Конда́к 1.

Избра́нный от Воево́ды и Го́спода во́инств небе́сных, преподо́бне о́тче на́ш Са́вво, си́лою креста́ Госпо́дня победи́вый напа́сти, я́же от диа́вола, ми́ра и пло́ти, я́ко име́я дерзнове́ние ко Го́споду, от вся́ких искуше́ний, бе́д и наве́тов вра́жиих моли́твами твои́ми сохраня́й на́с, похва́льная с любо́вию тебе́ воспева́ющих:

Ра́дуйся, о́тче на́ш Са́вво, чудотво́рче пресла́вный.

И́кос 1.

А́нгел во пло́ти яви́лся еси́ на земли́, преподо́бне Са́вво, от ю́ности бо возлюби́в Бо́га, равноа́нгельному поревнова́л еси́ житию́ учи́теля твоего́, преблаже́ннаго Се́ргия, и послужи́в Го́сподеви в пра́вде и преподо́бии во вся́ дни́ живота́ своего́, по исхо́де нетле́нием телесе́ сия́еши. Вси́ у́бо благогове́йно чту́ще тя́, воспева́ем си́це:

Ра́дуйся, и́стинный свята́го учи́теля твоего́ ревни́телю; ра́дуйся, земны́й А́нгеле и небе́сный челове́че.

Ра́дуйся, ве́рный слуго́ Госпо́день; ра́дуйся, усе́рдный чистоты́ и воздержа́ния храни́телю.

Ра́дуйся, зерца́ло ве́ры благочести́выя; ра́дуйся, о́бразе кро́тости духо́вныя.

Ра́дуйся, пустынножи́телей красото́; ра́дуйся, и́ноков наста́вниче.

Ра́дуйся, мно́гим ко спасе́нию путеводи́телю; ра́дуйся, ско́рый помо́щниче притека́ющим к тебе́ с ве́рою.

Ра́дуйся, о́тче на́ш Са́вво, чудотво́рче пресла́вный.

Конда́к 2.

Ви́дя, я́ко в ми́ре се́м вся́ческая суета́ и тле́ние, потща́лся еси́ те́сным и приско́рбным путе́м тече́ние жи́зни сея́ соверши́ти; всели́вся во оби́тели преподо́бнаго Се́ргия, и от него́ прия́в а́нгельский о́браз, поревнова́л еси́ богому́дрому его́ смире́нию и трудолю́бию, и ку́пно с ни́м де́нь и но́щь воспева́л еси́ Спаси́телю, все́х Бо́гу: Аллилу́иа.

И́кос 2.

Ра́зум и се́рдце покори́в Христу́ Спаси́телю, глаго́лющу: «И́же хо́щет по Мне́ ити́, да отве́ржется себе́, и во́змет кре́ст сво́й, и по Мне́ гряде́т»,– невозвра́тно отврати́л еси́ лице́ свое́ от ми́ра сего́, я́ко от Вавило́на грехо́внаго, и презре́в вся́ кра́сная и блага́я его́, водвори́лся еси́ в пусты́ни, ча́я Бо́га, спаса́ющаго вои́телей Свои́х. Ны́не же предстои́ши Престо́лу Бо́жию, наслажда́яся небе́сных бла́г, и ве́лие дерзнове́ние име́я ко Го́споду, не забу́ди на́с, к ра́це моще́й твои́х усе́рдно притека́ющих и восхваля́ющих тя́:

Ра́дуйся, жите́йских суе́т и мирски́х собла́знов избежа́вый; ра́дуйся, и́ноческое безстра́стие и безмо́лвие стяжа́вый.

Ра́дуйся, вся́ блага́я земли́, Небе́снаго ра́ди Ца́рствия, за уме́ты вмени́вый; ра́дуйся, равноа́нгельное житие́ до конца́ возлюби́вый.

Ра́дуйся, возненави́девый ми́ра сего́ грехо́вную сла́дость; ра́дуйся, восприе́мый обетова́ние непрестаю́щия жи́зни.

