Конда́к 1.

Избра́нный во́ине Христо́в и чудотво́рче, преподо́бне о́тче на́ш Варсоно́фие, и́же пра́ведным житие́м полки́ бесо́вския низложи́л еси́ и Ру́сь Святу́ю на стезя́х благоче́стия утверди́л еси́, похва́льная тебе́ прино́сим пе́ния. Ты́ же, я́ко име́я ве́лие дерзнове́ние ко Го́споду, от вся́ких на́с бе́д свободи́, любо́вию зову́щих:

Ра́дуйся, Варсоно́фие, О́птинскаго ста́рчества боголе́пное украше́ние.

И́кос 1.

Ли́к Небе́сный воспева́ет богоуго́дное твое́ житие́, зане́ от рожде́ния избра́н бы́л еси́ свети́ти ми́ру по́двиги благоче́стия. Еще́ во о́трочестве твое́м ста́рец богому́дрый прорече́ о тебе́, я́ко мно́гия ду́ши изба́виши от огня́ гее́нскаго. Те́мже помина́юще душеспаси́тельныя твоя́ по́двиги, с во́и Небе́сными похва́льная тебе́ вопие́м:

Ра́дуйся, ча́до, млеко́м благоче́стия напое́нное; ра́дуйся, о́вне, хле́бом прему́дрости упита́нный.

Ра́дуйся, моли́тве церко́вней от мла́да ма́терию науче́нный; ра́дуйся, у́треневавый Бо́гу во умиле́нии серде́чнем.

Ра́дуйся, на па́жити церко́вней собра́вый кри́ны благоче́стия; ра́дуйся, ра́лом любому́дрия искорени́вый страсте́й нече́стие.

Ра́дуйся, еле́ню, на го́ры богове́дения востеки́й; ра́дуйся, воды́ смиренному́дрия та́мо испи́вый.

Ра́дуйся, Варсоно́фие, О́птинскаго ста́рчества боголе́пное украше́ние.

Конда́к 2.

Се́рдце име́я любвеоби́льное, ни́щим и си́рым де́тем сострада́л еси́, о́тче Варсоно́фие. Па́мятуя, я́ко таковы́х е́сть Ца́рствие Небе́сное, угоще́ния и́м сла́дкая учрежда́л еси́, пи́щею земно́ю пита́я и́х телеса́, в ду́ши же и́х влага́я пресла́дкая Боже́ственная словеса́. Те́мже си́рыя де́ти, зря́ще о ни́х таково́е промышле́ние, Бо́гу, Пита́телю все́х, возсыла́ху хвалу́: Аллилу́иа.

И́кос 2.

В чи́не во́инстем служа́ оте́честву, о́браз благоче́стия ру́сскому во́инству бы́л еси́, открове́нием же свы́ше, я́ко апо́стол Па́вел, к по́чести вы́шняго зва́ния при́зван бы́л еси́. Таково́му о тебе́ промышле́нию Бо́жию чудя́щеся, си́це тебе́ вопие́м:

Ра́дуйся, христолюби́ваго во́инства до́блестный побо́рниче; ра́дуйся, о́птинскаго ангелоподо́бнаго полка́ му́дрый наста́вниче.

Ра́дуйся, оте́честву благомо́щное заступле́ние яви́вый; ра́дуйся, мона́шествующих духо́вным бра́нем иску́сно научи́вый.

Ра́дуйся, с Небесе́ Боже́ственным открове́нием облиста́нный; ра́дуйся, озаре́нием Небе́сным духо́вно преображе́нный.

Ра́дуйся, мечу́ я́рости Боже́ственныя на богопроти́вныя; ра́дуйся, щи́те духо́вный, о него́же сокруша́ются стре́лы разжже́нныя.

Ра́дуйся, Варсоно́фие, О́птинскаго ста́рчества боголе́пное украше́ние.

Конда́к 3.

