Конда́к 1.

Избра́нный уго́дниче Христо́в, преподо́бне о́тче Се́ргие, благохва́льная пе́ния о вели́ких твои́х чудесе́х принося́ще ти́ моли́твенницы твои́, прославля́ем просла́вльшагося в тебе́ Бо́га на́шего. Ты́ же, я́ко име́яй ве́лие дерзнове́ние к Нему́, от вся́ких на́с вре́менных и ве́чных бе́д твои́ми к Нему́ моли́твами свободи́, да зове́м ти́:

Ра́дуйся, Се́ргие преподо́бне, Ну́ромский чудотво́рче.

И́кос 1.

А́нгел земны́й и челове́к небе́сный бы́л еси́, преподо́бне о́тче Се́ргие: от ю́ности бо твоея́ Го́сподеви рабо́тати изво́ливый, дости́гл еси́ блаже́нства небе́снаго, и ны́не со а́нгелы Престо́лу Пресвяты́я Тро́ицы предстои́ши. Сего́ ра́ди тебе́, на небеси́ и на земли́ просла́вленному, вопие́м си́це:

Ра́дуйся, от ю́ности твоея́ все́м се́рдцем твои́м Го́спода возлюби́вый; ра́дуйся, и са́м от Него́ возлю́блен бы́вый.

Ра́дуйся, поуча́выйся в Зако́не Госпо́дни де́нь и но́щь; ра́дуйся, поуче́нием си́м я́ко дре́во плодоно́сное, при исхо́дищих во́д благода́тных насажде́нное, показа́выйся.

Ра́дуйся, чистоты́ вмести́лище; ра́дуйся, до́ме вся́ческия святы́ни.

Ра́дуйся, благода́ти Бо́жия во вся́ дни́ жития́ испо́лненный; ра́дуйся, насле́дниче небе́сных дарова́ний.

Ра́дуйся, Се́ргие преподо́бне, Ну́ромский чудотво́рче.

Конда́к 2.

Ви́дев, преподо́бне о́тче, я́ко вся́, я́же в ми́ре, су́етна су́ть и скороги́бнуща, изво́лил еси́ всеусе́рдное твое́ попече́ние име́ти о е́же ка́ко спасти́ ду́шу твою́. Мы́ же, о такове́м твое́м спаси́тельнем произволе́нии прославля́юще Бо́га, зове́м Ему́: Аллилу́иа.

И́кос 2.

Ра́зум боже́ственный име́я и тепле́йшее ко Го́споду произволе́ние, позна́л еси́, преподо́бне, я́ко бла́го е́сть челове́ку, и́же во́змет яре́м Госпо́день на ся́ от ю́ности своея́, и сего́ ра́ди, отве́ргся ми́ра, бы́л еси́ мона́х. Те́мже зове́м ти́:

Ра́дуйся, и́го крестоноше́ния Христо́ва возлюби́вый; ра́дуйся, восле́д Го́спода твоего́ неле́ностно устреми́выйся.

Ра́дуйся, ру́ку твою́ на ра́ло спасе́ния возложи́вый, никогда́же вспя́ть обраща́яся; ра́дуйся, за́дняя забыва́я, в пре́дняя усе́рдно простира́выйся.

Ра́дуйся, благоду́шным терпе́нием скорбе́й оби́тели небе́сныя дости́гнувый; ра́дуйся, ны́не о все́х в печа́лех су́щих моли́твенниче тепле́йший.

Ра́дуйся, скорбя́щих ско́рое утеше́ние; ра́дуйся, уныва́ющих уте́шителю благода́тный.

Ра́дуйся, Се́ргие преподо́бне, Ну́ромский чудотво́рче.

Конда́к 3.

Си́ла Вы́шняго осени́ тя́, преподо́бне, и препоя́са тя́ на враги́ ви́димыя и неви́димыя, и́хже победи́в, утверди́л еси́ на ка́мени недви́жимем за́поведей Христо́вых мы́сленныя но́зе твои́, и вше́д в небе́сныя оби́тели, ра́достно зове́ши Бо́гу: Аллилу́иа.

