Конда́к 1.

Избра́нный уго́дниче Бо́жий, земли́ Пско́вския процвете́ние, мона́шескаго жития́ на горе́ Сне́тной первонача́льниче и о́бщаго жития́ на не́й насади́телю, восхваля́ем тя́, Иоаса́фе преподобному́чениче. Пострада́вый ве́ры ра́ди Правосла́вныя и име́яй ко Христу́ ве́лие дерзнове́ние, от вся́ких на́с ско́рбных обстоя́ний и душе́вных неду́гов свободи́, да с ве́рою зове́м ти́:

Ра́дуйся, преподобному́чениче Иоаса́фе, оби́тели Снетого́рския украше́ние.

И́кос 1.

А́нгельския ли́ки возра́довашася, срета́юще в селе́ниих Небе́сных ду́шу твою́, о́тче Иоаса́фе, и учени́к твои́х. Ты́ бо ве́ры ра́ди Правосла́вныя от лихи́х инозе́мцев сме́рть о́гненную во хра́ме вку́пе с бра́тией прия́л еси́ и, на Небеса́ пресели́вся, та́мо Тро́ицу Святу́ю восхваля́еши. Моли́ся о на́с, ча́дех твои́х, по́двигу твоему́ дивя́щихся и с любо́вию зову́щих ти́:

Ра́дуйся, Пресвяты́я Тро́ицы ве́рный испове́дниче; ра́дуйся, ра́дости святы́х соприча́стниче.

Ра́дуйся, о́гнь боже́ственныя ве́ры в се́рдце твое́м стяжа́вый; ра́дуйся, огне́м муче́ний чи́стою же́ртвою пред Го́сподем предста́вый.

Ра́дуйся, сме́рти не убоя́выйся испове́дания ра́ди ве́ры пра́выя; ра́дуйся, от земны́я жи́зни пресели́выйся в Небе́сную.

Ра́дуйся, преподобному́чениче Иоаса́фе, оби́тели Снетого́рския украше́ние.

Конда́к 2.

Ви́дя, я́ко красоты́ и бла́га ми́ра сего́ скоропреходя́ща и тле́нию прича́стна, все́м се́рдцем прилепи́лся еси́, о́тче Иоаса́фе, к Еди́ному Нетле́нному Влады́це, взыва́я Ему́: Аллилу́иа.

И́кос 2.

Ра́зум имы́й благода́тию просвеще́н, избра́л еси́ мона́шеское житие́, да в не́м подвиза́яся, доброде́тели приобря́щеши и уго́ден Бо́гу бу́деши. Сего́ ра́ди тя́ ублажа́ем:

Ра́дуйся, и́го Христо́во, я́ко бла́го, на ся́ подъя́вый; ра́дуйся, ко Христу́ прише́дый и поко́й Его́ обреты́й.

Ра́дуйся, Тро́ицы Святы́я чи́стое жили́ще; ра́дуйся, благода́ти Ея́ простра́нное вмести́лище.

Ра́дуйся, неусы́пныя моли́твы о на́с исто́чниче; ра́дуйся, я́ко жа́ждущыя о́вцы ста́да твоего́ напая́еши.

Ра́дуйся, преподобному́чениче Иоаса́фе, оби́тели Снетого́рския украше́ние.

Конда́к 3.

Си́ла Вы́шняго укрепля́ше тя́, о́тче, егда́ жите́йския молвы́ избе́гнув и безмо́лвное житие́ возлюби́в, прише́л еси́ на го́ру Сне́тную и оби́тель зде́ основа́л еси́, во е́же мно́гим и́ноком, мирску́ю суету́ отри́нувшим, в безмо́лвии воспе́ти Бо́гу: Аллилу́иа.

И́кос 3.

Имы́й в се́рдце твое́м о́гнь любве́ ко Пресвяте́й Богоро́дице, оби́тель в че́сть свята́го Рождества́ Ея́ основа́, те́мже хода́тайству Ея́ живу́щих та́мо вручи́. О се́м ра́дующеся, ублажа́ем тя́:

Ра́дуйся, па́стырю на́ш до́брый; ра́дуйся, об оби́тели твое́й моли́твенниче неусы́пный.

Ра́дуйся, служи́телю Пресвяты́я Богоро́дицы ве́рный; ра́дуйся, чту́щих Ея́ покрови́телю усе́рдный.

Ра́дуйся, гра́да Пско́ва похвало́; ра́дуйся, его́ моли́твенное укрепле́ние.

