных прему́дростию Боже́ственною умудри́вый; ра́дуйся, му́дрых ве́ка сего́ обличи́вый.

Ра́дуйся, от ка́мене Христа́ ме́д духо́вный пи́вый; ра́дуйся, от у́ст твои́х сла́дость духо́вную источи́вый.

Ра́дуйся, блаже́нне Некта́рие, О́птиной пу́стыни благоуха́ние.

Конда́к 5.

Сокро́вищница дарова́ний духо́вных яви́лся еси́ Некта́рие, и́хже прия́л еси́ от богоно́сных ста́рцев твои́х: от Амвро́сия научи́лся еси́ дея́нию, от Анато́лия же виде́нию, от сама́го же Го́спода прия́л еси́ моли́тву непреста́нную, поя́ Ему́: Аллилу́иа.

И́кос 5.

Егда́ ста́рцем после́дним бы́ти тя́ бра́тия избра́ша о́тче Некта́рие, оба́че по смире́нию отрещи́ся хотя́щу, ста́рцев собо́р тебе́ в виде́нии предста́, и́хже сове́ту вня́л еси́, и́го благо́е прия́ти, те́мже похва́льная услы́ши сия́:

Ра́дуйся, единомы́сленная кре́посте ве́рных; ра́дуйся, изобличи́вый не́мощь неве́рных.

Ра́дуйся, собо́ра ста́рческаго при́сное благоуха́ние; ра́дуйся, о Бо́зе кре́пкое яви́вый подвиза́ние.

Ра́дуйся, моли́твою примиря́яй во вражде́ су́щих; ра́дуйся, псало́мски му́дрствуяй о ве́щех пресу́щных.

Ра́дуйся, виде́ний небе́сных при́сный созерца́телю; ра́дуйся, открове́ний Боже́ственных досто́йный храни́телю.

Ра́дуйся, блаже́нне Некта́рие, О́птиной пу́стыни благоуха́ние.

Конда́к 6.

Страсте́й ру́бище о́тче Некта́рие пра́щею поста́ раздра́л еси́, бде́нием же ве́тхих ри́з совле́клся еси́, те́мже ри́зы испещре́ни доброде́тельми тебе́ истка́ благода́ть Свята́го Ду́ха, в ню́же обле́клся еси́, поя́: Аллилу́иа.

И́кос 6.

У́м Христо́в стяжа́л еси́ богому́дре Некта́рие, совлече́нием мудрова́ния ми́ра сего́, и яви́лся еси́ любому́дрия свети́льник светоза́рный. Те́мже просвети́ ева́нгельским богоразу́мием вопию́щих тебе́ сия́:

Ра́дуйся, о́чи херуви́мския стяжа́вый; ра́дуйся, усты́ серафи́мския име́вый.

Ра́дуйся, пламене́ющаго раче́ния све́тлосте; ра́дуйся, светле́йшаго разсужде́ния я́сносте.

Ра́дуйся, страсте́й угаша́яй разжже́ние; ра́дуйся, пла́мене доброде́телей возжже́ние.

Ра́дуйся, прему́дрости Христо́вой таи́нниче; ра́дуйся, любому́дрия ева́нгельскаго исполне́ние.

Ра́дуйся, блаже́нне Некта́рие, О́птиной пу́стыни благоуха́ние.

Конда́к 7.

Умудри́тельное име́л еси́ о́тче сло́во разреша́ющее вся́кий непра́вды соу́з, просиява́ющее же глубины́ душе́вныя и во оти́шие преводя́щее от бу́ри скорбе́й. Те́мже уте́шительным сло́вом напита́й ча́да твои́х, вопию́щих Христу́: Аллилу́иа.

И́кос 7.

Я́ко хотя́ безу́мие ми́ра сего́ обличи́ти богому́дре Некта́рие, бу́йством мни́мым яви́л еси́ себе́ прикрове́н, юро́дством му́дрым высокому́дрых изобличи́л еси́ суему́дрие и к высоте́ благоче́стия привле́кл еси́ от страсте́й безче́стия вопию́щих тебе́ сия́:

Ра́дуйся, Прему́дрости Боже́ственныя сла́достное поко́ище; ра́дуйся, нему́дрости мирски́я горча́йшее позо́рище.

Ра́дуйся, бу́йством про́поведи Христа́ ра́спята просла́вивый; ра́дуйся, бе́гством поко́ища Христу́ сораспя́выйся.

