Конда́к 1.

Избра́нному свы́ше на по́двиги и́ночества преподо́бному отцу́ на́шему Зоси́ме похва́льное прино́сим пе́ние. Ты́ же, преподо́бне о́тче, предста́тельствуй у Престо́ла Бо́жия за на́с, многогре́шных ча́д твои́х, да зове́м ти́:

Ра́дуйся, преподо́бне о́тче Зоси́мо, благоче́стия подви́жниче.

И́кос 1

А́нгелом свы́ше предуста́влен бы́сть, преподо́бне о́тче Зоси́мо, на служе́ние Бо́гу, егда́, еще́ во чре́ве ти́ су́щу, оте́ц тво́й в нощи́ на моли́тве услы́ша гла́с: сы́на, и́же ти́ роди́тися и́мать, не учи́ мирски́м нау́кам, но зако́ну Бо́жию то́кмо. Те́мже, восхваля́юще тя́, зове́м:

Ра́дуйся, уго́дниче Бо́жий предызбра́нный; ра́дуйся, моли́твенниче и засту́пниче, от Бо́га на́м дарова́нный.

Ра́дуйся, я́ко житие́м оте́ческим внима́л еси́; ра́дуйся, я́ко ду́шу свою́ сло́вом Бо́жиим пита́л еси́.

Ра́дуйся, сокро́вище вы́шних разуме́ний; ра́дуйся, научи́выйся исполне́нию Боже́ственных веле́ний.

Ра́дуйся, у пеще́р преподо́бнаго Авраа́мия Смоле́нскаго воспита́нный; ра́дуйся, послуша́ния и моли́твы де́лателю неуста́нный.

Ра́дуйся, преподо́бне о́тче Зоси́мо, благоче́стия подви́жниче.

Конда́к 2.

Ве́дая от ю́ности, я́ко прехо́дит о́браз ми́ра сего́, о́тче Зоси́мо, отре́клся еси́ су́етнаго жития́, служе́нию царю́ земно́му предпоче́т служе́ние Царю́ Небе́сному, да со все́ми святы́ми вопие́ши Бо́гу: Аллилу́иа.

И́кос 2.

Ра́зум и́стинный от Бо́га свы́ше восприя́л еси́, егда́ не прельсти́ся име́нием ве́лиим, и услы́шал еси́ гла́с Бо́жий, глаго́лющ, я́ко путе́м и́ноческим тещи́ и́маши. Те́мже и бога́тство су́етное нивочто́же вмени́л еси́, мы́ же зове́м ти́:

Ра́дуйся, суете́ мирсте́й не подклони́выйся; ра́дуйся, о Бо́зе Спа́се твое́м возвесели́выйся.

Ра́дуйся, име́ние ве́лие ра́ди Бо́га отве́ргий; ра́дуйся, пу́ть те́сный, и́мже не мно́зи ше́ствуют, избра́вый.

Ра́дуйся, я́ко нищету́ во́льную Го́спода ра́ди предпоче́л еси́; ра́дуйся, я́ко бога́тство бла́гости Бо́жия восприя́л еси́.

Ра́дуйся, пре́жде всего́ Ца́рствия Небе́снаго иска́вый; ра́дуйся, мно́ги труды́ любве́ ра́ди ко Го́споду подъя́вый.

Ра́дуйся, преподо́бне о́тче Зоси́мо, благоче́стия подви́жниче.

Конда́к 3.

Си́лою Бо́жиею свы́ше осене́нный, ве́сь у́м сво́й, всю́ ду́шу и се́рдце устреми́л еси́ на служе́ние Бо́гу в зва́нии и́ночестем, воспева́я Ему́: Аллилу́иа.

И́кос 3.

Ре́вность по Бо́зе восприи́м, оста́вил еси́ ми́р и я́же в ми́ре, ко отце́м пусты́нником в леса́ Ро́славльския прите́кл еси́. И жития́ подви́жническаго взыску́я, всего́ себе́ ста́рцу Васили́ску пре́дал еси́, да послуша́нием и отверже́нием себе́ Ца́рство Бо́жие приобря́щеши, сего́ ра́ди вопие́м ти́ такова́я:

Ра́дуйся, стро́гости жития́ пусты́нническаго поревнова́вый; ра́дуйся, пло́д послуша́ния и терпе́ния до́бре показа́вый.

