Конда́к 1.

Избра́нный подви́жниче, преподо́бне о́тче на́ш Зоси́мо, прославля́я ны́не твою́ па́мять, мо́лим тя́ приле́жно, стоя́ у престо́ла Пресвяты́я Тро́ицы, помяни́ на́с чту́щих святу́ю па́мять твою́, и, ожида́ющих ми́лости Бо́жией по твоему́ хода́тайству, вопию́щих:

Ра́дуйся, Зоси́мо преподо́бне, уго́дниче Христо́в и чудотво́рче.

И́кос 1.

А́нгела земна́го и небе́снаго челове́ка яви́ тебе́ все́х Созда́тель и благопло́дную ду́шу твою́ из мла́да прови́дев, преподо́бне Зоси́мо, научи́ все́х вопи́ти тебе́ си́це:

Ра́дуйся, чи́стое Свята́го Ду́ха вмести́лище. Ра́дуйся, а́нгельским лико́в собесе́дниче.

Ра́дуйся, дре́во благосенноли́ственное, при исхо́дищах во́д насажде́нное. Ра́дуйся, я́ко до ны́не оби́льную реку́ исцеле́ний источа́еши.

Ра́дуйся, и на́с ча́д твои́х в моли́твах не оставля́еши. Ра́дуйся, Зоси́мо преподо́бне, уго́дниче Христо́в и чудотво́рче.

Конда́к 2.

Ви́дев Сердцеве́дец Госпо́дь добро́ту души́ твоея́ и чистоту́ помышле́ний, подаде́ ти́ кре́пость и си́лу проти́ву ста́ти искуше́ниям от ми́ра, пло́ти и диа́вола воздвиза́емым; да отве́ргнем суету́ ми́ра и земны́х все́х попече́ний; невозбра́нным по́мыслом и чи́стым се́рдцем Бо́гу еди́ному порабо́таем, воспева́я Его́: Аллилу́иа.

И́кос 2.

Ра́зум небе́сный тебе́ дарова́ся, свя́тче Бо́жий. От ю́ности твоея́ не престая́ помышля́ти о небе́сном, оста́вил еси́ до́м о́тчий, Ца́рствия Бо́жия ра́ди и пра́вды Его́. Сего́ ра́ди приими́ от на́с похвалы́ сия́:

Ра́дуйся, мирски́я суеты́ отреши́выйся. Ра́дуйся, небе́снаго оте́чества пла́менно вожделе́вый.

Ра́дуйся, Христа́ все́м се́рдцем возлюби́вый. Ра́дуйся, сто́лпе благоче́стия непоколеби́мый.

Ра́дуйся, Зоси́мо преподо́бне, уго́дниче Христо́в и чудотво́рче.

Конда́к 3.

Да не зло́бою измени́тися чистота́ твоего́ блага́го ра́зума, богому́дре Зоси́мо, та́йно бо от при́сных отше́л еси́ во святу́ю оби́тель блаже́ннаго Корни́лия, да та́мо свобо́дь от мирски́х суе́т, воспе́л еси́ Бо́гу: Аллилу́иа.

И́кос 3.

Име́яй всегда́ пред оча́ми твои́ми Го́спода, ве́сь преда́лся еси́ Ему́. Ви́дев же доброде́тельное житие́ твое́, преподо́бне Корни́лие и бра́тия прославля́ху о тебе́ Бо́га зову́ще:

Ра́дуйся, во́лю твою́ во́ле Бо́жией сочета́вый. Ра́дуйся, ве́рою благода́ть позна́вый.

Ра́дуйся, благода́тию доброде́тели стяжа́вый. Ра́дуйся, всего́ себе́ ни́щим отда́вый.

Ра́дуйся, в ми́лости неизме́нный. Ра́дуйся, врачу́ безме́здный.

Ра́дуйся, немощны́м я́ко себе́ послужи́вый. Ра́дуйся, и́стинно Христу́ угоди́вый.

Ра́дуйся, Зоси́мо преподо́бне, уго́дниче Христо́в и чудотво́рче.

Конда́к 4.

Бу́ри жите́йския избега́я, всели́лся еси́ на пусты́ннем о́строве езе́ра Ворбозо́мскаго, да еди́н Еди́ному Бо́гу послу́жиши и воспое́ши Ему́: Аллилу́иа.

