Конда́к 1.

Избра́нный от Воево́ды Си́л Небе́сных Го́спода Иису́са Христа́, оби́тели Угре́шския возобнови́телю, преподо́бне о́тче на́ш Пи́мене, я́ко име́яй ве́лие дерзнове́ние к Бо́гу, моли́ся вы́ну о спасе́нии ду́ш на́ших и избавле́нии на́с от вся́ких бе́д и напа́стей, да зове́м ти́:

Ра́дуйся, Пи́мене, те́плый о на́с пред Бо́гом моли́твенниче.

И́кос 1.

А́нгельский о́браз от ю́ности возлюби́в, всего́ себе́ преда́л еси́ Го́споду и ми́ра злоко́зненнаго отре́клся еси́, и бы́л еси́ и́стинный мона́х. Сего́ ра́ди мы́ воспева́ем ти́ си́це:

Ра́дуйся, роди́тельми твои́ми во благоче́стии возраще́нный; ра́дуйся, Отца́ Небе́снаго сы́не, благода́тию озаре́нный.

Ра́дуйся, земно́е оте́чество твое́, гра́д Во́логду, свя́тостию просла́вивый; ра́дуйся, к Небе́сному Оте́честву от ю́ности устреми́выйся.

Ра́дуйся, Свяще́нное Писа́ние, еще́ о́трок сы́й, чита́ти возлюби́вый; ра́дуйся, Алфави́т Духо́вный изуча́я, за́поведи Бо́жий позна́вый.

Ра́дуйся, Пи́мене, те́плый о на́с пред Бо́гом моли́твенниче.

Конда́к 2

Ви́дя мно́жество страсте́й от диа́вола, борю́щих тя́, преподо́бне Пи́мене, возопи́л еси́ ко Го́споду и, получи́в благода́тную по́мощь, Тому́ воспе́л еси́: Аллилу́иа.

И́кос 2.

Ра́зум Бо́жий жела́я хотя́ отча́сти уразуме́ти, преподо́бне Пи́мене, Свяще́нное Писа́ние усе́рдно чита́л еси́ еще́ ю́н сы́й и в ста́рости масти́тей, сего́ ра́ди Бо́г иско́мому тя́ приобщи́. Мы́ же, свое́ неве́жество разуме́юще, глаго́лем ти́:

Ра́дуйся, во о́трочестве ста́рцем Бо́жиим во благоче́стии наста́вленный; ра́дуйся, от ю́ности навы́кнувый богоуго́дному добронра́вию.

Ра́дуйся, Феофа́на Новоезе́рскаго и Льва́ О́птинскаго зре́ти и слу́шати сподо́бльшийся; ра́дуйся, блаже́ннаго Никола́я Во́логодскаго предрече́ния удосто́ивыйся.

Ра́дуйся, к Анто́нию Ра́донежскому сове́т име́вый; ра́дуйся, святи́теля Филаре́та Моско́вскаго благослове́ние на устрое́ние общежи́тия испо́лнивый.

Ра́дуйся, Пи́мене, те́плый о на́с пред Бо́гом моли́твенниче.

Конда́к 3.

Си́лою Бо́га Всевы́шняго, все́льшеюся в тя́, преподо́бне Пи́мене, возлюби́л еси́ бли́жних и яви́лся еси́ а́лчущим пита́тель, ни́щим и си́рым защи́тник, неду́гующим помо́щник, поя́ Пода́телю все́х бла́г Бо́гу: Аллилу́иа.

И́кос 3.

Име́я и́скреннее послуша́ние ко святи́телю Филаре́ту, преподо́бне Пи́мене, Угре́шскую оби́тель обнови́л еси́ и я́ко ину́ю Ла́вру соде́лал еси́, сего́ ра́ди мы́ благода́рственно пое́м ти́:

Ра́дуйся, прибы́в в Угре́шскую оби́тель, а́нгельское пе́ние услы́шавый; ра́дуйся, сие́ пе́ние, я́ко благода́ть, до кончи́ны в се́рдце сохрани́вый.

Ра́дуйся, мона́шеское общежи́тие во Угре́шстей оби́тели учреди́вый; ра́дуйся, сие́, я́ко наилу́чший пу́ть ко спасе́нию, просла́вивый.

