Конда́к 1.

Избра́нный от благочести́ваго ро́да подви́жниче, преподо́бне о́тче на́ш Ники́то, благоче́стием и труды́ мно́гими Бо́гу угоди́вый, приими́ похва́льное пе́ние от на́с, любо́вию чту́щих святу́ю па́мять твою́, и я́ко име́я ве́лие дерзнове́ние ко Го́споду, моли́ Христа́ Бо́га о спасе́нии ду́ш на́ших, да зове́м ти́:

Ра́дуйся, преподо́бне Ники́то, гра́да Костромы́ усе́рдный засту́пниче.

И́кос 1.

А́нгела земна́го яви́ тя Госпо́дь земли́ на́шей, я́ко во оби́телех ея́ до́бре подвиза́вся, кро́тким и ти́хим житие́м просия́л еси́. Те́мже и Христо́с отве́рзе ти́ врата́ Небе́сная и ли́ку преподо́бных сочета́, мы́ же благода́рне воспева́ем си́це:

Ра́дуйся, земли́ Росто́вския прозябе́ние; ра́дуйся, благочести́ваго ро́да украше́ние.

Ра́дуйся, Се́ргия преподо́бнаго боголюби́вый сро́дниче; ра́дуйся, смире́нный его́ учениче́ и усе́рдный послу́шниче.

Ра́дуйся, от младе́нчества любо́вь ко Го́споду яви́вый; ра́дуйся, да́же до сме́рти ю́ сохрани́вый.

Ра́дуйся, ко и́ноческому житию́ от ю́ности прилежа́вый; ра́дуйся, а́нгельский нра́в стяжа́вый.

Ра́дуйся, преподо́бне Ники́то, гра́да Костромы́ усе́рдный засту́пниче.

Конда́к 2.

Ви́дев Госпо́дь усе́рдие твое́ ко и́ноческому житию́, напра́ви стопы́ твоя́ ко преподо́бному сро́днику твоему́ а́вве Се́ргию, от него́же благоче́стию науче́н, любо́вь к доброде́телем стяжа́л еси́ и, послуша́нию прилежа́в, о́браз трудолю́бия яви́л еси́. Сего́ ра́ди, зря́ще о тебе́ благу́ю во́лю Госпо́дню, воспева́ем Бо́гу: Аллилу́иа.

И́кос 2.

Ра́зум просвеще́н име́ти жела́я, в зако́не Госпо́дни поуча́лся еси́ де́нь и но́щь, преподо́бне Ники́то, та́же и Ле́ствицу свята́го Иоа́нна списа́л еси́, да ле́ствицею доброде́телей и́ноческих на Не́бо взы́деши. Мы́ же, дивя́щеся усе́рдию твоему́, вопие́м ти́:

Ра́дуйся, роди́телей благи́х пло́д до́брый и избра́нный; ра́дуйся, благоче́стие от ни́х восприе́мый.

Ра́дуйся, от ю́ности по́стническому житию́ прилежа́вый; ра́дуйся, Се́ргию преподо́бному ученика́ себе́ соде́лавый.

Ра́дуйся, в послуша́нии тому́ усе́рдно пребыва́вый; ра́дуйся, наставле́ньми его́ мно́гия доброде́тели стяжа́вый.

Ра́дуйся, чистоты́ серде́чныя усе́рдный храни́телю; ра́дуйся, уста́вов и́ноческих изря́дный ревни́телю.

Ра́дуйся, преподо́бне Ники́то, гра́да Костромы́ усе́рдный засту́пниче.

Конда́к 3.

Си́лою Вы́шняго укрепля́емь, мно́гая ле́та во оби́тели Святы́я Тро́ицы подвиза́лся еси́, о́тче Ники́то, и постриже́ние и́ноческое от свята́го игу́мена Се́ргия восприе́м, о́браз пра́веднаго жития́ его́ в се́рдцы слага́л еси́, и свиде́тель ди́вных чуде́с и по́двигов его́ соде́лался еси́, воспева́я Бо́гу: Аллилу́иа.