И́кос 4.

Слы́шавше окре́стнии жи́телие твое́ прише́ствие на пусты́нный о́стров, прихожда́ху к тебе́, о́ви наста́витися, о́ви жи́тельствовати с тобо́ю, мы́ же, похваля́я твое́ прише́ствие, вопие́м:

Ра́дуйся, та́йнаго веле́ния Бо́жия послу́шавый. Ра́дуйся, Авраа́ма ве́ре поревнова́вый.

Ра́дуйся, во страну́ Белоезе́рскую пу́ть сво́й благоче́стне упра́вивый. Ра́дуйся, оби́тель и́ноческую та́мо созда́ти зело́ восхоте́вый.

Ра́дуйся, хра́мы Бо́жии в не́й боголе́пно устро́ивый. Ра́дуйся, Богоро́дицы заступле́нию и покро́ву оби́тель твою́ вда́вый.

Ра́дуйся, Зоси́мо преподо́бне, уго́дниче Христо́в и чудотво́рче.

Конда́к 5.

Я́ко светоза́рная звезда́ ше́ствовал еси́ уго́дниче Бо́жий, от си́лы в си́лу возраста́я, немо́лчно вопия́ Всеси́льному Бо́гу: Аллилу́иа.

И́кос 5.

Ви́дев вра́г спасе́ния на́шего оби́тель твою́ до́бре устроя́ему от тебе́, преподо́бне о́тче, воздви́же на тя́ свои́ ко́зни. Ты́ же все́ препобежда́я, недви́жим в упова́нии пребы́л еси́. Сего́ ра́ди услы́ши от на́с гла́с хвале́ния сицева́я:

Ра́дуйся, а́ки кро́ткий а́гнец вся́ терпе́вый. Ра́дуйся, с небесе́ утеше́ние прие́мый.

Ра́дуйся, любо́вию Христо́вою ко́зни вра́жия победи́вый. Ра́дуйся, мно́ги на пути́ и́ноческаго жития́ наста́вивый.

Ра́дуйся, я́ко сы́й на земли́ я́ве с небожи́тели бесе́довал еси́.

Ра́дуйся, Зоси́мо преподо́бне, уго́дниче Христо́в и чудотво́рче.

Конда́к 6.

Пропове́дует при́сно страна́ Росси́йская по́двиги и труды́ твоя́ преподо́бне. О́бласть же Белоезе́рская све́тло красу́ется, стяжа́в тя́ помо́щника и покрови́теля себе́ осо́бне, поя́: Аллилу́иа.

И́кос 6.

Возсия́л еси́ преподо́бне, я́ко звезда́ Богосве́тлая на о́строве езе́ра Ворбозо́мскаго, на не́м же оби́тель Благове́щения Пресвяты́я Богоро́дицы созда́л еси́, в не́й же под покро́вом Влады́чицы почи́л еси́. Услы́ши, преподо́бне о́тче на́ш Зоси́мо, от на́с ча́д твои́х приноси́мыя похвале́ния сия́:

Ра́дуйся, гра́ду Кири́ллову прише́ствием твои́м благослове́ние от Го́спода ниспосла́вый. Ра́дуйся, жи́телем ве́си Белоезе́рския свети́льник пресве́тел бы́вый.

Ра́дуйся, оби́тель и́ноческую та́мо до́бре устро́ивый. Ра́дуйся, ти́хое в не́й приста́нище обреты́й.

Ра́дуйся, при́сно в не́й в труде́х и моли́твах пребыва́вый.

Ра́дуйся, Зоси́мо преподо́бне, уго́дниче Христо́в и чудотво́рче.

Конда́к 7.

Посто́м и моли́твою пло́ть твою́ ду́хови порабо́тил еси́ и во Сла́ву Бо́жию духо́вне пожи́л еси́, сего́ ра́ди ны́не предстои́ши Престо́лу Пресвяты́я Тро́ицы, вы́ну воспева́я пе́снь: Аллилу́иа.

И́кос 7.