Ра́дуйся, виде́нием пти́ц ве́лиих, на Угре́шу летя́щих, обра́дованный; Ра́дуйся, сие́ виде́ние я́ко зна́мение благоволе́ния Бо́жия прия́вый.

Ра́дуйся, Пи́мене, те́плый о на́с пред Бо́гом моли́твенниче.

Конда́к 4.

Бу́ря недоуме́ния смуща́ет ми́ у́м, ка́ко по достоя́нию воспе́ти труды́ твоя́, преподо́бне о́тче Пи́мене, и́миже труди́лся еси́ во сла́ву Еди́наго И́стиннаго Бо́га, Ему́же мы́ со А́нгелы воспева́ем: Аллилу́иа.

И́кос 4.

Слы́шавше благочести́вии лю́дие о труде́х и по́двизех твои́х, преподо́бне Пи́мене, притеко́ша к тебе́, я́ко и́стинному па́стырю, и принесо́ша да́ры, да обнови́ши Угре́шскую оби́тель. Мы́ же, я́ко да́р, прино́сим тебе́ хвалы́ сия́:

Ра́дуйся, к покая́нию во гресе́х и смире́нию лю́ди приводя́й; ра́дуйся, во о́ных упова́ние о спасе́нии в Бо́зе утвержда́яй.

Ра́дуйся, дарми́ благоде́телей Угре́шскую оби́тель обнови́вый; Ра́дуйся, сердца́ те́х па́стырскою любо́вию согре́вый.

Ра́дуйся, благоде́телем Угре́шския оби́тели бы́вый и́стинный наста́вник; ра́дуйся, о те́х при́сный богомо́льниче.

Ра́дуйся, Пи́мене, те́плый о на́с пред Бо́гом моли́твенниче.

Конда́к 5.

Боготе́чная звезда́ яви́лся еси́ мно́жеству мона́хов, преподо́бне Пи́мене, наставля́я и окормля́я и́х ко спасе́нию и науча́я при́сно Бо́гу взыва́ти: Аллилу́иа.

И́кос 5.

Ви́девше жела́ющии жития́ и́ноческаго, я́ко во Угре́шстей оби́тели общежи́тие мона́шеское и благочи́ние храни́мо е́сть тобо́ю, преподо́бне Пи́мене, стека́хуся во мно́жестве к тебе́. Мы́ же, прославля́юще о тебе́ Го́спода Бо́га, вопие́м ти́:

Ра́дуйся, равноа́нгельнаго жития́ о́браз и́стинный на́м яви́вый; ра́дуйся, жа́ждавших вступи́ти на пу́ть и́ноческий с любо́вию во оби́тель приима́вый.

Ра́дуйся, провини́вшихся и́ноков увеща́ньми свои́ми к сле́зному раска́янию приводи́вый; ра́дуйся, о́вцы Христо́вы на живоно́сных па́житех воспита́вый.

Ра́дуйся, и́ноческаго общежи́тия велегла́сный пропове́дниче; ра́дуйся, па́ствы твоея́ до́брый наста́вниче.

Ра́дуйся, Пи́мене, те́плый о на́с пред Бо́гом моли́твенниче.

Конда́к 6.

Пропове́дницы Христа́ Бо́га бы́вше ученицы́ Угре́шскаго учи́лища, благодари́ша тя́, преподо́бне Пи́мене, я́ко и́стиннаго отца́ и учи́теля, пою́ще Бо́гу: Аллилу́иа.

И́кос 6.

Возсия́л еси́ в земли́ Моско́встей, преподо́бне Пи́мене, я́ко свети́льник, Бо́гом возжже́нный, те́мже мно́жество люде́й стека́хуся во Угре́шскую оби́тель ви́дети и слы́шати тя́. Мы́ же, па́мять твою́ творя́ще, вопие́м си́це:

Ра́дуйся, Моско́встей земли́ негаси́мый свети́льниче; ра́дуйся, све́том Христо́вым просвеща́яй ду́ши на́ша.

Ра́дуйся, обурева́емым душе́вными скорбьми́ уте́шителю; ра́дуйся, неду́гующим боле́зньми помо́щниче.