Ра́дуйся, облече́нный сла́вою Небе́снаго Ца́рствия; ра́дуйся, сокро́вище некра́домое и нетле́нное обреты́й.

Ра́дуйся, о Це́ркви Христо́вой, на земли́ во́инствующей, моли́твенниче небе́сный; ра́дуйся, о все́х ве́рных, на поклоне́ние к тебе́ притека́ющих, предста́телю.

Ра́дуйся, о́тче на́ш Са́вво, чудотво́рче пресла́вный.

Конда́к 3.

Си́лою, излия́нною на тя́ свы́ше, возше́д на высоту́ доброде́телей, посто́м и бде́нием, моли́твами и целому́дрием, я́ко многоце́нным венце́м благоустрое́ния и́ноческаго, повсю́ду просия́л еси́: сего́ ра́ди вси́ вели́ка и пресла́вна тя́ почита́ху. Ты́ же, бе́гая сла́вы от челове́к, пребыва́л еси́ я́ко еди́н от просты́х, тружда́яся па́че все́х и поя́ хвалу́ еди́ному, в Тро́ице сла́вимому, Бо́гу: Аллилу́иа.

И́кос 3.

Име́яй ду́шу, смиренному́дрия испо́лнену, а́ще и устраша́яся бре́мене нача́льства, оба́че не преслу́шав во́ли Бо́жия, прия́л еси́ поруче́нное тебе́ ста́до Христо́во и до́бре в пасе́нии его́ пребы́л еси́. Ны́не же, вы́ну предстоя́ Престо́лу Бо́жию, благоспоспе́шествуй моли́твами твои́ми все́м, взыва́ющим к тебе́:

Ра́дуйся, безпрекосло́вный во́ли учи́теля твоего́ исполни́телю; ра́дуйся, до́брый ста́да Христо́ва наста́вниче.

Ра́дуйся, возлю́бленный па́че мно́гих избра́нником Бо́жиим Се́ргием, от него́же не утаи́ся святы́ня твоя́; ра́дуйся, благово́нный кри́не вертогра́да церко́внаго.

Ра́дуйся, све́тлый сосу́де Боже́ственныя благода́ти; ра́дуйся, свети́льниче, не сокры́выйся под спу́дом, но на све́щнице поста́вленный.

Ра́дуйся, честно́е Свята́го Ду́ха селе́ние; ра́дуйся, преподо́бных све́тлое украше́ние.

Ра́дуйся, и́ноков в по́двизех по́стнических укрепля́яй; ра́дуйся, заблу́ждшим пу́ть спасе́ния показу́яй.

Ра́дуйся, о́тче на́ш Са́вво, чудотво́рче пресла́вный.

Конда́к 4.

Бу́рю страсте́й и искуше́ний вра́жиих, препобежда́я посто́м, бде́нием и моли́твами, утоли́л еси́ до конца́. Ны́не у́бо причаща́яся сла́вы небе́сныя со все́ми святы́ми, предстои́ши Царю́ сла́вы и пое́ши ку́пно с ни́ми: Аллилу́иа.

И́кос 4.

Слы́шаще бли́жнии и да́льнии богоуго́дное твое́ житие́, стека́хуся от окре́стных стра́н к тебе́, по́льзы ра́ди: ты́ же все́х любе́зно прие́мля, согрева́л еси́ сердца́ и́х Боже́ственною любо́вию. К тебе́ у́бо и мы́ припа́дающе, мо́лим: наста́ви ны́, я́ко оте́ц ча́да своя́, на стези́ спасе́ния и не забу́ди взыва́ющих к тебе́:

Ра́дуйся, все́м прибега́ющим к тебе́ наста́вниче предо́брый; ра́дуйся, и́щущим успокое́ния со́вести собесе́дниче прети́хий.

Ра́дуйся, уныва́ющих ду́ш уте́шителю пресла́дкий; ра́дуйся, ка́ющихся со умиле́нием хода́таю преусе́рдный.

