Конда́к 1.

Возбра́нный от Нача́льника и Соверши́теля ве́ры, Го́спода Иису́са, да́нный во о́браз после́дования Правосла́вныя Це́ркви сосло́вию, до́блественный подви́жниче и чудотво́рче преди́вный, преподо́бне о́тче Ника́ндре! Похва́льная со благодаре́нием прино́сим ти́, моли́твенницы твои́, и́бо те́плым твои́м предста́тельством у Царя́ Небе́снаго вся́ поле́зная и спаси́тельная хода́тайствуеши на́м. Я́ко име́я дерзнове́ние ко Престо́лу Благода́ти, от вся́ких на́с злоключе́ний свободи́, да зове́м ти́:

Ра́дуйся, преблаже́нне Ника́ндре, преподо́бне о́тче на́ш.

И́кос 1.

А́нгельскими девяточи́сленными си́лами окружа́емый сла́вы Госпо́дь, предуве́дев неукло́нное се́рдца твоего́ изволе́ние, я́ко хо́щеши бы́ти покори́вым ученико́м и тщали́вым исполни́телем за́поведей Его́, вдохну́ тебе́, я́коже дре́вле проро́чице А́нне, е́же прибега́ти ко хра́му Госпо́дню, да научи́шися та́мо нача́лом прему́дрости, я́же е́сть стра́х Госпо́день. Те́мже и научи́ на́с со удивле́нием воспева́ти тебе́ такова́я:

Ра́дуйся, благочести́ваго ко́рене благо́е прозябе́ние; ра́дуйся, чу́дное все́х христиа́нских доброде́телей плодоприноше́ние.

Ра́дуйся, младе́нче, при купе́ли обновле́ния посвяти́вый себе́ Го́споду на служе́ния ве́рная; ра́дуйся, пома́занниче, восприе́мый свы́ше всеору́жия духо́вная.

Ра́дуйся, те́ми от ю́ности на те́ло свое́, на ми́р се́й и диа́вола себе́ ополчи́вый; ра́дуйся, ра́зум сво́й ко све́ту богове́дения воспери́вый.

Ра́дуйся, очи́ма твои́ма всю́ду Го́спода иска́вый и в Не́м наме́рение полага́вый; ра́дуйся, слу́хи твоя́ на восприя́тие глаго́лов Бо́жиих, и́миже возражда́ется ве́ра, обрати́вый.

Ра́дуйся, уста́ твоя́ на славосло́вие Бо́жие и псалмопе́ние, на назида́ние и́скреннему твоему́ в душеполе́зном отверза́яй; ра́дуйся, ру́це твои́ на творе́ние благодея́ния тре́бующим устроя́яй.

Ра́дуйся, но́зе твои́ ше́ствовати по путе́м оправда́ний Госпо́дних управля́яй; ра́дуйся, вся́ твоя́ душе́вная и теле́сная чу́вства на благоугожде́ние Пода́телю все́х бла́г устремля́яй.

Ра́дуйся, преблаже́нне Ника́ндре, преподо́бне о́тче на́ш.

Конда́к 2.

Ви́дящи преподо́бный Ника́ндр душе́вныма очи́ма, я́ко в ми́ре се́м вся́ческая суета́, и я́ко недосто́йны су́ть стра́сти ны́нешняго ве́ка, иму́щей сла́ве яви́тися на Небесе́х, потща́ся, отве́ргся себе́, ми́ра и я́же в не́м, наставля́емь преподо́бными Евфроси́ном и Са́ввою, те́сным и приско́рбным ше́ствовати путе́м в го́рний Небе́сный Иерусали́м. Его́же дости́гнув ны́не, предстоя́ Престо́лу А́гнчу, досто́йно весели́тся с ни́ми и со все́ми избра́нными, поя́ Всеси́льному Бо́гу: Аллилу́иа.

И́кос 2.

Разуме́в Госпо́дь, напои́вый тя́, преподо́бне, слове́сным и неле́стным млеко́м благоче́стия, сподо́би тя́ преспева́ти в му́жа, в ме́ру во́зраста соверше́нна, возраста́юща во спасе́ние, да вку́сиши, я́ко бла́г Госпо́дь. К Нему́же приходя́щи, са́м я́ко ка́мение жи́во зи́ждешися в хра́м духо́вен, в святи́тельство свя́то, возноси́ти же́ртвы духо́вныя благоприя́тны Бо́гови. И да благоуспе́еши в се́м, удали́вся от до́му твоего́, вда́л еси́ себе́ му́жу богобоя́зливу, навы́кнути от него́, я́же су́ть на потре́бу, уве́дети Писа́ния, в ни́хже сокрове́н е́сть живо́т ве́чный, и да научи́ши на́с приглаша́ти тебе́ такова́я:

Ра́дуйся, ю́ноше, вся́ де́тская игра́лища, я́ко поползнове́ние ко злу́, презре́вый; ра́дуйся, мудрова́нием го́рних, а не земны́х, я́ко многоце́нным би́сером, сия́вый.

Ра́дуйся, о́ным лице́ твое́ и се́рдце украси́вый; ра́дуйся, Го́спода от всея́ души́ и всея́ кре́пости твоея́ возлюби́вый.

Ра́дуйся, не то́чию де́нь суббо́тный, но и вся́ дни́ живота́ Го́споду Бо́гу святи́вый; ра́дуйся, николи́же и́мене Го́спода Бо́га твоего́ всу́е прие́мый.

Ра́дуйся, роди́телей твои́х любо́вию, послуша́нием и воздая́нием до́лжным почти́вый; ра́дуйся, бли́жняго твоего́, я́ко себе́ сама́го возлюби́вый.

Ра́дуйся, ю́ность твою́ в целому́дрии обучи́вый; ра́дуйся, я́ко де́ву чи́сту, Жениху́ Христу́ себе́ обручи́вый.