Житие́ мирско́е благоче́стно упра́вив, о́тче Варсоно́фие, во́лю Боже́ственную о себе́ взыска́ти восхоте́л еси́. Те́мже пра́ведным Иоа́нном, па́стырем Кроншта́дтским, свяще́нство тебе́ предуказа́ся, и Гефсима́нским ста́рцем Варна́вою бра́к духо́вный предрече́ся, в не́мже ду́шу твою́ Жениху́ Христу́ уневе́стил еси́, поя́ Ему́: Аллилу́иа.

И́кос 3.

В ски́т Предте́чев прите́к, я́ко еле́нь жа́ждущий, покая́ния воды́ ища́, то́ю измы́л еси́ ти́ну страсте́й, ра́зум же духо́вный от богоно́сных ста́рцев О́птинских почерпа́яй, в во́зраст му́жа духо́внаго приспе́л еси́. Те́мже богоразу́мие твое́ похваля́юще, си́це тебе́ зове́м:

Ра́дуйся, от суе́т мирски́х, а́ки ла́нь от тене́т, устреми́выйся; ра́дуйся, я́ко на Иорда́н мы́сленный в ски́т Предте́чев притеки́й.

Ра́дуйся, богоно́сным ста́рцем, я́ко желе́зо ковачу́, ду́шу свою́ вручи́вый; ра́дуйся, послуша́нием, а́ки ключе́м, две́рь страсте́й затвори́вый.

Ра́дуйся, Боже́ственней во́ли после́дования возжеле́вый; ра́дуйся, на недви́жимем ка́мени смире́ния себе́ утверди́вый.

Ра́дуйся, посто́м и бде́нием главы́ змие́в сокруши́вый; ра́дуйся, А́нгельския си́лы раче́нием свои́м возвесели́вый.

Ра́дуйся, Варсоно́фие, О́птинскаго ста́рчества боголе́пное украше́ние.

Конда́к 4.

В чи́не а́нгельстем водвори́выйся в пу́стыни О́птинстей, я́ко броне́ю обложи́лся еси́ по́стническим житие́м, и ратобо́рством иску́сным низложи́л еси́ ко́зни диа́вольския, пе́снь побе́дную поя́ Бо́гу: Аллилу́иа.

И́кос 4.

Си́лою свы́ше препоя́сався, преподо́бне, и кре́ст на ра́мо взе́м и́ноческих скорбе́й, смиренному́дренно попра́л еси́ вся́ искуше́ния бесо́вская и к по́чести вы́шняго зва́ния победоно́сно поте́кл еси́. Те́мже вене́ц похва́л сплета́юще, си́це тебе́ вопие́м:

Ра́дуйся, святооте́ческим уче́нием, я́ко диади́мою, ра́зум увенча́вый; ра́дуйся, ангелоподо́бными доброде́тельми ду́шу украси́вый.

Ра́дуйся, и́ноческое житие́ серафи́мски пла́менне возлюби́вый; ра́дуйся, преда́ние богоно́сных ста́рцев я́ко ме́д духо́вный пи́вый.

Ра́дуйся, смиренному́дрия ка́мень краеуго́лен во глубине́ души́ утверди́вый; ра́дуйся, моли́тву, я́ко ме́ч духо́вный, трезве́нием изостри́вый.

Ра́дуйся, псалмопе́нием непреста́нным де́монская выше́ния смири́вый; ра́дуйся, трудолю́бными по́двиги хра́мину доброде́телей соверши́вый.

Ра́дуйся, Варсоно́фие, О́птинскаго ста́рчества боголе́пное украше́ние.

Конда́к 5.

Богоно́сному ста́рцу Анато́лию прилепи́выйся любо́вию душе́вною, и доброде́тельным его́ житие́м ду́шу свою́ снабди́в, я́ко ча́до возлю́бленное да́ры сыноположе́ния прия́л еси́ от него́ пребога́тыя, духодви́жною моли́твою благода́рно Бо́гу вопия́: Аллилу́иа.

И́кос 5.

Я́ко му́дрый па́стырь бразды́ правле́ния ски́та О́птинскаго прия́л еси́, и ста́до мона́шествующих духозла́чным уче́нием окорми́л еси́, те́мже бра́тия, ви́дяще благода́ть ста́рчества, на тебе́ почива́ющую, единогла́сно воззва́ша тебе́ такова́я:

Ра́дуйся, терпеливоду́шно понесы́й гоне́ния, я́ко ста́рец Ле́в; ра́дуйся, украше́нный смиренному́дрием, я́ко ста́рец Мака́рий.