Ра́дуйся, заблужда́ющих исправи́телю прекро́ткий; ра́дуйся, беззако́нных обличи́телю незло́бивый.

Ра́дуйся, к воздержа́нию и целому́дрию путеводи́телю неосла́бный; ра́дуйся, борю́щимся со страстьми́ помо́щниче неутоми́мый.

Ра́дуйся, пра́ваго пути́ ве́ры и благоче́стия указа́телю нело́жный; ра́дуйся, моля́щимся тебе́ от гне́ва Бо́жия защи́тниче неотсту́пный.

Ра́дуйся, о́тче на́ш Са́вво, чудотво́рче пресла́вный.

Конда́к 5.

Боготе́чная звезда́ яви́лся еси́, преподо́бне о́тче Са́вво, от мра́ка грехо́внаго хотя́щим прейти́ к Со́лнцу пра́вды, я́сно пу́ть показу́ющая. Те́мже мо́лим тя́: просвети́ и на́ша сердца́, страстьми́ жите́йскими омраче́нная, и спосо́бствуй на́м досто́йно воспева́ти Бо́гу: Аллилу́иа.

И́кос 5.

Ви́дя благове́рный кня́зь Гео́ргий смиренному́дрие твое́, я́ко уклони́лся еси́ от нача́льственныя вла́сти во оби́тели учи́теля твоего́, устремля́яся к пусты́нному безмо́лвию, то́й умоли́ тя́, да всели́шися на гора́х, глаго́лемых Сторо́жи. Ты́ же, изволя́я благо́му жела́нию, и оби́тель и́ноческую зде́ соста́вити хотя́, ре́кл еси́ со проро́ком: «Се́ поко́й мо́й, зде́ вселю́ся, я́ко изво́лих и́». И ско́ро на ме́сте се́м хра́м Пресвяты́я Богоро́дицы созда́ся, в не́мже ны́не нетле́нием моще́й твои́х благоуха́еши, и немо́лчно ко Го́споду вопие́ши о возглаша́ющих к тебе́ сицева́я:

Ра́дуйся, го́рлице пустыннолюби́вая и доброви́дная; ра́дуйся, пусты́ни до́брое прозябе́ние.

Ра́дуйся, цве́те присноцвету́щий; ра́дуйся, смиренному́дрием и вся́кими доброде́тельми страну́ сию́ облагоуха́вший.

Ра́дуйся, благополе́зно и му́дро проше́ние кня́зя соверши́вый; ра́дуйся, це́рковь прекра́сну зде́ во сла́ву Рождества́ Богоро́дицы сооруди́вый.

Ра́дуйся, пусты́ню во оби́тель и́ночества претвори́вый; ра́дуйся, ста́ду твоему́ ве́рный наста́вниче.

Ра́дуйся, все́м притека́ющим к тебе́ ми́р и благослове́ние от Го́спода моли́твами твои́ми низводя́яй; ра́дуйся, о все́х граде́х и ве́сех росси́йских моли́твенниче неусыпа́ющий.

Ра́дуйся, о́тче на́ш Са́вво, чудотво́рче пресла́вный.

Конда́к 6.

Про́поведи Ева́нгельския послу́шав: «Не пецы́теся душе́ю ва́шею, что́ я́сте, или́ что́ пие́те; ни те́лом ва́шим, во что́ облече́теся»,– упраздни́л еси́ се́рдце твое́ от жите́йских забо́т, пита́яся бы́лием пусты́нным и малоце́нныя ри́зы нося́. Сего́ ра́ди нетле́ния оде́ждою оде́ялся еси́ по преставле́нии твое́м, ю́же от Христа́ Бо́га получи́ти и на́м испроси́, вопию́щим Ему́: Аллилу́иа.

И́кос 6.

Возсия́л еси́, я́ко богосве́тлое свети́ло, во стране́ Росси́йстей, всеблаже́нне о́тче Са́вво, озаря́я на́с луча́ми доброде́телей и чуде́с твои́х, те́мже вопие́м ти́:

Ра́дуйся, дарова́ньми Свята́го Ду́ха сия́ющий чле́не Це́ркве Христо́вы; ра́дуйся, преизоби́луяй и́стинным к Бо́гу умиле́нием.