И́кос 3.

Име́я в се́рдце твое́м всесоверше́нное жела́ние рабо́тати Го́сподеви со стра́хом и ра́доватися Ему́ со тре́петом, оста́вил еси́ Оте́чество твое́ и прише́л еси́ в го́ру Афо́нскую, иде́же со отъя́тием власо́в главы́ твоея́, отложи́л еси́ ве́тхаго своего́ челове́ка со страстьми́ и похотьми́ его́. Те́мже приими́ от на́с пе́ния сицева́я:

Ра́дуйся, ра́бе Бо́жий, благи́й и ве́рный; ра́дуйся, ни́ву душе́вную твою́ неле́ностно возде́лавый.

Ра́дуйся, горы́ Афо́нския все́льниче; ра́дуйся, доброде́телей оте́ц преподо́бных горы́ тоя́, пре́жде тебе́ бы́вших, сонасле́дниче.

Ра́дуйся, мона́хом богодухнове́нное свети́ло; ра́дуйся, ко гра́ду небе́сному все́х путевождю́ благонаде́жный.

Ра́дуйся, пустынножи́телей украше́ние; ра́дуйся, безмо́лвия рачи́телю тепле́йший.

Ра́дуйся, Се́ргие преподо́бне, Ну́ромский чудотво́рче.

Конда́к 4.

Бу́рю многомяте́жнаго ми́ра страсте́й возненави́дев, о́тче, устрани́лся еси́ все́х его́ красо́т: в пусты́ню же все́лься, преподо́бне, Крести́телю в житии́ после́довал еси́, и Илии́ поревнова́л еси́ проро́ку. Ны́не у́бо и́стинно ве́чную в Небе́сных дво́рех получи́в сла́ву, с ни́ми предстои́ши Бо́гу, поя́ Тому́: Аллилу́иа.

И́кос 4.

Слы́шав, я́ко богохрани́мей держа́ве Росси́йстей возсия́ светоза́рное свети́ло вели́кий а́вво Се́ргий, восхоте́л еси́ учени́к его́ бы́ти, и сего́ ра́ди оста́вль го́ру Афо́нскую, устреми́лся еси́ к ца́рствующему гра́ду Москве́, да возмо́жеши жела́ние твое́ испо́лнити. Мы́ же, мы́сленно тя́ на пути́ се́м срета́юще, зове́м:

Ра́дуйся, смире́ния блага́го ревни́телю; ра́дуйся, му́дрости духо́вныя иска́телю неусы́пный.

Ра́дуйся, и́ноче благоиску́сный; ра́дуйся, стра́нниче богоизбра́нный.

Ра́дуйся, сподви́жник соиме́нному ти́ вели́кому Се́ргию бы́ти сподо́бивыйся; ра́дуйся, от него́ вселюбе́зно прия́тый.

Ра́дуйся, вели́каго учи́теля освяще́нный учениче́; ра́дуйся, сообита́телю его́ на небесе́х.

Ра́дуйся, Се́ргие преподо́бне, Ну́ромский чудотво́рче.

Конда́к 5.

Боготе́чней звезде́ подо́бяся, я́коже еле́нь на исто́чники водны́я, си́це ты́, преподо́бне, поте́кл еси́ в преде́лы Во́логодския, иски́й безмо́лвия. Дости́г же пусты́ни Ну́ромския и ту́ водрузи́в Кре́ст Христо́в, воспе́л еси́ Ему́ благода́рственно: Аллилу́иа.

И́кос 5.

Ви́девше тя́ преподо́бне о́тче, еди́наго на еди́не Го́сподеви в пусты́ни рабо́тающа, и мне́вше у тебе́ обрести́ мно́гая веще́ственная сокро́вища, лю́те нападо́ша на тя́ разбо́йницы, от ни́хже и ра́ны мно́ги подъя́л еси́, но а́бие Христо́с исцели́ тя́. Сего́ ра́ди мы́ взыва́ем ти́ такова́я:

Ра́дуйся, кри́не ра́йскаго прозябе́ния, во удо́лиих Ну́ромских произрасты́й; ра́дуйся, пусты́ни Во́логодския цве́те благоуха́нный.