Ра́дуйся, преподобному́чениче Иоаса́фе, оби́тели Снетого́рския украше́ние.

Конда́к 4.

Бу́рею жите́йских бе́д и напа́стей обурева́еми, мо́лим тя́, о́тче на́ш Иоаса́фе, не забу́ди ча́д, тобо́ю собра́нных, но напра́ви на́с к ти́хому приста́нищу безстра́стия, да в тишине́ серде́чней воспое́м Бо́гу: Аллилу́иа.

И́кос 4.

Слы́шаще и ви́дяще богоуго́дное житие́ твое́, о́тче Иоаса́фе, стеко́шася бра́тия во оби́тель Снетого́рскую и избра́ша тя́ во игу́мена. О спасе́нии си́х попече́ние име́я, о́бщее житие́ вве́л еси́ по уста́ву святы́х оте́ц, да во братолю́бии духо́вная ча́да твоя́ до́бре вку́пе поживу́т на ме́сте се́м, вопию́ще ти́:

Ра́дуйся, воево́до полка́ и́ноческаго; ра́дуйся, о́тче на́ш, незло́бивый и кро́ткий.

Ра́дуйся, в ну́ждах на́ших пред Бо́гом хода́тайствуяй; ра́дуйся, ста́до твое́ моли́твою от де́монских искуше́ний огражда́яй.

Ра́дуйся, тружда́ющимся во оби́тели твое́й благи́й помо́щниче; ра́дуйся, ми́лости с ве́рою у тебе́ прося́щим пода́телю.

Ра́дуйся, преподобному́чениче Иоаса́фе, оби́тели Снетого́рския украше́ние.

Конда́к 5.

Боготе́чной звезде́ уподо́бился еси́ в житии́ твое́м, преподобному́чениче Иоаса́фе, жите́йскою суето́ю не отягоща́яся и путеводя́ пасо́мыя тобо́ю ко блаже́нному безстра́стию, во пло́ти, а́ки беспло́тен, поя́ Бо́гу: Аллилу́иа.

И́кос 5.

Ви́дя вра́г ро́да челове́ча свято́е житие́ твое́, о́тче, восхоте́ погуби́ти тя́: наведе́ бо ра́ти иноплеме́нныя на Оте́чество твое́ и на гра́д Пско́в, вложи́ во умы́ и́х оби́тель твою́ разори́ти и и́ноков уби́ти. Ты́ же, о́тче, не убоя́выйся злы́х ко́зней его́, сме́ртию свое́ю вку́пе со ученики́ твои́ми испове́да Правосла́вную ве́ру. Те́мже досто́йно чту́ще, ублажа́ем тя́ похвалы́ сицевы́ми:

Ра́дуйся, пра́вды ра́ди Христо́вы от лати́н убие́нный; ра́дуйся, му́жественно сме́рть претерпе́вый.

Ра́дуйся, преподо́бных и му́чеников похвало́; ра́дуйся, немо́лчная испове́дников сла́во.

Ра́дуйся, зверонра́вия обличи́телю; ра́дуйся, малоду́шием коле́блемых ве́рный укрепи́телю.

Ра́дуйся, преподобному́чениче Иоаса́фе, оби́тели Снетого́рския украше́ние.

Конда́к 6.

Пропове́дник Правосла́вныя ве́ры житие́м твои́м яви́лся еси́, о́тче, проти́вныя Ева́нгелию и Це́ркви уче́ния отрица́я, и страда́нием И́стины ра́ди ра́дость ве́чную насле́довал еси́, вопия́ Христу́ Бо́гу: Аллилу́иа.

И́кос 6.

Возсия́л еси́, я́ко свеща́ на све́щнице, преподобному́чениче, боголюбе́зным житие́м и испове́дничеством твои́м. Те́мже и о́вцы па́жити твоея́ укрепля́л еси́ не боя́тися муче́ний вре́менных и сме́рти теле́сныя, да ве́чную жи́знь со Христо́м улуча́т. С ни́ми же и мы́, ча́да твоя́, вопие́м ти́:

Ра́дуйся, вре́менным огне́м блаже́нство ве́чное стяжа́вый; ра́дуйся, от запале́ния страсте́й на́с избавля́яй.

Ра́дуйся, от отча́яния и уны́ния ча́д твои́х изыма́яй; ра́дуйся, немощны́х от мучи́тельства страсте́й свобожда́яй.

Ра́дуйся, му́ченическим по́двигом твои́м гра́д Пско́в освяти́вый; ра́дуйся, бла́гость Христо́ву к на́м приклоня́яй.