И́кос 3.

Име́я по вся́ дни́ упова́ние на Бо́га, во́ли твоея́ отре́клся еси́, преподо́бне о́тче на́ш Ники́то, мы́ же, воспева́юще добронра́вное житие́ твое́, прославля́ем тя́ та́ко:

Ра́дуйся, нищету́ духо́вную возлюби́вый; ра́дуйся, мудрова́ние плотско́е умертви́вый.

Ра́дуйся, слеза́ми мно́гими се́рдце очи́стивый; ра́дуйся, богомы́слием у́м горе́ возвы́сивый.

Ра́дуйся, молча́ния Исаа́киева благогове́йный свиде́телю; ра́дуйся, послуша́ния Ни́конова ди́вный ревни́телю.

Ра́дуйся, Михе́евым словесе́м со стра́хом внима́вый; ра́дуйся, Си́монову благоразу́мию подража́вый.

Ра́дуйся, преподо́бне Ники́то, гра́да Костромы́ усе́рдный засту́пниче.

Конда́к 4.

Бу́рю помышле́ний послуша́нием усмиря́я, благослове́ние преподо́бнаго Се́ргия кро́тко восприя́л еси́, и к но́вому по́двигу устреми́лся еси́, о́тче Ники́то. Те́мже к преподо́бному Афана́сию прише́д, во оби́тели Высо́цкой гра́да Се́рпухова всели́лся еси́, Бо́гови вопия́: Аллилу́иа.

И́кос 4.

Слы́шавше бра́тия Се́рпуховския оби́тели о богоуго́днем житии́ твое́м, преподо́бне Ники́то, с любо́вию прия́ша тя́, я́ко отца́ духо́внаго, и попече́ние о душа́х свои́х вве́риша тебе́, а́ще и ле́ты ю́н бя́ше. Мы́ же, дивя́щеся разсужде́нию твоему́ и благода́ти, в тебе́ бы́вшей, взыва́ем си́це:

Ра́дуйся, преподо́бнаго Се́ргия досто́йный учениче́; ра́дуйся, преподо́бнаго Афана́сия смире́нный помо́щниче.

Ра́дуйся, да́р разсужде́ния послуша́нием стяжа́вый; ра́дуйся, у́мному де́ланию со усе́рдием прилежа́вый.

Ра́дуйся, ле́ствицею доброде́телей от си́лы в си́лу восходи́вый; ра́дуйся, обе́ты и́ноческия, я́ко зало́г спасе́ния, возлюби́вый.

Ра́дуйся, гра́д Кострому́ моли́твами твои́ми утверди́вый; ра́дуйся, зе́млю Костромску́ю стопа́ми твои́ми освяти́вый.

Ра́дуйся, преподо́бне Ники́то, гра́да Костромы́ усе́рдный засту́пниче.

Конда́к 5.

Богому́дрый игу́мен оби́тели Се́рпуховския яви́лся еси́, о́тче Ники́то, словесы́ святы́х оте́ц все́х назида́я, ка́ко подоба́ет в едине́нии и любви́ пребыва́ти, моли́тве и послуша́нию прилежа́ти, и кре́стным путе́м ко спасе́нию ше́ствовати, взыва́я Бо́гу: Аллилу́иа.

И́кос 5.

Ви́дев разоре́ние оби́тели твоея́ от нечести́вых иноплеме́нник, преподо́бне Ники́то, мно́гия по́двиги и труды́ положи́л еси́, па́ки устроя́я благоле́пие ея́, и я́ко ми́лостивый оте́ц, о лю́дех, кро́ва лише́нных, а́лчущих и в ну́ждах су́щих, попече́ние име́л еси́. Мы́ же, прославля́юще богоуго́дное житие́ и доброде́тели твоя́, вопие́м ти́:

Ра́дуйся, благочи́ния монасты́рскаго неуста́нный блюсти́телю; ра́дуйся, уста́ва церко́внаго усе́рдный ревни́телю.

