Конда́к 1.

Избра́ннаго Бо́гом от ю́ности побо́рника правосла́вныя святы́я ве́ры и прия́вшаго му́ченический вене́ц за испове́дание ея́, свята́го преподобному́ченика Афана́сия похва́льными пе́сньми почти́м. Ты́ же, я́ко предстоя́й пред престо́лом Царя́ сла́вы, от вся́ких на́с бе́д свободи́, да зове́м ти́:

Ра́дуйся, преподобному́чениче Афана́сие, похвало́ и украше́ние на́ше.

И́кос 1.

А́нгельский чи́н восприя́вши, а́нгельское житие́ яви́л еси́, ду́шу твою́ чистото́ю доброде́телей украси́в, непоро́чно Бо́гу служи́л еси́, сло́вом и житие́м ве́рныя своя́ наставля́я, сего́ ра́ди приими́ от на́с, преподобному́чениче, сия́ усе́рдныя похвалы́:

Ра́дуйся, измла́да Бо́га возлюби́вый; ра́дуйся, за́поведи Его́ ве́рно сохрани́вый.

Ра́дуйся, соблю́дший ду́шу твою́ страстьми́ непорабоще́нну; ра́дуйся, благода́тию Бо́жию просвеще́нный.

Ра́дуйся, ве́ры Христо́вы и́стинный побо́рниче; ра́дуйся, оте́ческих преда́ний нело́жный защи́тниче.

Ра́дуйся, му́ченическими добро́тами укра́шенный; ра́дуйся, в све́тлый черто́г Госпо́день прия́тый.

Ра́дуйся, преподобному́чениче Афана́сие, похвало́ и украше́ние на́ше.

Конда́к 2.

Ви́дев суету́ жития́ мирска́го, еще́ от ю́ности, в ми́ре пребыва́я, удаля́лся еси́ сла́достей жития́ сего́, моли́тве же и слу́жбе Бо́жией усе́рдно прилежа́ и у́м сво́й богомы́слием возвыша́я, при́сно воспева́л еси́ Го́сподеви а́нгельскую пе́снь: Аллилу́иа.

И́кос 2.

Ра́зум тво́й Боже́ственными уче́ньми просвеща́я, кра́сная ми́ра сего́, преподобному́чениче, отри́нул еси́, чесо́ ра́ди, водворя́яся во оби́тель Свята́го Ду́ха гра́да Ви́льны и та́мо моли́твою и поще́нием во служе́ние Христу́ себе́ уготовля́я, душеполе́зное сокро́вище стяжа́л еси́. Мы́ же, твое́ высо́кое любому́дрие ублажа́я, прино́сим ти́ похвалы́ сия́:

Ра́дуйся, прельще́ния ю́наго во́зраста победи́вый; ра́дуйся, от ю́ности жития́ богобоя́зненнаго сла́дость вкуси́вый.

Ра́дуйся, веле́ний Христо́вых измла́да исполни́телю; ра́дуйся, чистоты́ душе́вныя и теле́сныя усе́рдный храни́телю.

Ра́дуйся, подви́жниче, угожде́ние Бо́гу па́че всего́ возлюби́вый; ра́дуйся, о́браз отверже́ния себе́ на́м показа́вый.

Ра́дуйся, я́ко путе́м приско́рбным ко Христу́ после́довал еси́; ра́дуйся, я́ко в ра́йския оби́тели возше́л еси́.

Ра́дуйся, преподобному́чениче Афана́сие, похвало́ и украше́ние на́ше.

Конда́к 3.

Си́ла Всевы́шняго охраня́ющи тя́ непреста́нно в житии́ твое́м, я́ве показа́ тя, я́ко сосу́д избра́нный во е́же служи́ти Бо́гови и наставля́ти лю́ди ко спасе́нию. Те́мже и мы́, таково́е Боже́ственное смотре́ние о тебе́ зря́ще, воспева́ем ку́пно с тобо́ю хвале́бную пе́снь в Тро́ице сла́вимому Бо́гу: Аллилу́иа.

И́кос 3.