Ра́дуйся, пи́санная в зако́не благода́тию Бо́жиею сотвори́вый, и в усоверше́ние сего́ еще́ еди́но доконча́вый; ра́дуйся, вся́ име́ния твоя́ прода́вый, и да живо́т ве́чный насле́диши, ни́щим разда́вый.

Ра́дуйся, преблаже́нне Ника́ндре, преподо́бне о́тче на́ш.

Конда́к 3.

Си́ла Боже́ственнаго Ева́нгельскаго сло́ва: «Прииди́те ко Мне́ вси́ тружда́ющиися и обремене́ннии, и А́з упоко́ю вы́», — подо́бно мечу́ обою́ду остру́, прони́кну твое́, преблаже́нне, ре́вностное се́рдце, бы́вшу тебе́ со благогове́нием во святе́м хра́ме. Его́же де́йствия толи́ко испо́лнен бы́л еси́, я́ко ничесому́ запина́ющу, па́че же пу́ть тебе́ показу́ющему Бо́жиим изволе́нием му́жу Фео́дору, просте́рши ду́х тво́й, я́ко го́рлица в пусты́ню непроходи́мую водвори́лся еси́, и та́мо воздви́гши не́кое жили́ще, себе́ сама́го предста́вил еси́ селе́ние Бо́гу Вы́шнему, поя́ Ему́ в по́двизех моли́твы и поще́ния всегда́: Аллилу́иа.

И́кос 3.

Иму́щи основа́ние богоуго́днаго жития́ твоего́, преблаже́нне о́тче на́ш, смире́ние, кро́тость и нетщесла́вие, да Оте́ц тво́й, ви́дяй в та́йне, возда́ст тебе́ я́ве, мни́л еси́ места́ пусты́нная бы́ти сокрове́ние твоея́ доброде́тели. Но я́коже рече́ся: «Не́сть гла́с, и́же не услы́шится»,— та́ко и свято́е житие́ твое́ просла́вися во окре́стных страна́х. И да не ка́ко па́костник пло́ти, а́ггел сатани́н, препне́т твоему́ ше́ствию, и да не иску́сит тя́ похвали́тися о се́м, сего́ ра́ди оста́вив ме́сто пребыва́ния твоего́, Бо́гу лу́чшее что́ о тебе́ предзре́вшу, прите́кл еси́ во оби́тель свята́го Иоа́нна Богосло́ва, и открове́нным гла́сом пред Це́рковию и А́нгелами изре́кши свяще́нныя обе́ты, вда́л еси́ себе́ во служе́ние и́ноческое. Те́мже воспева́ем ти́ такова́я:

Ра́дуйся, во́ине, не двема́ господи́нома рабо́тати, но Еди́ному то́чию, Живу́щему на Небесе́х, восхоте́вый; ра́дуйся, вся́ повеле́нная чрез нача́льников поста́вленных от Него́, с ра́достию, а не с воздыха́нием, твори́вый.

Ра́дуйся, понесы́й терпеливоду́шно и са́мая вели́кая озлобле́ния; ра́дуйся, пло́ть твою́, вою́ющую на ду́ха, умертви́вый чрез моли́тву и суро́вая поще́ния.

Ра́дуйся, уедине́нно в богомы́слии и слеза́х но́щи проводи́вый; ра́дуйся, те́ло твое́, во умерщвле́ние страсте́й, на снеде́ние лета́ющим живо́тным обнажи́вый.

Ра́дуйся, кровьми́ му́ченическими во свиде́тельство непрело́жныя ве́ры обагре́нный; ра́дуйся, по распя́тии ве́тхаго Ада́ма, но́вым, И́же е́сть Христо́с, в преподо́бии и пра́вде оживотворе́нный.

Ра́дуйся, крести́выйся во Христа́; ра́дуйся, обле́кшийся во вся́ велеле́поты Его́.

Ра́дуйся, хле́ба а́нгельскаго во дво́рех Вы́шняго Сио́на вкуша́яй; ра́дуйся, глаго́лом Бо́жиим на труды́ многоразли́чныя себе́ укрепля́яй.

Ра́дуйся, преблаже́нне Ника́ндре, преподо́бне о́тче на́ш.

Конда́к 4.

Бу́ря смуще́ния, воздвиза́емая ве́тры многоразли́чных о преподо́бном житии́ твое́м помышле́ний, пребыва́ющих с тобо́ю во общежи́тельстве, коле́блет кора́бль смире́ния твоего́. Ты́ же, смире́ния рачи́телю, па́че и па́че исполня́яся о́ным, гряде́ши па́ки в пусты́ню, ю́же ти́ указа́ гла́с Неви́димаго от олтаря́ исходя́й, да та́мо на вя́щшия по́двиги, препоя́сався си́лою свы́ше, обрати́шися, попира́я си́лою Креста́ вся́ сопроти́внаго ко́зни, да та́ко сопле́тше победоно́сный вене́ц, удосто́ишися прия́ти на главу́ твою́ от руки́ Го́спода, всегда́ победи́тели на́с Творя́щаго, поя́ Ему́: Аллилу́иа.

И́кос 4.

Су́щу ти́ на ме́сте, вели́кий подви́жниче, иде́же бе́ устро́ено жили́ще твое́, Бо́гу та́ко де́йствующу, тече́ние твое́ соверша́л еси́ в те́плых моли́твах, во упова́нии несомни́тельнем, я́ко не изнемо́жет от Бо́га вся́к глаго́л, и в любви́, от нея́же ни ра́нами, ни преще́нием, ни гла́дом, ни ино́ю ко́ею ну́ждою отвлече́н бы́ти возмо́гл еси́. Оба́че диа́вол, я́ко ле́в, иски́й кого́ поглоти́ти, наусти́ безчелове́чныя разбо́йники, е́же преда́ти тя́ губле́нию, но ничто́же возмо́же. Па́че же просла́вися твое́ неизрече́нное терпе́ние: егда́ бо от я́звы копие́м в ре́бра ве́сь обагре́н бы́л еси́ кро́вию, тогда́ возопи́л еси́ в души́ твое́й, я́коже Стефа́н: «О́тче, отпусти́ и́м!» Мы́ же, зря́ще твое́ кре́пкое благоду́шие, со удивле́нием вопие́м ти́ такова́я:

Ра́дуйся, страда́льче, посвяти́вый в же́ртву прия́тну Бо́гови себе́ сама́го; ра́дуйся, не убоя́выйся от убива́ющих те́ло, души́ же не могу́щих уби́ти.