Ра́дуйся, добротолю́бия и́стинный учи́телю; ра́дуйся, скорбя́щих и стра́ждущих до́брый попечи́телю.

Ра́дуйся, свети́льниче от Го́спода возжже́нный; ра́дуйся, благода́тию Ду́ха Свята́го освяще́нный.

Ра́дуйся, в наше́ствии иноплеме́нник все́ упова́ние на Бо́га возложи́вый; ра́дуйся, кро́тостию и смире́нием мно́жества мона́хов собра́вый.

Ра́дуйся, преподо́бне Ники́то, гра́да Костромы́ усе́рдный засту́пниче.

Конда́к 6.

Пропове́дует земля́ Ру́сская смире́ние твое́ и любо́вь ко и́ноческому по́двигу, преподо́бне Ники́то: ты́ бо, уедине́ния взыску́я, и в Покро́вскую оби́тель бли́з гра́да Бо́ровска всели́вся, бра́тию ея́ я́ко ста́рец богому́дрый окормля́л еси́, воспева́я Бо́гу: Аллилу́иа.

И́кос 6.

Возсия́л еси́ во оби́тели Покро́вской свя́тостию жития́ твоего́, прехва́льне Ники́то, и ю́наго подви́жника, преподо́бнаго Пафну́тия, возрасти́л еси́, и́же вся́кому мона́шескому де́ланию от тебе́ научи́ся. Мы́ же, прославля́юще житие́ твое́, воспева́ем тя́:

Ра́дуйся, свети́льниче, пу́ть ко спасе́нию указу́яй; ра́дуйся, подви́жниче, горе́ сердца́ при́сно возводя́й.

Ра́дуйся, доброде́тельнаго жития́ богому́дрый учи́телю; ра́дуйся, преподо́бнаго Пафну́тия иску́сный наста́вниче.

Ра́дуйся, мно́гия и́ноки Бо́гови возрасти́вый; ра́дуйся, те́м я́ко оте́ц милосе́рдный бы́вый.

Ра́дуйся, преподо́бне, в по́двизех ча́д твои́х укрепля́вый; ра́дуйся, словесы́ твои́ми в терпе́нии и́х утвержда́вый.

Ра́дуйся, преподо́бне Ники́то, гра́да Костромы́ усе́рдный засту́пниче.

Конда́к 7.

Хотя́ по заве́ту преподо́бнаго Се́ргия в се́верней стране́ о́бщее житие́ и́ноков устро́ити, прии́де пре́жде во оби́тель Тро́ицкую помоли́тися, о́тче Ники́то. Зде́ же, узре́в чудеса́ от моще́й отца́ твоего́ духо́внаго, благода́рственне воспе́л еси́ Бо́гу: Аллилу́иа.

И́кос 7.

Но́ваго уго́дника чуде́с самови́дец бы́ти сподо́бився, ду́хом укрепи́лся еси́, преподо́бне о́тче Ники́то, да в се́верную страну́ изше́д, сла́ву учи́теля твоего́ и печа́льника земли́ Ру́сския распространи́ши. Мы́ же, я́ко ве́рнаго ученика́ Се́ргиева тя́ почита́юще, прославля́ем си́це:

Ра́дуйся, ди́внаго учи́теля ве́рный учениче́; ра́дуйся, благода́ти того́ досто́йный прие́мниче.

Ра́дуйся, заве́тов преподо́бнаго Се́ргия исполни́телю; ра́дуйся, уста́вов его́ в и́ноческих оби́телех насади́телю.

Ра́дуйся, мно́гими доброде́тельми житие́ украси́вый; ра́дуйся, в ли́це ученико́в Се́ргиевых просла́вленный.

Ра́дуйся, смире́ние во основа́ние по́двигов положи́вый; ра́дуйся, исполне́нием за́поведей Бо́жиих на Не́бо возше́дый.