Иму́щи при́сно пред очи́ма свои́ма же́ртву Христо́ву, за грехи́ людски́я принесе́нную, же́ртвенно преда́л еси́ житие́ твое́ в ру́це Бо́жии и, взе́м кре́ст долготерпе́ния и злострада́ния, Христу́ после́довал еси́. Те́м же и мы́, ублажа́юще христоподража́тельное житие́ твое́, воспева́ем ти́ си́це:

Ра́дуйся, в се́рдце твое́м о́браз Христа́ непреста́нно носи́вый; ра́дуйся, Христу́ рабо́тати и и́скренно Ему́ служи́ти лю́ди научи́вый.

Ра́дуйся, я́ко очеса́ми мы́сленными к Све́ту навече́рнему устремля́лся еси́; ра́дуйся, я́ко к небеси́ путе́м приско́рбным возше́л еси́.

Ра́дуйся, за́поведей Христо́вых и заве́тов апо́стольских усе́рднейший храни́телю; ра́дуйся, спасе́ние ду́ш па́ствы твоя́ изря́дный рачи́телю.

Ра́дуйся, житие́м твои́м пра́ведным Бо́гу угоди́вый; ра́дуйся, насле́дие Ца́рствия небе́снаго богоугожде́нием себе́ улучи́вый.

Ра́дуйся, преподобному́чениче Афана́сие, похвало́ и украше́ние на́ше.

Конда́к 4.

Бу́рю гоне́ний воздвиго́ша врази́ проти́во оби́тели Дубо́йския, ю́же устроя́я, соде́лал еси́, преподобному́чениче, опло́том ве́ры правосла́вныя. Ты́ же виде́нием небе́сным озаре́нный, вве́рив судьбы́ бра́тии твоея́ Бо́жию промышле́нию, усе́рдно моля́ся с не́ю Бо́гови, взыва́л Ему́: Аллилу́иа.

И́кос 4.

Слы́шавше насе́льницы гра́да Бе́реста, о богоуго́дном житии́ и́ноков Купяти́цкия оби́тели, проси́ша игу́мена сея́ оби́тели, да избере́т еди́наго из бра́тии поста́вити во игу́мена оби́тели Бересте́йския. Егда́ же бра́тия недоумева́ша, кому́ вда́ти же́зл игу́менства, про́мысл Бо́жий жре́бием указа́ на тя́, я́ко досто́йный сосу́д Боже́ственныя благода́ти. Те́м же и мы́, дивя́ся чу́дному промышле́нию Бо́жию о тебе́, достохва́льно взыва́ем ти́:

Ра́дуйся, па́стырю, от Самого́ Бо́га предука́занный; ра́дуйся, нача́льниче оби́тели, свы́ше избра́нный.

Ра́дуйся, во правосла́вии бра́тию оби́тели твоея́ укрепи́вый; ра́дуйся, моли́тве и терпе́нию житие́м твои́м вся́ научи́вый.

Ра́дуйся, оби́тели твоея́ честны́я от вра́жеских ко́зней охрани́телю; ра́дуйся, и насе́льников земли́ Бересте́йския в охране́нии ве́ры святы́я тве́рдый руководи́телю.

Ра́дуйся, в по́те лица́ твоего́ Бо́га ра́ди потруди́выйся; ра́дуйся, ве́рный ра́бе, до́брым де́лателем виногра́да Христо́ва яви́выйся.

Ра́дуйся, преподобному́чениче Афана́сие, похвало́ и украше́ние на́ше.

Конда́к 5.

Боготе́чной звезде́ подо́бен бы́л еси́ преподобному́чениче Афана́сие, в житии́ твое́м дея́ньми и уче́ньми до́бре па́ству твою́ назида́я и пу́ть и́стинный к го́рнему Иерусали́му е́й указу́я. Те́м же и ны́не на небесе́х сия́еши сла́вою ве́чною и ку́пно со ли́ки пра́ведных воспева́еши хвале́бную пе́снь Бо́гови: Аллилу́иа.

И́кос 5.

Ви́дев, я́ко в защище́нии ве́рных ча́д твои́х не довле́ет наде́ятися на си́лы челове́ческия, все́ упова́ние твое́ возложи́л еси́ на по́мощь Засту́пницы ро́да христиа́нскаго, моля́ся пред о́бразом Ея́ святы́м, имену́емым Ма́тери Бо́жия Купяти́цкия и в ча́с те́плыя моли́твы твоея́ услы́шал еси́ гла́с Ея́, повелева́ющий ти́ бо́дрственно за ве́ру святу́ю стоя́ти и па́ству твою́ пред си́льными ми́ра сего́ защища́ти. Сего́ ра́ди ве́рнии научи́шася воспева́ти тебе́ такова́я:

Ра́дуйся, в житии́ земне́м слы́шати гла́с Пречи́стыя Влады́чицы сподо́бивыйся; ра́дуйся, гла́сом Ея́ служи́ти Бо́гу призва́нный.