Ра́дуйся, юро́дством мни́мым обуи́л еси́ превознося́щихся; ра́дуйся, смиренному́дрием мно́гим умудри́л еси́ себе́ умаля́ющия.

Ра́дуйся, напе́рстниче прему́дрости и стра́же благоче́стия; ра́дуйся, некта́ре разу́мности истребля́яй нече́стие.

Ра́дуйся, блаже́нне Некта́рие, О́птиной пу́стыни благоуха́ние.

Конда́к 8.

Я́ко по́лная луна́ в но́щи безбо́жия возсия́л еси́, богому́дре Некта́рие, исполня́яй све́том богоразу́мия притека́ющия к све́тлым сове́там твои́м, тьмо́ю же неве́рия ослепле́нныя увери́тельными озари́л еси́ чудесы́. Те́мже просвети́вшеся от тебе́ позна́нием Со́лнца Пра́вды – Христа́, вопие́м Ему́: Аллилу́иа.

И́кос 8.

Проро́ческою ма́стию пома́зан бы́л еси́ благода́тию Пресвята́го Ду́ха я́коже бу́дущая я́сно зре́л еси́ я́ко настоя́щая, и сове́ты серде́чныя яви́л еси́ сокрове́нныя. Те́мже я́ко тайноглаго́льника тя́ вси́ восхваля́ем глаго́люще:

Ра́дуйся, таи́нниче Боже́ственных промышле́ний; ра́дуйся, свети́льниче серде́чных наме́рений.

Ра́дуйся, я́ко Царю́ предре́кл еси́ венце́м му́ченичества увязе́ние; ра́дуйся, я́ко Ца́рству Росси́йскому проре́кл еси́ венце́м духо́вным облаже́ние.

Ра́дуйся, я́ко се́дмь свети́льников прозре́л еси́ в О́птиной сия́ющих; ра́дуйся, я́ко се́дмь столпо́в узре́л еси́ в не́й от земны́х не́др восходя́щия.

Ра́дуйся, бу́дущаго ве́ка яснозри́телю блаже́ннейший; ра́дуйся, настоя́щаго вре́мене тайнови́дче изря́днейший.

Ра́дуйся, блаже́нне Некта́рие, О́птиной пу́стыни благоуха́ние.

Конда́к 9.

Горча́йший пло́д прозябе́ земли́ росси́йстей ко́рень безбо́жия егда́ насажде́н бы́сть на благода́тней па́жити ея́, оба́че сладча́йша яви́шася твоя́ проро́чества егда́ утеша́л еси́ приходя́щия лю́ди озло́бленныя. Те́мже не преста́й утеша́я ны́ о́тче блаже́нне твои́ми богому́дрыми рече́ньми, да Христу́ исто́ргшему ко́рень безбо́жия пое́м: Аллилу́иа.

И́кос 9.

Посе́чен бы́сть безбо́жниками вертогра́д ста́рчества, я́ко ума́лишася и́стина от земли́, оба́че я́ко о ко́рень твоего́ юро́дства притупи́ся се́рп безбо́жия, сего́ ра́ди утверди́ся испове́дание твое́ я́ко ке́др лива́нский. Мы́ же по́двигом твои́м укре́пльшася, похва́льная тебе́ зове́м:

Ра́дуйся, Боже́ственная розго́, плодя́щая гро́зд покая́ния; ра́дуйся, Боже́ственная клеще́ исторга́ющая те́рн безбо́жия.

Ра́дуйся, вино́, веселя́щее за́поведи творя́щих; ра́дуйся, пи́ще тве́рдая до́бре подвиза́ющимся.

Ра́дуйся, ме́де духо́вный Боже́ственных разуме́ний; ра́дуйся, млеко́ ева́нгельское Боже́ственных наставле́ний.

Ра́дуйся, словеса́ источа́яй и ду́ши ве́рных напая́яй; ра́дуйся, се́рп сло́ва наостри́вый и безбо́жие искорени́вый.

Ра́дуйся, блаже́нне Некта́рие, О́птиной пу́стыни благоуха́ние.

Конда́к 10.

Я́ко кора́бль испо́лнен доброде́телей в приста́нище дости́гл еси́ безстра́стия и отту́ду в го́рняя ве́трилом Ду́ха преста́вился еси́ к ста́рцам твои́м иде́же сою́зом любве́ связа́лся еси́ со все́ми святы́ми пе́снь пресла́вную поя́: Аллилу́иа.