Ра́дуйся, му́чеников соприча́стниче; ра́дуйся, Го́сподеви твоему́ незло́бием уподо́бивыйся.

Ра́дуйся, нището́ю твое́ю бога́т бы́вый; ра́дуйся, смире́нием твои́м Христо́ви подража́вый.

Ра́дуйся, пусты́ни благода́тное украше́ние; ра́дуйся, ми́рови свети́льниче пресве́тлый.

Ра́дуйся, Се́ргие преподо́бне, Ну́ромский чудотво́рче.

Конда́к 6.

Пропове́дует да́нную ти́ от Бо́га благода́ть целе́бную челове́к мно́жество: разсла́бленныя бо исцеля́еши, неду́гующым, ума́ лише́нным и бесны́м здра́вие подава́еши, слепы́я просвеща́еши и хромы́я твори́ши ходи́ти. Прославля́юще у́бо оби́льную благода́ть в тебе́ обита́ющую, благогове́йне вопие́м Бо́гу: Аллилу́иа.

И́кос 6.

Возсия́л еси́ я́ко звезда́ пресве́тлая от Афо́на и от оби́тели вели́каго тезоимени́таго тебе́ отца́ се́верней стране́ се́й, свя́те Се́ргие: бесо́встии же полцы́, не терпя́ще тя́ в пусты́ни, мно́жицею устраши́ти тя́ устремля́хуся, но оба́че, си́лою моли́тв твои́х прогоня́еми, бежа́ша. От и́хже наве́тов и на́с изба́ви моли́твами твои́ми, да зове́м ти́ си́це:

Ра́дуйся, бесо́м стра́шный прогони́телю; ра́дуйся, пре́лести и́х потреби́телю.

Ра́дуйся, главу́ зми́еву уязви́вый моли́твами твои́ми; ра́дуйся, кова́рства враго́в спасе́ния на́шего ни во что́ же обраща́яй.

Ра́дуйся, во́ине Христо́в непобеди́мый; ра́дуйся, ду́хи лука́вствия смиренному́дрием покори́вый.

Ра́дуйся, ве́рным на враги́ посо́бствуяй; ра́дуйся, усе́рдно к заступле́нию твоему́ притека́ющым во бра́ни мы́сленней ско́ро помога́яй.

Ра́дуйся, Се́ргие преподо́бне, Ну́ромский чудотво́рче.

Конда́к 7.

Хотя́щу ти́, преподо́бне, еди́ному в безмо́лвии житие́ твое́ сконча́ти, Госпо́дь устроя́ет тя́ па́стыря и учи́теля мона́шескому собо́ру: совокупи́в бо и́ноков ли́ки и воздви́г хра́м Спа́су Христу́, неле́ностно Ему́ порабо́тал еси́, во дни́ и в но́щи со ученики́ твои́ми зовы́й: Аллилу́иа.

И́кос 7.

Но́вый вои́стинну победоно́сец на плотски́я стра́сти яви́лся еси́, преподо́бне: и кто́ возмо́жет воспе́ти боре́ния твоя́, исчести́ труды́, боле́зни и по́двиги, в ни́хже тече́ние по́стничества соверши́л еси́; к си́х похвале́нию не дово́льни су́ще, любо́вию па́че почита́ем тя́ и ве́рно ти́ сицева́я прино́сим:

Ра́дуйся, гла́дом и жа́ждою пло́ть твою́ удручи́вый; ра́дуйся, вся́ко сладостра́стие всено́щными бде́нии увяди́вый.

Ра́дуйся, в моли́твах и поще́ниих подвиза́выйся и в безстра́стие облеки́йся; ра́дуйся, преди́вное воздержа́ния зерца́ло.