Ра́дуйся, в защище́нии оби́димым кре́пкое забра́ло; ра́дуйся, си́льным ми́ра сего́ небоя́зненный суда́ Бо́жия провозвести́телю.

Ра́дуйся, вожделе́ний инове́рия разруши́телю; ра́дуйся, пра́вды Бо́жия в сердца́х возстаю́щих и вражду́ющих на святу́ю ве́ру утверди́телю.

Ра́дуйся, па́стырю до́брый, ду́шу свою́ положи́ти за о́вцы своя́ изво́ливый; ра́дуйся, за пра́вду гоне́ния и ско́рби претерпе́вый.

Ра́дуйся, преподобному́чениче Афана́сие, похвало́ и украше́ние на́ше.

Конда́к 6.

Пропове́дник уче́ния Христо́ва вои́стинну яви́лся еси́, преподобному́чениче Афана́сие, сло́вом твои́м в ве́ре наставля́я, житие́м во благоче́стии ве́рных утвержда́я и все́х поуча́я с любо́вию пе́ти Бо́гу: Аллилу́иа.

И́кос 6.

Возсия́л еси́, преподобному́чениче, я́ко свети́льник, светя́й на све́щнице и́стинныя ве́ры Христо́вы, высото́ю ума́ твоего́ озаря́я ду́ши ве́рных и разгоня́я тму́ нече́стия и неве́рия, сего́ ра́ди избра́ша тя́ лю́дие, я́ко побо́рника ве́ры сея́, предста́ти пред лице́м си́льных ми́ра сего́ и огради́ти ю́ от злоко́зненных наве́тов возстаю́щих на ню́. Те́мже и мы́ досто́йно ублажа́ем тя́ похвала́ми си́ми:

Ра́дуйся, су́щим в напа́стех ско́рый помо́щниче; ра́дуйся, оби́димым кре́пкий засту́пниче.

Ра́дуйся, па́ствы твоея́ во благоустрое́нии жития́ церко́внаго му́дрый руководи́телю; ра́дуйся, малоду́шием коле́блемых ве́рный укрепи́телю.

Ра́дуйся, вражде́бных наве́тов достохва́льный отрази́телю; ра́дуйся, безпо́мощных при́сный защи́тителю.

Ра́дуйся, огра́дою кре́пкою оби́димых яви́выйся; ра́дуйся, пред лице́м си́льных ми́ра сего́ изрещи́ пра́вду не убоя́выйся.

Ра́дуйся, преподобному́чениче Афана́сие, похвало́ и украше́ние на́ше.

Конда́к 7.

Хотя́й непреста́нно житие́м свои́м Бо́гу благоугожда́ти, подвигополо́жник бы́л еси́, преподобному́чениче Афана́сие, неосла́бный о́браз бра́тии твое́й подая́ в труде́х, бде́ниих и поще́ниих, с любо́вию поуча́л еси́ и́х, призыва́я служи́ти Бо́гу и пе́ти Тому́: Аллилу́иа.

И́кос 7.

Но́ваго по́двига и́ноческаго жития́ вожделе́в, не отри́нул еси́ проше́ния и́ноков оби́тели Дубо́йския возложи́ти на ся́ бре́мя во благоустрое́нии ея́ и, ше́д во оби́тель сию́, узре́л еси́ на пути́ му́жа убо́га, е́ле жи́ва су́ща и, самаряни́ну милосе́рдому подо́бящися, подъя́л еси́ его́ на ра́мена твоя́ и не́сл еси́, внима́я неизрече́нным его́ глаго́лом. Се́й же му́ж, внеза́пу скры́выйся от тебе́, назва́ся сладча́йшим и́менем Иису́с. Сего́ ра́ди и мы́, та́йне твоего́ боговиде́ния дивя́щеся, со умиле́нием тебе́ вопие́м:

Ра́дуйся, ко милосе́рдию ду́шу твою́ предугото́вавый; ра́дуйся, о́браз сострада́ния лю́дем собо́ю яви́вый.

