Конда́к 1.

Избра́нный и ди́вный о́тче Са́вво, просвеще́нный от трисия́ннаго све́та, ты́ на́с омраче́нных грехо́вными страстьми́ просвети́ и твои́ми моли́твами от все́х бе́д изба́ви, да зове́м тебе́:

Ра́дуйся, Са́вво, новгоро́дский чудотво́рче.

И́кос 1.

А́нгельския чи́ни возра́довашася твои́м подвиго́м, и́миже в пусты́ни упражня́лся еси́ в посте́ и моли́твах; и ны́не мы́, почита́я тя́ собесе́дника а́нгелов, сицева́я вопие́м тебе́:

Ра́дуйся, небе́сный жи́телю; Ра́дуйся, страсте́й разруши́телю.

Ра́дуйся, воздержа́ние яви́вый; ра́дуйся, ви́шерскую пусты́ню просвети́вый.

Ра́дуйся, на спасе́ние учи́телю; Ра́дуйся, безмо́лвия рачи́телю.

Ра́дуйся, ско́рый помо́щниче; ра́дуйся, на пу́ть пра́вый наставля́яй.

Ра́дуйся, Ца́рствие Небе́сное возвеща́яй; ра́дуйся, уныва́ющих утеше́ние.

Ра́дуйся, гре́шных исправле́ние.

Ра́дуйся, Са́вво, новгоро́дский чудотво́рче.

Конда́к 2.

Ви́дящи наро́д стра́нный и чу́дный жития́ твоего́ о́браз, преподо́бне о́тче Са́вво, вельми́ удиви́ся; те́мже и мы́, размышля́я твоя́ по́двиги, пое́м Бо́гу: Аллилу́иа.

И́кос 2.

Ра́зуму пода́тися на́м Боже́ственному помоли́ся, преподо́бне Са́вво; ты́ бо, Боже́ственным сия́ющи све́том, со а́нгелы водворя́ешися, приими́ ра́достно похвалы́ тебе́ принося́щих:

Ра́дуйся, доброде́тельми просия́вый; ра́дуйся, благода́ть стяжа́вый.

Ра́дуйся, чистоты́ храни́телю; ра́дуйся, безмо́лвия люби́телю.

Ра́дуйся, Бо́жиих дарова́ний исполне́ние; ра́дуйся, в челове́цех чу́дное удивле́ние.

Ра́дуйся, Тро́ичнаго све́та зри́телю; ра́дуйся, бесо́в устраши́телю.

Ра́дуйся, к подвиго́м пропове́дниче; ра́дуйся, небе́сный испове́дниче.

Ра́дуйся, я́ко печа́ли отгоня́еши; ра́дуйся, я́ко по́мощь подава́еши.

Ра́дуйся, Са́вво, новгоро́дский чудотво́рче.

Конда́к 3.

Си́ла Вы́шняго осени́ тя́, преподо́бне Са́вво, и показа́ селе́ние и жили́ще Свята́го Ду́ха, Его́же и мы́ почита́юще, пое́м Бо́гу: Аллилу́иа.

И́кос 3.

Иму́ще тя́ вели́ка, о́тче, засту́пника и ско́раго в напа́стех помо́щника, твою́ святу́ю па́мять торжеству́юще, сия́ тебе́ вопие́м:

Ра́дуйся, скорбя́щих утеше́ние; ра́дуйся, Свята́го Ду́ха селе́ние.

Ра́дуйся, Святы́я Тро́ицы служи́телю; ра́дуйся, уныва́ющих посети́телю.

Ра́дуйся, бесо́вския си́лы прогна́ние; ра́дуйся, боля́щих здра́вие и врачева́ние.

Ра́дуйся, сто́лпе ве́ры утвержде́нный; ра́дуйся, учи́телю соверше́нный.

Ра́дуйся, к спасе́нию предводи́телю; ра́дуйся, бе́дствующих защи́тителю.

Ра́дуйся, доброде́тель укрепи́вый; ра́дуйся, бога́тство ни во что́же вмени́вый.

Ра́дуйся, Са́вво, новгоро́дский чудотво́рче.

Конда́к 4.

