Конда́к 1.

Восхва́лим, христолюби́вии лю́дие, ди́внаго уго́дника Бо́жия, и́же по́двигом до́брым подвиза́ся и и́ноческаго жития́ пу́ть че́стне соверши́, игу́менства честны́й кре́ст досто́йне понесе́, и вене́ц спасе́ния восприя́т; те́мже умиле́нно воспое́м ему́:

Ра́дуйся, преподо́бне Варлаа́ме, со отцы́ Пече́рскими в ра́дость Го́спода Иису́са вше́дый.

И́кос 1.

От бесе́ды преподо́бнаго Анто́ния те́плою к Бо́гу любо́вию се́рдцу твоему́ распали́вшуся, блаже́нне, ра́достен, а́ки не́кое обре́т сокро́вище, в до́м сво́й возврати́лся еси́, предложе́ние же во́ли твоея́ при ногу́ достоблаже́ннаго отца́ оста́вил еси́, и к нему́ па́ки прите́к, суеты́ мирски́я отве́ргше прило́ги. Те́мже пое́м ти́, о́тче похвалы́ сицевы́я:

Ра́дуйся, целому́дрие сохрани́вый; ра́дуйся, любо́вь к Бо́гу яви́вый.

Ра́дуйся, все́ упова́ние твое́ на Христа́ возложи́вый; ра́дуйся, преподо́бно на земли́ пожи́вый.

Ра́дуйся, Го́споду житие́м свои́м угоди́вый; ра́дуйся, досто́йным Ца́рствия Его́ себе́ показа́вый.

Ра́дуйся, преподо́бне Варлаа́ме, со отцы́ Пече́рскими в ра́дость Го́спода Иису́са вше́дый.

Конда́к 2.

Свя́те о́тче Варлаа́ме, разуме́в я́ко сокро́вище у́мное сокрове́нно е́сть в пеще́ре святе́й, все́ бога́тство твое́ и себе́ сама́го вда́л еси́ в послуша́ние достоблаже́нному Анто́нию и, я́ко купе́ц доброразу́мный, купи́л еси́ село́ то́, на не́мже би́сер безце́нный Ца́рство Небе́сное обре́л еси́. Те́мже тя́, богому́дре, прославля́ем, ча́юще вы́ну пе́ти с тобо́ю Христу́ Бо́гу: Аллилу́иа.

И́кос 2.

Ве́ка сего́ бога́тство и сла́ву, се́ни скоропреходя́щей подо́бны бы́ти проразсуди́л еси́, преподо́бне Варлаа́ме. Те́мже, вся́ сия́ в уме́ты вмени́в, да Христа́ Еди́наго приобря́щеши, избра́л еси́ те́сную стезю́ жития́ и́ноческаго. Сего́ ра́ди восхваля́ем тя́, свя́те, зва́ниями си́ми:

Ра́дуйся, на небеси́ со святы́ми пребыва́яй; ра́дуйся, во бде́нии пребыва́ти на́с наставля́яй.

Ра́дуйся, моли́твами твои́ми ве́сь ми́р покрыва́яй; ра́дуйся, в тя́жких обстоя́ниих и беда́х су́щим помога́яй.

Ра́дуйся, чту́щих тя́ благода́тный наста́вниче; ра́дуйся, си́рых и немощны́х засту́пниче.

Ра́дуйся, преподо́бне Варлаа́ме, со отцы́ Пече́рскими в ра́дость Го́спода Иису́са вше́дый.

Конда́к 3.

Яря́щася на тя́ во́инствующии супоста́ты, егда́ обле́клся еси́ в ри́зу спасе́ния, и воздвиго́ша на тя́ отца́ твоего́, Варлаа́ме, ты́ же преда́л еси́ се́рдце твое́ в ру́це Госпо́дни, во е́же пе́ти Вседержи́телю Бо́гу: Аллилу́иа.

И́кос 3.