Ра́дуйся, благослове́нием ста́рца Адриа́на в по́двизех утвержде́нный; ра́дуйся, отверже́ния себе́ сама́го де́лателю усе́рдный.

Ра́дуйся, богому́дрых наста́вник ре́вностный учениче́; ра́дуйся, отце́в добротолю́бия богоно́сный сонасле́дниче.

Ра́дуйся, прее́мник и́стиннаго ста́рчества Бо́гом показа́нный; ра́дуйся, от ча́д преподо́бнаго Паи́сия о́ное восприе́мый.

Ра́дуйся, преподо́бне о́тче Зоси́мо, благоче́стия подви́жниче.

Конда́к 4.

Ве́дый преподо́бный Васили́ск, я́ко не подоба́ет вступа́ти в по́двиги пустынножи́тельства не испыта́нным пре́жде в и́ночестем о́бщем житии́, та́ко упра́ви тя́, о́тче Зоси́мо, да с со́нмом и́нок вопие́ши Бо́гу: Аллилу́иа.

И́кос 4.

Ста́рцу Васили́ску повину́яся, прите́кл еси́ во оби́тель Коне́вскую и та́мо в послуша́нии у ста́рца Адриа́на среди́ бра́тии пребы́л еси́. Те́мже, удивля́ющеся трудо́м твои́м и вну́тренним боре́нием во оби́тели се́й, зове́м:

Ра́дуйся, ре́вность в тя́жцех труде́х яви́вый; ра́дуйся, послуша́ние ста́рцу твоему́ сохрани́вый.

Ра́дуйся, кро́тостию, зло́ препобежда́ющею, себе́ украси́вый; ра́дуйся, пло́д пра́вды, соу́з доброде́телей в себе́ возрасти́вый.

Ра́дуйся, я́ко терпе́нием твои́м любо́вь в се́рдцы возже́гл еси́; ра́дуйся, я́ко тщесла́вие дале́че от себе́ отгна́л еси́.

Ра́дуйся, уче́нием святооте́ческим внима́вый; ра́дуйся, па́че все́х бога́тств нищету́ Христо́ву восприе́мый.

Ра́дуйся, преподо́бне о́тче Зоси́мо, благоче́стия подви́жниче.

Конда́к 5.

Равноа́нгельнаго жития́ взыска́в, преподо́бне о́тче, всено́щными бде́нии, труды́, же́сткия власяни́цы ноше́нием пло́ть свою́ смири́л еси́, ду́хом горя́ и воспева́я Бо́гу: Аллилу́иа.

И́кос 5.

Ве́дая, я́ко благоче́стие на вся́ поле́зно е́сть, о́тче Зоси́мо, святы́х оте́ц уче́нию прилежа́л еси́, наипа́че же о моли́тве серде́чней, его́же и пове́дал еси́ ста́рцу твоему́ Васили́ску. Мы́ же, не иму́щии ре́вности о таково́м де́лании, но твои́м заступле́нием у Бо́га испроси́ти ю́ наде́ющиися, зове́м ти́:

Ра́дуйся, при нача́ле по́двига твоего́ ре́вность по Бо́зе показа́вый; ра́дуйся, до конца́ жития́ твоего́ сию́ удержа́вый.

Ра́дуйся, я́ко непреста́нно в моли́тве пребыва́л еси́; ра́дуйся, я́ко чистоту́ по́мыслов от Бо́га получи́л еси́.

Ра́дуйся, я́ко рукоде́лием многоразли́чным прилежа́л еси́; ра́дуйся, я́ко те́ми мно́гих бра́тий напита́л еси́.

Ра́дуйся, к трезве́нию ве́рныя приводя́й; ра́дуйся, росо́ю благода́ти ду́ши на́ша исполня́яй.

Ра́дуйся, преподо́бне о́тче Зоси́мо, благоче́стия подви́жниче.

Конда́к 6.

Ди́внии подви́жницы оби́тели Коне́вския яви́шася святи́и Зоси́ма и Васили́ск, я́ко те́х ра́ди мно́зии лю́дие притека́ху в ню́. Оба́че не восхоте́ша преподо́бнии сла́вы и многолю́дства, но то́чию жития́ безмо́лвнаго в пусты́ни, да та́мо воспою́т Бо́гу: Аллилу́иа.