Ра́дуйся, ка́меню непоколеби́мый, от него́же вся́ во́лны свире́пеющия сокруша́ются; ра́дуйся, я́ко в тебе́ ве́ра, любо́вь, смире́ние и незло́бие явля́ются.

Ра́дуйся, му́жу скорбе́й, ра́дуяйся со святы́м Па́влом во страда́ниях свои́х; ра́дуйся, прие́мляй ра́дость, весе́лие и мзду́ мно́гу на небесе́х.

Ра́дуйся, кро́вию твое́ю, я́ко гла́сом вопию́щим на не́бо, о́вых ослепле́нием оче́с и потопле́нием порази́вый; ра́дуйся, то́южде кро́вию о́вых на пу́ть и́стинный раска́яния обрати́вый.

Ра́дуйся, прише́дшим и́м к тебе́ не гро́зныя и ме́стныя взо́ры яви́вый; ра́дуйся, я́ко оте́ц сердобо́льный развраще́нных ча́д не оскорби́вый.

Ра́дуйся, излия́нием кро́ви твоея́ венча́выйся с му́ченики и страстоте́рпцы; ра́дуйся, не то́чию о все́х притека́ющих к тебе́ с ве́рою, но и о вразе́х твои́х те́плый моли́твенниче.

Ра́дуйся, преблаже́нне Ника́ндре, преподо́бне о́тче на́ш.

Конда́к 5.

Боготе́чная звезда́, заи́мствующая све́т сво́й от и́стиннаго Со́лнца пра́вды, Го́спода Иису́са, яви́лся еси́ на́м, богоблаже́нне Ника́ндре, во мра́чной но́щи многостра́стнаго жития́ сего́ спя́щим и заблужда́ющим, показу́яй на́м пе́рвее вре́мя воста́ния от сна́ грехо́внаго. Та́же благови́дным о́бразом свои́м, ве́рным сло́вом, житие́м, любо́вию, ду́хом, ве́рою, чистото́ю, кро́тостию и терпе́нием, веду́щи по пути́ спасе́ния к го́рнему Небе́сному Оте́честву все́х, прибега́ющих к тебе́ и вопию́щих Бо́гу: Аллилу́иа.

И́кос 5.

Ви́девше Правосла́вныя Це́ркви благочести́вая ча́да, па́че же окре́стнии, ре́вностное твое́ по за́поведем Госпо́дним житие́, и благода́ть Ду́ха Свята́го обита́ющую в се́рдце твое́м, е́юже умудри́вся во спасе́ние, преподава́л еси́ послу́шающим тя́ оте́ческая наказа́ния, и е́юже врачева́л еси́ не то́кмо неду́ги душе́вныя, но и теле́сныя, притека́ху к тебе́ с ве́рою не возвраща́ющеся то́щи, но я́коже о́блацы поднебе́снии испо́лнени вла́ги, ороша́ху ни́вы серде́ц свои́х, возвраща́юще благи́я плоды́ ве́ры, и вопию́ще такова́я:

Ра́дуйся, исто́чниче, среди́ безво́дных ме́ст источа́ющий сла́дкия во́ды поле́зных уче́ний; ра́дуйся, наста́вниче предо́брый в наде́жде тре́бующих о Бо́жии милосе́рдии увере́ний.

Ра́дуйся, дре́во благосенноли́ственное, успокоя́ющее прохла́дою и утеше́нием во юдо́ли се́й стра́нствующих; ра́дуйся, соверше́нными плода́ми о́наго насыща́ющее пра́вды Христо́вой а́лчущих.

Ра́дуйся, мирова́рнице, на вся́ неду́ги врачева́ния содержа́щая; ра́дуйся, о́ная, я́ко вра́чь скороми́лостивый, безме́здно неду́гующим подава́ющий.

Ра́дуйся, ми́лости превели́кия и скорбя́щим скоропредста́тельнаго сострада́ния храни́лище; ра́дуйся, непови́нных разреше́ние и осужде́нных пра́ведное суди́лище.

Ра́дуйся, потща́выйся о нищете́ духо́вней и то́ю всели́вый вну́трь тя́ Ца́рствие Бо́жие; ра́дуйся, прилежа́вый неосла́бно чистоте́ душе́вной и теле́сной, и то́ю же зри́ши Бо́га.

Ра́дуйся, свети́льниче, еле́ем дарова́ний Ду́ха Свята́го возже́нный; ра́дуйся, на высо́ко ме́сто сла́вы небе́сныя вознесе́нный.

Ра́дуйся, преблаже́нне Ника́ндре, преподо́бне о́тче на́ш.

Конда́к 6.

Пропове́дуют безмо́лвныя пусты́ни, оби́тели, гра́ды и ве́си безстра́стное житие́ твое́, е́же стяжа́л еси́, богому́дре! Пе́рвее умертви́вши пло́ть твою́ бде́нием, поще́нием, стоя́нием на молитвосло́виях, ниже́ возлега́нием на ре́бра, то́чию преклоне́нием главы́ и ма́лым дрема́нием. Проти́ву же диа́вольских наважде́ний и по́лчищ его́, овогда́ во вса́дники на ко́нех, с тимпа́ны и кли́чами, овогда́ в лю́тых волко́в и ди́виих звере́й преобража́вшихся, вооружа́лся еси́: о́вых пораже́нием жезла́, о́вых си́лою Креста́, и си́м, я́ко вели́кий Константи́н, побежда́л еси́. О не́мже хваля́ся, я́ко ору́жии непобеди́мом, пое́ши Распя́тому на не́м всегда́: Аллилу́иа.