Те́плейшею любо́вию Бо́га возлюби́в, о́тче Варлаа́ме, А́нгельскому житию́ неукло́нно поревнова́л еси́, ну́ждею от неразу́мнаго отца́ оде́ян бы́в в пресве́тлую оде́жду, попра́л еси́ ту́ в нечистоту́, вку́пе с не́ю попира́я го́рдаго врага́, льстя́щаго разли́чными су́етствы. Све́т у́бо Бо́жий незаходи́мый облиста́ се́рдце твое́, те́м не воззре́л еси́ на све́т ле́стный, но, Бо́га еди́наго предзря́ одесну́ю себе́, Того́ славосло́вил еси́ я́ко Человеколю́бца, преподо́бне. Мо́лим тя́, о́тче добропобе́дне, приими́ от на́с пе́сни хвале́бныя:

Ра́дуйся, шле́м спасе́ния прия́вый; ра́дуйся, се́рдце свое́ пала́тою Ду́ха Свята́го сотвори́вый.

Ра́дуйся, я́ко славосло́вию Го́спода поревнова́л еси́; ра́дуйся, я́ко насле́дником ра́дости нетле́нныя яви́лся еси́.

Ра́дуйся, спасе́нию ду́ш на́ших помога́яй; ра́дуйся, на пу́ть пра́ведный заблу́ждших направля́яй.

Ра́дуйся, преподо́бне Варлаа́ме, со отцы́ Пече́рскими в ра́дость Го́спода Иису́са вше́дый.

Конда́к 4.

Еги́пта мы́сленнаго и се́ти ловя́щих изба́витися хотя́ще, Варлаа́ме, пребы́л еси́ три́ дни́ а́лчен, моли́твою то́кмо ду́шу пита́я и глаго́ля с проро́ком: от тли́ сея́ возведи́ мя́, Бо́же, и а́з про́чая ле́та и́стинным ду́хом поживу́ Тебе́, поя́ неле́ностно: Аллилу́иа.

И́кос 4.

Ми́ра скоропреходя́щую суету́ и сла́ву тле́нную в уме́ты вменя́юще, да Христа́ Еди́наго приобря́щеши, возжела́л еси́ ше́ствовати к Нему́ стезе́ю и́ноческою. Оте́ческия трапе́зы не вкуси́л еси́, но, очи́ма до́лу зря́, у́м горе́ возводи́л еси́, помышля́я трапе́зу Небе́снаго Царя́, от нея́же вкуша́еши ны́ не во Ца́рствии Небе́снем, иде́же слы́шиши, Варлаа́ме, пе́сни похва́льныя, от земноро́дных ти́ приноси́мыя:

Ра́дуйся, я́ко на земли́ и́мя твое́ прославля́ется; ра́дуйся, я́ко сла́достию небе́сною наслажда́ешися.

Ра́дуйся, благоче́стием себе́ украси́вый; ра́дуйся, в сосу́д благоуха́нный ду́шу твою́ обрати́вый.

Ра́дуйся, я́ко со А́нгелы Го́спода воспева́еши; ра́дуйся, я́ко в ли́це преподо́бных пребыва́еши.

Ра́дуйся, преподо́бне Варлаа́ме, со отцы́ Пече́рскими в ра́дость Го́спода Иису́са вше́дый.

Конда́к 5.

Варлаа́ме целому́дренне, равноа́нгельнаго жития́ возжеле́в, не возше́л еси́ на ло́же обру́чницы твоея́, и се́рдца не уклони́л еси́ в словеса́ лука́вая, внима́я рече́нным: восхва́лятся преподо́бнии во сла́ве, и возра́дуются на ло́жах свои́х; си́х преподо́бных прича́стник яви́лся еси́, бла́же, и пое́ши Бо́гу чи́стым гла́сом: Аллилу́иа.

И́кос 5.

Анто́ния преподо́бнаго со и́ноки на горе́ Пече́рстей в по́двизех пребыва́вших, моли́тва о тебе́, всече́стне Варлаа́ме, бе́ приле́жна, и сия́ преклони́ се́рдце отца́ твоего́ на ми́лость, и́же и любе́зно тя́ целова́в, отпусти́ с ми́ром во святу́ю пеще́ру подвиза́тися. Сие́ же бы́сть, и́бо воззва́ша пра́веднии, и Госпо́дь услы́ша и́х, и тя́ изба́ви от печа́ли. Мы́ же благода́тных утеше́ний ча́юще, пое́м ти́ пе́сни сицевы́я:

Ра́дуйся, Боже́ственнаго избра́ния сосу́де благослове́нный; ра́дуйся, си́лою Вы́шняго осене́нный.