И́кос 6.

Ве́рнии де́лателие послуша́ния пребы́ша преподо́бнии Зоси́ма и Васили́ск, егда́ испо́лниша благослове́ние ста́рца своего́ Адриа́на пребы́ти с ни́м во оби́тели Коне́встей, а́ще и вельми́ жела́ша жития́ пусты́ннаго. По отше́ствии же того́, о́тче Зоси́мо, во смире́нии от служе́ния игу́менскаго уклони́лся еси́, да лу́чшее в пусты́нном безмо́лвии улучи́ши. Те́мже ти́ зове́м:

Ра́дуйся, от ста́рца Васили́ска сотаи́нником нарече́нный; ра́дуйся, в противостоя́нии вою́ющим на ны́ страсте́м и́ноче соверше́нный.

Ра́дуйся, сла́дость безмо́лвия пусты́ннаго вкуси́вый; ра́дуйся, посто́м и воздержа́нием пло́ть твою́ ду́хови покори́вый.

Ра́дуйся, показа́вый сла́вныя над ми́ром, пло́тию и диа́волом побе́ды; ра́дуйся, в чистоте́ сохрани́вый мона́шеския обе́ты.

Ра́дуйся, я́ко благо́е и́го Госпо́дне с любо́вию поне́сл еси́; ра́дуйся, я́ко сего́ ра́ди кро́ток и смире́н се́рдцем яви́лся еси́.

Ра́дуйся, преподо́бне о́тче Зоси́мо, благоче́стия подви́жниче.

Конда́к 7.

Во́лю Бо́жию о ме́сте пусты́ннаго пребыва́ния взыску́юще, мно́гая ме́ста испыта́ша святи́и Зоси́ма и Васили́ск, оба́че не бы́сть во́ля Бо́жия, да поки́нут ста́рцы страну́ Росси́йскую. О се́м мы́, ра́дующеся, вопие́м Бо́гу: Аллилу́иа.

И́кос 7.

Свети́ла вели́кая яви́стеся земли́ Сиби́рстей, преподо́бнии Зоси́мо и Васили́сче, егда́ на безмо́лвное жи́тельство та́мо пресели́стеся. Кто́ бо исчи́слит лише́ния и боре́ния ва́ша, бде́ния же, и злострада́ния, я́же та́мо пребы́ша ва́м? Ты́ же, о́тче Зоси́мо, томи́мь вельми́ искуше́нии диа́вольскими, проти́ву и́мене Бо́жия воздвиза́емыми, от ста́рца Васили́ска укрепля́емь, вся́ претерпе́л еси́, вя́щшую любо́вь ко Го́споду стяжа́в. Сего́ ра́ди вопие́м ти́:

Ра́дуйся, пусты́нниче соверше́нный, стре́лы разжже́нныя диа́вольския угаси́вый; ра́дуйся, непреста́нным призыва́нием и́мене Иису́сова бесо́вския полки́ порази́вый.

Ра́дуйся, безмо́лвия рачи́телю, пусты́ню духо́вно уплодоноси́вый; ра́дуйся, подви́жническим житие́м твои́м сию́ просла́вивый.

Ра́дуйся, мно́гажды от немину́емыя сме́рти си́лою Бо́жиею сохране́нный; ра́дуйся, сла́ву Бо́гу за вся́ воздая́й, подви́жниче смире́нный.

Ра́дуйся, созида́ния и возстановле́ния святы́х оби́телей до́брый ревни́телю; ра́дуйся, чи́на жития́ и́ноческаго в те́х благи́й насади́телю.

Ра́дуйся, преподо́бне о́тче Зоси́мо, благоче́стия подви́жниче.

Конда́к 8.

Провозве́стницы пути́ у́мнаго де́лания яви́шася в земли́ Ру́сской преподо́бнии Зоси́ма и Васили́ск, егда́ в безмо́лвии тому́ прилежа́ще, воспе́ша Бо́гу немо́лчную пе́снь: Аллилу́иа.

И́кос 8.