Ра́дуйся, я́ко, стра́ждущей от мра́за пло́ти твое́й, теплото́ю любве́ Христо́вы согрева́шеся ду́х тво́й; ра́дуйся, я́ко зно́ем опаля́ема тя́ роса́ боже́ственныя благода́ти прохлажда́ше.

Ра́дуйся, преподо́бных ли́ку вели́кая сла́во; ра́дуйся, подвиго́в и соверше́нства о́бразе достоподража́емый.

Ра́дуйся, Се́ргие преподо́бне, Ну́ромский чудотво́рче.

Конда́к 8.

Стра́нное и пачеесте́ственное житие́ преподо́бнаго Па́вла ви́дев, блаже́нне, бы́л еси́ того́ спо́стник и собесе́дник: во обои́х бо ва́с бя́ше еди́н и то́йжде ду́х, и сего́ ра́ди два́, я́ко еди́н, теко́сте ко Го́споду, пою́ще: Аллилу́иа.

И́кос 8.

Ве́сь еси́ в вы́шних, но и ни́жних не оставля́еши, преподо́бне о́тче Се́ргие, при́сно со Христо́м ца́рствуеши, и от на́с гре́шных моли́твы к Нему́ возсыла́еши: не то́чию бо припа́дающыя к цельбоно́сному твоему́ гро́бу, но и дале́че отстоя́щыя, призыва́ющыя же всечестно́е и́мя твое́, предста́тельством твои́м соблюда́еши от вся́каго зла́. Те́мже во умиле́нии зове́м ти́:

Ра́дуйся, прибе́жище на́ше в ско́рбех; ра́дуйся, приста́нище на́ше во обстоя́ниих.

Ра́дуйся, цели́телю боле́зней душе́вных вку́пе и теле́сных; ра́дуйся, посети́телю в не́мощех лежа́щих.

Ра́дуйся, я́ко призыва́емый ско́ро на по́мощь предваря́еши; ра́дуйся, я́ко печа́ли жите́йския от челове́к отъе́млеши.

Ра́дуйся, а́нгельскаго жития́ ревни́телю; ра́дуйся, лико́в святы́х все́х соприча́стниче.

Ра́дуйся, Се́ргие преподо́бне, Ну́ромский чудотво́рче.

Конда́к 9.

От вся́ких бе́д, скорбе́й и напа́стей избавля́й на́с, преподо́бне, твои́ми ко Го́споду многомо́щными моли́твами, и да́руй на́м и вре́менная блага́я и ве́чное ра́дование получи́ти, да ку́пно с тобо́ю воззове́м: Аллилу́иа.

И́кос 9.

Вити́йство челове́ческое не возмо́жет изрещи́, ка́ко по мно́зех ле́тех преставле́ния твоего́ и́ноку Ники́фору яви́лся еси́, глаго́ля: «Рцы́ игу́мену и бра́тии, да очи́стят гро́б мо́й, не хо́щет бо Госпо́дь ему́ в забве́нии бы́ти». Мы́ же, благода́рни су́ще Бо́гу, дарова́вшему на́м тебе́ Своего́ уго́дника, вопие́м ти́ сицева́я:

Ра́дуйся, подви́жниче всеусе́рднейший, во врата́ ра́йския вше́дый; ра́дуйся, и о спасе́нии земны́х бра́тий твои́х пещи́ся не престая́й.

Ра́дуйся, гро́б тво́й и те́ло твое́, я́коже сосу́д благода́ти, на́м оста́вивый; ра́дуйся, от ни́х струи́ исцеле́ния излива́ти не прекраща́яй.

Ра́дуйся, Христо́вым словесе́м после́дователю, с Ни́м ны́не на Небесе́х ца́рствуяй; ра́дуйся, се́явый слеза́ми, да с ра́достию рукоя́ти твоя́ пожне́ши во вре́мя свое́.