Ра́дуйся, глаго́лы Госпо́дни слы́шати сподо́бивыйся; ра́дуйся, открове́ние ди́вных та́ин от Бо́га восприя́вый.

Ра́дуйся, богови́дче Христо́в; ра́дуйся, богови́дцу Моисе́ови уподо́бивыйся.

Ра́дуйся, таи́нниче Бо́жий, еще́ на земли́ небе́сных бла́г вкуси́вый; ра́дуйся, я́ко Са́м Пастыренача́льник Иису́с призва́ти тя́ на по́двиг благоволи́вый.

Ра́дуйся, преподобному́чениче Афана́сие, похвало́ и украше́ние на́ше.

Конда́к 8.

Стра́нен и безу́мен показа́лся, еси́ лю́дем, преподобному́чениче, егда́, Христа́ ра́ди юро́дство восприя́в на сто́гнах ца́рствующаго гра́да и́стину святы́я правосла́вныя ве́ры защища́я и гне́вом Бо́жиим отше́дших от сея́ и́стины устраша́я, восклица́л еси́: «го́ре отсту́пником и неве́рным! ве́ра бо правосла́вная я́ко со́лнце возсия́ет!» Мы́ же словеса́ сия́, я́ко проро́чествие прие́млюще, моли́твенно к тебе́ взыва́ем: объюроде́вший у́м на́ш на стезю́ и́стины напра́ви, да с тобо́ю взыва́ем Бо́гу: Аллилу́иа.

И́кос 8.

«Ве́сь еси́ жела́ние мое́ и ра́дость моя́, сладча́йший Иису́се», — взыва́л еси́ ко Го́споду, преподобному́чениче, егда́ веде́н бы́л на ме́сто муче́ния твоего́: ду́шу бо твою́ преда́в в ру́це Бо́жии, те́ло твое́ сла́дце преда́л еси́ в ру́це мучи́телей твои́х. Такова́я любо́вь твоя́ ко Го́споду и кро́тость твоя́ мучи́телей смути́, и сего́ ра́ди еди́н от во́ин, от его́же руки́ пови́нен бы́л еси́ прия́ти сме́рть, дивя́ся му́жеству твоему́, благослове́ния оте́ческаго и проще́ния за сие́ безу́мное де́ло у тебе́ испроси́. Мы́ же, благогове́йно воспомина́юще сие́, похвала́ми ублажа́ем тя́ си́ми:

Ра́дуйся, любо́вию ко Христу́, а́ки многоце́нным би́сером, ду́шу твою́ украси́вый; ра́дуйся, де́йственным пропове́данием сея́ любве́ ве́рный пу́ть во святы́я на́м указа́вый.

Ра́дуйся, му́жественным смире́нием враго́в твои́х удиви́вый; ра́дуйся, кро́тостию твое́ю ослепле́нным враждо́ю к тебе́ мучи́телем у́мное прозре́ние дарова́вый.

Ра́дуйся, му́жественно сме́рть претерпе́вый; ра́дуйся, небе́сную Иису́сову сла́дость вкуси́вый.

Ра́дуйся, немо́лчная испове́дников сла́во; ра́дуйся, преди́вная му́чеников похвало́.

Ра́дуйся, преподобному́чениче Афана́сие, похвало́ и украше́ние на́ше.

Конда́к 9.

Вси́ ви́дящи тя́ в темни́чнем заточе́нии, преподобному́чениче, зело́ дивля́хуся твоему́ непоколеби́мому стоя́нию за ве́ру и́стинную святу́ю, заве́ты бо оте́ческия соблюда́я, не то́кмо не устраши́лся еси́ у́з, оплева́ний и поруга́ний, но му́жественно вся́ сия́ терпя́ за Христа́, сле́знаго испо́лнившися умиле́ния, благода́рственно воспева́л еси́ Бо́гу: Аллилу́иа.

И́кос 9.