Но́вую показа́ ми́лость рабо́м свои́м Человеколю́бец Госпо́дь, егда́ благоволи́ просла́вити тя́ и яви́ти в тебе́ благода́ть Свою́ чудотворя́щу, мы́ же таково́му промышле́нию Бо́жию ра́дующеся благода́рне вопие́м:

Ра́дуйся, вмести́лище благода́ти Бо́жией. Ра́дуйся, сосу́де Бо́жий избра́нный.

Ра́дуйся, чудотво́рче преди́вный. Ра́дуйся, гре́шных к покая́нию воззыва́яй.

Ра́дуйся, за усо́пших предста́тельствующий. Ра́дуйся, душе́вных и теле́сных неду́гов на́ших цели́телю.

Ра́дуйся, Зоси́мо преподо́бне, уго́дниче Христо́в и чудотво́рче.

Конда́к 8.

Стра́нно бе́ ви́де ти́ ка́ко ста́рец пусты́нник на безмо́лвном о́строве собра́ мно́зи и́ночествующие, и безмо́лвная пусты́ня яви́ся учи́лищем благоче́стия все́м и́щущим Го́спода и воспева́ющим: Аллилу́иа.

И́кос 8.

Всего́ себе́ на слу́шание вда́л еси́ о́тче. Обре́лся еси́ ско́рый помо́щник, призыва́ющих и́мя твое́, те́мже приими́ от на́с моле́ние сие́:

Ра́дуйся, исто́чниче исцеле́ний. Ра́дуйся, кре́пость и си́ла изнемога́ющих и па́дающих.

Ра́дуйся, от стра́ха и мечта́ний томи́мым свобожде́ние. Ра́дуйся, пред лице́м Бо́жиим непреста́нное моли́твенное горе́ние.

Ра́дуйся, чрез посла́ние свое́ духо́вное дще́ри Анастаси́и на́с Бо́жией прему́дрости науча́яй. Ра́дуйся, све́том свои́х писа́ний от мра́ка грехо́внаго на́с свобожда́яй.

Ра́дуйся, Зоси́мо преподо́бне, уго́дниче Христо́в и чудотво́рче.

Конда́к 9.

Все́м приходи́вшим в пусты́ню твою́, преподо́бне о́тче Зоси́мо, бы́сть ди́вно ви́дети тя́ в раздра́нней и многошве́йней ри́зе ходя́щаго и в ме́сте безмо́лвном пребыва́вшаго ве́рою пра́вою и де́лы благи́ми, воспе́ша ти́ вси́: Аллилу́иа.

И́кос 9.

Вети́и прему́дрыя превзоше́л еси́, преподо́бне о́тче Зоси́мо, досто́ин еси́ си́це похва́л:

Ра́дуйся, из глубины́ пусты́ни свети́вый ми́ру. Ра́дуйся, от о́строва пусты́ннаго возсия́вый заре́ю Богоразу́мия.

Ра́дуйся, Белоезе́рския ве́си духо́вное просвеще́ние. Ра́дуйся, нечести́вцев вразумле́ние.

Ра́дуйся, благочести́вых возвыше́ние.

Ра́дуйся, Зоси́мо преподо́бне, уго́дниче Христо́в и чудотво́рче.

Конда́к 10.

Спасе́ния наде́жду стяжа́л еси́ при исхо́де твое́м, преподо́бне о́тче Зоси́мо, я́коже пшени́ца зре́лая во вре́мя жа́твы пресели́лся еси́ в жи́тницу Небе́сную, немо́лчно возглаша́я пред престо́лом Бо́жиим: Аллилу́иа.

И́кос 10.

Стена́ и опло́т неруши́мый восхваля́ющим тя́, блаже́нне Зоси́мо, бы́л еси́. И на́с, в доброде́тели убо́гих и грехми́ пове́рженных, благомо́щным хода́тайством твои́м возста́ви, вопию́щих ти́:

Ра́дуйся, указа́телю пути́ пра́ваго. Ра́дуйся, сла́досте духо́вная.

Ра́дуйся, в ско́рбех защи́тниче. Ра́дуйся, моли́твенниче о помина́ющих па́мять твою́.

Ра́дуйся, ника́коже приходя́щих к тебе́ оставля́й. Ра́дуйся, не еди́н от тебе́ неуте́шен оты́де.