Ра́дуйся, подража́телю преподо́бных в соверше́нном терпе́нии; ра́дуйся, по́двигов и́ноческих ревни́телю.

Ра́дуйся, стра́сти грехо́вныя, си́лою благода́ти, в себе́ умертви́вый; ра́дуйся, нищеты́ и нестяжа́ния о́бразе.

Ра́дуйся, све́тлое святы́ни зерца́ло; ра́дуйся, все́х доброде́телей рачи́телю.

Ра́дуйся, немощны́х целе́бниче; ра́дуйся, же́зле, па́дающих подкрепля́ющий.

Ра́дуйся, о́тче на́ш Са́вво, чудотво́рче пресла́вный.

Конда́к 7.

Хотя́щу благове́рному кня́зю Гео́ргию во́инствовати на супоста́ты, благослове́ние препо́дал еси́, о́тче, на одоле́ние, глаго́ля проро́чески: «Изы́ди, благове́рный кня́же! Госпо́дь ти́ помо́жет, и враго́в твои́х одоле́еши, и благода́тию Бо́жиею здра́в возврати́шися в оте́чество твое́!»,– е́же и бы́сть, по глаго́лу твоему́. О́н у́бо, возврати́вся от бра́ни с побе́дою и сла́вою, и мно́гими дарми́ снабдева́я оби́тель твою́, воспева́ше благода́рственно ди́вному во святы́х Свои́х Бо́гу: Аллилу́иа.

И́кос 7.

Но́вый подража́тель дре́вних ратобо́рцев на стра́сти плотски́я яви́лся еси́, о́тче Са́вво: от ю́ности бо у́м тво́й впери́в к Бо́гу, я́ко сто́лп ве́ры непоколеби́мый, да́же до ста́рости масти́тыя пребы́л еси́ в распина́нии пло́ти своея́ со страстьми́ и похотьми́. Сего́ ра́ди не можа́ху си́лы бесо́вския запина́ти нога́ма твои́ма, ниже́ успева́ху устраша́ти тя́ издале́ча, от и́хже наве́тов и напа́стей соблюди́ неврежде́нных и на́с, торже́ственно воспева́ющих тебе́:

Ра́дуйся, ли́ку дре́вних по́стников сопричте́нный; ра́дуйся, всено́щными моли́твами и бде́нием всю́ пре́лесть бесо́вскую посрами́вый.

Ра́дуйся, чистоты́ и воздержа́ния храни́телю; ра́дуйся, страсте́й душе́вных и теле́сных победи́телю.

Ра́дуйся, во́ине Христо́в неустраши́мый; ра́дуйся, обдержи́мым бесо́вскою си́лою наде́жный врачу́.

Ра́дуйся, надме́нных мудрова́нием пло́ти к покоре́нию глаго́лом Бо́жиим приводя́й; ра́дуйся, все́м напа́ствуемым от ду́ха льсти́ духо́вное зре́ние и трезве́ние подава́яй.

Ра́дуйся, ду́ха вражды́ и любонача́лия от притека́ющих к тебе́ прогоня́яй; ра́дуйся, я́ко хода́тайством твои́м даро́в Свята́го Ду́ха, в во́инствовании Христо́вом укрепля́ющих, сподобля́емся.

Ра́дуйся, о́тче на́ш Са́вво, чудотво́рче пресла́вный.

Конда́к 8.

Стра́нное чу́до сотвори́л еси́, преди́вный о́тче Са́вво, егда́ нечести́вии хотя́ху расхи́тити достоя́ние це́ркве твоея́. Они́, я́ко та́тие, устремля́хуся око́нцем, е́же бе́ у гро́ба твоего́: зде́ же ве́лия гора́ показа́ся и́м, на ню́же взы́ти не́сть мо́щно. Со студо́м у́бо возвра́щшеся отсю́ду, последи́ же раска́явшеся, с во́плем и слеза́ми, гре́х сво́й испове́даша пред все́ми, и ско́ро пу́ть непра́вды оста́вльше, в покая́нии про́чее пожи́ша, с ве́рою вопию́ще Бо́гу: Аллилу́иа.