Вити́и многовеща́ннии не возмо́гут изрещи́ ра́дости тоя́ вели́кия, е́юже испо́лнени бы́ша сердца́ дости́гших ве́рно чти́ти святу́ю па́мять твою́: си́и, весе́лием одержи́мии, помы́слиша воздви́гнути хра́м на ме́сте му́ченическия кончи́ны твоея́, ме́сто же сие́ и по трие́х ста́х ле́тех по кончи́не твое́й сохра́нно бе́ в па́мяти ве́рных. Те́рн бо, прора́стший на кро́ви твое́й, я́ко свиде́тель нело́жный, соблюда́ше ме́сто сие́ от людска́го забве́ния, и свеща́ во гро́бе твое́м, ю́же име́л еси́ в ру́цех твои́х в ча́с кончи́ны твоея́, и́стинствова ме́сто твоего́ упокое́ния. О се́м у́бо ра́дующеся, ве́рнии восклица́ху ти́:

Ра́дуйся, путе́м терни́стым жития́ твоего́ грехо́вная те́рния души́ твоея́ умертви́вый; ра́дуйся, я́ко те́рнием прора́стшим на гро́бе твое́м, ме́сто упокое́ния твоего́ показа́вый и те́м ра́дость ве́лию ве́рным твои́м яви́вый.

Ра́дуйся, храни́телю обы́чаев церко́вных, со свеще́ю возжже́нною сме́рть восприя́вый; ра́дуйся, в зна́мении свещи́ возжже́нныя о́бразно та́йну сия́ния сла́вы твоея́ предобрази́вый.

Ра́дуйся, я́ко хра́мом, созда́нным в па́мять твою́ на гро́бе твое́м, сла́вно и́мя твое́ от люде́й прославля́ется; ра́дуйся, я́ко на гро́бе твое́м, я́коже и дре́вле на гробе́х му́ченических, же́ртва Христо́ва за грехи́ людски́я прино́сится.

Ра́дуйся, неизсяка́емый исто́чниче блаже́нныя па́мяти о тебе́ па́мяти на земли́; ра́дуйся, цве́том нетле́ния укра́шенный на небеси́.

Ра́дуйся, преподобному́чениче Афана́сие, похвало́ и украше́ние на́ше.

Конда́к 10.

Спасти́ хотя́й ду́шу твою́, о житии́ се́м привре́меннем нераде́л еси́, преподобному́чениче, егда́ бо на тя́ осужде́ние сме́рти изы́де, с ра́достию вели́кою преда́л еси́ ду́шу в ру́це Бо́гови, воспева́я Ему́, в му́ченическом по́двизе тебе́ укрепля́ющему, хвале́бную пе́снь: Аллилу́иа.

И́кос 10.

Стено́ю огражде́ния Це́ркви Правосла́вней обеща́лся еси́ бы́ти, проро́чески на сие́ указу́я в предсме́ртнем заве́те ученико́м твои́м: «та́мо, иде́же те́ло мое́ изъя́звленное и острупле́нное за и́мя Бо́жие поло́жено бу́дет, ве́ра правосла́вная процвете́т, я́ко кри́н посреде́ те́рния и я́ко и́скра в тепле́ сокры́тая яви́тся, возсия́ет и повсю́ду освети́т». Сего́ ра́ди и мы́, сла́вяще Бо́га, ди́внаго во святы́х Свои́х, и тя́ ублажа́ем:

Ра́дуйся, я́ко за и́стину ско́рби мно́гия и я́звы претерпе́л еси́; ра́дуйся, я́ко за испове́дание и защище́ние ве́ры правосла́вныя нетле́ние моще́й твои́х во блаже́ннем упокое́нии прия́л еси́.

Ра́дуйся, духо́вно слепо́тствующих и в зако́не Госпо́дни заблужда́ющих пречу́дный руководи́телю; ра́дуйся, все́х напа́стей и бе́д, обурева́ющих ве́рное ста́до Христо́во, отрази́телю.

Ра́дуйся, прославле́нием моще́й твои́х превели́кия ра́дости на́с испо́лнивый; ра́дуйся, и неве́рныя нетле́нием телесе́ твоего́ к позна́нию и́стины правосла́вия приведы́й.

Ра́дуйся, твои́м прорече́нием в наде́жди торжества́ ве́ры и́стинныя на́с укрепи́вый; ра́дуйся, и по успе́нии твое́м превели́ким сея́ ве́ры защи́тником себе́ яви́вый.