Ра́дуйся, преподо́бне Ники́то, гра́да Костромы́ усе́рдный засту́пниче.

Конда́к 8.

Стра́нно и ди́вно бы́сть прише́ствие твое́ во гра́д Кострому́, преподо́бне о́тче Ники́то: подоба́ет бо си́льным и ю́ным в да́льния страны́ тещи́ и но́вое служе́ние приима́ти. Ты́ же, не́мощен сы́й и очи́ма неду́жен, сие́ сверши́л еси́, воспева́я Даю́щему тебе́ кре́пость: Аллилу́иа.

И́кос 8.

Все́ упова́ние на Го́спода возложи́в, преподо́бне Ники́то, в преде́лы Костромски́я изше́л еси́, иде́же в пусты́ннем ме́сте оби́тель Богоявле́нскую устро́ив, мно́жество и́ноков собра́л еси́. Сего́ ра́ди похваля́ем тя́:

Ра́дуйся, благослове́ние духо́внаго отца́ испо́лнивый; ра́дуйся, зе́млю Костромску́ю прише́ствием твои́м освяти́вый.

Ра́дуйся, дре́вний гра́д моли́твами твои́ми утверди́вый; ра́дуйся, оби́тель Богоявле́ния в не́м основа́вый.

Ра́дуйся, взыску́ющия и́ноческаго по́двига о́крест себе́ собра́вый; ра́дуйся, боголюби́вому о́бщему житию́ те́х научи́вый.

Ра́дуйся, страну́ Костромску́ю по́двиги твои́ми просла́вивый; ра́дуйся, лю́ди ея́ на спасе́ния стези́ наста́вивый.

Ра́дуйся, преподо́бне Ники́то, гра́да Костромы́ усе́рдный засту́пниче.

Конда́к 9.

Вся́к правосла́вный похваля́ет терпе́ние твое́, преподо́бне о́тче Ники́то: ты́ бо, гла́д и хла́д, вся́кия напа́сти и наше́ствие иноплеме́нных в многотру́днем и ско́рбнем житии́ претерпева́я, Бо́га за вся́ благодари́л еси́, воспева́я Ему́: Аллилу́иа.

И́кос 9.

Вети́йствующий язы́к не мо́жет изрещи́ оби́лие любве́ твоея́ и вели́каго смире́ния: ты́ бо, преподо́бне, многоле́тен сы́й и са́ном архимандри́та облече́н, со смире́нием все́м послужи́л еси́. Сего́ ра́ди прославля́ем тя́:

Ра́дуйся, свети́льниче, игу́меном Ра́донежским возжже́нный; ра́дуйся, сосу́де, даро́в Ду́ха Свята́го испо́лненный.

Ра́дуйся, нището́ю духо́вною себе́ обогати́вый; ра́дуйся, глубино́ю смире́ния высоту́ Богомы́слия показа́вый.

Ра́дуйся, преподо́бне, христоподража́тельный нра́в стяжа́вый; ра́дуйся, вся́ ско́рби благоду́шне терпе́вый.

Ра́дуйся, слепо́тствуя теле́сне, духо́вное зре́ние име́вый; ра́дуйся, терпе́нием скорбе́й да́р разсужде́ния обреты́й.

Ра́дуйся, преподо́бне Ники́то, гра́да Костромы́ усе́рдный засту́пниче.

Конда́к 10.

Спасти́ хотя́ ду́ши приходя́щих к тебе́, Богому́дре о́тче Ники́то, по́двиг настоя́тельства терпели́во поне́сл еси́, и вся́кое попече́ние о лю́дех твои́х на ра́мо взе́м, лени́выя облича́л еси́, немощны́я укрепля́л еси́, скорбя́щия утеша́л еси́, да вси́ возмо́гут пе́ти Го́споду: Аллилу́иа.

И́кос 10.