Ра́дуйся, преподобному́чениче Иоаса́фе, оби́тели Снетого́рския украше́ние.

Конда́к 7.

Хотя́ще помраче́ннии лати́няне зе́млю Пско́вскую разори́ти, я́ко во́лцы хи́щнии нападо́ша на святы́я оби́тели, вне́ сте́н гра́да кро́тким све́том жития́ мона́шескаго сия́вшии, но све́та и́х погаси́ти не возмого́ша. Возсия́ху бо насе́льницы и́х по убие́нии свое́м в Небе́сных черто́зех у Престо́ла Спа́сова зову́ще Ему́: Аллилу́иа.

И́кос 7.

Но́ваго и пресла́внаго засту́пника стяжа́ тя́ земля́ Пско́вская, о́тче на́ш Иоаса́фе, хода́тайствуеши бо при́сно у Престо́ла Вседержи́телева за Оте́чество на́ше и на́с, скорбьми́ обурева́емых и тесно́тами в уны́ние погружа́емых, оба́че на моли́твы твоя́ наде́ющихся и со упова́нием тебе́ зову́щих:

Ра́дуйся, о́блаче благода́ти, во искуше́ниях на́с защища́яй; ра́дуйся, дре́во ра́йское, се́нию моли́тв на́с покрыва́яй.

Ра́дуйся, сто́лпе о́гненный, пу́ть к обетова́нному Небе́сному Оте́честву на́м указу́яй; ра́дуйся, от разсе́яния и ле́ности на́с воздвиза́яй.

Ра́дуйся, чту́щим па́мять твою́ покрови́телю до́брый; ра́дуйся, о приходя́щих во оби́тель твою́ моли́твенниче усе́рдный;

Ра́дуйся, преподобному́чениче Иоаса́фе, оби́тели Снетого́рския украше́ние.

Конда́к 8.

Стра́нницы и прише́льцы есмы́ в земно́м житии́, иму́ще тя́ помо́щника и путеводи́теля в се́й приско́рбной юдо́ли; мо́лим ти́ ся́, о́тче, помози́ на́м тяготы́ благоду́шно нести́ и в за́поведех Христо́вых научи́ на́с ходи́ти, да, обре́тше душе́вный поко́й и спасе́ние, воспое́м Христу́ Бо́гу: Аллилу́иа.

И́кос 8.

Ве́сь испо́лнен бы́в боже́ственныя любве́, предстои́ши ны́не в ли́це святы́х пред Престо́лом Вседержи́телевым, моля́ся за зе́млю Ру́сскую и за ча́д ея́, да от де́л мра́чных покая́нием возста́нем и во благочести́вей ве́ре Оте́ческой ве́рны пребу́дем, в ра́дости духо́вней зову́ще ти́:

Ра́дуйся, спасе́ния на́шего ве́рный помо́щниче; ра́дуйся, о гресе́х свои́х сле́зы пролива́ющих ко Го́споду сомоли́твенниче.

Ра́дуйся, в нераде́нии и ле́ности живу́щих вразуми́телю; ра́дуйся, не́мощей на́ших душе́вных немздоприе́мный цели́телю.

Ра́дуйся, оби́тели твоея́ стра́же неусы́пный; ра́дуйся, о благоче́стно живу́щих в не́й моли́твенниче усе́рдный.

Ра́дуйся, преподобному́чениче Иоаса́фе, оби́тели Снетого́рския украше́ние.

Конда́к 9.

Вси́ ве́рнии, во оби́тель твою́ стека́ющиися и па́мять твою́ усе́рдно почита́ющии, сла́вим честна́я страда́ния твоя́, преподобному́чениче, и мо́лимся приле́жно, да хода́тайством твои́м не лиши́т и на́с Небе́сный Влады́ка ми́лости Своея́, во е́же пе́ти со святы́ми на Небесе́х: Аллилу́иа.

И́кос 9.

Вети́йство челове́ческое не возмо́жет изрещи́ сла́ву твою́, о́тче, ю́же стяжа́л еси́ от подвигополо́жника Христа́ на Небесе́х, и́ноцы бо и мирсти́и, ко святы́м моще́м твои́м притека́ющии и усе́рдно по́мощи у тебе́ прося́щии, утеше́ние получа́ем, на си́лу же моли́тв твои́х упова́юще, с любо́вию прино́сим ти́ хвале́ния такова́я:

Ра́дуйся, со́бранныя тобо́ю о́вцы духо́вныя при́сно назира́яй; ра́дуйся, жезло́м па́стырским от ни́х вся́ враги́ ви́димыя и неви́димыя отгоня́яй.