И́кос 8.

Ве́сь бы́л еси́ в Бо́зе, еще́ сы́й на земли́, в по́двизех и́ноческаго жития́: предстоя́щу бо ти́ пред лице́м Госпо́дним на Боже́ственной слу́жбе, зри́мо быва́ше воспламене́ние чу́дное в лице́ твое́м от моли́твеннаго в ду́се горе́ния к Бо́гу. Овогда́ же в толи́ком бе́ умиле́нии душа́ твоя́, я́ко источа́тися пото́ком сле́зным от оче́с твои́х неудержи́мо, и́хже ра́ди единонра́вна тя́ зря́ху бы́ти со проро́ком, глаго́лющим: «Бы́ша сле́зы моя́ мне́ хле́б де́нь и но́щь». Оба́че, ве́лие стяжа́в дерзнове́ние к Бо́гу, не забу́ди и на́с, со слеза́ми печа́ли о гресе́х свои́х к твоему́ заступле́нию притека́ющих и вопию́щих к тебе́:

Ра́дуйся, огне́м Боже́ственныя любве́ ве́тхаго челове́ка в себе́ попали́вый; ра́дуйся, во пло́ти, а́ки безпло́тен, на земли́ пожи́вый.

Ра́дуйся, живы́ми и спаси́тельными слеза́ми о́гнь по́хоти угаси́вый; ра́дуйся, го́рния ра́дости и блаже́нства а́нгельскаго соприча́стниче.

Ра́дуйся, за премно́гую любо́вь твою́ к Бо́гу Отцу́ сла́вою и че́стию препросла́вленный; ра́дуйся, за глубо́кое смире́ние твое́ от Христа́, Сы́на Бо́жия, венце́м нетле́ния увенча́нный.

Ра́дуйся, за чистоту́ и безстра́стие а́нгельское от Пресвята́го Ду́ха осия́нный; ра́дуйся, пречестна́я оби́теле Святы́я Тро́ицы.

Ра́дуйся, Бо́жия Ма́тере служи́телю ве́рный и неусыпа́яй; ра́дуйся, в хра́ме Ея́ горе́ возноси́выйся ду́хом, и ны́не те́лом па́ки пребыва́яй.

Ра́дуйся, о́тче на́ш Са́вво, чудотво́рче пресла́вный.

Конда́к 9.

Вся́кия беды́ и ско́рби изба́ви на́с, преподо́бне о́тче Са́вво, твои́ми те́плыми к Бо́гу моли́твами, и испроси́ на́м вся́, ко вре́менной и ве́чной жи́зни потре́бная, да сподо́бимся го́рняго Иерусали́ма дости́гнути и ку́пно с тобо́ю воспева́ти Бо́гу: Аллилу́иа.

И́кос 9.

Вети́я многовеща́ннии недоуме́ют досто́йно восхвали́ти тя́, богому́дре Са́вво: кто́ бо дово́лен разуме́ти вся́ боре́ния твоя́ с миродержи́тели тьмы́ ве́ка сего́? Или́ кто́ изочте́т труды́, боле́зни и по́двиги твоя́, в ни́хже пустыннолю́бное житие́ соверша́л еси́? Оба́че мы́, любо́вию твое́ю побежда́еми, благода́рне тебе́ зове́м:

Ра́дуйся, зако́на Бо́жия исполни́телю всеусе́рдный; ра́дуйся, чистото́ю и целому́дрием многоце́ннаго би́сера честне́йший.

Ра́дуйся, в терпе́нии и боре́нии проти́ву пло́ти адама́нта тверде́йший; ра́дуйся, смиренному́дрием и кро́тостию па́че сла́вных земли́ просла́вленный.