Ра́дуйся, от находя́щих обстоя́ний моли́твою огражда́яй; ра́дуйся, о прося́щих по́мощи Бо́жия хода́тайствуяй.

Ра́дуйся, Пи́мене, те́плый о на́с пред Бо́гом моли́твенниче.

Конда́к 7.

Хотя́ ду́шу твою́ спасти́, ми́р Бо́жий стяжа́л еси́ вну́трь себе́, преподо́бне Пи́мене, те́мже и спаса́хуся о́крест тебе́ мно́жество ду́ш, благода́рственно пою́щих Бо́гу: Аллилу́иа.

И́кос 7.

Но́ваго тя́ Пи́мена почита́ем, преподо́бне о́тче, наста́вника мона́хов и собесе́дника а́нгелов, ста́до слове́сное, вруче́нное ти́ Бо́гом, до́бре пасу́ща. Сего́ ра́ди ублажа́ем тя́, вопию́ще:

Ра́дуйся, слове́сных ове́ц до́брый па́стырю; ра́дуйся, тезоиме́нному ти́ Пи́мену Вели́кому подража́телю.

Ра́дуйся, труды́ ра́ди Бо́га и бли́жняго возлюби́вый, ра́дуйся, пра́зден никогда́же пребы́вый.

Ра́дуйся, о гресе́х и не́мощех твои́х рыда́вый; ра́дуйся, па́ству к покая́нию призыва́вый.

Ра́дуйся, Пи́мене, те́плый о на́с пред Бо́гом моли́твенниче.

Конда́к 8.

Стра́нника и прише́льца себе́ на земли́ бы́ти помышля́я, ча́с кончи́ны твоея́ пред очи́ма твои́ма при́сно име́л еси́ и сего́ ра́ди к ве́чному животу́ стреми́лся еси́, поя́ Бо́гу: Аллилу́иа.

И́кос 8.

Бы́л еси́ все́м вои́стину па́стырь до́брый, преподо́бне Пи́мене, та́кожде и пита́тель, помо́щник и защи́тник, на́м же ны́не ты́ еси́ моли́твенник усе́рдный и хода́тай у престо́ла Влады́чня, сего́ ра́ди восхваля́ем тя́ си́це:

Ра́дуйся, па́стырскою любо́вию приходя́щих к тебе́ объе́млющий; ра́дуйся, упова́нием о Христе́ о́ныя ра́дующий.

Ра́дуйся, а́лчущих безме́здный пита́телю; ра́дуйся, нужда́ющимся странноприи́мницы устрои́телю.

Ра́дуйся, наипа́че о душа́х пасо́мых пеки́йся. Ра́дуйся, и теле́сныя ну́жды те́х забо́тою не оставля́яй.

Ра́дуйся, Пи́мене, те́плый о на́с пред Бо́гом моли́твенниче.

Конда́к 9.

Вся́кия ско́рби и боле́зни со смире́нием претерпе́л еси́, преподо́бне Пи́мене, никогда́же прекосло́вя во́ле Госпо́дни, но благода́рственно поя́ Бо́гу: Аллилу́иа.

И́кос 9

Вети́и многоуче́ннии недоумева́ют, ка́ко ублажа́ти тя́, преподо́бне Пи́мене, не от челове́ческия му́дрости, но от прему́дрости Бо́жия ра́зум прие́мшаго; сего́ ра́ди мы́ возглаша́ем ти́ сицева́я:

Ра́дуйся, во Христе́ прему́дрость Бо́жию возлюби́вый; ра́дуйся, дела́ми за́поведи Бо́жий позна́вый.

Ра́дуйся, ле́ствицу доброде́телей зако́нно проше́дый; ра́дуйся, нищету́ ду́ха и смире́ние во главу́ у́гла поста́вивый.

Ра́дуйся, ско́рби и боле́зни с терпе́нием понесы́й; ра́дуйся, проще́ния проси́ти у ме́ньших себе́ навы́кнувый.

Ра́дуйся, Пи́мене, те́плый о на́с пред Бо́гом моли́твенниче.

Конда́к 10.