И́кос 6.

Возсия́л еси́ ца́рству Правосла́вно-Росси́йскому под ле́ты вели́кий свети́льник, поста́вленный не под спу́дом, но на све́щнице, испо́лнен еле́я чи́ста ве́ры, наде́жды и любви́ к Сотво́ршему тя́, па́че же христиа́нскаго терпе́ния, незло́бия и чу́днаго воздержа́ния от бра́шен, да яви́ши все́м, любо́вию чту́щим тя́, я́ко не о хле́бе еди́ном жи́в бу́дет челове́к, но о вся́ком глаго́ле, исходя́щем из у́ст Бо́жиих. Те́мже и мы́, покрыва́емии тмо́ю грехопаде́ний, а́лчущии и жа́ждущии ду́хом, взира́юще на тя́, ра́достная приглаша́ем та́ко:

Ра́дуйся, во́ине Христа́ Бо́га на́шего избра́нный, пребыва́ющий Ему́ ве́рен да́же до сме́рти; ра́дуйся, во бра́ни жития́ неви́димых враго́в му́жественне победи́вый.

Ра́дуйся, во служе́нии твое́м, я́ко тече́ц ско́рый, не возврати́выйся вспя́ть; ра́дуйся, се́мя сло́ва Бо́жия не на се́рдце ка́менно, но на се́рдце плотя́но прии́мый.

Ра́дуйся, произрасти́вший благи́я плоды́, с ни́миже яви́лся ми́рови; ра́дуйся, я́ко те́ми ми́р прославля́ет Отца́, И́же е́сть на Небесе́х.

Ра́дуйся, наде́жду твою́ и в жи́зни и в сме́рти возложи́вый на Го́спода еди́на; ра́дуйся, то́ю покори́вый вся́ тебе́ сопроти́вная.

Ра́дуйся, о́ною, я́ко непобеди́мым щито́м, себе́ огради́вый; ра́дуйся, любо́вию твое́ю неразлу́чно себе́ Жениху́ Христу́ уневе́стивый.

Ра́дуйся, то́ю все́х блаже́нств, и́хже стяжа́ кро́вию свое́ю, при́сно наслажда́ющийся; ра́дуйся, я́ко седе́нием Христа́ одесну́ю Бо́га, и хода́тайством Его́ вопи́л еси́ в се́рдцы твое́м: А́вва О́тче!

Ра́дуйся, преблаже́нне Ника́ндре, преподо́бне о́тче на́ш.

Конда́к 7.

Хотя́щу не́коему богобоя́зливу му́жу Симео́ну приити́ поклони́тися тебе́ и насы́титися сла́достных уче́ний твои́х, и́миже возмо́гл бы укрепи́ти ду́шу свою́, якова́я и улучи́л е́сть. Но ты́, прозорли́вче, предре́кл еси́ ему́ скороприближа́ющуюся кончи́ну и предугото́вал еси́ его́ к ми́рному отше́ствию из сея́ плаче́вныя юдо́ли в ве́чную несконча́емую жи́знь: чесо́ ра́ди прии́м и́ноческий о́браз, устреми́в ду́шу свою́ горе́, и до́бре пожи́в, сконча́ся и пресели́ся во блаже́нная не́дра Авраа́мова. О чесо́м ты́, прославля́я Бо́га, пое́ши благода́рственная: Аллилу́иа.

И́кос 7.

Но́ваго тя́ проро́ка яви́ на земли́ ди́вный в высо́ких Госпо́дь, разделя́яй кому́ждо дарова́ния Свята́го Ду́ха, дарова́в тебе́ си́лу прозорли́вости: благоро́дну бо не́коему му́жу Петру́, заматоре́вшу во дне́х свои́х с жено́ю и безча́дну, чуде́сно приведе́нному к тебе́, предре́кл еси́, я́ко и́мать роди́тися сы́н ему́, и я́ко воздви́гнется на ме́сте безмо́лвия твоего́ хра́м Пресвяты́я Богома́тере, и распространи́тся ме́сто сие́ и просла́вится, е́же и сбы́стся. Чесово́му удивля́ющеся, вопие́м ти́:

Ра́дуйся, му́жу прорече́ний, исполне́нием де́ла увенча́нных; ра́дуйся, бу́дущая, я́ко настоя́щая, благода́тию Бо́жиею созерца́ющий.

Ра́дуйся, благогла́сная труба́, е́юже воздвиза́ются сердца́ земноро́дных уны́лая; ра́дуйся, духо́вная скрижа́ль, на не́йже изображены́ су́ть предсказа́ния нело́жная.

Ра́дуйся, и́ноков пустынножи́тельных наста́вниче и основа́телю; ра́дуйся, моли́твами твои́ми оби́тели чу́дныя распространи́телю.

Ра́дуйся, оскуде́ния монасты́рская оби́льне испо́лнивый и от хи́щников чуде́сне защити́вый; ра́дуйся, до́бре ста́до, тобо́ю со́бранное, ко спасе́нию наставля́яй.

Ра́дуйся, о́бразе нищеты́ духо́вныя благови́дный; ра́дуйся, вся́ ми́ра сего́ кра́сная, я́ко скороисчеза́ющая, Бо́га ра́ди презре́вый.

Ра́дуйся, мно́гия лю́ди от пути́ грехо́внаго ко Го́споду обрати́вый и спасы́й; ра́дуйся, призыва́ющих тя́ утеше́ний духо́вных исполня́ющий.

Ра́дуйся, преблаже́нне Ника́ндре, преподо́бне о́тче на́ш.

Конда́к 8.