Ра́дуйся, преподобному́чениче Афана́сие, похвало́ и украше́ние на́ше.

Конда́к 11.

Пе́ние всеумиле́нное принесо́ша Бо́гови ученицы́ твои́, преподобному́чениче, егда́ обрето́ша сокры́то от люде́й, чту́щих па́мять твою́, ме́сто твоего́ упокое́ния, и мо́щи твои́ нетле́нно пребыва́ющия, оба́че и мы́, взира́юще на такову́ю ми́лость Бо́жию на́м явле́нную, благода́рственно вопие́м просла́вившему тя́ Бо́гу: Аллилу́иа.

И́кос 11.

Свети́льник жития́ благоче́стнаго ве́рному ста́ду твоему́ бы́л еси́, преподобному́чениче Афана́сие, в души́ твое́й Боже́ственная бога́тства Ду́ха Свята́го собра́в, за Христа́ му́ченичество испове́дания прия́л еси́. Те́мже и мы́, моли́твами твои́ми просве́щшеся, вопие́м ти́:

Ра́дуйся, свети́льниче благода́тный жития́ благоче́стнаго; ра́дуйся, ве́ру, наде́жду и любо́вь до конца́ сохрани́вый.

Ра́дуйся, со Христо́м, Его́же от ю́ности возлюби́л еси́, на ве́ки соедини́выйся; ра́дуйся, мзду́ ве́лию за житие́ твое́ сла́вное от Него́ восприя́вый.

Ра́дуйся, звездо́ лучеза́рная над земле́ю на́шею возсия́вшая; ра́дуйся, Ца́рствия небе́снаго и сла́вы ве́чныя несле́дниче.

Ра́дуйся, нетле́нием моще́й твои́х о́браз воскресе́ния на́шего яви́вый; ра́дуйся, я́ко и́мя твое́ по все́й стране́ на́шей от конца́ в коне́ц прославля́ется.

Ра́дуйся, страны́ на́шея кре́пкое огражде́ние; ра́дуйся, при́сное пред Бо́гом на́ше защище́ние.

Ра́дуйся, преподобному́чениче Афана́сие, похвало́ и украше́ние на́ше.

Конда́к 12.

Благода́ть цельбоно́сна дана́ от Бо́га нетле́нному твоему́ телеси́, егда́ бо о́трок, на сме́ртнем одре́ лежа́щ, прикосну́ся ра́це твое́й, а́бие исцеле́. Благода́ти сея́, преподобному́чениче Афана́сие, и на́м, немощны́м, испроси́, да и мы́ здра́ви су́ще те́лом и ду́хом, в се́й и бу́дущей жи́зни о тебе́ пое́м Бо́гу: Аллилу́иа.

И́кос 12.

Пою́ще твое́ сла́вное и непреобори́мое стоя́ние за ве́ру и́стинную, ублажа́ем, преподобному́чениче, и святу́ю твою́ кончи́ну, е́юже на земли́ и на небеси́ просла́вился еси́, и прино́сим ти́ похвалы́ сия́:

Ра́дуйся, непоколеби́мый сто́лпе ве́ры Христо́вой и оте́ческих преда́ний; ра́дуйся, я́ко тобо́ю Це́рковь ве́рных просвеща́ется.

Ра́дуйся, ве́рный ра́бе Христо́в, любо́вь ко Христу́ свое́ю кро́вию запечатле́вый; ра́дуйся, за ве́ру и страда́ния в ра́дость Го́спода прия́тый.

Ра́дуйся, ве́рным ча́дом твои́м и́стинный пу́ть во оби́тели показа́вый; ра́дуйся, во оби́телех Христо́вых на ско́рби на́ши призира́ющий.

Ра́дуйся, от вра́г ви́димых и неви́димых кре́пкий на́ш засту́пниче; ра́дуйся, даро́ванной от Го́спода ми́лости неоску́дный исто́чниче.

Ра́дуйся, душе́вных и теле́сных неду́гов на́ших целе́бниче; ра́дуйся, всеусе́рдный ко спасе́нию на́ш наста́вниче.

Ра́дуйся, преподобному́чениче Афана́сие, похвало́ и украше́ние на́ше.

Конда́к 13.