Спасти́ся в Бо́зе хотя́й, всего́ себе́ покори́л еси́ во́ле Бо́жией и да́же до сме́рти ничто́же о себе́ высо́кая помы́слил еси́, преподо́бне Пи́мене, но я́ко ра́б тружда́яся по вся́ дни́, сы́н Бо́жий по благода́ти во Ца́рствии Небе́снем яви́лся еси́, поя́ Бо́гу: Аллилу́иа.

И́кос 10.

Стена́ еси́ мона́хом, прибега́ющим с ве́рою к тебе́, преподо́бне Пи́мене, и́бо де́лом и сло́вом о и́ноческом житии́ ревнова́л еси́, те́мже и на́с, по́двиги твоя́ ублажа́ющих, от вся́ких напа́стей защити́, вопию́щих к тебе́ такова́я:

Ра́дуйся, мона́шеское зва́ние и благоче́стие возлюби́вый; ра́дуйся, е́же утверди́ти общежи́тие в монастыре́х моско́вских ревнова́вый.

Ра́дуйся, благогове́йный Та́ин Бо́жиих служи́телю; ра́дуйся, церко́внаго уста́ва стро́гий блюсти́телю.

Ра́дуйся, к клевета́вшим на тя́ благоду́шие стяжа́вый; ра́дуйся, на во́лю Бо́жию, но не челове́ческую полага́выйся.

Ра́дуйся, Пи́мене, те́плый о на́с пред Бо́гом моли́твенниче.

Конда́к 11.

Пе́ние святи́телю Никола́ю со усе́рдием приноси́л еси́, преподо́бне Пи́мене, оби́тель того́ обновля́я и лю́ди ко прославле́нию чуде́с того́ призыва́я и науча́я о все́х и за вся́ благодари́ти Бо́га: Аллилу́иа.

И́кос 11.

Светоза́рную лучу́ во мра́це разоре́ния Угре́шския оби́тели от безбо́жных зри́м тя́, преподо́бне Пи́мене, ты́ бо, не убоя́вся ску́дости веще́ственныя, до́брый и иску́сный строи́тель тоя́ бы́л еси́, о́браз упова́ния на Бо́га на́м явля́я, сего́ ра́ди восхваля́ем тя́ си́це:

Ра́дуйся, Угре́шския оби́тели возобнови́телю; ра́дуйся, и на́м в возрожде́нии тоя́ помога́яй.

Ра́дуйся, труда́ми, боле́зньми и моли́твою бра́тию во Угре́шскую оби́тель собра́вый; ра́дуйся, и ны́не о бра́тии оби́тели твоея́ усе́рдно моля́щийся.

Ра́дуйся, еще́ жи́в сы́й, все́ упова́ние твое́ на Бо́га возложи́вый; ра́дуйся, и в преставле́нии твое́м к Бо́гу на́с не оставля́ющий.

Ра́дуйся, Пи́мене, те́плый о на́с пред Бо́гом моли́твенниче.

Конда́к 12.

Благода́ть Ду́ха Свята́го стяжа́в, преподо́бне Пи́мене, ны́не все́м тре́бующим подае́ши ю́ незави́стно, со дерзнове́нием престо́лу Бо́жию предстоя́ и моля́ся о на́с, пою́щих Бо́гу: Аллилу́иа.

И́кос 12.

Пою́ще обре́тение честны́х моще́й твои́х, преподо́бне Пи́мене, и благода́тную по́мощь, тобо́ю на́м подава́емую, прославля́ем Бо́га, прославля́ющаго святы́я Своя́, и воспева́ем тебе́ си́це:

Ра́дуйся, от святи́теля Филаре́та благослове́ние Бо́жие на обновле́ние Угре́шския оби́тели получи́вый; ра́дуйся, я́ко са́м ны́не в со́нном виде́нии па́ки возобнови́ти оби́тель повеле́вый.

Ра́дуйся, я́ко у ме́ста погребе́ния твоего́ а́нгельское пе́ние слы́шано бы́сть; ра́дуйся, я́ко честны́я мо́щи твоя́ ны́не чудоде́йствуют.