Ра́дуйся, розго́, процве́тшая благослове́нием ста́рца Амвро́сия; ра́дуйся, ве́рный помо́щниче и же́зле ста́рости преподо́бнаго Ио́сифа.

Ра́дуйся, возлю́бленное ча́до ста́рца Анато́лия; ра́дуйся, духо́вный дру́же и сотаи́нниче ста́рца Некта́рия.

Ра́дуйся, богому́дрый упра́вителю ски́та по заве́том ста́рца Моисе́я; ра́дуйся, любвеоби́льный а́вво, воспита́вый Ни́кона испове́дника.

Ра́дуйся, Варсоно́фие, О́птинскаго ста́рчества боголе́пное украше́ние.

Конда́к 6.

Со́лнце Пра́вды предугото́ви тя́, я́ко стрелу́ избра́нну, и к темнонеи́стовым язы́ком тя́ устреми́. Ты́ же моли́твами свои́ми христолюби́вому во́инству на враги́ спобо́рствовал еси́, ра́неных во́ев Та́йнами церко́вными па́стырски снабдева́я. Те́мже сла́вит тя́ страна́ Росси́йская и Бо́гу побе́дно вопие́т: Аллилу́иа.

И́кос 6.

От восто́ка со́лнечнаго возвра́щся, добропобе́дне Варсоно́фие, нощебде́нныя своя́ возста́вил еси́ по́двиги, и я́ко по́лная луна́ доброде́тельми сия́я в нощи́, Амали́ка мы́сленнаго умертви́л еси́ смире́нными свои́ми к Бо́гу моле́ньми. Те́мже по́двиги твоя́ до́бльственныя восхваля́юще, велегла́сно тебе́ зове́м:

Ра́дуйся, стрело́ избра́нная, уязви́вшая дре́вняго зми́я; ра́дуйся, звездо́ Правосла́вия, озари́вшая наро́ды неве́рныя.

Ра́дуйся, христолюби́вому во́инству на враги́ соодоле́ние; ра́дуйся, церко́вными Та́йнами те́х укрепле́ние.

Ра́дуйся, покая́ния пропове́дниче радостотво́рный; ра́дуйся, исцеле́ний исто́чниче чудоде́йственный.

Ра́дуйся, я́ко моли́твою уврачева́л еси́ стра́ждущих; ра́дуйся, я́ко псалмопе́нием усмири́л еси́ вражду́ющих.

Ра́дуйся, Варсоно́фие, О́птинскаго ста́рчества боголе́пное украше́ние.

Конда́к 7.

Я́ко безкро́вное му́ченичество, житие́ мона́шеское соверши́в, дости́гл еси́ приста́нища безстра́стия. Сего́ ра́ди да́р проро́чества излия́ на тя́ Госпо́дь и я́ко свети́льник разсужде́ния поста́ви тя́ на све́щнице церко́внем, да све́тиши в грехо́вней нощи́ и заблу́ждшия ко стезя́м благоче́стия наста́виши, е́же сла́вити и́м Бо́га и вопи́ти Ему́: Аллилу́иа.

И́кос 7.

Бу́рю грехо́вную, иму́щую вско́ре сокруши́ти зе́млю ру́сскую, твои́ма духо́вныма очи́ма прозре́л еси́. Те́мже, я́ко но́вый проро́к, к покая́нию увеща́л еси́ приступи́ти лю́ди заблу́ждшия, ве́рныя же укрепля́л еси́ претерпе́ти досто́йно ско́рби гряду́щия. Сего́ ра́ди я́ко уте́шителя богодухнове́ннаго пое́м тя́ си́це:

Ра́дуйся, ма́стию Ду́ха Свята́го пома́занный проро́че; ра́дуйся, испо́лненный Боже́ственных открове́ний Небе́сный челове́че.