Просия́ житие́ ва́ше, отцы́ преподо́бнии Зоси́мо и Васили́сче, не в Росси́и то́чию, но и дале́че су́щим, во о́браз жития́ все́м в пусты́ни хотя́щим спасти́ся. Те́мже и после́дующии подвиго́м ва́шим, тобо́ю, о́тче Зоси́мо, изложе́нным, пло́д мно́г принесо́ша, восхваля́юще тя́ си́це:

Ра́дуйся, благода́тная де́йствия моли́твы у́мныя списа́вый; ра́дуйся, по́двиги сомоли́твенника твоего́ ми́ру возвести́вый.

Ра́дуйся, я́ко назида́нием твои́м ве́ра мно́гих утверди́ся; ра́дуйся, я́ко о уче́нии твое́м чи́н и́ноческий возвесели́ся.

Ра́дуйся, дре́во благопло́дное, при вода́х пусты́нных возраще́нное; ра́дуйся, предста́телю на́ш пред Бо́гом, равноа́нгельное житие́ показа́вый.

Ра́дуйся, ве́лие утеше́ние Ду́ха Свята́го стяжа́вый; ра́дуйся, по кончи́не твое́й Ца́рство Небе́сное улучи́вый.

Ра́дуйся, преподо́бне о́тче Зоси́мо, благоче́стия подви́жниче.

Конда́к 9.

Во́ли Бо́жией повину́яся, прите́кшия к тебе́ сестры́ в послуша́нии подвиза́тися прия́л еси́. О се́м и возда́л еси́ сла́ву Бо́гу ку́пно со ста́рцем Васили́ском, я́ко обрета́ются ду́ши, жела́ющия послужи́ти Тому́ еди́ному. Ты́я же и до дне́сь притека́ют под кро́в оби́тели твоея́, вопию́ще: Аллилу́иа.

И́кос 9.

Мно́гия труды́ подъя́л еси́, о́тче Зоси́мо, в устрое́нии ду́ш се́стр, вве́рившихся руковожде́нию твоему́, наипа́че же ско́рби и гоне́ния непра́ведная. Ты́ же вся́ сия́ до конца́ претерпе́л еси́, да устро́иши спасе́ние себе́ и приходя́щих к тебе́. Мы́ же ве́дуще, я́ко сего́ ра́ди мзда́ твоя́ мно́га на Небесе́х, вопие́м ти́:

Ра́дуйся, изгна́ние пра́вды ра́ди претерпе́вый; ра́дуйся, терпе́нием твои́м на́с наста́вивый.

Ра́дуйся, в кро́тости и смире́нии святы́м мно́гим подража́вый; ра́дуйся, о́браз, ка́ко подоба́ет претерпева́ти поноше́ние и гоне́ние, на́м оста́вивый.

Ра́дуйся, я́ко моли́твами твои́ми сро́дницы твои́ в чи́не и́ночестем Бо́гу послужи́ша; ра́дуйся, я́ко мно́гия сестры́ подража́ти и́м благопоспеши́ша.

Ра́дуйся, оби́тель во и́мя Одиги́трии основа́вый Бо́жиим смотре́нием; ра́дуйся, я́ко та́ и до ны́не жела́ющим рабо́тати Бо́гови приста́нище е́сть спасе́ния.

Ра́дуйся, преподо́бне о́тче Зоси́мо, благоче́стия подви́жниче.

Конда́к 10.

От ю́ности твоея́, о́тче Зоси́мо, де́вственное житие́ возлюби́л еси́, в посте́ и моли́твах пребыва́я и благоугожда́я Бо́гови, во е́же бы́ти тебе́ освяще́нным сосу́дом Ду́ха Свята́го, все́льшагося в чи́стое се́рдце твое́ и воздыха́нии неизглаго́ланными научи́вшаго тя́ благоприя́тно пе́ти: Аллилу́иа.

И́кос 10.

Стена́ неруши́мая и Путеводи́тельница ди́вная яви́ся Ма́терь Бо́жия во все́м житии́ твое́м, преподо́бне о́тче. Те́мже и пре́жде успе́ния твоего́ проре́кл еси́ сестра́м оби́тели своея́: Ма́терь Бо́жия, Е́йже а́з вручи́х ва́с и всю́ оби́тель сию́, просла́вит и́мя Свое́ на ме́сте се́м и удиви́т на ва́с ми́лость Свою́. Мы́ же, сбытие́ сего́ зря́ще, зове́м:

Ра́дуйся, Ма́тере Бо́жия благогове́йный служи́телю; ра́дуйся, оби́тели и́ноческия во и́мя Ея́ основа́телю.