Ра́дуйся, пути́ же́стоки за словеса́ усте́н Го́спода твоего́ сохрани́вый; ра́дуйся, от пе́рваго и до единонадеся́таго часа́ жи́зни твоея́ Ему́ то́чию еди́ному служи́вый.

Ра́дуйся, Се́ргие преподо́бне, Ну́ромский чудотво́рче.

Конда́к 10.

Спасти́ся хотя́ще ве́рнии от грехо́в и страсте́й многообра́зных, о́тче, предста́теля тя́ себе́ и побо́рника поставля́ют и не лиша́ются упова́ния своего́: наставля́еши бо на спасе́ния стези́ усе́рдно к тебе́ притека́ющыя и Бо́гу ве́рно вопию́щыя: Аллилу́иа.

И́кос 10.

Сте́ну тя́ засту́пника и моли́твенника те́пла обре́тше, преподо́бне, из глубины́ се́рдца, я́ко благоуха́нное кади́ло, со воздыха́нием Бо́гу возсыла́ем хвалы́: тебе́ же при́сному су́щу моли́твеннику, сицева́я прино́сим пе́ния:

Ра́дуйся, плодо́в доброде́тельных благопроцве́тшая ни́во; ра́дуйся, благочести́вых ду́ш преизря́дное украше́ние.

Ра́дуйся, земны́м засту́пниче кре́пкий; ра́дуйся, послу́шателю ско́рый притека́ющих к тебе́.

Ра́дуйся, свети́льниче, мра́к де́монский дале́че отрева́яй; ра́дуйся, душетле́нных неду́гов тму́ отгоня́яй.

Ра́дуйся, я́ко многоразли́чная благодея́ния тобо́ю свы́ше подава́ема быва́ют; ра́дуйся, я́ко все́х моле́ния дерзнове́нно Вы́шнему прино́сиши.

Ра́дуйся, Се́ргие преподо́бне, Ну́ромский чудотво́рче.

Конда́к 11.

Пе́ние всеумиле́нное Го́сподеви воспева́л еси́ во вся́ дни́ жития́ твоего́, преподо́бне, непреста́нно и́мя Христо́во нося́ во устна́х и се́рдце твое́м: сего́ ра́ди очи́стив вну́тренняго твоего́ челове́ка, слико́вник яви́лся еси́ а́нгельским чино́м, с ни́ми поя́ Вседержи́телю: Аллилу́иа.

И́кос 11.

Свети́ло яви́лся еси́ светоза́рное, преподо́бне Се́ргие, во стране́ Во́логодстей: све́тлостию бо жития́ и де́л твои́х и зна́меньми чуде́с озаря́еши ду́шы на́ша. Сего́ ра́ди мы́, притека́юще к ра́це моще́й твои́х, глаго́лем ти́ такова́я:

Ра́дуйся, све́тлое со́лнце, блиста́нии твои́ми просвеща́ющее ве́рных; ра́дуйся, сосу́де ми́ра боже́ственнаго, облагоуха́яй припа́дающих к тебе́ со усе́рдием.

Ра́дуйся, во страна́х е́ллинских роди́выйся, богохрани́мей же держа́ве Росси́йстей Бо́гом да́нный; ра́дуйся, се́верныя страны́ на́шея украше́ние велеле́пное.

Ра́дуйся, гра́ду Во́логде похвало́ высо́кая. Ра́дуйся, хра́му, в не́мже почива́ют мо́щи твоя́, утвержде́ние непоколеби́мое.

Ра́дуйся, благоукраси́телю пусты́ни Ну́ромския; ра́дуйся, мно́гия и́ноки па́стырским жезло́м твои́м ко Христу́ приведы́й.

Ра́дуйся, Се́ргие преподо́бне, Ну́ромский чудотво́рче.

Конда́к 12.