Ра́дуйся, борю́щимся со страстьми́ и похотьми́ помо́щниче непобеди́мый; ра́дуйся, в труде́х, бде́нии и воздержа́нии вели́ким по́стником подража́телю ре́вностнейший.

Ра́дуйся, в духо́вной му́дрости наста́вниче благоиску́снейший; ра́дуйся, по́двигов и́ноческих показа́телю рачи́тельнейший.

Ра́дуйся, дру́гу Бо́жию, преподо́бному Се́ргию, единонра́вный; ра́дуйся, к ли́ку друго́в Бо́жиих на Небеса́ пресели́выйся.

Ра́дуйся, о́тче на́ш Са́вво, чудотво́рче пресла́вный.

Конда́к 10.

Спасти́ся хотя́ще ве́рнии от разли́чных напа́стей и бе́д ми́ра сего́, тебе́ те́плаго предста́теля и моли́твенника к Бо́гу предлага́ем: не тще́тну сотвори́ на́шу наде́жду на моли́твы твоя́, но хода́тайством твои́м изба́ви на́с от лю́тых бе́д, напа́стей, искуше́ний и скорбе́й, да несмуще́нно, от избы́тка се́рдца, глаго́лем всегда́ Бо́гу: Аллилу́иа.

И́кос 10.

Сте́ну тя́ тве́рду и моли́твенника изря́дна стяжа́в, свята́я оби́тель твоя́ и вси́ страны́ Росси́йския заступле́нием твои́м хва́лятся. Те́мже и мы́ гре́шнии, ко гро́бу твоему́ прите́кше, я́ко ча́да отца́, мо́лим: заступи́ и сохрани́ на́с от искуше́ний и скорбе́й, бе́д и напа́стей, моли́твами твои́ми, да взыва́ем ти́ ра́достно:

Ра́дуйся, благово́нный кри́не ра́йскаго вертогра́да; ра́дуйся, кипари́се, ве́рных сердца́ благово́нием услажда́ющий.

Ра́дуйся, дре́во благосенноли́ственное, и́мже оби́тель твоя́ покрыва́ется; ра́дуйся, неусы́пный моли́твенниче, жела́ния ве́рных во благи́х исполня́яй.

Ра́дуйся, наде́ждо и оти́шие в мо́ри жития́ сего́ пла́вающих; ра́дуйся, тве́рдое огражде́ние и прибе́жище усе́рдно Бо́гу рабо́тающих.

Ра́дуйся, неисчерпа́емый исто́чниче исцеле́ний; ра́дуйся, струе́, напая́ющая и веселя́щая жа́ждущих пра́вды.

Ра́дуйся, я́ко в ско́рбех жите́йских и обстоя́ниих сподобля́емся твоего́ заступле́ния; ра́дуйся, все́х усе́рдно притека́ющих к тебе́ от искуше́ний и бе́д ско́рое избавле́ние.

Ра́дуйся, о́тче на́ш Са́вво, чудотво́рче пресла́вный.

Конда́к 11.

Пе́ние всеумиле́нное прино́сим ти́, преблаже́нне о́тче Са́вво, и со дерзнове́нием мо́лим: вознеси́ ко Го́споду о спасе́нии ду́ш на́ших твою́ святу́ю моли́тву, да сподо́бимся ве́чно в ра́дости блаже́нней воспева́ти Бо́гу: Аллилу́иа.

И́кос 11.

Светопода́тельными луча́ми блиста́ет житие́ твое́, о́тче на́ш Са́вво: вся́кия бо доброде́тели Ева́нгельския явля́ется в тебе́ исполне́ние, те́мже и глаго́лем:

Ра́дуйся, сугу́быя ра́ди нищеты́ бога́тство небе́сное обреты́й; ра́дуйся, пла́чем и умиле́ния слеза́ми утеше́ние ве́чное прия́вый.

Ра́дуйся, алка́вый и жажда́вый пра́вды, ны́не же насыща́яйся ра́йским блаже́нством; ра́дуйся, ми́лостивым обеща́нное воздая́ние улучи́вый.