Ра́дуйся, Пресвяты́я Богоро́дицы покро́вом осене́нный; ра́дуйся, все́ упова́ние твое́ на Цари́цу Небе́сную возложи́вый.

Ра́дуйся, в ско́рбех и ра́достех во вся́ дни́ своя́ к Присноде́ве прибега́вый; ра́дуйся, по отше́ствии твое́м от жития́ сего́ Бо́гом и людьми́ просла́вленный.

Ра́дуйся, я́ко в го́рний Иерусали́м благо́ю Путеводи́тельницею упра́влен бы́л еси́; ра́дуйся, я́ко сего́ ра́ди все́м ше́ствующим к Небеси́ помо́щник от Бо́га яви́лся еси́.

Ра́дуйся, преподо́бне о́тче Зоси́мо, благоче́стия подви́жниче.

Конда́к 11.

Пе́ние умиле́нное прино́сим ти́, о́тче Зоси́мо, и всеусе́рдно про́сим: научи́ ны блюсти́ себе́ от ожесточе́ния серде́чнаго, от разоре́ния единоду́шия и от охлажде́ния дружелю́бия, да пребу́дем в любви́ Бо́жией, я́же о Христе́ Иису́се, и со все́ми святы́ми, угоди́вшими Бо́гу, сподо́бимся воспева́ти: Аллилу́иа.

И́кос 11.

Спаси́тельнаго де́лания наста́вник многому́дрый вои́стинну яви́лся еси́, богоно́сне о́тче Зоси́мо, ты́ бо в писа́ниих твои́х о де́лании духо́внем возвести́л еси́, о стяжа́нии благода́ти Всесвята́го Ду́ха и творе́нии моли́твы Иису́совы. Мы́ же тя́, в бде́нии и моли́тве подвиза́вшагося, до́ндеже Го́сподеви пре́дал еси́ святу́ю ду́шу твою́, воспева́ем:

Ра́дуйся, богому́дрыя писа́ния до́бре оста́вивый на́м в до́брое назида́ние; ра́дуйся, посо́бниче на́шему в терпе́нии и моли́тве возраста́нию.

Ра́дуйся, пра́здности и́щущих и труда́ бе́гающих обличи́телю; ра́дуйся, о стяжа́нии таковы́ми доброде́телей и́ноческих нелицеприе́мный попечи́телю.

Ра́дуйся, ре́вностию о де́лании моли́твеннем на́с обогаща́яй; ра́дуйся, да́ры бла́гости и кро́тости на́с преобража́яй.

Ра́дуйся, я́ко подви́жник иску́сен пребы́л еси́; ра́дуйся, я́ко о́браз пра́ваго прохожде́ния мона́шескаго жития́ яви́л еси́.

Ра́дуйся, преподо́бне о́тче Зоси́мо, благоче́стия подви́жниче.

Конда́к 12.

Благода́ти Боже́ственныя сосу́д яви́лся еси́, преподо́бне, егда́ а́ще и неду́гом ве́лиим одержи́мь бя́ше, непреста́нную моли́тву твори́л еси́, вопия́ Бо́гу: Аллилу́иа.

И́кос 12.

По́двигом до́брым подвиза́яся, о́тче Зоси́мо, тече́ние соверши́л еси́. Те́мже и преходя́ от ве́ка сего́ преле́стнаго, ре́к, я́ко в наде́жде умира́еши, восприя́л еси́ вене́ц пра́вды, его́же угото́ва Бо́г лю́бящим Его́. Мы́ же, упова́юще на предста́тельство твое́ о на́с гре́шных ко Го́споду, вопие́м ти́:

Ра́дуйся, тече́ние жития́ земна́го до́бре соверши́вый; ра́дуйся, обетова́нная Бо́жия непрело́жне получи́вый.

Ра́дуйся, я́ко благоче́стия лампа́ду возже́гл еси́; ра́дуйся, чистоты́ ангелоподо́бныя побо́рниче.

