Конда́к 1.

Избра́нный от кня́жескаго ро́да и призва́нный в и́ночество скорбьми́ мно́гими, уго́дниче Бо́жий преподобному́чениче Галактио́не, в пе́снех восхваля́ем тя́ с любо́вию, небе́снаго предста́теля и засту́пника на́шего; ты́ же, о́тче, я́ко име́яй дерзнове́ние ко Пресвяте́й Тро́ице, моли́ся вы́ну о спасе́нии на́с гре́шных и от вся́ких бе́д свобожда́й чту́щих святу́ю па́мять твою́, да зове́м ти́:

Ра́дуйся, преподобному́чениче Галактио́не, вели́кий чудотво́рче.

И́кос 1.

А́нгелов Творе́ц и всего́ ми́ра Созда́тель, прови́дев, я́ко сосу́д избра́н и́маши бы́ти Бо́жия благода́ти, о́тче Галактио́не, от ю́ности твоея́ мно́гими скорбьми́ воспита́ тя́ в подви́жника соверше́нна о Христе́, си́льнаго сло́вом и де́лом пред Бо́гом и челове́ки, на́с же подвиза́ет пе́ти тебе́:

Ра́дуйся, благоро́дных роди́телей сы́не; ра́дуйся, кня́жескаго ро́да свято́е прозябе́ние.

Ра́дуйся, в о́трочестве от сме́рти напра́сныя Бо́гом сохране́нный; ра́дуйся, гра́д оте́чествия твоего́ оста́вивый.

Ра́дуйся, пра́ведно и непоро́чно на земли́ пожи́вый; ра́дуйся, гражда́нство Иерусали́ма Небе́снаго улучи́вый.

Ра́дуйся, преподобному́чениче Галактио́не, вели́кий чудотво́рче.

Конда́к 2.

Ви́дев кончи́ну страда́льческую роди́теля твоего́ и враго́в лю́тость, иска́вших твоея́ поги́бели, о́тче Галактио́не, ты́ же, подража́я Христу́, в младе́нчестве Свое́м бе́гавшему от гне́ва И́родова, избежа́л еси́ сме́рти го́рькия, благода́рственно взыва́я ко Го́споду: Аллилу́иа.

И́кос 2.

Разуме́в до́бре непостоя́нство бла́г ми́ра сего́ преле́стнаго, Галактио́не богому́дре, че́сти и сла́вы и бога́тства уклони́лся еси́ и я́ко еди́н от ни́щих во гра́д Во́логду прише́л еси́, в не́м же пребыва́я, от труда́ ру́к свои́х не то́кмо са́м пита́лся еси́, но и ни́щих снабдева́л еси́; о се́м тя́ хва́лим и зове́м:

Ра́дуйся, кро́ткий Иису́сов после́дователю; ра́дуйся, смире́нный Христо́в подража́телю.

Ра́дуйся, труда́ми пра́ведными пита́выйся; ра́дуйся, пра́здность душевре́дную возненави́девый.

Ра́дуйся, ни́щих пита́телю; ра́дуйся, убо́гих благоде́телю.

Ра́дуйся, преподобному́чениче Галактио́не, вели́кий чудотво́рче.

Конда́к 3.

Си́ла Бо́жия в не́мощи твое́й соверша́шеся, Галактио́не преблаже́нне, егда́ благи́й яре́м Христо́в на ся́ возложи́л еси́ и, вери́гами желе́зными стягну́в те́ло твое́, в затво́р те́сный себе́ заключи́л еси́, в моли́твах непреста́нных пребыва́я и вы́ну вопия́ ко Го́споду: Аллилу́иа.

И́кос 3.