Ра́дуйся, чистото́ю се́рдца твоего́ лицезре́ния Бо́жия дости́гнувый; ра́дуйся, миротворе́ниями мно́гими в ли́це сыно́в Бо́жиих бы́ти сподо́бивыйся.

Ра́дуйся, терпе́нием пра́вды ра́ди в Ца́рство Небе́сное водвори́выйся; ра́дуйся, о́бразом кро́тости, ти́хости и незло́бия поуче́ние су́щим в озлобле́нии подава́яй.

Ра́дуйся, приме́ром братолю́бия, ко иска́нию не свои́х си́, но я́же бли́жняго, и на́ша сердца́ утвержда́яй; ра́дуйся, все́х со стра́хом рабо́тающих Го́сподеви ра́досте.

Ра́дуйся, о́тче на́ш Са́вво, чудотво́рче пресла́вный.

Конда́к 12.

Благода́ть, да́нная ти́ от Бо́га, цели́ти неду́ги душе́вныя и теле́сныя, созыва́ет ве́рных ко всечестны́м моще́м твои́м: при ни́хже, и ма́лое моле́ние принося́щим, ве́лия благода́ть от Бо́га подае́тся, ю́же прие́млюще, дру́г со дру́гом ра́достно Бо́гу возглаша́ем: Аллилу́иа.

И́кос 12.

Пою́ще ве́лия твоя́, досточу́дне о́тче, по́двиги и труды́, ублажа́ем приснопа́мятное успе́ние твое́: а́ще бо и преста́вился еси́ от на́с, но жи́в сы́й и по сме́рти, не отступа́еши от на́с ду́хом, оба́че и моще́й твои́х ра́ка пред очи́ма на́шима ви́дима е́сть всегда́. К тебе́ у́бо припа́даем, тебе́ мо́лимся и восхваля́ем тя́ си́це:

Ра́дуйся, в ве́ре и любви́ боже́ственной благогове́йно от ю́ности и благоче́стно до масти́тыя ста́рости пожи́вый; ра́дуйся, многотру́дныя и разнообра́зныя во и́ночестве по́двиги до́бре соверши́вый.

Ра́дуйся, я́ко соверше́ннаго освяще́ния от Ду́ха Свята́го испо́лнен еси́; ра́дуйся, чу́дному учи́телю твоему́ уподо́бивыйся всеце́лою чистото́ю и свя́тостию.

Ра́дуйся, я́ко с богому́дрым Се́ргием на Небесе́х при́сно лику́еши; ра́дуйся, я́ко с ни́м ку́пно Бо́га о на́с гре́шных умоля́еши.

Ра́дуйся, я́ко нетле́нием моще́й твои́х, а́ки трубо́ю, пропове́дуется бу́дущее все́х воскресе́ние; ра́дуйся, стране́ се́й и всему́ оте́честву на́шему многоце́нное украше́ние.

Ра́дуйся, я́ко тобо́ю мона́хов мно́жества в по́двизех свои́х укрепле́ние прие́млют; ра́дуйся, я́ко хода́тайством твои́м ве́рнии и в молва́х жите́йских спаса́ются.

Ра́дуйся, о́тче на́ш Са́вво, чудотво́рче пресла́вный.

Конда́к 13.

О пресла́вный чудотво́рче и ско́рый засту́пниче на́ш, блаже́нне о́тче Са́вво! Ма́лое сие́ от на́с приноше́ние ны́не прии́м, испроси́ на́м у Христа́ Бо́га утвержде́ние в ве́ре и братолю́бии, е́же бы́ти неврежде́нным от вся́ких искуше́ний, бе́д и напа́стей, и во гряду́щем ве́це му́к ве́чных изба́витися все́м, вопию́щим Ему́: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгел во пло́ти яви́лся еси́ на земли́, преподо́бне Са́вво, от ю́ности бо возлюби́в Бо́га, равноа́нгельному поревнова́л еси́ житию́ учи́теля твоего́, преблаже́ннаго Се́ргия, и послужи́в Го́сподеви в пра́вде и преподо́бии во вся́ дни́ живота́ своего́, по исхо́де нетле́нием телесе́ сия́еши. Вси́ у́бо благогове́йно чту́ще тя́, воспева́ем си́це:

Ра́дуйся, и́стинный свята́го учи́теля твоего́ ревни́телю; ра́дуйся, земны́й А́нгеле и небе́сный челове́че.