Ра́дуйся, Зоси́мо преподо́бне, уго́дниче Христо́в и чудотво́рче.

Конда́к 11.

Пе́ние всеумиле́нное принося́ Пресвяте́й Тро́ице, Богоизбра́нный о́тче Зоси́мо хра́м пресла́вен Благове́щения Бо́жией Ма́тери воздви́гл еси́, восхваля́я пречи́стую Де́ву: Аллилу́иа.

И́кос 11.

Светоза́рною звездо́ю сия́яй в пусты́нном о́строве, многосла́вимый о́тче на́ш Зоси́мо, лю́ди приходя́щии к тебе́ богому́дренно упа́сл еси́ поуче́ньми свои́ми, просвеща́я и уча́. Мы́ же вразумля́еми житие́м и наставле́ньями твои́ми вопие́м:

Ра́дуйся, побо́рниче правосла́вия. Ра́дуйся, денни́це пресве́тлая.

Ра́дуйся, цевни́це духо́вная. Ра́дуйся, писа́нии твои́ми на́с науча́яй.

Ра́дуйся, назида́ние на́ше и поможе́ние. Ра́дуйся, духо́вной ле́ствицею восходи́ти кре́пкое вспоможе́ние.

Ра́дуйся, Зоси́мо преподо́бне, уго́дниче Христо́в и чудотво́рче.

Конда́к 12.

Благода́тию боже́ственною осеня́ем, просия́л еси́ в животе́ твое́м, Богоно́сне о́тче Зоси́мо, освеща́я притека́ющих и зову́щих Бо́гу: Аллилу́иа.

И́кос 12.

Пою́ще твоя́ чудеса́, преподо́бне о́тче Зоси́мо, по успе́нии твое́м содева́емыя, от полноты́ любви́ тебе́ зове́м:

Ра́дуйся, и́стинный покло́нниче Бо́га. Ра́дуйся, храни́телю Его́ за́поведей.

Ра́дуйся, церко́вное украше́ние. Ра́дуйся, святы́ни почита́телю.

Ра́дуйся, боле́зней на́ших врачева́ние. Ра́дуйся, душа́м спасе́ние хода́таю.

Ра́дуйся, Зоси́мо преподо́бне, уго́дниче Христо́в и чудотво́рче.

Конда́к 13.

О преподо́бне и богоно́сне о́тче на́ш Зоси́мо! Вы́ну предстоя́ у Престо́ла Бо́жия, моли́ за ны́ гре́шныя, чту́щия святу́ю па́мять твою́, да многомо́щными моли́твами твои́ми избе́гнем стре́л вра́жиих и беспреткнове́нно дости́гнем Го́рняго о́наго Иерусали́ма и наслади́мся обеща́нных бла́г, угото́ванных Бо́жиим избра́нным; да Творцу́ вся́ческих возопие́м: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгела земна́го и небе́снаго челове́ка яви́ тебе́ все́х Созда́тель и благопло́дную ду́шу твою́ из мла́да прови́дев, преподо́бне Зоси́мо, научи́ все́х вопи́ти тебе́ си́це:

Ра́дуйся, чи́стое Свята́го Ду́ха вмести́лище. Ра́дуйся, а́нгельским лико́в собесе́дниче.

Ра́дуйся, дре́во благосенноли́ственное, при исхо́дищах во́д насажде́нное. Ра́дуйся, я́ко до ны́не оби́льную реку́ исцеле́ний источа́еши.

Ра́дуйся, и на́с ча́д твои́х в моли́твах не оставля́еши. Ра́дуйся, Зоси́мо преподо́бне, уго́дниче Христо́в и чудотво́рче.

Конда́к 1.

Избра́нный подви́жниче, преподо́бне о́тче на́ш Зоси́мо, прославля́я ны́не твою́ па́мять, мо́лим тя́ приле́жно, стоя́ у престо́ла Пресвяты́я Тро́ицы, помяни́ на́с чту́щих святу́ю па́мять твою́, и, ожида́ющих ми́лости Бо́жией по твоему́ хода́тайству, вопию́щих:

Ра́дуйся, Зоси́мо преподо́бне, уго́дниче Христо́в и чудотво́рче.