Стра́нное виде́ние и слы́шание не пленя́ющим ра́зума в послуша́ние ве́ры и не покаря́ющимся и́стине явля́ется бы́ти сие́: я́ко овогда́ чрез со́нное виде́ние, просте́ртием руки́ твоея́, овогда́ чрез глаго́л приве́тлив, овогда́ чрез разли́чная зна́мения, разсла́бленным, боля́щим, неду́гующим соверше́нное подае́ши исцеле́ние. Мы́ же, ве́рою пленя́еми, я́ко Бо́гу вся́ возмо́жна су́ть, и, «Ве́руяй в Мя́, дела́, — я́коже рече́ Христо́с, — я́же А́з творю́, бо́льша си́х сотвори́т», — прославля́ем в тебе́ чудотворя́щаго Бо́га. Тебе́ же испове́дающе досто́йным всемогу́щества Его́ ору́дием бы́ти, велегла́сно вопие́м: Аллилу́иа.

И́кос 8.

Ве́сь бы́в пре́дан Бо́гу: ра́зумом — я́ко помышля́ти о Не́м, во́лею — я́ко твори́ти уго́дная Ему́, па́мятию — приводя́ себе́ необъе́млемое присносу́щие Его́, вся́ назира́ющее и вся́ ве́дущее, предста́вил еси́ и те́ло твое́, изможди́в и очи́стив е́ бде́нием, поще́нием и чу́дным воздержа́нием, да сподо́бишися бы́ти селе́ние Бо́гу Вы́шнему, да пребу́деши во Христе́, и То́й в тебе́. Сего́ ра́ди во вре́мя свята́го поста́ притека́л еси́ в Демья́нскую оби́тель, и в соверше́ние все́х твои́х доброде́телей, наслажда́лся еси́ трапе́зы Госпо́дни, вкуша́я со благогове́нием и весе́лием Те́ло и Кро́вь Иису́са Христа́. Мы́ же, взира́юще на тя́, любе́зно вопие́м ти́:

Ра́дуйся, и́стинный учениче́ Христо́в, Его́же жела́нием возжеле́л еси́ испо́лнити во́лю; ра́дуйся, ше́ствовавый от ве́ры в ве́ру, от сла́вы в сла́ву.

Ра́дуйся, приснотеку́щаго живода́тельнаго исто́чника сла́достей наслади́выйся; ра́дуйся, вкуше́нием бра́шна неги́блющаго, ве́чнаго, предвкуси́вый небе́сная блаже́нства.

Ра́дуйся, удосто́ивыйся непостижи́маго та́инства, на не́же прини́кнути а́нгели жела́ют, о́бщник бы́ти; ра́дуйся, чрез соедине́ние сие́ призва́нный со Христо́м в Ца́рстве сла́вы жи́ти.

Ра́дуйся, челове́че, испо́лненный богомы́слия и презре́вый вся́ земна́я; ра́дуйся, во отвраще́ние е́же не ви́дети суеты́, главу́ и лице́ схи́мою покры́вый.

Ра́дуйся, о вре́мени кончи́ны твоея́, е́же от челове́к никто́же ве́сть, предвозвести́вый; ра́дуйся, по не́коем неду́зе ма́лом, крестообра́зно ру́це к пе́рсем сложи́вый.

Ра́дуйся, ду́х тво́й с весе́лием в ру́це Госпо́дни преда́вый; ра́дуйся, житие́ земно́е боже́ственным гла́сом, — благослове́н Бо́г, си́це благоволи́вый, сла́ва Тебе́, — запечатле́вый.

Ра́дуйся, преблаже́нне Ника́ндре, преподо́бне о́тче на́ш.

Конда́к 9.

Вся́кому естеству́ челове́ческому и а́нгельскому досто́ит диви́тися вели́ким от страны́ твоея́ по́двигом и чу́дному свы́ше тебе́ дарова́нию: толи́ко бо порабо́тил еси́ пло́ть твою́ ду́хови, я́ко на земли́ невеще́ственное, равноа́нгельное житие́ показа́л еси́, и живя́ ду́хом, ду́хом и ходи́л еси́, и во пло́ти, а́ки безпло́тен яви́лся еси́. Сего́ ра́ди мно́гих чуде́с творе́ния от Го́спода прие́м, чи́стою и богоприя́тною душе́ю, благода́тию Того́, ко избра́нным причте́н еси́ небе́сным си́лам в несконча́емом Ца́рствии, иде́же пое́ши Всеси́льному Бо́гу: Аллилу́иа.

И́кос 9.

Вети́й многовеща́нных язы́к недоуме́ет тя́, досто́йный вся́кия сла́вы, сла́вне преподо́бне о́тче Ника́ндре, по достоя́нию восхвали́ти и благоле́пно просла́вити па́че есте́ственная дела́ твоя́, я́же твори́л еси́ на земли́ во пло́ти су́щу ти́. Но и по преставле́нии твое́м в ве́чное Ца́рство сла́вы, иде́же ны́не по труде́х и по́двизех сла́достно почива́еши, мно́гая и пресла́вная чудеса́ твори́ти на́м не престае́ши: честна́я бо ра́ка, иде́же почива́ют святы́я твоя́ мо́щи, е́сть подо́бна Силоа́му, отню́дуже хромы́е, слепы́е, неду́жные и разсла́бленные здра́вие улуча́ют. Мы́ же, име́я таково́е безце́нное сокро́вище, благода́рствием убежда́еми, воспева́ем та́ко:

Ра́дуйся, земны́й а́нгеле и небе́сный челове́че; ра́дуйся, во пло́ти живы́й духо́вно, в ми́ре преми́рно.

Ра́дуйся, честно́е носи́ло и похвале́ние Святы́я Тро́ицы; ра́дуйся, трича́стное души́ твоея́ посвяти́вый Еди́ному Го́споду.

Ра́дуйся, крило́ма ра́зума возлете́вый к Трисо́лнечному Све́ту; ра́дуйся, во́лею твое́ю потща́выйся святи́ти себе́, я́коже свя́т Госпо́дь Бо́г на́ш.