Ра́дуйся, Го́спода от ю́ности возлюби́вый; ра́дуйся, ве́ру и любо́вь в се́рдце свое́м возрасти́вый.

Ра́дуйся, целому́дрие души́ своея́ сохрани́вый; ра́дуйся, смире́ние вели́кое стяжа́вый.

Ра́дуйся, преподо́бне Варлаа́ме, со отцы́ Пече́рскими в ра́дость Го́спода Иису́са вше́дый.

Конда́к 6.

Ра́зумом, просвеще́нным от Го́спода, испо́лнен бы́в, преподо́бне Варлаа́ме, не попусти́л еси́ страсте́м души́ твоея́ омрачи́ти, но, си́лою Бо́жиею вся́ разжже́ныя стре́лы вра́жия отрази́вше, Со́лнцу Пра́вды Христу́ воспева́еши вы́ну: Аллилу́иа.

И́кос 6.

Ласка́ниям отца́ твоего́ не повину́лся еси́, ниже́ преще́ния того́ устраши́лся еси́, ниже́ ле́стию же́нскою низложи́лся еси́, всече́стне Варлаа́ме, но непобеди́м от те́х пребы́л еси́, наде́яся на Христа́ Го́спода своего́, Ему́же мо́лишися с любо́вию о душа́х на́ших. Те́мже, усе́рдие твое́ похваля́юще, вопие́м ти́:

Ра́дуйся, тле́нная и вре́менная ми́ра сего́ презре́вый; ра́дуйся, от Го́спода да́р чудотворе́ния получи́вый.

Ра́дуйся, поста́ и воздержа́ния храни́телю; ра́дуйся, моли́твы и благоче́стия рачи́телю.

Ра́дуйся, врага́ злоко́зненнаго низложи́вый; ра́дуйся, на земли́, я́ко на небеси́ пожи́вый.

Ра́дуйся, преподо́бне Варлаа́ме, со отцы́ Пече́рскими в ра́дость Го́спода Иису́са вше́дый.

Конда́к 7.

Анто́ний, мона́шескаго жития́ на Руси́ первонача́льник, терпе́нию твоему́ удиви́ся, я́ко с лю́тым велиа́ром боря́ся, блаже́нне Варлаа́ме, не устраши́лся еси́ многоплете́нных вра́жиих ко́зней, и́миже а́ще и запе́нся, но терпе́нием и смире́нием победи́л еси́ зла́го миродержи́теля, побе́дно воспева́я Бо́гу: Аллилу́иа.

И́кос 7.

А́нгельскую чистоту́, простоту́ и вели́чие души́ твоея́ ве́дуще, Варлаа́ме досточу́дне, егда́ бра́тии двунадеся́тица собра́ся в пеще́ре святе́й, преподо́бный Анто́ний поста́ви тя́ над ни́ми игу́меном. Же́зл нача́льствования с че́стию восприя́вше, свя́тче, мно́ги труды́ на рамена́ своя́ подъя́л еси́, Пастыренача́льнику Христу́ подража́я. Сего́ ра́ди приими́ от на́с зва́ния сицева́я:

Ра́дуйся, от па́губных ересе́й отвраща́яй; ра́дуйся, о́чи на́ша душе́вныя просвеща́яй.

Ра́дуйся, от ко́зней диа́вольских защи́тниче; ра́дуйся, на Стра́шнем Суде́ о на́с моли́твениче.

Ра́дуйся, пред Бо́гом о все́х лю́дех хода́таю; ра́дуйся, у Престо́ла Госпо́дня ми́лостивый предста́телю.

Ра́дуйся, преподо́бне Варлаа́ме, со отцы́ Пече́рскими в ра́дость Го́спода Иису́са вше́дый.

Конда́к 8.

Многоча́стне и многообра́зне сотвори́ Госпо́дь чудеса́ моли́твами твои́ми, блаже́нне Варлаа́ме, я́ко да и мы с тобо́ю и все́ми святы́ми прославля́ем ди́внаго во святы́х Свои́х Христа́ Бо́га, воспева́юще Ему́: Аллилу́иа.

И́кос 8.