Бу́рю страсте́й многомяте́жнаго ми́ра возненави́девый, о́тче преподо́бный Са́вво, устрани́лся еси́ суе́т, ны́не же Бо́гу предстои́ши с небе́сными си́лами и пое́ши ку́пно с ни́ми: Аллилу́иа.

И́кос 4.

Светоза́рную лучу́ иму́ще тя́ ве́рнии, богоно́сный о́тче Са́вво, просвети́ и вразуми́ на́ша сердца́, мы́ же вопие́м тебе́ си́це:

Ра́дуйся, Новугра́ду украше́ние; ра́дуйся, Ви́шерския пусты́ни удобре́ние.

Ра́дуйся, христиа́нская красото́; ра́дуйся, росси́йская добро́то.

Ра́дуйся, благода́тию озаря́ющий; ра́дуйся, чудеса́ми просвеща́ющий.

Ра́дуйся, исцеле́ния исто́чниче; ра́дуйся, бе́дствующих помо́щниче.

Ра́дуйся, в боле́знех врачу́ и цели́телю; ра́дуйся, ско́рый послу́шателю.

Ра́дуйся, уче́нием ми́р просвети́вый; ра́дуйся, сла́ву Бо́жию умножа́яй.

Ра́дуйся, Са́вво, новгоро́дский чудотво́рче.

Конда́к 5.

Боготе́чную зарю́ уви́девше тя́, о́тче, в пусты́ни, лю́дие я́ко учи́теля светоно́сна придержа́ша о тебе́ и о се́м воспе́ша Бо́гу: Аллилу́иа.

И́кос 5.

Ви́дя твое́ житие́, наро́д вели́каго Нова́града, Са́вво преподо́бне, нача́ благогове́йно тебе́ почита́ти, и мы́ тебе́ вопие́м:

Ра́дуйся, в се́вере сия́ющий; ра́дуйся, чудеса́ми просвеща́ющий.

Ра́дуйся, наста́вниче вели́кий спасе́ния; ра́дуйся, послу́шателю ева́нгельскаго уче́ния.

Ра́дуйся, и́го Христо́во восприя́вый; ра́дуйся, доброде́тельми возсия́вый.

Ра́дуйся, неусы́пный предста́телю; ра́дуйся, о все́х ве́рных хода́таю.

Ра́дуйся, веща́телю сладкослове́сный; ра́дуйся, изъявля́яй та́инства небе́сная.

Ра́дуйся, христиа́нское похвале́ние; ра́дуйся, проти́вных побежде́ние.

Ра́дуйся, Са́вво, новгоро́дский чудотво́рче.

Конда́к 6.

Про́поведи ева́нгельския Творца́, я́же не пещи́ся о те́х я́же в ми́ре су́ть, послу́шавый, преподо́бный о́тче Са́вво, и на́м от Христа́ получи́ти безстра́стие умоли́, вопию́щим Бо́гу: Аллилу́иа.

И́кос 6.

Возсия́л еси́ от тферски́я страны́, преподо́бный о́тче Са́вво, и освяти́л еси́ новогра́дския пусты́ни, изба́ви на́с от вра́жиих наве́тов, вопию́щих си́це:

Ра́дуйся, кре́ст тво́й носи́вый; ра́дуйся, ду́хи лука́вствия покори́вый.

Ра́дуйся, сла́вы ве́чныя хода́таю; ра́дуйся, спаси́тельных бла́г пода́телю.

Ра́дуйся, почита́емый на земли́; ра́дуйся, увенча́нный на небеси́.

Ра́дуйся, страсте́й избавля́яй; ра́дуйся, у́з грехо́вных свобожда́яй.

Ра́дуйся, я́ко мзда́ твоя́ ве́чная; ра́дуйся, я́ко ра́дость твоя́ безконе́чная.

Ра́дуйся, вы́шняго Сио́на дости́гший; ра́дуйся, вене́ц небе́сный получи́вший.

Ра́дуйся, Са́вво, новгоро́дский чудотво́рче.

Конда́к 7.

Изше́дшу архиепи́скопу Иоа́нну в пусты́ню, е́же ви́дети тебе́, преподо́бне Са́вво, позна́в тя́, о́тче, при́сно Бо́гу рабо́тающа, возгласи́: Аллилу́иа.

И́кос 7.