И́кос 10.

В ра́йских ку́щех ны́не водворя́ешися блаже́нне Некта́рие, и наслажда́ешися блаже́нством несказа́нным и че́рплеши чи́стую во́ду жи́зни исходя́щую от Престо́ла Бо́жия. Те́мже в моли́твах помина́й тебе́ сла́вящия и глаго́лющия сия́:

Ра́дуйся, небохо́дец Боже́ственных селе́ний; ра́дуйся, пода́телю ра́йских утеше́ний.

Ра́дуйся, небому́дренных разуме́ний произраще́ние; ра́дуйся, благочести́вых обы́чаев насажде́ние.

Ра́дуйся, доброде́телей некта́р источа́яй; ра́дуйся, добронра́вия арома́т испуща́яй.

Ра́дуйся, изя́щное рая́ Бо́жия удобре́ние; ра́дуйся, изря́дное чернори́зцев украше́ние.

Ра́дуйся, блаже́нне Некта́рие, О́птиной пу́стыни благоуха́ние.

Конда́к 11.

Си́ры не потерпе́л еси́ на́с, о́тче оста́вити, те́мже мощьми́ твои́ми возврати́лся еси́ во оби́тель твою́, ю́же облагово́нил еси́ сла́дким некта́ром ра́йским и чудесы́ пресла́вными украси́л еси́ честну́ю ра́ку твою́, к не́йже притека́ющии с ве́рою исцеле́ния прие́млют вопию́ще Христу́: Аллилу́иа.

И́кос 11.

Неудержи́мою заре́ю от земны́х не́др возсия́л еси́, блаже́нне Некта́рие, я́ко у́тро Боже́ственное озари́л еси́ оби́тель твою́ со́лнцем незаходи́мым прите́кл еси́ в ню́ мощьми́ благода́тными и се́дмь свети́льников вже́гл еси́ и та́инств учреди́л еси́ се́дмь. Те́мже я́ко в дому́ Прему́дрости вси́ почива́юще велегла́сно ти́ зове́м:

Ра́дуйся, прему́дрости до́ме богозда́нный; ра́дуйся, глу́пости хра́мину разруши́вый.

Ра́дуйся, седьмосто́лпная доброде́телей осно́во; ра́дуйся, седмосве́щниче хра́ма Бо́жия.

Ра́дуйся, седми́ та́инств церко́вных благогове́йный служи́телю; ра́дуйся, седми́ столпо́в прему́дрости разумли́вый вая́телю.

Ра́дуйся, даро́в Ду́ха Свята́го одушевле́нная храни́тельнице; ра́дуйся, я́ко мощьми́ твои́ми исцеля́еши боля́щия.

Ра́дуйся, я́ко чудоде́йственную по́мощь подае́ши прося́щим.

Ра́дуйся, блаже́нне Некта́рие, О́птиной пу́стыни благоуха́ние.

Конда́к 12.

В Раю́ сла́дости процве́л еси́ блаже́нне Некта́рие, присносла́вным твои́м житие́м, доброде́телей масти́кою намасти́лся еси́ я́же изне́сл еси́ от трудо́в твои́х, те́мже то́ки медото́чныя некта́ра Боже́ственнаго источи́ тя́ прославля́ющим, и от души́ пою́щим Христу́ тя́ просла́вившему: Аллилу́иа.

И́кос 12.

Богому́дрое о Бо́зе твое́ житие́ воспева́ем блаже́нне Некта́рие, и́мже объюро́дил еси́ безу́мие ми́ра сего́ в му́дрости же Боже́ственней пресла́вное показа́л еси́ возраста́ние, те́мже источи́ на́м сла́дость Боже́ственнаго позна́ния вопию́щим тебе́:

Ра́дуйся, Боже́ственныя ра́дости сла́дость вкуша́яй; ра́дуйся, мирски́х скорбе́й го́речь истребля́яй.

Ра́дуйся, мирово́ние Ду́ха Свята́го обоня́яй; ра́дуйся, мудрова́ние ду́ха лука́ваго облича́яй.

Ра́дуйся, от Бо́га прие́мый да́ры многоразли́чныя; ра́дуйся, и́миже исцеля́еши неду́ги многоболе́зненныя.