Е́же от преподо́бнаго Анто́ния ви́дев, то и са́м во смире́нии сотвори́л еси́ и бы́л еси́ па́стырь до́брый твоему́ слове́сному ста́ду. Я́коже бо и са́м никогда́же измени́л еси́ пра́вила твоего́, та́ко и бра́тию нака́зовал име́ти тща́ние о спасе́нии и прилежа́ти о души́ безсме́ртней, да насле́дие ра́дости ве́чныя и́мут. Мы́ же такову́ю ре́вность твою́ зря́ще, со умиле́нием зове́м ти́:

Ра́дуйся, я́ко А́нгелы труды́ твои́ми возвесели́л еси́; ра́дуйся, я́ко диа́вола по́двигами твои́ми посрами́л еси́.

Ра́дуйся, до́брый учи́телю и́ночествующих; ра́дуйся, кре́посте в по́двизех бо́дрствующих.

Ра́дуйся, вра́жиих стре́л прогони́телю; ра́дуйся, диа́вольских наве́тов разори́телю.

Ра́дуйся, преподо́бне Варлаа́ме, со отцы́ Пече́рскими в ра́дость Го́спода Иису́са вше́дый.

Конда́к 9.

Ду́шу твою́, преподо́бне, любве́ Христо́вы сла́дким жела́нием уязви́в, преподо́бне о́тче Варлаа́ме, целому́дрием сию́ украси́вше све́тло, мы́сленнаго ища́ Иерусали́ма, стра́нствовал еси́ к чу́вственному, вся́кия труды́ в пути́ Христа́ ра́ди терпя́. Живоно́сный Гро́б благогове́йно облобыза́в, возврати́лся еси́ во оби́тель Ки́ево-Пече́рскую, пою́ще Бо́гу: Аллилу́иа.

И́кос 9.

Иерусали́ма Небе́снаго граждани́ном бы́ти жела́я, и Го́рняго Оте́чествия взыску́я, ди́вне о́тче Варлаа́ме, де́вство и мона́шество бога́тству вре́менному и сла́достем тле́ннаго жития́ предпоче́л еси́. Те́мже мо́лим тя́ усе́рдно: от земны́х на́с отврати́, и да́ждь го́рняя иска́ти, тебе́ пра́ведно пою́ще похвалы́, я́ко уго́днику Бо́жию и благода́ти стяжа́телю, си́це:

Ра́дуйся, в любви́ к Бо́гу пламене́вый; ра́дуйся, небе́сных бла́г возжеле́вый.

Ра́дуйся, пра́ведности на́с науча́яй; ра́дуйся, люби́ти Бо́га и бли́жняго своего́ на́с наставля́яй.

Ра́дуйся, арома́ты ра́йскими благоуха́яй; ра́дуйся, в славосло́вии Тро́ицы Святы́я ны́не пребыва́яй.

Ра́дуйся, преподо́бне Варлаа́ме, со отцы́ Пече́рскими в ра́дость Го́спода Иису́са вше́дый.

Конда́к 10.

Варлаа́ме, о́тче на́ш честны́й, Невече́рнему Све́ту со а́нгельскими чи́ны ны́ не предстои́ши и на́с в све́те за́поведей Госпо́дних ходи́ти моли́твами твои́ми упра́ви, во е́же ку́пно с тобо́ю, свя́те преподо́бне, пе́ти Христу́ Бо́гу: Аллилу́иа.

И́кос 10.

Е́же запове́дал еси́ пред после́дним свои́м издыха́нием, о́тче священноигу́мене Варлаа́ме, испо́лнено бы́сть. С ми́ром почи́л еси́ в Бо́зе, ну́жды монасты́рския оте́чески па́мятствуя, в ру́це Госпо́дни оби́тель пре́дал еси́ и покро́ву Богома́тери над бра́тией су́щу. Приими́, о́тче блаже́нне, от христиа́н боголюби́вых пе́сни таковы́я:

Ра́дуйся, оте́ческое попече́ние о бра́тии яви́л еси́; ра́дуйся, самоизво́льным твои́м страда́нием А́нгелов удиви́л еси́.

Ра́дуйся, мно́го от напа́стей лука́ваго с терпе́нием пострада́вый; ра́дуйся, де́монския ко́зни по́двигом обличи́вый.