Ра́дуйся, ве́рный слуго́ Госпо́день; ра́дуйся, усе́рдный чистоты́ и воздержа́ния храни́телю.

Ра́дуйся, зерца́ло ве́ры благочести́выя; ра́дуйся, о́бразе кро́тости духо́вныя.

Ра́дуйся, пустынножи́телей красото́; ра́дуйся, и́ноков наста́вниче.

Ра́дуйся, мно́гим ко спасе́нию путеводи́телю; ра́дуйся, ско́рый помо́щниче притека́ющим к тебе́ с ве́рою.

Ра́дуйся, о́тче на́ш Са́вво, чудотво́рче пресла́вный.

Конда́к 1.

Избра́нный от Воево́ды и Го́спода во́инств небе́сных, преподо́бне о́тче на́ш Са́вво, си́лою креста́ Госпо́дня победи́вый напа́сти, я́же от диа́вола, ми́ра и пло́ти, я́ко име́я дерзнове́ние ко Го́споду, от вся́ких искуше́ний, бе́д и наве́тов вра́жиих моли́твами твои́ми сохраня́й на́с, похва́льная с любо́вию тебе́ воспева́ющих:

Ра́дуйся, о́тче на́ш Са́вво, чудотво́рче пресла́вный.

Моли́тва.

О пречестна́я и свяще́нная главо́! Небе́снаго Иерусали́ма граждани́не, Пресвяты́я Тро́ицы обита́лище, преподо́бне о́тче Са́вво! Ве́лие име́я дерзнове́ние ко Всеми́лостивому Влады́це, моли́ся о ста́де огра́ды твоея́ и о все́х по ду́ху ча́дех твои́х. Не премолчи́ за ны́ ко Го́споду и не пре́зри ве́рою и любо́вию чту́щих тя́. Испроси́ предста́тельством твои́м у Царя́ ца́рствующих ми́р Це́ркви, под зна́менем креста́ во́инствующей, Архиере́ом святи́тельства благоле́пие, мона́шествующим до́брое в по́двизех тече́ние; святе́й оби́тели се́й, гра́ду сему́ и все́м градо́м и страна́м охране́ние; ми́ру безмяте́жие и ми́р, гла́да и па́губы избавле́ние; ста́рым и немощны́м утеше́ние и подкрепле́ние, ю́ным и младе́нцем благо́е в ве́ре возраста́ние, в Ева́нгельском уче́нии тве́рдое обуче́ние, и в чистоте́ и целому́дрии пребыва́ние; вдови́цам и сирота́м ми́лость и заступле́ние, плене́нным отра́ду и возвраще́ние, боля́щим исцеле́ние, малоду́шным упокое́ние, заблу́ждшим исправле́ние, согреша́ющим ду́х сокруше́ния, бе́дствующим и все́м, благода́тней по́мощи тре́бующим благовре́менну по́мощь. Не посрами́ на́с, к тебе́ с ве́рою притека́ющих, споспешеству́й, я́ко чадолюби́вый оте́ц ча́дом, и на́м понести́ и́го Христо́во во благоду́шии и терпе́нии, и все́х упра́ви в ми́ре и покая́нии сконча́ти живо́т сво́й непосты́дно и пресели́тися со упова́нием во оби́тели небе́сныя. Иде́же ты́, по труде́х и по́двизех, ны́не водворя́ешися со А́нгелы и Святы́ми, зря́ и прославля́я Бо́га, в Тро́ице сла́вимаго, Отца́ и Сы́на и Свята́го Ду́ха. Ами́нь.