Име́л еси́ по́мысл чи́ст и непоро́чную ду́шу, о́тче преподо́бне, и ангелоподо́бное житие́ на земли́ проходи́л еси́, смиря́я пло́ть твою́ по́двигами вели́кими; те́мже я́ко вои́стину а́нгела земна́го и челове́ка небе́снаго тя́ ублажа́ем и глаго́лем:

Ра́дуйся, а́нгельскаго о́браза усе́рдно возжела́вый; ра́дуйся, в схи́му святу́ю облече́нный.

Ра́дуйся, мече́м моли́твы непреста́нно вооруже́нный; ра́дуйся, во́ине Христо́в непобеди́мый.

Ра́дуйся, вме́сто доспе́хов ра́тных вери́гами желе́зными обложе́нный: ра́дуйся, вся́ искуше́ния диа́вольския победи́вый.

Ра́дуйся, преподобному́чениче Галактио́не, вели́кий чудотво́рче.

Конда́к 4.

Бу́ря страсте́й не потопи́ корабля́ души́ твоея́, Галактио́не преблаже́нне, но ве́янием Свята́го Ду́ха направля́ем, в ти́хое приста́нище безстра́стия вше́л еси́ и, безмо́лвное житие́ в затво́ре мно́го ле́т препровожда́я, непреста́нно воспева́л еси́ Пресвяте́й Тро́ице: Аллилу́иа.

И́кос 4.

Слы́шавше прозорли́выя твоя́ глаго́лы, о́тче преподо́бне, жи́тели гра́да Во́логды о скорогряду́щем на ни́х гне́ве Бо́жием, позна́ша тя́, предста́теля усе́рднаго за ни́х ко Го́споду, и потща́шася покая́нием очи́стити себе́ от скве́рн грехо́вных, тебе́ же, я́ко покая́ния пропове́днику, возглаша́ху сицева́я:

Ра́дуйся, я́ко Ио́на, покая́ние согра́жданом твои́м пропове́давый; ра́дуйся, я́ко Иереми́я, о разоре́нии гра́да Во́логды го́рце рыда́вый.

Ра́дуйся, дре́вним проро́ком равноче́стный; ра́дуйся, бу́дущая я́ко настоя́щая прови́девый.

Ра́дуйся, возше́дый на высоту́ соверше́нства духо́внаго; ра́дуйся, ра́бе Христо́в, ве́рность Ему́ до конца́ сохрани́вый.

Ра́дуйся, преподобному́чениче Галактио́не, вели́кий чудотво́рче.

Конда́к 5.

Боготе́чно, я́ко звезда́ путево́дная, ше́ствовал еси́, преподо́бне о́тче, и приме́ром жития́ твоего́ свята́го мно́гих ко Христу́ приве́л еси́, ны́не же всю́ страну́ Во́логодскую благода́тно озаря́еши мно́гими чудесы́ твои́ми. Не преста́й умоля́ти за ны́ Го́спода, о е́же сподо́битися и на́м вку́пе с тобо́ю пе́ти Ему́: Аллилу́иа.

И́кос 5.

Ви́девше исполне́ние проро́ческих твои́х глаго́лов, ди́вно сбы́вшихся в разоре́нии гра́да Во́логды от лито́вцев, согра́ждане твои́, о́тче Галактио́не, благогове́йно воспомина́ху твоя́ увеща́тельная к ни́м словеса́, и́ми же тща́лся еси́ привести́ и́х к покая́нию, посту́ и моли́тве, в умилостивле́ние пра́ведно дви́жимаго на ни́х гне́ва Бо́жия, те́мже и взыва́ху тебе́:

Ра́дуйся, моли́твенниче ко Го́споду за лю́ди согреши́вшия; ра́дуйся, провозве́стниче во́ли Бо́жией челове́ком.

Ра́дуйся, ди́вный прови́дче суде́б Госпо́дних неисповеди́мых; ра́дуйся, усе́рдный рачи́телю благоле́пия хра́мов Бо́жиих.

Ра́дуйся, строе́ние оби́тели и́ноческия на ме́сте по́двигов твои́х предсказа́вый; ра́дуйся, клеветы́ напра́сныя и посмея́ние кро́тце претерпе́вый.