Ра́дуйся, и́ноком скорбя́щим помо́щниче и уте́шителю; ра́дуйся, в по́двизех до́брых и́х укрепи́телю.

Ра́дуйся, на моли́тву на́с воздвиза́яй; ра́дуйся, сла́дость ея́ па́че земны́х ра́достей люби́ти на́с науча́яй.

Ра́дуйся, преподобному́чениче Иоаса́фе, оби́тели Снетого́рской украше́ние.

Конда́к 10.

Спасе́ние и вене́ц му́ченический в Небе́сных оби́телех улучи́в, о́тче на́ш благосе́рдный, на́с свои́ми моли́твами не оставля́еши, да кро́тости Христо́ве научи́вшеся, ле́гкий Его́ яре́м понесе́м во благоду́шии, вопию́ще: Аллилу́иа.

И́кос 10.

Стена́ кре́пкая от де́монских искуше́ний бу́ди, о́тче, и́ноческому чи́ну и все́м, к тебе́ притека́ющим, да и в земно́м житии́, и егда́ от у́з пло́ти на́м отреша́тися, ми́лости от Христа́ сподо́бимся моли́твами твои́ми, вопию́ще ти́:

Ра́дуйся, дости́гнувый о Го́споде ра́дования; ра́дуйся, к ра́дости духо́вней призыва́яй ве́рныя.

Ра́дуйся, вене́ц безсме́ртныя жи́зни от руку́ Вседержи́теля прия́вый; ра́дуйся, всесве́тлое Ца́рство Христо́во насле́довавый.

Ра́дуйся, немощны́х ду́ш укрепле́ние; ра́дуйся, оте́чества святы́я О́льги украше́ние.

Ра́дуйся, преподобному́чениче Иоаса́фе, оби́тели Снетого́рския украше́ние.

Конда́к 11.

Пе́ние всеумиле́нное, от любве́ и усе́рдия на́шего тебе́ приноси́мое, приими́, о́тче на́ш Иоаса́фе, и приклони́ся оте́чески к проше́нию на́шему, да не отлучи́мся тебе́ зде́ и та́мо, в Небе́снем Ца́рствии, и да сподо́бимся вку́пе с тобо́ю пе́ти: Аллилу́иа.

И́кос 11.

Светоза́рная звезда́ в нощи́ грехо́вней блужда́ющым бу́ди, преподобному́чениче, да све́том моли́тв твои́х во мра́це уны́ния су́щии просветя́тся, па́дшии возста́нут, и тебе́ я́ко споспе́шнику спасе́ния и́х возопию́т:

Ра́дуйся, к тебе́ взыва́ющих ско́рое услы́шание; ра́дуйся, серде́ц мяту́щихся кро́ткое успокое́ние.

Ра́дуйся, не́мощей на́ших ми́лостивый цели́телю; ра́дуйся, разсла́бленныя во́ли укрепи́телю.

Ра́дуйся, уклоня́ющихся от пра́выя ве́ры житие́м твои́м обличи́телю; ра́дуйся, о ми́ре Оте́чества на́шего пред Го́сподем предста́телю.

Ра́дуйся, преподобному́чениче Иоаса́фе, оби́тели Снетого́рския украше́ние.

Конда́к 12.

Благода́тию, от Бо́га ти́ да́нною, приведи́ на́с, о́тче Иоаса́фе, к ти́хому и немяте́жному приста́нищу Небе́снаго Оте́чества, да безбе́дно преплы́вше жития́ бу́рную пучи́ну, воспое́м Творцу́ на́шему: Аллилу́иа.

И́кос 12.

Пою́ще ди́внаго во святы́х Бо́га, и тебе́, о́тче на́ш Иоаса́фе, прославля́юще, и́нокини возрожде́нныя оби́тели твоея́ ми́лостивое твое́ ко все́м заступле́ние призыва́ют и вопию́т ти́:

Ра́дуйся, игу́мене на́ш ми́лостивый и благосе́рдный; ра́дуйся, во исхо́де ду́ш все́м помо́щниче благонаде́жный.

Ра́дуйся, в ми́ре живу́щим в де́лех благи́х споспе́шниче; ра́дуйся, в мона́шестве подвиза́ющимся ско́рбных наведе́ние избавле́ние.