Ра́дуйся, име́яй попече́ние не себе́ то́чию, но и все́м блаже́нства дости́гнути; ра́дуйся, испо́лненный ми́ра и любви́ Бо́жия, ко все́м миролюби́в и братолюби́в бы́л еси́.

Ра́дуйся, осеня́емый Ду́хом благода́тей, и притека́ющих к тебе́ во спасе́ние умудря́яй; ра́дуйся, в раска́яние прише́дших милосе́рдием Бо́жиим утеша́яй.

Ра́дуйся, пред лице́м Бо́жиим, я́ко ра́б пред Го́сподем, ходи́вый; ра́дуйся, подви́жниче, та́ко те́кший, я́ко дости́гл еси́ венца́ твоего́, его́же и на́с улучи́ти сподо́би.

Ра́дуйся, преблаже́нне Ника́ндре, преподо́бне о́тче на́ш.

Конда́к 10.

Спасе́ние хотя́ улучи́ти душе́ твое́й, преподо́бне, от ю́ности твоея́, да́же до кончи́ны, ше́ствовал еси́ путе́м у́зким и приско́рбным, взе́м кре́ст на ра́мо, ве́дящи, я́ко широ́кий и простра́нный пу́ть е́сть вводя́й в па́губу. Те́мже а́ще и те́рние, и непроходи́мая места́, и зла́я приключе́ния запина́ху тебе́, оба́че, предше́ствующу тебе́ ве́рному Вождю́ и Побо́рнику Иису́су, дости́гл еси́ во дворы́ небе́сныя, иде́же ра́достей неизглаго́ланных, я́же о́ко не ви́де, и у́хо не слы́ша, и на се́рдце челове́ку не взыдо́ша, наслажда́яся, вопие́ши Бо́гу: Аллилу́иа.

И́кос 10.

Стена́ необори́мая еси́ все́м земноро́дным, ко ско́рому твоему́ заступле́нию и предста́тельству притека́ющим, преблаже́нне о́тче Ника́ндре! Те́мже и на́м, к святы́м моща́м твои́м, неви́димыми а́нгелами стерего́мым, с ве́рою приходя́щим, и ми́лостивыя коему́ждо по потре́бе по́мощи прося́щим, бу́ди стена́ кре́пкая и опло́т неруши́мый, от вся́ких на́с бе́д застеня́я и огражда́я. За е́же мы́ вопие́м тебе́ такова́я:

Ра́дуйся, бы́стрый предста́телю, прие́млющий проше́ния на́ша и на же́ртвенник благоутро́бия Бо́жия вознося́щий; ра́дуйся, коего́ждо проше́ния в и́х по́льзу исполня́ющий.

Ра́дуйся, ско́рое услы́шание ни́щих; ра́дуйся, сердобо́льный судия́ вдови́ц и оте́ц си́рых.

Ра́дуйся, озлобля́емых непови́нно ре́вностный защи́тителю; ра́дуйся, боля́щих душе́ю и те́лом безме́здный исцели́телю.

Ра́дуйся, пи́ще и отра́до а́лчущих и жа́ждущих; ра́дуйся, согре́яние во мра́зех су́щих.

Ра́дуйся, обурева́емых немяте́жное приста́нище; ра́дуйся, до́брый ко́рмчий, жития́ сего́ кора́бль управля́ющий.

Ра́дуйся, оскуде́ния оби́тели твоея́ бога́тне испо́лнивый; ра́дуйся, хра́мы святы́я и зда́ния, снеде́нныя огне́м, согре́янием серде́ц благогове́ющих благоле́пне обнови́вый.

Ра́дуйся, преблаже́нне Ника́ндре, преподо́бне о́тче на́ш.

Конда́к 11.

Пе́нию вся́кому земноро́дных досто́ит умо́лкнути в прославле́нии превыша́ющих си́лы челове́ческия трудо́в твои́х, и́миже до́бре потруди́лся еси́ в пусты́ни, возде́лывая ни́ву се́рдца твоего́ к духо́вному плодоноше́нию. Кто́ бо от челове́к возвели́чит суро́вое житие́ твое́? Кто́ просла́вит му́жественныя по́двиги твоя́: безмо́лвие соверше́нное, смире́ние, незло́бие, нищету́ духо́вную, по́ст многодне́вный, моли́тву непреста́нную, чистоту́ по вну́треннему и вне́шнему челове́ку? За ня́же сподо́бился еси́ со все́ми без поро́ка после́дующими А́гнцу, в преподо́бии и пра́вде пожи́вшими, пе́ти: Аллилу́иа.

И́кос 11.

Светоза́рное свети́ло яви́лся еси́ не то́чию во страна́х Нова́града и Пско́ва, но и всю́ богоспаса́емую Росси́ю освеща́еши златови́дными луча́ми твоего́ пусты́ннаго и богоуго́днаго жития́, преподо́бне, и оби́льными вода́ми, от цельбоно́сных моще́й твои́х, напая́еши все́х ве́рных, вопию́щих к тебе́ такова́я:

Ра́дуйся, испове́давый Христа́ Иису́са сло́вом и де́лом пред челове́ки; ра́дуйся, я́ко в воздая́ние за сия́, испове́дан еси́ от Него́ пред а́нгелы Бо́жиими во ве́ки.

Ра́дуйся, благи́й де́лателю виногра́да Христо́ва, поне́сший тяготу́ дне́ и ва́р; ра́дуйся, плоды́ трудо́в твои́х, я́ко перворо́дное, прине́сший Го́споду в да́р.

Ра́дуйся, ми́ром сле́з твои́х в ве́ре пома́завый но́зе Иису́са; ра́дуйся, я́ко, иде́же гла́с Ева́нгельский проница́ет, возвеща́ется и́мя твое́.

Ра́дуйся, те́ло твое́ угото́вавый в жили́ще Ду́ху Свято́му; ра́дуйся, и по сме́рти, де́йствовати Ему́же в не́м лю́дем на по́льзу, удосто́ивыйся.