Благода́ть, да́нную ти́ и по́двиги твоя́ никто́же изрещи́ возмо́жет, о́тче Се́ргие: в пусты́ни бо нестяжа́тельно жи́вый, с Бо́гом и а́нгелы бесе́довал еси́, от челове́к бе́гая. Ны́не у́бо в Небе́сных Черто́зех ра́дуяся, пое́ши Го́споду Бо́гу: Аллилу́иа.

И́кос 12.

Пое́м до́блественныя по́двиги твоя́, ублажа́ем достохва́льную кончи́ну твою́, почита́ем и свяще́нную па́мять твою́, преподо́бне, в не́йже, я́ко еди́ному от друго́в Бо́жиих, похва́льная ти́ си́це вопие́м:

Ра́дуйся, я́ко све́тлыми по́двиги твои́ми ко Све́ту Невече́рнему вше́л еси́; ра́дуйся, я́ко со безпло́тными трисвяту́ю пе́снь немо́лчно взыва́еши.

Ра́дуйся, неизрече́нных бла́г насле́дниче; ра́дуйся, ликова́ния во Ца́рствии Небе́снем при́сно наслажда́ешися.

Ра́дуйся, я́ко предстои́ши во сла́ве Пресвяте́й Тро́ице; ра́дуйся, я́ко в па́мяти твое́й Христо́ву Це́рковь весели́ши неизрече́нно.

Ра́дуйся, я́ко тобо́ю по́стницы и пустынножи́телие в по́двизех укрепля́ются; ра́дуйся, я́ко ве́рнии благоправле́нием твои́м по стопа́м за́поведей Бо́жиих ше́ствовати науча́ются.

Ра́дуйся, Се́ргие преподо́бне, Ну́ромский чудотво́рче.

Конда́к 13.

О вели́кий и пресла́вный уго́дниче Христо́в, преподо́бне о́тче Се́ргие! Приими́ сие́ ма́лое от на́с приноси́мое тебе́ пе́ние, и потщи́ся ско́ро умоли́ти ми́лостиваго Бо́га и Влады́ку, да твои́м хода́тайством изба́вит на́с от вра́г ви́димых и неви́димых, от вся́кия напа́сти и ско́рби, от внеза́пныя сме́рти и бу́дущия му́ки, да с тобо́ю и со все́ми святы́ми сподо́бимся непреста́нно пе́ти Ему́: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгел земны́й и челове́к небе́сный бы́л еси́, преподо́бне о́тче Се́ргие: от ю́ности бо твоея́ Го́сподеви рабо́тати изво́ливый, дости́гл еси́ блаже́нства небе́снаго, и ны́не со а́нгелы Престо́лу Пресвяты́я Тро́ицы предстои́ши. Сего́ ра́ди тебе́, на небеси́ и на земли́ просла́вленному, вопие́м си́це:

Ра́дуйся, от ю́ности твоея́ все́м се́рдцем твои́м Го́спода возлюби́вый; ра́дуйся, и са́м от Него́ возлю́блен бы́вый.

Ра́дуйся, поуча́выйся в Зако́не Госпо́дни де́нь и но́щь; ра́дуйся, поуче́нием си́м я́ко дре́во плодоно́сное, при исхо́дищих во́д благода́тных насажде́нное, показа́выйся.

Ра́дуйся, чистоты́ вмести́лище; ра́дуйся, до́ме вся́ческия святы́ни.

Ра́дуйся, благода́ти Бо́жия во вся́ дни́ жития́ испо́лненный; ра́дуйся, насле́дниче небе́сных дарова́ний.

Ра́дуйся, Се́ргие преподо́бне, Ну́ромский чудотво́рче.

Конда́к 1.

Избра́нный уго́дниче Христо́в, преподо́бне о́тче Се́ргие, благохва́льная пе́ния о вели́ких твои́х чудесе́х принося́ще ти́ моли́твенницы твои́, прославля́ем просла́вльшагося в тебе́ Бо́га на́шего. Ты́ же, я́ко име́яй ве́лие дерзнове́ние к Нему́, от вся́ких на́с вре́менных и ве́чных бе́д твои́ми к Нему́ моли́твами свободи́, да зове́м ти́:

Ра́дуйся, Се́ргие преподо́бне, Ну́ромский чудотво́рче.