Ра́дуйся, духо́вным взо́ром сердца́ челове́ческая испыту́яй; ра́дуйся, покая́нием чистосерде́чным гре́шники врачу́яй.

Ра́дуйся, разсужде́ния духо́внаго светле́йшее обита́лище; ра́дуйся, Боже́ственных Та́ин досто́йное прия́телище.

Ра́дуйся, О́птинскаго ста́рчества чисте́йшее зерца́ло; ра́дуйся, наро́да ру́сскаго крепча́йшее забра́ло.

Ра́дуйся, Варсоно́фие, О́птинскаго ста́рчества боголе́пное украше́ние.

Конда́к 8.

Я́ко незло́биваго а́гнца во объя́тия своя́ прии́м прише́дшаго к тебе́ Ни́кона, предуста́вленнаго испове́дника О́птинскаго, предре́кл еси́ ему́, коли́ко и́мать пострада́ти о Христе́. Та́ко сотаи́нника в не́м обре́л еси́ и ученика́ благопослу́шнаго, и́же и ны́не не отлучи́вся от тебе́, но в го́рнем при́сно лику́я, пе́снь согла́сную пое́т с тобо́ю: Аллилу́иа.

И́кос 8.

Па́стырскую му́дрость восприи́м, богому́дре о́тче, о́вцы Христо́вы на зла́чных па́житех благода́ти упа́сл еси́, и слове́сным уче́нием твои́м, я́ко медото́чным питие́м, со́ль спаси́тельнаго пути́ препо́дал еси́ на сла́дость и́м. Сего́ ра́ди а́гнцы слове́сныя новому́ченическому ста́ду возрасти́л еси́, с ни́миже похвала́ми тя́ венча́ем си́ми:

Ра́дуйся, па́стырю незло́бивых а́гнцев; ра́дуйся, губи́телю неви́димых волко́в.

Ра́дуйся, кре́ст носи́вый, я́ко похвалу́ Христо́ву; ра́дуйся, пло́ть распя́вый со страстьми́ и похотьми́.

Ра́дуйся, новому́чеников О́птинских богодухнове́нное удобре́ние; ра́дуйся, испове́дником о́бразе в богозапове́данном терпе́нии.

Ра́дуйся, свята́го Ни́кона ве́нче златокова́нный; ра́дуйся, собо́ра О́птинскаго ка́меню богоизбра́нный.

Ра́дуйся, Варсоно́фие, О́птинскаго ста́рчества боголе́пное украше́ние.

Конда́к 9.

Ра́дость а́нгельская на Небеси́ яви́ся о житии́ твое́м святе́м, о́тче преподо́бне, де́моном же ско́рбь вели́ка бы́сть, егда́ умно́жил еси́ па́стырския твоя́ по́двиги. Те́мже мно́гия ду́ши от вла́сти де́монския тобо́ю свободи́вшася, в ли́це спаса́емых воспе́ша Бо́гу: Аллилу́иа.

И́кос 9.

Мудрецы́ ве́ка сего́ я́ко буесло́вящия обличи́л еси́, помышля́ющия о Творце́ свое́м я́ко не су́щем, чудоде́йствы же твои́ми торжество́ ве́ры показа́л еси́, егда́ разве́рзл еси́ слу́х глухонемо́му. Те́мже серде́чная на́ша ушеса́ отве́рзи ко слы́шанию сло́ва Бо́жия и приими́ похва́льная сия́ словеса́, от любве́ тебе́ приноси́мая:

Ра́дуйся, а́нгельския кре́пости испо́лненный подви́жниче; ра́дуйся, де́моном нанесы́й я́зву всегуби́тельную.

Ра́дуйся, ве́рным подава́яй светоза́рное просвеще́ние; ра́дуйся, разоря́яй тьму́ нечести́ваго неве́рия.

Ра́дуйся, Боже́ственных чуде́с изря́дный дарода́телю; ра́дуйся, богодосто́йное прия́телище благода́ти.

Ра́дуйся, его́же ра́ка я́ко исто́чник то́чит исцеле́ния; ра́дуйся, и́мже до ны́не творя́тся пресла́вная зна́мения.