О, всехва́льный уго́дниче Христо́в, преподобному́чениче Афана́сие, приими́ сие́, ма́лое моле́ние на́ше, в похвалу́ тебе́ приноси́мое! Бу́ди неосла́бный моли́твенник на́м пред престо́лом Всевы́шняго, и те́плым предста́тельством твои́м изба́ви на́с от зо́л земны́х и гряду́щаго муче́ния, да с тобо́ю воспева́ем Бо́гу: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгельский чи́н восприя́вши, а́нгельское житие́ яви́л еси́, ду́шу твою́ чистото́ю доброде́телей украси́в, непоро́чно Бо́гу служи́л еси́, сло́вом и житие́м ве́рныя своя́ наставля́я, сего́ ра́ди приими́ от на́с, преподобному́чениче, сия́ усе́рдныя похвалы́:

Ра́дуйся, измла́да Бо́га возлюби́вый; ра́дуйся, за́поведи Его́ ве́рно сохрани́вый.

Ра́дуйся, соблю́дший ду́шу твою́ страстьми́ непорабоще́нну; ра́дуйся, благода́тию Бо́жию просвеще́нный.

Ра́дуйся, ве́ры Христо́вы и́стинный побо́рниче; ра́дуйся, оте́ческих преда́ний нело́жный защи́тниче.

Ра́дуйся, му́ченическими добро́тами укра́шенный; ра́дуйся, в све́тлый черто́г Госпо́день прия́тый.

Ра́дуйся, преподобному́чениче Афана́сие, похвало́ и украше́ние на́ше.

Конда́к 1.

Избра́ннаго Бо́гом от ю́ности побо́рника правосла́вныя святы́я ве́ры и прия́вшаго му́ченический вене́ц за испове́дание ея́, свята́го преподобному́ченика Афана́сия похва́льными пе́сньми почти́м. Ты́ же, я́ко предстоя́й пред престо́лом Царя́ сла́вы, от вся́ких на́с бе́д свободи́, да зове́м ти́:

Ра́дуйся, преподобному́чениче Афана́сие, похвало́ и украше́ние на́ше.

Моли́тва.

О, вели́кий уго́дниче Христо́в, святы́й преподобному́чениче Афана́сие! К тебе́ мы́, гре́шнии и смире́нии, я́ко те́плому на́шему засту́пнику и ско́рому помо́щнику, моли́твенно прибега́ем и из глубины́ се́рдца взыва́ем: при́зри на ны́ ско́ро и умоли́ человеколю́бца Бо́га, да не осу́дит на́с, гре́шных, по беззако́ниям на́шим, но да сотвори́т с на́ми по вели́цей Свое́й ми́лости. Охрани́ на́с свои́м заступле́нием от облежа́щаго ны́ суему́дрия и неправове́рия и, я́ко па́стырь до́брый, упаси́ заблу́ждшия о́вцы ста́да Христо́ва и во дворы́ Госпо́дни сия́ всели́. Огради́ на́с от собла́знов, ересе́й и раско́лов, и наста́ви тве́рдо в ве́ре правосла́вней подвиза́тися. Потщи́ся, ско́рый о на́с предста́телю, благоприя́тным твои́м хода́тайством умоли́ти Го́спода, да ниспо́слет на́м ти́хое и богоуго́дное житие́, уврачу́ет Свое́ю благода́тию на́ша боле́зни душе́вныя и теле́сныя, согре́ет на́ша сердца́ любо́вию дру́г ко дру́гу и сотвори́т ны́ братолю́бны и единомы́сленны. Испроси́ та́кожде у Го́спода и всего́ потре́бнаго для жития́ на́шего теле́снаго: земли́ плодоро́дия, благорастворе́ния возду́хов и ми́рнаго устрое́ния. Страну́ на́шу, ве́си и гра́ды охрани́ моли́твами твои́ми от огня́, пото́па, тру́са, вра́жескаго наше́ствия и вну́тренних нестрое́ний. Егда́ же приспе́ет ча́с кончи́ны на́шея, утверди́ в на́с па́мять сме́ртную, да и мы́, в и́стиннем покая́нии и чи́стем сведе́нии со́вести на́шея предста́вше ко Го́споду, сподо́бимся десна́го стоя́ния и со все́ми святы́ми воспое́м сла́ву Отцу́ и Сы́ну и Свято́му Ду́ху во ве́ки веко́в. Ами́нь.