Ра́дуйся, преподобному́чениче Галактио́не, вели́кий чудотво́рче.

Конда́к 6.

Пропове́дник бы́л еси́ покая́ния лю́дем Во́логодским, Галактио́не блаже́нне, и страстоте́рпец до́брый, положи́вый ду́шу твою́ за гра́д и лю́ди единове́рныя, убие́н бы́в от злонра́вных лито́вцев, я́ко а́гнец незло́бивый, и ны́не во оби́телех ра́йских све́тло лику́еши, вопия́ Бо́гу: Аллилу́иа.

И́кос 6.

Возсия́л еси́ заре́ю мно́гих чуде́с, преподобному́чениче, и от ра́ки твоея́ честны́я благода́тныя исцеле́ния то́чиши все́м, с ве́рою приходя́щим; мо́лим тя́, уго́дниче Бо́жий, уврачу́й да́нною ти́ свы́ше благода́тию и на́ши неду́ги душе́вныя и теле́сныя, да зове́м ти́:

Ра́дуйся, страстоте́рпче добропобе́дный, бие́ние лю́тое от лито́вцев претерпе́вый; ра́дуйся, кро́вию твое́ю зе́млю обагри́вый.

Ра́дуйся, по трие́х дне́х страда́ния теле́снаго ду́шу твою́ в ру́це Бо́жии преда́вый; ра́дуйся, на ме́сте по́двигов твои́х че́стно погребе́нный.

Ра́дуйся, вери́ги твоя́ и гро́б тво́й цельбоно́сны яви́вый; ра́дуйся, ра́дости скорбя́щим пода́телю.

Ра́дуйся, преподобному́чениче Галактио́не, вели́кий чудотво́рче.

Конда́к 7.

Хотя́щим на́м моли́твы принести́ ко Го́споду, бу́ди на́м споспе́шник до́брый, о́тче Галактио́не, и я́ко же при жи́зни твое́й, бездо́ждию бы́вшу во гра́де Во́логде, по моле́нию архиере́я и всего́ наро́да моли́твою твое́ю до́ждь оби́лен у Го́спода испроси́л еси́; та́ко и ны́не проси́ на́м ми́лости у Всеще́драго Влады́ки Христа́, да благода́рственно пое́м Ему́: Аллилу́иа.

И́кос 7.

Ди́вно бы́сть житие́ твое́ подви́жническое и многострада́льное, преподо́бне о́тче на́ш Галактио́не, ди́вны су́ть и чудеса́ твоя́, и́миже просла́ви тя́ Госпо́дь по сме́рти, о ни́х же недоумева́юще благохвали́ти тя́ по достоя́нию, смире́нно прино́сим ти́ глаго́лы сия́:

Ра́дуйся, страны́ Во́логодския Бо́гом дарова́нный покрови́телю; ра́дуйся, пра́вило преподо́бнаго и́ноческаго жития́.

Ра́дуйся, моли́тв благоприя́тное кади́ло; ра́дуйся, бездо́ждие моли́твами разреши́вый.

Ра́дуйся, до́ждь оби́лен и благорастворе́ние возду́ха у Го́спода испроси́вый; ра́дуйся, святы́я оби́тели твоея́ благоле́пное украше́ние.

Ра́дуйся, преподобному́чениче Галактио́не, вели́кий чудотво́рче.

Конда́к 8.

Стра́нно е́сть ви́дети, преподо́бне, я́ко вода́ от кла́дезя, рука́ма твои́ма ископа́ннаго, неду́жными с ве́рою прие́млемая, цели́тельна быва́ет. Мо́лим тя́, уго́дниче Бо́жий, и на́с, жа́ждою духо́вною пали́мых, напо́й водо́ю Бо́жия благода́ти, да принесе́м Влады́це на́шему плоды́ до́брых де́л и сподо́бимся благоприя́тно пе́ти Ему́: Аллилу́иа.