Ра́дуйся, Варсоно́фие, О́птинскаго ста́рчества боголе́пное украше́ние.

Конда́к 10.

Ви́дя богоме́рзкое нече́стие ми́ра сего́ и хотя́ пре́лести у́глия угаси́ти, отве́рзл еси́ медоточи́вая уста́ твоя́ и сладкоглаго́ливых поуче́ний ре́ки источи́л еси́. Сего́ ра́ди гре́шницы отврати́шася от греха́, ве́рнии же к высоте́ боголюби́ваго устреми́шася благоче́стия, пе́снь сладча́йшую Бо́гу пою́ще: Аллилу́иа.

И́кос 10.

До́бре упа́сл еси́ ста́до мона́шествующих на па́житех животво́рных, и ми́ру яви́лся еси́ я́ко све́т вторы́й. Сего́ ра́ди па́стырскаго посеще́ния твоего́ про́сим, е́же изба́вити от лю́таго мироде́ржца ста́до твое́ и от преле́стных его́ се́тей. Да в кро́ве кри́л твои́х моли́твенных храни́ми, си́це тебе́ вопие́м:

Ра́дуйся, я́ко со́нмы мона́шествующих напита́л еси́ духо́вною пи́щею; ра́дуйся, я́ко мирски́я напои́л еси́ ева́нгельским млеко́м.

Ра́дуйся, благозву́чная цевни́це, доброде́тель целому́дрия воспева́яй; ра́дуйся, Предте́чева секи́ро, коре́ния страсте́й посеца́яй.

Ра́дуйся, стрело́ огневи́дная, порази́вшая возду́шных князе́й; ра́дуйся, мечу́ поостре́нный, сокруши́вый главы́ неви́димых змие́в.

Ра́дуйся, исто́чниче, к нему́же притека́ют жа́ждущия утеше́ния; ра́дуйся, огню́, и́мже попаля́ются хвра́стия сласте́й.

Ра́дуйся, Варсоно́фие, О́птинскаго ста́рчества боголе́пное украше́ние.

Конда́к 11.

Скорбьми́ безме́рными обложе́н бы́л еси́, я́ко терно́вым венце́м, поноше́ния претерпе́л еси́ и оклевета́ния, да́же до сме́рти кре́ст послуша́ния несы́й, в го́рний Иерусали́м восхо́д сво́й устроя́я. Те́мже страда́ния твоя́ воспева́юще, Бо́гу, укре́пльшему тя́, благода́рно пое́м: Аллилу́иа.

И́кос 11.

От пу́стыни твоея́ отгна́нный за́вистию диа́вола, в Старо-Голу́твине оби́тели я́ко прему́др вертогра́дарь водвори́лся еси́, в не́йже кри́ны прекра́сныя насади́в благоче́стия, в ра́йския оби́тели ду́хом отше́л еси́. Мо́щи же твоя́ святы́я О́птина пу́стынь, я́ко многоце́нное сокро́вище, в не́дро свое́ прия́т, и́миже красу́ется ны́не и во умиле́нии велегла́сно тебе́ вопие́т:

Ра́дуйся, О́птину пу́стынь я́ко благоцвету́щий вертогра́д возде́лавый; ра́дуйся, возрожде́ние в Голу́твину оби́тель я́ко ма́сличную ве́твь принесы́й.

Ра́дуйся, блаже́нство гони́мых пра́вды ра́ди стяжа́вый; ра́дуйся, кро́тостию Иису́совою и любо́вию враги́ победи́вый.

Ра́дуйся, го́лубе предо́брый, паря́й под се́нию креста́; ра́дуйся, я́ко в кро́ве кри́л твои́х ми́рствуют ча́да твоя́.

Ра́дуйся, иде́же е́сть те́ло твое́ свято́е, ту́ привита́ют духо́внии орли́; ра́дуйся, иде́же ублажа́ема па́мять твоя́, ту́ пребыва́еши ду́хом твои́м.

Ра́дуйся, Варсоно́фие, О́птинскаго ста́рчества боголе́пное украше́ние.