Ра́дуйся, я́ко моще́й твои́х де́монския си́лы трепе́щут; ра́дуйся, я́ко мо́щи твои́ коему́ждо в приключи́вшихся печа́лех увеселе́ние источа́ют.

Ра́дуйся, восте́кший на небеса́ душе́ю, я́ко Илия́ Елиссе́еви же оста́вивый ми́лоть, ты́ же на́м мо́щи твоя́; ра́дуйся, я́ко си́лою и́х, я́коже то́й ми́лотию разделя́ше во́ды, мы́, лобыза́юще я́, разделя́ем во́ды скорбе́й и ше́ствуем по су́ше исполне́ния жела́ний во благи́х.

Ра́дуйся, преблаже́нне Ника́ндре, преподо́бне о́тче на́ш.

Конда́к 12.

Благода́ть, да́нную преподо́бному Се́ргию, пропове́даше иногда́ вели́кий кня́зь Дими́трий с во́и свои́ми, егда́ то́й моли́твою его́ и по́мощию дву́х мона́хов, да́нных ему́ от него́, нечести́вых ага́рян победи́л е́сть. Ра́вно и мы́ благода́ть твою́ пропове́дуем, егда́, облежа́щу Пско́в злочести́вому Бато́рию с по́лчищи свои́ми, прове́л еси́ моли́твою твое́ю жи́телей страны́ сея́ безвре́дных посреди́ огня́ и меча́, ше́дших со освяще́нным собо́ром на погребе́ние твоего́ те́ла. Отуну́дуже почерпа́юще наде́жду, избавля́тися и вся́кой стране́, чту́щей тя́, от наше́ствия иноплеме́нных твои́м заступле́нием, вопие́м Бо́гу: Аллилу́иа.

И́кос 12.

Пою́ще благогове́йно пусты́нническия по́двиги твоя́, уго́дниче Бо́жий Ника́ндре, и́миже дости́гл еси́ безсме́ртныя сла́вы на небесе́х, и всечестно́е твое́ успе́ние в сме́рти, прославля́ем се́рдцем и устна́ми Бо́га вся́каго утеше́ния и щедро́т, дарова́вшаго на́м тебе́, такова́го му́жественнаго подви́жника на неви́димых враго́в в после́дование, и такова́го ми́лостиваго отца́, и́же и по преставле́нии свое́м на́с не оставля́еши, но оби́льными чуде́с вода́ми всегда́ напая́еши, очища́еши и прохлажда́еши. Те́мже, надгро́бную соверша́юще пе́снь, ублажа́ем достопа́мятное житие́ твое́ любе́зным воспомина́нием и усе́рдным целова́нием:

Ра́дуйся, челове́че Бо́жий, девятью́ блаже́нствами Ева́нгельскими укра́шенный; ра́дуйся, во свете́ние чуде́сное Це́ркви Правосла́вной на высоте́ поста́вленный.

Ра́дуйся, уподо́бивыйся Ону́фрию и Се́ргию вели́ким, подража́я житие́м в пусты́не; ра́дуйся, Алекса́ндру Сви́рскому, я́вльшемуся ти́ сугу́бо на укрепле́ние проти́ву нападе́ний бесо́вских, после́довавый в святы́ни.

Ра́дуйся, Моисе́ю богови́дцу поревнова́вый в презре́нии вре́менных сла́достей; ра́дуйся, поноше́ние Христо́во вмени́вый бо́льшее бога́тство, па́че все́х сокро́вищь, взира́я на мздовоздая́ние небе́сных ра́достей.

Ра́дуйся, ми́р име́вый и святы́ню со все́ми, и́хже ра́ди зри́ши Бо́га; ра́дуйся, по степе́нем доброде́телей приступи́вый ко гра́ду Бо́га Жива́го, к Иерусали́му Небе́сному.

Ра́дуйся, отту́ду хода́тайством твои́м ниспосыла́ющий вся́ на́м блага́я, вре́менная и ве́чная; ра́дуйся, победи́телю ви́димых и неви́димых враго́в, сотворе́нный столпо́м в Це́ркви, на не́мже напи́сано и́мя Бо́жие.

Ра́дуйся, уме́рый ми́рови жи́в же Бо́гови, ме́ртвым душе́ю да́рующий жи́ти; ра́дуйся, живы́й во ве́ки во Ца́рствии Небе́сном со Христо́м, с Ни́мже и на́м моли́ бы́ти.

Ра́дуйся, преблаже́нне Ника́ндре, преподо́бне о́тче на́ш.

Конда́к 13.

О, преблаже́нне, преподо́бне, вели́кий чудотво́рче Ника́ндре, ми́лостивейший во дне́х на́ших покрови́телю и о́тче! Ны́нешнее приими́ от се́рдца, подоба́ющее тебе́, приноси́мое моле́ние, и твои́м непосты́дным хода́тайством у Небе́снаго Царя́ испроси́: стра́ждущую страну́ Росси́йскую Христо́с Бо́г от лю́тых безбо́жник и вла́сти и́х да свободи́т, и да возста́вит престо́л правосла́вных прави́телей; ве́рных рабо́в Его́, в ско́рби и печа́ли де́нь и но́щь вопию́щих к Нему́, многоболе́зный во́пль да услы́шит, и да изведе́т от поги́бели живо́т на́ш, от вра́г ви́димых и неви́димых, от вся́ких бе́д, напа́стей и скорбе́й. И исхода́тайствуй все́м, усе́рдно призыва́ющим тя́, про́чее вре́мя живота́ в ми́ре и и́стинном покая́нии сконча́вше, в Небе́сном Ца́рствии с тобо́ю пе́ти во ве́ки: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгельскими девяточи́сленными си́лами окружа́емый сла́вы Госпо́дь, предуве́дев неукло́нное се́рдца твоего́ изволе́ние, я́ко хо́щеши бы́ти покори́вым ученико́м и тщали́вым исполни́телем за́поведей Его́, вдохну́ тебе́, я́коже дре́вле проро́чице А́нне, е́же прибега́ти ко хра́му Госпо́дню, да научи́шися та́мо нача́лом прему́дрости, я́же е́сть стра́х Госпо́день. Те́мже и научи́ на́с со удивле́нием воспева́ти тебе́ такова́я:

Ра́дуйся, благочести́ваго ко́рене благо́е прозябе́ние; ра́дуйся, чу́дное все́х христиа́нских доброде́телей плодоприноше́ние.