Стена́ и прибе́жище бы́сть тебе́, о́тче на́ш Ники́то, ико́на Пресвяты́я Богоро́дицы, имену́емая Фео́доровская, пред не́юже моле́ние те́плое за вся́ лю́ди возноси́л еси́. Сего́ ра́ди зове́м ти́:

Ра́дуйся, жития́ и́ноческаго во гра́де Костроме́ му́дрый устрои́телю; ра́дуйся, пра́вил о́бщаго жития́ усе́рдный насади́телю.

Ра́дуйся, оби́тели Богоявле́нской кре́пкое основа́ние; ра́дуйся, мона́шествующих при́сная похвало́.

Ра́дуйся, словесы́ твои́ми ча́да духо́вная напита́вый; ра́дуйся, о́ная на пу́ть спасе́ния наста́вивый.

Ра́дуйся, приходя́щия к тебе́ с любо́вию приима́вый; ра́дуйся, в ну́ждах су́щим потре́бная подава́вый.

Ра́дуйся, преподо́бне Ники́то, гра́да Костромы́ усе́рдный засту́пниче.

Конда́к 11.

Пе́ние всеумиле́нное Го́споду прине́сл еси́, преподо́бне о́тче Ники́то, егда́ ча́с кончи́ны твоея́ и разреше́ния от трудо́в и по́двигов мно́гих прии́де, ты́ бо, ду́х тво́й в ру́це Бо́жии со благодаре́нием предая́, воззва́л еси́: Аллилу́иа.

И́кос 11.

Свети́льника земли́ Ру́сския ве́мы тя́, Богоно́сне о́тче на́ш Ники́то: ты́ бо, о́гнь любве́ Боже́ственныя от преподо́бнаго Се́ргия восприе́м, сердца́ мно́гая возже́гл еси́. Те́мже похваля́ем тя́ словесы́ сицевы́ми:

Ра́дуйся, я́ко свети́льник земли́ Ру́сския возсия́вый; ра́дуйся, в стране́ Костромско́й по́прище многотру́дное сконча́вый.

Ра́дуйся, во оби́тели Богоявле́нской ду́х тво́й Бо́гу преда́вый; ра́дуйся, кончи́ною пра́ведною назида́ние все́м сотвори́вый.

Ра́дуйся, гра́д Кострому́ моща́ми твои́ми освяти́вый; ра́дуйся, во оби́тели Небе́сныя всели́выйся.

Ра́дуйся, я́ко Престо́лу Вседержи́теля предстои́ши; ра́дуйся, я́ко о стране́ на́шей при́сно хода́тайствуеши.

Ра́дуйся, преподо́бне Ники́то, гра́да Костромы́ усе́рдный засту́пниче.

Конда́к 12.

Благода́ть чуде́с от гро́ба твоего́ источа́еши все́м, с любо́вию притека́ющим к тебе́, преподо́бне о́тче Ники́то. Мы́ же, зря́ще такову́ю ми́лость Бо́жию, на́м гре́шным подава́емую предста́тельством твои́м, уми́льно взыва́ем: Аллилу́иа.

И́кос 12.

Почита́ем тя́, уго́дниче Бо́жий Ники́то, наста́вниче мона́хов и собесе́дниче А́нгелов, и воспева́ем по́двиги твоя́, и́миже Це́рковь Ру́сскую прославля́еши и на́с в Правосла́вии укрепля́еши. Сего́ ра́ди с любо́вию взыва́ем ти́:

Ра́дуйся, я́ко мно́гия оби́тели в земли́ на́шей наста́вника тя́ почита́ют; ра́дуйся, я́ко и́ноцы и мирсти́и к предста́тельству твоему́ с ве́рою притека́ют.

Ра́дуйся, я́ко моли́твами твои́ми от скорбе́й и бе́д огражда́еши; ра́дуйся, я́ко чудеса́ от гро́ба твоего́ неоску́дно источа́еши.