И́кос 8.

Ве́сь любо́вию Боже́ственною преиспо́лнен бы́в, Галактио́не досточу́дне, бли́жних твои́х и́скренно люби́л еси́ и усе́рдно и́м благотвори́л еси́, какову́ю же любо́вь твою́ к лю́дем, ти́ сро́дным, и по сме́рти явля́ти не престае́ши, подвиза́я ны́ пе́ти тебе́:

Ра́дуйся, на высоту́ соверше́нства о Христе́ восше́дый; ра́дуйся, му́жу жела́ний духо́вных.

Ра́дуйся, сия́ющий, я́ко со́лнце, в Ца́рствии Небе́снем; ра́дуйся, мра́к страсте́й разгоня́ющий в на́с святы́ми твои́ми моли́твами.

Ра́дуйся, веды́й на́с неви́димо на стезю́ благоугожде́ния; ра́дуйся, реко́ исцеле́ний благода́тных.

Ра́дуйся, преподобному́чениче Галактио́не, вели́кий чудотво́рче.

Конда́к 9.

Вси́ а́нгели Бо́жии и святы́х ли́цы восприя́ша тя́ с любо́вию в сожи́тие ра́йское, страстоте́рпче преподо́бне, егда́ бие́нный лю́те от нечести́вых лито́вцев ду́х тво́й испусти́л еси́ и Са́м Творе́ц а́нгелов венце́м сла́вы небе́сныя увенча́ тя́, Ему́ же помоли́ся, преподобному́чениче, да и на́с смире́нных не лиши́т О́н насле́дия Ца́рства Небе́снаго и пе́ния Ему́ со святы́ми: Аллилу́иа.

И́кос 9.

Вети́и суесло́внии, глаго́лавшии на тя́ стро́потная и прекосло́вная, преподо́бне о́тче, по нело́жному предсказа́нию твоему́, посрами́шася и погибо́ша, ты́ же ра́достно пребыва́еши со святы́ми и па́мять твоя́ честву́ется с похвала́ми до дне́сь, на ме́сте же по́двигов твои́х оби́тель и́ноческая красу́ется, я́ко же предре́кл еси́, и благоукраше́ннии хра́мы Бо́жии стоя́т, в ни́х же славосло́вие Бо́жие соверша́ется, тебе́ же прино́сятся хвале́бныя пе́сни сицевы́я:

Ра́дуйся, го́рняго ми́ра украше́ние; ра́дуйся, до́льняго ми́ра заступле́ние.

Ра́дуйся, и́ноков сла́во и похвало́; ра́дуйся, по́стников удобре́ние.

Ра́дуйся, кро́ве твоея́ излия́нием гра́д Во́логду освяти́вый; ра́дуйся, неве́рныя зна́меньми гро́зными устраша́яй.

Ра́дуйся, преподобному́чениче Галактио́не, вели́кий чудотво́рче.

Конда́к 10.

Спасти́ся все́м на́м помоли́ся, преподо́бне, и не преста́й хода́тайствовати за на́с пред Престо́лом Пресвяты́я Тро́ицы, я́ко имы́й дерзнове́ние к Триипоста́сному Влады́це; мо́лимся тебе́ приле́жно, помози́ на́м гре́шным стра́нствие земно́е благоче́стно сконча́ти и во сла́ве Ца́рствия Христо́ва ве́чно пе́ти Бо́гу на́шему: Аллилу́иа.

И́кос 10.

Стено́ю моли́тв твои́х небе́сных гра́д Во́логда огражда́ется и свята́я оби́тель твоя́ неруши́мо пребыва́ет, вси́ же, чту́щии тя́, у гро́ба твоего́ утеше́ние получа́ют, Галактио́не многострада́льне, те́мже прие́млюще от тебе́ мно́жество даро́в Бо́жия благода́ти, благода́рственно взыва́ем:

Ра́дуйся, милосе́рдия Христо́ва подража́телю; ра́дуйся, ве́чныя блаже́нныя жи́зни насле́дниче.