Но́вый вои́стинну подви́жник на стра́сти яви́лся еси́, преподо́бный о́тче Са́вво; кто́ изочте́т твоя́ по́стническия по́двиги; мы́ же, почита́юще тебе́, вопие́м:

Ра́дуйся, посто́м стра́сти покори́вый; ра́дуйся, тмы́ кня́зя победи́вый.

Ра́дуйся, вся́кое жела́ние увяди́л еси́; ра́дуйся, я́ко безстра́стен яви́лся еси́.

Ра́дуйся, по́двигов соверше́ние; ра́дуйся, пусты́ни украше́ние.

Ра́дуйся, по́стников сла́во; ра́дуйся, воздержа́ния зерца́ло.

Ра́дуйся, вся́кую доброде́тель изобрази́вый; ра́дуйся, и́го Христо́во возлюби́вый.

Ра́дуйся, и́стинную ве́ру утвержда́яй; ра́дуйся, в невече́рнем дни́ пребыва́яй.

Ра́дуйся, Са́вво, новгоро́дский чудотво́рче.

Конда́к 8.

Стра́нное твое́ житие́ бы́сть, преподо́бный о́тче Са́вво, ты́, на не́бо показу́я пу́ть, на высоту́ столпа́ возше́л еси́ и учи́л му́дрствовати го́рняя, а не до́льная, ны́не же в вы́шнем селе́нии пое́ши Бо́гу: Аллилу́иа.

И́кос 8.

Ве́сь бы́л еси́ в вы́шних и горе́ о́ком твоея́ души́ взира́л еси́ непреста́нно, и ны́не заступа́еши все́х вопию́щих сицева́я:

Ра́дуйся, вели́кий пустынножи́телю; ра́дуйся, проро́ком ревни́телю.

Ра́дуйся, стопа́м Христо́вым подража́вый; ра́дуйся, в пусты́ни просия́вый.

Ра́дуйся, соверше́нства учи́телю; ра́дуйся, враго́в прогони́телю.

Ра́дуйся, Христу́ угоди́вый; ра́дуйся, равноа́нгельно пожи́вый.

Ра́дуйся, я́ко благода́ти все́м про́сиши; ра́дуйся, я́ко моли́твы о все́х прино́сиши.

Ра́дуйся, я́ко вся́кую доброде́тель изобрази́л еси́; ра́дуйся, я́ко равноа́нгельскую че́сть получи́л еси́.

Ра́дуйся, Са́вво, новгоро́дский чудотво́рче.

Конда́к 9.

Вся́кое естество́ удиви́ся тебе́, преподо́бный о́тче Са́вво; ми́ра бо кра́сная от се́рдца возненави́девый и еди́наго Бо́га возлюби́вый, яви́лся еси́ я́ко а́нгел, поя́ Бо́гу: Аллилу́иа.

И́кос 9.

Вети́йстии язы́цы восхвали́ти тя́ по достоя́нию не мо́гут, о́тче богому́дре Са́вво, ты́ бо от ю́ности Бо́гу прибли́жился еси́, мы́ же сицева́я вопие́м тебе́:

Ра́дуйся, благоче́стия утвержде́ние; ра́дуйся, кре́пкое заступле́ние.

Ра́дуйся, неду́гов тму́ отгоня́яй; ра́дуйся, на пу́ть пра́вый наставля́яй.

Ра́дуйся, я́ко к Бо́жию хоте́нию управля́еши; ра́дуйся, благодея́ния все́м подава́еши.

Ра́дуйся, моле́ния Вы́шнему принося́й; ра́дуйся, о все́х стра́ждущих прося́й.

Ра́дуйся, па́дших греха́ми возста́ние; ра́дуйся, отча́янных воззва́ние.

Ра́дуйся, пустынножи́телей удобре́ние; ра́дуйся, мона́шествующих укрепле́ние.

Ра́дуйся, Са́вво, новгоро́дский чудотво́рче.

Конда́к 10.

Спасти́ся хотя́ще, ве́рнии от напа́стей разли́чных, о́тче преподо́бный Са́вво, тя́ предста́теля поставля́ют, ты́ бо ко спасе́нию наставля́еши вопию́щих Бо́гу: Аллилу́иа.

И́кос 10.