Моли́тва пе́рвая.

О вели́кий чудотво́рче, преподо́бне о́тче на́ш Се́ргие! Услы́ши на́с гре́шных моля́щихся тебе́ и и́мя твое́ свято́е на по́мощь призыва́ющих, не пре́зри на́с чту́щих тя́: моли́ о на́с гре́шных Соде́теля на́шего Го́спода Бо́га, тебе́ бо даде́ся благода́ть моли́тися за на́с. Не мни́м бо тя́ ме́ртва су́ща: а́ще бо те́лом и преста́вился еси́ от на́с, и ра́ка твоя́ пред очи́ма на́шима ви́дима е́сть, но свята́я твоя́ душа́ со а́нгельскими ли́ки предстои́т у Престо́ла Вседержи́телева. О па́стырю на́ш, преподо́бне о́тче Се́ргие! Потщи́ся сохрани́ти на́с от па́губныя сме́рти и от бесо́вскаго искуше́ния, умо́м от малоду́шия помраче́нных. Не оста́ви на́с, свети́льниче Христо́в, плене́нных бы́ти, но помози́ на́м моли́твами твои́ми от ве́чныя му́ки изба́витися и насле́дники Ца́рствия Небе́снаго бы́ти со все́ми святы́ми от ве́ка угоди́вшими Го́споду Бо́гу на́шему Иису́су Христу́, Ему́же подоба́ет че́сть, поклоне́ние, сла́ва и держа́ва, со Безнача́льным Его́ Отце́м и Пресвяты́м и Благи́м и Животворя́щим Его́ Ду́хом, ны́не и при́сно и во ве́ки веко́в. Ами́нь.

Моли́тва втора́я.

О преподо́бне и достоблаже́нне о́тче Се́ргие, до́брый на́ш па́стырю и учи́телю! Ты́ еще́ на земли́ се́й ра́б преи́скренний Спа́са Христа́ показа́лся еси́, и мно́гия да́ры благода́тныя от Него́ прия́ти сподо́бился еси́: по блаже́ннем же твое́м успе́нии Престо́лу непристу́пныя Его́ Сла́вы предстоя́, ве́лие к Нему́ дерзнове́ние и́маши. Сего́ ра́ди моли́ и о на́с, вла́ющихся в пусты́ни ми́ра сего́ и суе́т его́. Огради́ на́с предста́тельством твои́м от все́х вра́г ви́димых и неви́димых, от тлетво́рных ве́тр, смертоно́сныя я́звы, от гла́да, тру́са, пото́па, огня́, меча́, наше́ствия иноплеме́нных и от вся́каго зла́. Наипа́че же, свя́тче Бо́жий, проле́й те́плое твое́ моле́ние ко Го́споду о богохрани́мей держа́ве Росси́йстей, да в ми́ре, тишине́ и благоде́нствии жи́тельствуем. Огражда́й же моле́нием твои́м, преподо́бне, Це́рковь Христо́ву Правосла́вную от ересе́й и раско́лов, ри́зу Христо́ву раздра́ти тща́щихся: испроси́ па́стырем святы́ню, па́стве о спасе́нии ре́вность, ста́рцем кре́пость и благо́е напу́тствие в жи́знь ве́чную, сре́дним лу́чшим бы́ти, ю́ныя уцелому́дри и послуша́нию научи́. На́м же все́м, уго́дниче Бо́жий, вре́мя на покая́ние испроси́, да не во гресе́х на́ших у́мрем, но да моли́твами твои́ми, плоды́ досто́йны покая́ния прине́сшим, ве́чную присноблаже́нную жи́знь и сопребыва́ние со святы́ми Его́ да́рует на́м Госпо́дь, да прославля́ем гла́сы немо́лчными Его́ неизрече́нное милосе́рдие в безконе́чныя ве́ки веко́в. Ами́нь.