Ра́дуйся, я́ко в со́нмех святы́х ны́не Бо́га прославля́еши; ра́дуйся, я́ко в ли́це преподо́бных пред Престо́лом Святы́я Тро́ицы пребыва́еши.

Ра́дуйся, я́ко в невече́рнем све́те ны́не со А́нгелы лику́еши; ра́дуйся, я́ко и о на́с пред Бо́гом те́пле хода́тайствуеши.

Ра́дуйся, преподо́бне Ники́то, гра́да Костромы́ усе́рдный засту́пниче.

Конда́к 13.

О преподо́бне и богоно́сне о́тче Ники́то! Приими́ ны́не приноси́мое тебе́ похва́льное пе́ние, и не забу́ди ча́д твои́х, любо́вию чту́щих тя́. Умоли́ Го́спода си́л дарова́ти на́м во вся́цем благоче́стии и чистоте́ жи́ти и Ца́рствия Небе́снаго дости́гнути, да с тобо́ю воспое́м Бо́гу: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгела земна́го яви́ тя Госпо́дь земли́ на́шей, я́ко во оби́телех ея́ до́бре подвиза́вся, кро́тким и ти́хим житие́м просия́л еси́. Те́мже и Христо́с отве́рзе ти́ врата́ Небе́сная и ли́ку преподо́бных сочета́, мы́ же благода́рне воспева́ем си́це:

Ра́дуйся, земли́ Росто́вския прозябе́ние; ра́дуйся, благочести́ваго ро́да украше́ние.

Ра́дуйся, Се́ргия преподо́бнаго боголюби́вый сро́дниче; ра́дуйся, смире́нный его́ учениче́ и усе́рдный послу́шниче.

Ра́дуйся, от младе́нчества любо́вь ко Го́споду яви́вый; ра́дуйся, да́же до сме́рти ю́ сохрани́вый.

Ра́дуйся, ко и́ноческому житию́ от ю́ности прилежа́вый; ра́дуйся, а́нгельский нра́в стяжа́вый.

Ра́дуйся, преподо́бне Ники́то, гра́да Костромы́ усе́рдный засту́пниче.

Конда́к 1.

Избра́нный от благочести́ваго ро́да подви́жниче, преподо́бне о́тче на́ш Ники́то, благоче́стием и труды́ мно́гими Бо́гу угоди́вый, приими́ похва́льное пе́ние от на́с, любо́вию чту́щих святу́ю па́мять твою́, и я́ко име́я ве́лие дерзнове́ние ко Го́споду, моли́ Христа́ Бо́га о спасе́нии ду́ш на́ших, да зове́м ти́:

Ра́дуйся, преподо́бне Ники́то, гра́да Костромы́ усе́рдный засту́пниче.

Моли́тва.

О преподо́бне о́тче на́ш Ники́то, уго́дниче Бо́жий, моли́твенниче о душа́х на́ших и те́плый засту́пниче! Ты́ во дни́ земна́го жития́ твоего́, мно́гия труды́ мона́шеския подъе́м, ду́шу покая́нием и смире́нием очи́стил еси́ и я́ко оте́ц духо́вный любо́вию все́м послужи́л еси́. Сего́ ра́ди в Небе́сных оби́телех пребыва́еши, иде́же дерзнове́нно хода́тайствуеши о на́с. Мо́лим тя́, о́тче преподо́бне, моли́ Ми́лостиваго Бо́га земно́е по́прище на́м непреткнове́нно преити́ и от разжже́нных стре́л лука́ваго сохрани́тися, во е́же бы́ти на́м ча́дом Бо́жиим и в за́поведех Его́ непоро́чно ходи́ти. Моли́, о́тче святы́й, земли́ на́шей от бе́д изба́витися, гра́ду Костроме́ и все́й стране́ на́шей в Правосла́вии утверди́тися, да при́сно сла́вим Отца́, и Сы́на, и Свята́го Ду́ха во ве́ки веко́в. Ами́нь.