Сте́ну тя́, засту́пника и моли́твенника те́пла обре́тше, преподо́бне о́тче Са́вво, тебе́ же при́сному су́щу моли́твеннику сицева́я прино́сим пе́ния:

Ра́дуйся, в беда́х су́щим посети́телю; ра́дуйся, Бо́жиих повеле́ний исполни́телю.

Ра́дуйся, я́ко моли́твою враго́в изнури́л еси́; ра́дуйся, я́ко пути́ Госпо́дни сохрани́л еси́.

Ра́дуйся, стра́сти умертви́вый; ра́дуйся, равноа́нгельскую чистоту́ сохрани́вый.

Ра́дуйся, от ю́ности ми́ра отреки́йся; ра́дуйся, безпло́тным подо́бен яви́выйся.

Ра́дуйся, я́ко кре́ст на ра́ме поне́сл еси́; ра́дуйся, я́ко небе́сную ра́дость прия́л еси́.

Ра́дуйся, росси́йский свети́льниче; ра́дуйся, кре́пкий на́ш защи́тниче.

Ра́дуйся, Са́вво, новгоро́дский чудотво́рче.

Конда́к 11.

Пе́ние по достоя́нию возда́ти тебе́ не́сть возмо́жно, преподо́бный о́тче Са́вво, ты́ бо Боже́ственную благода́ть на́м хода́тайствуеши и Бо́гу со а́нгелы пое́ши: Аллилу́иа.

И́кос 11.

Светоприе́мный свети́льниче и вели́кий уго́дниче Са́вво, ты́, мно́гими доброде́тельми сия́ющь, вше́л еси́ в небе́сная свята́я и предста́л еси́ ко Го́споду, иде́же и на́с помина́й, вопию́щих тебе́ си́це:

Ра́дуйся, я́ко Боже́ственный зако́н соблю́л еси́; ра́дуйся, я́ко Бо́гу посвяти́лся еси́.

Ра́дуйся, прия́тый в го́рняя селе́ния; ра́дуйся, наслажда́ющийся небе́снаго весе́лия.

Ра́дуйся, Христиа́ны утвержда́ющий; ра́дуйся, от враго́в освобожда́ющий.

Ра́дуйся, я́ко безпло́тен пожи́вый; ра́дуйся, я́ко безпло́тным причте́н еси́.

Ра́дуйся, благода́ти на́м хода́таю; ра́дуйся, благодея́ний пода́телю.

Ра́дуйся, я́ко враги́ на́ша посрамля́еши; ра́дуйся, я́ко наве́ты и́х разруша́еши.

Ра́дуйся, Са́вво, новгоро́дский чудотво́рче.

Конда́к 12.

Благода́ть, да́нную тебе́, преподо́бне о́тче Са́вво, и по́двиги твоя́ изрещи́ не мо́жем, в пусты́ни бо нестяжа́тельно пожи́в, сего́ ра́ди на небесе́х ра́дуешися и пое́ши пе́снь: Аллилу́иа.

И́кос 12.

Пое́м до́блественныя по́двиги твоя́, ублажа́ем достохва́льную кончи́ну твою́, почита́ем свяще́нную па́мять твою́, преподо́бне о́тче Са́вво, и похва́льная си́це вопие́м:

Ра́дуйся, в черто́г небе́сный введе́нный; ра́дуйся, в число́ святы́х учине́нный.

Ра́дуйся, правосла́вным побо́рниче; ра́дуйся, Христиа́ном помо́щниче.

Ра́дуйся, вражды́ разруши́телю; ра́дуйся, враго́в истреби́телю.

Ра́дуйся, ве́рным ми́р и утвержде́ние; ра́дуйся, ско́рое от враго́в освобожде́ние.

Ра́дуйся, зло́бы земны́я губи́телю; ра́дуйся, отча́янных посети́телю.

Ра́дуйся, в сожи́тельство чино́в небе́сных учине́нный; ра́дуйся, от святы́х лико́в в черто́г введе́нный.

Ра́дуйся, Са́вво, новгоро́дский чудотво́рче.

Конда́к 13.