Конда́к 12.

Я́ко труба́ добропобе́дная, пропове́дует по́двиги твоя́ пу́стынь О́птинская, ста́рцы просла́вленная. В не́йже а́нгельски пожи́в и на Небеса́ взя́т бы́в, А́нгелом и собо́ру О́птинских отце́в вчини́лся еси́, с ни́ми поя́ Творцу́ всесли́чную пе́снь: Аллилу́иа.

И́кос 12.

Щи́т необори́мь е́сть предста́тельство твое́ за ны́, о́тче преподо́бне, и моли́твенное хода́тайство твое́ ме́ч е́сть духо́вный, бесо́в поража́яй. Сего́ ра́ди испроси́ на́м благода́ть у Всеми́лостиваго Царя́ Христа́ Бо́га, е́же возмощи́ на́м проти́витися все́м ко́знем врага́ и оде́янным во ору́жия све́та ста́ти, возвеща́юще тебе́ побе́дная сия́:

Ра́дуйся, побе́до в духо́вной на́шей бра́ни; ра́дуйся, ве́нче присноцвету́щий до́бре подвиза́ющимся.

Ра́дуйся, я́ко на мы́сленнаго Амали́ка ра́туеши с Небеси́; ра́дуйся, я́ко ва́рварская шата́ния упраждня́еши на земли́.

Ра́дуйся, неви́димое вспоможе́ние и́ноческому ополче́нию; ра́дуйся, бесо́в многоплаче́вное пораже́ние.

Ра́дуйся, я́ко тобо́ю О́птинское ста́рчество благоукраси́ся; ра́дуйся, я́ко тобо́ю житие́ на́ше помраче́нное просвети́ся.

Ра́дуйся, Варсоно́фие, О́птинскаго ста́рчества боголе́пное украше́ние.

Конда́к 13.

О непобеди́ме стратила́те Небе́снаго Царя́ Христа́, богому́дре ста́рче Варсоно́фие! Тебе́ ака́фистное пе́ние сие́ принося́ще, усе́рдно про́сим тя́: яви́ на́м благомо́щное твое́ заступле́ние и все́м, любо́вию тя́ почита́ющим, испроси́ у Го́спода оставле́ния грехо́в и а́нгельския кре́пости в по́двизех, да возмо́жем непреткнове́нно пе́ти Го́споду Си́л: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

Ли́к Небе́сный воспева́ет богоуго́дное твое́ житие́, зане́ от рожде́ния избра́н бы́л еси́ свети́ти ми́ру по́двиги благоче́стия. Еще́ во о́трочестве твое́м ста́рец богому́дрый прорече́ о тебе́, я́ко мно́гия ду́ши изба́виши от огня́ гее́нскаго. Те́мже помина́юще душеспаси́тельныя твоя́ по́двиги, с во́и Небе́сными похва́льная тебе́ вопие́м:

Ра́дуйся, ча́до, млеко́м благоче́стия напое́нное; ра́дуйся, о́вне, хле́бом прему́дрости упита́нный.

Ра́дуйся, моли́тве церко́вней от мла́да ма́терию науче́нный; ра́дуйся, у́треневавый Бо́гу во умиле́нии серде́чнем.

Ра́дуйся, на па́жити церко́вней собра́вый кри́ны благоче́стия; ра́дуйся, ра́лом любому́дрия искорени́вый страсте́й нече́стие.

Ра́дуйся, еле́ню, на го́ры богове́дения востеки́й; ра́дуйся, воды́ смиренному́дрия та́мо испи́вый.

Ра́дуйся, Варсоно́фие, О́птинскаго ста́рчества боголе́пное украше́ние.

Конда́к 1.

Избра́нный во́ине Христо́в и чудотво́рче, преподо́бне о́тче на́ш Варсоно́фие, и́же пра́ведным житие́м полки́ бесо́вския низложи́л еси́ и Ру́сь Святу́ю на стезя́х благоче́стия утверди́л еси́, похва́льная тебе́ прино́сим пе́ния. Ты́ же, я́ко име́я ве́лие дерзнове́ние ко Го́споду, от вся́ких на́с бе́д свободи́, любо́вию зову́щих:

Ра́дуйся, Варсоно́фие, О́птинскаго ста́рчества боголе́пное украше́ние.