Ра́дуйся, богому́дрыми писа́нии твои́ми на́с гре́шных назида́яй; ра́дуйся, благода́тию моли́тв твои́х на́с утеша́яй и увеселя́яй.

Ра́дуйся, о́бразе благи́й, и́ночествующим от Бо́га дарова́нный; ра́дуйся, все́м призыва́ющим тя́ моли́твенниче непреста́нный.

Ра́дуйся, преподо́бне о́тче Зоси́мо, благоче́стия подви́жниче.

Конда́к 13.

О преподо́бне о́тче Зоси́мо, ны́не предстоя́й у Престо́ла Бо́жия, моли́ся за на́с, гре́шных и недосто́йных ча́д твои́х, да моли́твами твои́ми изба́вльшеся от страсте́й диа́вольских, вою́ющих на ду́ши на́ша, сподо́бимся неосужде́нно предста́ти пред Го́сподем и в невече́рнем дни́ Ца́рствия Его́ взыва́ти: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1

А́нгелом свы́ше предуста́влен бы́сть, преподо́бне о́тче Зоси́мо, на служе́ние Бо́гу, егда́, еще́ во чре́ве ти́ су́щу, оте́ц тво́й в нощи́ на моли́тве услы́ша гла́с: сы́на, и́же ти́ роди́тися и́мать, не учи́ мирски́м нау́кам, но зако́ну Бо́жию то́кмо. Те́мже, восхваля́юще тя́, зове́м:

Ра́дуйся, уго́дниче Бо́жий предызбра́нный; ра́дуйся, моли́твенниче и засту́пниче, от Бо́га на́м дарова́нный.

Ра́дуйся, я́ко житие́м оте́ческим внима́л еси́; ра́дуйся, я́ко ду́шу свою́ сло́вом Бо́жиим пита́л еси́.

Ра́дуйся, сокро́вище вы́шних разуме́ний; ра́дуйся, научи́выйся исполне́нию Боже́ственных веле́ний.

Ра́дуйся, у пеще́р преподо́бнаго Авраа́мия Смоле́нскаго воспита́нный; ра́дуйся, послуша́ния и моли́твы де́лателю неуста́нный.

Ра́дуйся, преподо́бне о́тче Зоси́мо, благоче́стия подви́жниче.

Конда́к 1.

Избра́нному свы́ше на по́двиги и́ночества преподо́бному отцу́ на́шему Зоси́ме похва́льное прино́сим пе́ние. Ты́ же, преподо́бне о́тче, предста́тельствуй у Престо́ла Бо́жия за на́с, многогре́шных ча́д твои́х, да зове́м ти́:

Ра́дуйся, преподо́бне о́тче Зоси́мо, благоче́стия подви́жниче.

Моли́тва.

О вели́кий ста́рче, преподо́бне о́тче на́ш Зоси́мо! Кто́ изглаго́лет по́двиги твоя́: безмо́лвие, бде́ние, моли́тву непреста́нную, скорбе́й терпе́ние, сле́зы покая́ния и все́х проще́ние, во́ли Бо́жией всеце́лое преда́ние? Ты́ от ю́ности жи́знь свою́ Христу́ посвяти́л еси́, име́ние разда́в, во оби́тель пусты́нную всели́лся еси́. Мно́гим де́вам, Бо́гу уневе́стившимся, па́че отца́ ты́ бы́л еси́, духо́вно и́х окормля́я и ко спасе́нию наставля́я. И ны́не мо́лим тя́, святы́й уго́дниче Христо́в, мы́ недосто́йнии: бу́ди на́м помо́щник и засту́пник, оби́тели же, тобо́ю основа́нней, утвержде́ние и покро́в; научи́ на́с во́лю Бо́жию твори́ти, оби́ды проща́ти, ско́рби и боле́зни благоду́шно терпе́ти, да сподо́бимся и мы́ моли́твами твои́ми в ми́ре, любви́ и покая́нии земны́й пу́ть на́ш соверши́ти и Ца́рствия Небе́снаго дости́гнути, иде́же ты́ со все́ми святы́ми воспева́еши непреста́нно Бо́га во Святе́й Тро́ице сла́вимаго, Отца́, и Сы́на, и Свята́го Ду́ха. Ами́нь.