О всехва́льный и преди́вный уго́дниче Христо́в, Са́вво преподо́бный, мо́лимся и вопие́м тебе́ всеусе́рдно: приими́ ма́лое сие́ от на́с моле́ние, умоли́ ми́лостиваго Бо́га, да изба́вит на́с от вся́ких бе́д и бу́дущих и́змет му́к, вопию́щих: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгельския чи́ни возра́довашася твои́м подвиго́м, и́миже в пусты́ни упражня́лся еси́ в посте́ и моли́твах; и ны́не мы́, почита́я тя́ собесе́дника а́нгелов, сицева́я вопие́м тебе́:

Ра́дуйся, небе́сный жи́телю; Ра́дуйся, страсте́й разруши́телю.

Ра́дуйся, воздержа́ние яви́вый; ра́дуйся, ви́шерскую пусты́ню просвети́вый.

Ра́дуйся, на спасе́ние учи́телю; Ра́дуйся, безмо́лвия рачи́телю.

Ра́дуйся, ско́рый помо́щниче; ра́дуйся, на пу́ть пра́вый наставля́яй.

Ра́дуйся, Ца́рствие Небе́сное возвеща́яй; ра́дуйся, уныва́ющих утеше́ние.

Ра́дуйся, гре́шных исправле́ние.

Ра́дуйся, Са́вво, новгоро́дский чудотво́рче.

Конда́к 1.

Избра́нный и ди́вный о́тче Са́вво, просвеще́нный от трисия́ннаго све́та, ты́ на́с омраче́нных грехо́вными страстьми́ просвети́ и твои́ми моли́твами от все́х бе́д изба́ви, да зове́м тебе́:

Ра́дуйся, Са́вво, новгоро́дский чудотво́рче.

Моли́тва пе́рвая.

О вели́кий уго́дниче, пресла́вный чудотво́рче и оби́тели сея́ богодухнове́нный наста́вниче, Са́вво всеблаже́нне, душе́ю на небеси́ Престо́лу все́х Царя́ предстоя́й, те́лом же во святе́й оби́тели се́й почива́яй, и разли́чная чудеса́ повсю́ду моли́твами твои́ми соверша́яй, при́зри ми́лостивно на лю́ди предстоя́щия и твоего́ ко Го́споду Бо́гу хода́тайства во обдержа́щих ну́ждах прося́щия: вси́ бо мы́, по мно́жеству грехо́в на́ших, не то́чию сме́ем принести́ когда́ моле́бный гла́с, но ниже́ возвести́ оче́с свои́х на не́бо; ты́ же, я́ко стяжа́вый дерзнове́ние, принеси́ за все́х, к честне́й ра́це твое́й притека́ющих, те́плыя моли́твы к Го́споду, е́же изба́витися на́м от гла́да, пото́па, тру́са, огня́, меча́ и бра́ни, от люде́й и от диа́вола быва́ющия, и от вся́кия душе́вныя и теле́сныя боле́зни; да изба́вившеся си́х и рабо́тающе Го́споду, Ему́ же предстои́ши, вни́дем в неконча́емый поко́й и просла́вим та́мо с тобо́ю все́х благи́х пода́теля Бо́га, всегда́, ны́не и при́сно, и во ве́ки веко́в, ами́нь.

Моли́тва втора́я.

О преизя́щный и вели́кий уго́дниче Госпо́день Са́вво, похваля́ем твоя́ сла́вная чудотворе́ния, прославля́ем житие́ твое́ свято́е; никто́же возмо́жет исчести́ терпе́ние и по́двиги твоя́ святы́я; ты́ бо оте́чество и ро́д оста́вил еси́, в пусты́ню дости́г и, ученики́ собра́в, соста́вил оби́тель, воздви́гнув сто́лп, и на не́м подвиза́лся еси́, сохраня́я ста́до твое́ слове́сное; и́же непра́ведно иногда́ наше́дших разбо́йнически на оби́тель твою́ уви́дел еси́ и то́кмо жезла́ ударе́нием устраши́л еси́, и ны́не устраши́, о́тче преподо́бный, все́х враго́в, возстаю́щих на на́с; умоли́ ми́лостиваго Бо́га, да отпу́стит на́м прегреше́ния на́ша и сподо́бит на́с ку́пно ра́дости ве́чныя наслажда́тися со все́ми святы́ми, ны́не и при́сно, и во ве́ки веко́в, ами́нь.