Моли́тва пе́рвая.

О пречестна́я и свяще́нная главо́, Небе́снаго Иерусали́ма граждани́не, изря́дный уго́дниче Христо́в и вели́кий О́птинский чудотво́рче, преподо́бне о́тче Варсоно́фие! При́зри от го́рних высо́т на на́с, смире́нных и гре́шных, во умиле́нии серде́ц к тебе́ прибега́ющих, тебе́ бо моли́твенника благоприя́тнаго ве́мы ко Всеми́лостивому Бо́гу. Вознеси́ о на́с твоя́ святы́я моли́твы ко Престо́лу Человеколю́бца Го́спода, дабы́ не поги́бнути на́м со беззако́нии на́шими, но обрати́тися к покая́нию и исправле́нию, да про́чее вре́мя жития́ на́шего земна́го не в рабо́те греху́ и страсте́м, но в де́лании за́поведей Его́ святы́х и в благоче́стии провожда́ем, и со благо́ю наде́ждою дости́гнем кончи́ны на́шея. В ча́с же сме́ртный наипа́че яви́ся на́м, о́тче, засту́пник благи́й, ускори́ на моли́тву о на́с безпомо́щных и помози́ на́м ми́рную и благу́ю кончи́ну улучи́ти, Боже́ственных Та́инств прича́стну, гро́зная мыта́рства возду́шная безбе́дно прейти́ и унасле́довати го́рнее Ца́рство. Е́й, о́тче приснопа́мятный, не пре́зри на́с и не посрами́ упова́ния на́шего, но бу́ди о на́с предста́тель немо́лчный к Бо́гу. Па́стырю на́ш до́брый, упаси́ на́с бо́дренными твои́ми моли́твами и сохрани́ ненаве́тны от вся́каго зла́, да сла́вим неизрече́нное человеколю́бие Бо́га на́шего, Отца́ и Сы́на и Свята́го Ду́ха, и твое́ оте́ческое заступле́ние, во ве́ки веко́в. Ами́нь.

Моли́тва втора́я.

О свяще́нне во́ине и богому́дрый о́тче на́ш Варсоно́фие, О́птинскаго ста́рчества венцено́сный побо́рниче! Ты́ сла́ву ми́ра сего́ не возлюби́в, ниже́ по́чести и житие́ разсла́бленно, но во́инскую че́сть соблю́д до конца́ и земно́е три́знище оста́вив, вво́инился еси́ Царю́ Христу́ и со безпло́тными А́нгелы на де́моны ра́товал, и побе́ды по́чести прия́л еси́. Те́мже под твое́ предста́тельство, я́ко под кре́пкий щи́т, прибега́ем, и на лу́к моли́тв твои́х наде́ющеся, мо́лим тя́, о́тче преподо́бне: уте́ши ны́ я́ко оте́ц чадолюби́вый, и я́ко сыно́в на́с утверди́, облегча́я ско́рбь належа́щую, избавля́я от ну́жд ду́ши на́ша. Да́ждь на́м твоему́ житию́ после́довати и неукло́нно соблюсти́ преда́ния святы́х оте́ц, я́же ты́ запове́дал еси́ блюсти́ да́же до сме́рти. Е́й, о́тче, бу́ди на́м побо́рник в мы́сленных бра́нех на́ших, я́же веде́м со страстьми́ и ду́хи лука́выми, я́ко не́мощни есмы́ и неиску́сни. Ты́ же, я́ко иску́с послуша́ния проше́д и благода́ть ста́рчества унасле́довав, мо́жеши и на́м искуша́емым помощи́. Да под кро́вом моли́тв твои́х храни́ми, воспое́м и просла́вим Подвигополо́жника на́шего Го́спода Иису́са Христа́ со Отце́м и Животворя́щим Его́ Ду́хом всегда́, ны́не и при́сно, и во ве́ки веко́в. Ами́нь.