Ра́дуйся, я́ко у Престо́ла Бо́жия об оби́тели твое́й хода́тайствуеши; ра́дуйся, я́ко и за все́х моля́щихся тебе́ те́пле предста́тельствуеши.

Ра́дуйся, Пи́мене, те́плый о на́с пред Бо́гом моли́твенниче.

Конда́к 13.

О па́стырю до́брый и ревни́телю мона́шескаго чи́на, о Угре́шстей оби́тели при́сный хода́таю на Небеси́, преподо́бне Пи́мене, ны́нешняя на́ша приими́ приноше́ния и моли́ Христа́ Бо́га изба́витися на́м ве́чнаго осужде́ния, да предстоя́ще одесну́ю Его́, с тобо́ю воспева́ем: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгельский о́браз от ю́ности возлюби́в, всего́ себе́ преда́л еси́ Го́споду и ми́ра злоко́зненнаго отре́клся еси́, и бы́л еси́ и́стинный мона́х. Сего́ ра́ди мы́ воспева́ем ти́ си́це:

Ра́дуйся, роди́тельми твои́ми во благоче́стии возраще́нный; ра́дуйся, Отца́ Небе́снаго сы́не, благода́тию озаре́нный.

Ра́дуйся, земно́е оте́чество твое́, гра́д Во́логду, свя́тостию просла́вивый; ра́дуйся, к Небе́сному Оте́честву от ю́ности устреми́выйся.

Ра́дуйся, Свяще́нное Писа́ние, еще́ о́трок сы́й, чита́ти возлюби́вый; ра́дуйся, Алфави́т Духо́вный изуча́я, за́поведи Бо́жий позна́вый.

Ра́дуйся, Пи́мене, те́плый о на́с пред Бо́гом моли́твенниче.

Конда́к 1.

Избра́нный от Воево́ды Си́л Небе́сных Го́спода Иису́са Христа́, оби́тели Угре́шския возобнови́телю, преподо́бне о́тче на́ш Пи́мене, я́ко име́яй ве́лие дерзнове́ние к Бо́гу, моли́ся вы́ну о спасе́нии ду́ш на́ших и избавле́нии на́с от вся́ких бе́д и напа́стей, да зове́м ти́:

Ра́дуйся, Пи́мене, те́плый о на́с пред Бо́гом моли́твенниче.

Моли́тва.

О свяще́нная главо́, преподо́бне о́тче, преблаже́нне а́вво Пи́мене! Не забу́ди убо́гих твои́х до конца́, но помина́й на́с всегда́ во святы́х твои́х и благоприя́тных моли́твах к Бо́гу. Помяни́ ста́до твое́, е́же са́м упа́сл еси́, и не забу́ди посеща́ти ча́д твои́х. Моли́ за ны́, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́; не премолчи́ за ны́ ко Го́споду и не пре́зри на́с, ве́рою и любо́вию чту́щих тя́. Помина́й на́с, недосто́йных, у престо́ла Вседержи́телева, и не преста́й моля́ся о на́с ко Христу́ Бо́гу; и́бо дана́ тебе́ бы́сть благода́ть за ны́ моли́тися. Не мни́м бо тя́ су́ща ме́ртва; а́ще бо те́лом и преста́вился еси́ от на́с, но и по сме́рти жи́в сы́й пребыва́еши. Не отступа́й от на́с ду́хом, сохраня́я на́с от стре́л вра́жиих и вся́кия пре́лести бесо́вския и ко́зней диа́вольских, па́стырю на́ш до́брый. А́ще бо и моще́й твои́х ра́ка пред очи́ма на́шима ви́дима е́сть всегда́, но свята́я твоя́ душа́ со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся. Ве́дуще у́бо тя́ вои́стину и по сме́рти жи́ва су́ща, к тебе́ припа́даем и тебе́ мо́лимся: моли́ся о на́с Всеси́льному Бо́гу о по́льзе ду́ш на́ших и испроси́ на́м вре́мя на покая́ние, да невозбра́нно пре́йдем от земли́ на не́бо, от мыта́рств же го́рьких, бесо́в, возду́шных князе́й и ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́, Ему́же подоба́ет вся́кая сла́ва, че́сть и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно и во ве́ки веко́в. Ами́нь.