Ра́дуйся, ра́дости святы́х соприча́стниче; ра́дуйся, венца́ му́ченическаго сподо́бивыйся.

Ра́дуйся, благода́ти Бо́жия таи́нниче; ра́дуйся, Пресвяты́я Тро́ицы ве́рный испове́дниче.

Ра́дуйся, преподобному́чениче Галактио́не, вели́кий чудотво́рче.

Конда́к 11.

Пе́ние а́нгельское слы́шиши и добро́ту ра́йскую созерца́еши, преподо́бне о́тче Галактио́не, отону́дуже и на́ше пе́ние смире́нное услы́ши, прося́ на́м свы́ше у Го́спода вели́кия и бога́тыя Его́ ми́лости, да при́сно благодари́м тя́, предста́теля на́шего, и вопие́м Бо́гу: Аллилу́иа.

И́кос 11.

Све́тлыми луча́ми чуде́с сия́еши, Галактио́не богоно́сне, и и́ми вы́ну озаря́еши души́ ве́рных, с усе́рдием и любо́вию приходя́щих к цельбоно́сному твоему́ гро́бу; не мни́м бо тя́ ме́ртва су́ща, но жи́ва о Христе́, вне́млюща гласо́м на́шим хвале́бным и вопию́щим такова́я:

Ра́дуйся, свя́тче Бо́жий, со святы́ми почива́яй; ра́дуйся, избра́нниче Христо́в, земноро́дныя благоутро́бно посеща́яй.

Ра́дуйся, по успе́нии твое́м чудесы́ мно́гими свя́тость твою́ показа́вый; ра́дуйся, от гро́ба твоего́ струи́ целе́бныя источи́вый.

Ра́дуйся, разли́чныя боле́зни исцелева́яй; ра́дуйся, во вся́ких беда́х ско́рый помо́щниче.

Ра́дуйся, преподобному́чениче Галактио́не, вели́кий чудотво́рче.

Конда́к 12.

Благода́ть, да́нную ти́ от Бо́га, врачева́ти неду́ги душе́вныя и теле́сныя прославля́ем, о́тче Галактио́не; не забу́ди на́с, усе́рдно призыва́ющих тя́, во вре́мя тя́жких обстоя́ний и в ча́с сме́рти на́шея не оста́ви на́с моли́твами твои́ми, да в ра́дости вопие́м Бо́гу: Аллилу́иа.

И́кос 12.

Восхваля́ем вели́кия твоя́ по́двиги, ублажа́ем му́ченическую кончи́ну твою́, свя́те Галактио́не, и с несомне́нною ве́рою припа́дая к цельбоно́сному гро́бу твоему́, велича́юще тя́ зове́м:

Ра́дуйся, Пресвяты́я Живонача́льныя Тро́ицы вели́кий уго́дниче; ра́дуйся, Пресвяты́я Влады́чицы Богоро́дицы изря́дный слуго́.

Ра́дуйся, А́нгельских лико́в собесе́дниче; ра́дуйся, все́х святы́х сожи́телю.

Ра́дуйся, свеще́, в моли́твах к Бо́гу возжже́нная; ра́дуйся, ду́ш на́ших к Ца́рствию Го́рнему руководи́телю.

Ра́дуйся, преподобному́чениче Галактио́не, вели́кий чудотво́рче.

Конда́к 13.