Ра́дуйся, чи́сту ду́шу твою́ Бо́гови предста́вивый; ра́дуйся и по сме́рти теле́сней моли́твы не оста́вивый.

Ра́дуйся, преподо́бне Варлаа́ме, со отцы́ Пече́рскими в ра́дость Го́спода Иису́са вше́дый.

Конда́к 11.

Направле́нием твои́м, о́тче священноигу́мене Варлаа́ме, обурева́ему прило́гами сопроти́вных, многопопечи́тельную жи́знь на́шу невре́дну сохрани́ и ра́йских селе́ний да́ждь доспе́ти, иде́же пра́ведницы сия́ют, я́ко свети́ла, пою́ще Бо́гу: Аллилу́иа.

И́кос 11.

Блаже́нное отше́ствие твое́ на небеса́ ра́дости ве́рных исполня́ет, пречу́дне о́тче Варлаа́ме, я́ко хода́тая и засту́пника обрета́ем бо тя́ пред Бо́гом. Пое́м сла́вное житие́ твое́ и ублажа́ем тя́, я́ко уго́дника Бо́жия и ди́внаго чудотво́рца. Ты́ же, свя́те, при́сно помина́й на́с, соверша́ющих любо́вию па́мять твою́ и со умиле́нием зову́щих ти́ такова́я:

Ра́дуйся, усе́рдный о на́с моли́твенниче; ра́дуйся, оби́димых кре́пкий засту́пниче.

Ра́дуйся, доброде́тельнаго жития́ учи́телю; ра́дуйся, немощны́х иску́сный цели́телю.

Ра́дуйся, в любви́ к Бо́гу пламене́вый; ра́дуйся, небе́сных бла́г возжеле́вый.

Ра́дуйся, преподо́бне Варлаа́ме, со отцы́ Пече́рскими в ра́дость Го́спода Иису́са вше́дый.

Конда́к 12.

От И́стиннаго Све́та озаря́емый, светоза́рный свети́льник су́щим на земли́ явля́ешися, преподо́бне о́тче Варлаа́ме, сердца́ бо ве́рных просвеща́еши и к ра́зуму Боже́ственному вся́ наставля́еши, да со умиле́нием зову́т Христу́ Спа́су: Аллилу́иа.

И́кос 12.

Гра́д Константи́на царя́ посети́л еси́ и отше́л еси́ душе́ю во всесветя́щийся гра́д Царя́ Небе́снаго, мо́щи же твоя́, и́хже оста́вил еси́ по кончи́не твое́й в монастыре́ Святы́я горы́ Зи́мненския, запове́дал пренести́ во Святу́ю Ла́вру, иде́же ны́не ты́я нетле́нно почива́ют, источа́юще преизоби́льно чудеса́. Услы́ши смире́нный гла́с моля́щихся тебе́, пресла́вне о́тче Варлаа́ме, и Бо́гу предстоя́, при́сно помина́й на́с, соверша́ющих любо́вию па́мять твою́ и зову́щих ти́ та́ко:

Ра́дуйся, я́ко в Бли́жних пеще́рах Святы́я Ла́вры моща́ми почива́еши; ра́дуйся, я́ко в Невече́рнем Све́те душе́ю Бо́гу предстои́ши.

Ра́дуйся, вене́ц безсме́ртия от Бо́га прия́вый; ра́дуйся, и́стинному служе́нию Бо́гу на́с науча́ющий.

Ра́дуйся, сердца́ на́ша ра́дости исполня́яй; ра́дуйся, жа́жду духо́вную благода́тию утоля́яй.

Ра́дуйся, преподо́бне Варлаа́ме, со отцы́ Пече́рскими в ра́дость Го́спода Иису́са вше́дый.

Конда́к 13.