Ра́дуйся, к Богоро́дице моли́твенниче на́ш неусы́пный; ра́дуйся, спасе́ния на́шего предста́телю всеусе́рдный.

Ра́дуйся, преподобному́чениче Иоаса́фе, оби́тели Снетого́рския украше́ние.

Конда́к 13.

О преподобному́чениче о́тче на́ш Иоаса́фе, вонми́ ма́лому моле́нию сему́, смире́нно тебе́ приноси́мому, и умоли́ Ми́лостиваго Бо́га, да отпу́стит на́м вся́ прегреше́ния, и да оты́дут от на́с раздо́ры и нестрое́ния, да в любви́ и единомы́слии воспое́м Еди́ному в Тро́ице Творцу́: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгельския ли́ки возра́довашася, срета́юще в селе́ниих Небе́сных ду́шу твою́, о́тче Иоаса́фе, и учени́к твои́х. Ты́ бо ве́ры ра́ди Правосла́вныя от лихи́х инозе́мцев сме́рть о́гненную во хра́ме вку́пе с бра́тией прия́л еси́ и, на Небеса́ пресели́вся, та́мо Тро́ицу Святу́ю восхваля́еши. Моли́ся о на́с, ча́дех твои́х, по́двигу твоему́ дивя́щихся и с любо́вию зову́щих ти́:

Ра́дуйся, Пресвяты́я Тро́ицы ве́рный испове́дниче; ра́дуйся, ра́дости святы́х соприча́стниче.

Ра́дуйся, о́гнь боже́ственныя ве́ры в се́рдце твое́м стяжа́вый; ра́дуйся, огне́м муче́ний чи́стою же́ртвою пред Го́сподем предста́вый.

Ра́дуйся, сме́рти не убоя́выйся испове́дания ра́ди ве́ры пра́выя; ра́дуйся, от земны́я жи́зни пресели́выйся в Небе́сную.

Ра́дуйся, преподобному́чениче Иоаса́фе, оби́тели Снетого́рския украше́ние.

Конда́к 1.

Избра́нный уго́дниче Бо́жий, земли́ Пско́вския процвете́ние, мона́шескаго жития́ на горе́ Сне́тной первонача́льниче и о́бщаго жития́ на не́й насади́телю, восхваля́ем тя́, Иоаса́фе преподобному́чениче. Пострада́вый ве́ры ра́ди Правосла́вныя и име́яй ко Христу́ ве́лие дерзнове́ние, от вся́ких на́с ско́рбных обстоя́ний и душе́вных неду́гов свободи́, да с ве́рою зове́м ти́:

Ра́дуйся, преподобному́чениче Иоаса́фе, оби́тели Снетого́рския украше́ние.

Моли́тва.

О свяще́нная главо́, преподобному́чениче о́тче на́ш Иоаса́фе, земны́й А́нгеле и Небе́сный челове́че, изве́стное воздержа́ния пра́вило, одушевле́нный терпе́ния сто́лпе, му́ченическою кончи́ною житие́ твое́ увенча́вый, услы́ши ны́не на́с, тебе́ усе́рдно моля́щихся, и яви́ на́м, смире́нным и гре́шным, любо́вь оте́ческую и многомо́щное твое́ заступле́ние.

Испроси́ моли́твами твои́ми у Христа́ Бо́га вся́, я́же на по́льзу душа́м и телесе́м на́шим: ве́ру пра́ву, наде́жду спасе́ния несумне́нну, любо́вь нелицеме́рну, во искуше́ниих му́жество, в моли́твах постоя́нство, душа́м и телесе́м здра́вие, ми́р во дне́х на́ших и благослове́ние на вся́ блага́я дела́ и начина́ния на́ша, да не во зло́ обрати́м да́ры Бо́жии, но во сла́ву и́мене Его́ Свята́го и в прославле́ние твоего́ о на́с хода́тайства.

Не забу́ди, о́тче, и оби́тель твою́ святу́ю, тобо́ю созда́нную, и соблюди́ ю́ и все́х, живу́щих и подвиза́ющихся в не́й, от искуше́ний диа́вольских и вся́каго зла́.

Приходя́щим же и моля́щимся тебе́ с ве́рою, бу́ди помо́щник и хода́тай, избавля́я от вся́ких бе́д и скорбе́й.

Моли́, о́тче на́ш, Ми́лостиваго Бо́га, да отпу́стит на́м прегреше́ния и сподо́бит на́с наслажда́тися ра́дости ве́чныя ку́пно с тобо́ю и все́ми святы́ми во ве́ки веко́в. Ами́нь.