Ра́дуйся, я́ко тобо́ю к Прему́дрости Боже́ственней прибли́жихомся; ра́дуйся, я́ко тобо́ю безу́мий мирски́х избего́хом.

Ра́дуйся, блаже́нне Некта́рие, О́птиной пу́стыни благоуха́ние.

Конда́к 13.

О, богоблаже́нне о́тче Некта́рие, я́ко ми́ро че́стно стяжа́хом тя́, я́ко благоуха́нный некта́р воспева́ем тя́. Те́мже злосмра́дных де́л твои́м предста́тельством изба́ви на́с и благоуха́нными твои́ми моли́твами на́с богоприя́тны Бо́гу соде́лай да сладкогла́сно с тобо́ю пое́м Ему́: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

От ко́рене благоче́стия процве́л еси́, о́тче Некта́рие, пото́ки ева́нгельскими напая́емь и стра́хом Бо́жиим окормля́емь изде́тска, я́ко непоро́чный а́гнец от ма́тере в да́р Бо́гу прине́слся еси́, я́ко всесожже́ние ту́чное. Мы́ же воню́ обоня́юще трудо́в твои́х, похва́льная тебе́ зове́м:

Ра́дуйся, благочести́вых роди́телей процвете́ние; ра́дуйся, боголюби́вых ревни́телей прираще́ние.

Ра́дуйся, доброде́телей цветозла́чное одея́ние; ра́дуйся, доброво́нное целому́дрия пома́зание.

Ра́дуйся, я́ко в дому́ Бо́жии примета́яйся изде́тска; ра́дуйся, я́ко в раю́ сла́дости вчини́выйся изря́дне.

Ра́дуйся, ко́реню, напоя́емый вода́ми ве́ры; ра́дуйся, гро́зде источа́яй вино́ наде́жды.

Ра́дуйся, блаже́нне Некта́рие, О́птиной пу́стыни благоуха́ние.

Конда́к 1.

Богоблаже́нному ста́рцу Некта́рию я́ко благоуха́нному кри́ну О́птины пу́стыни, и́же источа́ет боже́ственный некта́р духо́внаго жития́ и благово́нит и́м Це́рковь Бо́жию, похва́льная принесе́м пе́ния, ты́ же, о́тче богому́дре, от мо́ря су́етствий и бе́д многоразли́чных изба́ви ста́до твое́ любо́вию тебе́ зову́щее:

Ра́дуйся, блаже́нне Некта́рие, О́птиной пу́стыни благоуха́ние.

Моли́тва.

О, Преподо́бне и богоблаже́нне о́тче Некта́рие, присносве́тлый свети́льниче ста́рчества о́птинскаго! Юро́дство подъе́мый и безу́мие ми́ра обличи́вый, от богобо́рных злоключе́ния до́бльственне претерпе́вый и блаже́нства изгна́нных ра́ди Го́спода Иису́са вкуси́вый. При́зри ны́не с Небесе́ и от Ра́йскаго са́да к на́м прини́кни. Возвы́си на́ше мудрова́ние от земны́х попече́ний и о небе́снем жи́тельстве помышля́ти научи́. Я́ко боже́ственными доброде́тельми себе́ украси́вый и плоды́ Ра́йских сла́достей непреста́нное наслажде́ние вкуси́вый, от треволне́ния страсте́й и го́рших плодо́в грехолю́бия на́с исхити́ всеизря́дным твои́м предста́тельством. В ве́ре Правосла́вной до после́дняго издыха́ния утверди́ ны́ стоя́ти и по оте́ческим стопа́м и преда́нием святы́х Апо́стол умудри́ ны́ ходи́ти.

Го́спода и Бо́га умоли́, богому́дре о́тче, от гряду́щаго анти́христа и от кова́рных его́ сете́й на́с изба́вити и в сокрове́нней пу́стыни спасе́ния на́с всели́ти. Да ти́хое, ми́рное и благоче́стное житие́ в ве́це се́м сконча́ем и Ра́йских селе́ний по твои́м моли́твам насле́дити сподо́бимся. Иде́же ку́пно с тобо́ю и со ста́рцы о́птинскими воспое́м и просла́вим Безнача́льную и Неразде́льную и Единосу́щную Тро́ицу, Отца́ и Сы́на и Свята́го Ду́ха во ве́ки веко́в. Ами́нь.