О преди́вный и всехва́льный уго́дниче Христо́в, священноигу́мене оби́тели Ки́ево-Пече́рския, преподо́бне о́тче Варлаа́ме! Приими́ сие́ ма́лое моле́ние, от усе́рдия на́шего в похвалу́ тебе́ приноси́мое, и покры́ й моли́твами твои́ми все́х с ве́рою и любо́вию притека́ющих к тебе́, да покая́ние на́ше прии́мше, Госпо́дь и Бо́г на́ш прости́т на́м вся́ грехи́ на́ша и прича́стники Ца́рствия Своего́ соде́лает, да с тобо́ю и со все́ми святы́ми вы́ну воспева́ем Ему́: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

От бесе́ды преподо́бнаго Анто́ния те́плою к Бо́гу любо́вию се́рдцу твоему́ распали́вшуся, блаже́нне, ра́достен, а́ки не́кое обре́т сокро́вище, в до́м сво́й возврати́лся еси́, предложе́ние же во́ли твоея́ при ногу́ достоблаже́ннаго отца́ оста́вил еси́, и к нему́ па́ки прите́к, суеты́ мирски́я отве́ргше прило́ги. Те́мже пое́м ти́, о́тче похвалы́ сицевы́я:

Ра́дуйся, целому́дрие сохрани́вый; ра́дуйся, любо́вь к Бо́гу яви́вый.

Ра́дуйся, все́ упова́ние твое́ на Христа́ возложи́вый; ра́дуйся, преподо́бно на земли́ пожи́вый.

Ра́дуйся, Го́споду житие́м свои́м угоди́вый; ра́дуйся, досто́йным Ца́рствия Его́ себе́ показа́вый.

Ра́дуйся, преподо́бне Варлаа́ме, со отцы́ Пече́рскими в ра́дость Го́спода Иису́са вше́дый.

Конда́к 1.

Восхва́лим, христолюби́вии лю́дие, ди́внаго уго́дника Бо́жия, и́же по́двигом до́брым подвиза́ся и и́ноческаго жития́ пу́ть че́стне соверши́, игу́менства честны́й кре́ст досто́йне понесе́, и вене́ц спасе́ния восприя́т; те́мже умиле́нно воспое́м ему́:

Ра́дуйся, преподо́бне Варлаа́ме, со отцы́ Пече́рскими в ра́дость Го́спода Иису́са вше́дый.

Моли́тва.

О свяще́нная главо́, преподо́бне о́тче Варлаа́ме! Ты́ еси́ оби́тели Ки́ево-Пече́рския похвало́ и ве́рных во Святе́м Правосла́вии утвержде́ние! По́двигом до́брым подвиза́вся на земли́, игу́менский же́зл ты́ досточе́стне проне́сл еси́ и на небесе́х восприя́л еси́ вене́ц пра́вды, его́же угото́вал Госпо́дь Бо́г все́м лю́бящим Его́. Те́мже на тво́й святы́й о́браз взира́юще [или́: пред честны́ми моща́ми твои́ми предстоя́ще], о пресла́внем жи́тельстве твое́м умиля́емся и чти́м святу́ю па́мять твою́. Почита́юще же твое́ целому́дрие, ре́вность в по́двизех, мно́гия доброде́тели, во сла́ву Бо́жию соде́янныя, и ве́лие дерзнове́ние пред Го́сподем, со смире́нием мо́лим тя́, преподо́бне о́тче: воззри́ у́бо благосе́рдым о́ком любве́ твоея́ на на́с, недосто́йных, и потщи́ся богоприя́тным твои́м хода́тайством испроси́ти у Царя́ ца́рствующих и Го́спода госпо́дствующих, да проба́вит на́м вели́кия и бога́тыя Своя́ ми́лости, да пода́ст на́м ду́х пра́выя ве́ры, ду́х любве́, ми́ра и ра́дости о Ду́се Свя́те, да изба́вит ны́ от вся́ких бе́д и напа́стей и ниспо́слет вся́ поле́зная ко спасе́нию ду́ш на́ших. Е́й, свя́тче Бо́жий, не посрами́ упова́ния на́шего, е́же на тя́ по Бо́зе и Богоро́дице возлага́ем, но бу́ди на́м помо́щник и покрови́тель во спасе́ние, да сподо́бимся сконча́ти житие́ на́ше в покая́нии и восприи́мем ве́чная блага́я во Ца́рствии Христа́ Бо́га на́шего, прославля́юще человеколю́бие Отца́ и Сы́на и Свята́го Ду́ха, и твое́ свято́е заступле́ние, ны́ не и при́сно и во ве́ки веко́в. Ами́нь.