О пречу́дне и богоно́сне о́тче на́ш Галактио́не, засту́пниче на́ш те́плый и моли́твенниче непреста́нный. Приими́ от на́с ми́лостиво ма́лое сие́ моле́ние и сохрани́ все́х на́с от вра́г ви́димых и неви́димых, от вся́кия ско́рби, напра́сныя сме́рти и бу́дущия му́ки; да сподо́бимся с тобо́ю и со все́ми святы́ми воспева́ти Бо́гу: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгелов Творе́ц и всего́ ми́ра Созда́тель, прови́дев, я́ко сосу́д избра́н и́маши бы́ти Бо́жия благода́ти, о́тче Галактио́не, от ю́ности твоея́ мно́гими скорбьми́ воспита́ тя́ в подви́жника соверше́нна о Христе́, си́льнаго сло́вом и де́лом пред Бо́гом и челове́ки, на́с же подвиза́ет пе́ти тебе́:

Ра́дуйся, благоро́дных роди́телей сы́не; ра́дуйся, кня́жескаго ро́да свято́е прозябе́ние.

Ра́дуйся, в о́трочестве от сме́рти напра́сныя Бо́гом сохране́нный; ра́дуйся, гра́д оте́чествия твоего́ оста́вивый.

Ра́дуйся, пра́ведно и непоро́чно на земли́ пожи́вый; ра́дуйся, гражда́нство Иерусали́ма Небе́снаго улучи́вый.

Ра́дуйся, преподобному́чениче Галактио́не, вели́кий чудотво́рче.

Конда́к 1.

Избра́нный от кня́жескаго ро́да и призва́нный в и́ночество скорбьми́ мно́гими, уго́дниче Бо́жий преподобному́чениче Галактио́не, в пе́снех восхваля́ем тя́ с любо́вию, небе́снаго предста́теля и засту́пника на́шего; ты́ же, о́тче, я́ко име́яй дерзнове́ние ко Пресвяте́й Тро́ице, моли́ся вы́ну о спасе́нии на́с гре́шных и от вся́ких бе́д свобожда́й чту́щих святу́ю па́мять твою́, да зове́м ти́:

Ра́дуйся, преподобному́чениче Галактио́не, вели́кий чудотво́рче.

Моли́тва.

Преподо́бне и богоблаже́нне о́тче на́ш Галактио́не, кре́пкое страны́ на́шея огражде́ние, христиа́н правосла́вных побо́рниче и те́плый за на́с гре́шных ко Всеми́лостивому Бо́гу на́шему Иису́су Христу́ и Пречи́стей Ма́тери Его́, Влады́чице на́шей Богоро́дице и Присноде́ве Мари́и моли́твенниче. Умиле́нно мо́лимся тебе́, преподо́бне, не забу́ди на́с гре́шных и недосто́йных ра́б твои́х, но я́ко засту́пник и хода́тай усе́рдный, при́зри ми́лостивно на не́мощь на́шу и испроси́ моли́твами твои́ми у Христа́ Бо́га на́шего, да освяти́т благода́тию Свое́ю души́ и телеса́ на́ша, у́м на́ш просвети́т све́том богопозна́ния, со́весть на́шу от ме́ртвых де́л да очи́стит, от грехо́вных помышле́ний и губи́тельнаго уны́ния да огради́т, и да́рует на́м и́скреннее покая́ние, серде́ц сокруше́ние, сле́зное умиле́ние, воздержа́ние и тре́звость, смиренному́дрие и кро́тость, чистоту́ душе́вную и теле́сную, нищелю́бие и страннолю́бие, и дру́г ко дру́гу нелицеме́рную любо́вь. О всеблаже́нне о́тче Галактио́не, сподо́би на́с ше́ствовати путе́м спасе́ния, да твои́ми моли́твами преблаги́й Христо́с Бо́г на́ш пока́жет на на́с, гре́шных, благода́ть и ми́лость Свою́, и вся́ческих зо́л и бу́дущаго муче́ния на́с свободи́т, и сподо́бит насле́дники бы́ти Ца́рствия Своего́ Небе́снаго сла́вящих и велича́ющих Его́ ку́пно со Безнача́льным Его́ Отце́м и Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.