Ра́дуйся, младе́нче, при купе́ли обновле́ния посвяти́вый себе́ Го́споду на служе́ния ве́рная; ра́дуйся, пома́занниче, восприе́мый свы́ше всеору́жия духо́вная.

Ра́дуйся, те́ми от ю́ности на те́ло свое́, на ми́р се́й и диа́вола себе́ ополчи́вый; ра́дуйся, ра́зум сво́й ко све́ту богове́дения воспери́вый.

Ра́дуйся, очи́ма твои́ма всю́ду Го́спода иска́вый и в Не́м наме́рение полага́вый; ра́дуйся, слу́хи твоя́ на восприя́тие глаго́лов Бо́жиих, и́миже возражда́ется ве́ра, обрати́вый.

Ра́дуйся, уста́ твоя́ на славосло́вие Бо́жие и псалмопе́ние, на назида́ние и́скреннему твоему́ в душеполе́зном отверза́яй; ра́дуйся, ру́це твои́ на творе́ние благодея́ния тре́бующим устроя́яй.

Ра́дуйся, но́зе твои́ ше́ствовати по путе́м оправда́ний Госпо́дних управля́яй; ра́дуйся, вся́ твоя́ душе́вная и теле́сная чу́вства на благоугожде́ние Пода́телю все́х бла́г устремля́яй.

Ра́дуйся, преблаже́нне Ника́ндре, преподо́бне о́тче на́ш.

Конда́к 1.

Возбра́нный от Нача́льника и Соверши́теля ве́ры, Го́спода Иису́са, да́нный во о́браз после́дования Правосла́вныя Це́ркви сосло́вию, до́блественный подви́жниче и чудотво́рче преди́вный, преподо́бне о́тче Ника́ндре! Похва́льная со благодаре́нием прино́сим ти́, моли́твенницы твои́, и́бо те́плым твои́м предста́тельством у Царя́ Небе́снаго вся́ поле́зная и спаси́тельная хода́тайствуеши на́м. Я́ко име́я дерзнове́ние ко Престо́лу Благода́ти, от вся́ких на́с злоключе́ний свободи́, да зове́м ти́:

Ра́дуйся, преблаже́нне Ника́ндре, преподо́бне о́тче на́ш.

Моли́тва.

О, преподо́бне и достоблаже́нне о́тче на́ш Ника́ндре, по́стниче терпеливоду́шный, безмо́лвия рачи́телю предо́блий, учи́телю духо́вный спасти́ся хотя́щим, наказа́телю прети́хий лени́вым, разреши́телю тлетво́рных страсте́й незло́бивый, му́жу жела́ний, прозорли́вства проро́ческаго исполне́ние, предвозгла́сная цевни́це бу́дущих, адама́нте ве́ры во Христа́ несеко́мый, незы́блемый сто́лпе терпе́ния, соверши́телю за́поведей Творца́ твоего́ благопослушли́вый, плотоно́сный а́нгеле и Ду́ха Свята́го вмести́лище благово́нное, жи́телю пусты́нный и бесо́в прогони́телю, испо́лнителю все́х доброде́телей смиренному́дрый, Небе́сный челове́че и сожи́телю го́рним чинонача́лием, земны́й а́нгеле, кро́тостию ду́ха кро́тких зе́млю насле́довавый, дру́же Христо́в и уго́дниче Пресвяты́я Богоро́дицы, я́же и ра́ку цельбоно́сных моще́й твои́х во хра́ме свое́м просла́вити благоизво́ли, я́ко Ма́ти су́щи Творца́ и Зижди́теля всея́ тва́ри и Храни́тельница все́х тружда́ющихся и обремене́нных. Та́я бо незави́стно и от ра́ки твоея́, преподо́бне, чуде́сному дождю́ на ве́рных излива́тися повеле́. К не́йже припа́дающе, любе́зно мо́лим тя́, досточу́дне: не преста́й моли́ти Пресвяту́ю и Живонача́льную Тро́ицу, низпосла́ти держа́ве на́шей тишину́ и долгоде́нствие, на враги́ же побе́ду и одоле́ние, и от наве́т вра́жиих во́инству сохрани́тися в ми́ре, це́рквам — согла́сие, и все́м лю́дем тишину́ и изоби́лие благи́х дарова́ти. И угаси́, блаже́нне, моли́твами твои́ми, паря́щия на ны́ разжже́нныя бесо́вския стре́лы, да не прико́снется на́м зло́ба грехо́вная, и все́м вся́ ми́лостивне да́руя, при́зри и на мя́, смире́ннаго своего́ раба́: свя́зан бо е́смь лю́те плени́цами прегреше́ний, и влеко́м, увы́ мне́! в пучи́ну стра́стнаго мо́ря неодержа́нно. Сего́ ра́ди приле́жно молю́ святы́ню твою́, пребога́те, и припа́даю любе́зно к ра́це моще́й твои́х со слеза́ми: предста́ни мне́ на пути́ бе́дственнаго жития́ сего́, расто́ргни у́зы, отжени́ стра́сти, осла́би от грехо́вных вери́г, изба́ви мя́ от належа́щия ско́рби и вся́каго зла́, разреши́ мя от боле́зненных у́з и спасе́ние да́руй, я́ко да спа́сшеся моли́твами твои́ми, воспою́ и просла́влю в Тро́ице сла́вимаго Еди́наго Бо́га, Отца́ и Сы́на и Свята́го Ду́ха, ны́не и в безконе́чныя ве́ки веко́в. Ами́нь.